“Haʻu Kiate Au, . . . pea Te U Fakaivifoʻou Kimoutolu”

‘Ko e Malangaʻaki ʻa e Folofolá’ ʻOkú Ne ʻOmai ʻa e Fakaivifoʻou

KO HA tangata haohaoa ia ʻi ha ngāue mahuʻinga. Naʻe mātuʻaki ola lelei ʻa ʻene ngaahi founga fakahinohinó ʻo “ofo ae kakai i he ene akonaki.” (Mātiu 7:​28, PM) Ko ha tokotaha malanga taʻehelaʻia foki ia. Ko hono taimí, iví, mo e koloá naʻe tuku tefito ia ki he malanga ʻo fekauʻaki mo e Puleʻanga ʻo e ʻOtuá. Ko e moʻoni, naʻe fononga ʻa Sīsū Kalaisi ʻi he kotoa ʻo hono fonua tupuʻangá ʻi he tuʻunga ko ha tokotaha malanga mo ha faiako taʻealafakatataua.​—Mātiu 9:​35.

Ko e ngāue fakavavevave ne fekau mai ai ʻa Sīsuú ke malangaʻi “ae ogoogolelei oe buleaga” ki hono toʻutangatá pea ke akoʻi ʻa ʻene kau ākongá ki he ngāue tatau ʻi ha tuʻunga fakamāmani lahi. (Mātiu 4:​23, PM; Mātiu 24:14; 28:​19, 20) ʻE hanga ʻe he mafatukituki ʻo ʻenau ngāue fakamalangá pea mo ʻene fakavavevavé pea pehē ki he tuʻunga lahi ʻataʻatā ʻo e ngāue peheé ʻo lōmekina ʻa hono kau muimui taʻehaohaoa mo ʻi he tuʻunga fakangatangatá?

ʻIkai ʻaupito! Hili hono fakahinohino ʻene kau ākongá ke nau lotu “ki he ʻEiki ʻo e utu-taʻú,” ʻa Sihova ko e ʻOtuá, ki ha kau ngāue tokolahi angé, naʻe fekauʻi atu kinautolu ʻe Sīsū ke nau ō ʻo akoʻi ʻa e kakaí. (Mātiu 9:​38, NW; Mātiu 10:1) Naʻá ne ʻomai leva ai ʻa ʻene fakapapau ko e fatongia ʻo e hoko ʻo muimui kiate iá—kau ai ʻa e fekau ke malangá—ʻe ʻomai ai ʻa e nonga mo e fiemālie moʻoni. Naʻe pehē ʻe Sīsū: “Haʻu kiate au, . . . pea te u fakaivifoʻou kimoutolu.”​—Mātiu 11:​28, NW.

Ko ha Matavai ʻo e Fiefiá

He manavaʻofa, ʻofa, mo anga-ʻofa ē ko e fakaafe ko iá! ʻOku fakahaaʻi ai ʻa e tokanga ongongofua ʻa Sīsū ki hono kau muimuí. ʻOku maʻu ʻe heʻene kau ākongá ʻa e fakaivifoʻou ʻi hono fakahoko honau fatongia ke malangaʻi “ae ogoogolelei” ʻo e Puleʻanga ʻo e ʻOtuá. ʻOku ʻomai ʻe he meʻá ni kiate kinautolu ʻa e fiefia mo e fiemālie moʻoni.​—Sione 4:​36.

