1-2. Fakamatalaʻi ʻa e founga ʻe hoko nai ai ʻa e ngaahi tefitoʻi moʻoni Fakatohitapú ʻo mahuʻingamālie ange kiate kitautolu ʻi he liliu hotau tuʻungá.

 ʻI HE ʻaho mali ʻo ha ongo meʻa, ko e tangata mali talavoú mo ʻene taʻahine mali hoihoifuá ʻokú na fanongo lelei ki ha malanga makatuʻunga ʻi he Tohi Tapú fekauʻaki mo e nofo malí. Ko e ngaahi tefitoʻi moʻoni ʻoku lāulea ki ai ʻi he malangá ʻoku ʻikai foʻou kiate kinaua. Ka mei he ʻaho ko ení ʻo faai atu, ko e fakamatala ko ení ʻe toe mahuʻingamālie ange kiate kinaua. Ko e hā hono ʻuhingá? Koeʻuhí te na ngāueʻaki ia ko ha ongo meʻa mali.

² ʻOku meimei tatau pē mo e taimi ʻoku hoko ai ha ongo meʻa Kalisitiane ko ha ongo mātuʻa. ʻI he faai mai ʻa e ngaahi taʻú, ʻokú na fanongo nai ki ha ngaahi malanga fekauʻaki mo hono ʻohake ʻa e fānaú. Ka ʻi he taimi ní ko e ngaahi tefitoʻi moʻoni ko iá ʻe toe mahuʻingamālie ange kiate kinaua. ʻOku teu ke na maʻu ha kiʻi tama ke na ʻohake. He fatongia fakaʻofoʻofa ē ko ia! Ko e moʻoni, ko e ngaahi tuʻunga foʻoú ʻe lava ke ne liliu ʻetau vakai ki he ngaahi tefitoʻi moʻoni Fakatohitapu anga-mahení. Ko e ʻuhinga eni ʻe taha ʻoku lau ai ʻe he kau lotu ʻa Sihová ʻa e Folofolá, ʻo hangē ko ia naʻe tala ki he ngaahi tuʻi ʻo ʻIsilelí ke nau faí, pea fakalaulauloto ki ai “ʻi he ngaahi ʻaho kotoa” ʻo ʻenau moʻuí.​—Teu. 17:19.

3. Ko e hā te tau lāulea ki ai ʻi he kupu ko ení?

³ Ngaahi mātuʻa, ʻoku mou maʻu ʻa e taha ʻo e ngaahi monū lahi taha ʻe lava ke maʻu ʻe ha Kalisitiane, ʻa ia, ko hono akoʻi hoʻomou fānaú fekauʻaki mo Sihova. Ka ʻoku fiemaʻu ke mou fai ʻa e meʻa lahi ange ʻi hono ʻoatu pē ha fakamatala fekauʻaki mo hotau ʻOtuá. ʻOku mou loto ke tokoniʻi hoʻomou fānaú ke ʻofa lahi kiate ia. Ko e hā ʻe lava ke mou fai ke uhuʻi ai ʻa e ʻofa kia Sihová ki hoʻomou fānaú? ʻI he kupu ko ení, te tau lāulea ai ki he tefitoʻi moʻoni ʻe fā ʻe lava ke tokoni kiate kimoutolu ngaahi mātuʻa. (2 Tīm.  3:16) Te tau toe vakai foki ki he founga kuo maʻu ʻaonga ai ʻa e ngaahi mātuʻa Kalisitiane ʻe niʻihi mei hono ngāueʻaki ʻa e akonaki ʻi he Tohi Tapú.

4. Ko e hā ʻa e tefitoʻi moʻoni ʻe taha ʻe lava ke ne tokoniʻi ʻa e ngaahi mātuʻá ke nau uhuʻi ʻa e ʻofa kia Sihová ki he loto ʻenau fānaú? (Sēmisi 1:5)

⁴ Tefitoʻi moʻoni 1: Kumi ki he tataki ʻa Sihová. Kole kia Sihova ke ne ʻoatu ʻa e poto ʻokú ke fiemaʻu ke tokoniʻi ʻaki hoʻo fānaú ke fakatupulekina ʻa e ʻofa kiate iá. (Lau ʻa e Sēmisi 1:5.) Ko ia ʻa e Tokotaha taau lahi taha ke ne ʻoatu ʻa e faleʻí. ʻOku lahi ʻa e ngaahi ʻuhinga ki ai. Fakakaukau ki ha ʻuhinga ʻe ua. ʻUluakí, ko Sihova ʻokú ne maʻu ʻa e taukei lahi taha ko ha mātuʻa. (Saame 36:9) Pea ko e uá, ko e faleʻi fakapotopoto ʻokú ne ʻomaí ʻoku ʻaonga maʻu pē.​—ʻAi. 48:17.

