Talanoa ki he Moʻuí

Kuo Tokonaki Mai ʻe Sihova ʻa e “Mālohi ʻOku Mahulu Atu ʻi he Tuʻunga Anga-Mahení”

FAKAMATALA FAI ʻE HELEN MARKS

Ko e ʻaho vela ʻaupito ia ʻi he faʻahitaʻu māfana ʻo e 1986. Ko au tokotaha pē naʻe tatali ʻi he fale kasitomú ʻi he taha ʻo e ngaahi malaʻe vakapuna lōngonoa taha ʻo ʻIulopé. Ko Tiranë ia, ko e kolomuʻa ʻo ʻAlipēniá, ʻa ia naʻá ne talaki ia tonu “ko e ʻuluaki puleʻanga fakaʻikaiʻi-ʻOtua ʻi he māmaní.”

ʻI HE ʻalu fakataha ʻa e ongoʻi veiveiuá mo e tailiilí, naʻá ku siofi ai ʻa e kamata ke hua ʻa ʻeku kató ʻe ha ʻōfisa ʻosi fakamahafu. Kapau naʻá ku fai pe leaʻaki ha meʻa ke ʻai ia ke huʻuhuʻu, naʻe lava ke hoko ʻa e olá ko hono kapusi au mei he fonuá pea tuku pilīsone pe kemi fakapōpula ʻa e kakai ʻoku nau talitali mai kiate au ʻi tuʻá. Fakafiefiá, naʻe malava ke u fakaʻaiʻai ʻa e ʻōfisá ke hoko ʻo anga-fakakaumeʻa ange ʻaki hono ʻoange kiate ia ha pulu-lole mo ha fanga kiʻi pisikete. Ka naʻe anga-fēfē ʻa ʻeku iku, ko ha fineʻeiki ʻi hono taʻu 60 tupú, ki he tuʻunga ko ení? Ko e hā naʻá ku liʻaki ai ha moʻui fiemālie pea ʻai ke ʻi ha tuʻunga fakatuʻutāmaki ʻa e feinga ke fakalahi ʻa e ngaahi meʻa mahuʻinga ʻo e Puleʻangá ʻi he taha ʻo e ngaahi feituʻu mālohi fakamuimui taha ʻo e pule Faka-Mākisi-Lēniní?

Ko ha Taʻahine Mahamahaki mo e Ngaahi Fehuʻi Lahi

ʻI he taʻu ʻe ua hili hoku fāʻeleʻi ʻi he 1920 ʻi Ierápetra, Kēlití, naʻe mate ʻa ʻeku tamaí ʻi he niumōniá. Naʻe masiva ʻa e fineʻeikí pea naʻe taʻeako. Ko e siʻi taha au ʻi he fānau ʻe toko fā, pea talu ʻa ʻeku fuesia ʻa e engeengá, mo ʻeku tea mo mahamahaki. Naʻe fokotuʻu ange ʻe he ngaahi kaungāʻapí ki heʻeku faʻeé ke tuku kotoa ʻa ʻene tokangá pea mo e kiʻi meʻa fakangatangata naʻe ala maʻú ki he toko tolu naʻe moʻuilelei angé kae tuku au ke u mate. ʻOku ou fiefia ʻi he ʻikai te ne muimui ʻi he faleʻi ko iá.

Ke fakapapauʻi ʻoku mālōlō ʻa e soulu ʻo e tangataʻeikí ʻi hēvani, naʻe faʻa ʻaʻahi ai ʻa e fineʻeikí ki he faʻitoká, ʻo faʻa ngāueʻaki ʻa e ngaahi ouau fakalotu ʻa ha pātele ʻOfotokisī. Neongo ia, ko e ngaahi ouau  fakalotu ko iá, naʻe ʻikai ke maʻamaʻa. ʻOku ou kei manatuʻi ha ʻaho Kilisimasi momoko lahi fakaʻulia naʻá ne foki mai ai mei he faʻitoká fakataha mo au ʻoku ou lue fakatolopī ʻi hono tafaʻakí. Ko e toki ʻosi pē ia ʻema ʻave ʻa e toenga ʻo ʻemau paʻangá ki he pātelé. Hili hono kuki ʻe he fineʻeikí ha lauʻiʻakau maʻamautolu fānaú, naʻá ne mavahe ki ha loki ʻe taha, halaʻatā ha meʻa ʻi hono keté pea naʻe ʻilonga ʻi hono kouʻahé ʻa e loʻimata ʻo e siva ʻa e ʻamanakí. ʻI ha taimi ki mui, naʻá ku langaʻi hake ai ʻa e loto-toʻa ke ʻalu ki he pātelé ʻo ʻeke ange ʻa e ʻuhinga naʻe mate ai ʻa e tangataʻeikí pea mo e ʻuhinga kuo pau ai ke totongi ʻe siʻeku fineʻeikí ʻa e pātelé. Naʻá ne tali mai ʻaki ha fanafana leʻoʻi mā: “Naʻe ʻave ia ʻe he ʻOtuá. Ko e meʻa ia ʻoku hoko ʻi he moʻuí. ʻE mole ʻa hoʻo loto-mamahí.”