Fuoloa ki muʻa ke ʻi he māmaní ʻa Sīsuú, naʻe fakamamafaʻi ʻi he ngaahi Konga Tohitapú ko e fiefiá kuo pau ke hoko ko ha tafaʻaki ia ʻo e ngāue toputapu ki he ʻOtuá. Naʻe fakahaaʻi mahino eni ʻi he taimi naʻe hiva ai ʻa e tokotaha-tohi-sāmé: “Mou mavava i he fiefia kia Jihova, ae gaahi fonua kotoabe. Tauhi a Jihova i he fiefia: haʻu moe hiva [“kalanga fiefia,” NW] ki hono ao.” (Sāme 100:​1, 2, PM) ʻI he ʻahó ni, ʻoku hākahaka ʻa e kakai ʻo e puleʻanga kotoa pē ʻia Sihova, pea ko ʻenau fakahāhā ʻa e fakahīkihikí ʻoku hangē ia ko e kaila ʻi he maʻalali ʻa ha kau tau ikuná. Ko e faʻahinga ʻoku līʻoa moʻoni ki he ʻOtuá ʻoku nau haʻu ki hono ʻaó “mo e kalanga fiefia.” Pea ʻoku feʻungamālie moʻoni ia, he ko Sihová ko e “ʻOtua fiefia,” ʻokú ne loto ke maʻu ʻe heʻene kau sevānití ʻa e fiefia ʻi hono fakahoko ʻenau fakatapui kiate iá.​—1 Timote 1:​11, NW.

Kau Faifekau Kuo Fakaivifoʻou

ʻOku malava fēfē ke ʻikai fakaongosiaʻi kitautolu ʻe he ngāue mālohi ʻi he malaʻe ngāue fakafaifekaú kae fakaivifoʻou moʻoní? Sai, ko hono fai ʻa e ngāue ʻa Sihová naʻe hangē ia ha meʻakai fakaivimālohi kia Sīsuú. Naʻá ne pehē: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au, pea ke fakaʻosi haʻána ngaue.”—Sione 4:34.

ʻI he tuʻunga meimei tatau, ko e kau Kalisitiane malanga faivelenga ʻi he ʻaho ní ʻoku nau maʻu ʻa e fiefiá ʻi heʻenau “malangaʻaki ʻa e folofola.” (2 Timote 4:2) Ko Connie, ko ha fefine Kalisitiane fatufefine ia ʻa ia ʻokú ne fakamoleki ha houa laka hake ʻi he 70 he māhina ʻi he ngāue fakamalangá, ʻokú ne pehē: “Hili ʻa e kau ʻi he ngāue fakafaifekaú, ʻoku ou maʻu ha ongoʻi fiemālie mo ha ongoʻi nonga, ʻo tatau ai pē kapau ʻoku ou helaʻia ʻi he ngataʻanga ʻo e ʻahó.”

Fēfē kapau ʻoku ʻikai ke tali lelei ʻa e pōpoaki ʻo e Puleʻangá? ʻOku hoko atu ʻa Connie: “Tatau ai pē pe ko e hā ʻa e talí, kuo ʻikai ʻaupito haʻaku fakaʻiseʻisa ʻi ha taimi ʻi he kau ki he ngāue fakafaifekaú. Tuku kehe ʻa hono ʻiloʻi ʻoku ou fai ʻa e meʻa ʻoku fakahōifua kia Sihová, ʻoku ou vakai ki ai ko ha meʻa fakafiefia ia ke lea fekauʻaki mo e moʻoní koeʻuhi ʻi heʻeku fai iá,  ʻoku ʻai ai ke mālohi ʻi hoku lotó ʻa e ʻamanaki fakaofo mei he Tohitapú.”

ʻOku ʻiloʻi ʻe he niʻihi ko e tokoniʻi ʻo e kakaí ke nau maʻu ʻa e ʻiloʻi totonu ʻo e ʻOtuá ʻoku ʻomai ai ʻa e ʻuhinga ki heʻenau moʻuí tonu. Ko Meloney, ko ha finemui ia ʻokú ne fakamoleki maʻu pē ʻa e houa laka hake ʻi he 50 he māhina ʻi he ngāue fakamalangá, ʻokú ne pehē: “ʻOku fakaivifoʻou ʻa e ngāue fakafaifekaú koeʻuhi ʻokú ne ʻomai ki heʻeku moʻuí ʻa e tataki pea mo e taumuʻa. Ko e ngaahi palopalema fakafoʻituituí pea mo e ngaahi faingataʻa fakaʻahó ʻoku mole atu ia ʻi heʻeku kau ʻi he ngāué.”

