Ko e Fekuki mo “ha Tolounua ʻi he Kakanó”

“Ko ʻeku ʻofa maʻataʻataá ʻoku feʻungaʻānoa ia kiate koe.”​—2 KOLINITO 12:​9, NW.

1, 2. (a) Ko e hā ʻoku ʻikai totonu ai ke tau puputuʻu neongo ʻa e moʻoniʻi meʻa ko ia ʻo ʻetau fehangahangai mo e ngaahi ʻahiʻahí pea mo e ngaahi palopalemá? (e) Ko e hā ʻoku malava ai ke tau loto-falala neongo ʻa e ngaahi ʻahiʻahí?

 “KO KINAUTOLU kotoabe oku loto ke moui aga faka-Otua kia Kalaisi Jisu, te nau ilo ae fakataga.” (2 Timote 3:​12, PM) Ko e hā ʻoku pehē aí? Koeʻuhi ʻoku taukaveʻi ʻe Sētane ʻoku tauhi pē ʻa e tangatá ki he ʻOtuá ʻi he ngaahi ʻuhinga siokita, pea ʻokú ne holiholivale ke fakamoʻoniʻi ʻene poiní. Naʻe tuʻo taha ʻa e fakatokanga ʻa Sīsū ki heʻene kau ʻapositolo loto-tōnungá: “Kuo tala [“fiemaʻu,” NW] kimoutolu ʻe Setane, ke ne sivi kimoutolu ʻo hange ko e uite.” (Luke 22:31) Naʻe ʻilo lelei ʻe Sīsū ʻoku fakaʻatā ʻe he ʻOtuá ʻa Sētane ke ne ʻahiʻahiʻi kitautolu fakafou ʻi he ngaahi palopalema fakamamahi lahi. Ko e moʻoni, ʻoku ʻikai ʻuhinga ia ko e faingataʻa kotoa pē ʻoku tau fehangahangai mo ia ʻi he moʻuí ʻoku tupu fakahangatonu ia meia Sētane pe ko ʻene kau tēmenioó. (Koheleti 9:11) Ka ʻoku vēkeveke ʻa Sētane ke ngāueʻaki ha faʻahinga founga pē ʻi hono mālohí ke maumauʻi ʻaki ʻetau anga-tonú.

² ʻOku tala mai ʻe he Tohitapú kiate kitautolu ʻoku totonu ke ʻoua te tau hoko ʻo puputuʻu ʻi hotau ngaahi ʻahiʻahí. Ko e hā pē ha meʻa ʻoku tō mai kiate kitautolu, ʻoku ʻikai ke ngalikehe ia pe taʻeʻamanekina. (1 Pita 4:12) Ko hono moʻoní, “ko e ngaahi meʻa tatau pē ʻi he founga ʻo e ngaahi mamahí ʻoku hoko ki he feohiʻanga fakakātoa ʻo [hotau] fanga tokoua ʻi he māmaní.” (1 Pita 5:​9, NW) ʻI he ʻahó ni, ʻoku ʻai ʻe Sētane ha tenge lahi fakaʻulia ki he sevāniti kotoa pē ʻa e ʻOtuá. ʻOku fiefia ʻa e Tēvoló ke sio ʻoku fakamamahiʻi kitautolu ʻaki ʻa e ngaahi palopalema hangē ha tolounuá ʻi he lahi taha ʻe malavá. Ke fakahoko iá, ʻokú ne ngāueʻaki ʻa e ngaahi meʻa ʻo ʻene fokotuʻutuʻú ʻi ha founga ʻoku ngalingali ʻe tānaki mai ai pe fakalahi ha ‘ngaahi tolounua pē ʻi hotau kakanó.’ (2 Kolinito 12:​7, NW) Ka neongo ia, ʻoku ʻikai fiemaʻu ke maumauʻi ʻe he ngaahi ʻoho ʻa Sētané ʻetau anga-tonú. Hangē tofu pē ko hono hanga ʻe Sihova ʻo ‘ngaohi ha haoʻanga’ kiate kitautolu ke tau kātakiʻi ai ʻa e fakatauelé, te ne fai ʻa e meʻa tatau ʻi he taimi ʻoku tau fehangahangai ai mo e ngaahi faingataʻa ko ia ʻoku hangē ha ngaahi tolounua ʻi hotau kakanó.​—1 Kolinito 10:13.

Founga ke Fekuki Ai mo ha Tolounuá

3. Naʻe anga-fēfē ʻa e tali ʻa Sihová ʻi he taimi naʻe kole ai ʻa Paula kiate ia ke ne toʻo atu ʻa e tolounua ʻi hono kakanó?

