1-2. Ko e hā ʻa e kehekehe ʻi ha ongo tuʻi, pea ko e hā ʻa e fehuʻi te tau lāulea ki aí?

TAU vakai fakalelei angé ki ha ongo tuʻi ʻi he kuonga muʻá. Ko e taha naʻá ne pule ʻi he puleʻanga matakali ʻe hongofulu ʻo ʻIsilelí; ko e toko taha naʻá ne pule ki he puleʻanga matakali ʻe ua ʻo Siutá. Neongo naʻá na moʻui ʻi ha vahaʻa taimi kehekehe, naʻá na faitatau ʻi he meʻa lahi. Naʻe fakatou angatuʻu ʻa e ongo tuʻí kia Sihova pea fakameleʻi hono kakaí. Naʻá na fakatou halaia ʻi he tauhi ʻaitoli mo e fakapō. Kae kehe, naʻe ʻi ai ha kehekehe ʻi he ongo tangatá ni. Ko e toko taha naʻá ne tuli ki ha ʻalunga fulikivanu ʻo aʻu ki heʻene mate, ka ko e toko taha naʻá ne fakatomala pea naʻe fakamolemoleʻi ʻene ngaahi ngāue fulikivanú. Ko hai kinaua?

² Ko ʻĒhapi, ko e tuʻi ʻo ʻIsilelí pea mo Manase, ko e tuʻi ʻo Siutá. Ko e faikehekehe ʻi he ongo tangatá ni ʻe lava ke akoʻi mai ai kiate kitautolu ha meʻa lahi fekauʻaki mo ha kaveinga mātuʻaki mahuʻinga​—ko e fakatomalá. (Ngā. 17:30; Loma 3:23) Ko e hā ʻa e fakatomala, pea ʻoku anga-fēfē hono fakahāhā? ʻOku fiemaʻu ke tau ʻiloʻi koeʻuhí ʻoku tau loto ke fakamolemoleʻi kitautolu ʻe Sihova ʻi heʻetau faiangahalá. Ke maʻu ʻa e tali ki he fehuʻi ko ení, te tau sivisiviʻi ʻa e moʻui ʻa e ongo tuʻi ko ení pea sio ki he meʻa ʻe lava ke tau ako mei heʻena faʻifaʻitakiʻangá. Te tau lāulea leva ki he meʻa naʻe akoʻi mai ʻe Sīsū fekauʻaki mo e fakatomalá.

3. Ko e faʻahinga tuʻi fēfē ʻa ʻĒhapi?

³ Ko ʻĒhapi ko e tuʻi ia hono fitu ʻo e puleʻanga matakali ʻe hongofulu ʻo ʻIsilelí. Naʻá ne mali mo Sisipeli, ko e ʻofefine ʻo e tuʻi ʻo Saitoní, ko ha puleʻanga koloaʻia ki he fakatokelaú. Ko e mali ko ení kuo pau pē naʻe ʻomai ai ʻa e koloa lahi ki he fonua ʻo ʻIsilelí. Ka naʻe toe lahi ange ai ʻa e maumau ʻi he vahaʻangatae ʻo e puleʻangá mo Sihová. Ko Sisipelí ko ha tokotaha lotu Pēali, pea naʻá ne fakaʻaiʻai ʻa ʻĒhapi ke pouaki ʻa e lotu fakalielia ko iá, ʻa ia  naʻe kau ai ʻa e feʻauaki ʻi he temipalé pea naʻa mo hono feilaulauʻaki ʻa e fānaú. Naʻe ʻikai ha palōfita ʻa Sihova naʻe malu ʻi he pule ʻa Sisipelí. Naʻá ne tāmateʻi ʻa e tokolahi ʻo kinautolu. (1 Tuʻi 18:13) Ko ʻĒhapi “naʻá ne kovi ange ʻi he vakai ʻa Sihová ʻi he kotoa ʻo e faʻahinga naʻe ʻi muʻa ʻiate iá.” (1 Tuʻi 16:30) Naʻe ʻikai puli meia Sihova ʻa e ngaahi tōʻonga ʻa ʻĒhapi mo Sisipelí. Naʻá ne lāuʻilo kakato ki he meʻa naʻá na faí. Neongo ia, ʻi he faimeesi ʻa Sihová, naʻá ne fekauʻi atu ʻa e palōfita ko ʻIlaisiaá ke fakatokanga ki Heʻene kakaí ke liliu ʻenau tōʻongá ki muʻa ke fuʻu tōmui. Ka naʻe fakafisi ʻa ʻĒhapi mo Sisipeli ke fanongo ki ai.

