Ngaahi Anga Fakafonua ʻi he Kilisimasí—ʻOku Nau Faka-Kalisitiane?

KO E faʻahitaʻu Kilisimasí eni. Ko e hā ʻa e ʻuhinga ʻo e meʻá ni kiate koe, ki ho fāmilí, mo ho ngaahi kaungāmeʻá? Ko ha taimi fakalaumālie ia, pe ko ha vahaʻa taimi pē ia ʻo e kātoanga fakafiefia mo nēkeneka? Ko ha taimi ia ke fakakaukauloto atu ai ki he ʻaloʻi ʻo Sīsū Kalaisí, pe ke ʻoua ʻe hohaʻa ai fekauʻaki mo e ngaahi meʻa maheni faka-Kalisitiané?

ʻI he fakakaukau ki he ngaahi fehuʻi ko iá, manatuʻi ko e ngaahi talatukufakaholo ʻi he Kilisimasí ʻe kehekehe nai ia ʻo fakatatau ki he feituʻu ʻokú ke nofo aí. Hangē ko ení, ʻi Mekisikou pea mo e ngaahi fonua ʻAmelika-Latina kehé, ʻoku kehekehe ai naʻa mo e hingoá. ʻOku fakahaaʻi ʻe he ʻenisaikolopētia ʻe taha ko e foʻi hingoa faka-Pilitānia ʻoku ui ko e Christmas “ko e haʻu ia mei he Christes Masse ʻi he kuonga lotolotó, ko e Misa ʻa Kalaisí.” Kae kehe, ko e La Navidad, pe ko e Fanauʻí, hangē ko ia ʻoku ui ʻaki ʻi he ngaahi fonua ʻAmelika Latina ko ení, ʻoku ʻuhinga iá ki he fanauʻi, pe ʻaloʻi, ʻo Kalaisí. Kiʻi vakai ʻi ha mōmeniti ki he ngaahi fakaikiiki ʻe niʻihi mei Mekisikou. ʻE tokoniʻi nai koe ʻe he meʻá ni ke fakatupu ʻa hoʻo fakakaukaú tonu ʻo fekauʻaki mo e faʻahitaʻu mālōlō ko ení.

Ko e Posadas, “ʻa e Kau Tangata Poto ʻe Toko Tolú,” pea mo e Nacimiento

Ko e ngaahi kātoanga fakafiefiá ʻoku kamata ia ʻi Tīsema 16 ʻaki ʻa e posadas. Ko e tohi ko e Mexico’s Feasts of Life ʻoku pehē ai: “Ko e taimi ia ʻo e posadas, ko e ʻaho kāvea ʻe hiva ʻo aʻu atu ki he efiafi ki muʻa ʻi he Kilisimasí, ʻa ia ʻoku fakamanatu ai ʻa e ʻalu fano holo toko ua ʻa Siosefa mo Mele ʻi he kolo ko Pētelihemá pea mo e mōmeniti naʻe faifai peá na maʻu ai ʻa e anga-ʻofa mo e fakaū. ʻOku fakatahataha fakaepoʻuli fakataha ai ʻa e ngaahi fāmilí mo e ngaahi kaumeʻá ke toe fakatātaaʻi ʻa e meʻa naʻe hoko ʻi he ngaahi ʻaho ki muʻa ʻi he ʻaloʻi ʻo Kalaisí.”

