“Kumi kia Jihova, mo Hono Malohi”

“He oku lele fetoutou mo liliuaki ae fofoga o Jihova i mamani kotoabe, ke fakaha malohi a ene afio ke kau mo kinautolu oku tokaga totonu ho nau loto kiate ia.”​—2 KALONIKALI 16:9 (2 FAKAMATALA MEA HOKOHOKO), PM.

1. Ko e hā ʻa e mālohi, pea kuo anga-fēfē ʻa hono ngāueʻaki ia ʻe he tangatá?

 ʻOKU lava ke ʻuhinga ʻa e mālohí ki ha ngaahi meʻa, ʻo hangē ko hono maʻu nai ʻa e pule, mafai, pe ko hono tākiekina ʻo e niʻihi kehé; ko e malava ke ngāue pe ke fakatupu ha ola; mālohi fakaesino (mālohinga); pe ko e mālohi fakaeʻatamai pe fakaeʻulungaanga. ʻOku ʻikai ke maʻu ʻe he tangatá ha lēkooti lelei ʻi he taimi ʻoku hoko mai ai ki hono ngāueʻaki ʻo e mālohí. Ko Pāloni Acton, ko ha faihisitōlia, ʻi heʻene lea ʻo kau ki he mālohi ʻi he nima ʻo e kau politikí, naʻá ne pehē: “ʻOku hehema ʻa e mālohí ke fakameleʻi pea ko e mālohi fakaʻaufulí ʻoku fakameleʻi fakaʻaufuli.” ʻOku lahi ʻaupito ʻi he hisitōlia ʻo onopōní ʻa e ngaahi faʻifaʻitakiʻanga ʻoku fakahaaʻi ai ʻa e moʻoni fakalūkufua ʻo e ngaahi lea ʻa Pāloni Action. Lolotonga ʻa e senituli hono 20, “naʻe pule ai ha tangata ki he kakai ke nau kovi ai” ʻo ʻikai hano tatau ki muʻa. (Koheleti 8:9 [Tagata Malaga, PM]) Kuo ngāuekovi lahi ʻaki ʻe he kau tikitato fakameleʻí ʻa honau mālohí pea kuo nau fakangata ʻa e moʻui ʻe laui miliona. Ko e mālohi ʻoku ʻikai taʻotaʻofi ʻe he ʻofá, potó, mo e fakamaau totonú ʻoku fakatuʻutāmaki.

2. Fakamatalaʻi ʻa e anga ʻo e kaunga ʻo e ngaahi ʻulungaanga fakaʻotua kehé ki he founga ʻo hono ngāueʻaki ʻe Sihova ʻa hono mālohí.

² ʻI he ʻikai tatau mo e faʻahinga tokolahi ʻo e tangatá, ʻoku ngāueʻaki maʻu pē ʻe he ʻOtuá ʻa hono mālohí ki he leleí. “He oku lele fetoutou mo liliuaki ae fofoga o Jihova i mamani kotoabe, ke fakaha malohi a ene afio ke kau mo kinautolu oku tokaga totonu ho nau loto kiate ia.” (2 Kalonikali 16:​9, PM) ʻOku tataki ʻe Sihova ʻa hono mālohí ʻi ha founga mapuleʻi. ʻOku taʻofi ʻe he anga-kātakí ʻa hono fakaʻauha ʻe he ʻOtuá ʻa e fulikivanú ke ʻoange ai kiate kinautolu ʻa e faingamālie ke nau fakatomala. ʻOku ueʻi ia ʻe he ʻofá ke ne ʻai ke ulo ʻa e laʻaá ki he faʻahinga kotoa ʻo e tangatá—ʻa e anga-tonu mo e taʻeangatonu. ʻE ueʻi fakaʻosi ia ʻe he fakamaau totonú ke ne ngāueʻaki ʻa hono mālohi taʻefakangatangatá ke toʻo ʻaki ʻa e tokotaha ʻokú ne maʻu ʻa e ngaahi founga ke fakatupunga ʻa e maté, ʻa Sētane ko e Tēvoló.—Mātiu 5:​44, 45; Hepelu 2:​14; 2 Pita 3:9.