Naʻe faingataʻa ke u fakafehokotaki ʻa ʻene talí mo e lotu ʻa e ʻEikí, ʻa ia naʻá ku ako ʻi he ʻapiakó. Naʻá ku kei manatuʻi ʻa hono ngaahi lea kamata fakaʻofoʻofa mo mohu ʻuhingá: “Ko ʻemau Tamai ʻoku ʻi Hevani, ke tapuhā ho Huafa, ke hoko hoʻo Pule, ke fai ho Finangalo, hange ko ia ʻi he langi ke pehe foki ʻi māmani.” (Mātiu 6:​9, 10) Kapau naʻe ʻuhinga ʻa e ʻOtuá ke fai ʻa hono finangaló ʻi māmani, ko e hā naʻe pau ai ke tau faingataʻaʻia lahí?

Naʻá ku meimei maʻu ʻa e tali ki he foʻi fehuʻi ko iá ʻi he taimi naʻe ʻaʻahi mai ai ki homau ʻapí, ʻi he 1929, ʻa Emmanuel Lionoudakis, ko ha tokotaha malanga taimi-kakato ʻa e Kau Fakamoʻoni ʻa Sihová. a ʻI hono ʻeke ange kiate ia ʻe heʻeku faʻeé pe ko e hā ʻa e meʻa naʻá ne fiemaʻú, naʻe ʻikai ke lea ʻa Emmanuel ka naʻá ne ʻoange kiate ia ha kaati fakamoʻoni. Naʻá ne ʻomai kiate au ʻa e kātí ke u lau. Koeʻuhi naʻá ku taʻu hiva pē, naʻe siʻi ʻa e meʻa naʻá ku mahinoʻí. ʻI he pehē naʻe noa ʻa e tokotaha malanga naʻe ʻaʻahi maí, naʻe tali ange ʻa ʻeku faʻeé: “Siʻi fakaʻofa ē! ʻOku ʻikai ke ke lava ʻo lea, pea ʻoku ʻikai ke u lava au ʻo lautohi.” Naʻá ne tataki anga-ʻofa atu leva ia ki he matapaá.

ʻI ha ngaahi taʻu siʻi ki mui ai, naʻá ku maʻu ai ʻa e talí. Ko hoku tuongaʻané, ko Emmanuel Paterakis, naʻá ne maʻu mei he faifekau taimi-kakato tatau ʻa e kiʻi tohi ko e Where Are the Dead?, ko e pulusi ʻe he Kau Fakamoʻoni ʻa Sihová. b ʻI hono lau iá, naʻe fakanonga kiate au ke u ʻilo naʻe ʻikai ke ʻave ʻe he ʻOtuá ʻa ʻeku tamaí. Naʻá ku ʻiloʻi ai ko e maté ko e tupu ia mei he taʻehaohaoa fakaetangatá pea ʻoku tatali ʻa ʻeku tamaí ki ha toetuʻu ki he moʻui ʻi ha māmani palataisi.

“Kuo Fai ʻe he Tohí Ni ʻa e Maumau Kiate Koe!”

Naʻe fakaʻāki ʻe he moʻoni ʻo e Tohitapú homau matá. Naʻa mau maʻu ha Tohitapu motuʻa ʻa e tangataʻeikí pea kamata ke ako ia, ʻo faʻa fai ʻaki ʻa e teʻelango naʻe tuʻu takatakai ʻi he veʻe tofunangá. Koeʻuhi ko au tokotaha pē ʻa e finemui ʻi he feituʻú naʻe mahuʻingaʻia ʻi he Tohitapú, naʻe ʻikai ke fakakau au ʻi he ngaahi ngāue ʻa e kiʻi kulupu fakalotofonua ʻa e Kau Fakamoʻoní. ʻI ha taimi, naʻá ku tui loto-moʻoni ai—neongo naʻe hala—ko e lotu ia ko ení maʻá e kakai tangatá pē.