ʻI he talatukufakaholó, ʻoku ʻave ʻe ha falukunga kakai ʻa e ngaahi ʻīmisi ʻo Mele mo Siosefá ki ha ʻapi pea mo hiva ʻo kole ai ki ha fakaū, pe posada. Ko e faʻahinga ʻi he falé ʻoku nau hivaʻi mai ʻa e talí kae ʻoua kuo faifai pea fakaʻatā ke hū ki loto ʻa e kau ʻaʻahí. ʻOku toki kamata leva ha paati, ʻa ia ko e niʻihi—ʻoku haʻi ai honau matá pea nau toʻo ha tokotoko—ʻoku ʻi ai ʻa e lole mo e fuaʻi ʻakau, pea mo e meʻa pehē) ʻoku tānaki ia ʻe he faʻahinga ʻi he kātoangá. ʻOku hoko atu heni ki he meʻakai, inu, ngaahi fasi pea mo e hula. Ko e ngaahi paati posada ʻe valu ʻoku fai ia ʻi Tīsema 16 ʻo aʻu ki Tīsema 23. ʻI hono 24, Nochebuena (efiafi ki muʻa ʻi he Kilisimasí) ʻoku kātoangaʻi ia, pea ʻoku fai ai ʻe he ngaahi fāmilí ha feinga ke nau fakatahataha ai ki ha kai efiafi makehe.

ʻIkai ke fuoloa ʻoku hoko mai leva ʻa e ʻAho Taʻu Foʻoú, ʻo kātoangaʻi ia ʻaki ʻa e ngaahi paati longoaʻa ʻaupito. ʻI he efiafi ʻo Sanuali 5, ko e Tres Reyes Magos (“kau tangata poto ʻe toko tolú”) ʻoku ʻamanekina ke nau ʻomai ʻa e ngaahi meʻa-vaʻinga maʻá e fānaú. Ko hono tumutumú ko ha paati ʻi Sanuali 6, ʻi he taimi ʻa ia ʻoku tufa ai ha rosca de Reyes (foʻi keke ʻoku fuo hangē ha foʻi mamá). ʻI hono kai ʻa e keke ko ení, ʻe maʻu ai ʻe ha taha ʻi heʻene konga keké ha kiʻi tamapua ʻokú ne fakatātaaʻi ʻa e pēpē ko Sīsuú. Ko e tokotaha te ne maʻú ʻoku fakamoʻuaʻi ia ke ne fokotuʻutuʻu pea hoko ko ha tokotaha talitali ʻo ha paati fakaʻosi ʻi Fepueli 2. (ʻI he ngaahi feituʻu ʻe niʻihi ʻoku ʻi ai ʻa e fanga kiʻi tamapua iiki ʻe tolu, ko hono fakatātaaʻi “ʻa e kau tangata poto ʻe toko tolú.”) Hangē ko ia ʻoku lava ke ke sio ki aí, ko e ngaahi paati ʻi he fekauʻaki mo e Kilisimasí ʻoku hokohoko taʻetuku atu.

Lolotonga ʻa e vahaʻa taimi ko ení, ko e nacimiento (fakatātā ʻo e Fanauʻí) ʻoku mātuʻaki tuʻu-ki-muʻa ia. Ko e hā ʻoku kau ki hení? Sai, ʻi he ngaahi feituʻu kakaí pea pehē ki he ngaahi falelotú  mo e ngaahi ʻapí, ʻoku fokotuʻu ai ʻa e ngaahi fakatātā mo e ngaahi ʻīmisi (lalahi pe iiki) naʻe ngaohi mei he maká, ʻakaú, pe ʻumeá. ʻOku nau fakatātaaʻi ʻa Siosefa mo Mele ʻokú na tūʻulutui ʻi he ʻao ʻo ha ʻaiʻanga kai ʻo e manú ʻa ia ʻoku ʻi ai ha kiʻi pēpē toki fanauʻi. ʻOku faʻa ʻi ai mo e kau tauhi-sipi pea mo e Los Reyes Magos (“ko e kau tangata potó”). Ko e fakatātaá ko ha fale ʻo e fanga manú, mo ha fanga manu ʻoku nau fakakakato ʻa e fakatātaá. Kae kehe, ko e tokotaha tefitó, ko ha pēpē toki fanauʻi, ʻoku ui faka-Sipeini ia ko e el Niño Dios (ko e Tama ʻOtua). Ko e ʻīmisi tefito ko ení ʻe tuku nai ia ki ai ʻi he efiafi Kilisimasí.

