Ngaahi Fehuʻi mei he Kau Lautohí

Ko e hā ʻa e ʻuhinga ʻo e fakamatala ʻi he Hepelu 12:4: “Kuo teʻeki ke mou talituʻu ke toto”?

Ko e kupuʻi lea “talituʻu ke toto” ʻoku fakahuʻunga ai ʻa e ʻalu ʻo aʻu ki he tuʻunga taupotu ko e maté, ʻo lilingi moʻoni ai ʻa hoto totó.

Naʻe ʻiloʻi ʻe he ʻapositolo ko Paulá ko e ola ʻo ʻenau tuí, naʻe ʻosi hoko ai ʻa e kau Kalisitiane Hepelū ʻe niʻihi ʻo “kitaki pe ʻa e fuʻu fefaʻuhi, ʻa ia ko e koto fakamamahi.” (Hepelu 10:​32, 33) ʻI hono fakahaaʻi iá, ʻoku hā ngali naʻe ngāueʻaki ai ʻe Paula ʻa e lea fakatātā fekauʻaki mo ha fāinga ʻi ha feʻauhi sipoti faka-Kalisi, ʻa ia naʻe lava ke kau ki ai ʻa e lova lele, fangatua, fuhu mo e tolo tisikasi pea mo e sika. Fakatatau ki ai, ʻi he Hepelu 12:​1, naʻá ne uki ʻa e kaungā Kalisitiané: “Ke tau huʻihuʻi ʻa e fakamamafa kotoa pe, mo e angahala ʻoku tau moʻuangofua ki ai, pea tau kitaki atu ʻetau lele he fakapuepue kuo tala humaki mai kiate kitautolu.”—Fakaʻītali ʻamautolu.

ʻI he veesi ʻe tolu ki mui aí, ʻi he Hepelu 12:​4, naʻe hiki nai ai ʻa Paula mei he fakakaukau fekauʻaki mo ha lova lelé ki ha feʻauhi fuhu. (ʻOku fakatou hā ia ʻi he 1 Kolinito 9:​26.) Ko e kau fuhu he kuonga muʻá naʻe haʻi honau tuké mo e kiaʻi-nimá ʻaki ʻa e ngaahi lauʻileta. Ko e ngaahi lauʻiletá naʻe aʻu nai ʻo fakamamafa ia “ʻaki ʻa e ngaahi fakamaʻu pulu, ukamea pe mētale, ʻa ia naʻá ne fakatupunga ʻa e ngaahi lavelavea lahi ki he kau fuhú.” Ko e ngaahi feʻauhi anga-fakamamahi peheé naʻá ne fakatupunga ʻa e fetotoʻi, ʻo aʻu he taimi ʻe niʻihi ki he mate.

Kae kehe, ko e kau Kalisitiane Hepeluú naʻa nau maʻu ʻa e ngaahi faʻifaʻitakiʻanga feʻunga ʻo e kau sevāniti loto-tōnunga ʻa e ʻOtuá ʻa ia naʻa nau fuesia ʻa e fakatanga mo e ngaohikovia anga-fakamamahi, ʻo aʻu ki he tuʻunga ʻo e maté, “ke toto.” Fakatokangaʻi ʻa e potutohi ʻa ia naʻe fakahanga ai ʻe Paula ʻa e tokangá ki he meʻa naʻe hokosia ʻe he faʻahinga loto-tōnunga ʻo e kuonga muʻá:

“Naʻe tolomakaʻi ha niʻihi, naʻe kilisi ua, naʻe fakapōngiheletāʻi; naʻa nau hēhētuʻu, ʻo kofu kiliʻi sipi mo kiliʻi kosi, he kuo nau masiva mo fakatangaʻi mo ngaohikovia.” Hili iá, naʻe fakahanga ʻe Paula ʻa e tokangá ki he Tokotaha-Fakahaohaoa ʻo ʻetau tuí, ʻa Sīsū: “Ne ne kataki ae bekia i he akau, mo ne taetokaga ki he fakama, . . . bea kuo nofo eni i he nima toomatau oe afioaga oe Otua.”​—Hepelu 11:37; 12:​2, PM.

ʻIo, ko e tokolahi naʻa nau “talituʻu ke toto,” ʻa ia, ke aʻu ki he tuʻunga ʻo e maté. Ko ʻenau talituʻú naʻe lahi ange ia ʻi ha fāinga pē ʻi loto mo e angahala ko e ʻikai ha tuí. Naʻa nau mateaki ʻi he malumalu ʻo e ngaohikovia anga-fakamamahi ʻi tuʻá, ʻo tauhi maʻu ʻenau loto-tōnungá ʻo aʻu ki he maté.

Ko e faʻahinga foʻou ange ʻi he fakatahaʻanga Selusalemá, mahalo ʻi heʻenau hoko ko e kau Kalisitiane hili ʻa e hōloa hifo e fakatanga mālohi ʻo e kuohilí, naʻe ʻikai ʻaupito te nau fehangahangai mo ha ngaahi ʻahiʻahi lahi pehē. (Ngāue 7:​54-​60; 12:​1, 2; Hepelu 13:7) Neongo ia, naʻa mo e ngaahi ʻahiʻahi natula siʻi ange ʻene mālohí naʻá ne fakalotosiʻi ʻa e niʻihi ʻo kinautolu mei he hokohoko atu hono fakahoko ʻa e feʻauhí; naʻa nau hoko ʻo ‘fiu mo vaivai i honau lotó.’ (Hepelu 12:​3, PM) Naʻe fiemaʻu ke nau fakalakalaka ki he tuʻunga matuʻotuʻá. ʻE langa hake ʻe he meʻa ko iá ʻenau malava ke kātekina ha meʻa pē nai ʻe hoko mai, neongo kapau ʻe kau ki ai ha ngaohikovia fakaesino ʻo aʻu ki he tuʻunga ko hono lilingi honau totó.​​—Hepelu 6:1; 12:​7-​11.

Ko e kau Kalisitiane tokolahi ʻi onopōní kuo nau “talituʻu ke toto,” hoko ʻo tāmateʻi koeʻuhi naʻe ʻikai te nau fakangaloku ʻenau lotu faka-Kalisitiané. ʻI he ʻikai tuku ʻa e ngaahi lea ʻa Paula ʻi he Hepelu 12:4 ke hoko ko ha tupuʻanga ʻo e manavaheé, ʻe lava ke tau lau ko hono fakahaaʻi ia ʻa e tuʻunga ʻa ia ʻoku tau fakapapauʻi ke hokohoko atu aí, ke hanganaki mateaki ki he ʻOtuá. Ki mui ʻi he tohi tatau ki he kau Hepeluú, naʻe tohi ʻe Paula: “Ke tau kuku mau moe ofa, aia ke tau tauhi aki ae Otua ke aoga, i he fakaabaaba moe manavahe.”​—Hepelu 12:​28, PM.