Kapau ʻokú ke loto ke ke ʻiloʻi lelei ha tokotaha, ʻoku tokoni ʻa hoʻo ako ki he meʻa kuó ne faí pea pehē ki he ngaahi faingataʻa kuó ne ikuʻí. ʻI he tuʻunga meimei tatau, kapau ʻokú ke loto ke ʻiloʻi lelei ʻa e ʻOtuá, ʻoku fiemaʻu ke ke ako ki he meʻa kuó ne faí. ʻI hoʻo fai peheé, te ke ofo nai ke ʻiloʻi ʻa e lahi ʻo e meʻa kuó ne fai ʻi he kuohilí ʻo tau maʻu ʻaonga ai ʻi he taimí ni pea pehē ki hotau kahaʻú.

Ko Sihova ko e ʻOtuá ʻa e Tokotaha-Fakatupu Maʻongoʻongá, pea ko hono “ngaahi anga ʻoku taʻehāmaí, ʻa hono mālohi taʻengatá . . . ʻoku hā mahino mai ia mei hono fakatupu ʻo e māmaní ʻo faai mai, koeʻuhi ʻoku ʻiloʻi ia ʻi he ngaahi meʻa kuo ngaohí.” (Loma 1:20) “Ko e Tokotaha-Ngaohi ia ʻo e māmaní ʻaki hono mālohí, ko e Tokotaha ia naʻá ne fokotuʻu ʻa e fonua mahú ʻaki hono potó pea naʻá ne falō atu ʻa e ngaahi langí ʻaki ʻene mahinó.” (Selemaia 10:12) Ko e fakaofo ʻo e fakatupú ʻoku toe fakaeʻa ai ʻa e mahuʻingaʻia ʻa e ʻOtuá ʻiate kitautolú.

Fakakaukau ki hono ʻai ʻe Sihova ke makehe ʻetau moʻuí ʻaki ʻene fakatupu ʻa e tangatá “ʻi hono ʻīmisí.” (Sēnesi 1:27) ʻOku ʻuhinga iá ʻokú ne ʻai ke tau lava ʻo tapua atu hono ʻulungaanga tuʻu-ki-muʻá ʻi ha ngaahi founga iiki. Naʻá ne fakatupu kitautolu fakataha mo e malava fakalaumālie, ʻa ia ko e malava ke mahinoʻi ʻa e anga ʻo ʻene vakaí mo e meʻa ʻokú ne fakamahuʻingaʻí. ʻI heʻetau feinga mālohi ke moʻui ʻo fakatatau ki he meʻa ko iá, ʻoku tau fiefia lahi ange ai mo maʻu ha moʻui mohu ʻuhinga. Mahulu hake aí, kuó ne ʻomai ʻa e malava ke maʻu ha vahaʻangatae mo ia.

ʻOku fakamoʻoniʻi ʻe he foʻi māmaní ʻa e anga ʻo e ongoʻi ʻa e ʻOtuá ʻo fekauʻaki mo kitautolú. ʻI he ngaahi lea ʻa e ʻapositolo ko Paulá, ko e ʻOtuá “naʻe ʻikai te ne tuku taʻeʻomai ha fakamoʻoni fekauʻaki mo ia tonu ʻi heʻene faileleí, ʻaki hono foaki mai kiate [kitautolu] ʻa e ʻuha mei he langí mo e ngaahi faʻahitaʻu mahu, ʻo ne fakamākona [kitautolu] ʻaki ʻa e meʻakai pea fakafonu [hotau] lotó ʻaki ʻa e fiefia.” (Ngāue 14:17) ʻOku tokonaki mai ʻe he ʻOtuá ʻo lahi ange ia ʻi he meʻa ʻoku fiemaʻu ke tau lava ʻo moʻui aí. Naʻá ne tokonaki mai ʻo hulu ʻa e ngaahi meʻa lahi mo kehekehe koeʻuhí ke tau fiefia ʻi he moʻuí. ʻI he kotoa ʻo e meʻá ni ʻokú ne fakaʻali mai ʻa e meʻa naʻá ne fakataumuʻa kiate kitautolú.