Ko e faivelenga ʻa hoku tuongaʻané ʻi he ngāue fakamalangá ko ha matavai ia ʻo e fakaueʻiloto kiate au. Naʻe ʻikai fuoloa kuo kamata ke ʻi ai ʻa e tokanga makehe ʻa e kau polisí ki homau fāmilí, ʻo ʻaʻahi tuʻumaʻu mai kiate kimautolu ʻi ha taimi pē ʻo e ʻahó pea mo e poʻulí ke kumi kia Emmanuel pea ki he ʻū tohí. ʻOku ou manatuʻi lelei ʻa e taimi naʻe haʻu ai ha pātele ke fakalotoʻi kimautolu ke mau toe foki ange ki he siasí. ʻI hono fakahā ange kiate ia ʻe Emmanuel mei he Tohitapú ko e huafa ʻo e ʻOtuá ko Sihová, naʻe hamusi ʻe he pātelé ʻa e Tohitapú, ʻo tupeʻi fakamanamana mai ki he mata ʻo hoku tuongaʻané, mo kaila, “Kuo fai ʻe he tohí ni ʻa e maumau kiate koe!”

ʻI he 1940, ʻi he fakafisi ʻa Emmanuel ke ngāue ʻi he kau taú, naʻe puke ia ʻo ʻave ki he laine muʻa ʻo e taú ʻi ʻAlipēnia. Naʻe ʻikai ke mau toe fetuʻutaki mo ia pea mau fakakaukau kuó ne mate. Kae kehe, ʻi he taʻu ʻe ua ki mui ai, naʻa mau maʻu ai ʻi he taʻeʻamanekina ha tohi meiate ia naʻe ʻomai mei pilīsone. Naʻe kei moʻui pea naʻá ne sai pē! Ko e taha ʻo e ngaahi konga Tohitapu naʻá ne hiki mai ʻi he tohi ko iá kuo nofo maʻu ia ʻo ʻikai ala toʻo mei hoku ʻatamaí talu mei ai: “He oku lele fetoutou mo liliuaki ae fofoga o Jihova i mamani kotoabe, ke fakaha malohi a ene afio ke kau mo kinautolu oku tokaga totonu ho nau loto kiate ia.” (2 Kalonikali 16:​9, PM) He fiemaʻu lahi ē ʻe kimautolu ʻa e fakalototoʻa ko iá!

Mei hono pilīsoné, naʻe malava ke kole ai ʻe Emmanuel ha fanga tokoua ke nau ʻaʻahi mai kiate au. Naʻe fokotuʻutuʻu leva ai ha ngaahi fakataha fakafufū faka-Kalisitiane ke fai ʻi ha fale he faama ʻi he tuʻa koló. Naʻe ʻikai te mau ʻiloʻi naʻe ʻosi siofi kimautolu! ʻI he Sāpate ʻe taha, naʻe takatakaiʻi ai kimautolu ʻe ha kau polisi kuo ʻosi fakamahafu.  Naʻa nau fakaheka kimautolu ki ha loli taʻefale pea fakaʻaliʻali kimautolu ʻi he koló kotoa. ʻOku ou kei manatuʻi pē ʻa e ongo ʻo hono kataʻi mo hono manukiʻi kimautolu ʻe he kakaí, ka ko Sihova fakafou ʻi hono laumālié naʻá ne ʻomai kiate kimautolu ʻa e loto-nonga.

Naʻe ʻave kimautolu ki ha toe kolo ʻe taha, ʻa ia naʻa nau laku ai kimautolu ki ha fanga kiʻi loki mātuʻaki fakapoʻuli mo ʻuli. Ko e falemālōlō ʻi hoku kiʻi lokí ko ha kane taʻetāpuni ʻa ia naʻe ʻave ʻo huaʻi tuʻo taha ʻi he ʻaho. Naʻe tautea au ki he māhina ʻe valu ʻi he pilīsoné koeʻuhi he naʻe pehē ko au ʻa e “faiako” ʻo e kulupú. Kae kehe, naʻe fokotuʻutuʻu ʻe ha tuongaʻane naʻe tuku pōpula ʻi ai ki heʻene loeá ke ne tokoni ki heʻemau keisí, pea naʻe malava ke ne ʻai ke tukuange kimautolu.

