Ongo Tautehina Naʻá Na Fakatupu ʻa e Fakakaukau Kehekehe

KO E ngaahi fili ʻoku fai ʻe he ngaahi mātuʻá ʻokú ne uesia taʻealakalofi ʻenau fānaú. ʻOku hoko moʻoni ia he ʻahó ni ʻo hangē pē ko ia naʻe ʻi he ngoue ko ʻĪtení. Ko e ʻalunga angatuʻu ʻa ʻĀtama mo ʻIví naʻe ʻi ai ʻene felāveʻi lahi mo e kotoa ʻo e faʻahinga ʻo e tangatá. (Senesi 2:​15, 16; 3:​1-6; Loma 5:​12) Neongo ia, ko kitautolu taki taha ʻoku tau maʻu ʻa e faingamālie ke fakatupu ha vahaʻangatae lelei mo hotau Tokotaha-Fakatupú ʻo kapau te tau fili ke fai pehē. ʻOku fakatātaaʻi eni ʻe he fakamatala fekauʻaki mo Keini pea mo ʻĒpelí, ʻa e ʻuluaki ongo tautehina ʻi he hisitōlia ʻo e tangatá.

ʻOku ʻikai ha lēkooti Fakatohitapu ʻoku hā ai naʻe folofola ʻa e ʻOtuá kia ʻĀtama mo ʻIvi hili ʻa hona kapusi mei ʻĪtení. Neongo ia, naʻe ʻikai ke fakaʻehiʻehi ʻa Sihova tonu mei he lea ki hona ongo fohá. ʻOku ʻikai ha veiveiua naʻe ʻiloʻi ʻe Keini mo ʻĒpeli mei heʻena ongo mātuʻá, ʻa e meʻa naʻe hokó. Naʻe lava ke na sio ki he “Selupimi, mo ha heleta ulo naʻe tavilovilo, mo leʻohi ʻa e hala ki he ʻAkau ʻo e Moʻui.” (Senesi 3:24) Naʻe toe sio tonu ʻa e ongo tangatá ni ʻi he moʻoni ʻo hono fakahā ʻe he ʻOtuá ʻe hoko ʻa e kakavá mo e mamahí ko e ngaahi tuʻunga moʻoni ia ʻo e moʻuí.​—Senesi 3:​16, 19.

Kuo pau pē naʻe lāuʻilo ʻa Keini mo ʻĒpeli ki he folofola ʻa Sihova ki he ngatá: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.” (Senesi 3:15) Ko e meʻa naʻe ʻilo ʻe Keini mo ʻĒpeli ʻo fekauʻaki mo Sihová ʻe malava ke ne ʻai kinaua ke na fakatupu ha vahaʻangatae fakahōifua pea mo ia.

ʻI he fakakaukau atu ki he kikite ʻa Sihová pea mo hono ngaahi ʻulungaanga ʻi he tuʻunga ko ha Tokotaha-Foaki ʻofá kuo pau pē naʻá ne fakatupu ʻia Keini mo ʻĒpeli ha holi ke maʻu ʻa e hōifua fakaʻotuá. Ka ko e hā hono lahi ʻo ʻena fakatupu ʻa e holi ko iá? Te na tali ʻa ʻena holi ʻi loto ke lotu ki he ʻOtuá pea fakatupulekina ʻa hona tuʻunga fakalaumālié ke aʻu ki he tuʻunga ko hono ngāueʻi ʻa e tui kiate iá?​—Mātiu 5:3.

ʻOmai ʻe he Ongo Tautehiná ʻa e Ongo Feilaulau

ʻI he taimi naʻe ʻamanekiná, naʻe ʻomai ai ʻe Keini mo ʻĒpeli ʻa e ongo feilaulau ki he ʻOtuá. Naʻe ʻomai ʻe Keini ʻa e ngaahi fua ʻo e kelekelé, pea foaki ʻe ʻĒpeli ʻa e veloaki ʻo ʻene fanga sipí. (Senesi 4:​3, 4) Ko e ongo tangatá ni naʻá na taʻu 100 nai, he naʻe taʻu 130 ʻa ʻĀtama ʻi heʻene hoko ko e tamai ki hono fohá, ʻa Seti.​—Senesi 4:​25; 5:3.

Ko ʻena feilaulaú naʻe fakahaaʻi ai naʻe ʻiloʻi ʻe Keini mo ʻĒpeli ʻa hona tuʻunga angahalaʻiá pea naʻá na holi ke maʻu ʻa e hōifua ʻa e ʻOtuá. Kuo pau naʻá na fai ʻi ha tuʻunga ha fakakaukau ki he palōmesi ʻa Sihova ʻo fekauʻaki mo e ngatá pea mo e Hako ʻo e fefiné. Ko hono lahi ʻo e taimi mo e feinga naʻe līʻoa ʻe Keini mo ʻĒpeli ki hono fakatupu ha vahaʻangatae fakahōifua mo Sihová ʻoku ʻikai ke fakahā ia. Ka ko e tali ʻa e ʻOtuá ki heʻena ongo feilaulaú ʻoku ʻomai ai ʻa e vavanga ki he ngaahi fakakaukau loloto ʻa e tokotaha taki taha.