5. (a) Ko e hā ʻoku tokonaki mai ʻe he kautaha ʻa Sihová ke tokoni ki he ngaahi mātuʻá? (e) Hangē ko ia ne hā ʻi he vitioó, ko e hā naʻá ke ako mei he founga naʻe ʻohake ai ʻe Tokoua mo Tuofefine Amorim ʻena fānaú?

⁵ Fakafou ʻi he Folofola ʻa Sihová mo ʻene kautahá, ʻokú ne tokonaki mai ai ʻa e meʻakai fakalaumālie hulu fau makatuʻunga ʻi he Tohi Tapú ʻe lava ke tokoni kiate koe ki hono ʻohake hoʻo fānaú ke nau ʻofa kia Sihova. (Māt. 24:45) Ko e fakatātaá, ʻe lava ke ke maʻu ʻa e faleʻi ʻaonga lahi ʻi he kupu hokohoko “Tokoni ki he Fāmilí,” ʻa ia ʻoku ala maʻu ʻi heʻetau uepisaití. Pehē foki, ʻoku lahi ʻa e ngaahi vitiō ʻi he jw.org fekauʻaki mo e ngaahi fakaʻekeʻeke mo e fanga kiʻi tulama ʻe lava ke tokoni ki he ngaahi mātuʻá ke nau ngāueʻaki ʻa e akonaki ʻa Sihová ʻi heʻenau ʻohake ʻenau fānaú. *​—Pal. 2:4-6.

6. ʻOku anga-fēfē ongoʻi ʻa ha tamai fekauʻaki mo e tataki ʻokú ne maʻu mo hono uaifí mei he kautaha ʻa Sihová?

⁶ Ko e ngaahi mātuʻa tokolahi kuo nau fakahāhā ʻa e houngaʻia ʻi he tokoni kuo tokonaki mai ʻe Sihova fakafou ʻi heʻene kautahá. Ko ha tamai ko Joe ʻokú ne pehē: “Ko hono ʻohake ha fānau ʻe toko tolu ʻi he moʻoní ʻoku ʻikai ko ha fatongia faingofua. ʻOku ou faʻa lotu maʻu pē mo hoku uaifí kia Sihova ke ne tokoniʻi kimaua. Pea ʻi he taimi ʻe niʻihi ʻoku faʻa haʻu taimi tonu maʻu pē ha kupu pe ko ha vitiō ʻo tokoniʻi ai kimaua ke fekuki mo ha tuʻunga naʻá ma fehangahangai mo ia. Ko e kumi ki he tataki ʻa Sihová kuo hoko ia ko ha maea fakahaofi moʻui kiate kimaua.” Ko Joe mo hono uaifí kuó na ʻiloʻi ko e  ngaahi tokonaki ko iá ʻoku tokoni ki heʻena fānaú ke nau ʻunuʻunu ofi kia Sihova.

7. Ko e hā ʻoku mahuʻinga ai ki he ngaahi mātuʻá ke nau tokanga ki he faʻifaʻitakiʻanga ʻoku nau fokotuʻú? (Loma 2:21)

⁷ Tefitoʻi moʻoni 2: Akoʻi fakafou ʻi he faʻifaʻitakiʻangá. Ko e fānaú ʻoku nau siofi ʻenau ngaahi mātuʻá pea faʻa faʻifaʻitaki kiate kinautolu. Ko e moʻoni, ʻoku ʻikai ha mātuʻa ʻe haohaoa. (Loma 3:23) Neongo ia, ko e ngaahi mātuʻa fakapotopotó ʻoku nau fai honau lelei tahá ke fokotuʻu ha faʻifaʻitakiʻanga lelei ki heʻenau fānaú. (Lau ʻa e Loma 2:21.) ʻI he fekauʻaki mo e fānaú naʻe pehē ʻe ha tamai ʻe taha: “ʻOku nau hangē ha konga ulapá ʻoku nau mimisi ʻa e meʻa kotoa pē.” ʻOkú ne toe pehē: “Te nau tala mai kiate kitautolu ʻa e taimi ʻoku ʻikai ke fehoanaki ai ʻetau faʻifaʻitakiʻangá mo e meʻa ʻoku tau feinga ke akoʻi kiate kinautolú.” Ko ia kapau ʻoku tau loto ke ʻofa ʻetau fānaú kia Sihova, ko ʻetau ʻofa kiate iá ʻoku fiemaʻu ke hoko ʻo mālohi mo hā mahino.

