‘Fakamoʻui Koe mo Kinautolu ʻOku Fanongo Kiate Koé’
‘Fakamoʻui Koe mo Kinautolu ʻOku Fanongo Kiate Koé’
“Lamalama kiate koe mo e meʻa ʻoku ke akoʻaki: . . . he ʻi hoʻo fai pehe, te ke fakamoʻui koe mo kinautolu foki ʻoku fanongo kiate koe.”—1 TIMOTE 4:16.
1, 2. Ko e hā ʻokú ne ueʻi ʻa e kau Kalisitiane moʻoní ke hokohoko atu ʻi heʻenau ngāue fakahaofi-moʻuí?
ʻI HA kolo mavahe ʻi he fakatokelau ʻo Tailení, ʻoku ʻahiʻahiʻi ai ʻe ha ongo meʻa mali ʻa ia ko e ongo Fakamoʻoni ʻa Sihova ʻa ʻena ngaahi pōtoʻi foʻou naʻe maʻu ʻi he leá ki he kau mēmipa ʻo ha matakali ʻi he moʻungá. Koeʻuhi ke vahevahe atu ʻa e ongoongo lelei ʻo e Puleʻanga ʻo e ʻOtuá ki he kau nofo ʻi he koló, naʻe ako ai ki mui ʻe he ongo meʻá ʻa e lea Lahu.
2 “ʻOku faingataʻa ke fakamatalaʻi ʻa e fiefia mo e fiemālie ʻokú ma maʻu, ʻi he ngāue he lotolotonga ʻo e kakai mahuʻingaʻia ko ení,” ko e fakamatala ia ʻa e husepānití. “ʻOkú ma ongoʻi moʻoni ʻokú ma kau ʻi hono fakahoko ʻo e Fakahā 14:6, 7, ʻi hono talaki ʻa e ongoongo fakafiefia ‘ki he puleʻanga kotoa pē, mo e matakali, mo e leá.’ ʻOku kei toe ʻa e ngaahi malaʻe siʻi pē kuo teʻeki ke hūhū ki ai ʻa e ongoongo leleí, pea ko e taha moʻoni eni ʻo kinautolu. ʻOkú ma meimei maʻu ʻa e ngaahi ako Tohitapu lahi ange ʻi he meʻa ʻoku lava ke ma fakahokó.” ʻOku hā mahino, ko e ongo meʻa ko ení ʻokú na ʻamanaki ke fakahaofi ʻo ʻikai ko kinaua pē kae pehē foki ki he faʻahinga ʻoku fanongo kiate kinauá. ʻI he tuʻunga ko e kau Kalisitiané, ʻikai ʻoku tau ʻamanaki kotoa ke fai ʻa e meʻa tatau?
“Lamalama Kiate Koe”
3. Koeʻuhi ke fakamoʻui ʻa e niʻihi kehé, ko e hā kuo pau ke tau ʻuluaki faí?
3 Naʻe akonaki ʻa e ʻapositolo ko Paulá kia Tīmote, “Lamalama kiate koe mo e meʻa ʻoku ke akoʻaki” pea ʻoku ngāueʻaki eni ki he kau Kalisitiané kotoa. (1 Timote 4:16) Ko e moʻoni, ke tokoniʻi ʻa e niʻihi kehé ke nau maʻu ʻa e fakamoʻuí, kuo pau ke tau ʻuluaki lamalama kiate kitautolu. ʻOku lava fēfē ke tau fai ʻa e meʻá ni? Ko e meʻa ʻe taha, kuo pau ke tau hanganaki tokanga ki he taimi ʻoku tau moʻui aí. Naʻe ʻoange ʻe Sīsū ha fakaʻilonga faʻu fetuiaki koeʻuhi ke ʻiloʻi ai ʻe hono kau muimuí ʻa e taimi ʻe hoko mai ai ʻa e “fakaʻosiʻosi ʻo e fokotuʻutuʻu ʻo e ngaahi meʻá.” Neongo ia, naʻe toe pehē ʻe Sīsū ʻe ʻikai te tau ʻiloʻi tonu ʻa e taimi ʻe hoko mai ai ʻa e ngataʻangá. (Mātiu 24:3, 36, NW) ʻOku totonu ke fēfē ʻetau tali ki he moʻoniʻi meʻa ko iá?
4. (a) Ko e hā ʻa e fakakaukau ʻoku totonu ke tau ohi ki he taimi ʻoku kei toe ʻi he fokotuʻutuʻu ko ení? (e) Ko e hā ʻa e fakakaukau ʻoku totonu ke tau fakaʻehiʻehi mei aí?
