Ongo Kiʻi Sino Iiki, Loto Lalahi

ʻE FĒFĒ ha talanoa ki ha kau sola ʻo fekauʻaki mo e Puleʻanga ʻo e ʻOtuá kapau ko ho māʻolungá ko e senitimita pē ʻe 76? ʻE lava ʻe Laura ke ne tala atu kiate koe. ʻI hono taʻu 33, ko hono māʻolungá ia, ko e senitimita pē ʻe 76. Ko ia mo hono tokouá, ko María, ʻa ia ʻoku taʻu 24 pea ʻoku senitimita ʻe 86 hono māʻolungá, ʻokú na nofo ʻi Kuito, ʻEkuatoa. Tuku angé kiate kinaua ke na fakamatala ki he ngaahi faingataʻaʻiaʻanga ʻokú na fehangahangai mo ia ʻi heʻena ngāue fakafaifekau faka-Kalisitiané.

“Ke ma aʻu ki homau feituʻu ngāue fakamalangá pea ki he ngaahi fakataha faka-Kalisitiané, ʻokú ma luelue ʻi ha vaeuaʻi kilomita nai ke maʻu ha pasi. Mei he feituʻu te ma hopo aí, ʻokú ma toe luelue ai ʻi ha vaeuaʻi kilomita ke maʻu ʻa e pasi hono uá. Ko hono pangó, ʻi he vāʻihala ko ʻení ʻoku nofo ai ha fanga kulī fekai ʻe toko nima. ʻOku fakamanavahē ʻaupito ʻa e fanga kulií kiate kimaua koeʻuhi ʻoku lava ke nau hā ngali lalahi ʻo hangē ha fanga hōsí. Ke tuli mamaʻo kinautolu kapau ʻe fiemaʻu, ʻokú ma toʻo ha vaʻakau, ʻa ia ʻokú ma fufuuʻi ia ʻi ha feituʻu ki muʻa ke ma heka ki he pasí koeʻuhi ke ma toe ala maʻu ia ki heʻema luelue ki ʻapí.

“Ko e heka ki he pasí ko ha sitepu lahi moʻoni ia kiate kimaua. ʻOkú ma tuʻu ʻi ha tafungofunga kelekele ʻi he tauʻanga pasí koeʻuhi ke faingofua ange ʻema heka ki aí. ʻOku afe mai ʻa e kau fakaʻuli ʻe niʻihi ki he foʻi tafungofungá, ka ʻoku ʻikai fai pehē ʻa e niʻihi ia. ʻI heʻene peheé, ʻoku tokoni ʻa e tokotaha ʻiate kimaua ʻoku lōloa angé ki hono fakaheka ʻa e tokotaha ʻoku nounou angé. Ko hono maʻu ʻo e pasi hono uá ʻoku fiemaʻu ia ke ma kolosi ʻi ha hala lahi moʻumoʻua—ko ha feinga moʻoni ia ʻaki homa kiʻi kauvaʻe nounoú. Koeʻuhi ko ʻema nounoú, ʻoku ʻomai ai ʻe ha kato tohi mamafa ha toe faingataʻa. Ke ʻai ke maʻamaʻa ange ʻa e kato ko iá, ʻokú ma ngāueʻaki ha kiʻi Tohitapu siʻisiʻi pea toe fakangatangata mo e lahi ʻo e ʻū tohi ʻokú ma toʻotoʻó.

“Talu mei heʻema kei siʻí, mo ʻema fakatou anga-fakalongolongo ʻaupito. ʻOku ʻilo ʻe homa ngaahi kaungāʻapí ko e talanoa ki he kau solá naʻe hoko maʻu pē ia ko ha meʻa fakalotosiʻi kiate kimaua. Ko ia ai, ʻoku nau ʻohovale mo maongo kiate kinautolu ʻenau sio mai kiate kimaua ʻokú ma tukituki atu ʻi honau ngaahi matapaá, pea ʻoku nau faʻa fanongo mai ai kiate kimaua. Ka ʻi he feituʻu ʻoku ʻikai fuʻu ʻilolahia ai kimauá, ʻoku faʻa sio mai pē ʻa e kakaí kiate kimaua ko e ongo kiʻi puku; ko ia, ʻoku ʻikai maʻu pē ke nau fai mai kiate kimaua ʻa e tokanga fakamātoato ʻoku tuha mo ʻema pōpoakí. Ka neongo ia, ko hono ongoʻi ʻo e ʻofa ʻa Sihová ʻokú ne ʻomai kiate kimaua ʻa e loto-toʻa ke hokohoko atu ʻi he ngāue fakaʻevangelioó. Ko e fakalaulauloto ki he Palovepi 3:​5, 6 (Lea Fakatātā, PM) ʻokú ne toe ʻomai kiate kimaua ʻa e loto-lahi.”

