1. ‘E lava fēfē ke uesia ‘etau anga-fakatōkilaló ‘i he fakakaukau siokita ‘a e māmaní?

KO E HĀ ‘oku faingata‘a ai ke ngāue‘aki ‘a e me‘a ‘oku tau ako mei he Folofola ‘a e ‘Otuá? Ko e ‘uhinga ‘e taha, ke fai ‘a e me‘a ‘oku totonú ‘oku fiema‘u ke tau anga-fakatōkilalo. ‘I he ‘ngaahi ‘aho faka‘osi’ ko ení, ‘oku faingata‘a ke hanganaki anga-fakatōkilalo, koe‘uhí ko e kakai tokolahi takatakai ‘iate kitautolú ‘oku nau “‘ofa kiate kinautolu pē, ko e kau ‘ofa ki he pa‘angá, loto-mahikihiki, hīkisia,” pea “‘ikai ma‘u ‘a e mapule‘i-kitá.” (2 Tīm. 3:1-3) ‘I he hoko ko e kau sevāniti ‘a e ‘Otuá, ‘oku tau ‘ilo‘i ‘oku kovi ‘a e fa‘ahinga ‘ulungaanga ko ení, ka ko e fa‘ahinga ‘oku nau tō‘onga pehení ‘oku nau hā ngali lavame‘a nai mo fiefia mo‘oni ‘i he mo‘uí. (Saame 37:1; 73:3) ‘E a‘u nai ‘o tau fifili: ‘‘Oku tuha mo‘oni mo e feingá ‘a hono fakamu‘omu‘a ‘a e fiema‘u ‘a e ni‘ihi kehé ‘i ha‘akú? ‘E kei faka‘apa‘apa‘i au ‘e he kakaí kapau te u anga-fakatōkilalo?’ (Luke 9:48) Kapau ‘oku tau faka‘atā ke tākiekina kitautolu ‘e he fakakaukau siokita ‘a e māmaní, ‘e lava ke tau maumau‘i ai hotau vaha‘angatae lelei mo hotau fanga tokouá pea  ‘ai ai ke faingata‘a ke ‘ilo‘i ‘e he ni‘ihi kehé ko e kau Kalisitiane kitautolu. Ka ‘i he‘etau ako ‘a e fa‘ifa‘itaki‘anga ‘a e kau sevāniti anga-fakatōkilalo ‘a e ‘Otuá pea fa‘ifa‘itaki kiate kinautolú, te tau ma‘u ‘a e ngaahi ola lelei.

2. Ko e hā ‘e lava ke tau ako mei he kau sevāniti faitōnunga ‘a e ‘Otuá ‘i he kuohilí?

² Ko e hā na‘á ne tokoni‘i ‘a e kau sevāniti faitōnunga ‘a e ‘Otuá ‘i he kuohilí ke nau hoko ko hono ngaahi kaume‘á? Na‘e anga-fēfē ‘enau fakahōifua‘i iá? Na‘a nau ma‘u mei fē ‘a e mālohi ke fai ‘a e me‘a totonú? ‘I he‘etau lau fekau‘aki mo ‘enau fa‘ifa‘itaki‘angá ‘i he Tohi Tapú pea fakalaulauloto ki he me‘a ‘oku tau laú, ‘e hoko ‘o toe mālohi ange ai ‘etau tuí.

3, 4. (a) ‘Oku anga-fēfē hono ako‘i kitautolu ‘e Sihová? (e) Ko e hā ‘oku tau fiema‘u ai ‘a e me‘a lahi ange ‘i he ‘iló ke ne ‘ai ke mālohi ‘etau tuí?

³ ‘Oku tokonaki mai ‘e Sihova ‘a e me‘a ‘oku fiema‘u kiate kitautolu ke ‘ai ke mālohi ai ‘etau tuí. ‘Oku tau ma‘u ‘a e fale‘i lelei mo e ako mei he Tohi Tapú, ko ‘etau ‘ū tohi faka-Kalisitiané, ko ‘etau uepisaití, JW Broadcasting, mo ‘etau ngaahi fakatahá mo e ‘asemipilií. Ka na‘e fakamatala ‘a Sīsū ‘oku tau fiema‘u ha me‘a lahi ange ‘i he ‘iló pē. Na‘á ne pehē: “Ko ‘eku me‘akaí ē ke fai ‘a e finangalo ‘o ia na‘á ne fekau mai aú pea ke faka‘osi ‘ene ngāué.”​—Sione 4:34.

