Ako ha Lēsoni Meia Nikotīmasi

“KABAU e muimui ha taha kiate au, tuku ke jiaki ia eia, bea too hake ene akau māfajia i he aho kotoabe, bea muimui iate au.” (Luke 9:​23, PM) Ko e kau toutai anga-fakatōkilaló pea mo ha tokotaha tānaki tukuhau fehiʻanekina naʻa nau tali loto-lelei ʻa e fakaafe ko iá. Naʻa nau liʻaki ʻa e meʻa kotoa koeʻuhi ke muimui ʻia Sīsū.—Mātiu 4:​18-22; Luke 5:​27, 28.

Ko e ui ʻa Sīsuú ʻoku kei ongona he ʻahó ni, pea kuo tali ia ʻe he tokolahi. Kae kehe, ko e niʻihi ʻoku nau fiefia ʻi hono ako ʻa e Tohitapú mo e Kau Fakamoʻoni ʻa Sihová ʻoku nau toumoua ke ‘jiaki kinautolu, bea too hake enau akau māfajiá.’ ʻOku ʻikai te nau loto-lelei ke tali ʻa e fatongia mo e monū ʻo e hoko ko e kau ākonga ʻa Sīsuú.

Ko e hā ʻoku fakatoupīkoi ai ʻa e niʻihi mei hono tali ʻa e fakaafe ʻa Sīsuú pea fakatapui kinautolu kia Sihova ko e ʻOtuá? ʻOku moʻoni, ko e faʻahinga naʻe ʻikai ke  ʻohake mo e fakakaukau faka-Kalisitiane Siu ʻo e tui-tahaʻi-ʻOtuá ʻe fiemaʻu nai kiate kinautolu ha taimi lahi ki muʻa ke nau hoko ʻo maʻu ha houngaʻia kakato ki he ʻi ai ʻo ha Tokotaha-Fakatupu māfimafi-aoniu fakafoʻituituí. Neongo ia, naʻa mo e hili ʻa ʻenau hoko ʻo tuipau ko e tokotaha moʻoni ʻa e ʻOtuá, ʻoku holomui ʻa e niʻihi mei he muimui ʻi he topuvaʻe ʻo Sīsuú. ʻOku nau manavahē nai ki he meʻa ʻe fakakaukau atu ki ai ʻa honau ngaahi kāingá mo e kaumeʻá ʻo fekauʻaki mo kinautolú kapau te nau hoko ko e Kau Fakamoʻoni ʻa Sihova. Ko e niʻihi, ʻa ia ʻoku mole meiate kinautolu ʻa e fakavavevave ʻo e taimi ʻoku tau moʻui aí, ʻoku nau hanga ki he tuli ke ongoongoa mo tuʻumālié. (Mātiu 24:​36-42; 1 Timote 6:​9, 10) Pe ko e hā pē nai ʻa e tuʻungá, ki he faʻahinga ʻoku hanganaki tautoloi ʻenau fili ke hoko ko ha kau muimui ʻo Sīsuú, ʻoku ʻi ai ha lēsoni ke ako mei he fakamatala kia Nikotīmasi, ko ha pule Siu koloaʻia ʻi he ʻaho ʻo Sīsuú.

Tāpuakiʻi ʻAki ʻa e Ngaahi Faingamālie Fakaofo

ʻI he māhina pē nai ʻe ono mei he kamata ʻe Sīsū ʻene ngāue fakafaifekau ʻi he māmaní, ʻoku ʻilo ʻe Nikotīmasi ko Sīsū ʻi hono tuʻunga ko ha faiakó ‘kuo hoko mai mei he ʻOtuá.’ ʻI he maongo ʻa e ngaahi mana naʻe toki fakahoko ʻe Sīsū ʻi Selusalema ʻi he Pāsova ʻo e 30 T.S., ʻoku haʻu ʻa Nikotīmasi, ʻi he poʻulí, ke fakahā ʻene tui kia Sīsuú pea ke ako lahi ange ʻo fekauʻaki mo e faiakó ni. ʻI he ʻuhinga ko iá, ʻoku tala ʻe Sīsū kia Nikotīmasi ha foʻi moʻoni loloto ʻo fekauʻaki mo e fiemaʻu ke “fanauʻi foʻou” kae lava ke hū ki he Puleʻanga ʻo e ʻOtuá. ʻI he taimi ko ení, ʻoku toe leaʻaki ʻe Sīsū ʻa e ngaahi leá ni: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa  ʻauha, kae maʻu ʻa e moʻui taʻengata.”—Sione 3:​1-16.

