Kuó ke lau fakalelei ‘a e ngaahi ‘īsiu ‘o e Taua Le‘o ‘i he ta‘u ní? Sai, sio angé pe ‘e lava ke ke tali ‘a e ngaahi fehu‘i ko ení:

‘Oku totonu ke fēfē ‘etau fakafeangai ki he kau paní?

‘Oku tau hounga‘ia ‘i he‘enau tuí; ka, ‘oku ‘ikai ke tau tokanga tōtu‘a kiate kinautolu. ‘Oku tau faka‘ehi‘ehi mei hono “fai ha fakavīkiviki‘i.” (Sute 16, fkm. ‘i lalo) He‘ikai ke tau ‘eke kiate kinautolu ha ngaahi fehu‘i fakafo‘ituitui fekau‘aki mo ‘enau ‘amanakí.​—w20.01, p. 29.

Ko e hā ‘oku totonu ke ke tuipau ai ‘oku fakatokanga‘i koe ‘e Sihova?

‘Oku fakahaa‘i ‘i he Tohi Tapú na‘á ne fakatokanga‘i koe ki mu‘a ke fanau‘i koé. Pea ‘okú ne fanongo mai ki ho‘o lotú. ‘Okú ne ‘ilo‘i ho‘o fakakaukaú mo e me‘a ‘oku ‘i ho lotó mo e kaunga ho‘o tō‘ongá kiate iá. (1 Kal. 28:9; Pal. 27:11) Kuó ne tohoaki‘i koe kiate ia.​—w20.02, p. 12.

Ko fē taimi ke tau lea aí mo e taimi ke ‘ikai lea aí?

‘Oku tau lea fiefia fekau‘aki mo Sihova. ‘Oku tau lea kapau ‘oku tau sio ki ha tokotaha ‘okú ne hu‘u atu ‘i ha ‘alunga hala. ‘Oku lea ‘a e kau mātu‘á ke fai ha fale‘i ‘o ka fiema‘u. ‘Oku ‘ikai ke tau lea (pe ‘oatu) ‘a e ngaahi fakaikiiki fekau‘aki mo ‘etau ngāue ‘i he fonua ‘oku fakataputapuí. ‘Oku ‘ikai ke tau fakahaa‘i ‘a e ngaahi me‘a fakapulipulí.​—w20.03, p. 20-21.

‘Oku anga-fēfē ‘a e kehe ‘a e fanga he‘e ‘i he Sioeli vahe 2 mei he fanga he‘e ‘i he Fakahā vahe 9?

‘Oku pehē ‘i he Sioeli 2:20-29 ‘e kapusi ‘e he ‘Otuá ‘a e fanga he‘é pea tala‘ofa ke fai ha totongi fakafoki ki he maumau na‘a nau fakatupungá. Hili iá, ‘oku hua‘i hifo ‘e he ‘Otuá hono laumālié. Na‘e fakahoko ia ‘i hono ‘ohofi ‘e he kau Pāpiloné ‘a ‘Isileli pea ki mui ai. ‘Oku fakamatala‘i ‘i he Fakahā 9:1-11 ‘a e kau pani ‘oku nau hangē ko e fanga he‘é ‘i hotau taimí ‘i he‘enau talaki ‘a e fakamaau ‘a e ‘Otuá ki he fokotu‘utu‘u fulikivanu ko ení, ‘oku ‘ai ai hono kau poupoú ke nau mātu‘aki tailiili.​—w20.04, p. 3-6.

Ko hai ‘a e tu‘i ‘o e tokelaú he ‘aho ní?

Ko Lūsia mo ‘ene fa‘ahí. Kuo nau kaunga fakahangatonu ki he kakai ‘a e ‘Otuá, ‘o tapui ‘a e ngāue fakamalangá pea fehi‘anekina‘i ‘a e Kau Fakamo‘oní. Ko e tu‘i ‘o e tokelaú kuó ne fe‘auhi mo e tu‘i ‘o e tongá.​—w20.05, p. 13.

Ko e ngaahi ‘ulungaanga ‘e hiva pē ‘i he Kalētia 5:22, 23 ‘a e “fua ‘o e laumālié”?

‘Ikai. ‘Oku tokoni‘i kitautolu ‘e he laumālie mā‘oni‘oní ke fakatupulekina ha ngaahi ‘ulungaanga lelei kehe, hangē ko e mā‘oni‘oní. (‘Ef. 5:8, 9)​—w20.06, p. 17.

Ko e hā ha fakatu‘utāmaki ‘e taha hono tuku atu ‘a e ngaahi me‘a fekau‘aki mo kitautolu ‘i he mītia fakasōsialé?

Ko e me‘a ‘okú ke tuku atú ‘e fakahaa‘i atu nai ai ‘okú ke pōlepole, ‘o ‘ikai ke anga-fakatōkilalo.​—w20.07, p. 6-7.

Ko e hā ‘e lava ke ako ‘e he kau faifekau Kalisitiané mei he kau toutai taukeí?

Na‘a nau toutai ‘i he taimi mo e feitu‘u ‘oku ngalingali ‘e ma‘u ai ‘a e iká. ‘Oku ako‘i ke nau ngāue‘aki ‘a e naunau totonú. Pea ‘oku nau ngāue loto-to‘a ‘i he tu‘unga faingata‘á. ‘E lava ke tau fai ‘a e me‘a tatau ‘i he‘etau ngāue fakafaifekaú.​—w20.09, p. 5.

Ko e hā ‘a e ngaahi founga ‘e lava ke tau tokoni‘i ai ‘etau kau ako Tohi Tapú ke fakaloloto‘i ‘enau ‘ofa kia Sihová?

‘E lava ke tau fakalototo‘a‘i kinautolu ke lau faka‘aho ‘a e Tohi Tapú pea fakalaulauloto ki he me‘a na‘a nau laú. Pea ‘e lava ke tau ako‘i kinautolu ke lotu.​—w20.11, p. 4.

Ko hai ‘oku kau ‘i he fakamatala ko eni: “‘E toetu‘u kotoa pē koe‘uhi ko Kalaisi”?​—1 Kol. 15:22.

Na‘e ‘ikai ke pehē ‘e he ‘apositolo ko Paulá ko e fa‘ahinga kotoa ‘o e tangatá ‘e fokotu‘u hake. Na‘á ne lave ki he kau Kalisitiane paní, ko e fa‘ahinga na‘e “fakatoputapu‘i ‘o fā‘ūtaha mo Kalaisi Sīsuú.” (1 Kol. 1:2; 15:18)​—w20.12, p. 5-6.

Ko e hā ‘e fai ‘e he kau paní hili ‘enau ‘liliu ‘i ha fo‘i kemo pē ‘a e matá, ‘i he lolotonga ‘a e ifi ‘a e talupite faka‘osí’?​—1 Kol. 15:51-53.

Te nau kau fakataha mo Kalaisi ‘i hono pule‘i ‘a e kakaí ‘aki ha tokotoko ukamea. (Fkh. 2:26, 27)​—w20.12, p. 12-13.