1. Ko e hā ‘a e kaveinga mahu‘inga na‘e lāulea ki ai ‘a Sīsū ‘i he pō faka‘osi mo ‘ene kau ākongá?

‘I HE pō faka‘osi ‘o Sīsū mo ‘ene kau ākongá ki mu‘a ke ne pekiá, na‘á ne lave meimei tu‘o 30 ai ki he ‘ofá. Na‘á ne tala ki he‘ene kau ākongá ‘oku totonu ke nau “fe‘ofa‘aki.” (Sione 15:12, 17) ‘E mātu‘aki makehe ‘enau ‘ofá ‘o fakatokanga‘i ‘e he ni‘ihi kehé pea ‘ilo‘i ko e kau muimui mo‘oni kinautolu ‘o Kalaisi. (Sione 13:34, 35) Ko e ‘ofa na‘e talanoa ki ai ‘a Sīsuú ‘oku ‘ikai ko ha fo‘i fakakaukau pē; ko ha ‘ulungaanga mālohi mo feilaulau‘i-kita ia. Na‘e pehē ‘e Sīsū: “‘Oku ‘ikai ha taha kuó ne ma‘u ha ‘ofa ‘oku lahi ange ‘i he me‘á ni, ke tuku atu ‘e ha taha ‘ene mo‘uí ma‘a hono ngaahi kaume‘á. Ko hoku ngaahi kaume‘a kimoutolu kapau ‘oku mou fai ‘a e me‘a ‘oku ou tu‘utu‘uni atu kiate kimoutolú.”​—Sione 15:13, 14.

2. (a) Ko e hā ‘oku ‘iloa ai ‘a e kau sevāniti ‘a e ‘Otuá ‘i he ‘aho ní? (e) Ko e hā ‘a e ngaahi fehu‘i te tau tali ‘i he kupu ko ení?

² ‘Oku ‘iloa ‘a e kau sevāniti ‘a Sihova ‘i he ‘aho ní ‘i he‘enau ‘ofa feilaulau‘i-kita mo e fā‘ūtaha mālohi mo‘oní. (1 Sio. 3:10, 11) ‘Oku ‘ikai mahu‘inga pe ko e hā ‘a e fonua pe matakali ‘oku tau kau ki aí, lea ‘oku tau lea‘akí, feitu‘u ‘oku tau ha‘u mei aí, pe ko e anga ‘o hono ‘ohake kitautolú. ‘Oku fe‘ofa‘aki mo‘oni ‘a e kau sevāniti ‘a  Sihova takatakai ‘i he māmaní. Ko e hā ‘oku mātu‘aki fiema‘u ai ‘i he ‘ahó ni ‘a e ‘ofá? ‘Oku anga-fēfē hono langa hake kitautolu ‘e Sihova mo Sīsū ‘aki ‘a e ‘ofá? Pea ‘e lava fēfē ke tau fakahāhā ‘a e ‘ofa ko ení ke fakafiemālie‘i mo fakaivimālohi‘i ‘aki ‘a e ni‘ihi kehé?​—1 Kol. 8:1.

3. ‘Oku uesia fēfē ‘a e kakaí ‘i he “ngaahi taimi fakalilifu” ko ení?

³ ‘Oku tau mo‘ui ‘i he “ngaahi taimi fakalilifu,” pea ko e mo‘uí “‘oku fonu ia ‘i he faingata‘a mo e mamahi.” (2 Tīm. 3:1-5; Saame 90:10) ‘Oku faingata‘a‘ia lahi ‘a e kakai tokolahi ‘o nau ongo‘i ‘o hangē ka nau ka fo‘í. Ko e kakai ‘e toko 800,000 tupu ‘oku nau taonakita ‘i he ta‘u kotoa pē, ko e toko taha ‘i he sekoni ‘e 40 kotoa pē. Ko e me‘a fakamamahí, na‘a mo e ni‘ihi hotau fanga tokouá kuo nau hokosia ‘a e ngaahi ongo‘i ko ení pea kuo nau to‘o ‘enau mo‘uí.