³ Naʻe kole ʻa e ʻapositolo ko Paulá ke toʻo ʻa e tolounuá mei hono kakanó. “ʻI he meʻá ni naʻe tuʻo tolu ʻeku kōlenga ki he ʻEikí ke lava ʻo mavahe atu muʻa ia meiate au.” Ko e hā ʻa e tali ʻa Sihova  ki he kole faivelenga ʻa Paulá? “Ko ʻeku ʻofa maʻataʻataá ʻoku feʻungaʻānoa ia kiate koe; he ko hoku mālohí ʻoku hoko ʻo haohaoa ʻi he vaivaí.” (2 Kolinito 12:​8, 9, NW) Tau ʻanalaiso ange ʻa e tali ko ʻení pea sio pe ʻe malava fēfē ke ne tokoniʻi kitautolu ke tau fekuki mo ha ngaahi palopalema pē ʻoku hangē ha tolounuá ʻa ē ʻokú ne fakamamahiʻi kitautolú.

4. ʻI he ngaahi founga fē naʻe maʻu ai ʻe Paula ʻa e ʻaonga mei he ʻofa maʻataʻatā ʻa Sihová?

⁴ Fakatokangaʻi naʻe fakalototoʻaʻi ʻe he ʻOtuá ʻa Paula ke ne houngaʻia ʻi he ʻofa maʻataʻatā naʻe ʻosi fakaaʻu ange kiate ia fakafou ʻia Kalaisí. Ko e moʻoni, naʻe tāpuakiʻi lahi ʻa Paula ʻi he ngaahi founga lahi. Naʻe tuku anga-ʻofa ange kiate ia ʻe Sihova ʻa e monū ʻo e tuʻunga ākongá, neongo naʻá ne hoko ko ha tokotaha fakafepaki loto-māfana tōtuʻa ʻo e kau muimui ʻo Sīsuú. (Ngāue 7:58; 8:3; 9:​1-4) Hili iá naʻe foaki anga-ʻofa ange ʻe Sihova kia Paula ʻa e ngaahi ngāue mo e ngaahi monū fakafiefia lahi. ʻOku hā mahino mai ai ʻa e lēsoni kiate kitautolu. Naʻa mo e ʻi he ngaahi taimi kovi tahá, ʻoku tau kei maʻu pē ʻa e ngaahi tāpuaki lahi ke tau houngaʻia ai. ʻOku ʻikai ʻaupito totonu ke hanga ʻe hotau ngaahi ʻahiʻahí ʻo ʻai ke ngalo ʻiate kitautolu ʻa e anga-lelei lahi fau ʻa Sihová.​—Sāme 31:19.

5, 6. (a) Naʻe anga-fēfē hono akoʻi ʻe Sihova kia Paula ko e mālohi fakaʻotuá ʻoku “hoko ʻo haohaoa ʻi he vaivaí”? (e) Naʻe anga-fēfē hono fakamoʻoniʻi ʻe he faʻifaʻitakiʻanga ʻa Paulá ko Sētané ko ha tokotaha loi?

⁵ ʻOku fakamoʻoniʻi ʻa e feʻungaʻānoa ʻa e ʻofa maʻataʻatā ʻa Sihová ʻi ha toe founga ʻe taha. ʻOku mahulu atu ʻa e mālohi ʻo e ʻOtuá ke tokoniʻi kitautolu ʻi hotau ngaahi ʻahiʻahí. (Efeso 3:20) Naʻe akoʻi ʻe Sihova kia Paula ko e mālohi fakaʻotuá ʻoku “hoko ʻo haohaoa ʻi he vaivaí.” Anga-fēfē? Naʻá ne tokonaki anga-ʻofa kia Paula ʻa e kotoa ʻo e mālohi naʻe fiemaʻu kiate iá koeʻuhí ke ne fekuki ai mo hono ʻahiʻahiʻí. Ko ia ai, naʻe hanga ʻe he kātaki ʻa Paulá mo ʻene falala haohaoa kia Sihová ʻo fakahaaʻi ki he faʻahinga kotoa ko e mālohi ʻo e ʻOtuá naʻe ikuna ʻi he tuʻunga ʻo e tangata vaivai mo angahalaʻia ko ʻení. Sai fakakaukau angé ki he ola ʻe hoko ki he Tēvoló, ʻa ia ʻokú ne taukaveʻi ʻoku tauhi pē ʻa e tangatá ki he ʻOtuá ʻi he lele lelei mo ʻikai ha palopalema ʻi he moʻuí. Naʻe hoko ʻa e anga-tonu ʻa Paulá ko hano paetakuʻi ia ʻo sipiʻi ai ʻa e mata ʻo e tokotaha lauʻikovi loi ko iá!

