1. Ko e hā ʻa e lēsoni fakafiemālie naʻe akoʻi ʻe Sihova kia ʻĒpalahamé?

 KO HA fetalanoaʻaki ia naʻe ʻikai ʻaupito ke ngalo ʻia ʻĒpalahame. Naʻe tala ʻe he ʻOtuá kia ʻĒpalahame fakafou ʻi ha ʻāngelo te Ne tafiʻi atu ʻa e ongo kolo ko Sōtoma mo Komolá. Naʻe hohaʻatuʻu ʻa e tangata faitōnunga ko iá. Naʻá ne ʻeke: “Te ke tafiʻi moʻoni koā ʻa e māʻoniʻoní fakataha mo e fulikivanú? . . . ʻIkai ʻe fai ʻe he Fakamaau ʻo māmaní kotoa ʻa e meʻa ʻoku totonú?” Naʻe akoʻi anga-kātaki ʻe Sihova ki hono kaumeʻa fakaetangata ʻofeiná ha lēsoni ʻoku ʻaonga mo fakafiemālie kiate kitautolu kotoa: ʻE ʻikai ʻaupito ke fakaʻauha ʻe he ʻOtuá ʻa e kakai māʻoniʻoní.—Sēn. 18:​23-33.

2. Ko e hā ʻokú ne fakapapauʻi mai kiate kitautolu ko e ngaahi fakamaau ʻa Sihová ʻoku māʻoniʻoni mo faimeesi?

² ʻOku anga-fēfē ʻetau fakapapauʻi ko e ngaahi ngāue faifakamaau ʻa Sihová ʻoku māʻoniʻoni mo faimeesi? Koeʻuhí ʻoku tau ʻilo ‘ʻoku sio ʻa Sihova ia ki he loto’ ʻo e kakaí. (1 Sām. 16:7) Ko hono moʻoní, ʻokú ne ʻafioʻi ʻa e “loto ʻo e tangata kotoa pē.” (1 Tuʻi 8:39; 1 Kal. 28:9) Ko ha foʻi moʻoni fakaofo ia. Ko e ngaahi fakamaau ʻa Sihová ʻoku taʻealamakupusi. ʻOku feʻungamālie hono fakamānavaʻi ʻa e ʻapositolo ko Paulá ke ne lea fekauʻaki mo Sihova ko e ʻOtuá: “He taʻemahakulea ē ko ʻene ngaahi fakamāú!”—Loma 11:33.

3-4. Ko e hā nai te tau fifili ki ai ʻi he taimi ʻe niʻihi, pea ko e hā te tau lāulea ki ai ʻi he kupu ko ení? (Sione 5:​28, 29)

³ Neongo ia, te tau maʻu nai ʻi he taimi ʻe niʻihi ha ngaahi fehuʻi meimei tatau mo e ngaahi fehuʻi naʻe ʻeke ʻe ʻĒpalahamé. ʻE aʻu nai ʻo tau fifili: ‘ʻOku ʻi ai koā ha ʻamanaki ki he kahaʻú ki he kakai hangē ko e faʻahinga naʻe fakamāuʻi ʻi Sōtoma mo Komolá? ʻE kau nai ha taha ʻiate kinautolu ʻi he “toetuʻu [ʻa e] taʻemāʻoniʻoní”?’—Ngā. 24:15.

 ⁴ Tau fakamanatu angé ʻetau mahino fekauʻaki mo e toetuʻú. Ki muí ni maí, naʻa tau maʻu ha fakamāʻalaʻala ki heʻetau mahino fekauʻaki mo e “toetuʻu ki he moʻui” pea mo e “toetuʻu ki he fakamaau.” a (Lau ʻa e Sione 5:​28, 29.) Ko e fakamāʻalaʻala ko ení kuo taki atu ia ki ha toe ngaahi fakatonutonu, ʻa ia ʻe lāulea ki ai ʻi he kupu ko ení mo e kupu hono hokó. ʻI he fekauʻaki mo e ngaahi fakamaau māʻoniʻoni ʻa Sihová, te tau ʻuluaki lāulea ki he meʻa ʻoku ʻikai ke tau ʻiloʻí pea te tau toki lāulea leva ki he meʻa ʻoku tau ʻiloʻí.