Ko ha ʻamanaki fakaofo ē ʻoku hanga mai kia Nikotīmasí! ʻE hoko nai ko ha kaungāfeohi vāofi ʻo Sīsū, ʻo malava ke mamata tonu ʻi he ngaahi tafaʻaki kehekehe ʻo e moʻui ʻa Sīsū ʻi he māmaní. ʻI he tuʻunga ko ha pule ʻo e kau Siú mo ha faiako ʻi ʻIsileli, ʻoku ʻilo moʻoni ʻa Nikotīmasi ki he Folofola ʻa e ʻOtuá. ʻOku toe lahi foki ʻa ʻene vavangá, ʻo tala ia mei heʻene fakahaaʻi ʻa Sīsū ko ha faiako kuo fekau mai ʻe he ʻOtuá. ʻOku mahuʻingaʻia ʻa Nikotīmasi ʻi he ngaahi meʻa fakalaumālié, pea ʻoku mātuʻaki anga-fakatōkilalo. He faingataʻa ē kuo pau ki ha mēmipa ʻo e fakamaauʻanga māʻolunga taha ʻo e kau Siú ke ne tali ha foha ʻo ha tufunga māʻulalo ko ha tangata kuo fekau mai ʻe he ʻOtuá! Ko e kotoa ʻo e ngaahi fua ko iá ʻoku mahuʻinga lahi ia ki ha tokotaha ke hoko ko ha ākonga ʻa Sīsū.

Ko e mahuʻingaʻia ʻa Nikotīmasi ʻi he tangata ko eni mei Nasaletí ʻoku ʻikai ngali ke hōloa. ʻI he taʻu ʻe ua mo e konga ki mui ai, ʻi he Kātoanga Falelouʻakaú, ʻoku maʻu ai ʻe Nikotīmasi ha fakataha ʻa e Sanetalimí. ʻI he taimi ko ení, ʻoku kei hoko ʻa Nikotīmasi ko e “toko taha foki ia iate kinautolu.” ʻOku fekau atu ʻe he houʻeiki taulaʻeikí mo e kau Fālesí ha kau ʻōfisa ke puke ʻa Sīsū. ʻOku foki mai ʻa e kau ʻōfisá ʻo līpooti: “Teʻeki ha tangata ʻe lea hange ko ia.” ʻOku kamata ke paetaku kinautolu ʻe he kau Fālesí: “Kuo taki hē mo kimoutolu foki, ʻo? Hono ai ha taha ʻi he houʻeiki kuo tui kiate ia, pe ha taha ʻo e kau Fālesi? Kā ko lāuvale na taeʻilo ki he Lao, ko e koto malaʻia kinautolu.” ʻOku ʻikai kei lava ʻe Nikotīmasi ke mataʻotaʻofi ia. ʻOkú ne lea hake: “He ko e anga o ʻetau lao ke fakamāu ha tangata, ʻi he teʻeki ke fanongo ki haʻane fakamatala, pe mahino ʻa e meʻa kuo ne fai?” ʻOkú ne hoko leva ai, ʻa ia tonu ko e tāketi ʻo e fakaangá mei he kau Fālesi kehé: “He ko e Kāleli foki mo koe? Hakule muʻa ʻo ʻilo, ʻoku ʻikai ha palofita ʻe tupu mei Kāleli.”—Sione 7:​1, 10, 32, 45-52.