4. Ko hai ‘a e fa‘ahinga ‘i he Tohi Tapú na‘a nau ongo‘i ‘i ha taimi ‘oku nau fie mate?

⁴ ‘I he taimi ‘o e Tohi Tapú, na‘e ongo‘i kovi ‘aupito ai ‘a e ni‘ihi ‘o e kau sevāniti faitōnunga ‘a e ‘Otuá koe‘uhi ko ‘enau ngaahi palopalemá ‘o nau loto ke nau mate. Ko e fakatātaá, na‘e tofanga ‘a Siope ‘i ha langa lahi ‘o ne pehē ai: “‘Oku ou fehi‘a ‘i he‘eku mo‘uí; ‘oku ‘ikai te u loto ke u kei mo‘ui atu.” (Siope 7:16; 14:13) Na‘e ongo‘i mātu‘aki mamahi ‘a Siona ‘o ne pehē: “Ko eni, ‘e Sihova, to‘o ange ā mu‘a ‘eku mo‘uí, he ‘oku lelei ange kiate au ke u mate ‘i ha‘aku mo‘ui.” (Siona 4:3) Ko e palōfita ko ‘Ilaisiaá na‘á ne ongo‘i mātu‘aki siva ‘ene ‘amanakí ‘o ne pehē: “Kuo fe‘unga! Pea ko eni, ‘e Sihova, to‘o ā ‘eku mo‘uí.” (1 Tu‘i 19:4) Ka na‘e ‘ofa ‘a Sihova ‘i he kau sevāniti mateaki ko ení peá ne loto ke nau mo‘ui. Na‘e ‘ikai te ne fakahalaia‘i ‘a e anga ‘o ‘enau ongo‘í. ‘I hono kehé, na‘á ne tokoni‘i kinautolu ke toe ma‘u ‘enau holi ke mo‘uí koe‘uhi ke lava ‘o hokohoko atu ‘enau tauhi faitōnunga kiate iá.

5. Ko e hā ‘oku fiema‘u mo‘oni ai ‘e hotau fanga tokouá mo e fanga tuofāfiné ‘a ‘etau ‘ofá ‘i he taimi ní?

⁵ ‘I he ‘ahó ni, ‘oku fekuki ai ‘a hotau fanga tokoua mo e fanga tuofāfine tokolahi mo e ngaahi tu‘unga fakalotomafasia pea ‘oku nau fiema‘u ‘etau ‘ofá. Kuo pau ke kātaki‘i ‘e he ni‘ihi ‘a hono ngaohikovi‘i pe lau‘i ‘i he‘enau ngāue‘angá. Pe ‘oku nau ongosia koe‘uhi ko ‘enau ngāue ‘i ha ngaahi houa lahi pe ma‘u ha ngaahi ngāue mātu‘aki fakalotomafasia. Lolotonga ia ‘oku ma‘u ‘e he ni‘ihi ha ngaahi palopalema fakafāmili mafatukituki. Mahalo pē ‘oku nau mali mo ha taha ‘oku ‘ikai ke tauhi kia Sihova pea ‘okú ne fakaanga‘i ma‘u pē kinautolu. Koe‘uhi ko e ngaahi me‘á ni mo e ngaahi tenge kehe, ‘oku ongo‘i ai ‘e he tokolahi ‘oku ‘ikai ke toe hanau ivi pea a‘u nai ‘o kamata ke nau veiveiua pe ‘oku kei ‘i ai hanau mahu‘inga. Ko hai ‘e lava ke tokoni kiate kinautolú?

6. ‘Oku fakaivimālohi‘i fēfē ‘e he ‘ofa ‘a Sihová ‘a ‘ene kau sevānití?

⁶ ‘Oku fakapapau‘i ‘e Sihova ki he‘ene kau sevānití ‘okú ne ‘ofa ‘iate kinautolu he taimí ni pea te ne ‘ofa ‘iate kinautolu ‘o ta‘engata. Sioloto atu ki he anga ‘o e ongo‘i ‘a e kau ‘Isilelí ‘i hono tala ange ‘e Sihova: “Na‘á ke hoko ‘o mahu‘inga kiate au, na‘e fakalāngilangi‘i koe, pea kuó u ‘ofa ‘iate koe,” pea “‘Oua na‘á ke ilifia, he ‘oku ou ‘iate koe”! (‘Ai. 43:4, 5) ‘Oku tau ‘ilo‘i ko kitautolu taki taha ‘oku tau mahu‘inga kia Sihova. * (Sio ki he fakamatala ‘i lalo.) ‘Oku tala‘ofa ‘a e Tohi Tapú: “Ko ha Tokotaha mālohi ia, te ne faifakahaofi. Te ne hākahaka ‘iate koe ‘i he fiefia lahi.”​—Sēf. 3:16, 17.

