Ko e “Ngaahi Taimi ʻo e Toe Fakafokí” ʻOku Ofi!

Taimi nounou ki muʻa ke hāʻele hake ʻa Sīsū ki hēvaní, naʻe ʻeke ange kiate ia ʻe he niʻihi ʻo ʻene kau ākonga anga-tonú: “ʻEiki, te ke toe fakafoki ʻa e puleʻangá ki ʻIsileli ʻi he taimí ni?” Ko e tali ʻa Sīsuú naʻe fakahuʻunga ai ʻe ʻi ai ha taimi ʻe mahili atu ki muʻa ke hoko mai ʻa e puleʻangá. Lolotonga ʻa e taimi ko iá, ʻe maʻu ʻe hono kau muimuí ha ngāue lahi ke fai. Naʻe pau ke nau hoko ko e kau fakamoʻoni ʻa Sīsū “fakatouʻosi ʻi Selusalema pea ʻi Siutea mo Samēlia kotoa pea ki he feituʻu mamaʻo taha ʻo e māmaní.”​—Ngāue 1:​6-8, NW.

KO E vāhenga-ngāue ko iá ʻe ʻikai lava ke fakahoko ia ʻi ha ngaahi ʻaho, ngaahi uike, pe ngaahi māhina siʻi. Kae kehe, ʻi he ʻikai ha toe tatalí, naʻe kamata leva ke malanga ʻa e kau ākongá. Ka naʻe ʻikai ke mole ʻenau mahuʻingaʻia ʻi he kaveinga ʻo e toe fakafokí. Ki ha fuʻu tokolahi naʻa nau fakatahataha ʻi Selusalema, naʻe lea ʻa e ʻapositolo ko Pitá ʻo fekauʻaki mo ia, ʻi heʻene pehē: “Mou . . . fakatomala, pea tafoki, koeʻuhi ke tamateʻi hoʻomou ngaahi angahala; kae toki hoko mei he fofonga ʻo e ʻEiki ʻa e ngaahi kuonga fakamānava hake [“fakaivifoʻou,” NW]; mo ne fekau mai ʻa e Toko Taha naʻe sinaki tuʻutuʻuni moʻo mou Misaia, ʻa Sisu: ʻa ia kuo pau ke maʻu ʻe he langi, kaeʻoua ke hoko ʻa e [“ngaahi taimi ʻo e toe fakafoki,” NW] mai ʻo e meʻa kotoa pe, ʻa e ngaahi taimi kuo folofola ki ai ʻa e ʻEiki ʻi he fofonga o ʻene kau palofita tapu, talu mei muʻa.”—Ngāue 3:​19-21, fakaʻītali ʻamautolu.

Ko e “ngaahi taimi ʻo e toe fakafoki” ko ení naʻe pau ke ʻomai ia ʻi he “ngaahi kuonga fakaivifoʻou,” meia Sihova. Ko e toe fakafoki naʻe tomuʻa talá naʻe pau ke hoko mai ia ʻi he ongo tuʻunga ʻe ua. ʻUluakí, ʻe ʻi ai ha toe fakafoki fakalaumālie fakaivifoʻou, ʻa ia ʻoku lolotonga hoko ia. Ko hono uá, ʻe hoko atu ʻi he meʻá ni ʻa hono fokotuʻu ha palataisi fakamatelie ʻi he māmaní.

Kamata ʻa e Taimi ʻo e Toe Fakafokí

Hangē ko ia naʻe fakahaaʻi ʻe he ʻapositolo ko Pitá ki he fuʻu kakai ʻi Selusalemá, ‘naʻe maʻu ʻa Sīsū’ ʻe he langí. Ko e tuʻunga eni naʻe ʻi aí ʻo aʻu mai ki he 1914, ʻi he taimi naʻe maʻu ai ʻe Sīsū ʻa hono mafai fakatuʻí pea kamata ke ne pule ko e Tuʻi fakanofo ʻa e ʻOtuá. ʻI he taimi ko iá, naʻe tomuʻa tala ʻe Pita, ʻe “fekau mai” ʻe Sihova ʻa hono ʻAló ʻi he ʻuhinga ko ʻEne fakaʻatā ʻa Sīsū ke ne fakahoko ʻa hono ngafa ʻi he tuʻunga ko e tokotaha tefito ʻi he ngaahi taumuʻa ʻa e ʻOtuá. ʻOku fakamatalaʻi ʻe he Tohitapú ʻa e meʻa naʻe hokó ʻi he lea fakaefakatātā: “Pea ne [kautaha fakahēvani ʻa e ʻOtuá] faʻeleʻi ha tama tangata [Puleʻanga ʻo e ʻOtuá ʻi he ongo nima ʻo Sīsū Kalaisí], ʻa e toko taha te ne puleʻi ʻa e ngaahi kakai kotoa pē ʻaki ha sepita ukamea.”—Fakahā 12:5.