4 Ko kitautolu taki taha te tau ʻeke nai, ‘ʻOku ou ngāueʻaki ʻo tatau ai pē pe ko e hā ʻa e taimi ʻoku toe ki he fokotuʻutuʻu ko ení ke fakahaofi au tonu mo e faʻahinga ko ia ʻoku fanongo kiate aú? Pe ʻoku ou fakakaukau, “Koeʻuhi ʻoku ʻikai te tau ʻiloʻi tonu ʻa e taimi ʻe hoko mai ai ʻa e ngataʻangá, ʻe ʻikai te u tokanga au ki ai”?’ Ko e fakakaukau ki muí ʻoku fakatuʻutāmaki ia. ʻOku fakatupu fakafepaki fakahangatonu ia ki he enginaki ʻa Sīsū: “Ke toka teuteu ʻa kimoutolu foki: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Mātiu 24:44) Ko e moʻoni ʻoku ʻikai ko e taimi eni ke mole ai ʻetau loto-māfana ki he ngāue ʻa Sihová pe ke hanga ki he māmaní ki ha maluʻanga pe fiemālie.—Luke 21:34-36.
5. Ko e hā ʻa e ngaahi faʻifaʻitakiʻanga naʻe fokotuʻu ʻe he Kau Fakamoʻoni ʻa Sihova ki muʻa ʻi he Kalisitiané?
5 Ko e toe founga ʻe taha ʻoku lava ke tau toe fakahaaʻi ai ʻoku tau lamalama kiate kitautolú ko ʻetau kātaki anga-tonu ʻi he tuʻunga ko e kau Kalisitiané. Ko e kau sevāniti ʻa e ʻOtuá ʻi he kuohilí naʻa nau hanganaki kātaki, tatau ai pē pe naʻa nau ʻamanekina ha fakahaofi ʻi he taimi pē ko iá pe ʻikai. Hili e lave ki he ngaahi faʻifaʻitakiʻanga ʻa e faʻahinga pehē ki muʻa ʻi he Kalisitiané hangē ko ʻĒpeli, ʻĪnoke, Noa, ʻĒpalahame mo Selá, naʻe fakamatala ʻa Paula: “Kuo ʻikai te nau lavaʻi ʻa e ngaahi talaʻofa; ka kuo nau sio ki ai mei he mamaʻo, pea kuo nau fetapa ki ai, pea kuo nau fakaha, ko e ʻāunofo mo e muli kinautolu ʻi mamani.” Naʻe ʻikai te nau tō ki ha faʻahinga holi pē ki ha moʻui faingofua, pea naʻe ʻikai te nau hehema ki he ngaahi tenge fakaeʻulungaanga taʻetaau takatakai ʻiate kinautolú, ka naʻa nau vēkeveke fakatuʻotuʻa atu ke “lavaʻi ʻa e ngaahi talaʻofa.”—Hepelu 11:13; 12:1.
6. Naʻe anga-fēfē hono ueʻi ʻa e founga moʻui ʻa e kau Kalisitiane ʻi he ʻuluaki senitulí ʻe heʻenau vakai ki he fakamoʻuí?
6 Naʻe toe sio ʻa e kau Kalisitiane ʻi he ʻuluaki senitulí kiate kinautolu ko e kau “ʻāunofo” ʻi he māmani ko ení. (1 Pita 2:11) Naʻa mo e hili ʻa hono fakahaofi ʻi he fakaʻauha ʻo Selusalema ʻi he 70 T.S., naʻe ʻikai tuku ʻa e malanga ʻa e kau Kalisitiane moʻoní pe te nau holomui ki ha founga moʻui fakamāmani. Naʻa nau ʻilo naʻe fakatatali mai ha fakamoʻui maʻongoʻonga ki he faʻahinga ko ia naʻe hanganaki anga-tonú. Ko hono moʻoní, ne aʻu mai pē ki he 98 T.S., naʻe tohi ʻe he ʻapositolo ko Sioné: “ʻOku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.”—1 Sione 2:17, 28.