Ko ha Moʻui Foʻou

ʻI he fakatauʻatāinaʻi ʻo Emmanuel mei pilīsoné, naʻá ne kamata ʻaʻahi ki he ngaahi fakatahaʻanga ʻi ʻAtenisí ko ha ʻovasia fefonongaʻaki. Naʻá ku hiki ki ai ʻi he 1947. Ko e toki taimi ia, naʻá ku fetaulaki ai mo ha fuʻu kulupu ʻo e Kau Fakamoʻoni tokolahi—ʻo ʻikai ko e kakai tangata pē ka ko e kakai fefine pea mo e fānau foki. Faifai atu pē, ʻi Siulai 1947, naʻe malava ai ke u fakaʻilongaʻi ʻa ʻeku fakatapui kia Sihová ʻaki ʻa e papitaiso ʻi he vaí. Naʻá ku faʻa misi fekauʻaki mo e hoko ko ha misinale pea naʻá ku kamata kau ki ha ako efiafi ke ako ʻa e lea faka-Pilitāniá. ʻI he 1950, naʻá ku hoko ai ko ha tāimuʻa. Naʻe haʻu ʻa e fineʻeikí ke ma nofo, pea naʻá ne tali fiefia foki ʻa e moʻoni faka-Tohitapú. Naʻá ne nofo ko e taha ʻo e Kau Fakamoʻoni ʻa Sihová ʻo aʻu ki heʻene maté ʻi he taʻu ʻe 34 ki mui ai.

ʻI he taʻu tatau pē ko iá, naʻá ku fetaulaki ai mo John Marks (Markopoulos), ko ha tangata fakalaumālie naʻe ʻapasiaʻi lahi mei he ʻIunaite Seteté. Naʻe fāʻeleʻi ʻa John ʻi he fakatonga ʻo ʻAlipēniá, pea ʻi he hili ʻene hiki ki he ʻIunaite Seteté, naʻá ne hoko ai ko e taha ʻo e Kau Fakamoʻoni ʻa Sihová. ʻI he 1950, naʻá ne ʻi Kalisi ai ʻo feinga ke maʻu ha visa ki ʻAlipēnia—ʻi he taimi ko ení ko ha fonua ia naʻe ʻikai haʻane fetuʻutaki ki tuʻa ʻi he malumalu ʻo e faʻunga fefeka taha ʻo e Kominiusí. Neongo naʻe teʻeki ai ke sio ʻa John ki hono fāmilí talu mei he 1936, naʻe ʻikai fakangofua ia ke ne hū ki ʻAlipēnia. Naʻe maongo kiate au ʻa ʻene faivelenga mālohi ki he ngāue ʻa Sihová pea mo ʻene ʻofa loloto ki he fetokouaʻakí. Naʻá ma mali ai ʻi ʻEpeleli 3, 1953. Naʻá ku hiki leva mo ia ki homa ʻapi foʻoú ʻi New Jersey, U.S.A.

Koeʻuhi ke tokoniʻi kimaua lolotonga ʻa ʻema malanga taimi-kakató, naʻe ʻi ai ʻa ʻeku kiʻi pisinisi mo John ʻi he matātahi New Jersey, ko hono teuteu ʻa e kai pongipongi ki he kau toutaí. Naʻá ma ngāue pē ʻi he lolotonga ʻa e ngaahi māhina  māfaná, mei he hengihengí ki he 9:00 pongipongí. ʻI hono tauhi ke maʻamaʻa ʻa ʻema moʻuí pea fakahanga ʻa ʻema ngaahi meʻa muʻomuʻá ki he ngaahi ngāue fakalaumālié, naʻe malava ai ke ma fakamoleki ʻa e lahi taha ʻo homa taimí ʻi he ngāue fakamalangá. ʻI he faai mai ʻa e ngaahi taʻú, naʻe kole ai ke ma hiki ki he ngaahi kolo kehekehe ʻa ia naʻe lahi ai ʻa e fiemaʻu ʻo e kau malangá. ʻI ai, fakataha mo e tokoni ʻa Sihová, naʻá ma tokoniʻi ʻa e faʻahinga mahuʻingaʻiá, fokotuʻu ʻa e ngaahi fakatahaʻanga pea tokoni ʻi hono langa ʻa e ngaahi Fale Fakatahaʻanga.