⁶ Ko Paula ē, ko ha kaungāmeʻa ki muʻa ʻo Sētane ʻi heʻene faitau fakafepaki ki he ʻOtuá, ko ha tokotaha fakatanga mātuʻaki fiematamuʻa ʻo e kau Kalisitiané, ko ha Fālesi faivelenga, ʻa ia ʻoku ʻikai ha veiveiua, naʻá ne maʻu ʻi he taimi ʻe taha ʻa e fiemālie lahi ʻo e moʻuí koeʻuhi naʻe fāʻeleʻi hake ia ʻi ha fāmili māʻolunga. Naʻe hoko ʻeni ʻa Paula ia ʻo tauhi kia Sihova mo Kalaisi ʻi he tuʻunga ko e “siʻi taha ʻi he kau Aposetolo.” (1 Kolinito 15:9) ʻI heʻene peheé, naʻá ne moʻulaloa fakatōkilalo ai ki he mafai ʻo e kulupu pule faka-Kalisitiane ʻo e ʻuluaki senitulí. Pea naʻá ne kātaki loto-tōnunga neongo ʻa hono tolounua ʻi he kakanó. ʻI he lahi ʻa e fakamamahi ʻa Sētané, naʻe ʻikai ke hanga ʻe he ngaahi ʻahiʻahi ia ʻo e moʻuí ʻo fakatupunga ʻa e faivelenga ʻa Paulá ke hōloa. Naʻe ʻikai ʻaupito ke mole meia Paula ia ʻene tokangataha ki he ʻamanaki ko ia te ne kau ʻi he Puleʻanga fakahēvani ʻo Kalaisí. (2 Timote 2:12; 4:18) Naʻe ʻikai ha tolounua, neongo ʻene mamahí, ʻe lava ke ne fakasiʻisiʻi ʻene faivelengá. ʻOfa ke pehē pē mo ʻetau faivelengá, ʻo hokohoko atu ʻene mālohí! ʻI hono tokoniʻi kitautolu ʻi hotau ngaahi ʻahiʻahí, ʻoku fakalāngilangiʻi ai ʻe Sihova kitautolu ʻaki ʻa e monū ko e tokoni ki hono fakamoʻoniʻi ko Sētané ko ha tokotaha loi.​—Palovepi 27:11.

Mātuʻaki Mahuʻinga ʻa e Ngaahi Tokonaki ʻa Sihová

7, 8. (a) ʻI he ngaahi founga fē ʻoku fakaivimālohiʻi ai ʻe Sihova ʻene kau sevānití he ʻahó ni? (e) Ko e hā ʻoku mātuʻaki mahuʻinga ai ʻa e ako mo e lau Tohitapu fakaʻahó ki he fekuki mo ha tolounua ʻi hotau kakanó?

⁷ ʻI he ʻahó ni, ʻoku fakaivia ʻe Sihova ʻa e kau Kalisitiane loto-tōnungá fakafou ʻi hono laumālie māʻoniʻoní, ko ʻene Folofolá, mo ʻetau fetokouaʻaki faka-Kalisitiané. Hangē pē ko e ʻapositolo ko Paulá, ʻe malava ke tau lī atu ʻetau ngaahi kavengá kia Sihova ʻi he lotu. (Sāme 55:22) Neongo ʻe ʻikai nai ke toʻo atu ʻe he ʻOtuá hotau ngaahi ʻahiʻahí, ʻoku malava ke ne ʻomai kiate kitautolu ʻa e poto ke fekuki ai mo kinautolu, naʻa mo e ngaahi ʻahiʻahi ko ia ʻoku tautefito ʻa ʻene faingataʻa ke kātekiná. ʻOku malava foki ʻe Sihova ke tokonaki mai kiate kitautolu ʻa e loto-mālohi​—ʻo ʻomai kiate kitautolu ʻa e “mālohi ʻoku mahulu atu ia ʻi he tuʻunga anga-mahení”​—ke tokoniʻi kitautolu ke tau kātaki.​—2 Kolinito 4:​7, NW.