7. Kuo anga-fēfē ʻa e fakahaaʻi ʻe he Kau Fakamoʻoni ʻa Sihová ʻa ʻenau kātakí ʻi onopooni?
7 ʻI onopooni kuo toe kītaki ai ʻa e Kau Fakamoʻoni ʻa Sihová ʻi he ngāue faka-Kalisitiané, neongo kuo nau hokosia ʻa e fakatanga kakaha. Kuo kulanoa ʻenau kātakí? ʻIkai ʻaupito, he naʻe fakapapauʻi mai ʻe Sīsū kiate kitautolu: “Ko ia te ne kataki ʻo aʻu ki he ngataʻanga, ko e toko taha ko ia te ne moʻui,” tatau ai pē pe ʻoku fakamoʻoniʻi ko e ngataʻanga ia ʻo e fokotuʻutuʻu motuʻá pe ko e ngataʻanga ʻo ʻete moʻui lolotongá. ʻI he toetuʻú, ʻe manatuʻi ai ʻe Sihova ʻo fakapaleʻi ʻa e kotoa ʻo ʻene kau sevāniti anga-tonu ko ia kuo nau maté.—Mātiu 24:13; Hepelu 6:10.
8. ʻOku lava fēfē ke tau fakahaaʻi ʻoku tau houngaʻia ʻi he kātaki ʻa e kau Kalisitiane ʻo e kuohilí?
8 ʻIkai ko ia pē, ʻoku tau fiefia ʻi he ikai tokanga pē ʻa e kau Kalisitiane anga-tonu ʻo e kuohilí ki he fakamoʻui pē ʻo kinautolú. Ko e moʻoni ko kitautolu ko ia kuo tau ako fekauʻaki mo e Puleʻanga ʻo e ʻOtuá fakafou ʻi heʻenau ngaahi ngāué ʻoku tau houngaʻia ʻi heʻenau kātaki ʻi hono fakahoko ʻo e fekau ʻa Sīsū: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, . . . mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.” (Mātiu 28:19, 20) Lolotonga ʻa e kei ʻatā ʻa e faingamālié kiate kitautolú, ʻoku lava ke tau fakahāhā ʻetau houngaʻiá ʻaki ʻa e malanga ki he niʻihi kehe ʻa ia kuo teʻeki ai te nau fanongo ʻi he ongoongo leleí. Kae kehe, ko e malangá ko e ʻuluaki sitepu pē ia ki he ngaohi-ākongá.
‘Lamalama ki he Meʻa ʻOkú Ke Akoʻakí’
9. ʻOku lava fēfē ke tokoniʻi kitautolu ʻe ha fakakaukau pau ke kamata ha ngaahi ako Tohitapu?
9 ʻOku kau ki hotau vāhenga-ngāué ʻo ʻikai ko e malangá pē kae toe pehē foki ki he faiakó. Naʻe fekauʻi kitautolu ʻe Sīsū ke akoʻi ʻa e kakaí ke nau tauhi ʻa e kotoa ʻo e ngaahi meʻa naʻá ne tuʻutuʻuni maí. Ko e moʻoni, ʻi he ngaahi feituʻu ʻe niʻihi, ko e tokosiʻi pē ʻoku hā ngali ʻoku nau loto ke ako fekauʻaki mo Sihová. Ka ko hono maʻu ha vakai taʻepau ki he feituʻú ʻe lava ke ne taʻofi ʻetau ngaahi feinga ke kamata ha ngaahi ako Tohitapú. Ko Yvette, ko ha tāimuʻa ia ʻi ha feituʻu naʻe ui ʻe he niʻihi ʻoku taʻefuá, naʻá ne fakatokangaʻi ko e kau ʻaʻahi ki he feituʻú, ʻa ia naʻe ʻikai te nau maʻu ha fakakaukau taʻepaú, naʻa nau kamata ha ngaahi ako Tohitapu ʻi ʻapi. Hili ʻene ohi ha fakakaukau pau lahi angé, naʻe toe maʻu foki ʻe Yvette ʻa e kakai naʻa nau loto ke ako Tohitapu.
10. Ko e hā hotau ngafa tefito ʻi he tuʻunga ko e kau faiako Tohitapú?
10 ʻOku toumoua nai ʻa e kau Kalisitiane ʻe niʻihi ke tuʻuaki ke ako Tohitapu mo e faʻahinga mahuʻingaʻiá koeʻuhi ʻoku ʻikai te nau ongoʻi ʻoku lava ke nau fai ha ako. ʻI heʻene peheé, ʻoku tau maʻu ʻa e ngaahi tuʻunga kehekehe ʻo e malavá. Ka ʻoku ʻikai fiemaʻu ia ke tau pōtoʻi lahi kae lavameʻa ʻi he tuʻunga ko e kau faiako ʻo e Folofola ʻa e ʻOtuá. Ko e pōpoaki maʻa ʻa e Tohitapú ʻoku mālohi, pea naʻe pehē ʻe Sīsū ʻoku ʻiloʻi ʻe he faʻahinga hangē ha sipí ʻa e leʻo ʻo e Tauhi-Sipi moʻoní ʻi he taimi ʻoku nau fanongo ai ki aí. Ko ʻetau ngāué leva, ko hono ʻoatu pē ʻa e pōpoaki ʻa e Tauhi-Sipi Leleí, ʻa Sīsū, ʻi he mahino taha ʻi heʻetau malavá.—Sione 10:4, 14.