Ko ha Vakai Ofi Ange ki he Ngaahi Talatukufakaholo ʻo e Fanauʻí

ʻI he fekauʻaki mo e kātoanga Kilisimasí hangē ko ia ʻoku ʻilolahia ʻi he kotoa ʻo e māmaní, ʻoku pehē ʻe he The Encyclopedia Americana: “Ko e lahi taha ʻo e ngaahi anga fakafonua ʻoku fekauʻaki he taimí ni mo e Kilisimasí naʻe ʻikai ko e ngaahi anga fakafonua faka-Kilisimasi ia ʻi he kamatá ka ko e ngaahi anga fakafonua ia ki muʻa ʻi he Kalisitiané pea ʻikai ke faka-Kalisitiane naʻe ohi mai ʻe he siasi faka-Kalisitiané. Ko e Sātunaliá, ko ha kātoanga faka-Loma ia naʻe kātoangaʻi ʻi he vaeuaʻanga ʻo Tīsemá, naʻá ne tokonaki mai ʻa e sīpinga ki he lahi ʻo e ngaahi anga fakafonua fakafiefia ʻo e Kilisimasí. Ko e fakatātaá, mei he kātoanga ko ení, naʻe maʻu mei ai ʻa e kātoanga kai tōtuʻá, ko e foaki ʻo e ngaahi meʻaʻofá, pea mo e tutu ʻo e ngaahi teʻelangó.”

ʻI ʻAmelika Latina, ko e ngaahi anga fakafonua tefito ko ia ʻo e Fanauʻí naʻe ngāueʻaki nai ia, fakataha mo e ngaahi meʻa naʻe tānaki atu ki ai. ‘Mei he tupuʻanga ko e hā,’ ko hoʻo fifilí nai ia. Ko e moʻoni, ko e tokolahi ʻoku nau loto ke pipiki ki he Tohitapú ʻoku nau ʻiloʻi ko e niʻihi ʻo e ngaahi anga fakafonuá ko e ngaahi ouau faka-ʻAsiteki ʻataʻatā pē. Naʻe pehē ʻe ha nusipepa, ko e El Universal, ʻi he Kolo Mekisikoú: “Ko e kau Felela mei he ngaahi vāhenga fakalotu kehekehé naʻa nau ngāueʻaongaʻaki ʻa e moʻoniʻi meʻa ko ia ko e fenāpasi ʻa e ngaahi kātoanga fakafiefia ʻi he tohimāhina fakaeouau faka-ʻInitiá mo e tohimāhina litūsia Katoliká, ko ia naʻa nau ngāueʻaki eni ke poupouʻiʻaki ʻenau ngāue fakaʻevangelioó mo fakamisinalé. Naʻa nau fetongi ʻa e ngaahi kātoanga fakamanatu ʻo e ngaahi ʻotua faka-Hisipaniola ki muʻá ʻaki ʻa e ngaahi kātoanga fakafiefia ki he ngaahi ʻotua faka-Kalisitiané, kamata ngāueʻaki ʻa e ngaahi kātoanga fakafiefia mo e ngaahi ngāue faka-ʻIulopé, pea toe kau ai ʻa e ngaahi kātoanga fakafiefia faka-ʻInitiá, ʻa ia naʻe iku ia ki  hono fakatahaʻi ʻa e ngaahi tui fakaetalatukufakaholó ʻa ia naʻe malanga hake ai ʻa e ngaahi kupuʻi lea faka-Mekisikou alafalalaʻangá.”