7. ‘Oku anga-fēfē ‘a e hangē ‘a e ‘ofa ‘a Sihová ko e ‘ofa ‘a ha fa‘ē toutama? (Sio ki he ‘uluaki fakatātā ‘i he kupú ni.)

⁷ ‘Oku tala‘ofa ‘a Sihova te ne fakaivimālohi‘i  mo fakafiemālie‘i ‘a hono kakaí tatau ai pē pe ko e hā ‘enau ngaahi palopalemá. Na‘á ne pehē: “Te mou huhu pea ‘e fua kimoutolu, pea ‘e lulululu kimoutolu ‘i he funga tuí. Hangē ha fa‘ē ‘okú ne fakafiemālie‘i ‘a ‘ene tamá, ‘e pehē ‘a ‘eku hanganaki fakafiemālie‘i kimoutolú.” (‘Ai. 66:12, 13) Fakakaukau atu ki he ongo‘i malu ‘a ha pēpē ‘i hono fua ia ‘e he‘ene fa‘eé pe va‘inga mo iá! ‘Oku ‘ofa lahi ‘a Sihova ‘iate koe pea ‘okú ne loto ke ke ongo‘i malu. ‘Oua ‘aupito na‘á ke veiveiua ‘okú ke mātu‘aki mahu‘inga kia Sihova.​—Sel. 31:3.

8, 9. ‘Oku lava fēfē ke fakaivimālohi‘i kitautolu ‘e he ‘ofa ‘a Sīsuú?

⁸ Ko e toe ‘uhinga eni ‘oku tau ‘ilo‘i ai ‘oku ‘ofa ‘a Sihova ‘iate kitautolú: “Na‘e ‘ofa lahi ‘aupito ‘a e ‘Otuá ki he māmaní ‘o ne foaki ai hono ‘Alo tofu-pē-taha-ne-fakatupú, koe‘uhi ko e tokotaha kotoa pē ‘okú ne ngāue‘i ‘a e tui kiate iá ke ‘oua na‘a ‘auha ka ne ma‘u ‘a e mo‘ui ta‘engatá.” (Sione 3:16) Ko e feilaulau ‘a Sīsuú ‘oku fakamo‘oni‘i ai ‘okú ne ‘ofa foki mo ia ‘iate kitautolu, pea ‘oku fakaivimālohi‘i kitautolu ‘e he ‘ofa ko ení. ‘Oku pehē ‘e he Tohi Tapú na‘a mo e “mamahí pe faingata‘a‘iá” he‘ikai lava ke ne “fakamavahe‘i kitautolu mei he ‘ofa ‘a e Kalaisí.”​—Loma 8:35, 38, 39.

⁹ ‘Oku tau ma‘u ‘i he taimi ‘e ni‘ihi ha ngaahi palopalema ‘okú ne fakavaivai‘i fakaesino pe fakaeongo kitautolu pe to‘o ‘etau fiefia ‘i he tauhi kia Sihová. Ka ko e manatu‘i ‘a e lahi ‘o e ‘ofa ‘a Kalaisi ‘iate kitautolú ‘oku lava ke ne ‘omai kiate kitautolu ‘a e mālohi ke tau kātaki. (Lau ‘a e 2 Kolinitō 5:14, 15.) Ko e ‘ofa ‘a Sīsuú ‘okú ne ‘omai kiate kitautolu ‘a e holi ke hokohoko atu ‘etau mo‘ui mo e tauhi kia Sihová. ‘E lava ke tokoni‘i ai kitautolu ke ‘oua te tau fo‘i, neongo kapau ‘oku tau faingata‘a‘ia ‘i ha ngaahi fakatamaki, fakatanga, siva ‘a e ‘amanakí, pe loto-mo‘ua.

10, 11. Ko hai ‘oku ‘a‘ana ‘a e fatongia ke langa hake ‘a e fanga tokoua loto-si‘í? Fakamatala‘i.