MEʻA ʻOKU ʻIKAI KE TAU ʻILOʻÍ

5. Ko e hā kuo leaʻaki ʻi heʻetau ʻū tohi ʻi he kuohilí fekauʻaki mo e faʻahinga naʻe fakaʻauha ʻi Sōtoma mo Komolá?

⁵ ʻI he kuohilí, kuo lāulea ʻetau ʻū tohí ki he fehuʻi fekauʻaki mo e meʻa ʻoku hoko ki he faʻahinga ʻoku fakamāuʻi ʻe Sihova ko e kau taʻemāʻoniʻoní. Kuo tau leaʻaki ko e faʻahinga peheé hangē ko ia ʻi Sōtoma mo Komolá, ʻoku ʻikai haʻanau ʻamanaki ki ha toetuʻu ʻi he kahaʻú. Ka ʻi he hili ʻa e lotu mo e ako lahi ange kuo malanga hake ʻa e fehuʻi, ʻE lava moʻoni ke tau leaʻaki papau ia?

6. Ko e hā ʻa e fakatātā ʻe niʻihi ʻo e ngaahi fakamaau ʻa Sihova ki he kakai taʻemāʻoniʻoní, pea ko e hā ʻoku ʻikai ke tau ʻiloʻí?

⁶ Fakakaukau ki ha ngaahi fakatātā ʻe niʻihi mei he Tohi Tapú. ʻOku lahi ʻa e ngaahi talanoa Fakatohitapu ʻoku fakamatala ai ki he ngaahi fakamaau ʻa Sihova ki he kakai taʻemāʻoniʻoní, hangē ko e tokolahi taʻefaʻalaua naʻa nau mate ʻi he Lōmakí pe ko e ngaahi puleʻanga ʻe fitu ʻi he Fonua ʻo e Talaʻofá ʻa ia naʻe tuʻutuʻuni ʻe Sihova ki hono kakaí ke tuku atu ki he fakaʻauhá pe ko e kau sōtia ʻAsīlia ʻe toko 185,000 naʻe tāmateʻi ʻe ha ʻāngelo ʻa Sihova ʻi ha pō pē ʻe taha. (Sēn. 7:23; Teu. 7:​2, 3; ʻAi. 37:​36, 37) ʻI he ngaahi tuʻunga ko ení, ʻoku ʻomai ʻe he Tohi Tapú ha fakamatala feʻunga ke fakapapauʻiʻaki naʻe tauteaʻi ʻe Sihova ʻa e faʻahinga kotoa ko iá ke fakaʻauha taʻengata, ʻo ʻikai ha ʻamanaki ki ha toetuʻu? ʻIkai, ʻoku ʻikai ke pehē. Ko e hā ʻoku lava ai ke tau leaʻaki iá?

7. Ko e hā ʻoku ʻikai ke tau ʻiloʻi fekauʻaki mo e kakai naʻe fakaʻauha ʻi he Lōmakí pe ʻi hono ikunaʻi ʻo Kēnaní? (Sio foki ki he fakatātā .)

⁷ ʻOku ʻikai ke tau ʻiloʻi ʻa e founga naʻe fakamāuʻi ai ʻe Sihova ʻa e tokotaha taki taha; pea ʻoku ʻikai ke tau ʻiloʻi pe naʻe maʻu ʻe he faʻahinga naʻe tāmateʻí ha faingamālie ke ako fekauʻaki mo Sihova pea fakatomala. ʻI he fekauʻaki mo e taimi ʻo e Lōmakí, ʻoku pehē ʻe he Tohi Tapú ko Noá “ko ha tokotaha malangaʻi ʻo e māʻoniʻoní.” (2 Pita 2:5) Ka ʻoku ʻikai ke tala mai ia ai ko e lolotonga ʻene langa ʻa e fuʻu ʻaʻaké, naʻá ne toe feinga ke aʻu ki he tokotaha kotoa ʻi he māmaní ʻa ia te nau fehangahangai mo e fakaʻauha ʻi he Lōmakí. ʻI he tuʻunga meimei tatau, ʻi he meʻa fekauʻaki mo e ngaahi puleʻanga Kēnaní, ʻoku ʻikai ke tau ʻiloʻi pe naʻe maʻu ʻe he kakai fulikivanu kotoa ko iá ha faingamālie ke ako fekauʻaki mo Sihova pea liliu honau ngaahi ʻalungá.