ʻOku fakamatalaʻi ʻe he The Encyclopedia Americana: “ʻI hono fokotuʻu ki muʻa ʻa e Fanauʻí naʻe hoko ia ko ha konga ʻo e kātoanga Kilisimasí . . . Ko hono fakatātaaʻi ʻi he falelotú ʻa e crèche [ko e fakatātā ʻo e ʻaiʻanga kai ʻo e manú] ʻoku pehē naʻe kamata ia ʻe Sangato Francis.” Ko e ngaahi faiva ko eni ʻo e fakatātaaʻi ʻa e ʻaloʻi ʻo Kalaisí naʻe fai ia ʻi he ngaahi falelotú lolotonga ʻa e kamata ʻo e fokotuʻu kolonia ʻo Mekisikoú. Naʻe fokotuʻutuʻu ia ʻe he kau mōnike Felenisisikaní koeʻuhi ke akoʻiʻaki ʻa e kau ʻInitiá fekauʻaki mo e Fanauʻí. Ki mui mai naʻe hoko ʻa e posadas ʻo toe manakoa ange. Pe ko e hā pē ʻa honau muʻaki taumuʻá, ko e founga ʻo hono fakahoko he ʻahó ni ʻo e posadas ʻoku fakaeʻa ai ʻa hono natula totonú. Kapau ʻokú ke ʻi Mekisikou lolotonga ʻa e faʻahitaʻu ko ení, ʻe lava ke ke sio pe mahinoʻi ʻa e meʻa naʻe fakaeʻa ʻe ha tokotaha-tohi maʻá e El Universal ʻi heʻene fakamatala: “Ko e posadas, ʻa ia naʻe hoko ko ha founga ke fakamanatu mai ai kiate kitautolu ʻa e fononga fakapilikimi ʻa e ongo mātuʻa ʻa Sīsuú ʻo kumi ki ha fakaū ʻa ia ʻe lava ke ʻaloʻi ai ʻa e Tama ʻOtuá, ʻoku hoko pē ia he ʻahó ni ko e ngaahi ʻaho ʻo e konā, fai ʻo e ngaahi meʻa tōtuʻa, faʻa kai, ngaahi meʻa taʻeʻaonga, pea mo e faihia lahi ange.”

Ko e fakakaukau ʻo e nacimiento naʻe malanga hake ia lolotonga ʻa e taimi ʻo e fokotuʻu Koloniá mei he muʻaki ngaahi fakatātaaʻi ʻa e faiva ʻi he ngaahi falelotú. Lolotonga ʻoku manakoa ia ʻe he niʻihi, ʻokú ne fakafofongaʻi totonu ʻa e meʻa ʻoku leaʻaki ʻe he Tohitapú? Ko ha fehuʻi lelei ia. ʻI he taimi naʻe ʻaʻahi atu ai ʻa e kau tangata poto ʻa ia naʻe taku ʻe toko tolú​—ʻa ia ko hono moʻoní ko e kau ʻasitalolosiá​—naʻe ʻikai ke kei nofo ʻa Sīsū ia mo hono fāmilí ʻi ha fale ʻo e fanga manú. Naʻe faai mai ʻa e taimí, pea naʻe nofo ʻa e fāmilí ʻi ha fale. Te ke ʻiloʻi ʻoku mahuʻinga ke fakatokangaʻi ʻa e fakaikiiki ko eni ʻi he lēkooti fakamānavaʻi ʻi he Mātiu 2:​1, 11. ʻOku lava ke ke toe fakatokangaʻi ʻoku ʻikai ke tala ʻe he Tohitapú ia ʻa e tokolahi ʻo e kau ʻasitalolosia naʻe ʻi aí. a

ʻI ʻAmelika Latina, ʻoku fetongi ai ʻe he kau tangata poto ʻe toko tolú ʻa e fakakaukau fekauʻaki mo Sanitā Kolosí. Neongo ia, hangē ko ia ʻoku fai ʻi he ngaahi fonua kehé, ʻoku fufū ʻe he ngaahi mātuʻa tokolahi ʻa e ngaahi meʻa-vaʻingá ʻi he ʻapí. ʻI he pongipongi leva ʻo Sanuali 6, ʻoku kumi ai ʻa e fānaú ki he ngaahi meʻa-vaʻingá, ʻo hangē naʻe ʻomai kinautolu ʻe he kau tangata poto ʻe toko tolú. Ko ha taimi fakatupu paʻanga eni ki he kau fakatau meʻa vaʻingá, pea kuo maʻu paʻanga lahi ʻa e niʻihi ʻi he meʻa ʻoku ʻiloʻi ʻe he kakai loto-totonu tokolahi ko e anga pē ʻo e fakakaukaú. Ko e talatupuʻa fekauʻaki mo e kau tangata poto ʻe toko tolú ʻoku mole ʻa e tui ki aí ʻi he lotolotonga ʻo e fuʻu tokolahi, naʻa mo e ʻi he lotolotonga ʻo e fānau īkí. Neongo ʻoku ʻikai leleiʻia ʻa e niʻihi ʻi he mole ʻa e kau tui ki he talatupuʻa ko ení, ko e hā ʻe lava ʻe ha taha ʻo ʻamanekina mei he anga ʻo e fakakaukaú ʻa ia naʻe tauhi maʻu pē koeʻuhi ko e talatukufakaholó pea ki he faingamālie fakakomēsialé?