8-9. Ko e hā naʻá ke ako mei he fakamatala ʻa Andrew mo Emma?

⁸ ʻOku lahi ʻa e ngaahi founga ʻe lava ke akoʻi ai ʻe he ngaahi mātuʻá ʻenau fānaú ke ʻofa kia Sihova. Fakatokangaʻi ʻa e meʻa ʻoku leaʻaki ʻe ha tokoua taʻu 17 ko Andrew: “Ko ʻeku ongo mātuʻá naʻá na fakamamafaʻi maʻu pē ʻa e mahuʻinga ʻo e lotú. ʻI he pō kotoa, naʻe lotu ʻeku tamaí mo au, neongo kapau naʻá ku ʻosi fai ʻe au ʻeku lotu. ʻOku fakamanatu maʻu mai pē ʻe heʻeku ongo mātuʻá: ‘ʻE lava ke ke talanoa kia Sihova ʻi ha faʻahinga taimi pē ʻokú ke loto ki ai.’ Ko hono fakamamafaʻi ko ia ʻo e lotú naʻe maongo moʻoni kiate au, pea ʻi he taimí ni ʻoku faingofua kiate au ke u lotu kia Sihova pea vakai kiate ia ko ha Tamai ʻofa.” Ngaahi mātuʻa, manatuʻi maʻu pē ʻe lava ke hoko hoʻomou ʻofa kia Sihová ko ha tākiekina lelei ki hoʻomou fānaú.

⁹ Fakakaukau foki ki he faʻifaʻitakiʻanga ʻa Emma. ʻI he taimi naʻe liʻaki ai ʻe heʻene tamaí kinautolú, naʻe lahi ʻa e ngaahi moʻua ke tā ʻe heʻene faʻeé. ʻOku pehē ʻe Emma: “Naʻe ʻi ai ʻa e taimi lahi naʻe fāinga fakapaʻanga ai ʻeku faʻeé, ka naʻá ne talanoa maʻu pē fekauʻaki mo e founga ʻoku tokonaki mo tokangaʻi ai ʻe Sihova ʻene kau sevānití. Naʻe lava ke u sio naʻá ne tui moʻoni ki ai ʻo fakafou ʻi he founga naʻá ne moʻui aí. Naʻe ngāueʻaki ʻe heʻeku faʻeé ʻa e meʻa naʻá ne akoʻi maí.” Ko e hā ʻa e lēsoní? Ko e ngaahi mātuʻá ʻe lava ke nau akoʻi ʻenau fānaú ʻaki ʻenau faʻifaʻitakiʻangá naʻa mo e ʻi he ngaahi tuʻunga faingataʻá.​—Kal. 6:9.

10. Ko e hā ʻa e ngaahi faingamālie naʻe maʻu ʻe he ngaahi mātuʻa ʻIsileli tokolahi ke fetuʻutaki ai mo ʻenau fānaú? (Teutalōnome 6:6, 7)

¹⁰ Tefitoʻi moʻoni 3: Talanoa maʻu pē mo hoʻo fānaú. Naʻe fakahinohino ʻe Sihova ki he kau ʻIsileli ʻo e kuonga muʻá ke akoʻi maʻu pē ʻenau fānaú fekauʻaki mo ia. (Lau ʻa e Teutalōnome 6:6, 7.) Ko e ngaahi mātuʻa ko iá naʻa nau maʻu ʻa e faingamālie lahi ʻi he kotoa ʻo e ʻahó ke talanoa ai mo ʻenau fānaú pea uhuʻi ʻa e ʻofa kia Sihová ki honau lotó. Ko e fakatātaá, ko ha kiʻi tamasiʻi ʻIsileli naʻá ne fakamoleki nai ʻa e taimi lahi ke tokoni ki heʻene tamaí ke tō ʻa e ngoué pe ʻi he utu-taʻú. Ko hono tuofefiné naʻá ne fakamoleki nai ʻa e lahi taha ʻo e ʻahó ʻi he tokoni ki heʻene faʻeé ʻi he tuituí, lālangá mo e ngaahi ngāue fakaʻapi kehe. ʻI he ngāue fakataha ʻa e ngaahi mātuʻá mo e fānaú, naʻe lava ke nau talanoa fekauʻaki mo e ngaahi kaveinga mahuʻinga lahi. Ko e fakatātaá, ʻe lava ke nau lāulea ki he ʻulungaanga ʻo Sihova ko e leleí pea fakakaukau ki he founga naʻá ne tokoniʻi ai ʻa e fāmilí.