ʻOku pehē ʻe he kau mataotao ʻe niʻihi naʻe vakai ʻa ʻIvi kia Keini ko e “hako” ia te ne fakaʻauha ʻa e ngatá, he ʻi hono fāʻeleʻi ʻo Keiní naʻá ne pehē: “Kuo u maʻu ha tangata ʻia Sihova.” (Senesi 4:1) Kapau naʻe kau ʻa Keini ʻi he tui ko ení, naʻá ne hala fakaʻaufuli. ʻI he tafaʻaki ʻe tahá, naʻe ō fakataha ʻa e tuí mo e feilaulau ʻa ʻĒpelí. Ko ia ai, “koe tui nae atu ai e Ebeli ki he Otua ae feilaulau lelei hake ia Keini.”—Hepelu 11:​4, PM.

Ko e vavanga fakalaumālie ʻa ʻĒpelí pea mo e hala ʻa Keini ʻi he meʻa ko iá naʻe ʻikai ko e  faikehekehe pē ia ʻi he vahaʻa ʻo e ongo tautehiná ni. Naʻe ʻi ai foki ha faikehekehe ʻi he fakakaukaú. Ko ia ai, “naʻe leleiia a Jihova kia Ebeli mo ene feilaulau: Ka nae ikai te ne leleiia kia Keini mo ene feilaulau.” ʻOku ngalingali naʻe fakakaukau noaʻia pē ʻa Keini ki heʻene feilaulaú peá ne fai fakafatongia pē ʻa hono foaki iá. Ka naʻe ʻikai ke hōifua ʻa e ʻOtuá ʻi he lotu fakaeouaú pē. Naʻe fakatupu ʻe Keini ha loto kovi, pea naʻe ʻafioʻi ʻe Sihova naʻá ne maʻu ha ngaahi fakaueʻiloto hala. Ko e tali ʻa Keini ki hono talitekeʻi ʻa ʻene feilaulaú naʻe tapua atu ai ʻa ʻene fakakaukau totonú. ʻI he ʻikai ke feinga ke fakatonutonu ʻa e ngaahi meʻá, naʻe “ita aubito a Keini, bea kehe hono mata.” (Senesi 4:​5, PM) Naʻá ne fakahaaʻi ʻi heʻene tōʻongá ʻa e ngaahi fakakaukau mo e ngaahi taumuʻa fulikivanu.

Fakatokangá pea mo e Talí

ʻI hono ʻiloʻi ʻa e fakakaukau ʻa Keiní, naʻe faleʻi ia ʻe he ʻOtuá ʻo ne pehē: “Koeha oku ke ita ai? bea koeha oku kehe ai ho mata? Kabau te ke fai lelei, ikai e maʻu koe? bea ka ikai te ke fai lelei, oku [toitoi] i he mataba ae agahala. Bea e aganofo ia kiate koe, bea te ke bule kiate ia.”—Senesi 4:​6, 7, PM.

ʻOku ʻi ai ha lēsoni heni maʻatautolu. Ko hono moʻoní, ʻoku toitoi ʻa angahala ʻi he matapaá ʻo teuteu ke keina kitautolu. Neongo ia, kuo foaki mai ʻe he ʻOtuá kiate kitautolu ʻa e tauʻatāina ke fili, pea ʻe lava ke tau fili ke fai ʻa e meʻa ʻoku totonú. Naʻe fakaafeʻi ʻe Sihova ʻa Keini ke ne “fai lelei,” ka naʻe ʻikai te Ne fakamālohiʻi ia ke liliu. Naʻe fili ʻe Keini ʻa e founga pē ʻaʻana.

ʻOku hoko atu a e fakamatala fakamānavaʻí: “Hili iá naʻe tala ange ʻe Keini kia ʻĒpeli ko hono tehiná: ‘Ta ō ki he ngoué.’ Ko ia naʻe hoko ʻo pehē lolotonga ʻena ʻi he ngoué naʻe ʻohofi ai ʻe Keini ʻa ʻĒpeli ko hono tehiná ʻo ne tāmateʻi ia.” (Senesi 4:​8, NW) Naʻe hoko ai ʻa Keini ko ha tokotaha fakapō talangataʻa mo taʻefakaʻatuʻi. Naʻe ʻikai te ne fakahaaʻi naʻa mo ha kiʻi ongoʻi halaia ʻi hono ʻeke ange ʻe Sihova: “Kofaʻā ʻa Epeli ko ho tehina?” Ka, ʻi ha tōʻonga taʻekaungāongoʻi mo fiematamuʻa, naʻe tali ange ʻe Keini: “ʻOku ʻikai te te ʻilo: he ko e tauhi kita ʻo hoto tokoua?” (Senesi 4:9) Ko e loi fakahangatonu mo e fakaʻikaiʻi ko ia ʻa e tupu meiate iá naʻe fakaeʻa ai ʻa e taʻeongoʻi ʻa Keiní.

