ʻOku pehē ʻi he ʻAisea 60:1: “Tuʻu hake, ʻe fefine, ʻo ulo atu, he kuo hoko mai ʻa hoʻo māmá. Ko e lāngilangi ʻo Sihová ʻokú ne ulo atu kiate koe.” ʻOku fakahaaʻi ʻe he potutohí ko e “fefine” ko ení ko Saione, pe Selusalema, ʻa e kolomuʻa ʻo Siuta ʻi he taimi ko iá. a (ʻAi. 60:14; 62:​1, 2) ʻOku fakafofongaʻi ʻe he koló ʻa e puleʻangá fakakātoa. Ko e ngaahi lea ʻa ʻAiseá ʻoku ʻohake ai ʻa e fehuʻi ʻe ua: ʻUluakí, ko fē taimi naʻe “tuʻu hake” ai ʻa Selusalema pea ulo atu ʻene maama fakalaumālié pea naʻe anga-fēfē? Uá, ʻoku ʻi ai ha fakahoko lahi ange ʻo e ngaahi lea ʻa ʻAiseá ʻi hotau taimí?

Ko fē taimi naʻe “tuʻu hake” ai ʻa Selusalema pea ulo atu ʻene maama fakalaumālié pea naʻe anga-fēfē? Naʻe hoko ʻa Selusalema mo hono temipalé ko e koto maumau lolotonga hono ʻave fakamālohi ʻa e kau Siú ki Pāpilone ʻi he taʻu ʻe 70. Ka ʻi he hili ʻa e tō ʻa Pāpilone ki he kau Mītiá mo e kau Pēsiá, ko e kau ʻIsileli mei he kotoa ʻo e ʻEmipaea Pāpiloné naʻe ʻatā ke nau foki ki honau fonua tupuʻangá pea toe fakafoki ʻa e lotu moʻoní. (ʻĒsela 1:​1-4) Kamata ʻi he 537 K.M., ko ha toenga faitōnunga mei he kotoa ʻo e matakali ʻe 12 naʻa nau foki. (ʻAi. 60:4) Naʻe kamata ke nau ʻohake ʻa e ngaahi feilaulaú kia Sihova, fai ʻa e ngaahi kātoangá, pea toe langa ʻa e temipalé. (ʻĒsela 3:​1-4, 7-11; 6:​16-22) Naʻe toe kamata ke ulo atu ʻa e lāngilangi ʻo Sihová ki Selusalema—ʻa ia, ko e kakai ʻa e ʻOtuá kuo toe fakafokí. Ko ia ai, naʻa nau hoko ko ha matavai ʻo e fakamaama ki he ngaahi puleʻangá, ʻa ia naʻa nau ʻi ha fakapoʻuli fakalaumālie.

Kae kehe, ko e kikite ʻa ʻAisea fekauʻaki mo e toe fakafokí ko hano konga pē naʻe fakahoko ʻi Selusalema ʻo e kuonga muʻá. Ko e tokolahi taha ʻo e kau ʻIsilelí naʻe ʻikai ke nau hokohoko atu ke talangofua ki he ʻOtuá. (Nehe. 13:27; Mal. 1:​6-8; 2:​13, 14; Māt. 15:​7-9) Ki mui ai, naʻe aʻu ʻo nau siʻaki ʻa e Mīsaiá, ʻa Sīsū Kalaisi. (Māt. 27:​1, 2) ʻI he 70 T.S., naʻe fakaʻauha ʻa Selusalema mo hono temipalé ko hono tuʻo uá ia.

Naʻe tomuʻa tala ʻe Sihova ʻa e ikuʻanga fakamamahi ko iá. (Tan. 9:​24-27) ʻOku hā mahino, naʻe ʻikai ko ʻene taumuʻa ki Selusalema ʻi he māmaní ke fakahoko ʻa e tafaʻaki kotoa ʻo e ngaahi kikite ʻo e toe fakafokí ʻi he ʻAisea vahe 60.

ʻOku ʻi ai ha fakahoko lahi ange ʻo e ngaahi lea ʻa ʻAiseá ʻi hotau taimí? ʻIo, ka ʻi he fekauʻaki mo ha fefine fakaefakatātā ʻe taha—“ko e Selusalema ʻi ʻolungá.” Naʻe tohi ʻa e ʻapositolo ko Paulá ʻo fekauʻaki mo e fefiné: “Ko ia ʻa ʻetau faʻeé.” (Kal. 4:26) Ko e Selusalema ʻi ʻolungá ko e konga fakahēvani ia ʻo e kautaha ʻa e ʻOtuá, ʻa ia ʻoku faʻuʻaki ʻa e ngaahi meʻamoʻui laumālie mateakí. Ko ʻene “fānaú” ʻoku kau ai ʻa Sīsū pea mo e kau Kalisitiane pani ʻe he laumālié ʻe toko 144,000, ʻa ia ʻi he hangē ko Paulá ʻoku nau maʻu ʻa e ʻamanaki ke moʻui ʻi hēvani. Ko e kau Kalisitiane paní ʻoku faʻuʻaki kinautolu ha “kakai māʻoniʻoni”—ʻa e “ʻIsileli ʻa e ʻOtuá.”—1 Pita 2:9; Kal. 6:16.