3. Ko e hā ʻoku hoko ai ʻa e mālohi māfimafi-aoniu ʻo e ʻOtuá ko ha ʻuhinga ia ke falala ai kiate iá?

³ Ko e mālohi fakamanavahē ʻo ʻetau Tamai fakahēvaní ko ha ʻuhinga ia ki he tuipau mo e falala—fakatouʻosi ki heʻene ngaahi talaʻofá pea ki heʻene maluʻí. ʻOku ongoʻi malu ha kiʻi tama ʻi he lotolotonga ʻo ha kau sola ʻi he taimi ʻokú ne pikimaʻu ai ki he nima ʻo ʻene tamaí, koeʻuhi he ʻokú ne ʻiloʻi ʻe ʻikai tuku ʻe heʻene tamaí ke hoko ha maumau kiate ia. ʻI he founga tatau, ko ʻetau Tamai fakahēvaní, ʻa e tokotaha ʻoku ‘lahi hono malohi ke fakamouí,’ te ne maluʻi kitautolu mei ha maumau tuʻuloa ʻo kapau ʻoku tau ʻaʻeva mo ia. (Aisea 63:​1 [Isaia, PM]; Maika 6:8) Pea ʻi hono tuʻunga ko ha Tamai leleí, ʻoku fakahoko maʻu pē ʻe Sihova ʻa ʻene ngaahi talaʻofá. Ko hono mālohi taʻefakangatangatá ʻoku fakapapauʻi ai ko ʻene ‘leá te ne fakaaʻu ʻa e meʻa naʻá ne fekau atu aí.’—Aisea 55:11; Taitusi 1:2.

4, 5. (a) Ko e hā ʻa e ola ʻi he taimi naʻe falala taʻetoeveiveiua ai ʻa Tuʻi ʻAsa kia Sihová? (e) Ko e hā nai ʻe hokó kapau ʻoku tau falala ki he ngaahi fakaleleiʻanga fakaetangatá ki heʻetau ngaahi palopalemá?

⁴ Ko e hā ʻoku mātuʻaki mahuʻinga ai ke tau fakapapauʻi ke ʻoua ʻe mole ʻetau tokanga ki he maluʻi ʻa ʻetau Tamai fakahēvaní? Koeʻuhi ʻoku malava ke hoko ʻo lōmekina ʻe he ngaahi tuʻungá pea ngalo ai ʻa e feituʻu ʻoku ʻi ai hotau maluʻanga moʻoní. ʻOku hā eni ʻi he faʻifaʻitakiʻanga ʻa Tuʻi ʻAsá, ko ha tangata ʻa ia naʻe faʻa falala kia Sihova. Lolotonga ʻa e pule ʻa ʻAsá, naʻe ʻohofi ai ʻa Siuta ʻe ha kau tau ʻItiopea mālohi ʻe taha miliona. ʻI hono ʻiloʻi ko e kau tau lelei angé naʻe ʻi he tafaʻaki ʻo hono ngaahi filí, naʻe lotu ʻa ʻAsa: “E Jihova, koe mea noabe kiate koe ke tokoni, ki he toko lahi, be kiate kinautolu oku ikai ha nau malohi:  E Jihova ko ho mau Otua, ke ke tokoni kiate kimautolu; he oku mau falala kiate koe, bea i ho huafa oku mau alu atu ki he fuu kakai ni. E Jihova, ko koe be ko ho mau Otua; oua naa malohi ae tagata kiate koe.” (2 Kalonikali 14:11, PM) Naʻe fakahoko ʻe Sihova ʻa e kole ʻa ʻAsá peá ne ʻoange kiate ia ha ikuna pau.

⁵ Kae kehe, hili ʻa e ngaahi taʻu lahi ʻo e ngāue anga-tonú, naʻe vaivai ʻa e falala ʻa ʻAsa ki he mālohi faifakamoʻui ʻo Sihová. Ke kalofi ha fakamanamana fakakautau mei he puleʻanga fakatokelau ʻo ʻIsilelí, naʻá ne hanga ai ki Sīlia ki ha tokoni. (2 Kalonikali 16:​1-3) Neongo naʻe iku ʻa ʻene totongi fakafufū ʻa e tuʻi Sīlia ko Penihētatí ki hono toʻo ʻa e fakamanamana naʻe fai ʻe ʻIsileli ki Siutá, ko e fuakava ʻa ʻAsa mo Sīliá naʻe fakahaaʻi ai ʻa e ʻikai ha falala kia Sihová. Naʻe ʻeke hangatonu ʻe he palōfita ko Hānaní kiate ia: “ʻIkai ko e hosite tokolahi ʻa e kau Itiopea mo e kau Lupi, pea tokolahi ʻaupito ʻenau tau saliote mo e hōsi? Ka ʻi hoʻo falala kia Sihova naʻa ne tukuange kinautolu ki ho nima.” (2 Kalonikali 16:​7, 8) Neongo ia, naʻe talitekeʻi ʻe ʻAsa ʻa e valoki ko ení. (2 Kalonikali 16:​9-12) ʻI he fehangahangai mo e ngaahi palopalemá, ʻoua te tau falala ki he ngaahi fakaleleiʻanga fakaetangatá. ʻI hono kehé, tau fakahāhā ʻa e falala ki he ʻOtuá, he ko e falala ki he mālohi ʻo e tangatá ʻe iku taʻealakalofi atu ia ki he ʻamanaki-tōnoa.—Sāme 146:​3-5.

