ʻE Lava Fēfē Ke Ke Hao ʻi he Ngataʻanga ʻo e Māmani ko Ení?

ʻOKU fakamatalaʻi ʻe he Tohitapú ʻa e ngataʻanga ʻo e fokotuʻutuʻu ʻo e ngaahi meʻa lolotonga ko ení ko e “ʻaho ʻo e huhua houhau ʻa e ʻaho ko ia, ko e ʻaho ʻo e ʻefihia mo e taʻomi, ko e ʻaho ʻo e maveu mo e anganoa, ko e ʻaho poʻuli ko e kaupoʻuli, ko e ʻaho ʻo e loa mo e poʻuli matolu.” (Sefanaia 1:15) Ko e moʻoni ʻoku ʻikai ko e faʻahinga ʻaho eni ia te ke faʻa fakatuʻotuʻa atu ki aí! Neongo ia, naʻe naʻinaʻi ʻa e ʻapositolo ko Pitá ki hono kaungā Kalisitiané ke nau “nofoʻaki tali ki he hoko mai ʻa e ʻaho ʻo e ʻOtua mo mou fakatoʻotoʻo mai ia, ʻa ia ʻe tutu ai ʻa e ngaahi langi ʻo movetevete, pea ʻe vela ʻo vai ʻa e ngaahi fetuʻu. Ka ʻi he funga ʻo e talaʻofa ʻa ʻEne ʻAfio ʻoku tau ʻamanaki ki ha ngaahi langi foʻou mo ha fonua [“māmani,” NW] foʻou, ʻa ia ʻoku nofoʻanga ai ʻa maʻoniʻoni.”—2 Pita 3:12, 13.

Naʻe ʻikai ke lea heni ʻa Pita ia ʻo fekauʻaki mo ha fakaʻauha ʻo e ngaahi langi mo e māmani matelié. Ko e “ngaahi langi” mo e “māmani” naʻe ʻuhinga ki ai ʻa Pita ʻi he potutohi ko ení ko e tuʻu fakaefakatātā ia ki he ngaahi puleʻanga fakaetangata fakameleʻi lolotongá pea mo e sōsaieti ʻo e faʻahinga fakaʻotuamate ʻo e tangatá. Ko e “ʻaho ʻo Sihova” ʻe ʻikai te ne fakaʻauha ʻa e māmaní tonu ka te ne “fakaeve mei ai hono kau angahala.” (Aisea 13:9) Ki he faʻahinga ʻoku nau “mapuhoi mo toʻe koeʻuhi ko e ngaahi fakalielia” ʻoku fai ʻi he sōsaieti ʻo e faʻahinga fulikivanu ʻo e tangatá he ʻaho ní, ʻe hoko ai ʻa e ʻaho ʻo Sihová ko ha ʻaho ʻo e fakamoʻui.—Isikeli 9:4.

ʻE lava fēfē leva ke hao ha taha ʻi he “ʻAho ʻo Sihova, ʻa e ʻaho lahi mo fakalilifu”? “Ko e folofola ʻa Sihova” ʻa ia naʻe fakahaaʻi ki he taha ʻo ʻene kau palōfitá ʻoku tokonaki mai ai ʻa e tali ki he fehuʻi ko iá: “ʻE hoko ʻo pehe, ko ia ʻoku tautapa ki he huafa ʻo Sihova ʻe fakahaofi.” (Sioeli 1:1; 2:31, 32) ʻE fiefia ʻa e Kau Fakamoʻoni ʻa Sihová ke tokoniʻi koe ke ke ʻiloʻi ʻa e ʻuhinga ʻo e tautapa ki he huafa ʻo Sihová.