Naʻe ngaohi ʻe Sihova ʻa e foʻi māmaní koeʻuhi ke lava ʻa e faʻahinga ʻo e tangatá ʻo moʻui taʻengata ʻi ai. ʻOku pehē ʻe he Tohi Tapú: “Kuó ne foaki ia ki he ngaahi foha ʻo e tangatá,” pea “naʻe ʻikai te ne fakatupu ia ke hoko ko e koto taʻeʻaonga, ka naʻá ne faʻu ia ke nofoʻi.” (Saame 115:16; ʻAisea 45:18) Ke nofoʻi ʻe hai pea ko e hā hono fuoloá? “Ko e kau māʻoniʻoní  te nau maʻu ʻa e māmaní, pea te nau nofo ai ʻo taʻengata.”​—Saame 37:29.

Ko hono moʻoní, naʻe fakatupu ʻe Sihova ʻa e ʻuluaki tangatá mo e fefiné, ʻa ʻĀtama mo ʻIvi, pea tuku kinaua ki ha māmani palataisi “ke . . . ngoueʻi ia pea mo tokangaʻi ia.” (Sēnesi 2:8, 15) Naʻe ʻoange ʻe he ʻOtuá kiate kinaua ha ngāue fakafiefia ʻe ua: “Mo fanafanau mo fakatokolahi pea fakafonu ʻa e māmaní pea mo pule ki ai.” (Sēnesi 1:28) Naʻe maʻu foki ʻe ʻĀtama mo ʻIvi ʻa e ʻamanaki ke fiefia ʻi he māmaní ʻo taʻengata. Ko e meʻa fakamamahí, naʻá na fili ke talangataʻa ki he ʻOtuá pea ko e ʻuhinga ia naʻe mole ai ʻa e ʻamanaki ko e hoko ʻo ʻi he haʻohaʻonga ʻo e “kau māʻoniʻoní” ʻa e faʻahinga “te nau maʻu ʻa e māmaní.” Kae kehe, hangē ko ia ʻoku tau vakai ki aí, naʻe ʻikai ke liliu ʻe heʻena ngāué ʻa e taumuʻa ʻa Sihova kiate kitautolu pe ki he foʻi māmaní. ʻUluakí, tau lāulea angé ki ha meʻa ʻe taha kuo fai ʻe he ʻOtuá.

Ko e Tohi Tapú ʻoku toe ʻiloa ia ko e Folofola ʻa e ʻOtuá. Ko e hā naʻe tokonaki mai ai ʻe Sihova ʻa e Tohi Tapú? Ko e ʻuhinga tefitó ke lava ke tau ako ai ʻo fekauʻaki mo ia. (Palōveepi 2:1-5) Ko e moʻoni, ʻoku ʻikai ke tali ʻe he Tohi Tapú ʻa e fehuʻi kotoa pē ʻoku lava ke tau ʻeke ʻo fekauʻaki mo e ʻOtuá​—ʻoku ʻikai lava ia ʻe ha toe tohi. (Tangata Malanga 3:11) Kae kehe ko e meʻa kotoa ʻoku ʻi he Tohi Tapú ʻoku tokoniʻi ai kitautolu ke tau ʻilo fekauʻaki mo e ʻOtuá. ʻOku tau sio ai ko hai ia ʻo fakafou ʻi he anga ʻo ʻene fakafeangai ki he kakaí. ʻOku tau ʻiloʻi ʻa e faʻahinga kakai ʻokú ne saiʻia aí pe ʻikai saiʻia aí. (Saame 15:1-5) ʻOku tau ʻilo ʻa e anga ʻo ʻene vakai ki he lotú, tuʻunga fakaeʻulungāngá, mo e ngaahi meʻa fakamatelié. Pea ʻoku ʻomai ʻe he Tohi Tapú ʻa e fakamatala māʻalaʻala ki he ngaahi ʻulungaanga ʻo Sihová fakafou ʻi he ngaahi lea mo e ngaahi ngāue hono ʻAló, ʻa Sīsū Kalaisi.​—Sione 14:9.