8. Ko e hā ʻoku ʻikai ke tau ʻiloʻi fekauʻaki mo e kakai ʻo Sōtoma mo Komolá?

⁸ Fēfē ʻa e kakai ʻo Sōtoma mo Komolá? Ko ha tangata māʻoniʻoni ko hono hingoá ko Lote, naʻá ne nofo ʻi honau lotolotongá. Ka ʻoku tau ʻiloʻi pe naʻe malanga ʻa Lote kiate kinautolu kotoa? ʻIkai. Ko hono moʻoní naʻa nau fulikivanu, ka naʻa nau ʻilo ʻa e leleí mo e koví? Manatuʻi naʻe feinga ha kau tangata ʻi he kolo ko iá ke tohotohoʻi ʻa e ongo fakaafe ʻa Loté. ʻOku pehē ʻe he Tohi Tapú ko e kakai tangata “mei he tamasiʻi ki he vaivai.” (Sēn. 19:4; 2 Pita 2:7) ʻOku tau ʻiloʻi moʻoni ko e ʻOtua faimeesi ko Sihová naʻá ne fakahalaiaʻi ʻa e tokotaha taki taha ki he mate ʻo ʻikai ha ʻamanaki ki ha toetuʻu? Naʻe fakapapauʻi ʻe Sihova kia ʻĒpalahame naʻe ʻikai ke aʻu ʻo toko hongofulu ʻa e kau tangata māʻoniʻoni ʻi he kolo ko iá. (Sēn. 18:32) Ko ia naʻa nau taʻemāʻoniʻoni, pea naʻe totonu pē hono  fakaʻauha kinautolu ʻe Sihova koeʻuhí ko ʻenau tōʻongá. ʻE lava leva ke tau leaʻaki papau heʻikai ha taha ʻo kinautolu ʻe fokotuʻu mai ʻi he “toetuʻu [ʻa e] taʻemāʻoniʻoní”? ʻIkai, ʻoku ʻikai lava ke tau leaʻaki ia!

9. Ko e hā ʻoku ʻikai ke tau ʻiloʻi fekauʻaki mo Solomoné?

⁹ ʻI he tafaʻaki ʻe tahá, ʻoku tau toe lau foki ʻi he Tohi Tapú fekauʻaki mo e kakai māʻoniʻoni naʻa nau hoko ʻo taʻemāʻoniʻoni. Ko e fakatātā ʻe taha ko Tuʻi Solomone. Naʻe akoʻi lelei ia ʻi he ngaahi founga ʻa e ʻOtuá pea naʻe tāpuakiʻi lahi ia ʻe Sihova; neongo ia, naʻá ne tafoki ki mui ai ʻo lotu ki he ngaahi ʻotua loí. Ko ʻene ngaahi angahalá naʻe fakatupu houhau kia Sihova pea naʻe fuesia ʻe he puleʻanga ʻIsilelí hono ngaahi nunuʻá ʻi he laui senituli. Ko e moʻoni, ʻoku pehē ʻe he Folofolá “naʻe toka ʻa Solomone ʻo mālōlō fakataha mo ʻene fanga kuí,” ʻo kau ai mo e kau tangata faitōnunga hangē ko Tuʻi Tēvitá. (1 Tuʻi 11:​5-9, 43; 2 Tuʻi 23:13) Ka ko e founga naʻe tanu ai iá ko ha fakapapauʻiʻanga ia te ne toetuʻu? ʻOku ʻikai lave ki ai ʻa e Tohi Tapú. Neongo ia, ʻe fakaʻuhinga nai ʻa e niʻihi ʻo pehē “ko e tokotaha kuo maté kuo ʻatā ia mei heʻene angahalá.” (Loma 6:7) Ko e moʻoni ia, ka ʻoku ʻikai ke ʻuhinga ʻení ko e faʻahinga kotoa kuo nau maté te nau toetuʻu, ʻo hangē ia kuo nau maʻu ʻa e totonu ke toe moʻui mai. Ko e toetuʻú ko e meʻaʻofa ia mei ha ʻOtua ʻofa. ʻOkú ne foaki ia ki he faʻahinga ʻokú ne loto ke nau maʻu ʻa e faingamālie ke tauhi kiate ia ʻo taʻengata. (Siope 14:​13, 14; Sione 6:44) ʻE maʻu ʻe Solomone ha meʻaʻofa pehē? Ko Sihova ʻokú ne ʻiloʻi ʻa e talí; ʻoku ʻikai ke tau ʻiloʻi. Ka ko e meʻa ʻoku tau ʻiloʻí, ʻe fai ʻe Sihova ʻa e meʻa ʻoku totonú.

