1. ‘Oku anga-fēfē ho‘o langa hake ha kaume‘a vāofi mo ha taha?

KO E anga-mahení, ko e ‘uluaki sitepu ke langa hake ha kaume‘a vāofi mo ha taha ‘okú ke fetaulaki mo ia ko hono fakamoleki ha taimi mo ia. ‘I ho‘omo fetalanoa‘akí, ‘o vahevahe ho‘omo ngaahi fakakaukaú mo e hokosiá, ‘okú mo hoko ai ‘o kaume‘a. Neongo ia, ‘i hono langa hake ha kaume‘a vāofi mo Sīsū, ‘oku tau fehangahangai mo e ngaahi pole. Ko e hā ‘a e ni‘ihi ‘o kinautolu?

2. Ko e hā ‘a e ‘uluaki pole ‘oku tau fehangahangai mo iá?

² Ko e ‘uluaki polé kuo te‘eki ai ke tau fetaulaki mo Sīsū. Na‘e fehangahangai ‘a e kau Kalisitiane tokolahi ‘i he ‘uluaki senitulí mo e pole tatau. Ka na‘e pehē ‘e Pita: “Neongo na‘e ‘ikai ‘aupito te mou sio kiate ia, ‘oku mou ‘ofa ‘iate ia. Neongo ‘oku ‘ikai te mou mātā ia he taimí ni, ka ‘oku mou ngāue‘i ‘a e tui kiate ia.” (1 Pita 1:8) Ko ia ‘oku malava ke ma‘u ha vaha‘angatae vāofi mo Sīsū neongo kuo te‘eki ke tau fetaulaki mo ia.

3. Ko e hā ‘a e pole hono ua ‘oku tau fehangahangai mo iá?

³ Ko e pole hono uá ‘oku ‘ikai malava ke tau lea kia Sīsū. ‘I he‘etau lotú, ‘oku tau talanoa ai kia Sihova. Ko e mo‘oni, ‘oku tau lotu ‘i he huafa ‘o Sīsuú, ka ‘oku ‘ikai ke tau talanoa fakahangatonu kiate ia. Ko hono mo‘oní, ‘oku ‘ikai ke loto ‘a Sīsū ke tau lotu ange kiate ia. Ko e hā hono ‘uhingá? Koe‘uhi ko e lotú ‘oku totonu ke fai kia Sihova toko taha pē. (Māt. 4:10) Neongo ia, ‘e lava ke tau fakahāhā ‘etau ‘ofa kia Sīsuú.

4. Ko e hā ‘a e pole hono tolú, pea ko e hā te tau lāulea ki ai ‘i he kupu ko ení?

 ⁴ Ko e pole hono tolú ‘oku nofo ‘a Sīsū ia ‘i hēvani, ko ia he‘ikai lava ke tau fakamoleki ha taimi mo ia. Ka ‘e lava ke tau kei ‘ilo‘i ‘a e me‘a lahi fekau‘aki mo Sīsū ‘o ‘ikai ke ‘i ai tonu mo ia. Te tau sivisivi‘i ‘a e me‘a ‘e fā ‘e lava ke tau fai ke fakaivimālohi‘i ai ‘etau kaume‘a mo iá. Neongo iá, tau ‘uluaki sivisivi‘i angé ‘a e ‘uhinga ‘oku mātu‘aki mahu‘inga ai ke tau langa hake ha kaume‘a vāofi mo Kalaisí.

5. Ko e hā kuo pau ai ke tau kaume‘a mo Sīsuú? (Sio foki ki he puha “ Kaume‘a mo Sīsuú ‘Oku Taki Atu ki he Kaume‘a mo Sihova” mo e “ Vakai Mafamafatatau ki he Ngafa ‘o Sīsuú.”)

