Ko e Hā Kuo Nau ʻIlo ʻi Sisililí?

KUO lala ʻi ha laui senituli ʻa e tuʻuʻanga ʻo e kolo motuʻa ko Sisililí. Naʻe ʻiloa ia ʻi he taimi ʻe taha ʻi he hisitōlia ʻo e Tohitapú. ʻI he taimí ni, ʻi hono toʻo ʻa hono lāngilangi ki muʻá pea ʻufiʻufi ia ʻe he ngaahi lau kelekelé, kuo fakasiʻisiʻi ia ki ha foʻi tafungofunga pe foʻi māʻolunga. ʻI he ngaahi taʻu ki mui ní kuo kamata ai ke sivisiviʻi ʻe he kau ʻāsiolokí ʻa e ngaahi toetoenga ʻo Sisililí. Ko e hā ʻoku fakaeʻa ʻe he ngaahi toetoenga ko ení ʻo fekauʻaki mo e ngaahi fakamatala ʻa e Tohitapú?

Ko Sisilili ʻi he Tohitapú

ʻI heʻene tuʻu ʻi he konga fakahahake ʻo e Teleʻa Sisililí, ko Sisililí naʻe ʻi he taha ia ʻo e ngaahi ʻēlia moʻui lahi ange ʻo e fonua motuʻa ko ʻIsilelí. Fakahangatonu ʻi he tafaʻaki ʻe taha ʻo e teleʻá ki he tokelaú ʻoku tuʻu ai ʻa e moʻunga ko Molé ʻa ia naʻe ʻapitanga ai ʻa e kau Mitianí lolotonga ʻenau teuteu ke ʻohofi ʻa Fakamaau Kitione mo ʻene kau taú. Kiʻi maleʻei siʻi ki he hahaké ko e vai ia ko Hālotí, ʻi he veʻe Moʻunga Kilipoá. Naʻe fakatokosiʻi heni ʻe Sihova ʻa e kau tau ʻe laui afe ʻa Kitioné ki ha kau tangata pē ʻe toko 300 koeʻuhi ke fakahāhaaʻi ai ʻa ʻene malava ke fakahaofi ʻa hono kakaí ʻo taʻekau ai ha fuʻu kau tau mālohi. (Fakamāu 7:​1-25; Sakalaia 4:6) ʻI he Moʻunga Kilipoa ofi maí, naʻe ikunaʻi ai ʻa Saula, ko e ʻuluaki tuʻi ʻo ʻIsilelí, ʻe he kau Filisitiá ʻi ha tau fakaofo, ʻa ia naʻe tāmateʻi ai ʻa Sionatane mo e ongo foha kehe ʻo Saula ʻe toko ua pea naʻe fai ai ʻe Saula tonu ʻa ʻene taonakitá.—1 Samiuela 31:​1-5.

Ko e ngaahi lave faka-Tohitapu ki he kolo motuʻa ʻo Sisililí ʻoku nau ʻomai ha ngaahi faikehekehe mataʻāʻā. ʻOku nau talanoa fekauʻaki mo e ngāuekoviʻaki ʻo e mafaí pea mo e tafoki mei he moʻoní ʻa e kau pule ʻIsilelí pea pehē foki ki he tuʻunga anga-tonu mo e faivelenga ʻi he tafaʻaki ʻa e kau sevāniti ʻa Sihová. Ko Sisilili naʻe fokotuʻu ai ʻe Tuʻi ʻĒhapi—ko e tokotaha-pule ʻo e matakali ʻe hongofulu fakatokelau ʻo e puleʻanga ʻo ʻIsilelí ʻi he konga ki mui ʻo e senituli hono hongofulu K.M.—ʻa hono nofoʻanga fakatuʻí, neongo ko e kolomuʻa fakapuleʻangá ko Samēlia. (1 Tuʻi 21:1) Ko Sisilili naʻe maʻu ai ʻe he palōfita ʻa Sihova ko ʻIlaisiaá ʻa e ngaahi fakamanamana ki hano tāmateʻi mei he uaifi muli ʻo ʻĒhapi ko Sisipelí. Naʻe fakaʻitaʻi ia koeʻuhi ko hono tāmateʻi taʻemanavahē ʻe ʻIlaisiā ʻa e kau palōfita ʻa Pēalí, hili ʻa e ʻahiʻahiʻi ʻo e tuʻunga ʻOtua moʻoní ʻa ia naʻe fakahoko ʻe ʻIlaisiā ʻi Moʻunga Kāmelí.—1 Tuʻi 18:36–19:2.