¹⁰ ‘Oku toe ngāue‘aki ‘e Sihova ‘a e fakataha‘angá ke langa hake ai kitautolu ‘aki ‘ene ‘ofá. ‘I he‘etau ‘ofa ‘i hotau fanga tokouá mo e fanga tuofāfiné, ‘oku tau fakamo‘oni‘i ai ‘etau ‘ofa kia Sihová. ‘Oku tau fai ‘a e me‘a kotoa ‘oku tau malavá ke tokoni‘i hotau fanga tokouá ke nau ‘ilo ‘oku nau mahu‘inga pea ‘oku ‘ofa ‘a Sihova ‘iate kinautolu. (1 Sio. 4:19-21) Na‘e tohi ‘a e ‘apositolo ko Paulá: “Mou hanganaki fefakalototo‘a‘aki mo felangahake‘aki, ‘o hangē  tofu pē ko ia ‘oku mou lolotonga faí.” (1 Tes. 5:11) ‘Oku ‘ikai ko e kau mātu‘á pē ‘oku lava ke nau fai ení. Ko kitautolu taki taha ‘oku lava ke tau fa‘ifa‘itaki kia Sihova mo Sīsū ‘aki hono fakafiemālie‘i ‘a hotau fanga tokouá mo e fanga tuofāfiné.​—Lau ‘a e Loma 15:1, 2.

¹¹ Ko e ni‘ihi ‘i he fakataha‘angá ‘oku nau tofanga ‘i he loto-mafasia pe loto-mo‘ua lahí ‘e fiema‘u nai kiate kinautolu ha tokoni fakapalōfesinale mo ha faito‘o. (Luke 5:31) Ko e kau mātu‘á mo e ni‘ihi kehe ‘i he fakataha‘angá ‘oku nau ‘ilo‘i neongo ‘oku ‘ikai ko ha kau toketā kinautolu kuo ako‘i, ko e tokoni mo e fakafiemālie ‘oku lava ke nau ‘oatú ‘oku mahu‘inga ‘aupito. Ko e fa‘ahinga kotoa ‘i he fakataha‘angá ‘oku lava ke nau “lea fakanonga ki he fa‘ahinga ‘oku loto-mafasiá, poupou ki he kau vaivaí, mou kātaki ‘i he feangainga mo e tokotaha kotoa.” (1 Tes. 5:14) ‘Oku tau loto ke feinga ke mahino‘i ‘a e anga ‘o e ongo‘i ‘a hotau fanga tokouá. ‘Oku fiema‘u ke tau anga-kātaki kiate kinautolu pea lea ‘i he founga ‘e fakafiemālie‘i ai kinautolu ‘i he‘enau loto-si‘í. ‘Okú ke feinga ke fakaivimālohi‘i ‘a e ni‘ihi kehé? Ko e hā ‘e lava ke ke fai ke ke hoko ai ko ha tokotaha fakafiemālie mo fakalototo‘a lahi ange?

12. ‘Omai ha fakatātā ‘o ha tokotaha na‘e fakalototo‘a‘i ‘e he ‘ofa ‘i he‘ene fakataha‘angá.

¹² ‘Oku pehē ‘e ha tuofefine ‘i ‘Iulope: “‘I he taimi ‘e ni‘ihi ‘oku ou fakakaukau taonakita ai, ka ‘oku ou ma‘u ha fokotu‘utu‘u ‘o e tokoni lelei. Ko e fakataha‘anga ‘oku ou kau ki aí kuó ne fakahaofi ‘eku mo‘uí. Ko e fanga tokouá mo e fanga tuofāfiné ‘oku nau mātu‘aki fakalototo‘a mo ‘ofa ma‘u pē. Neongo ko ha tokosi‘i pē ‘oku nau ‘ilo‘i ‘oku ou tofanga ‘i he loto-mafasiá, ‘oku ‘i ai ma‘u pē ‘a e fakataha‘angá ke tokoni‘i au. Ko e ongo me‘a mali ‘e taha ‘okú na hangē ha‘aku ongo mātu‘a fakalaumālié. ‘Okú na tokanga‘i lelei au, pea ‘okú na ‘i ai houa ‘e 24 ‘i he ‘aho ke tokoni‘i au.” Ko e mo‘oni, ‘oku ‘ikai lava ke tokoni lahi tatau mo kinaua ‘a e tokotaha kotoa. Ka ko kitautolu kotoa ‘e lava ke tau fai ha me‘a lahi ke tokoni ki hotau fanga tokouá mo e fanga tuofāfiné. * (Sio ki he fakamatala ‘i lalo.)