Tokoniʻi Homa Fanga Tokoua Masivá

Kae kehe, naʻe vave ʻa e ʻatā mai kiate kimaua ha meʻa ke fakatuʻotuʻa fakalotomāfana ki ai. Naʻe fiemaʻu ʻe he fanga tokoua fua fatongiá ke fai ha fetuʻutaki mo e kaungā Kalisitiane ʻoku nofo ʻi he ngaahi fonua Palakaná ʻa ia naʻe tapui ai ʻemau ngaahi ngāué. Naʻe mavahe ʻi he laui taʻu ʻa e Kau Fakamoʻoni ʻa Sihova ʻi he ngaahi fonua ko iá mei he fetokouaʻaki fakavahaʻapuleʻangá, ʻo siʻi ai ʻenau maʻu pe halaʻatā ʻi ha meʻakai fakalaumālie, pea naʻa nau fehangahangai mo e fakafepaki anga-fakamamahi. Ko e tokolahi taha ʻo kinautolú naʻe ʻi he malumalu ʻo hano siofi tuʻumaʻu, pea ko e tokolahi naʻe ʻi he pilīsoné pe ko e ngaahi kemi fakapōpulá. Naʻa nau fiemaʻu fakavavevave ha ngaahi tohi makatuʻunga faka-Tohitapu, fakahinohino pea mo e fakalototoʻa. Ko e fakatātaá, ko ha pōpoaki fai fakafufū ʻe taha naʻa mau maʻu mei ʻAlipēnia naʻe pehē ai: “Lotu ki he ʻEikí maʻamautolu. ʻOku faʻao ʻa e ʻū tohí mei he fale ki he fale. ʻOku ʻikai te nau fakaʻatā kimautolu ke mau ako. ʻOku tuku pōpula ʻa e toko tolu.”

Ko ia ai, ʻi Nōvema 1960 naʻá ma kamata ai ha fononga lōloa māhina ʻe ono ke ʻaʻahi ki he niʻihi ʻo e ngaahi fonua ko iá. Naʻe hā mahino te ma fiemaʻu ʻa e “mālohi ʻoku mahulu atu ʻi he tuʻunga anga-mahení,” ko e loto-toʻa, loto-lahi mo e poto foaki faka-ʻOtua ke fakahokoʻaki ʻema ngāue kuo vaheʻi  maí. (2 Kolinito 4:​7, NW) Ko e ʻuluaki feituʻu naʻe vaheʻi kimaua ki aí ko ʻAlipēnia. Naʻá ma fakatau ha kā ʻi Pālesi pea kamata ʻa e fonongá. Hili ʻema aʻu ki Lomá, ko John pē naʻe malava ke ne maʻu ha visa ki ʻAlipēniá. Naʻe pau ai ke u hoko atu ki ʻAtenisi, Kalisi, ʻo tatali ai kiate ia.

Naʻe hū ʻa John ki ʻAlipēnia ʻi he konga ki mui ʻo Fepueli 1961 pea nofo ai ʻo aʻu ki he ngataʻanga ʻo Maʻasí. ʻI Tiranë, naʻá ne fetaulaki tonu ai mo e fanga tokoua ʻe toko 30. He fiefia lahi ē ko kinautolu ke maʻu ʻa e ʻū tohi pea mo e fakalototoʻa ʻa ia naʻe fiemaʻu lahí! Ne teʻeki ai te nau maʻu ha ʻaʻahi mei tuʻa ʻo feʻunga mo e taʻu ʻe 24.

Naʻe maongo kia John ʻa e anga-tonu mo e kātaki ʻa e fanga tokoua ko iá. Naʻá ne ʻiloʻi ai ne mole ʻa e ngaahi ngāue ʻa e tokolahi pea naʻe tuku pōpula kinautolu koeʻuhi ko e ʻikai te nau kau ʻi he ngaahi ngāue ʻa e fonua Kominiusí. Naʻe maongo tautefito kiate ia ʻa hono ʻoange kiate ia ʻe ha ongo tokoua ʻi hona taʻu 80 tupú ha meʻaʻofa ko e paʻanga ʻe 100 (U.S.) nai ki he ngāue fakamalangá. Naʻá na tātānaki ʻi he laui taʻu mei heʻena kiʻi paʻanga penisoni siʻisiʻi mei he puleʻangá.

Ko e ʻaho fakaʻosi ʻo e nofo ʻa John ʻi ʻAlipēniá ko Maʻasi 30, 1961—ko e ʻaho ʻo e Fakamanatu ʻo e pekia ʻa Sīsuú. Naʻe fai ʻe John ʻa e malanga Fakamanatú ki ha kau fanongo ʻe toko 37. ʻI he ngataʻanga ʻo e malangá, naʻe ʻave fakavave ki tuʻa ʻe he fanga tokouá ʻa John ʻi he matapā ʻi muí pea leleakiʻi ia ki he taulanga Durrës, ʻa ia naʻá ne heka ai ki ha vaka uta koloa Toake naʻe huʻu ki Piraiévs (Piraeus), Kalisi.