4. Ko e hā ʻa e tautea ʻo ʻĒhapí, pea naʻe anga-fēfē ʻene fakafeangaí?

⁴ Naʻe faai atu pē ʻo ngata ʻa e kātaki ʻa Sihová. Naʻá ne fekau atu ʻa ʻIlaisiā ke tala kia ʻĒhapi mo Sisipeli hona tauteá. Ko hona laine fakafāmilí kotoa ʻe tafiʻi atu. Ko e ngaahi lea ʻa ʻIlaisiaá naʻe oʻo moʻoni kia ʻĒhapi! Ko e fakaʻohovalé, ko e tangata hīkisia ko iá naʻá ne “fakavaivaiʻi ia.”​—1 Tuʻi 21:19-29.

5-6. Ko e hā ʻa e ngaahi fakamoʻoni naʻe ʻikai ke fakatomala moʻoni ʻa ʻĒhapí?

⁵ Neongo naʻe fakavaivaiʻi ʻe ʻĒhapi ʻa ia tonu ʻi he taimi ko iá, ko ʻene tōʻonga ʻi he hili iá naʻe fakahaaʻi ai naʻe ʻikai ke ne fakatomala moʻoni. Naʻe ʻikai ke ne feinga ke toʻo atu ʻa e lotu Pēalí mei hono puleʻangá. Pea naʻe ʻikai ke ne pouaki ʻa e lotu kia Sihová. Naʻe toe fakahaaʻi ʻe ʻĒhapi ʻa e ʻikai ke ne fakatomalá ʻi ha ngaahi founga kehe.

⁶ Ki mui ai, ʻi he taimi naʻe fakaafeʻi ai ʻe ʻĒhapi ʻa e tuʻi lelei ʻo Siuta ko Sihosafaté ke na kau fakataha ʻi hono tauʻi ʻa e kau Sīliá, naʻe fokotuʻu ange ʻe Sihosafate ke na ʻuluaki kumi faleʻi ki ha palōfita ʻa Sihova. ʻI he kamatá, naʻe talitekeʻi ʻe ʻĒhapi ʻa e fakakaukau ko iá, ʻi heʻene pehē: “ʻOku kei toe ha tangata ʻe toko taha ʻa ia ʻe lava ke ta fai ha fehuʻi kia Sihova ʻo fakafou ʻiate ia; ka ʻoku ou fehiʻa ʻiate ia, he ʻoku ʻikai ʻaupito ke ne kikiteʻi ha ngaahi meʻa lelei ʻo fekauʻaki mo au, ko e kovi pē.” Neongo ia, naʻá na kumi faleʻi ki he palōfita ko Maikaiá. Ko hono moʻoní, naʻe tomuʻa tala ʻe he tangata ʻa e ʻOtuá ʻa e ongoongo kovi fekauʻaki mo ʻĒhapi! ʻI he ʻikai fakatomala ʻo kumi ki he fakamolemole ʻa Sihová, naʻe tuku pilīsone ʻe ʻĒhapi fulikivanu ʻa e palōfitá. (1 Tuʻi 22:7-9, 23, 27) Neongo naʻe tuku pilīsone ʻe he tuʻí ʻa e palōfita ʻa Sihová, naʻe ʻikai ke ne taʻofi ai ʻa e kikité mei hono fakahokó. ʻI he tau ko iá, naʻe tāmateʻi ai ʻa ʻĒhapi.​—1 Tuʻi 22:34-38.