⁴ Ko hono fai ‘a e finangalo ‘o e ‘Otuá na‘e hangē ia ha me‘akai kia Sīsuú. Ko hono kai ‘a e me‘akai fakatupu mo‘ui leleí ‘oku ‘ai ai ke tau ongo‘i lelei mo mālohi hotau sinó. ‘I ha founga meimei tatau, ko hono fai ‘a e finangalo ‘o e ‘Otuá ‘okú ne ‘ai ke tau ongo‘i lelei mo mālohi ‘etau tuí. Ko e fakatātaá, kuó ke ‘alu ‘i ha taimi ki ha fakataha malanga ‘okú ke ongo‘i hela‘ia ka ‘i ho‘o foki ki ‘api hili ‘a e malangá ‘okú ke ongo‘i fiefia mo fakaivifo‘ou?

5. ‘Oku anga-fēfē ‘etau ma‘u ‘aonga ‘i he‘etau hoko ‘o potó?

⁵ ‘I he‘etau fai ‘a e me‘a ‘oku fiema‘u mai ‘e Sihova ke tau faí, ‘oku tau poto ai. (Saame 107:43) Pea ‘oku hoko ‘a e ngaahi me‘a lelei lahi ki he fa‘ahinga ‘oku nau ma‘u ‘a e potó. “‘Oku ‘ikai lava ke fakahoa ki ai ha me‘a pē ‘okú ke holi ki ai. . . . Ko ha ‘akau ia ‘o e mo‘uí ki he fa‘ahinga ‘oku nau puke iá, pea ko kinautolu ‘oku nau puke ma‘u iá ‘e vakai atu kiate kinautolu ‘oku nau fiefia.” (Pal. 3:13-18) Na‘e pehē ‘e Sīsū: “Kapau ‘oku mou ‘ilo‘i ‘a e ngaahi me‘á ni, he fiefia ē ko kimoutolu kapau ‘oku mou fai ia.” (Sione 13:17) ‘E fiefia ‘a e kau ākonga ‘a Sīsuú ‘i he‘enau hanganaki fai ‘a e me‘a na‘e tala ange ‘e Sīsū ke nau faí. Ko e muimui ‘i he‘ene akonakí mo ‘ene fa‘ifa‘itaki‘angá na‘e hoko ko ‘enau founga mo‘uí ia.

6. Ko e hā ‘oku fiema‘u ai ke hokohoko atu ‘etau ngāue‘aki ‘a e me‘a ‘oku tau akó?

⁶ ‘I he ‘ahó ni, ‘oku fiema‘u foki ke tau hokohoko atu hono ngāue‘aki ‘a e me‘a ‘oku tau akó. Fakakaukau atu ki ha ‘enisinia ‘oku ‘i ai ‘ene ngaahi me‘angāue, naunau, mo e ‘ilo. ‘E tokoni‘i ia ‘e he ngaahi me‘a ko iá ke ne hoko ko ha ‘enisinia lelei ‘o kapau pē ‘okú ne ngāue‘aki. ‘Okú ne taukei nai ‘i ha ngaahi ta‘u, ka ‘oku fiema‘u ke ne hanganaki ngāue‘aki ‘a e me‘a kuó ne akó kapau ‘okú ne loto ke kei hoko ko ha ‘enisinia lelei. ‘I he founga meimei tatau, ‘i he‘etau ‘uluaki ako ‘a e mo‘oní, na‘a tau fiefia koe‘uhí na‘a tau ngāue‘aki ‘a e me‘a na‘a tau lau ‘i he Tohi Tapú. Ka ke ma‘u ‘a e fiefia tu‘uloá, kuo pau ke hokohoko atu ‘etau ngāue‘aki ‘a e me‘a ‘oku ako‘i mai ‘e Sihová ‘i he ‘aho kotoa pē.

7. Ko e hā kuo pau ke tau fai ke ako mei he ngaahi fa‘ifa‘itaki‘anga ‘i he Tohi Tapú?

⁷ ‘I he kupu ko ení, te tau lāulea ai ki he tu‘unga ‘e ni‘ihi ‘e faingata‘a nai ai ke tau hanganaki anga-fakatōkilalo. Te tau ako ai ki he founga na‘e hanganaki anga-fakatōkilalo ai ‘a e fa‘ahinga faitōnunga ‘i he kuohilí. Ka kuo pau ke tau fai ‘a e me‘a lahi ange ‘i hono lau pē ‘a e fakamatalá. Kuo pau ke tau fakakaukau ki ai pea ngāue‘aki leva ia ‘i he‘etau mo‘uí.

