Ko Fē ʻe Lava Ke Ke Hanga Ki Ai ki ha Faleʻi Leleí?

Ko e “ngāueʻanga faleʻí” kuo hoko ia he taimí ni ko ha pisinisi paʻanga ʻoku laulauipiliona he taʻu. ʻOku fiemaʻu ʻe he kakaí ha tokoni. ʻOku pehē ʻe he palofesinale ʻi he moʻui lelei fakaʻatamaí ko Heinz Lehmann: “[ʻI he sōsaieti ʻo e ʻaho ní] ʻoku ʻi ai ʻa e ngaahi feʻamokaki fakaeako mo fakasōsiale. Ko e ngaahi tuʻunga mahuʻinga fakalotú kuo ʻikai ke nau kei hangē ko e taimi ki muʻá. Ko e ngaahi fāmilí kuo hōloa lahi hono mālohí . . . , pea ʻi heʻene peheé kuo taufāholo ai e kakaí. ʻOku pehē ʻe he faʻu-tohi ko Eric Maisel: “Ko e faʻahinga ko ia naʻa nau hanga ʻi ha taimi ki honau taulafaʻahikehe fakamatakalí, faifekaú pe toketā fakafāmilí ki ha tokoni fekauʻaki mo e ngaahi palopalema fakaʻatamaí, fakalaumālié mo fakaesinó kuo nau hanga kinautolu he taimí ni ki he ngaahi tohi faleʻi tokoniʻi-kitá ke tokonaki mai ʻa e ngaahi talí.”

NAʻE fokotuʻu ʻe he Kautaha Fakaeʻatamai ʻAmeliká ha kulupu fakahoko ngāue ke nau fakatotoloʻi ʻa e ngāueʻanga tupulaki vave ko ení. Naʻa nau pehē lolotonga ʻoku ʻi ai ʻa e “fuʻu malava lahi ke tokoniʻi ʻa e niʻihi tāutahá ke nau ʻiloʻi kinautolu mo e niʻihi kehé . . . , ko e ngaahi taukaveʻi mo e ngaahi kaveinga tuʻuaki ʻoku ō fakataha mo e ngaahi polokalama ko ení ʻoku fakautuutu hono fakalahiʻi mo ʻai ke fakatoʻoalotó.” ʻOku pehē ʻe ha tangata faʻu-tohi ʻi he Toronto Star: “Tokanga ki he lahi ʻo e ngaahi kākā ʻo e lotu-fakalaumālié. . . . Tokanga tautefito ki he ngaahi tohi, ngaahi foʻi tepi tokoniʻi-kita kotoa pē pe ngaahi seminā ʻoku tuʻuaki ai ʻa e meʻa fuʻu lahi fau, ʻi ha taimi siʻisiʻi fau, ki ha feinga pe akonekina-kita siʻisiʻi fau.” ʻI heʻene peheé, ʻoku ʻi ai ʻa e fuʻu tokolahi fau ʻoku nau kumi moʻoni ke tokoniʻi ʻa e faʻahinga ʻoku ʻi ai ʻenau fiemaʻú. Neongo ia, ko e meʻa fakamamahi ʻoku hoko moʻoní ʻoku tokolahi ʻa e faʻahinga taʻefaitotonu ʻoku nau kumi tupu mei he tuʻunga liʻekina mo e faingataʻaʻia ʻa e kakaí, ʻo ʻikai ʻoatu ha tokoni pe ha ngaahi fakaleleiʻanga ʻoku moʻoní.

ʻI he vakai ki he meʻa ko ení, ko e hā ha matavai tefito ʻo e tokoní ʻe lava ke tau falala ki aí? Ko fē ʻe lava ke tau maʻu mei ai ha fakahinohino ʻaonga ʻe ngāue maʻu peé?