Ko Millicent, ko ha faifekau faivelenga ia ʻe taha ʻa e Kau Fakamoʻoni ʻa Sihová, ʻokú ne pehē: “ʻOku ʻomai ʻe he ngāue fakafaifekaú ʻa e meʻa mahuʻinga ki he ʻaho taki taha ʻoku ou fakamoleki ʻi he talanoa ki he niʻihi kehé fekauʻaki mo e taumuʻa ʻa e ʻOtuá ki he faʻahinga ʻo e tangatá pea mo hono fakamatalaʻi ʻa e founga ʻo hono toe fakafoki mai ʻa e Palataisí ki he māmaní. ʻOkú ne ʻai ʻa Sihova ke moʻoni kiate au ʻi ha tuʻunga fakaʻaho pea ʻomai kiate au ʻa e nonga mo ha tuʻunga ʻo e fiefia ʻi loto ʻa ia ʻe ʻikai lava ke maʻu ia ʻi ha toe ngaahi founga kehe.”

Kau Tali Kuo Fakaivifoʻoú

Ko e kau malanga ʻo e Puleʻangá ʻoku fakaivifoʻou moʻoni kinautolu ʻe he ngāue fakafaifekau faka-Kalisitiané, pea ko e faʻahinga ʻoku nau tali ʻa e pōpoaki foaki-moʻuí ʻoku fakafiemālieʻi kinautolu ʻe he meʻa ko iá. Neongo naʻe akoʻi ha tokotaha faiako ʻi Potukali ʻe he kau tāupoʻoú mo e kau pātelé, naʻá ne ongoʻi ko ʻene ngaahi fiemaʻu fakalaumālié naʻe ʻikai ke fakatōliʻa ia ʻe hono siasí. Naʻe kei taʻetali pē ʻene ngaahi fehuʻi faka-Tohitapú. Ko ha ako Tohitapu tuʻumaʻu naʻe fai ʻe ha taha ʻo e Kau Fakamoʻoni ʻa Sihová naʻe ʻoange ai kiate ia ʻa e fakamaama Fakatohitapu hokohoko. Naʻe fiefia ʻa e faiakó ni. “Naʻá ku tatali vēkeveke ki heʻeku akó ʻi he Pulelulu kotoa pē,” ko ʻene leá ia, “ʻi hono tali tahataha ʻa ʻeku ngaahi fehuʻí ʻaki ʻa e fakamoʻoni faka-Tohitapu fakatupu tuipau.” ʻI he ʻahó ni, ko e fefiné ni ko ha sevāniti fakatapui ia ʻa Sihova, pea ko ia foki ʻokú ne fakaivifoʻou ʻa e niʻihi kehé ʻaki ʻa e moʻoni faka-Tohitapú.

ʻOku hā mahino leva, ko e Kau Fakamoʻoni ʻa Sihová ʻoku ʻikai ke lōmekina kinautolu ʻe he tuʻunga mafatukituki ʻo ʻenau ngāue fakamalangá pe ko e tuʻunga lahi fau ʻo honau feituʻu ngāue ʻi māmani lahí. ʻOku ʻikai ke fakalotosiʻi kinautolu ʻe he loto-noá pe ko e fakafepakí. Kuo nau ngāueʻaki tōtōivi kinautolu tonu ke fakahoko ʻenau ngāue ko hono malangaʻi ʻo e Puleʻangá. ʻOku nau vahevahe atu ʻa e ongoongo leleí ki he kakaí ʻi ha feituʻu pē ʻe maʻu nai ai kinautolu—ʻi ha tauʻanga loli ʻi he ʻIunaite Seteté (1), ʻi ha malaʻe vakapuna ʻi Kōlea (2), ʻi he ʻEnitesí (3), pe ʻi ha falekoloa ʻi Lonitoni (4). Ko e kau muimui ʻo Sīsū ʻi he ʻaho ní ʻoku nau hokohoko fiefia atu ʻa ʻenau ngāue ʻaongá ʻi māmani lahi. Pea ʻi he moʻoni ʻa ʻene talaʻofá, kuó ne fakaivifoʻou kinautolu pea kuó ne ngāueʻaki kinautolu ke nau fakaivifoʻou ʻa e tokolahi kehe.​—Fakahā 22:17.