⁸ ʻOku anga-fēfē ʻetau maʻu ʻa e tokoni peheé? Kuo pau ke tau ako tōtōivi ʻa e Folofola ʻa e ʻOtuá, he ʻi aí te tau maʻu ai ʻa ʻene ngaahi fakafiemālie moʻoní. (Sāme 94:19) ʻI he Tohitapú, ʻoku tau lau ai ʻa e ngaahi lea fakaʻofa ʻa e kau sevāniti ʻa e ʻOtuá ʻi heʻenau kole ki ha tokoni fakaʻotuá. Ko e ngaahi tali ʻa Sihová, ʻa ia ʻoku faʻa kau ai ʻa hono ngāueʻaki ʻo e ngaahi lea fakafiemālié, ko e ngaahi meʻa ia ke fakalaulauloto ki ai. ʻE fakaivimālohiʻi kitautolu ʻe he akó koeʻuhi ko e “mālohi ʻoku mahulu atu ia ʻi he tuʻunga anga-mahení ke ʻa e ʻOtuá ia kae ʻikai meiate  kitautolu.” Hangē pē ko e fiemaʻu ke tau kai ʻa e meʻakai fakamatelié ʻi he ʻaho kotoa ki he fakatupu ivi mo e mālohí, ʻoku pehē ʻa e pau ke tau kai tuʻumaʻu ʻi he ngaahi folofola ʻa e ʻOtuá. ʻOku tau fai ʻeni? Kapau ʻoku tau fai pehē, te tau sio leva ai ko ʻetau maʻu “ʻa e mālohi ʻoku mahulu atu ia ʻi he tuʻunga anga-mahení” ʻokú ne tokoniʻi kitautolu ke tau kātakiʻi ha ngaahi tolounua fakaefakatātā pē ʻokú ne fakamamahiʻi nai kitautolu ʻi he taimí ni.

9. ʻE malava fēfē ke tokoniʻi ʻe he kau mātuʻá ʻa e faʻahinga ʻoku nau fekuki mo e ngaahi palopalemá?

⁹ Ko e kau mātuʻa Kalisitiane manavahē-ʻOtuá ʻe lava ke hoko ʻo “hange ha fakaū mei he matangi” ko e fakamamahí, ko ha “toitoiʻanga mei he ʻalotamaki” ko e ngaahi palopalemá. Ko e kau mātuʻa, ʻa ia ʻoku nau loto ke feʻungamālie mo e fakamatala fakamānavaʻi ko iá, ʻoku nau kole fakatōkilalo mo loto-moʻoni kia Sihova ke foaki ange kiate kinautolu “ʻa e ʻelelo ʻo e tama ako” koeʻuhi ke nau lava ai ke ʻilo ʻa e founga ke tali ʻaki ai ha ngaahi foʻi lea totonu ki he faʻahinga ʻoku faingataʻaʻiá. Ko e ngaahi lea ʻa e kau mātuʻá ʻoku malava ke hangē ha kiʻi tauafu ʻokú ne fakamokomoko mo fakafiemālieʻi hotau laumālié he lolotonga ʻa e ngaahi taimi faingataʻa ʻi he moʻuí. ʻI he lea “fakafiemālie ki he ngaahi soulu ʻoku mafasiá,” ʻoku poupouʻi moʻoni ʻe he kau mātuʻá honau fanga tokoua mo e fanga tuofāfine fakalaumālie ko ia ʻoku nau hoko ʻo ongosia mo loto-mafasia koeʻuhi ko ha tolounua ʻi honau kakanó.​—Aisea 32:2; 50:4; 1 Tesalonaika 5:​14, NW.

10, 11. ʻE malava fēfē ke fakalototoʻaʻi ʻe he kau sevāniti ʻa e ʻOtuá ʻa e niʻihi kehe ko ia ʻoku nau hokosia ha ngaahi ʻahiʻahi kakahá?

¹⁰ Ko e kau sevāniti kotoa ʻa Sihová ko ha konga ia ʻo hono fāmili Kalisitiane fāʻūtahá. ʻIo, ko kitautolú ko e “ngaahi kupu ʻoku fekauʻaki,” pea ʻoku “totonu ke tau feʻofaʻaki.” (Loma 12:5; 1 Sione 4:11) ʻOku anga-fēfē ʻetau fakahoko ʻa e fatongia ko ʻení? Fakatatau ki he 1 Pita 3:8 (NW), ʻoku tau fai ia ʻaki ʻetau “fakahāhā ʻa e feongoʻiʻaki, ʻo maʻu ʻa e feʻofaʻaki fakatokouá, [pea hoko ʻo] manavaʻofa ongongofua” ki he faʻahinga kotoa ʻoku fekauʻaki mo kitautolu ʻi he tuí. Ko e meʻa ki he faʻahinga ʻoku fekuki tautefito mo ha tolounua ʻoku langa mamahi ʻi he kakanó, tatau ai pē pe ʻoku nau kei siʻi pe taʻumotuʻa, ko kitautolu kotoa ʻe malava ke tau fakaʻatuʻi makehe kinautolu. Anga-fēfē?