Kumi ʻa e Mālohi ʻOku Foaki ʻe Sihová

6. Ko e hā ʻoku totonu ai ke tau “kumi kia Jihova, mo hono malohi”?

⁶ ʻE lava ʻe Sihova ke fakaivia ʻa ʻene kau sevānití pea pehē ki hono maluʻi kinautolu. ʻOku enginaki mai ʻa e Tohitapú kiate kitautolu ke “kumi kia Jihova, mo hono malohi.” (Sāme 105:​4, PM) Ko e hā hono ʻuhingá? Koeʻuhi he ʻi he taimi ʻoku tau fai ai ʻa e ngaahi meʻá ʻi he mālohi ʻo e ʻOtuá, ʻe ngāueʻaki ai hotau mālohí ki he lelei, kae ʻikai ki he fakalotomamahiʻi ʻo e niʻihi kehé. ʻOku ʻikai ha feituʻu te tau maʻu ai ha faʻifaʻitakiʻanga lelei ange ʻo e meʻá ni ka ʻia Sīsū Kalaisi, ʻa ia naʻá ne fakahoko ʻa e ngaahi mana lahi ʻi he “mālohi ʻo Sihová.” (Luke 5:​17, NW) Naʻe mei lava pē ke fakatapui ʻe Sīsū ʻa ia tonu ke ne hoko ʻo koloaʻia, ongoongoa, pe naʻa mo e hoko ko ha tuʻi mālohi tāfataha. (Luke 4:​5-7) ʻI hono kehé, naʻá ne ngāueʻaki ʻa e mālohi naʻe foaki ange ʻe he ʻOtuá kiate iá ke faiako mo akoʻaki, ke tokoniʻaki pea ke faifakamoʻui. (Maake 7:​37; Sione 7:​46) Ko ha faʻifaʻitakiʻanga lelei moʻoni ia maʻatautolu!

7. Ko e hā ʻa e ʻulungaanga mātuʻaki mahuʻinga ʻoku tau fakatupulekina ʻi he taimi ʻoku tau fai ai ʻa e ngaahi meʻá ʻi he mālohi ʻo e ʻOtuá kae ʻikai ʻi hoʻotautolú?

⁷ ʻIkai ko ia pē, ʻi heʻetau fai ʻa e ngaahi meʻá ʻi he “mālohi ko ia ʻoku tokonaki mai ʻe he ʻOtuá,” ʻe tokoniʻi kitautolu ʻe he meʻá ni ke tau hanganaki anga-fakatōkilalo. (1 Pita 4:​11, NW) Ko e kau tangata ko ia ʻoku nau kumi ha mālohi maʻanautolú ʻoku nau hoko ʻo ʻafungi. Ko ha fakatātā, ko e Tuʻi ʻAsīlia ko ʻEsahatoní, ʻa ia naʻá ne talaki loto-pōlepole: “ʻOku ou mālohi, ʻoku ou mālohi tāfataha, ko ha helo au, ʻoku ou lahi fau, ʻoku ou lahi fakaʻulia.” ʻI hono kehé, ko Sihová ‘kuó ne fili ʻa e ngaahi meʻa ʻo mamani ʻoku vaivaí ke fakamāʻi ʻa e ngaahi meʻa ʻoku malohí.’ Ko ia ai, kapau ʻoku pōlepole ha Kalisitiane moʻoni, ʻokú ne pōlepole ʻia Sihova, he ʻokú ne ʻiloʻi ko e meʻa ko ia kuó ne faí kuo ʻikai ke fakahoko ia ʻi hono mālohi ʻoʻoná. ‘Ko ʻetau fakavaivaiʻi kitautolu ʻi he lalo nima mafimafi ʻo e ʻOtuá’ te ne ʻomai ai ʻa e hakeakiʻi moʻoní.—1 Kolinito 1:​26-31; 1 Pita 5:6.