Matavai ʻo e Tataki Taʻealatō

Naʻe pehē ʻe he tangata malanga ʻAmelika ʻo e senituli hono 19 ko Henry Ward Beecher: “Ko e Tohitapú ko e siate ia ʻa e ʻOtuá maʻá u ke fakaʻuli ʻaki koe, ke maluʻi koe naʻá ke toka, mo fakahā kiate koe ʻa e taulangá, mo e founga ke aʻu ai ki aí ʻo ʻikai hake ʻi ha ngaahi maka pe ʻoneʻone toumoloto.” Naʻe toe pehē ʻe ha tangata ʻe taha fekauʻaki mo e Tohitapú: “ʻOku ʻikai faifai ange pea tupu fakalaka ha taha ʻi he Konga Tohitapú; ʻoku fālahi ange mo loloto ange ʻa e tohí ʻi he ʻalu hotau ngaahi taʻú.” Ko e hā ʻoku totonu ai ke ke fakakaukau fakamātoato ki he matavai ko ení?

ʻI hono fakaongoongoleleiʻi pē iá, ʻoku pehē ʻe he Tohitapú: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.” (2 Timote 3:​16, 17) Ko e kakano ʻo e Tohitapú ko e tupu ia mei he Matavai tonu ʻo e moʻuí, ʻa e ʻOtua ko Sihová. (Sāme 36:9) ʻI heʻene peheé, ʻokú ne mātuʻaki ʻiloʻi lelei hotau faʻungá, ʻo hangē ko ia ʻoku fakamanatu mai kiate kitautolu ʻe he Sāme 103:14: “Oku ne ʻilo ʻe ia hota anga; ʻoku ne manatu ai pe ko e efu pe kitaua.” ʻOku tau malava leva ai, ke maʻu ʻa e loto-falala  kakato ki he mahuʻinga ʻo e Tohitapú.

Ko hono moʻoní, ʻoku ʻi he Tohitapú ʻa e ngaahi tefitoʻi moʻoni lahi mo e ngaahi tataki ʻa ia ʻe malava ke ngāueʻaongaʻaki ki ha faʻahinga tuʻunga pē te ke ʻi ai nai. Fakafou ai ʻoku folofola mai ʻa e ʻOtuá kiate kitautolu: “Ko eni ʻa e hala, fou ai.” (Aisea 30:21 [Isaia, PM]) ʻE malava moʻoni ʻe he Tohitapú ke fakalato ʻa e ngaahi fiemaʻu ʻa e faʻahinga tāutaha ʻo e ʻaho ní? Tau sio angé.

ʻOku Fakalato ʻe he Tohitapú ʻa ʻEtau Ngaahi Fiemaʻú . . .

ʻI he Fekuki mo e Ngaahi Loto-Moʻuá. ʻOku tala mai ʻe he Tohitapú kiate kitautolu: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:​6, 7) Kuo fakamoʻoniʻi nai ʻoku ola lelei ʻa e lotú ʻi he fekuki mo e ngaahi loto-moʻua fakaeongo fekauʻaki mo e faingataʻa fakaʻikonōmiká, ngaohikoviʻi fakaefehokotaki fakasino mo fakaeleá, pe ko e mate ha taha ʻofeina? Fakakaukau ki he meʻa naʻe hokosia ʻoku hoko haké.

Ko Jackie, hili ʻene ʻilo ʻa e ngaohikoviʻi fakaefehokotaki fakasino ʻo ʻene taʻahiné, ʻokú ne pehē: “Ko e ongoʻi halaia ʻi he taʻemalava ke te maluʻi haʻate tamá ʻoku ʻikai ala maʻu ha lea feʻunga ia ki ai. Naʻe pau ke u tauʻi ʻa e ngaahi ongoʻi ʻo e mamahi, fisiʻia, mo e ʻita. Ko e ngaahi ongoʻi ko ení ne nau kamata ke holoki ʻeku moʻuí. Naʻá ku fiemaʻu ʻaupito ʻa Sihova ke ne maluʻi hoku lotó.” Hili hono lau mo toe lau ʻa e Filipai 4:​6, 7, naʻá ne feinga mālohi leva ke ngāueʻaki ʻene akonakí. “Naʻá ku lotu he ʻaho kotoa, ʻo toutou kole ke ʻoua naʻa tuku ke keina au ʻe he ngaahi ongoʻi taʻepaú, pea kuo tokoniʻi au ʻe Sihova ke fakatupulekina ha loto ʻoku nonga mo fiefia. ʻOku ou ongoʻi moʻoni ʻa e nonga ʻi loto ʻiate au,” ko e fakamatala ia ʻa Jackie.