Ko e toe ʻuhinga ʻe taha naʻe tokonaki mai ai ʻe Sihova ʻene Folofolá, ʻa e Tohi Tapú, koeʻuhi ke lava ke tau ʻiloʻi ʻa e founga ke hoko ai ʻo fiefiá, mo maʻu ha moʻui mohu ʻuhinga. Fakafou ʻi he Tohi Tapú, ʻoku tala mai ai ʻe Sihova ʻa e founga ke maʻu ai ha fāmili fiefia, founga ke hoko ai ʻo fiemālie pē ʻi he meʻa ʻoku maʻú, mo e founga ke fekuki ai mo e loto-mafasiá. Hangē ko ia ʻe toki fakamatalaʻi ʻi he makasini ko ení, ʻoku ʻi he Tohi Tapú ʻa e tali ki he ongo fehuʻi lalahi hangē: Ko e hā ʻoku lahi fau ai ʻa e faingataʻá? Ko e hā ʻoku tuku tauhi mai ʻe he kahaʻú? ʻOku toe fakamatalaʻi ai ʻa e meʻa kuo fai ʻe he ʻOtuá ke aʻusia ʻene muʻaki taumuʻá.

Ko e Tohi Tapú ko ha tohi fakaofo ia​—ko ha lavameʻa fakaʻotua ia—​ʻi he founga kehekehe. Naʻe hiki eni ʻe ha kau tangata ʻe toko 40 nai ʻi ha vahaʻa taimi ko e taʻu ʻe 1,600 tupu, kae kehe ʻoku makehe ia koeʻuhí ko e ʻOtuá ʻa e Tokotaha-Faʻutohí. (2 Tīmote 3:16) ʻI he ʻikai hangē ko e ngaahi ngāue ʻo e kuonga muʻá, kuo fakatolonga tonu mātē mai ia ʻi ha ngaahi taʻu, ʻo hangē ko ia kuo fakapapauʻi ʻe he ngaahi takainga tohi ʻe laui afe ʻo e Tohi Tapú ʻi he kuonga muʻá. Ko e meʻa ʻoku toe mahulu hake aí, kuo hao ʻa e Tohi Tapú mei he ngaahi feinga ke taʻofi hono liliú, tufakí mo hono laú. ʻI he ʻahó ni, ko e tohi tufaki lahi taha eni mo liliu lahi tahá. Ko e ʻi ai ʻa e Tohi Tapú ko ha fakamoʻoni ia “ko e folofola ʻa hotau ʻOtuá ʻoku tolonga ʻo taʻengata.”​—ʻAisea 40:8.

Ko e toe lavameʻa ʻe taha ʻa e ʻOtuá ko e ngaahi tokonaki makehe kuó ne fai ke fakapapauʻi ʻene taumuʻa kiate kitautolú. Hangē ko ia naʻe lave ki ai ki muʻá, naʻe fakataumuʻa ʻe he ʻOtuá ki he faʻahinga ʻo e tangatá ke nau moʻui taʻengata ʻi he māmaní. Kae kehe, ʻi he taimi naʻe fili ai ʻa ʻĀtama ke talangataʻa ki he ʻOtuá pea faiangahalá, naʻe mole meiate ia ʻa e faingamālie ke moʻui taʻengata ʻo ʻikai ngata pē kiate ia tonu kae pehē foki ki heʻene fānau ʻi he kahaʻú. “Ko e fou mai ʻi he tangata ʻe toko taha ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.” (Loma 5:12) Ko e talangataʻa ʻa e tangatá naʻá ne fakafaingataʻaʻiaʻi ʻa e taumuʻa ʻa e ʻOtuá. Naʻe anga-fēfē ʻa e fakafeangai ki ai ʻa Sihová?

Ko e ngaahi ngāue ʻa Sihová naʻe faitatau mo hono ʻulungāngá. Ko ʻene fakamaau totonú naʻá ne ʻai ʻa ʻĀtama mo ʻIvi ke na fai ha fakamatala ki heʻena ngāué, ka naʻá ne anga-ʻofa ʻi hono tokonaki mai ha haoʻanga ki heʻena fānau ʻi he kahaʻú. Naʻe fakapapauʻi ʻe Sihova ʻi heʻene potó ʻa e founga ke fakafeangai ai ki he tuʻungá, pea naʻe vave ʻene talaki ʻa e fakaleleiʻangá. (Sēnesi 3:15) Ko e founga ke ʻatā ai  mei he angahalá mo e maté naʻe tokonaki mai ia fakafou ʻi he ʻAlo ʻo e ʻOtuá, ʻa Sīsū Kalaisi. Ko e hā ʻoku kau ki hení?