⁵ Kuo pau ke tau hoko ko e kaume‘a ‘o Sīsū kapau ‘oku tau loto ke ma‘u ha vaha‘angatae lelei mo Sihova. Ko e hā ‘oku mo‘oni ai iá? Fakakaukau ki ha ‘uhinga ‘e ua. ‘Uluakí, na‘e tala ‘e Sīsū ki he‘ene kau ākongá: “Ko e Tamaí tonu ‘okú ne ‘ofa ‘iate kimoutolu, koe‘uhi kuo mou ‘ofa ‘iate au.” (Sione 16:27) Na‘á ne toe pehē: “‘Oku ‘ikai ha‘u ha taha ki he Tamaí ka ‘i he‘ene fou pē ‘iate au.” (Sione 14:6) Ko e feinga ke kaume‘a mo Sihova ‘o ‘ikai ke langa hake ha kaume‘a vāofi mo Sīsuú ‘oku hangē ia ko e feinga ke hū ki ha fale ‘o ‘ikai fou ‘i he matapaá. Na‘e ngāue‘aki ‘e Sīsū ha talanoa fakatātā meimei tatau ‘i he‘ene fakamatala‘i ‘a ia tonu ko e “matapā ki he fanga sipí.” (Sione 10:7) Ko e ‘uhinga hono uá ‘oku tapua haohaoa atu ‘e Sīsū ‘a e ngaahi ‘ulungaanga ‘ene Tamaí. Na‘á ne tala ange ki he‘ene kau ākongá: “‘Ilonga ‘a ia kuó ne mātā aú kuó ne mātā foki ‘a e Tamaí.” (Sione 14:9) Ko ia ko ha founga mahu‘inga ke tau hoko ai ‘o ‘ilo‘i ‘a Sihová ko e ako fekau‘aki mo e mo‘ui ‘a Sīsuú. ‘I he‘etau ako fekau‘aki mo Sīsuú, ‘e tupulaki ‘etau ‘ofa kiate iá. Pea ‘i he lahi ange ‘etau ‘ofa kia Sīsuú, ko e toe lahi ange ia ‘etau ‘ofa ki he‘ene Tamaí.

6. Ko e hā ‘a e ‘uhinga ‘e taha kuo pau ai ke tau ma‘u ha vaha‘angatae mo Sīsū? Fakamatala‘i.

 ⁶ Kuo pau ke tau ma‘u ha vaha‘angatae mo Sīsū kae lava ke tali ‘etau ngaahi lotú. ‘Oku ‘uhinga eni ke tau fai ‘a e me‘a lahi ange ‘i he lea‘aki pē ‘a e kupu‘i lea “‘i he huafa ‘o Sīsū” ‘i he‘etau ngaahi lotu anga-mahení. Kuo pau ke tau ‘ilo‘i ‘a e founga ‘oku ngāue‘aki ai ‘e Sihova ‘a Sīsū ‘i hono tali ‘etau ngaahi lotú. Na‘e tala ange ‘e Sīsū ki he‘ene kau ‘apositoló: “‘Ilonga ha me‘a te mou kole ‘i hoku hingoá, te u fai eni.” (Sione 14:13) Neongo ko Sihova ‘a e tokotaha ‘okú ne fanongo mo tali ‘etau ngaahi lotú, kuó ne ‘oange ‘a e mafai kia Sīsū ke fakahoko ‘Ene ngaahi filí. (Māt. 28:18) Ko ia, ki mu‘a ke tali ‘e he ‘Otuá ‘etau ngaahi lotú, ‘okú ne sio pe kuo tau ngāue‘aki ‘a e fale‘i ‘a Sīsuú. Ko e fakatātaá, na‘e pehē ‘e Sīsū: “Kapau te mou fakamolemole‘i ‘a e faihala ‘a e kakaí, ‘e fakamolemole‘i foki kimoutolu ‘e ho‘omou Tamai fakahēvaní; he kapau ‘e ‘ikai ke mou fakamolemole‘i ‘a e faihala ‘a e kakaí, ‘e ‘ikai foki ke fakamolemole‘i ‘e ho‘omou Tamaí ‘a ho‘omou faihalá.” (Māt. 6:14, 15) He mahu‘inga leva ē ke tau fakafeangai ki he ni‘ihi kehé ‘i he anga-lelei ‘o hangē ko e fakafeangai mai ‘a Sihova mo Sīsū!

7. Ko hai ‘oku ma‘u ‘aonga mei he feilaulau huhu‘i ‘a Sīsū?

⁷ Ko e fa‘ahinga pē ‘oku kaume‘a vāofi mo Sīsuú te nau ma‘u ‘aonga mei he‘ene feilaulau huhu‘í. ‘Oku anga-fēfē ‘etau ‘ilo‘i iá? Na‘e pehē ‘e Sīsū te ne tuku atu “‘ene mo‘uí ma‘a hono ngaahi kaume‘á.” (Sione 15:13) Ko e kakai faitōnunga na‘a nau mo‘ui ki mu‘a ke ha‘u ‘a Sīsū ki he māmaní ‘e fiema‘u ke nau ako fekau‘aki mo ia pea hoko ‘o ‘ofa kiate ia. Ko e kau tangata mo e kau fefine hangē ko ‘Ēpalahame, Sela, Mōsese mo Lēhapi te nau toetu‘u, ka na‘a mo e kau sevāniti mā‘oni‘oni ko eni ‘a Sihová ‘e fiema‘u ke nau langa hake ha kaume‘a mo Sīsū kae lava ke nau ma‘u ‘a e mo‘ui ta‘engatá.—Sione 17:3; Ngā. 24:15; Hep. 11:8-12, 24-26, 31.