ʻI ha māhina ʻe ono ki mui ai, ʻi he ʻAho Pāsova ʻo e 33 T.S., ʻoku vakai ai ʻa Nikotīmasi ki he sino ʻo Sīsuú ʻi hono ʻohifo mei he ʻakau fakamamahí. ʻOkú ne kau fakataha mo Siosefa mei ʻAlemateá, ko ha mēmipa ʻe taha ʻo e Sanetalimí, ʻi hono teuteuʻi ʻa e sino ʻo Sīsuú ke tanú. Ki he taumuʻa ko iá, ʻoku ʻomai ai ʻe Nikotīmasi “ha koto mula mo e ʻalosi” ko e pāuni nai ʻe 100 hono mamafá ʻi he lau pāuni faka-Lomá, ko e tatau ia ʻo e pāuni ʻe 72 ʻi he lau pāuni ʻa Pilitāniá. ʻOkú ne  fakahaaʻi mai ha fuʻu totongi lahi. ʻOku toe fiemaʻu ʻa e loto-toʻa kiate ia ke fekuki ai mo hono fakakalasi fakataha ia mo e “siana kākā ko ena,” ʻo hangē ko ia ʻoku uiʻaki ʻe hono kaungā Fālesí ʻa Sīsuú. ʻI hono teuteu fakavave ʻa e sino ʻo Sīsuú ke tanú, ʻoku tuku ʻe he toko ua ko ʻení ʻa Sīsū ʻi ha fonualoto foʻou ofi mai pē. Kae kehe, naʻa mo e mōmeniti ko ení, ʻoku teʻeki ai ke fakapapauʻi ʻa Nikotīmasi ia ko ha ākonga ʻa Sīsū!—Sione 19:​38-42; Mātiu 27:63; Maake 15:43.

ʻUhinga Naʻe ʻIkai Te Ne Fai Ai ha Meʻá

Ko e ʻuhinga ʻo e holomui ʻa Nikotīmasi mei hono ‘too hake ene akau māfajiá’ pea muimui ʻia Sīsuú, naʻe ʻikai ke fakahaaʻi ia ʻe Sione ʻi heʻene fakamatalá. Kae kehe, naʻá ne tuku mai ha ngaahi fakamoʻoni te ne fakamatalaʻi nai ʻa e lotolotoua ʻa e Fālesí ni.

Ko e ʻuluakí, naʻe fakahaaʻi ʻe Sione ko e pule Siú ni naʻe “haʻu poʻuli kia [Sīsū].” (Sione 3:2) ʻOku fokotuʻu mai ʻe ha mataotao Tohitapu ʻe taha: “Naʻe haʻu ʻa Nikotīmasi ʻi he poʻulí, ʻo ʻikai ʻi heʻene manavahē, ka ke hao mei he fuʻu kakai te nau fakahohaʻasi ʻa ʻene fetalanoaʻaki mo Sīsuú.” Kae kehe, naʻe lave ʻa Sione kia Nikotīmasi ko e tangata “nae fuofua haʻu kia Jisu i he bouli” ʻi he potutohi tatau pē naʻá ne lave ai kia Siosefa mei ʻAlemateá ko ha “akoga ia a Jisu, kae fakalilolilo be, ko ene manavahe ki he kakai Jiu.” (Sione 19:​38, 39, PM) Ko ia ai, ʻoku hangehangē naʻe haʻu ʻa Nikotīmasi kia Sīsū ʻi he poʻulí koeʻuhi ko ʻene “manavahē ki haʻa Siū,” ʻo hangē tofu pē ko e manavahē ʻa e niʻihi ʻi hono ʻahó ke ʻi ai haʻanau kaunga kia Sīsuú.—Sione 7:13.