¹¹ ʻOku totonu ke tau feinga ke hoko ʻo lāuʻilo ki heʻenau faingataʻaʻiá. Kapau ʻoku tau ongonoa, anga-momoko, pe loto-noa, ʻe lava ke tau ʻai fāinoa ai ʻenau faingataʻaʻiá ʻo toe kovi ange. Ko ʻetau lāuʻilo ki honau ngaahi ʻahiʻahí ʻoku totonu ke ueʻi ai kitautolu ke tau tokanga ʻi he meʻa ʻoku tau leaʻakí, founga ʻoku tau lea ʻaki ai iá, mo e anga ʻo ʻetau ngāué. Ko ʻetau hoko ʻo fakatuʻamelie mo fakalototoʻá ʻe malava ke tokoni ia ki hono fakasiʻisiʻi ʻa e langa lahi ʻo ha faʻahinga tolounua pē ʻokú ne fakamamahiʻi kinautolu. Te tau fakamoʻoniʻi nai ai ʻetau hoko ko ha tokoni fakaivimālohi kiate kinautolu.​—Kolose 4:11.

Founga Ne Fekuki Lavameʻa Ai ʻa e Niʻihi

12-14. (a) Ko e hā naʻe fai ʻe ha Kalisitiane ʻe taha ke fekuki ai mo e kanisaá? (e) Naʻe anga-fēfē hono hanga ʻe he fanga tuongaʻane mo e fanga tokoua fakalaumālie ʻo e fefiné ni ʻo poupouʻi mo fakalototoʻaʻi iá?

¹² ʻI heʻetau ofi atu ki he ngataʻanga ʻo e ngaahi ʻaho fakaʻosí ni, ʻoku tupulaki fakaʻaho ai ʻa e “gaahi  mamahi.” (Mātiu 24:​8, PM) Ko ia ai, ʻoku hangehangē ʻoku fakamamahiʻi ʻe he ngaahi ʻahiʻahí ʻa e tokotaha kotoa ʻi he māmaní, tautefito ki he kau sevāniti loto-tōnunga ʻa Sihová, ʻa ia ʻoku nau feinga ke fai hono finangaló. Ko e fakatātaá, fakakaukau angé ki ha tokotaha Kalisitiane naʻe ngāue ʻi he ngāue fakafaifekau taimi-kakató. Naʻe maʻu ʻiate ia ʻa e fakaʻilonga ʻo e kanisaá pea naʻe pau ai ke tafa ʻo toʻo ʻa hono lama ʻo e fāvaí mo e lama ʻo hono kālava vaí. ʻI he taimi naʻá ne ʻilo ai mo hono husepānití naʻá ne maʻu ʻa e mahakí ni, naʻá na hanga leva kia Sihova ʻi ha lotu lōloa mo e kōlenga fakamātoato. Naʻá ne pehē ki mui ai naʻe hoko mai kiate kinaua ha nonga ʻe ʻikai ala tui ki ai. Neongo ia, naʻá ne kātekina ʻa e ngaahi taimi taufetongi ʻo e lelei mo e ngaahi taimi kovi lahi, tautefito ki he taimi naʻe fekuki ai mo e ngaahi nunuʻa ʻo hono ngaahi faitoʻó.

¹³ Ke fekuki mo hono tuʻungá, naʻe feinga ʻa e tuofefiné ni ke ako ki he lahi taha ʻo ʻene malavá ʻo fekauʻaki mo e kanisaá. Naʻá ne kumi faleʻi ki heʻene kau toketaá. ʻI he Taua Leʻo, ʻĀ Hake!, mo e ngaahi tohi faka-Kalisitiane felāveʻi mo iá, naʻá ne maʻu ai ha ngaahi fakamatala fakafoʻituitui ʻoku hā ai ʻa e founga naʻe fekuki fakaeongo ai ʻa e faʻahinga tāutaha mo e mahakí ni. Naʻá ne toe lau mo e ngaahi konga Tohitapu feʻungamālie ʻoku hā ai ʻa e malava ʻa Sihova ke tokoniʻi hono kakaí he lolotonga ʻa e ngaahi faingataʻá, pea mo e ngaahi fakamatala ʻaonga kehe.