13. Ko e hā ‘oku fiema‘u ke tau fai ke fakafiemālie‘i ‘a e ni‘ihi kehé?

¹³ Hoko ko ha tokotaha fanongo lelei. (Sēm. 1:19) ‘Oku tau fakahāhā ‘a e ‘ofá ‘i he‘etau fanongo fakataha mo e kaungāongo‘í. ‘Eke ha ngaahi fehu‘i anga-‘ofa ‘e lava ke ne tokoni‘i koe ke ke mahino‘i ‘a e anga ‘o e ongo‘i ho tokouá. Te ne ‘ilo‘i ‘okú ke tokanga mo‘oni ange, mei he me‘a ‘oku hā atu ‘i ho matá. Lolotonga ‘ene talanoá, anga-kātaki pea tuku ke ne fakamatala ‘o ‘ikai fakahoha‘asi ia. ‘I he hoko ko ha tokotaha fanongo leleí, ‘e lava ke ke mahino‘i lelei ange ia pea ‘e lava ke tokoni‘i ai ia ke ne falala kiate koe. ‘E faingofua ange leva ke ne fanongo ki he me‘a ‘okú ke lea‘akí ‘i ho‘o feinga ke tokoni‘i iá. ‘I ho‘o tokanga mo‘oni ki he ni‘ihi kehé, ‘e lava ke ke hoko ai ‘o mātu‘aki fakafiemālie kiate kinautolu.

14. Ko e hā kuo pau ai ke ‘oua te tau fakaangá?

¹⁴ ‘Oua ‘e fakaanga. Ko ha tokotaha loto-mafasia ‘e toe ongo‘i kovi ange kapau ‘okú ne fakakaukau ‘oku tau fakaanga‘i ia. ‘E mātu‘aki faingata‘a leva ai ke tau tokoni kiate ia. “Ko e lea ta‘efakakaukaú ‘oku hangē ia ko hano hokohoka‘i ‘e ha heletaá, ka ko e ‘elelo ‘o e potó ko ha faito‘o.” (Pal. 12:18) Neongo he‘ikai ‘aupito ke tau fakatupunga ha maumau ‘osi fakakaukau‘i ki ha tokotaha loto-mafasia ‘i he‘etau leá, ‘e kei lava pē ke tau fakatupunga ha  mamahi lahi ‘i he‘etau lea ta‘efakakaukaú. Ke fakafiemālie‘i hotau tokouá, kuo pau ke tau ‘ai ke ne ongo‘i tuipau ‘oku tau feinga mo‘oni ke mahino‘i ‘a hono tu‘ungá.​—Māt. 7:12.

15. Ko e hā ‘a e ongo me‘angāue mahu‘inga ‘e lava ke tau ngāue‘aki ke fakafiemālie‘i ‘a e ni‘ihi kehé?

¹⁵ Ngāue‘aki ‘a e Folofola ‘a e ‘Otuá ke fakafiemālie‘i ‘a e ni‘ihi kehé. (Lau ‘a e Loma 15:4, 5.) Ko e ha‘u ‘a e Tohi Tapú mei he “‘Otuá ‘a ia ‘okú ne ‘omai ‘a e kātakí mo e fakafiemālié,” ko ia ‘oku ‘ikai faka‘ohovale ‘a ‘etau ma‘u ‘a e fakafiemālie lahi ‘i he‘ene folofolá. ‘Oku tau toe ma‘u foki ‘a e Watch Tower Publications Index mo e Tataki Fakaefekumi Ma‘á e Kau Fakamo‘oni ‘a Sihová. Ko hono ngāue‘aki ‘a e ongo me‘angāué ni, ‘e lava ke tau ma‘u ai ‘a e ngaahi konga Tohi Tapu mo e ‘ū tohi ‘e lava ke tau ngāue‘aki ke fakafiemālie‘i mo fakalototo‘a‘i hotau fanga tokouá mo e fanga tuofāfiné.