8. Ko e hā ʻoku totonu ke tau ʻuluaki fai ki hono maʻu mai ʻa e mālohi ʻo Sihová?

⁸ ʻOku anga-fēfē ʻetau maʻu mai ʻa e mālohi ʻo e ʻOtuá? ʻUluakí, kuo pau ke tau kole ki ai ʻi he lotu. Naʻe fakapapauʻi ʻe Sīsū ki heʻene kau ākongá ʻe foaki ʻe heʻene Tamaí ʻa e laumālie māʻoniʻoní ki he faʻahinga ʻoku nau kole iá. (Luke 11:​10-​13) Fakakaukau atu ki hono fakahūhū ʻe he meʻá ni ki he kau ākonga ʻa Kalaisí ʻa e mālohi ʻi heʻenau fili ke talangofua ki he  ʻOtuá kae ʻikai ko e kau taki lotu ko ia naʻa nau tuʻutuʻuni kiate kinautolu ke tuku ʻenau faifakamoʻoni ʻo fekauʻaki mo Sīsuú. ʻI heʻenau lotu ki he tokoni ʻa Sihová, naʻe tali ʻenau lotu loto-moʻoní, pea naʻe fakaivia kinautolu ʻe he laumālie māʻoniʻoní ke hokohoko atu ʻa e malangaʻi ʻo e ongoongo leleí ʻaki ʻa e loto-toʻa.—Ngāue 4:​19, 20, 29-​31, 33.

9. Fakahaaʻi ʻa e matavai hono ua ʻo e mālohi fakalaumālié, pea lave ki ha faʻifaʻitakiʻanga Fakatohitapu ke fakahaaʻi ʻa ʻene ʻaongá.

⁹ Ko hono uá, ʻe lava ke tau maʻu mai ha mālohi fakalaumālie mei he Tohitapú. (Hepelu 4:​12) Ko e mālohi ʻo e Folofola ʻa e ʻOtuá naʻe hā mahino ia lolotonga ʻa e ngaahi ʻaho ʻo Tuʻi Siosaiá. Neongo ne ʻosi toʻo ʻe he Tuʻi Siuta ko ení ʻa e ngaahi ʻaitoli panganí mei he fonuá, ko hono ʻilo taʻeʻamanekina ʻo e Lao ʻa Sihová ʻi he temipalé naʻe ueʻi ai ia ke ne fakalahiʻi ʻa e polokalama fakamaʻa ko ení. a Hili ʻa hono lau fakafoʻituitui ʻe Siosaia ʻa e Laó ki he kakaí, naʻe fai ʻe he puleʻangá kotoa ha fuakava mo Sihova, pea naʻe kamata ai ha feingangāue hono ua, toe longomoʻui ange ʻo fakafepakiʻi ʻa e tauhi ʻaitolí. Ko e ola lelei ʻo e fakatonutonu ʻa Siosaiá he ʻi he lolotonga ʻo “ʻene moʻui naʻe ʻikai te nau afe mei he angimui kia Sihova.”—2 Kalonikali 34:33.

10. Ko e hā ha founga hono tolu ke maʻu mai ʻaki ʻa e mālohi meia Sihová, pea ko e hā ʻoku mātuʻaki mahuʻinga ai iá?

¹⁰ Ko hono tolú, ʻoku tau maʻu mai ʻa e mālohi meia Sihová fakafou ʻi he feohiʻanga faka-Kalisitiané. Naʻe fakalototoʻaʻi ʻe Paula ʻa e kau Kalisitiané ke nau maʻu maʻu pē ʻa e ngaahi fakatahá koeʻuhi ke ‘fefakaʻaiʻaiʻaki ki he feʻofaʻaki mo e ngaue lelei’ pea ke fefakalototoʻaʻaki. (Hepelu 10:​24, 25) ʻI he taimi ne tukuange fakaemana ai ʻa Pita mei he pilīsoné, naʻá ne loto ke fakataha mo hono fanga tokouá, ko ia naʻá ne ʻalu hangatonu ki he fale ʻo e faʻē ʻa Sione Maʻaké, ʻa ia naʻe “ʻi ai ha tokolahi kuo fakataha ke hūfia.” (Ngāue 12:12) Ko e moʻoni, naʻe mei lava ke nau nofo kotoa pē ʻi ʻapi ʻo lotu ai. Ka naʻa nau fili ke nau fakatahataha ke lotu mo fefakalototoʻaʻaki lolotonga ʻa e taimi faingataʻa ko iá. ʻI he ofi ki he ngataʻanga ʻo e fononga lōloa mo fakatuʻutāmaki ʻa Paula ki Lomá, naʻá ne fetaulaki ai mo e fanga tokoua ʻe niʻihi ʻi Piuteolai pea ki mui ai mo e niʻihi kehe ʻa ia naʻa nau fononga mai ke fakafetaulaki kiate ia. Ko ʻene talí? “ʻI he feʻiloaki ʻa Paula mo kinautolu [ʻa e faʻahinga ki muí], naʻa ne fai ʻene fakafetaʻi ki he ʻOtua, mo ne maʻu ai ha toʻa.” (Ngāue 28:​13-15) Naʻe fakaivimālohiʻi ia ʻe heʻene toe fakataha mo e kaungā Kalisitiané. Ko kitautolu foki ʻoku tau maʻu mai ʻa e mālohi mei he feohi mo e kaungā Kalisitiané. ʻI heʻetau ʻatā pea malava ke fefeohiʻakí, kuo pau ke ʻoua te tau feinga ke luelue tokotaha ʻi he hala ʻefiʻefi ʻoku taki atu ki he moʻuí.—Palovepi 18:1 (Lea Fakatātā, PM); Mātiu 7:​14.