Naʻe anga-fēfē ʻa e “tuʻu hake” ʻa e Selusalema ʻi ʻolungá pea “ulo atu”? Naʻá ne fai eni ʻo fakafou ʻi heʻene fānau pani ʻi he māmaní. Fakahoa ʻenau ngaahi hokosiá pea mo e meʻa naʻe kikiteʻi ʻi he ʻAisea vahe 60.

Ko e kau Kalisitiane paní naʻe pau ke nau “tuʻu hake” koeʻuhí naʻa nau ʻi ha tuʻunga fakapoʻuli fakalaumālie ʻi he senituli hono ua K.M. ʻi hono kāpui kinautolu ʻe he tea ʻo e tafoki ʻo fakafepaki ki he moʻoní naʻe tomuʻa talá. (Māt. 13:​37-43)  Ko ia ai, naʻa nau hoko ko e kau pōpula ki Pāpilone ko e Lahi, ʻa e ʻemipaea ʻi māmani ʻo e lotu loí. Naʻe nofo pōpula ai pē ʻa e kau paní ʻo aʻu ki he “fakaʻosiʻosi ʻo e fokotuʻutuʻu lolotongá,” ko ha vahaʻa taimi naʻe kamata ʻi he taʻu 1914. (Māt. 13:​39, 40) ʻIkai fuoloa mei ai, ʻi he 1919, naʻe fakatauʻatāinaʻi kinautolu pea kamata leva ke nau fakaulo atu ʻa e maama fakalaumālié ʻaki ʻenau kau faivelenga ki he ngāue fakamalangá. b ʻI he faai mai ʻa e ngaahi taʻú, ko e kakai mei he kotoa ʻo e ngaahi puleʻangá kuo nau haʻu ki he maama ko iá, kau ai ʻa e toenga ʻo e ʻIsileli ʻa e ʻOtuá—ʻa e “ngaahi tuʻí” naʻe lave ki ai ʻi he ʻAisea 60:3.—Fkh. 5:​9, 10.

ʻI he kahaʻú, ko e kau Kalisitiane paní te nau tapua atu ʻa e maama fakaʻotuá ʻi ha founga ʻoku toe lahi ange. Anga-fēfē? ʻI heʻenau ʻosiki honau ʻalunga moʻui ʻi he māmaní, te nau hoko ko ha konga ʻo e “Selusalema Foʻou,” pe taʻahine mali ʻa Kalaisi ʻo e kaungā-tuʻi mo e kaungā-taulaʻeiki ʻe toko 144,000.—Fkh. 14:1; 21:​1, 2, 24; 22:​3-5.

Ko e Selusalema Foʻoú te ne fakahoko ha ngafa mahuʻinga ʻi hono fakahoko ʻa e ʻAisea 60:1. (Fakafehoanaki ʻa e ʻAisea 60:​1, 3, 5, 11, 19, 20 mo e Fakahā 21:​2, 9-11, 22-26.) Hangē pē ko e hoko ʻa Selusalema ʻi he māmaní ko e tuʻuʻanga ʻo e puleʻangá ʻi ʻIsileli ʻo e kuonga muʻá, ʻe pehē ʻa e hoko ʻa Selusalema Foʻou mo Kalaisi ko e founga-pule ia ʻi he fokotuʻutuʻu foʻou ʻo e ngaahi meʻá. ʻOku anga-fēfē ʻa e “ʻalu hifo mei hēvani mei he ʻOtuá” ʻa Selusalema Foʻoú? ʻAki hono fakahanga mai ʻene tokangá ki he māmaní. ʻE “huluhulu ʻe hono māmá ʻa e hala ke ʻaʻeva ai” ʻa e kakai mei he kotoa ʻo e ngaahi puleʻangá. ʻE aʻu ʻo fakatauʻatāinaʻi kinautolu mei he angahalá mo e maté. (Fkh. 21:​3, 4, 24) Ko e olá ʻe “toe fakafoki [kakato ʻa e] ngaahi meʻa kotoa pē,” hangē ko ia naʻe tomuʻa tala ʻe ʻAisea mo e kau palōfita kehé. (Ngā. 3:21) Ko e toe fakafoki fisifisimuʻa ko iá naʻe kamata ʻi he taimi naʻe hoko ai ʻa Kalaisi ko e Tuʻí pea ʻe fakaʻosi ʻi he ngataʻanga ʻo ʻene Pule Taʻu ʻe Afé.