Ko koe foki te ke ʻi ha tuʻunga nai ʻoku hulu atu ia ʻi hoʻo malava ke mapuleʻi pe fakaleleiʻí pea ʻe haʻu fakataha ai mo ha ngaahi hohaʻa fakaeongo. ʻI he muimui ʻi he enginaki ʻa e Tohitapú ke lotú, ʻe lava ke ke fekuki ola lelei ai mo ia. ʻOku fakalototoʻaʻi kitautolu ʻe he tokotaha-tohi-sāmé ʻaki ʻa e ngaahi leá ni: “Tekaki kia Sihova ho ʻalunga; ʻio falala ki ai, pea te ne fai ʻe ia.”—Sāme 37:5.

Ki ha Fakalototoʻa. Naʻe fai ʻe he tokotaha-tohi-sāmé ʻa e fakahāhā ko eni ʻo e houngaʻiá: “E Jihova, kuou ofa ki he nofoaga o ho fale, moe botu oku nofo ai a hoo afio. Oku tuu hoku vaʻe i he botu tokamalie: i he gaahi fakataha oe kakai teu fakafetai kia Jihova.” (Sāme 26:​8, 12, PM) ʻOku fakalototoʻaʻi kitautolu ʻi he Tohitapú ke tau fakatahataha fakataha maʻu pē ke lotu kia Sihova. ʻE malava fēfē ʻe he feohi ko ení ke fakalato hoʻo ngaahi fiemaʻú? Ko e hā ʻa e meʻa kuo ʻilo ʻe he niʻihi kehé?

ʻOku pehē ʻe Becky: “ʻOku ʻikai ke tauhi ʻeku ongo mātuá ʻaku kia Sihova, ko ia ai, ʻokú na fakafepaki mai ʻi he taimi ʻoku ou feinga ai ke fai ha faʻahinga meʻa ʻoku fekauʻaki mo e ngāue ki he ʻOtuá. ʻOku fai ʻa e feinga lahi ia kiate au kae toki maʻu ʻa e ngaahi fakatahá.” ʻOku ongoʻi ʻe Becky kuó ne maʻu ʻa e ngaahi tāpuaki lahi koeʻuhi kuó ne kīvoi ke maʻu maʻu pē ʻa e ngaahi fakataha faka-Kalisitiané. “ʻOku fakaivimālohiʻi ʻe he ngaahi fakatahá ʻeku tuí, koeʻuhi ke u malava ai ʻo matuʻuaki ʻa e ngaahi tenge fakaʻaho ʻi hoku tuʻunga ko ha tokotaha ako, ʻofefine, mo e sevāniti ʻa Sihová. Ko e kakai ʻi he Fale Fakatahaʻangá ʻoku nau mātuʻaki kehe kinautolu mei he tamaiki ako ʻi he ʻapiakó! ʻOku nau tokanga mai mo tokoni, pea ko ʻemau ngaahi talanoá ʻoku fakalototoʻa maʻu pē. Ko kinautolú ko e ngaahi kaumeʻa moʻoni.”

ʻIo, ko e muimui ki he fakahinohino ʻa e Tohitapú ke fakatahataha fakataha maʻu peé, ʻe malava ai ke hanga ʻe Sihova ʻo fakalato ʻetau fiemaʻu ko ia ʻa e fakalototoʻá. Ko e feituʻu eni te tau hokosia ai ʻa e moʻoni ʻo e ngaahi lea ʻa e tangata-tohi-sāmé: “Koe Otua ko ho tau hufaga moe malohi, koe tokoni lahi bea ofi i he mamahi.”—Sāme 46:​1, PM.

Ki he Fakafiemālie mo e Ngāue ʻAonga. “Mou tuʻu maʻu, taʻe ngaūe, ʻo mou tupulekina maʻu ai pe ʻi he ngaue ʻa e ʻEiki: ʻi hoʻomou ʻilo ni, ko e meʻa ki he ʻEiki, ko hoʻomou fakaongosia ʻoku ʻikai ko e laufanō ia,” ko e poupou ia ʻa e Tohitapú. (1 Kolinito 15:58) ʻOku fakafiemālie moʻoni ʻa e “ngaue ʻa e ʻEiki”? ʻOku fakahoko ʻe he ngāue fakafaifekau faka-Kalisitiané ha meʻa ʻaonga?