11. ʻOku lava fēfē ke ke toe ola lelei ange ʻi hono tokoniʻi ha tokotaha ako Tohitapu?
11 ʻE lava fēfē ke ke ʻoatu ola lelei ange ʻa e pōpoaki ʻa Sīsuú? Ke kamataʻaki, ʻai ke ke maheni tonu mo e meʻa ʻoku leaʻaki ʻe he Tohitapú fekauʻaki mo e tuʻunga-lea ʻoku fai ki ai ʻa e lāuleá. Kuo pau ke ke mahinoʻi ʻe koe tonu ha kaveinga ki muʻa ke ke lava ʻo akoʻi ia ki he niʻihi kehé. Toe feinga foki, ke tauhi maʻu ha ʻatimosifia ngeia kae angafakakaumeʻa lolotonga ʻa e akó. Ko e kau akó, kau ai ʻa e faʻahinga iiki ʻaupitó, ʻoku nau ako lelei ange ʻi he taimi ʻoku nau fiemālie ai, pea fakahaaʻi ange kiate kinautolu ʻe he faiakó ʻa e tokaʻi mo e anga-ʻofá.—Palovepi 16:21 (Lea Fakatātā, PM).
12. ʻOku lava fēfē ke ke fakapapauʻi ʻoku mahinoʻi ʻe he tokotaha akó ʻa e meʻa ʻokú ke akoʻi kiate iá?
12 ʻI he tuʻunga ko e faiakó, ʻoku ʻikai te ke loto pē ke ʻoatu ʻa e ngaahi foʻi moʻoní ki he tokotaha akó ke ʻotomētiki pē ʻene laulau mai ʻa e talí. Tokoniʻi ia ke ne mahinoʻi ʻa e meʻa ʻokú ne akó. Ko e tuʻunga fakaako ʻo e tokotaha akó, meʻa ʻoku hokosia ʻi he moʻuí, mo e maheni mo e Tohitapú ʻe kaunga ia ki heʻene mahinoʻi ʻa e meʻa ʻokú ke leaʻakí. Ko ia ai, te ke ʻeke hifo nai kiate koe, ‘ʻOkú ne maʻu ʻa e ʻuhinga ʻo e ngaahi Konga Tohitapu naʻe lave ki ai ʻi he tohi akó?’ ʻE lava ke ke tohoakiʻi ʻa ʻene fakakaukaú ʻaki ʻa e ngaahi fehuʻi ʻa ia ʻe ʻikai lava ke tali faingofua ʻaki pē ha ʻio pe ko ha ʻikai, ka ko e ngaahi tali ʻoku fiemaʻu ki ai ha fakamatala. (Luke 9:18-20) ʻI he tafaʻaki ʻe tahá, ʻoku toumoua ʻa e kau ako ʻe niʻihi ke fehuʻi ki ha faiako. Ko ia ai, te nau hokohoko atu pē nai ʻo ʻikai ke mahinoʻi kakato ʻa e meʻa ʻoku akoʻi kiate kinautolú. Fakalototoʻaʻi ʻa e tokotaha akó ke ne ʻeke ha ngaahi fehuʻi pea ke tala atu kiate koe ʻa e taimi ʻoku ʻikai te ne mahinoʻi kakato ai ha foʻi poiní.—Maake 4:10; 9:32, 33.
13. ʻE lava fēfē ke ke tokoniʻi ʻa e tokotaha akó ke ne hoko ko ha faiako?