Kuó ke toloi ʻa e fili ke hoko ko e taha ʻo e kau ākonga ʻa Sīsuú koeʻuhi ko e meʻa ʻe lea ʻaki nai ʻe ho ngaahi kāingá, kaumeʻá pe kaungāfeohí? “Ko e ilifia ki ha tangata, ʻoku te moʻua ai ʻi ha tauhele,” ko e lau ia ʻa ha palōveepi. ʻE lava fēfē ke ke fekuki mo e manavahē ko iá? ʻOku hoko atu ʻe he palōvēpí: “Ka ko ia ʻoku tuʻu ʻene falala kia Sihova, ʻe maluʻi.” (Palovepi 29:25) Koeʻuhi ke langa hake ʻa e falala ko iá ʻia Sihova, ʻoku fiemaʻu ke ke ʻiloʻi tonu ʻe poupouʻi koe ʻe he ʻOtuá ʻi he taimi ʻokú ke faingataʻaʻia lahi aí. Lotu kia Sihova pea kole kiate ia ke ne ʻoatu kiate koe ʻa e loto-toʻa ke ke fai ai naʻa mo e ngaahi fili iiki ʻo fekauʻaki mo hoʻo lotú. ʻE faai atu pē, ko hoʻo tui mo e falala kia Sihová ʻe aʻu ia ki he tuʻunga ʻe lava ai ke ke fai ʻa e ngaahi fili lalahi ʻoku fehoanaki mo e finangalo ʻo e ʻOtuá.

Ko e tuʻunga mo e ngeia ʻo Nikotīmasi ʻi hono tuʻunga ko ha mēmipa ʻo e kalasi pulé naʻá ne toe taʻofi nai ia mei he fou ʻi he sitepu mahuʻinga ʻo hono siʻaki tonu iá. ʻI he taimi ko iá, kuo pau pē naʻá ne kei pipiki mālohi ki hono tuʻunga ko ha mēmipa ʻo e Sanetalimí. ʻOkú ke toumoua ke fai ha ngāue ke hoko ko e muimui ʻo Kalaisí koeʻuhi ʻe mole nai meiate koe ha tuʻunga ngeia ʻi he sōsaietí pe pau nai ke ke feilaulauʻi ha ngaahi ʻamanaki pau ki he laka ki muʻá? ʻOku ʻikai ha taha ʻo e ngaahi meʻá ni ʻe lava ke fakahoa atu ki he monū ʻo e malava ke tauhi ʻa e Fungani Māʻolunga ʻo e ʻunivēsí, ʻa ia ʻokú ne loto-lelei ke fakaai ʻa e ngaahi kole ʻokú ke fai ʻo fehoanaki mo hono finangaló.—Sāme 10:17; 83:18; 145:18.

Ko e toe ʻuhinga nai ʻe taha ki he tautoloi ʻa Nikotīmasí naʻe fekauʻaki nai ia mo ʻene ngaahi koloá. ʻI he tuʻunga ko ha Fālesí, naʻe tākiekina nai ia ʻe he niʻihi kehé, “ʻa ia ko e faʻahinga ʻofa ki he paʻanga.” (Luke 16:14) Ko e moʻoniʻi meʻa ko ia ʻo e malava ke ne maʻu ha mula mo ha ʻālosí ʻoku fakamoʻoniʻi ai ʻa ʻene koloaʻiá. ʻOku hanganaki toloi ʻe he niʻihi ʻi he ʻahó ni ʻa e fili ke fua ʻa e ngaahi fatongia ʻo ha Kalisitiane koeʻuhi ko ʻenau loto-moʻua ki heʻenau ngaahi koloa fakamatelié. Kae kehe, naʻe enginaki ʻa Sīsū ki hono kau muimuí: “ʻOua naʻa mou lotomoʻua koeʻuhi ko hoʻomou moʻui, ha meʻa te mou kai pe ha meʻa te mou inu; ʻumaʻā homou sino, ki ha meʻa te mou ʻai ki ai. . . . ʻoku meaʻi ʻe hoʻomou Tamai Fakalangi ʻoku tāu mo kimoutolu ʻa e ngāhi meʻa ko ia kotoa. Ka mou kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.”—Mātiu 6:​25-33.