Ka naʻe ʻikai ha taumuʻa ʻa e ngaahi puleʻangá ke fakamoʻulaloa ki he tuʻunga-pule ʻo Kalaisí. Ko e moʻoni, naʻa nau lea fakafepaki ki heʻene faʻahinga mateaki fakaemāmani te ne pule ki aí, ʻa ia ʻoku ʻiloa he ʻahó ni ko e Kau Fakamoʻoni ʻa Sihová. ʻI he hangē ko honau kau fakamelomelo fakaeʻapositoló, kuo fai taʻetoumoua ʻe he Kau Fakamoʻoní ʻa e “ngāue ʻo e faifakamoʻoni kia Sīsū.” (Fakahā 12:​17, NW) Ko e fakafepaki ki he ngāue naʻe fai ʻe he kau Kalisitiane loto-moʻoni ko ení naʻe mapuna hake ia ʻi he fonua ki he fonua. ʻI he 1918, ko e kau mēmipa  fua fatongia ʻi he kau ngāue ʻo e ʻuluʻi ʻōfisi ʻo e Sōsaieti Taua Leʻo ʻi Brooklyn, Niu ʻIoké, naʻe ʻave kinautolu ki he fakamaauʻangá ʻi he ngaahi tukuakiʻi loi pea tauteaʻi taʻetotonu ai ki he ngaahi tuku pōpula taimi lōloa. ʻI ha taimi, naʻe hā ai ko e ngāue fakaefakamoʻoni ʻi onopooni “ki he feituʻu mamaʻo taha ʻo e māmaní” naʻe faai ia ki he taʻelavameʻa.​—Fakahā 11:​7-​10.

Kae kehe, ʻi he 1919, naʻe tukuange ai ʻa e kau mēmipa naʻe tuku pōpula ʻo e kau ngāue ʻi he ʻuluʻi ʻōfisí pea fakaʻatā kinautolu ki mui mei he ngaahi tukuakiʻi loi kotoa pē. Naʻa nau toe kamata leva ʻa e ngāue ʻo e toe fakafoki fakalaumālié. Talu mei he taimi ko iá, mo e fiefia ʻa e kakai ʻa Sihová ʻi he lakalakaimonū fakalaumālie taʻehanotatau.

Naʻe fai ha feingangāue fakalahi ke akoʻi ʻa e kakai ʻo e puleʻanga kotoa pē ke nau tauhi ʻa e ngaahi meʻa naʻe fekauʻi ʻe Kalaisi ʻa hono kau muimuí ke nau faí. (Mātiu 28:20) He fakaivifoʻou ē ko ia ke sio ki he niʻihi ʻa ia naʻa nau fakahāhā ki muʻa ʻa e ngaahi ʻulungaanga hangē ha manú kuo liliu ʻenau fakakaukaú! Naʻa nau huʻi atu ʻa e angaʻitangata motuʻá, ʻa ia ʻoku fakatupu ai ʻa e ngaahi fasi-ʻa-anga hangē ko e “ita,” “kabekabe,” mo e “lea uli,” pea ʻai ʻa e angaʻitangata foʻou, “aia kuo fakafoou i he ilo, o fakatatau ki hono tatau o ia [ʻOtuá] naa ne fakatubu ia.” ʻI ha ʻuhinga fakalaumālie, ko e ngaahi lea ʻa e palōfita ko ʻAiseá ʻoku fakahoko ia naʻa mo e ʻi he taimí ni: “ʻE nonofo ʻa e uolofi [ko ha tokotaha ʻa ia naʻá ne fakahāhā ki muʻa ʻa e ngaahi ʻulungaanga hangē ha ulofí] mo e lami [ko ha tokotaha ʻokú ne fakaeʻa ha tōʻonga angavaivai], pea ʻe takoto ʻa e lepati mo e kiʻi kosi, pea fakataha ʻa e kafi mo e laione mui mo e pulu sino.”—Kolose 3:​8-​10, PM; Aisea 11:​6, 9 (Isaia, PM).

