Kuó ke lau fakalelei ‘a e ngaahi ‘īsiu fakamuimui ‘o e Taua Le‘o? Sai, sio angé pe ‘e lava ke ke tali ‘a e ngaahi fehu‘i ko ení:

Ko e hā ‘a e fakamo‘oni Fakatohitapu ‘oku kaungāongo‘i mai ‘a e ‘Otuá kiate kitautolu?

‘I he taimi na‘e nofo pōpula ai ‘a e kau ‘Isileli ‘o e kuonga mu‘á ‘i ‘Isipité, na‘e lāu‘ilo ‘a e ‘Otuá ki he‘enau mamahí pea ongo‘i ‘enau faingata‘a‘iá. (‘Eki. 3:7; ‘Ai. 63:9) Na‘e ngaohi kitautolu ‘i he ‘īmisi ‘o e ‘Otuá, pea ‘oku lava ke tau ma‘u ‘a e kaungāongo‘í. ‘Okú ne kaungāongo‘i mai kiate kitautolu neongo ‘oku tau ongo‘i nai ‘oku ‘ikai te tau taau mo ‘ene ‘ofá.​—wp18.3, p. 8-9.

Na‘e anga-fēfē tokoni ‘a e ngaahi akonaki ‘a Sīsuú ki he kakaí ke nau iku‘i ‘a e tomu‘a fehi‘á?

Ko e kau Siu tokolahi ‘i he taimi ‘o Sīsuú na‘a nau tomu‘a fehi‘a. Na‘e fakamamafa‘i ‘e Kalaisi ‘a e fiema‘u ke hoko ‘o anga-fakatōkilaló pea ako‘i ‘oku hala ‘a e pōlepole‘aki ‘e he kakaí ‘a honau matakalí. Na‘á ne enginaki ki hono kau muimuí ke nau fevakai‘aki ko e fanga tokoua.​—w18.06, p. 9-10.

Ko e hā ‘oku tau ako mei he ‘uhinga na‘e ‘ikai faka‘atā ai ‘e he ‘Otuá ‘a Mōsese ke ne hū ki he Fonua ‘o e Tala‘ofá?

Na‘e hoko ‘a Mōsese ko ha kaume‘a ofi ‘o Sihova. (Teu. 34:10) ‘I he ofi ke ngata ‘a e ta‘u ‘e 40 ‘i he toafá, na‘e toe lāunga ‘a e kakaí ko hono tu‘o uá ia ko e ‘ikai ‘i ai ha vaí. Na‘e tala ‘e he ‘Otuá kia Mōsese ke ne lea ki he maká. ‘I hono kehé, na‘e taa‘i ‘e Mōsese ‘a e maká. Na‘e houhau lahi ‘a Sihova ‘i he ‘ikai talangofua ‘a Mōsese ki he‘ene fakahinohinó pe ko e ‘ikai ‘ave ‘e Mōsese ‘a e lāngilangí ki he ‘Otuá koe‘uhi ko e maná. (Nōm. 20:6-12) ‘Oku totonu ke ako‘i mai heni kiate kitautolu ‘a e mahu‘inga ‘o e talangofua kia Sihova pea ‘oange ‘a e lāngilangí kiate ia.​—w18.07, p. 13-14.

‘E anga-fēfē nai ha‘atau fai ha fehālaaki kapau te tau fakamaau‘aki ‘a e me‘a ‘oku hā ki tu‘á?

‘Oku ‘i ai ‘a e tafa‘aki ‘e tolu ‘a ia ‘oku tākiekina ai ‘a e tokolahi ‘e he me‘a ‘oku hā ki tu‘á: Ko e matakali pe fonua ‘o ha tokotaha, lahi ‘o e pa‘anga ‘okú ne ma‘ú pea mo hono ta‘umotu‘á. ‘Oku mahu‘inga ke tau feinga ke sio ki he ni‘ihi kehé fakafou ‘i he vakai ta‘efilifilimānako ‘a e ‘Otuá! (Ngā. 10:34, 35)​—w18.08, p. 8-12.

Ko e hā ‘a e ngaahi founga ‘e ni‘ihi ‘e lava ke tokoni‘i ai ‘e he kau Kalisitiane ta‘umotu‘á ‘a e ni‘ihi kehé?

Ko ha Kalisitiane ta‘umotu‘a kuo liliu hono vāhenga-ngāué ‘oku kei fakamahu‘inga‘i pē ia ‘e he ‘Otuá pea lava ke ne fai ‘a e me‘a lahi ke tokoni ki he ni‘ihi kehé. Te ne kakapa atu ki he ngaahi hoa ta‘etuí, tokoni‘i ‘a e fa‘ahinga ‘ikai longomo‘uí, fai ‘a e ngaahi ako Tohi Tapu, pea fakalahi ‘ene ngāue fakafaifekaú.​— w18.09, p. 8-11.

Ko e hā ‘a e me‘a ‘oku ‘i he Puha Me‘angāue Fakafaiako ‘a e kau Kalisitiané?

‘Oku ‘i ai ‘a e kaati fetu‘utaki mo e tohi fakaafe. ‘Oku kau ai ‘a e tuleki kuo fokotu‘utu‘u lelei ‘e valú pehē ki he Taua Le‘o. ‘Oku ma‘u ‘i he puha me‘angāué ‘a e ngaahi polosiua ‘e ni‘ihi, tohi ako tefito ‘e ua, mo e vitiō ‘aonga ‘e fā kau ai ‘a e Ko e Hā ke Ako Ai ‘a e Tohi Tapú?​—w18.10, p. 16.

‘E lava fēfē ke “fakatau mai ‘a e mo‘oní” ‘e ha Kalisitiane, hangē ko ia ‘oku ekinaki ‘i he Palōveepi 23:23?

‘Oku ‘ikai ke tau totongi ha pa‘anga ke ma‘u ‘a e mo‘oní. Neongo ia, ‘oku fiema‘u ke tau fakamoleki ha taimi pea fai mo e feinga lahi koe‘uhi ke ma‘u mai ia.​—w18.11, p. 4.

Ko e hā ‘oku lava ke tau ako mei he anga ‘o e fakafeangai ‘a Hōsea ki hono uaifí, ‘a Kōmela?

Na‘e toutou fai ‘e Kōmela ‘a e tono, ka na‘e fakamolemole‘i ia ‘e Hōsea pea nofo mali ai pē mo ia. Kapau ‘oku fai ‘e ha hoa mali Kalisitiane ha fehokotaki fakasino ta‘etaau, ko e hoa tonuhiá ‘e lava ke ne fakamolemole‘i ia. ‘I he taimi ‘oku hoko atu ‘a e fehokotaki fakasino mo e hoa halaiá, ‘oku ‘ikai ha toe ‘uhinga Fakatohitapu ke fai ha vete.​—w18.12, p. 13.