ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi hoko haké:

• Ko e hā ʻoku lava ai ke tau fakapapauʻi ko hono fakahoko ʻo e kikite fekauʻaki mo e “ngaahi langi foʻou mo ha fonua foʻou” ʻi he Aisea 65:​17-​19 (Isaia, PM) naʻe kau ki ai ʻa e meʻa lahi ange ia ʻi he toe foki pē ʻa e kau Siú mei he nofo pōpulá?

Koeʻuhi ko e tohi ʻa e ʻapositolo ko Pita mo Sioné, ʻi he ʻuluaki senituli T.S., naʻe tuhu ia ki ha fakahoko ʻi he kahaʻú, ʻa ia ʻoku kau ki ai ʻa e ngaahi tāpuaki ʻoku kei toe ke hoko mai. (2 Pita 3:​13; Fakahā 21:​1-4)​—4/15, peesi 10-​12.

• Ko e hā nai ʻa e makatuʻunga ʻo e ngaahi talatupuʻa faka-Kalisi fekauʻaki mo e kau tangata konga ʻotua fakamālohí?

Ko e ngaahi tuʻunga fakaʻofoʻofa mo mioʻi nai eni ʻo e moʻoniʻi meʻa ko ia ki muʻa ʻi he Lōmakí naʻe ʻai ai ʻe ha kau ʻāngelo ʻe niʻihi ʻa e ngaahi sino fakaetangata pea tataki ʻa e ngaahi moʻui fakamālohi, mo ʻulungaanga taʻetaau ʻi he māmaní. (Senesi 6:​1, 2)​—4/15, peesi 27.

• Ko e hā ʻa e ngaahi fakatuʻutāmaki ke fakaʻehiʻehi mei ai ʻa e kau Kalisitiane matuʻotuʻá ʻi he ngaahi malí?

ʻOku mahuʻinga ke fakaʻehiʻehi mei he ngaahi paati longoaʻa maveuveú, ʻa ia ʻe lava ke tupu kapau ʻoku maʻu ʻo fuʻu tauʻatāina ʻa e ʻolokaholó pea kapau ʻoku ʻi ai ha hulohula taʻemapuleʻi ki ha fasi leʻo-lahi. Tuku kehe kapau kuo fakahaaʻi mahino ʻoku ʻatā ʻa e talitalí ki he tokotaha kotoa, ʻoku ʻikai totonu ke kau ki ai ʻa e faʻahinga taʻefakaafeʻí. ʻOku totonu ke fakapapauʻi ʻe he tangata malí ʻe ʻi ai ʻa e kau Kalisitiane falalaʻanga kae ʻoua kuo ngata ʻa e kātoangá ʻi ha houa ʻoku fakaʻatuʻi.​—5/1, peesi 19-​22.

• Ko e hā ʻoku ʻuhinga ki ai ʻi he lave ʻi he Sāme 128:3 ki he hoko ʻa e fānaú ʻo “hange ʻani huliʻi olive” takatakai ʻi he tēpile ʻa ha tangatá?

ʻOku faʻa tupu hake ʻa e fanga kiʻi vaʻa foʻou mei he tefito ʻo e sino ʻo ha fuʻu ʻōlive. ʻI he taimi kuo ʻikai toe kei ʻomai ai ʻe he sino tefito ʻo ha fuʻu ʻakau motuʻa ha fua lahí, ʻe hoko nai ʻa e fanga kiʻi vaʻa foʻoú ko e ngaahi foʻi sino longomoʻui takatakai ʻiate ia. ʻI he tuʻunga meimei tatau, ʻe lava ke fiefia ʻa e ongo mātuʻá ke maʻu ʻa e fānau ʻoku nau ʻomai ʻa e fua ʻo nau tauhi kia Sihova fakataha mo kinaua.​—5/15, peesi 27.

• Ko e hā ʻa e ngaahi ʻaonga ʻoku maʻu ʻe he fānaú mei ha ʻatimosifia ʻo ha fāmili lelei?

ʻOku fakatoka ai ʻa e makatuʻunga ki heʻenau vakai lelei ki he tuʻunga mafaí, houngaʻia ʻi he ngaahi meʻa mahuʻinga totonú, mo e ngaahi vahaʻangatae fiefia mo e niʻihi kehé. Ko ha ʻatimosifia pehē ʻe toe lava ke ne tokoniʻi kinautolu ke fakatupu ai ha kaumeʻa mo e ʻOtuá.​—6/1, peesi 18.

• ʻI ha fonua ʻe taha ʻi he Hahake Mamaʻó, ko e hā ne fai ai ke fakalototoʻaʻiʻaki ʻa e foʻi fakakaukau ko ia ko e kau Kalisitiane kotoa pē ko e fanga tokouá?

Naʻe enginakiʻi ʻa e ngaahi fakatahaʻangá kotoa ke ʻoua ʻe ngāueʻaki ki ha faʻahinga pau ʻa e ngaahi foʻi lea ki he tuʻunga māʻolungá. Ka, ʻoku totonu ke ngāueʻaki ʻo tatau ki he tokotaha kotoa pē ko e fanga tokoua.​—6/15, peesi 21, 22.