MEʻA ʻOKU TAU ʻILOʻÍ

10. ʻOku anga-fēfē ongoʻi ʻa Sihova fekauʻaki mo hono fakaʻauha ʻa e faʻahinga ʻo e tangatá? (ʻIsikeli 33:11) (Sio foki ki he fakatātaá.)

¹⁰ Lau ʻa e ʻIsikeli 33:11. ʻI heʻene haʻu ki he founga ʻoku fakamāuʻi ai ʻe Sihova ʻa e faʻahinga ʻo e tangatá, ʻokú ne fakahaaʻi anga-ʻofa mai kiate kitautolu ʻa e anga ʻene ongoʻí. Naʻe fakamānavaʻi ʻa e ʻapositolo ko Pitá ke ne fakaongo atu ʻa e meʻa naʻe hiki ʻe he palōfita ko ʻIsikelí, ʻo pehē ko “Sihova . . . ʻoku ʻikai te ne finangalo ke fakaʻauha ha taha.” (2 Pita 3:9) Koeʻuhi ko e moʻoni fakatupu tuipau ko iá, ʻoku tau ʻiloʻi ko Sihová ʻoku ʻikai te ne fakavave ke fakaʻauha taʻengata ʻa e kakaí. ʻOkú ne fonu ʻi he meesi, pea ʻokú ne fakahāhā ʻa e mēsí ʻi ha taimi pē ʻoku feʻungamālie.

11. Ko hai ʻe ʻikai ke toetuʻú, pea ʻoku anga-fēfē ʻetau ʻiloʻi iá?

¹¹ Ko e hā ʻoku tau ʻiloʻi fekauʻaki mo e kakai heʻikai te nau toetuʻú? ʻOku ʻomai ʻe he Tohi Tapú ha ngaahi fakatātā pē ʻe niʻihi. b Naʻe fakahaaʻi ʻe Sīsū ko Siutasi ʻIsikalioté heʻikai te ne toetuʻu. (Mk. 14:21; Sione 17:12) c Naʻe ngāue ʻiloʻilo pau mo loto-lelei ʻa Siutasi ke fakafepaki kia Sihova ko e ʻOtuá pea mo Hono ʻAló. (Mk. 3:29) d ʻI he tuʻunga meimei tatau, naʻe pehē ʻe Sīsū ko e niʻihi ʻo e kau taki lotu naʻa nau fakafepaki kiate iá te nau mate ʻo ʻikai ha ʻamanaki ki ha toetuʻu. (Māt. 23:33) Pea naʻe fakatokanga ʻa e ʻapositolo ko Paulá ko e kau tafoki ʻo fakafepaki ki he moʻoní taʻefakatomalá heʻikai ke nau toetuʻu.—Hep. 6:​4-8; 10:29.

12. Ko e hā ʻoku tau ʻiloʻi fekauʻaki mo e meesi ʻa Sihová? ʻOmai ha fakatātā.

¹² Kae kehe, ko e hā ʻoku tau ʻiloʻi fekauʻaki mo e meesi ʻa Sihová? Kuo anga-fēfē ʻene fakahāhā ʻoku “ʻikai te ne finangalo ke fakaʻauha ha taha”? Fakakaukau ki heʻene faimeesi ki he niʻihi naʻa nau fai ha ngaahi angahala mamafa. Ko Tuʻi Tēvita naʻá ne fai ʻa e ngaahi angahala mamafa, ʻo kau ai ʻa e tono mo e fakapō. Neongo ia, naʻe fakatomala ʻa Tēvita, ko ia naʻe meesi ʻa  Sihova ʻo ne fakamolemoleʻi ia. (2 Sām. 12:​1-13) Ko Tuʻi Manase naʻá ne mātuʻaki fulikivanu ʻi he konga lahi ʻene moʻuí. Kae kehe, naʻa mo e ʻi he tuʻunga mafatukituki ko iá, naʻe tali anga-lelei ʻe Sihova ʻa e fakatomala ʻa e tangata ko iá pea maʻu ha makatuʻunga ke fakahāhā ai ʻa e mēsí mo e fakamolemolé. (2 Kal. 33:​9-16) ʻOku fakamanatu mai ʻe he ongo fakatātā ko ení ko Sihova ʻokú ne fakahāhā ʻa e mēsí ʻi ha taimi pē ʻokú ne sio ai ʻoku ʻi ai ha makatuʻunga ke fai pehē. Te ne fokotuʻu hake ʻa e faʻahinga peheé koeʻuhí naʻa nau lāuʻilo naʻa nau fai ʻa e ngaahi angahala fakalilifu pea naʻa nau fakatomala.