13 Ko ha taumuʻa mahuʻinga ʻo hono fai ha ako Tohitapú ke tokoniʻi ʻa e tokotaha akó ke ne hoko ko ha faiako. (Kaletia 6:6) Ki he taumuʻa ko iá, ʻi he tuʻunga ko hono fakamanatu ʻo hoʻo akó, te ke kole nai kiate ia ke ne fakamatalaʻi kiate koe ha foʻi poini ʻi he ngaahi kupuʻi lea faingofua, ʻo hangē ko haʻane fakamatalaʻi ia ki ha tokotaha ko e fuofua taimi ia ʻokú ne fanongo ai ki aí. Ki mui ai, ʻi he taimi ʻokú ne hoko ai ʻo taau ke kau ʻi he ngāue fakafaifekaú, ʻe lava ke ke fakaafeʻi ia ke kau fakataha mo koe ʻi he ngāué. Ngalingali te ne ongoʻi fiemālie ʻi he ngāue mo koé, pea ʻe tokoniʻi ia ʻe he meʻa naʻe hokosiá ke tupulaki ʻa ʻene loto-falalá kae ʻoua kuó ne mateuteu ke ʻalu ʻiate ia pē ʻi he ngāue fakafaifekaú.
Tokoniʻi ʻa e Tokotaha Akó Ke Ne Hoko ko e Kaumeʻa ʻo Sihova
14. Ko e hā hoʻo taumuʻa tefito ʻi he tuʻunga ko ha faiakó, pea ko e hā ʻe tokoni ke ke lavameʻa ʻi hono fakahoko iá?
14 Ko e taumuʻa tefito ʻa e faiako faka-Kalisitiane kotoa pē ke tokoniʻi ʻa e tokotaha akó ke ne maʻu ʻa e tuʻunga ʻo e hoko ko e kaumeʻa ʻo Sihova. Te ke fakahoko eni ʻo ʻikai ʻaki hoʻo ngaahi leá pē kae toe pehē foki ki hoʻo faʻifaʻitakiʻangá. Ko e faiako ʻaki ʻa e faʻifaʻitakiʻangá ʻoku ʻi ai hono ola mālohi ki he loto ʻo e kau akó. ʻOku lea moʻoni pē ʻa ngāue, tautefito ʻi he taimi ʻoku hoko mai ai ki hono fakahūhū ʻa e ngaahi ʻulungaanga tāú mo hono fakaʻaiʻai ʻa e faivelengá ki he tokotaha akó. Kapau ʻokú ne sio ko hoʻo ngaahi leá mo e ngāué ko e tupu ia mei ha vahaʻangatae lelei mo Sihova, ʻe ueʻi lahi ange ai ia ke ne fakatupulekina ʻiate ia ha vahaʻangatae pehē.
15. (a) Ko e hā ʻoku mahuʻinga ai ke fakatupu ʻe he tokotaha akó ʻa e fakaueʻiloto totonu ki hono tauhi ʻo Sihová? (e) ʻOku lava fēfē ke ke tokoniʻi ʻa e tokotaha akó ke hokohoko atu ʻa hono fai ʻo e fakalakalaka fakalaumālié?
15 ʻOkú ke fiemaʻu ʻa e tokotaha akó ke tauhi kia Sihova ʻo ʻikai koeʻuhi pē ko e ʻikai te ne loto ke fakaʻauha ia ʻi ʻĀmaketoné ka koeʻuhi ko ʻene ʻofa kiate iá. ʻI hono tokoniʻi ia ke ne fakatupu ha fakaueʻiloto maʻá, te ke langa ʻaki ai ʻa e ngaahi naunau velangataʻa ʻa ia ʻe hao ʻi he ngaahi ʻahiʻahiʻi ʻo ʻene tuí. (1 Kolinito 3:10-15) Ko ha fakaueʻiloto hala, hangē ko ha holi tōtuʻa ke tatau mo koe pe ko ha toe taha kehe peé, ʻe ʻikai te ne ʻoange ai kiate ia ʻa e mālohi ke talitekeʻiʻaki ʻa e ngaahi tākiekina taʻefakakalisitiané pe ko e loto-toʻa ke fai ʻa e meʻa ʻoku totonú. Manatuʻi, ʻe ʻikai te ke hoko ko ʻene faiako ʻo taʻengata. Lolotonga hoʻo maʻu ʻa e faingamālié, ʻe lava ke ke fakalototoʻaʻi ia ke ʻunuʻunu ke toe ofi ange kia Sihova ʻaki hono lau ʻa e Folofola ʻa e ʻOtuá ʻi he ʻaho kotoa pē pea fakakaukau fekauʻaki mo ia. ʻI he foungá ni te ne hokohoko atu ai ke maʻu ʻa e “ngaahi lea moʻui” mei he Tohitapú mo e ngaahi tohi makatuʻunga ʻi he Tohitapú ʻi ha taimi fuoloa hili e ʻosi ʻa hoʻo ako mo iá.—2 Timote 1:13.
16. ʻOku lava fēfē ke ke akoʻi ʻa e tokotaha akó ke ne lotu mei hono lotó?