11. Lave ki ha ngaahi tuʻunga ʻe niʻihi ʻa ia ʻoku fiemaʻu tautefito ai ʻa e “makehe atu ʻo e mālohí.”

¹¹ Fakafou ʻi he lotu maʻu pē, ako ʻa e Folofola ʻa e ʻOtuá, mo e feohi mo e kaungātuí, ʻoku tau “malohi i he Eiki, bea i he lahi o ene mafimafi.” (Efeso 6:​10, PM) Ko kitautolu kotoa ʻoku ʻikai ha veiveiua ʻa ʻetau “malohi i he Eiki.” ʻOku faingataʻaʻia ʻa e niʻihi mei he ngaahi mahaki fakaʻauʻausino, ko e niʻihi mei he fakaʻauha ʻe he taʻumotuʻá pe mei ha mole ʻa ha kaumeʻa ʻi he kotoa ʻo e moʻuí. (Sāme 41:3) ʻOku kātekina ʻe he niʻihi ʻa e fakafepaki ʻa ha hoa taʻetui. Ko e ngaahi mātuʻá, tautefito ki he ngaahi mātuʻa taʻemalí, te nau ʻilo nai ko hono tokangaʻi ʻo ha ngāue taimi-kakato lolotonga ʻo hono tauhi hake ha fāmilí ko ha fatongia fakaongosia ia. ʻOku fiemaʻu ʻe he kau talavou Kalisitiané ʻa e mālohi ke nau fakafepakiʻiʻaki ʻa e tenge mei he toʻumeʻá pea ke lea ʻikai ki he ngaahi faitoʻo kona tapú mo e ʻulungaanga taʻetāú. ʻOku ʻikai totonu ke toumoua ha taha ke kole kia Sihova ki ha “makehe atu ʻo e mafai [“mālohí,” NW]” ke fekukiʻaki mo e ngaahi pole peheé.—2 Kolinito 4:7.

“Foaki ae Malohi ki he Vaivai”

12. ʻOku anga-fēfē ʻa hono poupouʻi kitautolu ʻe Sihova ʻi he ngāue fakafaifekau faka-Kalisitiané?

¹² ʻIkai ko ia pē, ʻoku foaki mālohi ʻa Sihova ki heʻene kau sevānití ʻi he taimi ʻoku nau fakahoko ai ʻenau ngāue fakafaifekaú. ʻOku tau lau ʻi he kikite ʻa ʻAiseá: “Oku ne foaki ae malohi ki he vaivai; bea kiate kinautolu oku ikai haa nau malohi oku ne fakatubu ae malohi . . . . Ka ko kinautolu oku tatali kia Jihova e fakafoou ho nau malohi; te nau buna hake aki ae kabakau o hage koe faga ikale; te nau lele ka e ikai vaivai; bea te nau eveeva ka e ikai bogia.” (Aisea 40:​29-31, PM) Naʻe maʻu fakafoʻituitui ʻe he ʻapositolo ko Paulá ʻa e mālohi ke fakahokoʻaki ʻa ʻene ngāue fakafaifekaú. Ko hono olá, naʻe ola lelei ʻa ʻene ngāue fakafaifekaú. Naʻá ne tohi ki he kau Kalisitiane ʻi Tesalonaiká: “Talaʻehai naʻe hoko atu ʻemau Kosipeli ko e ngeʻesi lea pe, ka naʻe ō mo e malohi, pea ō mo e Laumalie Maʻoniʻoni.” (1 Tesalonaika 1:5) Ko ʻene malangá mo e faiakó naʻe ʻi ai hono mālohi ke ne fakahoko ʻa e ngaahi liliu lahi ʻi he moʻui ʻa e faʻahinga ko ia naʻa nau fanongo kiate iá.