13. (a) Ko e hā naʻe faimeesi ai ʻa Sihova ki he kau Ninivé? (e) Ko e hā naʻe leaʻaki ʻe Sīsū ki mui ai fekauʻaki mo e kau Ninivé?

¹³ ʻOku tau ʻilo foki fekauʻaki mo e meesi ʻa Sihova ki he kau Ninivé. Naʻe tala ʻe he ʻOtuá kia Siona: “Ko ʻenau anga-fulikivanú kuo aʻu hake kiate au.” Ka ʻi he taimi naʻa nau fakatomala ai mei heʻenau ngaahi angahalá, naʻe fakamolemoleʻi anga-lelei kinautolu ʻe Sihova. Naʻe lahi mamaʻo ange ʻene faimēsí ʻia Siona. Naʻe ʻita ʻa Siona, pea naʻe pau ke fakamanatu ange ʻe he ʻOtuá kiate ia ko e kau Ninivé naʻe “ʻikai te nau ʻilo ʻa e tonú mo e halá.” (Siona 1:​1, 2; 3:10; 4:​9-11) Ki mui ai, naʻe ngāueʻaki ʻe Sīsū ʻa e fakatātā ko iá ke akoʻi ʻa e fakamaau totonu mo e meesi ʻa Sihová. Naʻe pehē ʻe Sīsū ko e kau Ninive fakatomalá te nau “tuʻu hake ʻi he fakamāú.”—Māt. 12:41.

14. ʻE ʻuhinga ki he hā ʻa e “toetuʻu ki he fakamaau” ki he kau Ninivé?

¹⁴ ʻI he ‘fakamaau’ fē ʻe “tuʻu hake” ai ʻa e kau Ninivé? Naʻe faiako ʻa Sīsū fekauʻaki mo ha “toetuʻu ki he fakamaau” ʻi he kahaʻú. (Sione 5:29) Naʻá ne ʻuhinga ki heʻene Pule Taʻu ʻe Afé, lolotonga ʻa e taimi ʻe toetuʻu fakatouʻosi mai ai “ʻa e māʻoniʻoní mo e taʻemāʻoniʻoní.” (Ngā. 24:15) Ki he kau taʻemāʻoniʻoní, ʻe hoko eni ko ha “toetuʻu ki he fakamaau.” ʻA ia, ko Sihova mo Sīsū te na siofi mo sivisiviʻi ʻenau tōʻongá pea mo e anga ʻenau tali ki he ako fakaʻotuá. Kapau ʻe fakafisi ha tokotaha Ninive naʻe toetuʻu ke kau ki he lotu maʻá, ʻe fakahalaiaʻi ia ʻi hono fakamāuʻí. (ʻAi. 65:20) Ka ko e faʻahinga kotoa ʻoku nau fili ke lotu faitōnunga kia Sihová, te nau hao ʻi honau fakamāuʻí. Te nau maʻu ʻa e ʻamanaki ʻo e moʻui taʻengatá!—Tan. 12:2.

15. (a) Ko e hā ʻoku totonu ai ke tau fakaʻehiʻehi mei he pehē heʻikai ke toe fokotuʻu mai ha taha mei he faʻahinga naʻe fakaʻauha ʻi Sōtoma mo Komolá? (e) ʻE anga-fēfē nai haʻatau mahinoʻi ʻa e ngaahi lea ʻoku hiki ʻi he Sute 7? (Sio ki he puha “ Ko e Hā Naʻe ʻUhinga ki Ai ʻa Suté?”)