7. Naʻe anga-fēfē hono fakamatalaʻi ʻe Sihova ʻa ʻĒhapi hili ʻene maté?

⁷ Hili ʻa e mate ʻa ʻĒhapí, naʻe fakahaaʻi ʻe Sihova ʻa e anga ʻene vakai ki he tangata ko iá. ʻI he foki lelei ʻa Tuʻi Sihosafate ki hono ʻapí, naʻe fekau atu ʻe Sihova ʻa e palōfita ko Sehú ke ne valokiʻi ia ki heʻene kau mo ʻĒhapí. Naʻe pehē ʻe he palōfita ʻa Sihová: “Ko e fulikivanú koā ʻoku totonu ke ke tokoniʻí, pea ko e faʻahinga koā ʻoku fehiʻa kia Sihová ʻoku totonu ke ke ʻofa ki aí?” (2 Kal. 19:1, 2) Fakakaukau angé: Kapau naʻe fakatomala moʻoni ʻa ʻĒhapi, kuo pau pē heʻikai ke fakamatalaʻi ia ʻe he palōfitá ko ha tangata fulikivanu naʻe fehiʻa kia Sihova. ʻOku hā mahino, neongo naʻe fakahāhā ʻe ʻĒhapi ha kiʻi fakaʻiseʻisa, naʻe ʻikai ʻaupito ke ne fakatomala kakato.

8. Ko e hā ʻe lava ke tau ako fekauʻaki mo e fakatomalá mei he faʻifaʻitakiʻanga ʻa ʻĒhapí?

⁸ Ko e hā ʻe lava ke tau ako mei he faʻifaʻitakiʻanga ʻa ʻĒhapí? ʻI he fanongo ʻa ʻĒhapi ki hono tala ange ʻe ʻIlaisiā ʻa e pōpoaki ʻo e fakatamaki ʻe hoko ki hono laine fakafāmilí, ʻi he kamatá naʻá ne fakavaivaiʻi ʻa ia tonu. Ko ha kamata lelei ia. Ka ko ʻene ngaahi tōʻonga ki muí naʻe fakahaaʻi ai naʻe ʻikai ke ne fakatomala mei hono lotó. Ko e fakatomalá leva kuo pau ke kau ki ai ʻa e meʻa lahi ange ʻi ha fakahaaʻi fakataimi pē ʻa e fakaʻiseʻisá. Tau lāulea angé ki ha toe fakatātā ʻe lava ke ne tokoniʻi kitautolu ke mahinoʻi ʻa e meʻa ʻoku kaunga ki he fakatomala moʻoní.

9. Ko e faʻahinga tuʻi fēfē ʻa Manase?

⁹ ʻI ha senituli nai ʻe ua ki mui ai, naʻe hoko ʻa Manase ko e tuʻi ʻo Siutá. ʻOku ngalingali naʻá ne hoko ʻo kovi ange ʻia ʻĒhapi! ʻOku tau lau: “Naʻá ne fai ʻo lahi ʻaupito ʻa e meʻa naʻe kovi ʻi he vakai mai ʻa Sihová, ke fakalotomamahiʻi ai ia.” (2 Kal. 33:1-9) Naʻe fokotuʻu ʻe Manase ʻa e ngaahi ʻōlita ki he ngaahi ʻotua panganí, pea naʻe aʻu ʻo ne fokotuʻu ha ʻīmisi kuo tongi ʻi ha pou ʻakau toputapu​—ʻoku ngalingali ko ha fakaʻilonga ʻo e lotu fehokotaki fakasinó​—ʻi he temipale toputapu ʻo Sihová! Naʻá ne faimana, vavalo mo faifakalouʻakau. Naʻá ne “lilingi foki . . . ʻa e toto taʻehalaia lahi ʻaupito.” Ko ʻene fakapō anga-fakamamahí naʻe kau ai ʻa hono ʻai “hono ngaahi fohá tonu ke nau fou atu ʻi he afi,” ko ha feilaulau ki he ngaahi ʻotua loí.​—2 Tuʻi 21:6, 7, 10, 11, 16.