13. Ko e hā naʻá ne fakaivimālohiʻi ʻa Selemaia ke ne kītaki neongo ʻa e fakafepakí?

 ¹³ ʻI he fetaulaki mo ha laumālie taʻemahuʻingaʻia ʻi hotau feituʻú—ko ha feituʻu kuo tau toutou malanga nai ai ʻi ha ngaahi taʻu kae siʻi ʻa hono talí—ʻoku tau hoko nai ai ʻo loto-mafasia. Naʻe ongoʻi loto-siʻi meimei tatau mo Selemaia ʻi he fakafepaki, manuki, mo e taʻemahuʻingaʻia naʻá ne fetaulaki mo iá. “ʻE ʻikai te u toe hueʻekina ia [ʻa e ʻOtuá], pea ʻe ʻikai te u toe lea ʻi hono huafa,” ko ʻene lea hifo pē ia kiate iá. Ka naʻe ʻikai lava ke ne hanganaki fakalongolongo. Ko ʻene pōpoakí naʻe ‘hoko ia . . . ʻo hange ko e afi vela kuo loki ʻi hono huí.’ (Selemaia 20:9) Ko e hā naʻá ne ʻoange kiate ia ʻa e toe mālohi foʻou ʻi he fehangahangai mo e fakafili mātuʻaki lahí? “Oku iate au a Jihova, o hage koe toko taha malohi fakamanavahe,” ko e lea ia ʻa Selemaiá. (Selemaia 20:​11, PM) Ko e houngaʻia ʻa Selemaia ʻi he mātuʻaki mahuʻinga ʻo ʻene pōpoakí pea mo hono vāhenga-ngāue kuo foaki ange ʻe he ʻOtuá naʻá ne ʻai ia ke ne tali ʻa e fakalototoʻa ʻa Sihová.

Ko e Mālohi ke Fakalaveaʻi mo e Mālohi ke Fakamoʻui

14. (a) Ko ha meʻangāue mālohi fēfē ʻa e ʻeleló? (e) ʻOmai ha ngaahi fakatātā ke fakahaaʻiʻaki ʻa e maumau ʻe lava ke fai ʻe he ʻeleló.

¹⁴ ʻOku ʻikai ke haʻu fakahangatonu mei he ʻOtuá ʻa e mālohi kotoa ʻoku tau maʻú. Ko e fakatātaá, ko e ʻeleló ʻoku ʻi ai hono mālohi ke fakalaveaʻi pea pehē ke fakamoʻui. “Ko e maté mo e moʻuí ʻoku ʻi he mālohi ʻo e ʻeleló,” ko e fakatokanga ia ʻa Solomoné. (Palovepi 18:​21, NW) Ko e ngaahi nunuʻa ʻo e fetalanoaʻaki nounou ʻa Sētane mo ʻIví ʻoku fakahaaʻi ai ʻa e lahi ʻo e moveuveu ʻoku lava ke fakatupunga ʻe he ngaahi leá. (Senesi 3:​1-5; Semisi 3:5) Ko kitautolu foki ʻoku lava ke tau fakahoko ha maumau lahi ʻaki hotau ʻeleló. Ko e ngaahi lea tukuhifo ʻo fekauʻaki mo ha mamafa ʻo ha finemui ʻe lava ke ne fakatupunga ai ia ke ne fou atu ki he ʻanolekisiá. Ko hano toe leaʻaki taʻefakakaukau ʻo ha lauʻikovi loi te ne maumauʻi nai ha kaungāmeʻa fuoloa. ʻIo, ʻoku fiemaʻu ke mapuleʻi ʻa e ʻeleló.

15. ʻE lava fēfē ke tau ngāueʻaki hotau ʻeleló ke langa hake pea ke fakamoʻui?

¹⁵ Kae kehe, ʻoku lava ʻa e ʻeleló ke langa hake pea pehē ki he hae hifo. ʻOku pehē ʻe he palōvepi ʻi he Tohitapú: “ʻOku ai ha taha ko ʻene faʻa lau ʻoku hange ko e hokohokai ha heleta: ka ko e ʻelelo ʻo e poto ko e meʻa faitoʻo.” (Palovepi 12:18) ʻOku ngāueʻaki ʻe he kau Kalisitiane fakapotopotó ʻa e mālohi ʻo e ʻeleló ke fakafiemālieʻi ʻa e loto-mafasiá pea mo e mamahí. Ko e ngaahi lea kaungāongoʻí ʻoku lava ke ne fakalototoʻaʻi ʻa e kau taʻu hongofulu tupu ko ia ʻoku nau faitau mo e tenge fakatupu maumau ʻa e toʻumeʻá. Ko ha ʻelelo faʻa fakakaukau ʻoku lava ke ne fakapapauʻi ki he fanga tokoua mo e tuofāfine taʻumotuʻá ʻoku kei fiemaʻu mo ʻofaʻi kinautolu. Ko e ngaahi lea ʻofá ʻoku lava ke ne fakafiefiaʻi ʻa e ʻaho ʻo e faʻahinga ko ia ʻoku nau puké. Hiliō he meʻa kotoa, ʻoku lava ke tau ngāueʻaki hotau ʻeleló ke vahevahe atu ʻa e pōpoaki mālohi ʻo e Puleʻangá ki he faʻahinga kotoa te nau fanongó. Ko hono fanongonongo ʻo e Folofola ʻa e ʻOtuá ʻoku ʻi hotau mālohí ia kapau ʻoku ʻi ai hotau lotó. ʻOku pehē ʻe he Tohitapú: “ʻOua te ke taʻofi ha lelei meiate kinautolu ʻoku ʻonautolu ia, ʻosi  ʻoku mafai [“mālohi,” NW] ʻe ho nima ke fai.”—Palovepi 3:27.