8-9. Hangē ko ia ‘oku fakamatala‘i ‘i he Sione 15:4, 5, ko e hā ‘oku lava ke tau fai koe‘uhi ko hotau vaha‘angatae mo Sīsuú, pea ko e hā ‘oku mahu‘inga ai iá?

⁸ ‘Oku tau fiefia ‘i he ngāue fakataha mo Sīsū ‘i he ngāue fakamalangá mo hono ako‘i ‘a e ongoongo lelei ‘o e Pule‘angá. ‘I he ‘i māmani ‘a Sīsuú, na‘á ne hoko ko ha faiako. Pea talu ‘ene foki ki hēvaní, ko Sīsū, ‘a e ‘ulu ‘o e fakataha‘angá, kuó ne hokohoko atu ke tataki ‘a e ngāue fakamalangá mo e faiakó. ‘Okú ne vakai hifo mo hounga‘ia ‘i ho‘o ngaahi feinga ke tokoni‘i ‘a e tokolahi taha ‘e ala lavá ke hoko ‘o ‘ilo‘i ia mo ‘ene Tamaí. Ko hono mo‘oní, ko e founga pē ‘oku lava ke tau fakahoko ai ‘a e ngāue ko ení ko e tokoni ‘a Sihova mo Sīsuú.—Lau ‘a e Sione 15:4, 5.

⁹ ‘Oku ako‘i mā‘ala‘ala mai ‘e he Folofolá kuo pau ke tau ma‘u ‘a e ‘ofa kia Sīsū pea tauhi ma‘u ia kae lava ke tau fakahōifua‘i ‘a Sihova. Ko ia tau lāulea angé ki he me‘a ‘e fā ‘e lava ke tau fai ke hoko ai ko ha kaume‘a ‘o Sīsū.

10. Ko e hā ‘a e ‘uluaki sitepu ki he‘etau langa hake ha kaume‘a mo Sīsū?

¹⁰ (1) Hoko ‘o ‘ilo‘i ‘a Sīsū. ‘E lava ke tau fai eni ‘aki hono lau ‘a e tohi ‘a Mātiu, Ma‘ake, Luke mo Sione. ‘I he‘etau fakalaulauloto ki he ngaahi fakamatala Fakatohitapu fekau‘aki mo e mo‘ui ‘a Sīsuú, te tau hoko ai ‘o ‘ofa mo faka‘apa‘apa‘i ‘a Sīsū koe‘uhi ko ‘ene fakafeangai anga-lelei ki he kakaí. Ko e fakatātaá, neongo ko ia honau ‘Eikí, na‘e ‘ikai ke ne fakafeangai ki he‘ene kau ākongá ‘o hangē ha kau tamaio‘eikí. Neongo ia, na‘á ne fakahaa‘i ‘ene ngaahi fakakaukau mo e ongo‘i lolotó kiate kinautolu. (Sione 15:15) Na‘e kaungāmamahi ‘a Sīsū mo kinautolu pea tangi mo kinautolu.  (Sione 11:32-36) Na‘a mo hono kau fakafepakí na‘a nau ‘ilo‘i na‘á ne hoko ko ha kaume‘a ‘o e fa‘ahinga na‘a nau tali ‘ene pōpoakí. (Māt. 11:19) ‘I he‘etau fa‘ifa‘itaki ki he anga ‘o e fakafeangai ‘a Sīsū ki he‘ene kau ākongá, ko hotau vaha‘angatae mo e ni‘ihi kehé ‘e lelei ange, te tau ongo‘i fiemālie mo fiefia ange, pea ‘e tupulaki ‘etau hounga‘ia ‘ia Kalaisí.