Pea naʻe fakahoko ha faihia ʻi Sisilili. Naʻe fakapoongi ai ʻa e motuʻa Sisilili ko Nēpote. Naʻe mānumanu ʻa Tuʻi ʻĒhapi ki he ngoue vaine ʻa Nēpoté. ʻI hono kounaʻi atu ʻe he tuʻí ke ne maʻu ʻa e konga kelekelé, naʻe tali mateaki ange ʻe Nēpote: “Ke taofi au mei ai e Jihova, a eku foaki ae tofia o eku gaahi tamai kiate koe.” Naʻe taʻefiemālie lahi ʻa ʻĒhapi ʻi he tali makatuʻunga ʻi he tefitoʻi moʻoni ko ení. ʻI he sio ki he ongoʻi loto-mamahi ʻa e tuʻí, naʻe fokotuʻutuʻu ai ʻe Kuini Sisipeli ha fakamaau kākā, ʻo tukuakiʻi ʻa Nēpote ki he taʻefakaʻapaʻapa. Naʻe fakahalaiaʻi ai ʻa e tonuhia ko Nēpoté pea tolomakaʻi ia ki he mate, pea naʻe maʻu ʻe he tuʻí ʻa ʻene ngoue vainé.—1 Tuʻi 21:​1-​16, PM.

Koeʻuhi ko e ngāue fulikivanu ko ení, naʻe kikiteʻi ʻe ʻIlaisiā: “ʻE keina ʻa Sisipeli ʻe he fanga kuli ʻi he keli ʻo Sisilili.” Naʻe toe fakahaaʻi ʻe he palōfitá: “Ko haʻa Ehapi ʻoku pekia ʻi he kolo ʻe kai ʻe he fanga kuli . . . Talaatu naʻe ʻikai ha taha ʻe tatau mo Ehapi  ʻene fakatau liʻaki ia ke fai ʻa e meʻa ʻoku tau kovi ki he finangalo ʻo Sihova, ʻa ia naʻe oʻi ia ʻe hono uaifi ko Sisipeli.” Kae kehe, koeʻuhi naʻe fakatōkilaloʻi ʻe ʻĒhapi ʻa ia tonu ʻi he taimi naʻe fakamahino ai ʻe ʻIlaisiā ʻa e fakamaau ʻa Sihová, naʻe fakahaaʻi ai ʻe Sihova ʻe ʻikai ke hoko mai ʻa e tautea ko ení ʻi he taimi ʻo e moʻui ʻa ʻĒhapí. (1 Tuʻi 21:​23-29) ʻOku hoko atu ʻa e fakamatala ʻa e Tohitapú ʻo pehē, ʻi he ngaahi ʻaho ʻo e fetongi ʻo ʻIlaisiā, ko ʻIlaisá, naʻe pani ai ʻa Sehu ke ne hoko ko e tuʻi ʻo ʻIsilelí. ʻI heʻene heka atu ki Sisililí, naʻe fekauʻi ʻe Sehu ke lī kituʻa ʻa Sisipeli mei he matapā sioʻata ʻo hono palasí, pea naʻe tāmalaki ia ʻi lalo ʻe he fanga hōsí. Ki mui ai, naʻe ʻiloʻi atu naʻe fakatoe pē ʻe he fanga kulī kai vevé ʻa hono ngeʻesi-ʻulú, ko hono ongo vaʻé, pea mo hono ongo ʻaofi nimá. (2 Tuʻi 9:​30-​37) Ko e meʻa faka-Tohitapu fakaʻosi naʻe hokó naʻe felāveʻi fakahangatonu ia mo Sisilili ʻi he hoko atu ai ki hono tāmateʻi ʻo e toko 70 ʻo e ngaahi foha ʻo ʻĒhapí. Naʻe fokotuʻu ʻe Sehu honau ngaahi foʻi ʻulú ʻi he ongo fokotuʻunga lalahi ʻe ua ʻi he matapā ʻo e kolo ʻo Sisililí, hili iá naʻá ne taaʻi mo e kau tangata pea mo e kau taulaʻeiki tuʻu-ki-muʻa kehe naʻa nau kau ʻi he pule tafoki mei he moʻoni ʻa ʻĒhapí.—2 Tuʻi 10:​6-​11.