8, 9. Ko e hā ‘oku tau ako fekau‘aki mo e anga-fakatōkilalo ‘a Paulá ‘i he Ngāue 14:8-15? (Sio ki he ‘uluaki fakatātā ‘i he kupú ni.)

⁸ ‘Oku finangalo ‘a e ‘Otuá “ke fakahaofi ‘a e fa‘ahinga kakai kotoa pē pea ke nau a‘usia ha ‘ilo totonu ki he mo‘oní.” (1 Tīm. 2:4) ‘Oku anga-fēfē ho‘o vakai ki he kakai kotoa kuo te‘eki ai ke nau ako ‘a e mo‘oní? Na‘e malanga ‘a e ‘apositolo ko Paulá ki he kakai Siú ‘a ia na‘a nau ‘osi ‘ilo‘i ha me‘a fekau‘aki mo Sihova. Ka na‘á ne toe malanga foki ki he fa‘ahinga na‘a nau lotu ki he ngaahi ‘otua loí. Ko e malanga kiate kinautolú na‘e ‘ahi‘ahi‘i ai ‘a e anga-fakatōkilalo ‘a Paulá. Anga-fēfē?

⁹ ‘I he ‘uluaki fononga fakamisinale ‘a Paulá, na‘á ne ‘alu mo Panepasa ki he kolo ko Līsitá. Ko e kakai Laikonia na‘e nofo aí na‘a nau fakafeangai kia Paula mo Panepasa hangē ko ha ongo heló pea ui kinaua ‘aki ‘a e hingoa ‘o honau ongo ‘otua loi ko Siusi mo Heamesi. Na‘e tali lelei ia ‘e Paula mo Panepasa? Na‘á na vakai ki heni ko ha liliu lelei ia mei he fakatanga na‘á na hokosia ‘i he ongo kolo fakamuimui na‘á na ‘a‘ahi ki aí? Na‘á na fakakaukau ko e tokanga kotoa ko eni na‘e fai kiate kinauá ‘e tokoni‘i ai ha kakai tokolahi ange ke nau fanongo ki he ongoongo leleí? ‘Ikai! Na‘á na loto-mamahi ‘aupito peá na kaila: “Ko e hā ‘oku mou fai ai ‘a e ngaahi me‘á ni? Ko e ongo tangata pē foki mo kimaua ‘o ma ma‘u ‘a e ngaahi vaivai‘anga tatau pē mo ia ‘oku mou ma‘ú.”​—Ngā. 14:8-15.

10. Ko e hā na‘e ‘ikai ke ongo‘i ai ‘e Paula mo Panepasa ‘okú na mā‘olunga ange ‘i he kau Laikoniá?

¹⁰ ‘I he pehē ‘e Paula mo Panepasa ko e ongo tangata pē foki mo kinauá, na‘á na ‘uhingá na‘á na ta‘ehaohaoa. Na‘e ‘ikai te na ‘uhingá ‘oku tatau ‘ena founga lotú mo e founga lotu ‘a e kau Laikoniá. Na‘e fekau‘i atu ‘e he ‘Otuá ‘a Paula mo Panepasa ko e ongo misinale. (Ngā. 13:2) Na‘e pani kinaua ‘aki ‘a e laumālie mā‘oni‘oní pea na‘á na ma‘u ha ‘amanaki fisifisimu‘a. Ka na‘e ‘ikai ko ha ‘uhinga eni ke na ongo‘i mā‘olunga ange ai. Na‘á na ‘ilo‘i ko e kakai ko iá ‘e lava foki ke nau ma‘u ‘a e ‘amanaki fakahēvaní kapau te nau tali ‘a e ongoongo leleí.

11. ‘E lava fēfē ke tau anga-fakatōkilalo ‘o hangē ko Paulá ‘i he‘etau malangá?