11. Ko e hā ʻa e faingamālie ʻe taha ki he ngaahi mātuʻa Kalisitiané ke nau talanoa ai mo ʻenau fānaú?

¹¹ Ko e taimí ni ia kuo kehe ia. ʻI he ngaahi fonua lahi, ko e ngaahi mātuʻá mo e fānaú ʻoku ʻikai lava ke nau fakamoleki ha taimi fakataha ʻi he ʻahó. ʻOku ʻalu nai ʻa e mātuʻá ki he ngāué, pea ko e fānaú ʻoku nau ʻalu nai ki he akó. Ko hono olá, ko e ngaahi mātuʻá kuo pau ke nau  kumi ki ha ngaahi taimi ke lava ʻo nau talanoa ai mo ʻenau fānaú. (ʻEf. 5:15, 16; Fil. 1:10) Ko e faingamālie ʻe taha ko e lotu fakafāmilí. Ko ha tokoua kei siʻi ko Alexander ʻokú ne pehē: “ʻOku fokotuʻutuʻu maʻu pē ʻe heʻeku tamaí ʻa e taimi ki he lotu fakafāmilí, pea ʻoku ʻikai ke ne fakaʻatā ha meʻa ke ne toʻo atu ʻemau taimi fakataha ko ení. Hili ʻa e akó, ʻoku mau talanoa.”

12. Ko e hā ʻoku totonu ke manatuʻi ʻe he ʻuluʻi fāmilí lolotonga ʻa e lotu fakafāmilí?

¹² Kapau ko ha ʻuluʻi fāmili koe, ko e hā ʻe lava ke ke fai ke ʻai ke fakafiefia ʻa e lotu fakafāmilí ki hoʻo fānaú? Fēfē ke ke ako mo hoʻo fānaú ʻi heʻetau tohi foʻou fakaʻofoʻofa ko e Fiefia ʻi he Moʻuí ʻo Taʻengata! Ko e ako ko iá ʻe maʻu ai ha faingamālie lelei ʻaupito ki ha fetalanoaʻaki longomoʻui. ʻOkú ke loto ke fakahaaʻi tauʻatāina atu ʻe hoʻo fānaú ʻenau ngaahi ongoʻí mo e hohaʻá, ko ia ʻoua ʻe ngāueʻaki ʻa e taimi ki he lotu fakafāmilí ke malangaʻi pe tafuluʻi ai kinautolu. Pea feinga ke ʻoua ʻe ʻita kapau ʻoku tala atu ʻe hoʻo fānaú ha fakakaukau ʻoku ʻikai fehoanaki mo e ngaahi tefitoʻi moʻoni Fakatohitapú. ʻI hono kehé, houngaʻia ʻi heʻenau fakahaaʻi faitotonu atu ʻenau ongoʻí, pea fakalototoʻaʻi kinautolu ke nau lea tauʻatāina atu. ʻE lava ke ke toki ʻi ha tuʻunga lelei taha ke tokoni ai ki hoʻo fānaú ʻo kapau ʻokú ke ʻiloʻi moʻoni ʻa e anga ʻenau ongoʻí.

13. Ko e hā ʻa e ngaahi faingamālie kehe ʻoku maʻu ʻe he ngaahi mātuʻá ke tokoniʻi ai ʻenau fānaú ke ʻunuʻunu ofi kia Sihová?