Ko e Hā Kuo ʻIlo ʻe he Kau ʻĀsiolokí?

ʻI he 1990 naʻe kamata ai ha ngāue fakataha ʻi hono keli ʻa e tuʻuʻanga ʻo Sisililí. Naʻe kau ki heni ʻa e Akoʻanga ʻĀsioloki ʻo e Univēsiti Tel Aviv (naʻe fakafofongaʻi ia ʻe David Ussishkin) pea mo e Akoʻanga Pilitānia ʻo e ʻĀsiolokí ʻi Selusalema (naʻe fakafofongaʻi ia ʻe John Woodhead). ʻI he faʻahitaʻu fakangāue ʻe fitu (naʻe feʻunga ʻa e faʻahitaʻu fakangāue ʻe taha mo e uike ʻe ono) lolotonga ʻa e ngaahi taʻu ʻo e 1990-​1996, ko e kau ngāue pole ʻi he vahaʻa ʻo e 80 mo e 100 naʻa nau ngāue ʻi he feituʻú.

Ko e fakahūhū ʻi onopooni ki he ʻāsiolokí ko hono sivisiviʻi ʻa e fakamoʻoní ʻi ha tuʻuʻanga ʻoku taki taha fakamoʻoniʻi tonu ia, ʻo ʻikai ha lave ki he ngaahi fakakaukau mo e ngaahi fakamahalo naʻe maʻu ki muʻá. Ko ia ai, ki hono ako ʻe he tokotaha ʻāsiolokí ʻa e ngaahi fonua ʻo e Tohitapú, ko e fakamatala Fakatohitapú ʻoku ʻikai ko e mafai fakaʻosi ia ʻi he kaveingá. Ko e kotoa ʻo e ngaahi maʻuʻanga fakamatala mo e fakamoʻoni fakamatelie kehé kuo pau ke fakakaukauʻi pea fakafuofua lelei. Kae kehe, hangē ko e fakamatala ʻa John Woodhead, ʻoku ʻikai ha tohi fakamoʻoni ʻi onoʻaho ʻo fekauʻaki mo Sisilili tuku kehe ha ngaahi vahe siʻi ʻi he Tohitapú. Ko ia, ko e ngaahi fakamatala mo e fakahokohoko taimi ʻa e Tohitapú ʻoku totonu ke hoko ko e konga ia ʻo ha faʻahinga fakatotolo pē. Ko e hā kuo fakahaaʻi ʻi he ngaahi ngāue ʻa e kau ʻāsiolokí?