Ko e Ngāueʻaki Totonu ʻo e Mālohí

16, 17. ʻI hono ngāueʻi ʻa honau tuʻunga mafai kuo foaki ange ʻe he ʻOtuá, ʻoku lava fēfē ke faʻifaʻitaki ʻa e kau mātuʻá, ngaahi mātuʻa tauhi fānaú, ngaahi husepānití, mo e ngaahi uaifí kia Sihova?

¹⁶ Neongo ʻokú ne māfimafi-aoniu, ʻoku puleʻi ʻe Sihova ʻa e fakatahaʻangá ʻaki ʻa e ʻofa. (1 Sione 4:8) ʻI he faʻifaʻitaki kiate iá, ʻoku tokangaʻi anga-ʻofa ʻe he kau ʻovasia Kalisitiané ʻa e tākanga ʻa e ʻOtuá—ʻo ngāueʻaki, kae ʻikai ngāuekoviʻaki, ʻa honau mafaí. Ko e moʻoni, ʻoku fiemaʻu ki he kau ʻovasiá ʻi he taimi ʻe niʻihi ke nau “fakaʻilo hala, valoki, enginaki,” ka ʻoku fai eni “ʻi he angakātaki ʻaupito, pea ʻaki ʻa e faʻahinga ako kehekehe.” (2 Timote 4:2) Ko ia ai, ʻoku fakalaulauloto maʻu pē ʻa e kau mātuʻá ki he ngaahi lea naʻe tohi ʻe he ʻapositolo ko Pitá ki he faʻahinga ʻoku nau maʻu ʻa e mafai ʻi he fakatahaʻangá: “ʻE, mou fei mo tauhi ʻa e fanga sipi ʻa e ʻOtua ʻoku ʻiate kimoutolu, ʻo ʻoua naʻa fai fakakoloto hono leʻohi, ka ʻi he loto fiefai ʻi he funga ʻo e finangalo ʻo e ʻOtua; ʻo ʻikai ko e sio paʻanga ʻuli, ka ʻi he ʻofa ki he ngaue; pea ʻoua te mou fakafieʻeiki ki he ngaahi potungaue, kae hoko ko e faʻifaʻitakiʻanga ki he fanga sipi.”—1 Pita 5:​2, 3; 1 Tesalonaika 2:​7, 8.

¹⁷ ʻOku toe maʻu ʻe he ngaahi mātuʻá mo e ngaahi husepānití ʻa e mafai kuo tuku kiate kinautolu ʻe Sihová, pea ko e mālohi ko ení ʻoku totonu ke ngāueʻaki ia ke tokoniʻi, akoʻi, mo koloaʻaki. (Efeso 5:​22, 28-​30; 6:4) ʻOku fakahaaʻi ʻi he faʻifaʻitakiʻanga ʻa Sīsuú ʻe lava ke ngāueolaleleiʻaki ʻa e mafaí ʻi ha founga anga-ʻofa. Kapau ʻoku mafamafatatau mo huʻufataha ʻa e akonakí, ʻoku ʻikai ke hoko ai ʻa e fānaú ʻo loto-mafasia. (Kolose 3:​21) ʻOku fakaivimālohiʻi ʻa e ngaahi nofo malí ʻi he taimi ʻoku ngāueʻaki anga-ʻofa ai ʻe he ngaahi husepāniti Kalisitiané ʻa honau tuʻunga-ʻulú pea ʻapasia loloto ʻa e ngaahi uaifí ki honau ʻulu fakaehusepānití ʻo ʻikai fakalaka atu ʻi honau tuʻunga tākiekina kuo vaheʻi ʻe he ʻOtuá ke pule pe tuʻu honau lotó.—Efeso 5:​28, 33; 1 Pita 3:7.

18. (a) ʻOku totonu ke fēfē ʻetau faʻifaʻitaki ki he faʻifaʻitakiʻanga ʻa Sihová ʻi hono mapuleʻi ʻo ʻetau ʻitá? (e) Ko e hā ʻoku totonu ke feinga ʻa e faʻahinga ko ia ʻoku ʻi ai honau tuʻunga mafaí ke fakahūhū ki he faʻahinga ʻoku nau tokangaʻí?