11. Ko e hā ‘a e sitepu hono ua ke hoko ai ko e kaume‘a ‘o Sīsuú, pea ko e hā ‘oku mahu‘inga aí?

¹¹ (2) Fa‘ifa‘itaki ki he anga ‘o e fakakaukau mo e tō‘onga ‘a Sīsū. Ko e lelei ange ‘etau ‘ilo‘i mo fa‘ifa‘itaki ki he anga ‘ene fakakaukaú, ko e vāofi ange ia ‘etau kaume‘a mo iá. (1 Kol. 2:16) ‘E lava fēfē ke tau fa‘ifa‘itaki kia Sīsū? Fakakaukau ki ha fa‘ifa‘itaki‘anga ‘e taha. Na‘e fakakaukau lahi ange ‘a Sīsū ki hono tokoni‘i ‘a e ni‘ihi kehé ‘i hono fakahōhō‘ia‘i ‘a ia tonú. (Māt. 20:28; Loma 15:1-3) Koe‘uhi ko ‘ene ma‘u ‘a e fakakaukau fakae‘atamai ko ení, na‘á ne feilaulau‘i-kita mo fa‘a fakamolemole. Na‘e ‘ikai ke ne ‘itangofua ‘i he me‘a na‘e lea‘aki ‘e he kakaí fekau‘aki mo iá. (Sione 1:46, 47) Pea na‘e ‘ikai ke ne tukulotoa ‘a e fehālaaki ‘a e kakaí ‘i he kuohilí ke uesia ai ‘ene vakai kiate kinautolú. (1 Tīm. 1:12-14) Na‘e pehē ‘e Sīsū: “Ko e me‘a eni ‘e ‘ilo ai ‘e he fa‘ahinga kotoa ko ‘eku kau ākonga kimoutolú—‘o kapau ‘oku mou ma‘u ‘a e ‘ofá ‘i homou lotolotongá.” (Sione 13:35) Fēfē ke ke ‘eke hifo, “‘Oku ou muimui ki he fa‘ifa‘itaki‘anga ‘a Sīsuú ‘aki hono fai ‘a e me‘a kotoa ‘oku ou malavá ke tauhi ma‘u ‘a e melino mo hoku fanga tokouá?”

12. Ko e hā ‘a e sitepu hono tolu ke hoko ai ko e kaume‘a ‘o Sīsuú, pea ‘e lava fēfē ke tau fou ai?

¹² (3) Poupou ki he fanga tokoua ‘o Kalaisí. ‘Oku vakai ‘a Sīsū ki he me‘a ‘oku tau fai ma‘a hono fanga tokoua paní ‘o hangē ‘oku tau fai ange ia kiate iá. (Māt. 25:34-40) Ko e founga tefito ‘etau poupou ki he kau paní ko e kau kakato ki hono malanga‘i ‘o e Pule‘angá mo e ngāue ngaohi ākonga ‘a ia na‘e fakahinohino ‘e Sīsū ki hono kau muimuí ke nau faí. (Māt. 28:19, 20; Ngā. 10:42) ‘I he tokoni pē ‘a e ‘fanga sipi kehé’ ‘oku lava ai ‘a e fanga tokoua ‘o Kalaisí ke fakahoko ‘a e ngāue fakamalanga lahi he taimí ni ‘i he māmaní. (Sione 10:16) Kapau ‘okú ke kau ‘i he fanga sipi kehé, ko e taimi taki taha ‘okú ke kau ai ‘i he ngāue ko ení, ‘okú ke fakahaa‘i ai ho‘o ‘ofa ki he kau paní pehē foki kia Sīsū.

13. ‘Oku lava fēfē ke tau ngāue‘aki ‘a e akonaki ‘a Sīsū ‘i he Luke 16:9?

¹³ ‘Oku tau toe hoko ko e kaume‘a ‘o Sihova mo Sīsū ‘aki ‘etau ngāue‘aki ‘etau pa‘angá ke poupou ki he ngāue ‘okú na tatakí. (Lau ‘a e Luke 16:9.) Ko e fakatātaá, ‘e lava ke tau tokoni ki he ngāue ‘i māmani lahí, ‘a ia ‘oku kau ai hono fakapa‘anga ‘a e malanga‘i ‘o e ongoongo leleí ‘i he ngaahi feitu‘u tu‘u mavahé, langa mo tauhi ‘a e ngaahi fale ‘oku poupou ki he lotu mo‘oní, pea tokonaki ‘a e tokoni fakamatelie ki he fa‘ahinga ‘i ha fakatamaki. ‘E lava foki ke tau poupou fakapa‘anga ki he‘etau fakataha‘angá tonu pea tokoni‘i ‘a e fa‘ahinga ‘oku tau ‘ilo‘i ‘oku nau fiema‘u tokoní. (Pal. 19:17) Ko e ngaahi founga eni ‘oku lava ke tau poupou ai ki he fanga tokoua ‘o Kalaisí.