ʻI hono keli hake ʻo e ngaahi ʻākolo mo e ngaahi naunau ʻumeá, naʻe hoko ai ʻo mahino mei he kamatá ko e ngaahi toetoengá ʻoku foki ia ki he Kuonga Ukamea naʻe takú, ʻo fokotuʻu tonu ai kinautolu ʻi loto ʻi he vahaʻa taimi ʻo Sisilili ʻi he Tohitapú. Ka ʻi he hoko atu ʻa e ngaahi kelí, naʻe ʻi ai ha ngaahi meʻa fakaʻohovale. Ko e ʻuluakí ko hono lahi ʻo e tuʻuʻangá mo hono ngaahi fuʻu ʻākolo kāfakafá. Naʻe ʻamanekina ʻe he kau ʻāsiolokí ha tuʻuʻanga mo e ngaahi ʻākolo meimei tatau mo ia ʻi Samēlia ʻi onoʻahó, ʻa e kolomuʻa ʻo e puleʻanga ʻo ʻIsilelí. Kae kehe, ʻi he hoko atu ʻa e kelí, naʻe hoko ʻo mahino ai naʻe lahi mamaʻo ange ʻaupito ʻa Sisilili. Ko hono fuá ko e mita ʻe 300 lōloa pea mita ʻe 150 fālahi nai ʻi he lōloa ʻo hono ʻaá, ko e ʻēlia fakakātoa ʻi loto ʻi hono  ngaahi ʻākoló naʻe lahi ʻaki ia ʻa e liunga tolu ʻi ha toe kolo kehe naʻe ʻiloʻi ʻi ʻIsileli ʻi he vahaʻa taimi ko iá. Naʻe takatakaiʻi ia ʻe ha luo vai kuo pakukā, ʻo tupu mei ai ha tō ki lalo mita ʻe 11 mei he ngaahi ʻākoló. Fakatatau kia Palōfesa Ussishkin, ko e luo vai ko ení ko ha tafaʻaki taʻehanotatau ia ʻo e taimi ʻi he Tohitapú. “ʻOku ʻikai ke mau maʻu ha toe meʻa ʻe tatau mo eni ʻi ʻIsileli ka ʻi he vahaʻa taimi ʻo e Kau Kalusetí,” ko ʻene laú ia.

Ko e toe tafaʻaki taʻeʻamanekina ʻe taha ko e ʻikai ʻiloa ʻa e ngaahi faʻunga lahi ʻi he lotomālie ʻo e koló. Ko e kelekele kulokula lahi naʻe ʻomai lolotonga ʻa hono langa ʻo e koló naʻe ngāueʻaki ia ki hono ngaohi ha lēvolo māʻolunga—ko ha sīpinga ʻo ha foʻi tafunga lahi ki ʻolunga, pe peletifoomu—ʻi he lotoʻaá. Ko e Līpooti Ki Muʻa Hono Ua ki he ngaahi keli ʻi Tela Sisililí ʻoku fakamatala ai ko e tafunga ʻiloa ko ení ʻoku lava ke hoko ko e fakamoʻoni ia naʻe ʻikai ko ha nofoʻanga fakatuʻi pē ʻa Sisilili. Naʻe pehē ai: “ʻOku mau saiʻia ke ʻohake ʻa e moʻoniʻi meʻa ko ia ʻo e malava ke pehē ko Sisililí ko e senitā ia ʻo ha nofoʻanga fakakautau ki he kau tau fakatuʻi ʻIsilelí ʻi he taimi ʻo e ngaahi tuʻi ʻOmilaí [ʻOmilai mo hono ngaahi hakó] . . . ʻa ia naʻe tauhi mo akoʻi ai ʻa e kau tau heka saliote mo e kau tau heka hoosi fakatuʻí.” Makatuʻunga ʻi he lahi ʻo e foʻi tafunga lahi ko eni ki ʻolungá, pea pehē ki he lotoʻaá tonu, ʻoku fakamahaloʻi ʻe Woodhead ko ha faʻahinga feituʻu faiʻanga laka nai eni ki hono fakahāhaaʻi ʻa e mālohi fakakautau ʻo e kongakau saliote lahi taha ʻi he Hahake Lotolotó ʻi he taimi ko iá.

Ko e ngaahi toetoenga ʻo e matapā ʻo e koló naʻe keli haké ko ha tafaʻaki ia ʻoku mahuʻinga makehe ki he kau ʻāsiolokí. ʻOku nau fakahaaʻi ha hūʻanga ʻo ʻikai siʻi hifo ʻi ha matapā konga fā. Kae kehe, koeʻuhi ne ʻave ko e koloa vete ʻa e ngaahi maka lahi ʻi he tuʻuʻangá ʻi he faai mai ʻa e ngaahi senitulí, ko e ngaahi meʻa kuo ʻiló ʻoku ʻikai taki atu ia ai ki ha fakamulituku. ʻOku fakakaukau ʻa Woodhead ko e ngaahi toetoengá ʻoku tuhu ia ki ha matapā konga ono ʻo meimei lahi tatau mo e ngaahi matapā ko ia kuo maʻu ʻi Mekito, Hāsoa, mo Kēselí. a