Naʻá ku fiefia ʻi heʻene toe foki ʻo hao lelei maí. Naʻe lava leva he taimi ko ení ke ma kamata ʻi he toenga ʻo ʻema fononga fakatuʻutāmakí. Naʻe ʻave kimaua ʻi heʻema fonongá ki ha fonua Palakana kehe ʻe tolu ʻa ia naʻe tapui ai ʻemau ngāué—ko ha fononga fakatuʻutāmaki, koeʻuhi naʻá ma ʻave ha ʻū tohi faka-Tohitapu, ko e ngaahi taipe mo e ngaahi tokonaki kehe. Naʻá ma maʻu ʻa e monū makehe ke feʻiloaki ai mo e fanga tokoua mo e fanga tuofāfine mateaki lahi ʻa ia naʻa nau mateuteu ke tuku ke mole ʻenau ngāué, ko ʻenau tauʻatāiná pea naʻa mo ʻenau moʻuí koeʻuhi ko Sihova. Ko ʻenau faivelengá mo e ʻofa moʻoní ko ha matavai ia ʻo e fakaueʻiloto. Naʻe toe maongo foki kiate kimaua ʻa e tokonaki mai ʻe Sihova ʻa e “mālohi ʻoku mahulu atu ʻi he tuʻunga anga-mahení.”

Hili ʻa e kakato lavameʻa ʻo ʻema fonongá, naʻá ma foki ki he ʻIunaite Seteté. ʻI he ngaahi taʻu hoko mai aí, naʻá ma hokohoko atu ai ʻa hono ngāueʻaki ʻa e ngaahi founga kehekehe ʻi he feinga ke ʻave ʻa e ʻū tohí ki ʻAlipēnia pea ke maʻu ʻa e līpooti ʻo e ngaahi ngāue ʻa homa fanga tokouá.

ʻI he Fononga Tuʻo Lahi, ʻi he Ngaahi Tuʻunga Fakatuʻutāmaki

Naʻe faai mai ʻa e ngaahi taʻú, pea ko e mate ʻa John ʻi he 1981, ʻi hono taʻu 76, naʻá ku nofo tokotaha ai. Ko hoku fakafotu, ko Evangelia mo hono husepānití, ko George Orphanides, naʻá na anga-ʻofa ʻo ʻave au ke mau nofo pea talu mei ai mo ʻena tokonaki mai ʻa e poupou mahuʻinga fakaeongo mo ʻaonga. Ko kinaua foki kuó na mātā tonu ʻa e poupou ʻa Sihová lolotonga ʻena ngāue ʻi he malumalu ʻo e tapuí ʻi Sutani. c

Faifai atu pē, naʻe pau ke fai ha feinga foʻou ke fetuʻutaki mo homau fanga tokoua ʻi ʻAlipēniá. Koeʻuhi naʻe nofo ai ʻa e ngaahi kāinga ʻo hoku husepānití, naʻe kole kiate au pe te u loto-lelei ke fai ha fononga ki he fonua ko iá. Ko e moʻoni te u ʻalu!

Hili ha ngaahi māhina ʻo e feinga kīkīvoí, naʻe malava ai ke u maʻu ha visa mei he ʻōfisi ʻamipasitoa ʻAlipēnia ʻi ʻAtenisí, ʻi Mē 1986. Ko e mēmipa ʻo e kau ngāue ʻi he potungāue fakaefakafofongá naʻa nau fakatokanga mālohi mai kiate au ka ʻi ai ha meʻa ʻe fehālaaki, heʻikai lava ke u ʻamanekina ha tokoni mei he ngaahi fonua kehé. ʻI heʻeku fakaofiofi atu ki ha fakafofonga folau ke fakatau mai ha ngaahi tikite vakapuna ki ʻAlipēniá, naʻá ne moʻutāfuʻua. ʻI he ʻikai tuku ke taʻofi au ʻe he ilifiá, naʻá ku heka leva ki he vakapuna, puna fakauike pē ʻe taha mei ʻAtenisi ki Tiranë. Ko e kau tangata taʻumotuʻa ʻAlipēnia pē ʻe toko tolu naʻa mau heka fakataha ʻi he vakapuná; naʻa nau ʻi Kalisi ʻi ha ngaahi ʻuhinga fakafaitoʻo.