14. Hangē ko ia ‘i he ‘Efesō 4:15, 16, ko e hā ‘a e sitepu hono fā ki he hoko ko e kaume‘a ‘o Sīsuú?

¹⁴ (4) Poupou ki he fokotu‘utu‘u ‘a e fakataha‘anga Kalisitiané. ‘Oku tau fakaivimālohi‘i ‘etau kaume‘a mo Sīsū ko e ‘ulu ‘o e fakataha‘angá ‘i he taimi ‘oku tau ngāue fakataha ai mo e fa‘ahinga kuo fakanofo ke tokanga‘i kitautolú. (Lau ‘a e ‘Efesō 4:15, 16.) Ko e fakatātaá, ‘oku tau feinga he taimí ni ke fakapapau‘i ko e kotoa ‘o e ngaahi Fale Fakataha‘angá ‘oku ngāue ‘aonga kakato ‘aki. Ke fakahoko ení, kuo fakataha‘i ‘a e ngaahi fakataha‘anga ‘e ni‘ihi pea liliu mo e ngaahi feitu‘u ngāué. Ko e fokotu‘utu‘u ko ení kuo fakahaofi ai ‘a e pa‘anga  lahi. Kae kehe, ‘i he taimi tatau, kuo fiema‘u ki he kau malanga ‘e ni‘ihi ke nau fe‘unu‘aki ki he ngaahi tu‘unga fo‘ou. Ko e kau malanga faitōnunga ko iá kuo nau ngāue nai ‘i ha fakataha‘anga ‘i he laui ta‘u pea kuo nau vāofi mo e fanga tokoua mo e fanga tuofāfine ‘i aí. Ka ko eni kuo kole ange ke nau hiki ki ha fakataha‘anga kehe. Kuo pau pē na‘e fiefia ‘a Sīsū ‘i he vakai hifo ki he kau ākonga mateaki ko ení ‘oku nau poupou ki he fokotu‘utu‘u ko ení!

15. ‘E anga-fēfē ‘a e lelei ange ‘etau kaume‘a mo Sīsuú ‘i he kaha‘ú?

¹⁵ Ko e fa‘ahinga ‘oku pani ‘aki ‘a e laumālie mā‘oni‘oní ‘oku nau ma‘u ‘a e ‘amanaki ‘o e ‘i ai mo Sīsū ‘o ta‘engata pea kaungā‘ea mo ia ‘i he Pule‘anga ‘o e ‘Otuá. Ko hono mo‘oní te nau ‘i ai mo Kalaisi—sio kiate ia, talanoa mo ia pea fakamoleki ‘a e taimi mo ia. (Sione 14:2, 3) Ko e fa‘ahinga ‘oku nau ma‘u ‘a e ‘amanaki ke mo‘ui ‘i he māmaní te nau ma‘u foki ‘a e ‘ofa mo e tokanga ‘a Sīsuú. Neongo he‘ikai ke nau sio kia Sīsū, ko honau vaha‘angatae mo iá ‘e tupu ke toe mālohi ange ‘i he‘enau fiefia ‘i he mo‘ui na‘e tala‘ofa ‘e Sihova mo Sīsū ma‘anautolú.—‘Ai. 9:6, 7.

16. Ko e hā ‘a e ngaahi tāpuaki ‘oku tau ma‘u mei he‘etau kaume‘a mo Sīsuú?

¹⁶ ‘I he‘etau tali ‘a e fakaafe ‘a Sīsū ke hoko ko hono kaume‘á, ‘oku tau ma‘u ai ‘a e ngaahi tāpuaki lahi. Ko e fakatātaá, ‘oku tau ma‘u ‘aonga mei he‘ene ‘ofá mo e poupoú he taimí ni. ‘Oku tau ma‘u ‘a e faingamālie ke mo‘ui ta‘engata. Pea ko e mahu‘inga tahá, ko ‘etau kaume‘a mo Sīsuú ‘e taki atu ia ki he koloa lelei tahá—ko ha vaha‘angatae fakafo‘ituitui vāofi mo e Tamai ‘a Sīsuú, ‘a Sihova. Ko ha monū mo‘oni ē ke ui ko e kaume‘a ‘o Sīsū!