• ʻOku tali ʻe he Kau Fakamoʻoni ʻa Sihová ʻa e ngaahi faitoʻo kuo faʻu mei he totó?

ʻOku mau tui ko e fekauʻi ʻe he Tohitapú ke ‘fakaʻehiʻehi mei he totó’ ʻoku taʻofi ai mo e huhu ʻo e toto kakató pe ko hono ngaahi konga tefitó (pelesimā, fanga kiʻi sela kulokula, fanga kiʻi sela hinehina, mo e ngaahi platelet). (Ngāue 15:​28, 29) Ki he fanga kiʻi kongokonga iiki ko e toʻo mei he ngaahi konga tefitó, ʻoku fili fakafoʻituitui ki ai ʻa e Kalisitiane taki taha, ʻo tauhi maʻu ʻi he fakakaukaú ʻa e lau ʻa e Tohitapú pea mo hono vahaʻangatae mo e ʻOtuá.​—6/15, peesi 29-​31.

• ʻE malava moʻoni ke maʻu ʻa e nonga ʻi lotó he ʻahó ni?

ʻIo. Fakafou ʻi he Tohitapú, ʻoku tataki ʻe Sīsū Kalaisi ʻa e kakaí ki he founga ʻo e lotu maʻá pea mo e nonga ʻoku fakamatalaʻi ʻi he Aisea 32:18. ʻIkai ko ia pē, ko e faʻahinga ʻoku nau maʻu ʻa e nonga peheé ʻoku nau maʻu ʻa e ʻamanaki ʻo e fiefia ʻi he nonga tuʻuloa ʻi he māmaní, ʻi hono fakahoko ʻo e Sāme 37:​11, 29.​—7/1, peesi 7.

• Ko e hā ʻa e ngafa naʻe maʻu ʻe George Young ʻi he hisitōlia fakateokalati ʻi onopōní?

Kamata ʻi he 1917, naʻá ne fakamoʻoniʻi ai ʻa ʻene hoko ko ha tokotaha toʻo maama ʻo e ongoongo lelei ʻo e Puleʻangá ʻi he ngaahi fonua lahi. Naʻe ʻave ia ʻe heʻene ngāue fakafaifekaú ʻi Kānata kotoa, ki he ngaahi motu ʻo e Kalipiané, ki Pelēsila mo e ngaahi fonua kehe ʻo ʻAmelika Tonga mo ʻAmelika Lotoloto, ki Sipeini, ki Potukali, ki he feituʻu naʻe ui he taimi ko iá ko e Sovieti ʻIunioní, pea ki he ʻIunaite Seteté.​—7/1, peesi 22-​27.

• Ko e hā ʻa e ʻuhinga ʻi he 1 Kolinito 15:29 ʻi heʻene lave ki he niʻihi ʻoku nau “papitaiso maʻa e pekia”?

Ko e poiní, ko e taimi ko ia ʻoku pani ai ʻa e kau Kalisitiané ʻe he laumālie māʻoniʻoní, ʻoku fakauku atu ai kinautolu ki ha ʻalunga ʻo e moʻuí ʻa ia ʻoku taki atu ki heʻenau maté pea hoko atu ai ki heʻenau toetuʻu ki he moʻui fakahēvaní.​—7/15, peesi 17.

• Ko e hā naʻe fai ʻe he ʻapositolo ko Paulá lolotonga ʻa e taimi naʻe fakamatalaʻi ko hono ngaahi taʻu lōngonoá?

Naʻá ne tokoni nai ke fokotuʻu mo fakaivimālohiʻi ʻa e ngaahi fakatahaʻanga ʻi Sīlia mo Selusiá. Ko e lahi ʻo e ngaahi faingataʻa naʻe lave ki ai ʻi he 2 Kolinito 11:​23-​27 kuo pau naʻe hoko ia lolotonga ʻa e vahaʻa taimi ko ení, ʻo fakahaaʻi ai naʻá ne fakahoko ha ngāue fakafaifekau longomoʻui.​—7/15, peesi 26, 27.

• Ko e hā ʻe lava ke ne tokoniʻi kitautolu ke hoko ʻo fakaʻatuʻi ʻi heʻetau ngaahi ʻamanakí?

Manatuʻi ʻoku maʻu ʻe Sihova ʻa e mahinó. Ko e lotu kiate iá ʻe lava ke ne tokoniʻi ai kitautolu ke ʻai ke mafamafatatau ʻetau fakakaukaú, pea ʻoku fakahaaʻi ai ʻa e anga-fakanānā. Ko e toe tokoni ʻe taha ko hono maʻu ha toe fakakaukau ʻe taha ʻaki ʻa e talanoa mo ha kaumeʻa matuʻotuʻa.​—8/1, peesi 29, 30.