ʻI he tūʻuta atu pē ʻa e vakapuná, naʻe taki atu au ki ha fale naʻe ngaongao ʻa ia naʻe ngāueʻaki ko ha ʻōfisi kasitomu. Ko e tehina ʻo hoku husepānití mo hono tuofefiné, neongo naʻe ʻikai ko ha ongo Fakamoʻoni ʻa Sihova kinaua, naʻá na loto-lelei ke tokoniʻi au ke fai ha fetuʻutaki mo e fanga tuongaʻane tokosiʻi he feituʻú. Fakatatau ki he laó, naʻe pau ke na fakahā ki he taki ʻo e koló fekauʻaki mo ʻeku aʻu atú. Ko hono ikuʻangá, naʻe siofi ʻaupito au ʻe he kau polisí. Ko ia ai, naʻe fokotuʻu mai ʻe hoku kāingá  ke u nofo ʻi hona ʻapí kae tuku ke na kumi ki he ongo tuongaʻane naʻá na nofo ʻi Tiranë ʻo ʻomai kinaua kiate au.

ʻI he taimi ko iá, ko e fanga tuongaʻane fakatapui pē ʻe toko hiva naʻe ʻiloʻi naʻa nau ʻi he kotoa ʻo ʻAlipēniá. Ko e ngaahi taʻu ʻo e tapuí, fakatangá mo hono siofi maʻu peé naʻá ne ʻai kinaua ke na mātuʻaki tokanga ʻaupito. Naʻe mingimingi ʻaupito hona matá. Hili ʻa ʻeku maʻu ʻa e falala ʻa e ongo tuongaʻané, ko ʻena ʻuluaki fehuʻí eni: “Ko fē ʻa e ngaahi Taua Leʻo?” ʻI he laui taʻu ko e ongo tatau pē ʻe ua ʻo e ngaahi tohi motuʻa angé naʻá na maʻú—ʻo ʻikai naʻa mo ha Tohitapu.

Naʻá na talanoa mahino fekauʻaki mo e ngaahi tuʻunga fakamamahi kuo fai kiate kinautolu ʻe he founga-pule ʻa e puleʻangá. Naʻá na lave ki he tuʻunga ʻo ha tokoua ʻofeina ʻa ia naʻá ne fakapapauʻi ke ne hanganaki tuʻu-ʻatā fakapolitikale ʻi ha fili naʻe teu ke fai. Koeʻuhi naʻe puleʻi ʻa e meʻa kotoa ʻe he Puleʻangá, naʻe ʻuhinga ení ʻe ʻikai ke maʻu ʻe hono fāmilí ha ngaahi ʻinasi meʻakai. Ko ʻene fānau ne ʻosi malí mo honau ngaahi fāmilí ʻe ʻave kotoa ki pilīsone, neongo naʻe ʻikai haʻanau kaunga ki heʻene ngaahi tui fakalotú. Naʻe pehē ʻe he fakamatalá ko e ngaahi mēmipa ʻo e fāmili ʻo e tokoua ko ení, koeʻuhi ko ʻenau ilifiá, naʻa nau tāmateʻi ia ʻi he pō ki muʻa ʻi he filí, lī hono sinó ki ha vaitupu pea taukaveʻi ki mui naʻá ne ilifia ʻo ne tāmateʻi pē ʻe ia, ia.

Ko e masiva ʻa e ongo kaungā Kalisitiane ko iá ko ha meʻa fakalotomamahi. Neongo ia, ʻi heʻeku feinga ke ʻoange kiate kinaua taki taha ha tola ʻe 20, naʻe ʻikai te na tali, ʻo na pehē, “ʻOkú ma fiemaʻu pē ʻa e meʻakai fakalaumālie.” Ko e siʻi ongo tuongaʻane ʻofeina ko ení naʻá na nofo ʻi he laui hongofuluʻi taʻu ʻi he malumalu ʻo ha founga-pule fakatikitato ʻa ia naʻá ne akoʻi ʻa e tokolahi taha ʻo e kakaí ke nau hoko ko e kau fakaʻikaiʻi-ʻOtua. Ka ko ʻena tuí mo e fakapapaú naʻe mālohi ʻo hangē pē ko ia ko e Kau Fakamoʻoni ʻi he feituʻu kehé. Ko e malava ʻa Sihova ke tokonaki ʻa e “mafai ʻoku mahulu atu ʻi he tuʻunga anga-mahení,” naʻa mo e ʻi he malumalu ʻo e ngaahi tuʻunga faingataʻa tahá, naʻe maongo moʻoni ia kiate au ʻi he taimi naʻá ku mavahe ai mei ʻAlipēnia ʻi he uike ʻe ua ki mui aí.

