Hangē pē ko e ‘Otuá ko ha Laumālie, ko e kau ‘āngeló foki ko ha ngaahi laumālie ta‘ehāmai “‘oku ‘ikai ke kakano mo hui.” Ko e kau ‘āngelo mateakí ‘oku nau nofo ‘i hēvani pea ‘oku nau ‘i he ‘ao tonu ‘o e ‘Otuá.​—Luke 24:39; Mātiu 18:10; Sione 4:24.

Kuo ‘i ai ‘a e ngaahi taimi ne hā ai ‘a e kau ‘āngeló ko ha tangata ke tokanga‘i ‘a e ngaahi ngāue kuo ‘omai ‘e he ‘Otuá ki he māmaní pea nau toe liliu sino ‘i he hili hono fakahoko kakato ‘enau ngāué.​—Fakamaau 6:11-23; 13:15-20.

Neongo ‘oku hā ‘i he Tohi Tapú ‘a e kau ‘āngeló ko ha kau tangata pea kuo nau liliu sino ma‘u pē ko e kau tangata, ‘oku ‘ikai ha kau ‘āngelo tangata pe fefine. ‘Oku ‘ikai te nau mali pe fakafanau. ‘Ikai ko ia pē, na‘e ‘ikai ke ‘uluaki hoko mai ‘a e kau ‘āngeló ko ha kau tangata ‘i he māmaní​—pe ko ha fanga ki‘i pēpē, fānau pe kakai lalahi. Na‘e fakatupu ‘e Sihova ‘a e kau ‘āngeló; ko ia ‘oku ui ai ‘e he Tohi Tapú kinautolu ko e “ngaahi foha ‘o e ‘Otua mo‘oní.”​—Siope 1:6; Saame 148:2, 5.

‘Oku lave ‘a e Tohi Tapú ki he “ngaahi lea ‘a e tangatá pea mo e kau ‘āngeló,” ‘o fakahaa‘i ai ko e fa‘ahinga ‘oku sino laumālié ‘oku ‘i ai ‘enau lea pea ‘oku nau lea. Neongo kuo ngāue‘aki ‘e he ‘Otuá ‘a e kau ‘āngeló ke fetu‘utaki mo e fa‘ahinga ‘o e tangatá, ‘oku ‘ikai te ne faka‘atā kitautolu ke tau hū pe lotu kiate kinautolu.​—1 Kolinitō 13:1; Fakahā 22:8, 9.

‘Oku laui mano liunga mano ‘a e kau ‘āngeló, ‘o a‘u nai honau tokolahí ki he laui pilioná. *​—Taniela 7:10; Fakahā 5:11.

Ko e kau ‘āngeló ‘oku nau “kaukaua ‘i he mālohí”—mālohi mama‘o ange ia ‘i he fa‘ahinga ‘o e tangatá​—pea ‘oku nau mahulu hake ‘i he poto fakaetangatá. ‘Oku hā mahino ‘oku lava ke nau fononga ‘i he vave fakamanavahē, ‘o mahulu atu ia ‘i he ngaahi ngata‘anga ‘o e māmani matelié.​—Saame 103:20; Taniela 9:20-23.

Neongo ‘oku nau mā‘olunga ange faka‘atamai mo fakalaumālie, ‘oku ‘i ai ‘a e ngaahi ngata‘anga ‘o e kau ‘āngeló, pea ‘oku ‘i ai mo e ngaahi me‘a ‘oku ‘ikai te nau ‘ilo‘i.​—Mātiu 24:36; 1 Pita 1:12.

Na‘e fakatupu ‘a e kau ‘āngeló mo ha ngaahi ‘ulungaanga, ko e ngaahi ‘ulungaanga faka‘otua, mo e tau‘atāina ke filí. Ko ia ai, ‘i he hangē ko e fa‘ahinga ‘o e tangatá ‘oku lava ke nau fili ke fai ‘a e me‘a ‘oku tonú pe halá. Me‘a pango, ne fili ‘a e kau ‘āngelo ia ‘e ni‘ihi ke angatu‘u ki he ‘Otuá.​—Sute 6.