Ofi ʻa e Toe Fakafoki Lahi Angé!

ʻI he tānaki atu ki he toe fakafoki ʻa ia naʻe iku ki ha palataisi fakalaumālie he ʻaho ní, ʻoku fakaofiofi vave mai ʻa e taimi ʻa ia ʻe hoko ai hotau foʻi palanité ko ha palataisi fakamatelie. Ko ha konga siʻi ʻo e foʻi māmaní naʻe hoko ia ko ha palataisi ʻi he taimi naʻe tuku ai ʻe Sihova ʻetau ongo kuí, ʻa ʻĀtama mo ʻIvi, ʻi he ngoue ʻo ʻĪtení. (Senesi 1:​29-​31) Ko e ʻuhinga ia ʻoku lava ke tau lea ai ʻo kau ki he Palataisi ʻe toe fakafoki maí. Neongo ia, ki muʻa ke hoko iá, kuo pau ke toʻo mei he māmaní ʻa e lotu loi ʻokú ne fakaongoongokoviʻi ʻa e ʻOtuá. Ko e ngaahi ʻelemēniti fakapolitikale ʻo e māmani ko ení te nau fakahoko ʻa e meʻá ni. (Fakahā 17:​15-​18) Ko e ngaahi ʻelemēniti fakapolitikalé leva mo e fakakomēsialé, fakataha mo honau kau poupoú, ʻe fakaʻauha. Fakaʻosí, ko e fakamuimui taha ʻo e kau fakafepaki ki he ʻOtuá​—ʻa Sētane ko e Tēvoló mo ʻene kau tēmenioó​—ʻe tāpuniʻi kinautolu ʻo feʻunga mo ha taʻu ʻe afe​—ko e lōloa ia ʻo e ngāue ʻo e toe fakafokí. Lolotonga ʻa e taimi ko iá, “ʻe fiefia ʻa e lala mo e fonua mamate; pea ʻe tomeʻe ʻa e Alapa, ʻo fisi hange ko e lose.” (Aisea 35:1) ʻE hoko ʻa e māmaní kotoa ʻo ʻatā mei he fakahohaʻá. (Aisea 14:7) Naʻa mo e laui miliona naʻa nau maté ʻe toe fakafoki kinautolu ki he moʻui ʻi he foʻi māmaní. ʻE aʻusia ʻe he tokotaha kotoa ʻa e ngaahi ʻaonga ʻo e toe fakafokí ʻi he feilaulau huhuʻí. (Fakahā 20:​12-​15; 22:​1, 2) ʻE ʻikai ha kakai kui, tuli, pe mamatea ʻi he māmaní. “ʻOku ʻikai ha nofo ai te ne pehe, ʻOku ou mahaki.” (Aisea 33:24) Taimi nounou hili ʻa e ngataʻanga ʻo e Pule Taʻu ʻe Taha Afe ʻa Kalaisí, ʻe tukuange mai ai ʻa e Tēvoló mo ʻene kau tēmenioó ʻi ha vahaʻa taimi nounou pea te nau sio ai ki he founga ʻo hono fakahoko ki he tuʻunga ko iá ʻa e taumuʻa ʻa e ʻOtuá ki he māmaní. Fakaʻosí leva, ʻe fakaʻauha kinautolu ʻo taʻengata.​—Fakahā 20:​1-3.

ʻI he taimi ʻe aʻu ai ʻa e māmaní ki he ngataʻanga ʻo e toe fakafoki taʻu ʻe taha afé, ʻe fakahīkihikiʻi ai ʻa Sihova ʻe he “mea kotoabe oku mānava,” pea te nau fai ia ʻi he kotoa ʻo ʻitānití. (Sāme 150:​6, PM) Te ke kau ʻi honau lotolotongá? ʻE lava ke ke kau ai.