Naʻe Lahi ʻa e Meʻa Naʻá Ne Tō mei Aí

ʻOku mahuʻingá, he ko e fakamatala kia Nikotīmasí ʻa ia ko e Kōsipeli pē ʻa Sioné ʻoku hā aí, ʻoku ʻikai ʻasi ia ai pe naʻe faifai peá ne hoko ko ha tokotaha muimui ʻo Sīsū pe ʻikai. Fakatatau ki ha talatukufakaholo ʻe taha, naʻe tuʻu ʻa Nikotīmasi maʻa Sīsū, papitaiso, hoko ko e tāketi ʻo e fakatanga ʻa e kau Siú, toʻo ia mei hono lakangá,  pea naʻe faifai pē ʻo kapusi ia mei Selusalema. Pe ko e hā ʻa e tuʻungá, ko e meʻa ʻe taha ʻoku fakapapauʻí: Naʻe lahi ʻa e meʻa naʻá ne tō mei ai ʻi heʻene tautoloi lolotonga ʻa e ʻi māmani ʻa Sīsuú.

Kapau naʻe kamata muimui ʻa Nikotīmasi ʻia Sīsū ʻi he taimi ʻo ʻene fuofua fetaulaki pē mo e ʻEikí, naʻá ne mei hoko ko ha ākonga fekoekoeʻi ʻa Sīsū. ʻAki ʻa e ʻilo, vavanga, anga-fakatōkilalo mo e tokanga ʻa Nikotīmasi ki he ngaahi fiemaʻu fakalaumālié, naʻá ne mei malava ke hoko ai ko ha ākonga tuʻu-ki-muʻa. ʻIo, naʻe mei malava ke ne fanongo ʻi he ngaahi lea fakaofo ʻa e Faiako Lahí, ako ʻa e ngaahi lēsoni mātuʻaki mahuʻinga mei he ngaahi talanoa fakatātā ʻa Sīsuú, mamata ʻi he ngaahi mana fakaofo naʻe fakahoko ʻe Sīsuú pea maʻu ʻa e mālohi mei he enginaki fakaʻosi ʻa Sīsū ki heʻene kau ʻapositoló. Ka naʻá ne tō mei he ngaahi meʻa kotoa ko iá.

Ko e lotolotoua ʻa Nikotīmasí naʻe ʻuhinga ia ko ha mole lahi ʻi heʻene tafaʻakí. Naʻe kau ai ʻa e fakaafe loto-māfana ʻa Sīsū: “Haʻu kiate au, ʻa kimoutolu kotoa pē ʻoku ongosia mo mafasiá, pea te u fakaivifoʻou kimoutolu. ʻAi ʻeku ʻioké kiate kimoutolu pea mou ako meiate au, he ʻoku ou anga-mokomoko mo loto-fakatōkilalo, pea te mou ʻilo ha fakaivifoʻou ʻi homou soulú. He ko e ʻioke ʻaʻakú ʻoku anga-ʻofa pea ko e kavenga ʻaʻakú ʻoku maʻamaʻa.” (Mātiu 11:​28-30, NW) Naʻe tō ʻa Nikotīmasi mei he faingamālie ke ne hokosia moʻoni ʻa e fakaivifoʻou ko ení meia Sīsū tonu!

Fēfē Koe?

Talu mei he 1914, kuo ʻi ai ʻa Sīsū Kalaisi ʻi hēvani ko e Tuʻi ʻo e Puleʻanga fakahēvani ʻo e ʻOtuá. ʻI he tomuʻa tala ʻa e meʻa ʻe hoko lolotonga ʻa ʻene ʻi aí, naʻá ne lea ʻi he lotolotonga ʻo e ngaahi meʻa kehé: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” (Mātiu 24:14) Ki muʻa ke hoko mai ʻa e ngataʻangá, ko e ngāue fakamalanga fakaemāmani lahi ko iá kuo pau ke fakahoko. ʻOku fiefia ʻa Sīsū Kalaisi ʻi he hoko ʻo kau ai ʻa e faʻahinga taʻehaohaoa ʻo e tangatá. ʻOkú ke kau nai mo koe foki ʻi he ngāué ni.