ʻOku fakahaaʻi ʻe ʻAmelia ʻa e anga ʻo ʻene ongoʻí:  “Naʻá ku ako ʻa e Tohitapú mo ha ongo meʻa naʻá na teu ke taki taha maʻana. Naʻá ku toe tokoniʻi foki ha fefine ʻa ia ko hono ʻofefiné naʻe tāmateʻi angafakamanu. Naʻe mamahi ʻa e fefiné koeʻuhi ko e tuʻunga taʻepau ʻo e maté. ʻI he ongo tuʻunga ko ení fakatouʻosi, ko hono ngāueʻaki ko ia ʻo e ngaahi tefitoʻi moʻoni ʻo e Tohitapú ne ʻomi ai ʻa e nonga mo e ʻamanaki ki heʻenau moʻuí. ʻOku ou ongoʻi ʻa e ongo ʻo e fiefia lahi mo e fiemālie koeʻuhi naʻe ʻi ai ʻeku kaunga ʻi hono tokoniʻi kinautolú.” ʻOku pehē ʻe Scott: “Kapau naʻá ke hokosia ha meʻa lelei ʻi he malaʻe malangá, kamata ha ako Tohitapu foʻou, pe fiefia ʻi he lavameʻa ʻi ha faifakamoʻoni ʻi he founga ʻikai anga-mahení, te ke kei talanoa pē fekauʻaki mo ia ʻi he ngaahi taʻu ka hoko maí. Ko e ngaahi ongoʻi mo e fiefia tatau ʻe toe fakaake mai ia ʻi he taimi kotoa pē ʻoku toe fakamatalaʻi aí! Ko e ngāue fakafaifekaú ko e meʻa ia ʻoku haʻu mei ai ʻa e fiefia lahi taha mo tolongá.”

ʻOku hā mahino, ko hono ngāueʻaki ʻa e fakahinohino ko ia ʻa e Tohitapú ke hoko ko e kau faifekau longomoʻuí kuo fakalato ai ʻa e fiemaʻu ʻa e faʻahinga tāutaha ko ení ki ha ngāue fakafiemālie mo ʻaongá. ʻOku fakaafeʻi atu mo koe foki ke kau ʻi he ngāue ko hono akoʻi ʻa e niʻihi kehé fekauʻaki mo e ngaahi founga mo e ngaahi tefitoʻi moʻoni ʻa e ʻOtuá, pea ʻi he taimi tatau ʻoku ʻaonga ia kiate koe.—Aisea 48:17; Mātiu 28:​19, 20.

Maʻu ʻAonga mei he Folofola ʻa e ʻOtuá

ʻOku ʻikai toe fehuʻia, ko e Tohitapú ko e matavai alafalalaʻanga ia ʻo e ngaahi fakahinohino ʻoku alangāueʻaki ʻi he māmani ʻo e ʻaho ní. Ke maʻu ʻaonga mei aí, ʻoku fiemaʻu ke tau fai ha feinga tuʻumaʻu. Kuo pau ke tau lau tuʻumaʻu ia, ako ia, pea fakalaulauloto ki ai. ʻOku enginaki mai ʻa Paula: “Fakalaulauloto ki he gaahi mea ni; ke ke moua koe ki ai; koeuhi ke ha mai hoo fakaaau ki muʻa i he mea kotoabe.” (1 Timote 4:​15, PM; Teutalonome 11:​18-21) ʻOku fakapapauʻi mai ʻe he ʻOtuá kapau te ke feinga ke ngāueʻaki ʻa ʻene akonaki ko ia ʻoku ʻi he Tohitapú, te ke hoko ʻo lavameʻa. Okú ne talaʻofa mai: “Falala ki he ʻEiki . . . fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.”—Palovepi 3:​5, 6 (Lea Fakatātā, PM).

[Fakatātā ʻi he peesi 31]

Ko e muimui ki he akonaki ʻa e Tohitapú te ne ʻai ʻa e moʻuí ke fakafiemālie mo lavameʻa