10. Naʻe anga-fēfē hono akonakiʻi ʻe Sihova ʻa Manasé, pea naʻe anga-fēfē fakafeangai ʻa e tuʻí?

¹⁰ Hangē ko ʻĒhapí, ko Manase naʻá ne tukunoaʻi loto-fefeka ʻa e ngaahi fakatokanga naʻe ʻoange kiate ia ʻe Sihova fakafou ʻi Heʻene kau palōfitá. Faai atu pē, “naʻe ʻomi ai ʻe Sihova [ki Siuta] ʻa e kau ʻeikitau ʻa e tuʻi ʻo ʻAsīliá, pea nau puke ʻa Manase ʻaki ha ngaahi mātaʻu ʻo nau haʻi ia ʻaki ha ongo meʻa-haʻi kopa pea ʻave ia ki Pāpilone.” Naʻa nau tuku pilīsone ai ʻa Manase ʻi he fonua muli ko iá, ʻoku ngalingali naʻá ne fakakaukau fakamātoato ai. Naʻá ne “mātuʻaki fakatōkilaloʻi ai pē ia ʻi he ʻao ʻo e ʻOtua ʻo ʻene fanga kuí.” Naʻe ʻikai ke ngata pē ai. “Naʻá ne kōlenga kia Sihova ko hono ʻOtuá ki ha hōifua.” Ko hono moʻoní, ko Manasé “naʻá ne toutou lotu kiate Ia.” Naʻe liliu ʻa e tangata fulikivanu ko iá. Naʻe kamata ke ne vakai kia Sihova “ko hono ʻOtuá,” pea naʻá ne kīvoi ʻi he lotu kiate iá.​—2 Kal. 33:10-13.

11. Fakatatau ki he 2 Kalonikali 33:15, 16, naʻe anga-fēfē hono fakahāhā ʻe Manase naʻá ne fakatomala moʻoní?

¹¹ ʻI he faai atu ʻa e taimí, naʻe tali ʻe Sihova ʻa e lotu ʻa Manasé. Naʻá ne vakai ki he liliu ʻi he loto ʻo e tangatá, hangē ko ia naʻe fakahaaʻi ʻi heʻene ngaahi lotú. Naʻe ongo kia Sihova ʻa e kōlenga ʻa Manasé peá ne fakafoki ia ki he taloní. Naʻe ngāuekakatoʻaki ʻe Manase ʻa e faingamālié ke fakahāhā ʻa e lahi ʻene fakatomalá. Naʻá ne fai ʻa e meʻa naʻe ʻikai ʻaupito ke fai ʻe ʻĒhapi. Naʻá ne liliu ʻene tōʻongá. Naʻá ne kau longomoʻui ʻi hono fakafepakiʻi ʻa e lotu loí pea pouaki ʻa e lotu moʻoní. (Lau ʻa e 2 Kalonikali 33:15, 16.) Naʻe fiemaʻu moʻoni ki ai ʻa e loto-toʻa mo e tui, he ko Manase naʻá ne tākiekina kovi hono fāmilí, ko ʻene kau houʻeikí mo hono kakaí ʻi he laui hongofuluʻi taʻu. Ka ʻi he taimi ko ení, ʻi he fakaʻosiʻosi ʻa e moʻui ʻa Manasé, naʻá ne feinga ke fakaleleiʻi ʻa e kovi ʻe niʻihi naʻá ne faí. ʻOku ngalingali, naʻá ne hoko ko ha tākiekina lelei ki hono kiʻi mokopuna ko Siosaiá, ʻa ia naʻá ne hoko ko ha tuʻi lelei ʻaupito ki mui ai.​—2 Tuʻi 22:1, 2.

12. Ko e hā ʻe lava ke tau ako fekauʻaki mo e fakatomalá mei he faʻifaʻitakiʻanga ʻa Manasé?

¹² Ko e hā ʻe lava ke tau ako mei he faʻifaʻitakiʻanga ʻa Manasé? Naʻá ne fakatōkilaloʻi ʻa ia tonu,  pea naʻá ne fai ʻa e meʻa lahi ange. Naʻá ne lotu, ʻo kōlenga ki ha meesi. Pea naʻá ne liliu hono ʻalungá. Naʻá ne ngāue mālohi ke fakaleleiʻi ʻa e maumau naʻá ne fakatupungá, peá ne feinga mālohi ke lotu kia Sihova pea tokoniʻi ʻa e niʻihi kehé ke nau fai ʻa e meʻa tatau. ʻOku ʻomai ʻi he faʻifaʻitakiʻanga ʻa Manasé ʻa e ʻamanaki ki he kau faiangahala kovi tahá. ʻOku tau vakai ki he fakamoʻoni mālohi ko Sihová ko e ʻOtua ʻoku “lelei mo mateuteu ke fakamolemole.” (Saame 86:5) ʻOku malava ke fakamolemoleʻi ʻa e faʻahinga ʻoku fakatomala moʻoní.