16 ʻE lava ke ke toe tokoniʻi ʻa e tokotaha akó ke tupu ʻo toe ofi ange kia Sihova ʻaki hono akoʻi ia ke ne lotu mei hono lotó. ʻE lava fēfē ke ke fai eni? Mahalo pē te ke fakahanga nai ia ki he sīpinga lotu ʻa Sīsuú, pea pehē ki he ngaahi lotu ʻaufuatō lahi ʻoku hiki ʻi he Tohitapú, hangē ko e ngaahi lotu ko ia ʻi he ngaahi sāmé. (Sāme 17, 86, 143; Mātiu 6:9, 10) Tānaki atu ki ai, ʻi he taimi ʻoku fanongo ai hoʻo tokotaha akó ʻi hoʻo lotu ke kamata mo fakaʻosiʻaki ʻa e akó, te ne mahinoʻi ai ʻa hoʻo ngaahi ongoʻi kia Sihová. Ko ia ai, ʻoku totonu ke tapua maʻu pē mei hoʻo ngaahi lotú ʻa e loto-moʻoni mo hangatonu, pehē foki ki he mafamafatatau fakalaumālie mo fakaeongo.
Ngāue ke Fakamoʻui Hoʻo Fānaú
17. ʻOku lava fēfē ke tokoniʻi ʻe he ngaahi mātuʻá ʻenau fānaú ke nau nofo ʻi he hala ki he fakamoʻuí?
17 Ko e moʻoni, ʻoku ʻi he lotolotonga ʻo e faʻahinga ko ia ʻoku tau loto ke fakamoʻuí, ʻa e ngaahi mēmipa ʻo hotau fāmilí. Ko e fuʻu tokolahi ʻo e fānau ʻa e ngaahi mātuʻa Kalisitiané ʻoku nau loto-moʻoni mo “tuʻu maʻumaʻuluta he tui.” Neongo ia, ʻoku ʻikai nai ke faiaka loloto ʻa e moʻoní ʻi he loto ʻo e niʻihi kehé. (1 Pita 5:9; Efeso 3:17; Kolose 2:7) Ko e tokolahi ʻo e toʻutupu ko ení ʻoku nau liʻaki ʻa e founga faka-Kalisitiané ʻi he taimi ʻoku nau fakaofiofi ai pe aʻu ki he tuʻunga fuʻu lahí. Kapau ko ha mātuʻa koe, ko e hā ʻe lava ke ke fai ke ʻai ke siʻi ai ʻa e ngalingali ke hoko ʻa e meʻa peheé? ʻUluakí, ʻoku lava ke ke ngāue ki hono fakatupu ha ʻatimosifia fakafāmili lelei. Ko ha moʻui fakafāmili lelei ʻokú ne fakatoka ʻa e makatuʻunga ki ha vakai lelei ki he tuʻunga mafaí, houngaʻia ʻi he ngaahi meʻa mahuʻinga totonú, mo e ngaahi vahaʻangatae fiefia mo e niʻihi kehé. (Hepelu 12:9) Ko ia ai, ko e ngaahi haʻi vāofi ʻi loto he fāmilí ʻe lava ke hoko ia ko e matavai ʻa ia ʻe lava ke tupulekina ai ʻa e kaumeʻa ʻa ha kiʻi tama mo Sihová. (Sāme 22:10) ʻOku fai fakataha ʻe he ngaahi fāmili mālohí ʻa e ngaahi meʻá ʻi he tuʻunga ko ha kulupu—naʻa mo e pau ke feilaulauʻi ʻe he ngaahi mātuʻá ʻa e taimi ko ia ʻe lava ke ngāueʻaki ki ha ʻaonga fakafoʻituituí. ʻI he foungá ni te ke lava ke akoʻi hoʻo fānaú ʻaki ʻa e faʻifaʻitakiʻangá ke nau fai ʻa e ngaahi fili totonu ʻi he moʻuí. Ngaahi mātuʻa, ko e meʻa ʻoku fiemaʻu lahi taha ʻe hoʻomou fānaú meiate kimoutolú ʻoku ʻikai ko e ngaahi ʻaonga fakamatelié, ka ko kimoutolu—ko homou taimí, iví, mo e ʻofá. ʻOku mou ʻoange ki hoʻomou fānaú ʻa e ngaahi meʻa ko ení?