¹³ Ngaahi mātuʻa, kumi ki ha ngaahi faingamālie lolotonga ʻa e ʻahó ke tokoniʻi hoʻo fānaú ke nau ʻunuʻunu ofi kia Sihova. ʻOku ʻikai fiemaʻu ia ke ke tatali ki he taimi ako Tohi Tapú ke akoʻi ai kinautolu fekauʻaki mo hotau ʻOtua ʻofá. Fakatokangaʻi ʻa e meʻa ʻoku leaʻaki ʻe ha faʻē ko Lisa: “Naʻá ma tokoniʻi ʻema fānaú ke nau fakafekauʻaki ʻa Sihova mo e fakatupú. Ko e fakatātaá, ʻi he taimi ʻoku fai ai ʻe heʻemau kulií ha tōʻonga fakaoli ʻo kata ai ʻema fānaú, te ma tala ange ʻa e anga hono fakatātaaʻi heni ko hotau Tokotaha-Fakatupú ʻokú ne anga-fakakata pea ʻokú ne fiefia ʻi he moʻuí ʻo hangē pē ko kitautolú.”

14. Ko e hā ʻoku mahuʻinga ai ki he ngaahi mātuʻá ke nau tokoniʻi ʻenau fānaú ke fili fakapotopoto honau ngaahi kaumeʻá? (Palōveepi 13:20)

¹⁴ Tefitoʻi moʻoni 4: Tokoniʻi hoʻo fānaú ke nau fakatupulekina ʻa e ngaahi kaumeʻa lelei. ʻOku fakamāʻalaʻala mai ʻi he Folofola ʻa e ʻOtuá  ko hotau ngaahi kaumeʻá ʻe lava ke nau tākiekina kitautolu​—ki he lelei pe kovi. (Lau ʻa e Palōveepi 13:20.) Mātuʻa, ʻokú ke ʻiloʻi ʻa e ngaahi kaumeʻa hoʻo fānaú? Kuó ke fetaulaki mo kinautolu pea fakamoleki ha taimi mo kinautolu? Ko e hā ʻe lava ke ke fai ke tokoni ai ki hoʻo fānaú ke nau kaumeʻa mo e faʻahinga ʻoku nau ʻofa kia Sihová? (1 Kol. 15:33) ʻE lava ke ke tokoniʻi kinautolu ke fai ʻa e ngaahi fili fakapotopoto ʻaki hono fakaafeʻi ʻa e faʻahinga ʻoku nau mālohi fakalaumālié ke kau fakataha mo kimoutolu ʻi hoʻomou ngāue fakafāmilí.​—Saame 119:63.

15. Ko e hā ʻe lava ke fai ʻe he ngaahi mātuʻá ke tokoniʻi ʻenau fānaú ke nau fakatupulekina ʻa e ngaahi kaumeʻa lelei?

¹⁵ Fakakaukau ki he hokosia ʻa ha tamai ko Tony. ʻOkú ne fakamatala ki he meʻa naʻá ne fai mo hono uaifí ke tokoniʻi ʻena fānaú ke maʻu ha ngaahi kaumeʻa lelei: “ʻI he faai mai ʻa e ngaahi taʻú, naʻá ku fakaafeʻi mo hoku uaifí ki homau ʻapí ʻa e fanga tokoua mo e fanga tuofāfine ʻi he taʻumotuʻa mo e puipuituʻa kehekehe. Naʻa mau kai fakataha pea mau kau fakataha ʻi heʻemau lotu fakafāmilí. Ko ha founga lelei eni ke maheni ai mo e faʻahinga ʻoku nau ʻofa mo tauhi kia Sihova ʻi he fiefiá. Kuo mau maʻu ʻa e tāpuaki ke nofo fakataha mo e kau ʻovasia sēketi, kau misinale mo e niʻihi kehe. Ko ʻenau ngaahi hokosiá, faivelengá mo e laumālie feilaulauʻi-kitá kuo maongo lahi ia ki heʻema fānaú pea kuo tokoniʻi ai kinautolu ke nau ʻunuʻunu ofi kia Sihova.” Ngaahi mātuʻa, fakapapauʻi ke tokoniʻi hoʻomou fānaú ke nau maʻu ha feohi lelei.