ʻOku tuhu ʻa e ngaahi meʻa fakaʻāsioloki naʻe maʻú ki ha ʻi ai taimi nounou fakaʻohovale ʻa ha kolo naʻe mātuʻaki tuʻuʻanga lelei, fakatouʻosi ʻi he tuʻunga fakakautaú mo e fakasiokālafí. ʻOku fakamamafaʻi ʻe Woodhead ʻo pehē ʻi hono tuʻunga ko ha fuʻu kolo ʻākoloʻi lahí, ko Sisililí ko ha tuʻuʻanga pē ia ʻi ha vahaʻa taimi pē ʻe taha—ʻo ngāueʻaki ia ʻi ha ngaahi hongofuluʻi taʻu siʻi pē. ʻOku tuʻu eni ia ʻo faikehekehe ʻaupito mo e ngaahi tuʻuʻanga faka-Tohitapu lahi kehe ʻi ʻIsileli, ʻo hangē ko Mekito, Hāsoa, pea mo e kolomuʻa ko Samēliá, ʻa ia naʻe toutou toe langa, fakalahi, pea nofoʻi lolotonga ʻa e ngaahi vahaʻa taimi kehekehe. Ko e hā naʻe taʻeʻaonga mātuʻaki vave pehē ai ʻa e tuʻuʻanga lelei ʻaupito ko ení? ʻOku mahaloʻi ʻe Woodhead naʻe meimei fakatupunga ʻe ʻĒhapi mo hono haʻa tuʻí ha tōlalo fakaʻikonōmika fakaʻaufuli koeʻuhi ko ʻenau tolovekaʻaki ʻa e ngaahi koloa ʻa e puleʻangá. Naʻe hā mahino eni ʻi he fuʻu lahi tōtuʻa mo e mālohi ʻo Sisililí. Ko e puleʻanga foʻou ʻi he malumalu ʻo Sehú ʻoku hangehangē naʻe loto ia ke mavahe tonu mei he manatu kia ʻĒhapí pea ko ia naʻá ne liʻaki ai ʻa e koló.

Ko e fakamoʻoni kotoa kuo keli hake ʻo aʻu mai ki he taimi ní, ʻoku fakapapauʻi ai ko e tuʻuʻanga ʻo Sisililí ko ha senitā lahi ia ʻo ʻIsileli ʻi he vahaʻa taimi ʻo e Kuonga Ukameá. Ko hono lahí mo hono ngaahi ʻākoló ʻoku fāitaha ia mo hono fakamatalaʻi ʻi he Tohitapú ko ha nofoʻanga fakatuʻi ʻiloa kia ʻĒhapi mo Sisipeli. Ko e ngaahi fakaʻilonga ʻo hono nofoʻi fakangatangata lolotonga ʻa e vahaʻa taimi ko ení ʻoku felotoi ia mo e ngaahi fakamatala faka-Tohitapu fekauʻaki mo e koló: Naʻe mahiki vave ia ʻo ʻiloa lolotonga ʻa e pule ʻa ʻĒhapí, pea ʻi he fekau ʻa Sihová, ʻoku hā mahino naʻe ʻohifo ia ki lalo ʻi he tuʻunga fakamā ʻi he taimi naʻe “taaʻi [ai] ʻe Sehu ʻa e toe kotoa ʻo e fale ʻo Ehapi ʻi Sisilili, mo hono houʻeiki, mo hono kau feʻiloaki, mo ʻene kau minisita; ʻo ʻikai te ne fakatoe hano toenga.”—2 Tuʻi 10:11.