¹⁴ Ko ha kupu ʻe taha ki he fekuki mo e ʻamanaki-tōnoá naʻe lave ai ki he ngaahi lea fakapotopoto ko ʻení: “Ko e tangata mavahe ʻoku ne nofoʻaki kumi ʻa e holi aʻana.” (Palovepi 18:1) Ko ia ai, naʻe ʻomai ʻe he kupú ʻa e faleʻi ko ʻení: “Talitekeʻi ʻa e fakamavahé.” a ʻOku pehē ʻe he tuofefiné: “Naʻe tala mai ʻe he tokolahi kiate au naʻa nau lotu mai maʻaku; naʻe telefoni mai ʻa e niʻihi kehé kiate au. Naʻe telefoni mai maʻu pē ʻa e toko ua ʻo e kau mātuʻá ʻo vakaiʻi pe ʻoku ou fēfē. Naʻá ku maʻu ha ngaahi matalaʻiʻakau mo e ngaahi kaati talamonū lahi. Naʻe aʻu ʻo teuteu ʻe he niʻihi ha ngaahi meʻakai. Pehē foki, naʻe pole ʻa e tokolahi ke nau ʻave au ki hoku faitoʻó.”

15-17. (a) Naʻe anga-fēfē ʻa e fekuki ʻa ha tokotaha Kalisitiane mo e ngaahi faingataʻa naʻe hoko mei ha ongo fakatuʻutāmaki? (e) Ko e hā ʻa e poupou naʻe fai ʻe he faʻahinga ʻi he fakatahaʻangá?

¹⁵ Ko ha sevāniti taimi fuoloa ʻa Sihova ʻi New Mexico, U.S.A., naʻe tuʻo ua ʻene ʻi ha fakatuʻutāmaki ʻa ha meʻalele. Naʻe lavea hono kiá mo hono ongo umá, ʻo toe fakalahi ai pē hono tuʻunga langa huí ʻa ia naʻá ne fekuki mo ia ʻo laka hake ʻi he taʻu ʻe 25. ʻOkú ne pehē: “Naʻe faingataʻa lahi kiate au ke ʻai hoku ʻulú ke tuʻu tonu ki ʻolunga mo toʻo ha meʻa ʻoku mamafa ange ʻi he kilo ʻe uá. Ka naʻe tokoni lahi kiate au ʻa e lotu faivelenga kia Sihová. Naʻe pehē ki he ngaahi kupu ʻi he Taua Leʻo kuo mau akó. Naʻe fakamatala ʻa e kupu ʻe taha ʻi he Maika 6:​8, ʻo fakahā ko e hoko ʻo fakanānā ʻi he ʻaʻeva mo e ʻOtuá ʻoku ʻuhinga iá ko ʻete ʻiloʻi hoto ngaahi ngataʻangá. Naʻe tokoni ʻeni kiate au ke u ʻiloʻi ai neongo ʻa e tuʻunga kuó u ʻi aí, ʻoku ʻikai totonu ke u loto-siʻi, neongo ko e taimi naʻá ku fakamoleki ʻi he ngāue fakafaifekaú naʻe siʻi ange ia ʻi heʻeku fakaʻamú. Ko e tauhi kiate ia ʻaki ʻa e ngaahi fakaueʻiloto maʻá ʻa e meʻa tefito ʻoku laú.”

¹⁶ ʻOkú ne toe fakamatala: “Naʻe fakaongoongoleleiʻi maʻu pē au ʻe he kau mātuʻá ʻi heʻeku ngaahi feinga ke maʻu ʻa e ngaahi fakatahá pea ke ʻalu ʻi he malaʻe fakafaifekaú. ʻOku fakalea mo fāʻofua ʻiate au ʻa e fānaú. Naʻe mātuʻaki anga-kātaki kiate au ʻa e kau faifekau tāimuʻá ʻo nau faʻa feliliuaki ʻenau ngaahi palaní ʻi he ngaahi ʻaho ʻoku ou puke aí. ʻI he taimi naʻe kovi ai ʻa e ʻeá, naʻa nau anga-ʻofa ʻo ʻave au ʻi he ngaahi toe ʻaʻahí pe fakaafeʻi au ke u kau ʻi heʻenau ngaahi ako Tohitapú. Pea koeʻuhi naʻe ʻikai lava ke u toʻo ha kato tohi, naʻe faʻo ʻe he kau malanga kehé ʻeku ʻū tohí ʻi heʻenau kató ʻi he taimi naʻá ku ʻalu ai ʻi he ngāue fakamalangá.”

¹⁷ Fakatokangaʻi ʻa e founga naʻe tokoni ai ʻa e kau mātuʻa ʻo e fakatahaʻangá mo e ngaahi kaungātuí ki he ongo tuofefiné ni ke na fekuki ai mo ʻena ngaahi vaivaiʻanga hangē ha tolounuá. Naʻa nau fai ʻa e tokoni ʻaonga mo anga-ʻofa naʻe fakataumuʻa ke feau ai ʻa e ngaahi fiemaʻu pau fakalaumālié, fakasinó, mo e fakaeongó. ʻIkai ʻoku fakalototoʻaʻi koe ʻe he meʻa ko iá ke ke fai ha tokoni ki he fanga tokoua mo e fanga tuofāfine kehe ʻa ia ʻoku nau hokosia ha ngaahi palopalemá? Ko kimoutolu foki fānaú ʻoku malava ke mou hoko ko ha tokoni ki he faʻahinga ʻi hoʻomou fakatahaʻangá ʻa ia ʻoku nau fāinga mo e ngaahi tolounua ʻi honau kakanó.​—Palovepi 20:29.