Hangē ko ia ʻoku fakahāhaaʻi ʻe Laura mo María, ko e kītaki neongo ʻa e ngaahi faingataʻaʻiaʻanga fakaesinó ʻoku malava ke fakalāngilangiʻi ai ʻa e ʻOtuá. Naʻe lotu ʻa e ʻapositolo ko Paulá ke toʻo atu meiate ia ʻa hono “tolounua i he kakano,” mahalo ko ha mamahi fakaesino. Ka naʻe tala ange ʻe he ʻOtuá kiate ia: “Ko eku tokoni e lahi maau: he kuo fakakakato eku malohi i hoo vaivai.” ʻIo, ʻoku ʻikai fiemaʻu ia ke toʻo meiate kitautolu ha faingataʻaʻia fakaesino kae toki malava  ke tau tauhi ʻa e ʻOtuá. Ko e falala kakato ki he ʻOtuá ʻoku malava ke ne tokoniʻi kitautolu ke ngāueʻaongaʻaki ʻa e lelei taha ʻo hotau ngaahi tuʻungá. Koeʻuhi naʻe fakakaukau ʻa Paula ki hono “tolounua i he kakano” ʻi he founga ko ʻení, naʻe malava ai ke ne pehē: “Kau ka vaivai oku ou toki malohi.” (2 Kolinito 12:​7, 9, 10, PM) Hili ha ngaahi taʻu mei ai, naʻe tohi ʻe Paula: “ʻOku ou mafeia ʻa e meʻa kotoa pe ʻiate ia ʻoku ne fakakaukaua au.”​—Filipai 4:13.

ʻI he ngaahi taimi ʻi onopōní, ʻoku fakahoko ai ʻe he ʻOtuá ha ngāue mālohi fakafou ʻi he kau tangata, kau fefine, mo e fānau ʻa ia ʻoku nau līʻoa kakato kiate iá. ʻOku ʻi ai ha tokolahi ʻo kinautolu ʻoku nau faingataʻaʻia ʻi ha founga nai. Neongo ko e kotoa ʻo kinautolú ʻoku nau ʻamanaki ki he fakamoʻui fakaʻotua ʻi he malumalu ʻo e Puleʻanga ʻo e ʻOtuá, ʻoku ʻikai te nau tatali kae ʻoua kuo fakaʻatā kinautolu ʻe he ʻOtuá mei honau ngaahi palopalemá ki muʻa ia pea toki feinga ke fai ha meʻa ʻi heʻene ngāué.

ʻOkú ke faingataʻaʻia tupu mei ha ngaahi vaivai fakaesino ʻe niʻihi? Loto-toʻa! Fakafou ʻi hoʻo tuí te ke lava ai ke ʻi he lotolotonga ʻo e faʻahinga hangē ko Paulá, Laura, mo María. ʻOku lava ke leaʻaki fekauʻaki mo kinautolu, ʻo hangē pē ko ia ko e tuʻunga ʻo e kau tangata mo e kau fefine ʻo e tuí ʻi he ngaahi taimi ʻo e kuonga muʻá: “Naʻe fakaake malohi [kinautolu] mei he vavai.”—Hepelu 11:34.

[Fakatātā ʻi he peesi 8]

María

Laura

[Fakatātā ʻi he peesi 9]

ʻOku tokoni ʻa María ke fakaheka ʻa Laura ki he pasí

[Fakatātā ʻi he peesi 9]

“ʻOku fakamanavahē ʻaupito ʻa e fanga kulií kiate kimaua koeʻuhi ʻoku lava ke nau hā ngali lalahi ʻo hangē ha fanga hōsí”

ʻI laló: Ko Laura mo María mo e faʻahinga naʻa nau ako ʻa e Tohitapú mo kinauá