Naʻe ʻilo ʻe Nikotīmasi naʻe hoko mai ʻa Sīsū mei he ʻOtuá. (Sione 3:2) Mei hono ako ʻa e Tohitapú, te ke maʻu nai ha fakamulituku tatau. Kuó ke fai nai ʻa e ngaahi liliu ʻi hoʻo founga moʻuí ke fehoanaki mo e ngaahi tuʻunga faka-Tohitapú. ʻOkú ke aʻu nai ʻo maʻu ʻa e ngaahi fakataha ʻa e Kau Fakamoʻoni ʻa Sihová ke maʻu ai ʻa e ʻilo lahi ange ki he Tohitapú. ʻOku fakaongoongoleleiʻi koe ʻi he ngaahi feinga ko iá. Kae kehe, naʻe fiemaʻu kia Nikotīmasi ke fakalaka atu mei hono fakahaaʻi pē ʻa e houngaʻia kia Sīsū ko e tokotaha naʻe fekau mai ʻe he ʻOtuá. Naʻe fiemaʻu ke ne “jiaki ia eia, bea too hake ene akau māfajia i he aho kotoabe, bea muimui ia [Sīsū].”—Luke 9:​23, PM.

ʻAi ke maongo ki hotau lotó ʻa e meʻa naʻe fakahā mai ʻe he ʻapositolo ko Paulá kiate kitautolú. Naʻá ne tohi: “Kaeʻumaʻā ʻi heʻemau kaungāngaue mo ia ʻoku mau enginaki foki ke ʻoua naʻa ʻiku hoʻomou tali ʻa e kelesi ʻa e ʻOtua ko e laufanō. He ʻoku ne folofola, Ko e taimi tali hu ne u ongoʻi ai koe, ko e ʻaho fai fakamoʻui ne u tokoni ai koe. Vakai mai. Ko eni pe taimi matuʻaki tali hu; vakai mai, Ko eni pe ʻaho fai fakamoʻui.”—2 Kolinito 6:​1, 2.

Ko e taimi eni ke fakatupulekina ai ʻa e tui ʻokú ne ueʻi koe ke ke fai ha ngāué. Ke aʻusia iá, fakalaulauloto ki he ngaahi meʻa ʻokú ke ako ʻi he Tohitapú. Lotu kia Sihova ʻo kole kiate ia ha tokoni ke ke fakahāhā ai ʻa e tui ko iá. ʻI hoʻo hokosia ʻa ʻene poupoú, ko hoʻo houngaʻia mo e ʻofa kiate iá te ne ueʻi koe ke ke loto ke ‘jiaki koe, bea too hake hoʻo akau māfajiá i he aho kotoabe, bea muimui ia Sīsū Kalaisi.’ Te ke fai ha meʻa he taimí ni?

[Fakatātā ʻi he peesi 9]

ʻI he ʻuluaki taimí, naʻe tuʻu loto-toʻa ʻa Nikotīmasi maʻa Sīsū

[Fakatātā ʻi he peesi 9]

Neongo ʻa e fakafepakí, naʻe tokoni ʻa Nikotīmasi ke teuteuʻi ʻa e sino ʻo Sīsuú ki hono tanú

[Fakatātā ʻi he peesi 10]

Ko e ako fakafoʻituituí mo e lotú ʻe lava ke ne fakaivimālohiʻi koe ke ke fai ha ngāue

[Fakatātā ʻi he peesi 10]

Te ke tali ʻa e monū ʻo e ngāue ʻi he malumalu ʻo e tuʻunga taki ʻo Sīsū Kalaisí?