18. Ko e hā ʻa e fakalototoʻa ʻoku tau maʻu nai ʻi he ngaahi talanoa ki he moʻuí ʻoku pulusi ʻi he ongo makasini Taua Leʻo mo e ʻĀ Hake!?

¹⁸ Ko e ongo makasini Taua Leʻo mo e ʻĀ Hake! kuo pulusi mai ai ʻa e ngaahi talanoa lahi ki he moʻui mo e ngaahi meʻa naʻe hokosia ʻe he Kau Fakamoʻoni kuo nau fekuki, pea ʻoku nau kei fekuki,  mo e ngaahi palopalema ʻi he moʻuí. ʻI hoʻo lau tuʻumaʻu ʻa e ngaahi kupu peheé, te ke sio ai ko e tokolahi ʻo ho fanga tokoua mo e fanga tuofāfine fakalaumālie takatakai ʻi he māmaní kuo nau kātekina ʻa e ngaahi faingataʻaʻia fakaʻekonōmika, mole atu ʻa e faʻahinga naʻa nau ʻofa aí ʻi he ngaahi fakatamaki, pea mo e ngaahi tuʻunga fakatuʻutāmaki ʻi he taimi taú. ʻOku moʻui ʻa e niʻihi kehe fakataha mo e ngaahi mahaki fakatupu taʻemalava ha meʻa. Ko e tokolahi ʻoku ʻikai malava ke nau fai ʻa e niʻihi ʻo e ngaahi meʻa faingofua ʻi he moʻuí ʻa ia ko e meʻa noa pē ia ki he faʻahinga moʻuileleí. ʻOku ʻahiʻahiʻi kakaha ʻaupito kinautolu ʻe honau puké, tautefito ki he taimi ʻoku ʻikai malava ai ke nau kau ʻi he ngaahi ngāue faka-Kalisitiané ki he lahi ko ia ʻoku nau loto ki aí. He houngaʻia lahi ē ko kinautolu ʻi he tokoni mo e poupou ʻoku fai ange kiate kinautolu ʻe honau fanga tokouá mo e fanga tuofāfiné, taʻu siʻi mo e taʻumotuʻa!

ʻOku ʻOmai ʻe he Kātakí ʻa e Fiefia

19. Ko e hā naʻe malava ai ʻa Paula ke fiefia neongo hono ngaahi ʻahiʻahi mo e ngaahi vaivaiʻanga hangē ha tolounuá?

¹⁹ Naʻe fiefia ʻa Paula ke sio ki he founga naʻe fakaivimālohiʻi ai ia ʻe he ʻOtuá. Naʻá ne pehē: “ʻOku ou fiefia lahi tahá, te u pōlepole ʻi he fekauʻaki mo ʻeku ngaahi vaivaí, koeʻuhi ko e mālohi ʻo Kalaisí ke kei hangē ha tēniti kiate au. Ko ia ai, ʻoku ou fiefia ʻi he ngaahi vaivaí, ʻi he ngaahi paetakú, ʻi he ngaahi masivá, ʻi he ngaahi fakatangá mo e ngaahi faingataʻá, koeʻuhi ko Kalaisi. He ʻi heʻeku vaivaí, ʻoku ou toki mālohi leva.” (2 Kolinito 12:​9, 10, NW) Koeʻuhi ko e ngaahi meʻa naʻá ne hokosia fakafoʻituituí, naʻe malava ai ʻa Paula ke lea loto-pau: “ʻOku ʻikai te u lea pehe koeʻuhi pe ko ʻeku masiva; he ko e meʻa kia kita kuo u ako ke u fiemalie ai pe ʻi he meʻa ʻoku ou ʻi ai. ʻIo, ʻoku ou lava ʻa e nofo moʻulaloa, pea ʻoku ou lava foki ʻa e mohu meʻa. Ne akoʻi au, ʻi heʻeku meʻa tāu taha mo hono kotoa, kau potopotoʻi ʻi he nofo makona mo e nofo fiekaia, mo e nofo mohumeʻa mo e nofo masiva. ʻOku ou mafeia ʻa e meʻa kotoa pe ʻiate ia ʻoku ne fakakaukaua au.”​—Filipai 4:​11-13.