16. Fēfē kapau ʻe tala atu ʻe ha kiʻi tama ʻoku ʻikai ke ne loto ke tauhi kia Sihova?

¹⁶ Fēfē kapau neongo hoʻo fai ho tūkuingatá, ʻoku tala atu ʻe ha taha hoʻo fānaú ʻoku ʻikai ke ne loto ke tauhi kia Sihova? ʻOua te ke fakamulitukuʻaki kuo ʻikai lava ho fatongia ko ha mātuʻá. Kuo ʻomai ʻe Sihova kiate kitautolu kotoa​—kau ai hoʻo tamá​—ʻa e meʻaʻofa ko e tauʻatāina ke filí, ʻa e malava ke fili pe te tau tauhi ki he ʻOtuá pe ʻikai. Kapau kuo fili ʻe hoʻo tamá ke mavahe meia Sihova, ʻoua ʻe siva hoʻo ʻamanaki te ne toe foki mai ʻi ha ʻaho ʻe taha. Manatuʻi ʻa e talanoa fakatātā ki he foha molé. (Luke 15:11-19, 22-24) Ko e talavou ko iá naʻá ne hē mamaʻo mei he ʻalunga ʻo e māʻoniʻoní, ka ʻi he ngataʻangá, naʻá ne toe foki mai. ʻE pehē nai  ʻe ha niʻihi, “Ko ha talanoa fakatātā pē ia. ʻE lava ke hoko moʻoni ia?” ʻIo ʻe lava ke hoko! Ko hono moʻoní, ko e meʻa ia naʻe hokosia ʻe ha talavou ko Elie.

17. ʻOku anga-fēfē hono fakalototoʻaʻi koe ʻe he hokosia ʻa Elie?

¹⁷ ʻOku fakamatala ʻa Elie fekauʻaki mo ʻene ongo mātuʻá: “Naʻá na fai hona lelei tahá ke uhuʻi ʻiate au ha ʻofa kia Sihova mo ʻene Folofolá, ko e Tohi Tapú. Kae kehe, ʻi heʻeku taʻu hongofulu tupú, naʻe kamata ke u angatuʻu.” Naʻe kamata ke moʻui lōua ʻa Elie, pea naʻá ne talitekeʻi ʻa e ngaahi feinga kotoa ʻene ongo mātuʻá ke tokoniʻi fakalaumālie iá. Hili ʻene mavahe mei ʻapí, naʻá ne fai ʻa e ngaahi tōʻonga taʻetaau. Neongo ia, naʻá ne faʻa talanoa ki he Tohi Tapú mo e taha hono ngaahi kaungāmeʻá. ʻOku pehē ʻe Elie: “Ko e lahi ange ʻeku talanoa ki hoku kaungāmeʻá ʻo fekauʻaki mo Sihová, ko e lahi ange ia ʻeku fakakaukau fekauʻaki mo Sihová. Faifai atu pē, ko e ngaahi tenga ʻo e moʻoni Fakatohitapú ʻa ia naʻe nofo taʻengāue pē ʻi hoku lotó​—ʻa e ngaahi tenga naʻe feinga mālohi ʻeku ongo mātuʻá ke toó​—naʻe kamata ia ke tupu.” ʻI he faai atu ʻa e taimí, naʻe foki mai ʻa Elie ki he moʻoní. * Sioloto atu ki he fiefia lahi ʻene ongo mātuʻá koeʻuhi ko ʻena feinga ke akoʻi ia mei heʻene kei siʻí ke ʻofa kia Sihova!​—2 Tīm. 3:14, 15.

18. ʻOku anga-fēfē hoʻo ongoʻi fekauʻaki mo e ngaahi mātuʻa ʻoku nau ngāue mālohi ke akoʻi ʻenau fānaú ke ʻofa kia Sihová?

¹⁸ Ngaahi mātuʻa, kuo tuku atu ha monū fakaofo kiate kimoutolu, ʻa ia, ko hono ʻohake ha toʻutangata foʻou ʻo e kau lotu kia Sihová. (Saame 78:4-6) ʻOku ʻikai ko ha fatongia siʻisiʻi ia, pea ʻoku mau fakaongoongoleleiʻi loto-moʻoni kimoutolu ki hoʻomou ngaahi feinga taʻemālōlō ke tokoniʻi hoʻomou fānaú! Kapau ʻe hokohoko atu hoʻomou fai homou lelei tahá ke tokoniʻi hoʻomou fānaú ke ʻofa kia Sihova pea ʻohake kinautolu ʻi heʻene akonakí mo e ekinakí, ʻe lava ke mou fakapapauʻi ʻe fakahōifuaʻi ai ʻa ʻetau Tamai fakahēvani ʻofá.​—ʻEf. 6:4.