16. Ko e hā ‘a e ongo ‘ulungaanga te na tokoni‘i kitautolu ke fakalototo‘a‘i ha taha ‘oku loto-mafasia?

¹⁶ Hoko ‘o manava‘ofa mo anga-fakaalaala. Ko Sihova ‘a e “Tamai ‘o e manava‘ofá pea mo e ‘Otua ‘o e fakafiemālie kotoa pē,” pea ‘okú ne “manava‘ofa kaungāongo‘i” ki he‘ene kau sevānití. (Lau ‘a e 2 Kolinitō 1:3-6; Luke 1:78; Loma 15:13) Na‘e fokotu‘u ‘e Paula ha fa‘ifa‘itaki‘anga lelei ‘i he me‘á ni koe‘uhí na‘á ne fa‘ifa‘itaki kia Sihova. Na‘á ne tohi: “Na‘a mau anga-fakaalaala ‘i homou lotolotongá, ‘o hangē ko hono tokanga‘i manava‘ofa ‘e ha fa‘ē toutama ‘a ‘ene fānaú tonu. Ko ia ‘i hono ma‘u ‘a e manava‘ofa loloto kiate kimoutolú, na‘a mau fakapapau‘i ai ke ‘oatu kiate kimoutolu, ‘o ‘ikai ngata pē ‘i he ongoongo lelei ‘a e ‘Otuá kae toe pehē foki mo kimautolu tonu, koe‘uhí na‘a mou hoko ko e fa‘ahinga mātu‘aki ‘ofeina kiate kimautolu.” (1 Tes. 2:7, 8) ‘I he‘etau manava‘ofa ‘o hangē ko Sihová, te tau ‘oatu nai ai ‘a e fakafiemālie ‘oku lotu ‘a hotau fanga tokouá ‘o kolé!

17. Ko e hā ‘a e vakai totonu ki hotau fanga tokouá ‘e tokoni ke tau fakalototo‘a‘i ai kinautolú?

¹⁷ ‘Oua ‘e ‘amanekina ‘a e haohaoá mei ho fanga tokouá. Ma‘u ha vakai totonu. Kapau ‘okú ke ‘amanekina ‘a e haohaoá mei ho fanga tokouá, ‘e siva ho‘o ‘amanakí. (Tml. 7:21, 22) Manatu‘i ko Sihová ‘okú ne ‘ilo‘i ‘a e me‘a totonu ke ‘amanekina meiate kitautolú. Ko ia ‘oku fiema‘u ke tau fekātaki‘aki. (‘Ef. 4:2, 32) ‘Oku ‘ikai ‘aupito te tau loto ke ‘ai ke ongo‘i ‘e hotau fanga tokouá ‘oku ‘ikai fe‘unga ‘a e me‘a ‘oku nau faí pe fakahoa kinautolu ki he ni‘ihi kehé. ‘I hono kehé, ‘oku tau fakalototo‘a‘i kinautolu pea fakahaa‘i ‘a e ngaahi me‘a lelei ‘oku nau faí. ‘E lava ke tokoni‘i kinautolu ‘e he me‘á ni ke nau fiefia ‘i he‘enau tauhi kia Sihová.​—Kal. 6:4.

18. Ko e hā ‘oku tau loto ai ke langa hake ‘a e ni‘ihi kehé ‘i he ‘ofá?

¹⁸ Ko e tokotaha kotoa ‘i he kau sevāniti ‘a Sihová ‘oku mahu‘inga kiate ia mo Sīsū. (Kal. 2:20) ‘Oku tau ‘ofa lahi ‘i hotau fanga tokouá mo e fanga tuofāfiné, ko ia kuo pau ke tau fakafeangai ‘i he manava‘ofa kiate kinautolu. ‘Oku tau “tuli ki he ngaahi me‘a ‘oku fakatupu melinó pea mo e ngaahi me‘a ‘oku fai ai ‘a e felangahake‘akí.” (Loma 14:19) He fakatu‘amelie mo‘oni ē ko kitautolu ki he mo‘ui ‘i Palataisí, ‘a ia ‘e ‘ikai ha ‘uhinga ke hoko ai ha taha ‘o loto-si‘i! He‘ikai ke toe ‘i ai ha puke pea he‘ikai ke toe ‘i ai ha tau. He‘ikai ke toe mate ‘a e kakaí ‘i he angahala tukufakaholó, pea he‘ikai ke toe ‘i ai ha fakatanga, ngaahi palopalema fakafāmili, pe siva ‘a e ‘amanakí ‘i he mo‘uí. ‘I he ‘osi ‘a e ta‘u ‘e taha afé, ‘e haohaoa ‘a e fa‘ahinga kotoa ‘o e tangatá. Ko e fa‘ahinga te nau faitōnunga ai pē ‘i he ‘ahi‘ahi faka‘osí ‘e ohi kinautolu ‘e Sihova ko hono ngaahi foha ‘i he māmaní pea te nau ma‘u “‘a e tau‘atāina lāngilangi‘ia ‘a e fānau ‘a e ‘Otuá.” (Loma 8:21) Ko ia fakatauange ke tau fakahāhā kotoa ‘a e ‘ofa ‘oku langa haké pea fetokoni‘aki ke tau hao atu ki he māmani fo‘ou fisifisimu‘a ‘a e ‘Otuá.