Ko e Fakahokohoko Taimi ʻo Sisililí

“ʻOku mātuʻaki faingataʻa ʻi he ʻāsiolokí ke maʻu ha makatuʻunga tonu matematē ki he lau taimí,”  ko e fakahaaʻi ia ʻe John Woodhead. Ko ia, ʻi he saveaʻi ʻe he kau ʻāsiolokí ʻa e ngaahi ola ʻo e ngaahi taʻu ʻe fitu ʻo e kelí, ʻoku nau fakahoa ʻa e ngaahi meʻá ni mo e ngaahi meʻa ʻoku maʻu hake ʻi he ngaahi tuʻuʻanga fakaʻāsioloki kehé. Kuo taki atu ʻa e meá ni ki hano toe fakafuofuaʻi mo e fakakikihi. Ko e hā hono ʻuhingá? Koeʻuhi talu mei he ngaahi keli ʻa e ʻāsioloki ʻIsileli ko Yigael Yadin ʻi Mekito lolotonga ʻa e 1960 tupú mo e konga ki muʻa ʻo e 1970 tupú, naʻe fakapapauʻi ai ʻo pehē ʻe he tokolahi ʻi he māmani fakaʻāsiolokí naʻá ne ʻilo ai ʻa e ngaahi ʻākolo mo e ngaahi matapā ʻo e koló, ʻa ia naʻe lau ia mei he vahaʻa taimi ʻo Tuʻi Solomoné. ʻI he taimí ni, ko e ngaahi ʻākoló, naunau ʻumeá, mo e ngaahi matapā naʻe maʻu ʻi Sisililí ʻoku nau fakatupunga ʻa e niʻihi ke nau fehuʻia ʻa e ngaahi fakamulituku ko ení.

Ko e fakatātaá, ko e naunau ʻumea naʻe maʻu ʻi Sisililí ʻoku tatau ia mo e maka ko ia ʻi Mekito naʻe fakafekauʻaki ʻe Yadin mo e pule ʻa Solomoné. Ko e faʻunga mo e lahi ʻo e matapā ʻo e ongo tuʻuʻanga ʻe uá ʻokú na meimei tatau, kapau ʻoku ʻikai te na faitatau. ʻOku pehē ʻe Woodhead: “Ko e kotoa ʻo e fakamoʻoní ʻokú ne ʻai ʻa e tuʻuʻanga ʻo Sisililí ki he vahaʻa taimi ʻo Solomoné pe tuku hifo ʻa e lau taimi ʻo e ngaahi meʻá ni ki he ongo tuʻuʻanga kehé [ʻa Mekito mo Hāsoa] ki he vahaʻa taimi ʻo ʻĒhapí.” Koeʻuhi ʻoku fakafekauʻaki mahino ʻe he Tohitapú ʻa e tuʻuʻanga ʻo Sisililí mo e vahaʻa taimi ʻo ʻĒhapí, ʻokú ne vakai ki ai ʻoku ʻuhinga lelei ange ke tali ko e ngaahi maka ko ení ʻoku tapua mai ai ʻa e taimi ʻo e pule ʻa ʻĒhapí. ʻOku fakahaaʻi ʻe David Ussishkin ʻa e loto-tatau: “ʻOku pehē ʻe he Tohitapú naʻe langa ʻe Solomone ʻa Mekito—ʻoku ʻikai te ne pehē naʻá ne langa ʻa e ngaahi matapā tonu ko iá.”

ʻE Lava ke ʻIloʻi ʻa e Hisitōlia ʻo Sisililí?

ʻOku fakatupunga ʻe he ngaahi meʻa fakaʻāsioloki naʻe maʻú pea mo e fakakikihi naʻe hoko aí ha veiveiua ki he fakamatala ʻa e Tohitapú ʻo kau ki Sisilili pe ko Solomoné? Ko hono moʻoní, ko e fekīhiaki fakaʻāsiolokí ʻoku siʻi ʻa ʻene kaunga hangatonu ki he fakamatala ʻa e Tohitapú. ʻOku sivisiviʻi ʻe he ʻāsiolokí ʻa e hisitōliá ʻi ha makatuʻunga kehe mei he talanoa ko ia ʻi he Tohitapú. ʻOkú ne ʻomai ʻa e ngaahi fehuʻi kehe pea kehe ʻa ʻene fakamamafá. ʻE lava ke fakahoa ʻe ha taha ʻa e tokotaha ako Tohitapú pea mo e tokotaha ʻāsiolokí ki ha ongo meʻa ʻokú na fononga ʻi ha ongo hala ʻoku fakafuofua ʻokú na huʻufataha. ʻOku heka meʻalele ʻa e tokotaha fononga ʻe tahá ʻi he halá, kae luelue ʻa e tokotaha ʻe tahá ʻi he kauhalá. Ko e meʻa ʻokú na hangataha mo tokanga ki aí ʻoku kehekehe. Ka, ko ʻena ngaahi fakakaukaú ʻoku faʻa fefakakakatoʻaki ʻo ʻikai fepakipaki. Ko hono fakahoa ʻa e ngaahi meʻa fakaueʻiloto ʻa e ongo meʻa fonongá ʻoku lava ke taki atu ia ki ha ngaahi ʻilo fakamānako.