Ko e Kilisimasí, pe ko e Fanauʻí, naʻe ʻikai ke kātoangaʻi ia ʻe he muʻaki kau Kalisitiané. ʻOku pehē ʻe ha ʻenisaikolopētia ʻe taha ʻo fekauʻaki mo e meʻá ni: “Ko e kātoangá naʻe ʻikai ke fakamanatu ia ʻi he ʻuluaki ngaahi senituli ʻo e siasi faka-Kalisitiané, koeʻuhi ko e founga faka-Kalisitiané fakalūkufua ke kātoangaʻi ʻa e mate ʻa e faʻahinga ʻiloá kae ʻikai ko honau fāʻeleʻí.” ʻOku fakafehokotaki ʻe he Tohitapú ʻa e kātoangaʻi ʻo e ngaahi faiʻahó ki he kau panganí, ʻikai ki he kau lotu moʻoni ʻa e ʻOtuá.​—Mātiu 14:​6-​10.

Ko e moʻoni, ʻoku ʻikai ʻuhinga eni ia, ʻoku ʻikai ʻaonga ke ako mo manatuʻi ʻa e ngaahi meʻa moʻoni naʻe kau ki hono ʻaloʻi ʻo e ʻAlo ʻo e ʻOtuá.  Ko e fakamatala faka-Tohitapu moʻoní ʻoku tokonaki mai ai ʻa e ngaahi fakamaama mo e ngaahi lēsoni mahuʻinga ki he faʻahinga kotoa ko ia ʻoku nau loto ke fai ʻa e finangalo ʻo e ʻOtuá.

ʻAloʻi ʻo Sīsuú Fakatatau ki he Tohitapú

Te ke maʻu ʻa e fakamatala alafalalaʻanga fekauʻaki mo e ʻaloʻi ʻo Sīsuú ʻi he ongo Kōsipeli ʻa Mātiu mo Luké. ʻOkú na fakahaaʻi naʻe ʻaʻahi ʻa e ʻāngelo ko Kepalelí ki ha finemui teʻeki mali ko hono hingoá ko Mele ʻi he kolo Kāleli ko Nasaletí. Ko e hā ʻa e pōpoaki naʻá ne fakahokó? “Ko ʻeni, te ke tuʻituʻia, pea te ke ʻaloʻi ha tama, pea te ke fakahingoa ia ko Sisu. Pea ʻe hoko ko e lahi ʻa e toko taha ko ia; pea ʻe lau ia ko e ʻAlo ʻo e ʻEiki Taupotu; pea ʻe foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi ki he hako ʻo Sekope ʻo lauikuonga; pea ko ʻene pule ʻe ʻikai ngata.”—Luke 1:​31-33.