13. Fakatātaaʻi ha lēsoni mātuʻaki mahuʻinga fekauʻaki mo e fakatomalá.

¹³ Naʻe fai ʻe Manase ʻa e meʻa lahi ange ʻi he ongoʻi fakaʻiseʻisa pē ʻi heʻene ngaahi angahalá. ʻOku akoʻi mai ai ha lēsoni mātuʻaki mahuʻinga fekauʻaki mo e fakatomalá. Fakakaukau ki ha fakatātā: ʻOkú ke ʻalu ki ha fale mā ke fakatau ha keke. Ka ʻi he ʻikai ke ʻoatu ʻe he faifakataú ha keké, ʻokú ne ʻoatu ha fuaʻimoa. Te ke fiemālie ai? ʻIkai ʻaupito! ʻE tokoni nai kapau ʻe tala atu ʻe he faifakataú ko e fuaʻimoá ko e meʻa tefito ia ʻoku ngaohiʻaki ʻa e keké? Ko e tali tatau, ʻikai ʻaupito! ʻI he tuʻunga meimei tatau, ʻoku fiemaʻu ʻe Sihova mei he tokotaha faiangahalá ʻa e fakatomala. Kapau ʻoku ongoʻi fakaʻiseʻisa ʻa e tokotaha faiangahalá ʻi heʻene angahalá, ʻoku lelei ia. Ko ha ongoʻi pehē ko ha meʻa mahuʻinga ia ʻoku kaunga ki he fakatomalá, ka ʻoku ʻikai ko ʻene kakató ia. Ko e hā ʻa e meʻa ʻoku toe fiemaʻú? ʻOku tau ako ʻa e meʻa lahi mei ha talanoa fakatātā fakalotomāfana naʻe lave ki ai ʻa Sīsū.

14. ʻI he talanoa fakatātā ʻa Sīsuú, naʻe anga-fēfē hono fakahāhā ʻe he foha talangataʻá ʻa e ʻuluaki fakaʻilonga ʻo e fakatomalá?

¹⁴ Naʻe fai ʻe Sīsū ha talanoa fakalotomāfana fekauʻaki mo ha foha talangataʻa, ʻoku hiki ʻi he Luke 15:11-32. Ko ha kiʻi talavou naʻá ne angatuʻu ki heʻene tamaí, mavahe mei ʻapi, pea fononga ki ha “fonua mamaʻo.” Naʻá ne moʻui taʻetaau ai mo moʻui fakalusa. Neongo ia, ʻi he hoko mai ʻa e taimi faingataʻá, naʻá ne fakakaukau fakamātoato. Naʻá ne ʻiloʻi naʻe lelei mamaʻo ange ʻene moʻuí ʻi heʻene nofo ʻi he fale ʻo ʻene tamaí. Hangē ko hono fakalea ʻe Sīsuú, ko e kiʻi talavoú naʻe “foki mai ʻene fakakaukau leleí.” Naʻá ne fakapapauʻi ke foki ki ʻapi, pea kole ki he fakamolemole ʻene tamaí. Ko e mōmeniti naʻe ʻiloʻi ai ʻe he fohá ʻene hē mamaʻo atú naʻe mahuʻinga. Ka naʻe feʻunga pē ia? ʻIkai. Naʻe pau ke ne fai ha ngāue!

15. Naʻe anga-fēfē hono fakahaaʻi ʻe he foha mole ʻi he talanoa fakatātā ʻa Sīsuú ʻene fakatomalá?

¹⁵ Naʻe fakahaaʻi ʻe he foha molé ʻa e fakatomala loto-moʻoni ʻi he meʻa naʻá ne faí. Naʻá ne fai ha fononga lōloa ʻo foki ki ʻapi. Pea ʻi heʻene fakaofiofi atu ki heʻene tamaí, naʻá ne pehē: “Kuó u faiangahala ki he langí pea kiate koe. ʻOku ʻikai ke u kei taau ke ui ko ho foha.” (Luke 15:21) Ko e vetehia loto-moʻoni ʻa e kiʻi talavoú naʻe fakahaaʻi ai naʻá ne loto ke fakaleleiʻi hono vahaʻangatae mo Sihová. Naʻá ne toe ʻiloʻi ko ʻene ngaahi tōʻongá naʻe fakamamahiʻi ai ʻene tamaí. Pea naʻá ne mateuteu ke ngāue mālohi ke  toe maʻu ʻa e leleiʻia ʻene tamaí, naʻa mo ʻene loto-lelei ke hoko ko e taha ʻo e kau tangata ngāue totongi ʻene tamaí! (Luke 15:19) Ko e talanoa fakatātā ko ení ʻoku ʻikai ko ha talanoa fakalotomāfana pē. Ko e tefitoʻi moʻoni ʻoku akoʻi mai aí ʻoku totonu ke mahuʻinga ki he kau mātuʻa ʻi he fakatahaʻangá ʻi heʻenau feinga mālohi ke ʻiloʻi pe kuo fakatomala ha kaungātui mei heʻene faihala mafatukitukí.