¹⁵ ʻI he lea ʻa Sīsū fekauʻaki mo e kakai ʻo  Sōtoma mo Komolá, naʻá ne pehē “ʻi he ʻAho Fakamāú” te nau lelei ange kinautolu ʻi he kakai naʻa nau talitekeʻi ia mo ʻene ngaahi akonakí. (Māt. 10:​14, 15; 11:​23, 24; Luke 10:12) Ko e hā naʻá ne ʻuhinga ki aí? Te tau fakahuʻunga nai naʻe ngāueʻaki ʻe Sīsū ʻa e haipepolī ʻi he tuʻunga ko ení. Ka ʻoku hā ngali ʻoku ʻikai ko e tuʻungá ia, ʻo tatau pē mo e taimi naʻá ne lea ai fekauʻaki mo e kau Ninivé. e ʻI hono kehé, ʻoku hā ngali naʻe ʻuhingaʻi moʻoni ʻe Sīsū ʻa e meʻa naʻá ne leaʻakí. Ko e “ʻAho Fakamāú” naʻá ne lave ki ai ʻi he ongo tuʻungá fakatouʻosi naʻe tatau pē. Hangē ko e kau Ninivé, ko e kakai ʻo Sōtoma mo Komolá naʻa nau fai ʻa e ngaahi meʻa naʻe kovi. Ka ko e kau Ninivé naʻa nau maʻu ha faingamālie ke fakatomala. ʻIkai ko ia pē, manatuʻi ʻa e meʻa naʻe leaʻaki ʻe Sīsū fekauʻaki mo e “toetuʻu ki he fakamaau.” ʻE kau ai ʻa e “faʻahinga naʻa nau fai ʻa e ngaahi meʻa ʻoku fulikivanú.” (Sione 5:29) Ko ia ʻoku hā ngali ʻe ʻi ai pē nai ha ʻamanaki ki he kakai ʻo Sōtoma mo Komolá. ʻOku lava ke pehē ʻe ʻi ai pē ha niʻihi ʻo e kakai ko iá te nau toetuʻu, pea te tau maʻu nai ʻa e faingamālie ke akoʻi kinautolu fekauʻaki mo Sihova pea mo Sīsū Kalaisi!

16. Ko e hā ʻoku tau ʻiloʻi fekauʻaki mo e founga ʻe fili ai ʻe Sihova ʻa e faʻahinga ʻe toetuʻú? (Selemaia 17:10)

¹⁶ Lau ʻa e Selemaia 17:10. ʻOku tokoniʻi kitautolu ʻe he veesi ko iá ke tau fakamāʻopoʻopo ʻa e meʻa ʻoku tau ʻiloʻí: Kuo hoko maʻu pē ʻa Sihova ko e tokotaha ʻokú ne “hakule ʻa e lotó, ʻo sivi ʻa e ngaahi fakakaukau lolotó.” ʻI heʻene haʻu ko ia ki he toetuʻu ʻi he kahaʻú, te ne “ʻoange ki he tokotaha taki taha ʻo fakatatau ki hono ʻalunga,” ʻo hangē ko ia kuó ne fai maʻu peé. Ko Sihova te ne tuʻu maʻu ʻi he taimi ʻoku fiemaʻu aí ka ʻokú ne faimeesi ʻi ha taimi pē ʻe feʻungamālie. Ko ia ʻoku totonu ke ʻoua te tau fakahuʻunga ʻoku ʻikai ke maʻu ʻe ha tokotaha ʻa e ʻamanaki ki he toetuʻú tuku kehe kapau ʻoku tau ʻiloʻi ko e tuʻungá ia!

“ʻE FAI ʻE HE FAKAMAAU ʻO MĀMANÍ KOTOA ʻA E MEʻA ʻOKU TOTONÚ”