Naʻe ʻohovale ʻaupito ʻa Mele ʻi he pōpoaki ko ení. ʻI he ʻikai te ne malí, naʻá ne tala ange: “ʻE hoko fēfē ia? he ʻoku teʻeki te u ʻiloa ha tangata.” Naʻe tali ange ʻe he ʻāngeló: “ʻE hoko mai ʻa e Laumālie Maʻoniʻoni kiate koe, pea ʻe fakamalumalu koe ʻe he māfimafi ʻo e ʻEiki Taupotu: pea ko ia ʻe ui ai ʻa e hako tapu te ke fāʻeleʻi, ko e ʻAlo ʻo e ʻOtua.” Ko Mele, ʻi heʻene ʻiloʻi ko e finangalo eni ʻo e ʻOtuá, naʻá ne pehē ange: “Ko au ʻeni, ko e kaunanga ʻa e ʻEiki: ke hoko mai kiate au ʻo hangē ko hoʻo meʻa.”—Luke 1:​34-38.

Naʻe lea ha ʻāngelo kia Siosefa fekauʻaki mo e ʻaloʻi fakaemaná koeʻuhi ke ʻoua te ne veteʻi ʻa Mele, ʻa ia naʻá ne palani ke fai hili ʻene ʻiloʻi ʻa ʻene tuʻituʻiá. Naʻá ne toki loto-lelei leva ai ke fakahoko ʻa e fatongia ko hono tauhi ʻa e ʻAlo ʻo e ʻOtuá.​—Mātiu 1:​18-​25.

ʻI ha tuʻutuʻuni leva meia Sisa ʻAokositusi naʻe fakamālohiʻi ai ʻa Siosefa mo Mele ke na fononga mei Nasaleti ʻi Kālelí ki Pētelihema ʻi Siuteá, ko e kolo ʻo ʻena fanga kuí, ke lēsisita. “Lolotonga ʻena ʻi ai, naʻe kakato hono māhina ke fāʻele: pea naʻa ne ʻaloʻi ʻa e tama, ko hono ʻuluaki, ʻo ne fakakofuʻaki ia ʻa e kofuʻi tamasiʻi valevale, ʻo ne fakatokoto ʻi he ʻaiʻangakai ʻo e manu: koeʻuhi naʻe ʻikai te na hao ʻi he fale talifononga.”—Luke 2:​1-7.

ʻOku fakamatalaʻi ʻe he Luke 2:​8-​14 ʻa e meʻa naʻe hoko atu aí: “Naʻe ʻi he fonua ko ia ha kau tauhi sipi naʻe mohe vao, ʻo leʻohi ʻenau fanga sipi ʻi he poʻuli. Pea ʻiloange, naʻe tuʻu mai kiate kinautolu ha angelo ʻa e ʻEiki, pea malama mai ʻa e Sikaina ʻo e ʻEiki ʻo huluʻia kinautolu; pea naʻa nau manavahē—ko e manavahē ka ko ha manavahē. Pea pehē ʻe he angelo kiate kinautolu, ʻOua ʻe manavahē; he ko eni kuo u haʻu mo au ha talanoa mālie, ko e meʻa fakafiefia ʻaupito, ko e meʻa maʻa e kakai Isileli katoa. He naʻe ʻaloʻi kiate kimoutolu ʻanenai ʻi he Kolo ʻo Tevita ha Fakamoʻui, ʻa ia ko e ʻEiki Misaia. Pea ko hono fakaʻilonga ʻeni kiate kimoutolu: te mou ʻilo ha tamasiʻi valevale, kuo kofu fakatamasiʻi valevale, pea ʻoku ne tokoto ʻi he ʻaiʻangakai ʻo e manu. Pea fakafokifā pe naʻe ʻi he angelo ha tokolahi ʻo e hositē ʻo Langi, ʻoku nau fakamālō ki he ʻOtua, ʻo nau pehē, Ko e kolōlia ki he ʻOtua ʻi langi taupotu, pea ko e melino ki māmani ki he kakai kuo hoifua ki ai.”

