Fakapotopoto ʻi Heʻenau Founga Pē ʻAnautolu

“ʻOKU maʻu ʻe he kakai lalahí ʻa e potó, ka ʻoku fakapotopoto ʻa e fānaú ʻi he founga pē ʻanautolu,” ko e lau ia ʻa ha palōveepi Naisīlia. Ko Edwin, ʻa ia ko ha mātuʻa Kalisitiane ʻi Naisīlia, naʻá ne ʻiloʻi ʻa e moʻoni ʻo e meʻá ni.

ʻI he ʻaho ʻe taha, naʻe ʻilo ai ʻe Edwin ha puha mētale ʻi hono lalo tesí ʻi ʻapi.

“Ko e puha eni ʻa hai?” ko e ʻeke ia ʻe Edwin ki heʻene fānau ʻe toko tolú.

“Ko e puha ʻaʻaku,” ko e tali ia ʻa e taʻu valu ko Emmanuel. Naʻá ne tānaki fakavave mai ki ai ko e puha ukamea ʻumeʻumea, senitimita ʻe 12 tapafā ko eni mo ha foʻi ava ʻi ʻolungá naʻe ʻai ia ki he ngaahi tokoni ki he ngāue ʻi māmani lahi ʻa e Kau Fakamoʻoni ʻa Sihová. “Koeʻuhi ʻoku ʻikai te u ʻalu ʻi he ʻaho kotoa pē ki he Fale Fakatahaʻangá,” ko ʻene fakamatalá ia, “naʻá ku fakakaukau ai ke faʻu ha puha koeʻuhi ko e taimi pē ʻoku ʻikai ai te u ngāueʻaki ʻa ʻeku paʻanga kaí, ʻe lava ke u faʻo ia ki he puhá.”

Naʻe ʻi ai ha puha ʻi ʻapi ʻa e tamai ʻa Emmanuel ki hono tānaki ha paʻanga ke ne maʻu ʻa e fakataha-lahi fakavahe fakataʻú. Ka koeʻuhi ko ha fiemaʻu fakavavevave ʻa e fāmilí, naʻa nau ngāueʻaki ai ʻa e paʻanga ʻi aí. Ke fakapapauʻi ko ʻene paʻanga tokoní ʻe ʻikai ke ngāueʻaki ia ki ha toe taumuʻa kehe, naʻe ʻave ai ʻe Emmanuel ha kiʻi kapa motuʻa ki ha tokotaha kasa ke ne silaʻi. Ko e tokotaha kasá, ʻi heʻene ʻiloʻi ʻa e taumuʻa ʻo e kapá, naʻá ne faʻu ha puha maʻa Emmanuel mei he ngaahi toetoenga mētalé. Ko Michael, ʻa e tehina taʻu nima ʻo Emmanuel, naʻá ne toe kole mo ia ki ha puha.

ʻI he ofo he meʻa naʻe fai ʻe he ongo tamaikí, naʻe ʻeke ange ʻe Edwin ʻa e ʻuhinga naʻá na ʻai ai ke faʻu ʻa e ongo puhá. Naʻe tali ange ʻe Michael: “ʻOku ou loto ke tokoni!”

ʻI he ʻikai ke ʻiloʻi ʻe heʻenau ongo mātuʻá, ko Emmanuel, Michael mo Uchei, ko hona tuofefine taʻu hivá, naʻa nau tānaki ʻa e konga ʻo ʻenau paʻanga kai hoʻataá ʻo faʻo ia ʻi he ongo puhá. Naʻa nau maʻu mei fē ʻa e fakakaukaú ni? ʻI he lahi feʻunga pē ʻa e fānaú ke nau pukepuke ʻi honau nimá ʻa e paʻangá, naʻe akoʻi kinautolu ʻe heʻenau ongo mātuʻá ke lī ha paʻanga ki he puha tokoni ʻi he Fale Fakatahaʻangá. ʻOku hā mahino, naʻe ngāueʻaki moʻoni ʻe he fānaú ʻa e meʻa kuo nau akó.

ʻI heʻene fonu ʻa e ongo puhá, naʻe hifi ia ʻo fakaava. Ko e fakakātoa ʻo e tātānakí ko e $3.13 (U.S.)​—ʻoku ʻikai ko ha paʻanga siʻisiʻi ia ʻi ha fonua ʻa ia ko e fakaʻavalisi ʻo ʻenau paʻanga hū mai fakataʻú ʻoku laui teau siʻi pē. Ko e tokoni loto-fiefoaki peheé ʻokú ne poupouʻi ʻa e ngāue fakamalanga ʻa e Kau Fakamoʻoni ʻa Sihová ʻa ia ʻoku fai he taimí ni ʻi he ngaahi fonua ʻe 235 ʻi māmani lahi.