Ke huhuʻi ʻa e faʻahinga ʻo e tangatá mei he nunuʻa ʻo e angatuʻu ʻa ʻĀtamá, naʻe fekau hifo ʻe Sihova ʻa Sīsū ki he māmaní ke ne akoʻi ʻa e kakaí ki he ʻalunga ʻo e moʻuí pea “foaki ʻene moʻuí ko ha huhuʻi ko e fetongi ʻo e tokolahi.” a (Mātiu 20:28; Sione 14:6) Naʻe lava ʻe Sīsū ke ne fai ʻa e huhuʻí koeʻuhi naʻá ne hoko ko e tangata haohaoa ʻo hangē ko ʻĀtamá. Ka ʻi he ʻikai ke hangē ko ʻĀtamá, naʻe tauhi maʻu ʻe Sīsū ʻa e talangofua haohaoa, naʻa mo e aʻu ki he maté. Koeʻuhi ko e ʻikai ke tuha ʻa Sīsū mo e maté, naʻe fokotuʻu hake ia ʻe Sihova ke toe moʻui ʻi hēvani. Naʻe lava ʻe Sīsū ʻi he taimi ko ení ke fai ʻa e meʻa naʻe ʻikai ke fai ʻe ʻĀtamá​—ʻoatu ki he faʻahinga talangofua ʻo e tangatá ʻa e ʻamanaki ki he moʻui taʻengatá. “He hangē tofu pē ko e fou mai ʻi he talangataʻa ʻa e tangata ʻe toko taha ʻo hoko ai ʻa e tokolahi ko e kau angahalá, ʻoku pehē pē ʻa e fou mai ʻi he talangofua ʻa e foʻi toko taha ʻa e hoko ʻa e tokolahi ʻo māʻoniʻoni.” (Loma 5:19) Fakafou ʻi he feilaulau huhuʻi ʻa Sīsuú, ʻe fakahoko ai ʻe he ʻOtuá ʻene talaʻofa ki he tangatá ke moʻui taʻengata ʻi he māmaní.

ʻOku tau ako lahi ʻo fekauʻaki mo Sihova mei he founga ʻo ʻene fakafeangai ki he faingataʻa tupu mei he talangataʻa ʻa ʻĀtamá. ʻOku tau sio ʻoku ʻikai ha meʻa ʻe lava ke ne taʻofi ʻa Sihova mei hono fakaʻosi ʻa e meʻa naʻá ne kamataʻí; ko ʻene leá ʻe hoko ʻo “lavameʻa moʻoni.” (ʻAisea 55:11) ʻOku tau toe houngaʻia foki ʻi he loloto ʻo e ʻofa mai ʻa Sihová. “Ko e meʻa ʻeni naʻe fakahaaʻi ai ʻa e ʻofa ʻa e ʻOtuá ʻi he fekauʻaki mo hotau tuʻungá, naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú ki he māmaní koeʻuhi ke tau maʻu ai ʻa e moʻuí fakafou ʻiate ia. Ko e anga ʻeni ʻo e ʻofá, ʻoku ʻikai ko e pehē ne tau ʻofa ki he ʻOtuá, ka naʻá ne ʻofa ʻiate kitautolu peá ne fekauʻi mai hono ʻAló ko ha feilaulau fakatupuhōifuaʻanga maʻa ʻetau ngaahi angahalá.”​—1 Sione 4:9, 10.

Ko e ʻOtuá naʻe “ʻikai te ne mamaeʻi ʻa hono ʻAló tonu ka ne tuku atu ia koeʻuhiā ko kitautolu hono kotoa,” ko ia ʻoku tau fakapapauʻi ko e ʻOtuá te ne “foaki anga-lelei mai ʻa e ngaahi meʻa kehe kotoa pē” kuó ne talaʻofaʻaki maí. (Loma 8:32) Ko e hā kuo talaʻofa mai ʻe he ʻOtuá te ne fai maʻatautolú? Hoko atu hoʻo laú.