¹¹ Ko e founga eni ‘e taha ‘oku tau fakahāhā ai ‘oku tau anga-fakatōkilalo ‘o hangē ko Paulá. ‘Oku ‘ikai ‘aupito ke tau ongo‘i ko ‘etau vāhenga-ngāue fakamalangá pe ko e ngaahi me‘a ‘oku tokoni‘i kitautolu ‘e Sihova ke tau lava‘í ‘okú ne ‘ai kitautolu ke tau makehe. ‘E lava ke tau ‘eke hifo: ‘‘Oku anga-fēfē ‘eku ongo‘i fekau‘aki mo e fa‘ahinga ‘i hoku feitu‘u ngāué? ‘Oku ou tomu‘a fehi‘a ki ha fa‘ahinga kakai ‘e ni‘ihi?’ ‘I he māmaní kotoa, ‘oku feinga ‘a e Kau Fakamo‘oni ‘a Sihová ke ma‘u ‘a e fa‘ahinga te nau fanongo ki he ongoongo leleí. ‘Oku a‘u ‘o feinga ‘a e ni‘ihi ke ako ‘a e lea pe ko e anga fakafonua ‘a e kakai ‘oku vakai kiate kinautolu ‘a e ni‘ihi kehé ‘oku nau mā‘ulaló. Ka ‘oku ‘ikai ‘aupito te nau ongo‘i ‘oku nau lelei ange ‘i he fa‘ahinga ‘oku nau malanga ki aí. ‘I hono kehé, ‘oku nau feinga ke mahino‘i ‘a e tokotaha taki taha koe‘uhí ke tokoni‘i ‘a e tokolahi taha ‘e ala lavá ke nau tali ‘a e pōpoaki ‘o e Pule‘angá.

12. Na‘e anga-fēfē hono fakahāhā ‘e ‘Epafasi na‘á ne tokanga mo‘oni ki he ni‘ihi kehé?

¹² Ko ha toe founga ‘e taha ‘oku tau fakahāhā ai ‘a e anga-fakatōkilaló ko e lotu ma‘a hotau fanga tokoua mo e fanga tuofāfine, kuo nau ‘osi “ma‘u ha tui ‘a ia ‘oku mahu‘inga tatau mo [ha‘atautolú].” (2 Pita 1:1) Ko e me‘a eni na‘e fai ‘e ‘Epafasí. ‘Oku lave tu‘o tolu pē ‘a e Tohi Tapú fekau‘aki mo ia. ‘I he taimi na‘e tuku pōpula ai ‘a Paula ‘i ha fale ‘i Lomá, na‘á ne tohi ki he kau Kalisitiane ‘i Kolosé, fekau‘aki mo ‘Epafasi ‘o pehē: “‘Okú ne lotu tōtōivi ma‘u pē ma‘amoutolu.”  (Kol. 4:12) Na‘e ‘ilo‘i lelei ‘e ‘Epafasi ‘a e fanga tokouá, pea na‘á ne tokanga lahi kiate kinautolu. Na‘e ui ia ‘e Paula ko ha “kaungā-pōpula,” ko ia na‘e ‘i ai ‘a e ngaahi palopalema ‘a ‘Epafasi. (Flm. 23) Ka na‘á ne kei tokanga pē ki he fiema‘u ‘a e ni‘ihi kehé, pea na‘á ne fai ha me‘a ke tokoni kiate kinautolu. Na‘e lotu ‘a ‘Epafasi ma‘a hono fanga tokouá mo e fanga tuofāfiné, pea ‘e lava ke tau fai ‘a e me‘a tatau, na‘a mo e lave ki honau hingoá. Ko e ngaahi lotu peheé ‘oku mālohi ‘aupito.​—2 Kol. 1:11; Sēm. 5:16.

13. ‘E lava fēfē ke ke fa‘ifa‘itaki kia ‘Epafasi ‘i ho‘o lotú?

¹³ Fakakaukau ki ha taha ‘e lava ke ke lotu ‘o lave ki hono hingoá. ‘Okú ke ‘ilo nai ha ngaahi kaungāme‘a ‘i he fakataha‘angá pe ko e ngaahi fāmili ‘oku nau fekuki mo e ngaahi faingata‘a. Mahalo pē ‘oku ‘i ai ha ngaahi fili faingata‘a ke nau fai pe ngaahi ‘ahi‘ahi ke nau taliteke‘i. ‘E lava foki ke ke lotu ma‘á e fanga tokoua ko honau hingoá ‘oku ‘i he jw.org ‘i he kupu “Tuku Pilīsone ‘a e Kau Fakamo‘oni ‘a Sihová Koe‘uhi ko ‘Enau Tuí.” (Sio ‘i he NEWSROOM > LEGAL DEVELOPMENTS.) ‘E lava foki ke ke lotu ma‘á e fa‘ahinga kuo mole honau ngaahi ‘ofa‘anga ‘i he maté, fa‘ahinga kuo nau hao ki muí ni ‘i ha ngaahi fakatamaki, pe tau, mo e fa‘ahinga ‘oku nau palopalema‘ia fakapa‘anga. ‘Oku tokolahi fau ‘a e fanga tokoua mo e fanga tuofāfine ‘oku nau fiema‘u ‘etau ngaahi lotú! ‘I he‘etau lotu ma‘anautolú, ‘oku tau fakamo‘oni‘i ai ‘oku ‘ikai ke tau fakakaukau pē ki he‘etau ngaahi fiema‘ú ka ‘oku tau fakakaukau foki ki he ngaahi fiema‘u ‘a e ni‘ihi kehé. (Fil. 2:4) ‘Oku fanongo mai ‘a Sihova ki he ngaahi lotu ko iá.