¹⁸ Ko e faʻahinga ko ia ʻoku ʻi ai honau tuʻunga mafai ʻi he fāmilí pea ʻi he fakatahaʻangá ʻoku totonu ke nau tokanga tautefito ke mapuleʻi ʻenau ʻitá, koeʻuhi he ʻoku fakahūhū ʻe he ʻitá ʻa e manavahē kae ʻikai ko e ʻofa. Naʻe pehē ʻe he palōfita ko Nēhumí: “Oku tuai a Jihova ki he houhau, mo lahi i he malohi.” (Nehumi 1:​3, PM; Kolose 3:19) Ko hono mapuleʻi ʻetau ʻitá ko ha fakaʻilonga ia ʻo e mālohi, ka ko hono tukuange atu iá ko e fakamoʻoniʻi ia ʻo e vaivai. (Palovepi 16:32) Ko e taumuʻa fakatouʻosi ʻi he fāmilí pea ʻi he fakatahaʻangá, ke fakahūhū ʻa e ʻofá—ʻa e ʻofa kia Sihová, feʻofaʻakí, pea mo e ʻofa ki he ngaahi tefitoʻi moʻoni totonú. Ko e ʻofá ʻa e haʻi mālohi taha ʻo e fāʻūtahá pea mo e fakaueʻiloto mālohi taha ki hono fai ʻo e meʻa ʻoku totonú.—1 Kolinito 13:​8, 13; Kolose 3:​14.

19. Ko e hā ʻa e fakapapau fakafiemālie ʻoku foaki mai ʻe Sihová, pea ʻoku totonu ke fēfē ʻa ʻetau tali ki aí?

¹⁹ Ke ʻiloʻi ʻa Sihova, kuo pau ke fakatokangaʻi ʻa hono mālohí. Fakafou ʻia ʻAisea, naʻe pehē ʻe Sihova: “ʻIkai kuo ke ʻilo? kehe, ʻikai kuo ke fanongo? ko e ʻOtua taʻengata ʻa Sihova, ʻa e Fakatupu ʻo e ngaahi ngataʻanga ʻo mamani; ʻoku ʻikai ke vaivai ia, pea ʻoku ʻikai ke ongosia.” (Aisea 40:28) Ko e mālohi ʻo Sihová ʻoku taʻemalava ke ʻosi ia. Kapau ʻoku tau falala kiate ia ʻo ʻikai kiate kitautolu pē, ʻe ʻikai te ne liʻaki kitautolu. ʻOkú ne fakapapau mai kiate kitautolu: “ʻOua ʻe manavahe, he ʻoku ou ʻiate koe ʻe au; ʻoua ʻe kilokilo holo, he ko ho ʻOtua au: te u poupou koe ʻe au; ʻio, te u tokoni kiate koe; ʻio, te u pukepuke koe ʻaki ʻa e toʻomataʻu o ʻeku faitotonu.” (Aisea 41:10) ʻOku totonu ke fēfē ʻa ʻetau tali ki heʻene tokanga anga-ʻofá? ʻI he hangē ko Sīsuú, tau ngāueʻaki maʻu pē ha mālohi pē ʻoku foaki mai ʻe Sihova kiate kitautolú ke tokoni pea ke fakatupu langa hake. ʻOfa ke tau mapuleʻi hotau ʻeleló koeʻuhi ke fakamoʻui kae ʻikai ke fakatupu maumau. Pea ʻofa ke tau hanganaki ʻāʻā fakalaumālie maʻu pē, ʻo tuʻu maʻu ʻi he tuí, pea tupu ʻo mālohi ʻaupito ʻi he mālohi ʻo hotau Tokotaha-Fakatupu Maʻongoʻongá, ʻa Sihova ko e ʻOtuá.—1 Kolinito 16:13.

[Fakamatala ʻi lalo]

ʻE Lava Ke Ke Fakamatalaʻi?

• ʻOku anga-fēfē ʻa hono ngāueʻaki ʻe Sihova ʻa hono mālohí?

• Ko e hā ʻa e ngaahi founga ʻoku lava ke tau maʻu mai ai ʻa e mālohi ʻo Sihová?

• ʻOku totonu ke ngāueʻaki fēfē ʻa e mālohi ʻo e ʻeleló?

• ʻOku lava fēfē ke hoko ko ha tāpuaki ʻa e mafai kuo foaki mai ʻe he ʻOtuá?

[Fehuʻi ki he Ako]

[Fakatātā ʻi he peesi 15]

Naʻe ngāueʻaki ʻe Sīsū ʻa e mālohi ʻo Sihová ke tokoniʻi ʻa e niʻihi kehé

[Fakatātā ʻi he peesi 17]

Ko hono fanongonongo ʻo e Folofola ʻa e ʻOtuá ʻoku ʻi hotau mālohí ia ʻo kapau ʻoku ʻi ai hotau lotó