Kau Mēmipa Foʻou ʻo e Kulupu Pulé

ʻI HE Tokonaki, ʻo ʻOkatopa 2, 1999, naʻe fakaʻosi ʻaki ai ʻa e Fakataha Fakataʻu ʻa e Watch Tower Bible and Tract Society of Pennsylvania ha fanongonongo fakaʻohovale. Ko e toko 10,594 naʻe ʻi aí, pe fakahoko he laine telefoní, naʻa nau fiefia ʻi he fanongo ne toe tānaki mai ha kau mēmipa foʻou ʻe toko fā ki he Kulupu Pule ʻo e Kau Fakamoʻoni ʻa Sihová. Ko e kau mēmipa foʻoú, ʻa ia ko e kau Kalisitiane pani kotoa, ko Samuel F. Herd; M. Stephen Lett; Guy H. Pierce; mo David H. Splane.

• Ko Samuel Herd naʻe kamata tāimuʻa ia ʻi he 1958, pea mei he 1965 ki he 1997, naʻá ne kau ai ʻi he ngāue fakafeituʻú mo e fakavahé. Hili iá, ko ia mo hono uaifí, ʻa Gloria, naʻá na hoko ko e konga ʻo e fāmili Pēteli ʻo e ʻIunaite Seteté, ʻa ia naʻe ngāue ai ʻa Tokoua Herd ʻi he Potungāue Ngāué. Naʻá ne toe ngāue foki ko ha tokotaha tokoni ki he Kōmiti Ngāué.

• Ko Stephen Lett naʻe kamata tāimuʻa ia ʻi Tīsema 1966, pea mei he 1967 ki he 1971, naʻá ne ngāue ai ʻi he Pēteli ʻi he ʻIunaite Seteté. ʻI ʻOkatopa 1971, naʻá ne mali ai mo hono uaifí, ʻa Susan, peá na kau atu ki he ngāue tāimuʻa makehé. Mei he 1979 ki he 1998, naʻá ne ngāue ai ko ha ʻovasia fakafeituʻu. Talu mei ʻEpeleli 1998, ko ia mo Susan kuó na hoko ko e konga ʻo e fāmili Pēteli ʻo e ʻIunaite Seteté. ʻI aí kuó ne ngāue ʻi he Potungāue Ngāué pea naʻá ne hoko ko ha tokotaha tokoni ki he Kōmiti Faiakó.

• Ko Guy Pierce naʻá ne tauhi hake ʻe ia ha fāmili peá ne toki kamata tāimuʻa mo hono uaifí ʻi ʻEpeleli 1982. Naʻá ne ngāue ko ha ʻovasia fakafeituʻu mei he 1986 ʻo aʻu mai ki he 1997, ʻi he taimi naʻá ne hoko ai mo hono uaifí, ko Penny, ko e konga ʻo e fāmili Pēteli ʻi he ʻIunaite Seteté. Kuo ngāue ʻa Tokoua Pierce ko ha tokotaha tokoni ki he Kōmiti Kau Ngāué.

• Ko David Splane naʻe kamata tāimuʻa ia ʻi Sepitema 1963. Ko ha tokotaha maʻu tohi fakamoʻoni ako ia ʻo e kalasi hono 42 ʻo Kiliatí, naʻá ne ngāue ko ha misinale ʻi Senegal, ʻAfilika, pea taʻu ʻe 19 ʻi he ngāue fakafeituʻú ʻi Kānata. Ko ia mo hono uaifí, ko Linda, kuó na ʻi he Pēteli ʻi he ʻIunaite Seteté talu mei he 1990, ʻa ia kuo ngāue ai ʻa Tokoua Splane ʻi he potungāue Ngāué mo e Faitohí. Talu mei he 1998, mo ʻene hoko ko ha tokotaha tokoni ki he Kōmiti Faitohí.

Tānaki atu ki he kau mēmipa foʻou ʻe toko faá, ʻoku kau ki he Kulupu Pulé he taimí ni ʻa W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, mo D. Sydlik. Ko e lotu ia ʻa e tokotaha kotoa ke hokohoko atu ʻa hono tāpuakiʻi mo fakaivimālohiʻi ʻe Sihova ʻa e Kulupu Pulé, ʻa ia kuo fakalahi he taimi ní, ʻi heʻene hokohoko atu ke tokangaʻi ʻa e ngaahi ngāue ʻa e kakai ʻa e ʻOtuá takatakai ʻi he māmaní pea mo tokonaki ʻenau ngaahi meʻa fakalaumālié.