18. Ko e hā ʻa e ngaahi faʻahinga fehuʻi kuo pau ke tokoniʻi ai ʻe he ngaahi mātuʻá ke fakapapauʻi ʻe heʻenau fānaú?
18 Kuo pau ke ʻoua ʻaupito ʻe pehē ʻe he ngaahi mātuʻa Kalisitiané, ʻe ʻotomētiki pē ʻa e hoko foki ko e kau Kalisitiane ʻa ʻenau fānaú. Ko Daniel, ko ha tokotaha mātuʻa mo e tamai ʻa ha toko nima, ʻokú ne fakamatala: “Kuo pau ke vaheʻi ʻe he ngaahi mātuʻá ʻa e taimi ke tokoni ke toʻo atu ai ʻa e ngaahi veiveiua ʻoku maʻu taʻealakalofi ʻe heʻenau fānaú ʻi he akoʻangá mo e ngaahi feituʻu kehé. Kuo pau ke nau akoʻi anga-kātaki ʻenau fānaú ke nau maʻu ʻa e ngaahi tali ki he ngaahi fehuʻi hangē ko ení: ‘ʻOku tau moʻui moʻoni ʻi he taimi ʻo e ngataʻangá? ʻOku ʻi ai moʻoni ha lotu moʻoni pē ʻe taha? Ko e hā ʻoku ʻikai ai ko ha feohi lelei ha kaungāako ʻoku hā ngali lelei moʻoni? ʻOku hala maʻu pē ke fehokotaki fakasino ki muʻa ʻi he nofo malí?’” Ngaahi mātuʻa, ʻe lava ke mou fakatuʻotuʻa atu ʻe tāpuakiʻi ʻe Sihova hoʻomou ngaahi feingá, he ʻokú ne mahuʻingaʻia mo ia foki ʻi he lelei ʻa hoʻomou fānaú.
19. Ko e hā ʻoku lelei taha ai ke ako ʻa e ngaahi mātuʻá tonu mo ʻenau fānaú?
19 ʻE ongoʻi taʻefeʻunga nai ʻa e ngaahi mātuʻa ʻe niʻihi ʻi he taimi ʻoku hoko mai ai ke ako mo ʻenau fānaú tonu. Kae kehe, ʻoku ʻikai fiemaʻu ke mou ongoʻi peheni, he ʻoku ʻikai ha taha ʻoku ʻi ha tuʻunga lelei ange ke ne fakahinohinoʻi hoʻomou fānaú ʻiate kimoutolu. (Efeso 6:4) Ko e ako mo hoʻomou fānaú tonu te ne fakaʻatā ai kimoutolu ke mou tomuʻa ʻilo ʻa e meʻa ʻoku ʻi honau lotó mo e ʻatamaí. ʻOku fakamātoato ʻenau ngaahi fakamatalá pe ʻoku fai ʻo kehe pē ke fai? ʻOku nau tui moʻoni ki he meʻa ʻoku nau akó? ʻOku moʻoni ʻa Sihova kiate kinautolu? ʻE lava ke ke maʻu ʻa e ngaahi tali ki heni mo e ngaahi fehuʻi mātuʻaki mahuʻinga kehé ʻo kapau pē te ke toki ako fakafoʻituitui mo hoʻo fānaú.—2 Timote 1:5.
20. ʻOku lava fēfē ke ʻai ʻe he ngaahi mātuʻá ʻa e ako fakafāmilí ke fakafiefia mo ʻaongá?
20 ʻE lava fēfē ke ke tauhi maʻu ʻa hoʻo polokalama ako fakafāmilí ʻi he ʻosi pē hoʻo kamata iá? Ko Joseph, ko ha tokotaha mātuʻa mo e tamai ʻa ha foha mo ha ʻofefine kei siʻi, ʻokú ne pehē: “Hangē ko e kotoa ʻo e ngaahi ako Tohitapú, ko e ako fakafāmilí ʻoku totonu ke fakafiefia, ko ha meʻa ke fakatuʻotuʻa ki ai ʻa e tokotaha kotoa pē. Ke aʻusia ia ʻi hotau fāmilí, ʻe ʻikai lava ke tau fuʻu fefeka fekauʻaki mo e taimí. ʻE ʻosi nai ʻemau akó ʻi ha houa, ka neongo kapau ʻoku mau maʻu pē ʻi he taimi ʻe niʻihi ha miniti ʻe hongofulu, te mau kei ako pē. Ko e meʻa ʻe taha ʻokú ne ʻai ʻemau akó ke hoko ko ha meʻa mahuʻinga ki he fānaú ʻi he uiké ko ʻemau fakatātaaʻi ko ia ʻa e ngaahi konga mei he Ko ʻEku Tohi ʻo e Ngaahi Talanoa Faka-Tohitapú. a Ko e loloto ʻo e maongo ki he ʻatamaí pea mo e mahino ʻoku maʻu mei aí ʻoku mahuʻinga mamaʻo ange ia ʻi he lahi ʻo e ngaahi palakalafi ʻoku mau ʻosikí.”