Naʻe fakamalaʻiaʻi ʻe Sihova ʻa Keini pea kapusi ia mei he ngaahi ʻātakai ʻo ʻĪtení. Ko e fakamalaʻia naʻe ʻosi fakahaaʻi ki he kelekelé ʻoku hā mahino naʻe toe fakahaaʻi lahi ange ia ʻi he tuʻunga ʻo Keiní, pea ʻe ʻikai ke fua lelei ʻa e kelekelé ʻi heʻene ngoueʻi iá. Naʻe pau ke ne hoko ko ha tokotaha hikihiki holo pea ko ha tokotaha hola takai holo ʻi he māmaní. Ko e lāunga ʻa Keini ʻi he fefeka ʻa  hono tauteá naʻe fakahaaʻi ai ʻene loto-moʻua naʻa sāuni kiate ia ʻa e fakapoongi ʻo hono tehiná, ka naʻe ʻikai te ne fakahaaʻi ha fakatomala moʻoni. Naʻe fokotuʻu ʻe Sihova “ha fakaʻilonga” kia Keini—ngalingali ko ha lao mamafa naʻe ʻiloʻi pea tauhi ʻe he niʻihi kehé pea naʻe fakataumuʻa ia ke taʻofi ʻa hono tāmateʻi ia ʻi ha sāuní.—Senesi 4:​10-15.

Ko Keini leva “naʻá ne ʻalu mei he ʻao ʻo Sihová ʻo ne nofo ʻi he fonua ʻo e Toitoiʻanga ʻi he hahake ʻo ʻĪtení.” (Senesi 4:​16, NW) ʻI hono ʻave hano uaifi mei he lotolotonga ʻo hono fanga tuofāfiné pe fanga ʻilamutú, naʻá ne langa ha kolo ʻa ia naʻá ne fakahingoa kia ʻĪnoke, ko hono foha naʻe ʻuluaki fakatupú. Ko e hako ʻo Keini ko Lēmekí naʻá ne hoko ʻo hehema fakamālohi tatau pē mo ʻene kui fakaʻotuamaté. Ka ko e laine fakafāmili ʻo Keiní naʻe tafiʻi ia ʻi he Lōmaki ʻo e ʻaho ʻo Noá.​—Senesi 4:​17-​24.

Ngaahi Lēsoni Maʻatautolu

ʻOku lava ke tau ako mei he ngaahi fakamatala ʻo fekauʻaki mo Keini pea mo ʻĒpelí. ʻOku enginaki ʻa e ʻapositolo ko Sioné ki he kau Kalisitiané ke nau feʻofaʻaki, ʻo “ikai ke hage ko Keini, nae oe toko taha kovi, bea naa ne tamateʻi hono tokoua.” Ko Keini “nae kovi ene gaahi gaue aana, bea maonioni ae gaahi gaue a hono tokoua.” ʻOku toe pehē ʻe Sione: “Ko ia kotoabe oku fehia ki hono tokoua, koe fakabo ia: bea oku mou ilo oku ikai ha fakabo e iate ia ae moui taegata.” ʻIo, ko e founga ʻo ʻetau tōʻonga ki hotau kaungā Kalisitiané ʻoku ʻi ai hono kaunga ki hotau vahaʻangatae mo e ʻOtuá pea mo ʻetau ngaahi ʻamanaki ki he kahaʻú. ʻE ʻikai lava ke tau fehiʻa ki ha taha ʻo hotau kaungātuí pea kei maʻu ʻa e hōifua ʻa e ʻOtuá.​—1 Sione 3:​11-​15, PM; 1 Sione 4:​20.

Kuo pau pē naʻe ʻohake ʻi ha tuʻunga meimei tatau ʻa Keini mo ʻĒpeli, ka naʻe ʻikai ke tui ʻa Keini ia ki he ʻOtuá. Ko hono moʻoní, naʻá ne fakahaaʻi ʻa e laumālie ʻo e Tēvoló, ʻa e muʻaki ‘tamate-tangata mo e tamai ʻa e loí.’ (Sione 8:​44) ʻOku fakahaaʻi ʻe he ʻalunga ʻo Keiní ʻoku tau maʻu kotoa ha fili ke fai, ko e faʻahinga ko ia ʻoku fili ke angahalá ʻoku nau fakamavaheʻi kinautolu mei he ʻOtuá, pea ʻoku fakahoko ʻe Sihova ʻa ʻene ngaahi fakamaau ki he faʻahinga taʻefakatomalá.