Ko e Kau ʻAsitalolosiá

ʻOku lave ʻi he fakamatala ʻa Mātiú naʻe haʻu ʻa e kau ʻasitalolosia mei he Hahaké ki Selusalema ko e kumi ki he feituʻu naʻe ʻaloʻi ai ʻa e Tuʻi ʻo e kakai Siú. Naʻe mahuʻingaʻia ʻaupito ʻa Tuʻi Hēlota ʻi he meʻá ni​—kae ʻikai ki ha ngaahi taumuʻa lelei. “Pea ne fekau ke nau ō ki Petelihema, ʻo ne pehe, Mou ʻalu ʻo ʻeke fakatotolo ki he tamasiʻi; pea ka mou ka ʻilo mou tala mai, koeʻuhi ke u ʻalu mo au ʻo hu kiate ia.” Naʻe ʻilo ʻe he kau ʻasitalolosiá ʻa e kiʻi tamá pea “naʻa nau tangaki ʻenau ngāhi ʻangameʻa, ʻo nau ʻatu kiate ia ʻa e ngāhi meʻaʻofa, ko e koula mo e laipeno mo e mula.” Ka naʻe ʻikai te nau foki kia Hēlota. “ʻI he valokia kinautolu ʻi ha misi ke ʻoua te nau foki kia Helota.” Naʻe ngāueʻaki ʻe he ʻOtuá ha ʻāngelo ke fakatokanga kia Siosefa fekauʻaki mo e ngaahi taumuʻa ʻa Hēlotá. Naʻe hola leva ʻa Siosefa mo Mele ki ʻIsipite mo hona fohá. Ko hono hokó, ʻi ha feinga ke fakangata ʻa e Tuʻi foʻoú, naʻe tuʻutuʻuniʻi ʻe Tuʻi Hēlota anga-fakamamahi ʻa hono tāmateʻi ʻo e tamaiki tangatá ʻi he feituʻu Pētelihemá. Tamaiki tangata fē? ʻA e faʻahinga naʻe taʻu ua pea ʻi lalo aí.—Mātiu 2:​1-16.

Ko e Hā ʻOku Lava Ke Tau Ako mei he Fakamatalá?

Ko e kau ʻasitalolosia ʻaʻahí​—ko e hā pē honau tokolahí​—naʻe ʻikai te nau lotu ki he ʻOtua moʻoní. Ko e liliu Tohitapu La Nueva Biblia Latinoamérica (Pulusinga ʻo e 1989) ʻoku pehē ai ʻi he fakamatala ʻi laló: “Ko e kau Makí naʻe ʻikai ko ha ngaahi tuʻi, ka ko ha kau talamonū mo e kau taulaʻeiki ʻo ha lotu pangani.” Naʻa nau haʻu ʻo fakatatau ki heʻenau ʻilo ʻo fekauʻaki mo e ngaahi fetuʻú ʻa ia naʻa nau līʻoa ki aí. Kapau naʻe finangalo ʻa e ʻOtuá ke tataki kinautolu ki he kiʻi tamá, ne mei tataki pē kinautolu ia ki he feituʻú tonu ʻo ʻikai fiemaʻu ke nau ʻuluaki  ʻalu ki Selusalema pea ki he palasi ʻo Hēlotá. Ki mui ai, naʻe kau mai ʻa e ʻOtuá ke liliu honau ʻalungá ke maluʻi ʻa e tamá.

ʻI he taimi Kilisimasí ʻoku faʻa takatakaiʻi ʻa e fakamatala ko ení ʻe ha ʻatimosifia fakaetalatupuʻa mo fakamānako ʻa ia ʻokú ne fakapūlouʻi ʻa e meʻa mahuʻinga tahá: ʻa ia naʻe ʻaloʻi ʻa e pēpē ko ení ke hoko ko ha Tuʻi ngeia, hangē ko ia naʻe fanongonongo kia Mele pea ki he kau tauhi-sipí. ʻIkai, ʻoku ʻikai ke kei pēpē ʻa Sīsū Kalaisi, pe naʻa mo ha kiʻi tama. Ko e Tuʻi pule ia ʻo e Puleʻanga ʻo e ʻOtuá, ʻa ia ʻoku vave ʻaupito ʻene fakangata ʻa e tuʻunga-pule kotoa ʻoku fakafepaki ki he finangalo ʻo e ʻOtuá, pea te ne solova ʻa e ngaahi palopalema kotoa ʻa e faʻahinga ʻo e tangatá. Ko e Puleʻanga ia ʻoku tau kole ki ai ʻi he Lotu ʻa e ʻEikí.​—Taniela 2:​44; Mātiu 6:​9, 10.