21. Ko fē nai ʻa e taimi ke fakahinohinoʻi ai ʻe he ngaahi mātuʻá ʻenau fānaú?
21 Ko e moʻoni, ko hono akoʻi hoʻomou fānaú ʻoku ʻikai fakangatangata pē ia ki he ngaahi vahaʻa taimi ako mahení. (Teutalonome 6:5-7) Ko e tokotaha Fakamoʻoni ʻi Taileni naʻe lave ki ai ʻi he kamatá ʻokú ne pehē: “ʻOku ou manatuʻi lelei ʻa e anga ʻo hono faʻa ʻave au ʻe Teti ʻi he ngāue fakamalangá, ʻi heʻema pasikalá, ki he ngaahi feituʻu mamaʻo ʻo e feituʻu ngāue ʻo ʻemau fakatahaʻangá. ʻOku ʻikai ha veiveiua, ko e faʻifaʻitakiʻanga lelei ʻa ʻemau ongo mātuʻá mo ʻena akoʻi kimautolu ʻi he malumalu ʻo e tuʻunga kotoa pē naʻá ne tokoniʻi kimautolu ke fili ke hū ki he ngāue fakafaifekau taimi-kakató. Pea ʻoku kei ola lelei ʻa e ngaahi lēsoni ko iá. ʻOku ou kei ngāue pē ʻi he ngaahi feituʻu mamaʻo ʻo e ngāué!”
22. Ko e hā ʻa e ola ʻi hoʻo ‘lamalama kiate koe mo e meʻa ʻokú ke akoʻakí’?
22 ʻI he taimi totonú pē, ʻi ha ʻaho vavé ni mai, ʻe hoko mai ai ʻa Sīsū ke fakahoko ʻa e fakamaau ʻa e ʻOtuá ki he fokotuʻutuʻu ko ení. ʻE toki fakalaka atu ai ʻa e meʻa lahi ko ia ʻe hokó ki he hisitōliá fakalūkufua, ka ko e kau sevāniti anga-tonu ʻa Sihová te nau hanganaki hokohoko atu ʻa hono tauhi iá fakataha mo e vakai atu ki he fakamoʻui taʻengatá. ʻOkú ke ʻamanaki ke ʻi honau lotolotongá, fakataha mo hoʻo fānaú mo e kau ako Tohitapú? Manatuʻi leva: “Lamalama kiate koe mo e meʻa ʻoku ke akoʻaki: ke ke nofoʻaki fai ʻa e ongo meʻa ko ia; he ʻi hoʻo fai pehe, te ke fakamoʻui koe mo kinautolu foki ʻoku fanongo kiate koe.”—1 Timote 4:16.
[Fakamatala ʻi lalo]
a Pulusi ʻe he Watchtower Bible and Tract Society of New York, Inc.
ʻE Lava Ke Ke Fakamatalaʻi?
• ʻOku totonu ke fēfē ʻetau fakakaukaú, koeʻuhi ʻoku ʻikai te tau ʻiloʻi ʻa e taimi tonu ʻo e fakamaau ʻa e ʻOtuá?
• Ko e hā ʻa e ngaahi founga ʻoku lava ai ke tau ‘lamalama ʻa e meʻa ʻoku tau akoʻakí’?
• ʻOku lava fēfē ke ke tokoniʻi ha tokotaha ako ke ne hoko ko ha kaumeʻa ʻo Sihova?
• Ko e hā ʻoku mahuʻinga ai ʻa e vaheʻi ʻe he ngaahi mātuʻá ʻa e taimi ke akoʻi ʻa ʻenau fānaú?
[Fehuʻi ki he Ako]
[Fakatātā ʻi he peesi 15]
ʻOku fakaleleiʻi ʻa e akó ʻaki ha ʻatimosifia ngeia kae anga-fakakaumeʻa
[Fakatātā ʻi he peesi 18]
Ko hono fakatātaaʻi ʻa e ngaahi talanoa faka-Tohitapú, hangē ko hono fakamāuʻi ʻe Solomone ʻa e ongo feʻauakí, ʻokú ne ʻai ʻa e ngaahi ako fakafāmilí ke fakafiefia