16. Ko e hā ʻe faingataʻa nai ai ki he kau mātuʻá ke ʻiloʻi pe kuo fakatomala moʻoni ha tokotaha?

¹⁶ ʻOku ʻikai ko ha fatongia faingofua ki he kau mātuʻá ke fakapapauʻi pe ʻoku fakatomala moʻoni ha tokotaha naʻá ne fai ha angahala mamafa. Ko e hā hono ʻuhingá? Ko e kau mātuʻá ʻoku ʻikai lava ke nau sio ki he lotó, ko ia kuo pau ke nau fakafalala ki he fakamoʻoni ʻoku hāmai ki tuʻa ko honau tokouá kuo liliu kakato ʻene vakai ki heʻene angahalá. ʻI he tuʻunga ʻe niʻihi, ʻe fakataha ʻa e kau mātuʻá mo ha taha kuo faiangahala maeʻeeʻa nai pea ʻe ʻikai nai ke nau tuipau ʻokú ne fakatomala moʻoni.

17. (a) Ko e hā ʻa e fakatātā ʻoku fakahaaʻi ai ʻoku ʻikai feʻunga pē ha ongoʻi fakaʻiseʻisa ke fakahāhā ai ʻa e fakatomala moʻoní? (e) Hangē ko ia ʻoku fakamatalaʻi ʻi he 2 Kolinitō 7:11, ko e hā ʻoku ʻamanekina mei ha tokotaha fakatomala moʻoni?

¹⁷ Fakakaukau ki ha fakatātā. Ko ha tokoua ʻokú ne toutou fai ha tono ʻi ha laui taʻu lahi. ʻI he ʻikai kumi ki ha tokoní, ʻokú ne fufū ʻene tōʻonga taʻetāú mei hono uaifí, kaungāmeʻá mo e kau mātuʻá. Faai atu pē, ʻoku fakaeʻa ia. ʻI hono ʻoange ʻa e fakamoʻoní, ʻokú ne fakahaaʻi ʻa e meʻa naʻá ne faí pea naʻa mo ʻene hā ngali mātuʻaki fakaʻiseʻisa. ʻOku feʻunga pē ia? Ko e kau mātuʻa ʻoku nau ngāue ki ha keisi pehē ʻe fiemaʻu moʻoni ke nau sio ki ha meʻa lahi ange ʻi he fakaʻiseʻisá pē. Naʻe ʻikai ko ha fakamāuʻi eni ʻo ha kiʻi tō fakataimi pē ka ko ha ʻalunga fulikivanu ʻi ha laui taʻu. Naʻe ʻikai ke vetehia loto-lelei ʻa e tokotaha faihalá; naʻe fakaeʻa ia. Ko ia ʻe fiemaʻu ki he kau mātuʻá ke nau sio ki ha fakamoʻoni ʻo e liliu moʻoni ʻi he fakakaukau, ongoʻi mo e tōʻonga ʻa e tokotaha faihalá. (Lau ʻa e 2 Kolinitō 7:11.) ʻE fiemaʻu nai ʻa e taimi lahi ke fai ai ʻe he tangatá ʻa e ngaahi liliu ʻoku fiemaʻú. ʻOku ngalingali, ʻe kapusi ia mei he fakatahaʻanga Kalisitiané ʻi ha vahaʻa taimi.​—1 Kol. 5:11-13; 6:9, 10.

18. ʻE lava fēfē ke fakahāhā ʻe ha tokotaha kuo tuʻusi ʻa e fakatomala moʻoní, pea ko e hā hono olá?