Naʻá ku toe maʻu ʻa e monū ke ʻaʻahi ki ʻAlipēnia ʻi he 1989 pea ʻi he 1991 foki. ʻI he kamata māmālie ke hā mahino ʻa e tauʻatāina ʻo e leá mo e lotú ʻi he fonua ko iá, naʻe tupu vave ʻa e tokolahi ʻo e kau lotu kia Sihová. Ko e kiʻi kau Kalisitiane fakatapui tokosiʻi naʻa nau ʻi ai he 1986 kuo tupu ia he taimí ni ʻo laka hake ʻi he kau malanga longomoʻui ʻe toko 2,200. Naʻe ʻi honau lotolotongá ʻa Melpo, ko e tuofefine ʻo hoku husepānití. ʻE lava ke toe ʻi ai ha veiveiua ki he ʻi ai ʻa e tāpuaki ʻa Sihová ʻi he kulupu loto-tōnunga ko iá?

ʻI he Mālohi ʻo Sihová, Kuó U Maʻu Ai ha Moʻui Fiemālie

ʻI heʻeku sio atu ki muí, ʻoku ou tuipau ko ʻema ngāué—ʻa John mo au—kuo ʻikai ke kulanoa. Naʻá ma ngāueʻaki ʻa homa mālohinga fakatalavoú ʻi he founga ʻaonga tahá. Ko ʻema ngāue ʻi he ngāue fakafaifekau taimi-kakató kuo ʻaonga lahi ange ia ʻi ha toe ngāue kehe pē naʻe malava ke ma tuli ki ai. ʻOku ou fiefia ʻi he siʻi faʻahinga ʻofeina tokolahi ko ia kuó ma tokoniʻi ke nau ʻiloʻi ʻa e moʻoni ʻo e Tohitapú. ʻI heʻeku taʻumotuʻa he taimi ní, ʻoku lava ke u fakalotolahiʻi ʻi he loto-ʻaufuatō ʻa e faʻahinga kei siʻi angé ke nau ‘manatu ki honau Tubuagá i he gaahi aho o ʻenau kei jií.’​—Koheleti 12:​1, PM.

Neongo ʻeku taʻu 81, ʻoku ou kei malava pē ke ngāue ko ha tokotaha malanga taimi-kakato ʻo e ongoongo leleí. ʻOku ou ʻā pongipongia ʻo faifakamoʻoni ki he kakai ʻi he ngaahi tauʻanga pasí, ʻi he ngaahi tauʻanga meʻalelé, ʻi he halá, ʻi he ngaahi falekoloá pe ʻi he ngaahi paʻaké. Ko e ngaahi palopalema ʻo e taʻumotuʻá ʻokú ne ʻai he taimí ni ke faingataʻa ʻa e moʻuí, ka ko hoku fanga tokoua mo e fanga tuongaʻane anga-ʻofa fakalaumālié—ʻa hoku fuʻu fāmili lahi fakalaumālié—pea pehē foki ki he fāmili ʻo hoku fakafotú, kuo fakamoʻoniʻi ʻenau hoko ko ha poupou moʻoni. Hiliō he meʻa kotoa, kuó u ʻiloʻi ko e “mālohi ʻoku mahulu atu ʻi he tuʻunga anga-mahení [ʻoku ʻa e] ʻOtuá ʻo ʻikai meiate kitautolu.”​—2 Kolinito 4:​7, NW.

[Fakamatala ʻi lalo]

[Fakatātā ʻi he peesi 25]

ʻI ʻolungá: Ko John (taupotu taha ki he toʻohemá), ko au (ʻi loto-mālie), mo hoku tuongaʻané ʻa Emmanuel ʻi hoku toʻohemá mo ʻema faʻeé ʻi hono toʻohemá, fakataha mo ha kulupu ʻo e kau nofo Pētelí, ʻAtenisi, 1950

[Fakatātā ʻi he peesi 25]

Toʻohema: Fakataha mo John ʻi heʻema pisinisi ʻi he matātahi New Jersey, 1956

[Fakatātā ʻi he peesi 26]

Fakataha-lahi fakavahe ʻi Tiranë, ʻAlipēnia, 1995

[Fakatātā ʻi he peesi 26]

Nofoʻanga Pētelí, Tiranë, ʻAlipēnia. Kakato ʻi he 1996

[Fakatātā ʻi he peesi 26]

Mo hoku fakafotú ko Evangelia Orphanides (toʻomataʻu) mo hono husepānití, ko George

[Fakatātā ʻi he peesi 26]

ʻI ʻolungá: ko e kupu mei ha “Taua Leʻo” ʻo e 1940 naʻe liliu fakafufū ki he lea faka-ʻAlipēniá