Fakafou ʻi he fanongonongo ʻa e kau ʻāngeló ki he kau tauhi-sipí, ʻoku tau ako ai ko e faingamālie ki he fakamoʻuí ʻoku ʻatā ia ki he faʻahinga kotoa ʻoku nau loto-lelei ke fanongo ki he pōpoaki ʻo e ongoongo leleí. Ko e faʻahinga ko ē ʻoku nau maʻu ʻa e hōifua ʻa e ʻOtuá ʻoku nau hoko ko e “kakai kuo hoifua ki ai.” ʻOku ʻi ai ʻa e ngaahi ʻamanaki fakaofo ki he melino ʻi he māmaní kotoa ʻi he malumalu ʻo e Puleʻanga ʻo Sīsū Kalaisí, ka kuo pau ke loto-lelei ʻa e kakaí ke fai ʻa e finangalo ʻo e ʻOtuá. ʻOku tokoni ʻa e faʻahitaʻu Kilisimasí ki he meʻá ni, pea ʻoku tapua nai mei ai ʻa e holi ko iá? Ko e kakai loto-moʻoni tokolahi ʻoku nau loto ke muimui ʻi he Tohitapú ʻoku nau ongoʻi ʻoku hā mahino ʻa e talí.—Luke 2:​10, 11, 14.

[Fakamatala ʻi lalo]

[Puha ʻi he peesi 4]

ʻE ʻOHOVALE ʻA E NIʻIHI

ʻI heʻene tohi The Trouble With Christmas, ko e faʻu-tohi ko Tom Flynn ʻokú ne fakamatalaʻi ai ʻa e ngaahi fakamulituku naʻe aʻu ki aí hili ʻa e ngaahi taʻu naʻe fakamoleki ʻi he fekumi ki he Kilisimasí:

“Ko ha ngaahi talatukufakaholo lahi fakaʻulia ʻoku tau fakafekauʻaki he taimí ni mo e Kilisimasí ko ʻenau tupu mei he ngaahi talatukufakaholo fakalotu pangani ki muʻa ʻi he Kalisitiané. Ko e niʻihi ʻo e ngaahi meʻá ni ʻoku nau maʻu ʻa e ngaahi ʻuhinga fakasōsiale, fakaefehokotaki fakasino, pe fakaeʻuniveesi ʻa ia te ne taki nai ʻa e faʻahinga poto, mo ongongofua ki he talatukufakaholo ʻi onopōní ke liʻaki ʻa e ngaahi talatupuʻá ʻi he taimi pē ʻoku nau mahinoʻi lelei ange ai honau ngaahi tupuʻangá.”​—Peesi 19.

Hili hono ʻomai ha fakamatala fakaepoupou lahi, ʻoku toe foki ʻa Flynn ki he poini tefitó: “Ko e taha ʻo e ngaahi meʻa lahi ʻoku ʻiloʻi ʻi he Kilisimasí ko e siʻi ke faka-Kalisitiane moʻoni ʻa e meʻa ʻoku ʻi aí. ʻI he taimi pē ʻoku tau liʻaki ai ʻa e ngaahi meʻa tefito ki muʻa ʻi he Kalisitiané, ko e lahi taha ʻo e meʻa ʻoku toé ʻoku ki mui ia ʻi he Kalisitiané, kae ʻikai ke alafalalaʻanga faka-Kalisitiane, ʻa hono tupuʻangá.”​—Peesi 155.

[Fakatātā ʻi he peesi 7]

Ko e fanongonongo ʻo e ʻaloʻi ʻo Sīsuú ʻoku fokotuʻu ai ʻa e makatuʻunga ki hono ngafa ʻi he kahaʻú ʻi he tuʻunga ko e Tuʻi kuo fili ʻa e ʻOtuá