17. Ko e hā ʻa e kahaʻu ʻoku fakatatali mai ki he faʻahinga ʻo e tangatá kuo nau maté?

¹⁷ Talu mei he kau ʻa ʻĀtama mo ʻIvi fakataha mo Sētane ʻi he angatuʻu kia Sihova ko e ʻOtuá, kuo mate ʻa e laui piliona ʻo e faʻahinga ʻo e tangatá. Ko e “maté, hotau fili” kuó ne fai ha utu-taʻu  kāfakafa! (1 Kol. 15:26) Ko e hā ʻoku toka mei muʻa ki he kakai kotoa ko iá? Ko ha fika fakangatangata, ko e toko 144,000 ʻo e kau muimui faitōnunga ʻo Kalaisí te nau maʻu ha toetuʻu ke moʻui taʻefaʻamate ʻi hēvani. (Fkh. 14:1) Ko e fuʻu tokolahi ʻo e kau tangata mo e kau fefine faitōnunga naʻa nau ʻofa kia Sihová te nau kau ʻi he “toetuʻu . . . ʻa e māʻoniʻoní,” pea te nau moʻui taʻengata ʻi he māmaní kapau te nau nofoʻaki māʻoniʻoni lolotonga ʻa e Pule Taʻu ʻe Taha Afe ʻa Kalaisí mo e lolotonga ʻa e ʻahiʻahi fakaʻosí. (Tan. 12:13; Hep. 12:1) Pehē foki lolotonga ʻa e Taʻu ʻe Taha Afé, ko e “taʻemāʻoniʻoní”—kau ai ʻa e faʻahinga naʻe ʻikai ʻaupito ke nau tauhi kia Sihova pe naʻa mo e faʻahinga naʻa nau “fai ʻa e ngaahi meʻa ʻoku fulikivanú”—ʻe ʻoange kiate kinautolu ʻa e faingamālie ke liliu honau ngaahi ʻalungá pea hoko ʻo faitōnunga. (Luke 23:​42, 43) Kae kehe, ko e faʻahinga ʻe niʻihi naʻa nau fulikivanu ʻaupito, ʻo mātuʻaki fakapapauʻi ke angatuʻu kia Sihova mo ʻene ngaahi taumuʻá pea kuó ne fili ai ʻe ʻikai ʻaupito ke ʻi ai ha toetuʻu kiate kinautolu.—Luke 12:​4, 5.

18-19. (a) Ko e hā ʻoku lava ai ke tau falala pau ki he ngaahi fakamaau ʻa Sihova ki he faʻahinga kuo nau maté? (ʻAisea 55:​8, 9) (e) Ko e hā te tau lāulea ki ai ʻi he kupu hono hokó?

¹⁸ ʻOku tau maʻu ha ʻuhinga lelei ke falala pau ai ki he ngaahi fakamaau kotoa ʻa Sihová, fakatouʻosi ʻene fakamaau fakahōifuá mo ʻene fakamaau fakahalaiá? ʻIo! Hangē ko ia naʻe mahinoʻi lelei ʻe ʻĒpalahamé, ko Sihova ʻa e “Fakamaau” haohaoa, poto fakaʻaufuli mo faimeesi ʻo e māmaní kotoa. Kuó ne teuʻi hono ʻAló pea tuku kiate ia ʻa e faifakamaau kotoa pē. (Sione 5:22) Fakatouʻosi ʻa e Tamaí mo e ʻAló ʻoku lava ke na sio ki he meʻa ʻoku ʻi he loto ʻo e tangata taki taha. (Māt. 9:4) ʻI he tuʻunga kotoa pē, te na fai ʻa e “meʻa ʻoku totonú”!

¹⁹ Tuku ke tau fakapapauʻi ko Sihova ʻokú ne ʻiloʻi ʻa e lelei tahá. ʻOku tau ʻiloʻi ʻoku ʻikai ke tau taau ke faifakamaau—ka ʻokú ne taau mo ia! (Lau ʻa e ʻAisea 55:​8, 9.) Ko ia ʻoku tau falala pau ʻo tuku ʻa e kotoa ʻo e faifakamāú kiate ia pea mo hono ʻAló, ʻa e Tuʻi ʻokú ne tapua haohaoa mai ʻa e fakamaau totonu mo e faimeesi ʻene Tamaí. (ʻAi. 11:​3, 4) Ko e hā leva ʻe lava ke tau leaʻaki fekauʻaki mo e ngaahi fakamaau fakaʻotua fekauʻaki mo e fuʻu mamahi lahí? Ko e hā ʻoku ʻikai ke tau ʻiloʻí? Pea ko e hā ʻoku tau ʻiloʻí? ʻE tali ʻi he kupu hono hokó ʻa e ongo fehuʻi ko iá.