¹⁸ Ke fakahaaʻi ʻoku fakatomala moʻoni ha tokotaha kuo tuʻusi, te ne ʻalu maʻu pē ki he fakatahá pea muimui ki he faleʻi ʻa e kau mātuʻá ke maʻu ha taimi-tēpile lelei ʻo e lotu mo e ako. Te ne feinga mālohi foki ke fakaʻehiʻehi mei he ngaahi tuʻunga ʻe iku atu ai ki haʻane faihala. Kapau ʻokú ne ngāue mālohi ke fakaleleiʻi hono vahaʻangatae mo Sihová, ʻe lava ke ne fakapapauʻi ʻe fakamolemoleʻi kakato ia ʻe Sihova pea ʻe toe fakafoki mai ia ʻe he kau mātuʻá ki he fakatahaʻangá. Ko e moʻoni, ʻi he fakafeangai ki ha tokotaha faihala, ko e kau mātuʻá ʻoku nau sivisiviʻi ʻa e keisi taki taha ʻo fakatatau ki hono  tuʻungá pea ʻoku nau fakaʻehiʻehi mei he fakamaau anga-fefeká.

19. Ko e hā ʻoku kaunga ki he fakatomala moʻoní? (ʻIsikeli 33:14-16)

¹⁹ Hangē ko ia kuo tau akó, ko e fakatomala moʻoní ʻoku kaunga ki ai ʻa e meʻa lahi ange ʻi he pehē pē ʻoku tau fakaʻiseʻisa ʻi heʻetau tuli ki ha ʻalunga angahalaʻiá. ʻOku toe kau ki ai ha liliu moʻoni ʻo e ʻatamaí mo e lotó ʻo taki atu ki hono fai ha ngāue pau. ʻOku kau ki heni ʻa hono liʻaki ha ʻalunga hala pea tafoki ʻo toe ʻaʻeva ʻi he founga ʻa Sihová. (Lau ʻa e ʻIsikeli 33:14-16.) ʻOku totonu ko e meʻa tefito ke tokanga ki ai ha tokotaha faiangahala ko hono fakaleleiʻi ʻa e maumau ʻi hono vahaʻangatae mo Sihová.

20-21. ʻE anga-fēfē nai haʻatau tokoniʻi ha tokotaha kuó ne fai ha angahala mamafa?

²⁰ Naʻe fakamatala ʻa Sīsū ki he tafaʻaki mahuʻinga ʻene ngāue fakafaifekaú ʻaki ʻene pehē: “Kuó u haʻu ke ui . . . [ʻa e] kau angahalá ke nau fakatomala.” (Luke 5:32) ʻOku totonu ke pehē foki ʻetau holí. Tau pehē pē ʻoku tau ʻiloʻi kuo fai ʻe hotau kaumeʻa ofí ha angahala mamafa. Ko e hā ʻoku totonu ke tau faí?

²¹ ʻE fakatupu maumau pē ki hotau kaumeʻá kapau te tau feinga ke ʻufiʻufi ʻene angahalá. Heʻikai ʻaupito pē lavameʻa ʻa e ngaahi feinga ko iá koeʻuhí ʻoku ʻafioʻi ia ʻe Sihova. (Pal. 5:21, 22; 28:13) ʻE lava ke ke tokoniʻi ho kaumeʻá ʻaki hono fakamanatu kiate ia ʻoku loto ʻa e kau mātuʻá ke tokoni. Kapau ʻoku fakafisi ho kaumeʻá ke vetehia ki he kau mātuʻá, ʻoku totonu ke ke fakahā ia ki he kau mātuʻá, ʻo fakahaaʻi ai ʻokú ke loto moʻoni ke tokoni kiate ia. Ko hono vahaʻangatae mo Sihová ʻoku ʻi ha tuʻunga fakatuʻutāmaki!

22. Ko e hā te tau lāulea ki ai ʻi he kupu hono hokó?

²² Kae fēfē kapau kuo fuʻu fuoloa hono fai ʻe ha tokotaha ha angahala mafatukituki pea fili ai ʻa e kau mātuʻá kuo pau ke tuʻusi? ʻE ʻuhinga ení kuo nau fakafeangai taʻefaimeesi kiate ia? ʻI he kupu hono hokó, te tau vakai fakalelei ai ki he founga faimeesi ʻa Sihova ki hono akonakiʻi ʻa e kau angahalá pea mo e founga ʻe lava ke tau faʻifaʻitaki ai ki aí.