20, 21. (a) Ko e hā te tau maʻu ai ha fiefia ʻi he fakalaulauloto ki he “ngaahi meʻa ʻoku ʻikai ha”? (e) Ko e hā ʻa e niʻihi ʻo e “ngaahi meʻa ʻoku ʻikai ha” ʻokú ke ʻamanaki atu ke sio ai ʻi he Palataisi ʻi he māmaní?

²⁰ Ko ia ai, ʻi hono kātekina ha tolounua fakaefakatātā pē ʻi hotau kakanó, ʻe lava ke tau maʻu ai ʻa e fiefia lahi ʻi hono fakahāhaaʻi ki he tokotaha kotoa ko e mālohi ʻo Sihová ʻoku hoko ʻo haohaoa ia ʻi hotau vaivaiʻangá. Naʻe tohi ʻe Paula: “ʻOku ʻikai te mau foʻi . . . ka ʻoku fai ai pe ʻa e fakafoʻou ʻo homau tangata ʻi loto, ʻo hokohoko ʻaho pe. He ko homau mamahi maʻamaʻa ni mo mole, ʻoku ne fakatupu maʻamautolu ha langilangi mamafa mo taʻengata, ko e meʻa fungani ʻi he fungani ange fau; lolotonga ʻoku . . . mau tokangaʻi ʻa e . . . ngaahi meʻa ʻoku ʻikai ha: he ko e ngaahi meʻa . . . ʻoku ʻikai ha ʻoku fakaitaniti.”​—2 Kolinito 4:​16-18.

²¹ Ko e tokolahi taha ʻo e kakai ʻa Sihova ʻi he ʻaho ní ʻoku nau ʻamanaki ke moʻui ʻi heʻene Palataisi ʻi he māmaní pea ke fiefia ʻi he ngaahi tāpuaki kuó ne talaʻofa maí. ʻOku lava ke pehē ko e ngaahi tāpuaki peheé ʻoku “ʻikai ha” mai ia kiate kitautolu ʻi he ʻahó ni. Kae kehe, ʻoku ngaʻunu vave ʻaupito mai ʻa e taimi te tau sio ai ki he ngaahi tāpuaki ko iá ʻaki hotau matá tonu, ʻio, pea fiefia ai ʻo taʻengata. Ko e taha ʻo e tāpuaki ko iá ko e fakanonga ʻo ʻikai ʻaupito ke toe moʻui fakataha mo ha palopalema hangē ha tolounuá! Ko e ʻAlo ʻo e ʻOtuá te ne “holoki ʻa e ngaahi ngaue ʻa e Tevolo” pea “fakakaʻanga ʻa e toko taha ʻa ia ʻoku aʻana ʻa e malohi ʻo e mate.”​—1 Sione 3:8; Hepelu 2:14.

22. Ko e hā ʻa e loto-pau mo e fakapapau ʻoku totonu ke tau maʻú?

²² Ko ia ai, tatau ai pē pe ko e hā ha tolounua ʻi hotau kakanó ʻokú ne fakamamahiʻi kitautolu he ʻaho ní, tau hanganaki fekuki mo ia. ʻI he hangē ko Paulá, te tau maʻu ʻa e mālohi ke fai pehē ʻi he anga-lelei ʻa Sihová, ʻa ia ʻokú ne ʻomai loto-fiefoaki ʻa e mālohi kiate kitautolú. ʻI he taimi te tau moʻui ai ʻi he Palataisi ʻi he māmaní, te tau fakahīkihikiʻi ʻa Sihova ko hotau ʻOtuá ʻi he ʻaho kotoa koeʻuhi ko ʻene ngaahi ngāue fakaofo kotoa pē maʻatautolú.​—Sāme 103:2.

[Fakamatala ʻi lalo]

ʻE Anga-Fēfē Haʻo Tali?

• Ko e hā e ʻuhinga pea ʻi he founga fē ʻoku feinga ai ʻa e Tēvoló ke maumauʻi ʻa e anga-tonu ʻa e kau Kalisitiane moʻoní?

• ʻOku anga-fēfē ʻa e hoko ʻa e mālohi ʻo Sihová ʻo “haohaoa ʻi he vaivaí”?

• ʻE malava fēfē ke fakalototoʻaʻi ʻe he kau mātuʻá mo e niʻihi kehé ʻa e faʻahinga ko ia ʻoku fakamamahiʻi ʻe he ngaahi palopalemá?

[Fehuʻi ki he Ako]

[Fakatātā ʻi he peesi 18]

Naʻe tuʻo tolu ʻa e lotu ʻa Paula ke hanga ʻe he ʻOtuá ʻo toʻo atu ʻa e tolounua ʻi hono kakanó