14. ‘Oku anga-fēfē ‘a e hoko ‘a Sihova ko e tokotaha fanongo lelei tahá?

¹⁴ Ko ha toe founga ‘e taha ‘oku tau fakahāhā ai ‘a e anga-fakatōkilaló ko e hoko ko ha tokotaha fanongo lelei. ‘Oku tala mai ‘i he Sēmisi 1:19 ke tau “vave ki he fanongo.” Ko Sihova ‘a e tokotaha fanongo lelei tahá. (Sēn. 18:32; Sios. 10:14) Ko e fakatātaá, lau ‘a e fetalanoa‘aki ‘oku ‘i he ‘Ekisoto 32:11-14. (Lau.) Neongo na‘e ‘ikai te ne fiema‘u ‘a e fakakaukau ‘a Mōsesé, na‘e faka‘atā ‘e Sihova ‘a Mōsese ke ne fakahaa‘i ‘a e anga ‘o ‘ene ongo‘í. Te ke fanongo anga-kātaki ki ha taha kuó ne faihala ‘i he kuohilí pea muimui ‘i he‘ene fokotu‘ú? Neongo ia, ko Sihová ‘okú ne fanongo anga-kātaki ki he fa‘ahinga kotoa ‘o e tangatá ‘oku nau lotu ‘i he tuí.

15. ‘E lava fēfē ke tau fa‘ifa‘itaki kia Sihova ‘aki hono fakalāngilangi‘i ‘a e ni‘ihi kehé?

¹⁵ ‘Eke hifo: ‘Kapau ‘oku mātu‘aki anga-fakatōkilalo ‘a Sihova ‘o lava ke ne fanongo ki he kakaí hangē ko ‘ene fanongo kia ‘Ēpalahame, Lesieli, Mōsese, Siosiua, Mānoa, ‘Ilaisiā, mo Hesekaiá, ‘ikai ‘oku totonu ke u feinga ke fai ‘a e me‘a tatau? ‘E lava ke u fakalāngilangi‘i lahi ange ‘a hoku fanga tokouá kotoa ‘aki ‘a e fanongo kiate kinautolu pea muimui ‘i he‘enau fokotu‘ú ‘o ka malava? ‘Oku ‘i ai ha taha ‘i he‘eku fakataha‘angá pe ‘i hoku fāmilí ‘e lava ke u tokanga lahi ange ki ai? Ko e hā ‘a e me‘a te u fai fekau‘aki mo iá?’​—Sēn. 30:6; Fkm. 13:9; 1 Tu‘i 17:22; 2 Kal. 30:20.

16. Na‘e anga-fēfē ‘a e fakafeangai ‘a Tu‘i Tēvita ‘i he faikovi kiate ia ‘a Simí?

¹⁶ ‘Oku toe tokoni‘i kitautolu ‘e he anga-fakatōkilaló ke tau fakahāhā ‘a e mapule‘i-kita ‘i he faikovi mai ‘a e ni‘ihi kehé. (‘Ef. 4:2) ‘Oku tau sio ki ha fa‘ifa‘itaki‘anga lelei ‘aupito ‘o e me‘a ko iá ‘i he 2 Sāmiuela 16:5-13. (Lau.) Na‘e laukovi mo ‘ohofi ‘a Tēvita mo ‘ene kau sevānití ‘e Simi, ko ha kāinga ‘o Tu‘i Saula. Na‘e mei lava pē ke ta‘ofi ‘e Tēvita ‘a Simi, ka ‘i hono kehé na‘á ne kātekina anga-kātaki ‘a ‘ene laukoví. Na‘e anga-fēfē ‘a e lava ke ma‘u ‘e Tēvita ha mapule‘i-kita pehē? ‘E lava ke tau ‘ilo ia mei hono sivisivi‘i ‘a e Saame hono tolú.