ʻOku ʻi he Tohitapú ha lēkooti kuo hiki ʻo e ngaahi meʻa motuʻa naʻe hoko pea mo e kakai; ʻoku feinga ʻa e ʻāsiolokí ke toe maʻu mai ʻa e fakamatala ʻo fekauʻaki mo e ngaahi meʻa ko eni naʻe hokó pea mo e kakaí ʻaki hono sivisiviʻi ha ngaahi fakaʻilonga pē ʻo kinautolu ʻe lava ke maʻu ʻoku kei toe ʻi he kelekelé. Kae kehe, ko e ngaahi toetoenga ko ení ʻoku faʻa mātuʻaki taʻekakato pea ʻoku fakatuʻunga mei ai ʻa e ngaahi fakaʻuhinga kehekehé. ʻI he meá ni, ʻi heʻene tohi ko e Archaeology of the Land of the Bible​—10,000−586 B.C.E., ʻoku fakamatala ai ʻa Amihai Mazar: “Ko e ngāue ʻi he malaʻe fakaʻāsiolokí . . . ʻoku ʻi ha tuʻunga fakaeʻaati lahi ia pea pehē foki ko ha fakatahaʻi ia ʻo e ako mo e pōtoʻi fakapalōfesinale. ʻOku ʻikai ha founga pau fefeka ia ʻe lava ke ne fakapapau mai ha lavameʻa, pea ko e ngaofengofuá mo e fakakaukau toki faʻu ʻe he kau talēkita ʻi he malaʻé ʻoku tuʻutuʻuniʻi. Ko e tōʻonga, talēniti, mo e fakafuofua ʻa e tokotaha ʻāsiolokí ʻoku ʻikai siʻi hifo honau mahuʻingá ʻi heʻene akó pea mo e ngaahi maʻuʻanga fakamatala ʻoku ala maʻu kiate iá.”

Kuo fakapapauʻi ʻe he ʻāsiolokí ʻa e ʻi ai ʻa ha senitā fakatuʻi mo fakakautau lahi ʻi Sisilili, ko ha senitā naʻe ʻi ai ʻi ha taimi fakaʻohovale ʻa ʻene nounoú lolotonga ʻa e vahaʻa taimi fakahisitōlia ʻoku fenāpasi mo e pule ʻa ʻĒhapí—ʻo hangē tofu pē ko e fakamatala ʻa e Tohitapú. Kuo langaʻi hake ai ʻa e ngaahi fehuʻi fakafihi kehe lahi ʻa ia ʻe ako nai ʻe he kau ʻāsiolokí ʻi he ngaahi taʻu ka hoko maí. Neongo ia, ko e ngaahi peesi ʻo e Folofola ʻa e ʻOtuá, ʻa e Tohitapú, ʻoku hokohoko atu ʻa ʻene lea māʻalaʻalá, ʻi hono tokonaki mai kiate kitautolu ʻa e talanoa kakató ʻi ha founga ʻa ia ʻe ʻikai ʻaupito lava ia ʻe he kau ʻāsiolokí.

[Fakamatala ʻi lalo]

[Fakatātā ʻi he peesi 26]

Ko e ngaahi keli fakaʻāsioloki ʻi Sisililí

[Fakatātā ʻi he peesi 28]

Ko ha ʻaitoli Kēnani naʻe maʻu ʻi Sisilili