Ko ʻĒpeli, ʻi he tafaʻaki ʻe tahá, naʻá ne ngāueʻi ʻa e tui kia Sihová. Ko e moʻoni, “ko tui naʻe ʻatu [ai] ki he ʻOtua ʻe Epeli ha feilaulau, ʻo lelei hake ʻi haʻa Keini; ʻio, ko ia ia naʻe fakamoʻoni ai maʻana ʻoku ne maʻoniʻoni he naʻe fakamoʻoni ʻe he ʻOtua ʻi he funga ʻo e ngaahi meʻa naʻa ne ʻomi.” Neongo ʻoku ʻikai ʻi he ngaahi Konga Tohitapú ha foʻi lea ʻe taha naʻe leaʻaki ʻe ʻĒpeli, ʻokú ne “kei lea” pē, fakafou ʻi heʻene tui alafaʻifaʻitakiʻangá.—Hepelu 11:4.

Ko ʻĒpeli naʻe ʻuluaki ʻi ha laine lōloa ʻo e kau tauhi anga-tonú. Ko hono totó, ʻa ia naʻe ‘tangi kia Sihova mei he kelekelé,’ naʻe ʻikai ke fakangaloʻi. (Senesi 4:10; Luke 11:​48-51) Kapau ʻoku tau ngāueʻi ʻa e tuí ʻo hangē ko ia naʻe fai ʻe ʻĒpelí, ʻe lava ke tau fiefia mo kitautolu foki ʻi ha vahaʻangatae mahuʻinga mo tuʻuloa pea mo Sihova.

[Puha ʻi he peesi 22]

KO E FAʻÁ PEA MO E TAUHI-SIPÍ

Ko hono ngoueʻi ʻo e kelekelé mo tokangaʻi ʻa e fanga manú ʻa e niʻihi ʻo e muʻaki ngaahi fatongia naʻe ʻoange ʻe he ʻOtuá kia ʻĀtamá. (Senesi 1:​28; 2:​15; 3:​23) Ko hono foha ko Keiní naʻá ne fai ʻa e ngoué, pea naʻe hoko ʻa ʻĒpeli ko ha tauhi-sipi. (Senesi 4:2) Koeʻuhi ko e meʻakai ʻa e faʻahinga ʻo e tangatá naʻe faʻu ʻataʻatā pē mei he ngaahi fuaʻiʻakaú pea mo e vesitapoló tuku kehe ʻi he hili ʻa e Lōmakí, ʻi he tafaʻaki ʻe tahá, ko e hā naʻe tauhi hake ai ʻa e fanga sipí?​—Senesi 1:​29; 9:​3, 4.

Koeʻuhi ke nau tupu ʻo tokolahi, naʻe fiemaʻu ki he fanga sipí ʻa e tokangaʻi fakaetangatá. Ko e ngāue ʻa ʻĒpelí ʻoku fakamoʻoniʻi ai naʻe tauhi hake ʻe he tangatá ʻa e fanga manu lalata ko ení mei he kamataʻanga pē ʻo e hisitōlia ʻo e faʻahinga ʻo e tangatá. ʻOku ʻikai ke tala ʻe he ngaahi Konga Tohitapú pe naʻe ngāueʻaki ʻe he fuofua faʻahinga ʻo e tangatá ʻa e huʻakau ʻo e fanga manú ko ha meʻakai tefito ia, ka naʻa mo e faʻahinga ʻoku nau kai vesitapolo ʻataʻataá ʻe lava ke nau ngāueʻaki ʻa e fulufuluʻi sipí. Pea ʻi he taimi ʻoku mate ai ʻa e fanga sipí, ʻoku ngāueʻaki honau kilí ki he ngaahi taumuʻa ʻaonga. Hangē ko ení, ke fakavalaʻi ʻa ʻĀtama mo ʻIvi, naʻe tokonaki mai ʻe Sihova ʻa e “ngaahi kofu kiliʻimanu.”—Senesi 3:21.

ʻI ha tuʻunga pē, ʻoku hā ngali ʻuhinga lelei ke pehē naʻe muʻaki ngāue fāitaha ʻa Keini mo ʻĒpeli ʻiate kinaua. Naʻá na fakatupu ha meʻa naʻe fiemaʻu ʻe he niʻihi kehe ʻi he fāmilí koeʻuhi ke hanganaki fakavalaʻi mo fafangaʻi lelei ʻaki kinautolu.

[Fakatātā ʻi he peesi 23]

Ko Keini “nae kovi ene gaahi gaue aana, bea maonioni ae gaahi gaue a hono tokoua”