17. Ko e hā na‘á ne tokoni‘i ‘a Tēvita ke ne ma‘u ‘a e mapule‘i-kitá, pea ‘e lava fēfē ke tau fa‘ifa‘itaki kiate ia?

 ¹⁷ Na‘e fa‘u ‘e Tēvita ‘a e Saame hono tolú ‘i he taimi na‘e feinga ai hono foha ko ‘Apisalomé ke tāmate‘i iá. Na‘e ‘ohofi ‘e Simi ‘a Tēvita ‘i he lolotonga ‘a e taimi ko ení, ka na‘e ma‘u ‘e Tēvita ‘a e mālohi ke hanganaki anga-mokomoko. Anga-fēfē? ‘I he Saame 3:4, ‘oku tau lau ai ‘a e lea ‘a Tēvitá: “Te u ui le‘o-lahi kia Sihova, pea te ne tali mai kiate au mei hono mo‘unga tapú.” ‘I he taimi ‘oku faikovi mai ai kiate kitautolú, ‘oku fiema‘u ke tau lotu ‘o hangē ko ia na‘e fai ‘e Tēvitá. ‘E ‘omai leva ‘e Sihova kiate kitautolu ‘a hono laumālie mā‘oni‘oní koe‘uhi ke tau lava ‘o kātaki. ‘E lava ke ke ma‘u ha mapule‘i-kita lahi ange pe fakamolemole lahi ange ‘i he faikovi mai ha taha kiate koe? ‘Okú ke tuipau ‘oku tokanga mai ‘a Sihova ki ho‘o faingata‘a‘iá pea te ne tokoni‘i mo tāpuaki‘i koe?

18. Te tau ma‘u ‘aonga fēfē ‘i hono ngāue‘aki ‘a e fakahinohino ‘a Sihová?

¹⁸ ‘I he‘etau fai ‘a e me‘a ‘oku tau ‘ilo ‘oku totonú, te tau poto ai pea ‘e tāpuaki‘i kitautolu ‘e Sihova. ‘I he Palōveepi 4:7, ‘oku pehē ai ‘i he Tohi Tapú: “Ko e potó ‘a e me‘a mahu‘inga tahá.” Neongo ‘oku makatu‘unga ‘a e potó ‘i he ‘iló, ‘oku kau ki ai ‘a e me‘a lahi ange ‘i hono mahino‘i pē ‘a e ngaahi mo‘oni‘i me‘á. ‘Oku kau ki he potó ‘a e ngaahi fili ‘oku tau faí. Na‘a mo e fanga loó ‘oku nau fakahāhā ‘a e poto ‘i hono tuku tauhi ha me‘akai ki he taimi momokó. ‘Oku ‘ikai te nau ‘ilo ha me‘a lahi, ka ‘oku nau teuteu ‘i he poto ki he kaha‘ú. (Pal. 30:24, 25) Ko Kalaisi, ‘a ia ‘oku ui ko e “poto ‘o e ‘Otuá,” ‘okú ne fai ma‘u pē ‘a e me‘a ‘oku fakahōifua ki he‘ene Tamaí. (1 Kol. 1:24; Sione 8:29) ‘E fakapale‘i kitautolu ‘e he ‘Otuá ‘i he taimi ‘oku tau fakahāhā ai foki ‘a e potó ‘aki ‘a e fili ke fai ‘a e me‘a ‘oku tau ‘ilo ‘oku totonú pea hanganaki anga-fakatōkilalo. (Lau ‘a e Mātiu 7:21-23.) Ko ia hanganaki ngāue ke ‘ai ‘a e fakataha‘angá ko ha feitu‘u ‘a ia ‘e lava ke tauhi anga-fakatōkilalo ai ‘a e tokotaha kotoa kia Sihova. ‘Oku fiema‘u ‘a e taimi mo e kātaki ke ngāue‘aki ‘a e me‘a ‘oku tau ‘ilo ‘oku totonú. Ka ko hono fai iá ‘oku fakahāhā ai ‘a e anga-fakatōkilalo, pea ko e anga-fakatōkilaló te ne ‘ai kitautolu ke tau fiefia ‘i he taimí ni pea ta‘engata.