ʻOku Toʻo Atu ʻe he Maama Fakaʻotuá ʻa e Fakapoʻulí!

“E fakamaama e Jihova ʻa eku fakabouli.”—2 SAMIUELA 22:​29, PM.

1. ʻOku anga-fēfē ʻa e fekauʻaki ʻa e māmá mo e moʻuí?

 “FOLOFOLA ʻa e ʻOtua, Ke maama mai: pea naʻe maama.” (Senesi 1:3) ʻI he ngaahi foʻi lea mahuʻinga ko iá, ʻoku fakapapauʻi mai ai ʻe he fakamatala fakaefakatupu ʻi he Sēnesí ko Sihova ʻa e matavai ʻo e māmá, ʻa ia ka ne ʻikai ha maama heʻikai malava ha moʻui ia ʻi he māmaní. Ko Sihová foki ko e toe matavai ia ʻo e maama fakalaumālié, ʻa ia ʻoku mātuʻaki mahuʻinga ki hotau tataki ʻi he ʻalunga ʻo e moʻuí. (Sāme 43:3) Naʻe fakahaaʻi ʻe Tuʻi Tēvita ʻa e fekauʻaki vāofi ʻa e maama fakalaumālié pea mo e moʻuí ʻi heʻene tohi: “Ko e matavai ʻo e moʻui ʻoku ʻi he ʻAfiona: ʻi hoʻo māma te mau sio māma.”—Sāme 36:9.

2. Hangē ko ia naʻe fakahaaʻi ʻe Paulá, ʻoku fekauʻaki vāofi ʻa e māmá mo e hā?

² ʻI he taʻu ʻe 1,000 nai hili ʻa e taimi ʻo Tēvitá, naʻe lave ai ʻa e ʻapositolo ko Paulá ki he fakamatala fakatupú. ʻI he tohi ki he fakatahaʻanga Kalisitiane ʻi Kolinitoó, naʻá ne pehē: “Ko e ʻOtua ia naʻa ne folofola, ʻE ulo mai ha maama mei he poʻuli.” Naʻe fakahaaʻi leva ʻe Paula ko e maama fakalaumālie ko iá ʻoku fekauʻaki vāofi ia mo e ʻilo meia Sihová ʻi heʻene pehē: “Kuo ne ulo ʻi homau loto, koeʻuhi ke ai ha ulo atu ʻo e ʻilo ki he langilangi ʻo e ʻOtua, ʻi he fofonga ʻo Sisu Kalaisi.” (2 Kolinito 4:6) ʻOku anga-fēfē ʻa e aʻu mai ʻa e maama ko ʻení kiate kitautolú?

Ko e Tohitapú ​—Fakahokoʻanga ʻo e Māmá

3. Fakafou ʻi he Tohitapú, ko e hā ʻa e maama ʻoku ʻomai ʻe Sihová?

³ ʻOku ʻomai ʻe Sihova ʻa e maama fakalaumālié ʻo fakafou tefito mai ia ʻi heʻene Folofola fakamānavaʻí, ko e Tohitapú. Ko ia, ʻi heʻetau ako ʻa e Tohitapú pea maʻu ʻa e ʻilo mei he ʻOtuá, ʻoku tau fakaʻatā ai ʻa ʻene māmá ke ulo mai kiate kitautolu. Fakafou ʻi he Tohitapú, ʻoku fakamaama mai ai ʻe Sihova ʻene ngaahi taumuʻá mo fakahā mai ai kiate kitautolu ʻa e founga ʻe malava ke tau fai ai hono finangaló. ʻOku ʻomai ai ʻe he meʻá ni ʻa e taumuʻa ki heʻetau moʻuí mo tokoni ki hono fakalato ʻetau ngaahi fiemaʻu fakalaumālié. (Koheleti 12:1; Mātiu 5:3) Naʻe fakamamafaʻi ʻe Sīsū kuo pau ke tau tokanga ki heʻetau ngaahi fiemaʻu fakalaumālié ʻi heʻene lave ki he Lao ʻa Mōsesé, naʻá ne pehē: “Kuo tohi, Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.”—Mātiu 4:4; Teutalonome 8:3.

4. ʻI he founga fē ʻoku hoko ai ʻa Sīsū “ko e maama ʻo māmani”?

⁴ ʻOku fakafekauʻaki vāofi ʻa Sīsū mo e maama fakalaumālié. Ko hono moʻoní, naʻá ne lea fekauʻaki mo ia tonu “ko e maama ʻo māmani” peá ne pehē: “Ko ia ʻoku ne muimui kiate au, ʻe ʻikai ʻaupito te ne fononga ʻi he poʻuli, ka te ne maʻu ʻa e maama ʻo e moʻui.” (Sione  8:12) ʻOku tokoni ʻa e kupuʻi lea ko ʻení kiate kitautolu ke tau mahinoʻi ʻa e ngafa tefito ʻo Sīsū ʻi hono fakahoko ʻa e moʻoni ʻa Sihová ki he faʻahinga ʻo e tangatá. Ke tau fakaʻehiʻehi mei he fakapoʻulí pea ʻaʻeva ʻi he maama ʻa e ʻOtuá, kuo pau ke tau fanongo ki he meʻa kotoa ʻoku leaʻaki ʻe Sīsuú pea muimui ofi ʻi heʻene faʻifaʻitakiʻangá mo ʻene ngaahi akonakí hangē ko ia ʻoku lēkooti ʻi he Tohitapú.

5. Ko e hā ʻa e fatongia naʻe maʻu ʻe he kau muimui ʻo Sīsuú ʻi he hili ʻene pekiá?

⁵ ʻI ha ngaahi ʻaho siʻi pē ki muʻa heʻene pekiá, naʻe toe lave ai ʻa Sīsū kiate ia tonu ko e maama, ʻo tala ki heʻene kau ākongá: “ʻOku kei toe ha kiʻi taimi ʻo e ʻi homou lotolotonga ʻa e maama. Mou laka hoʻomou maʻu ʻa e maama, ke ʻoua naʻa lapasi kimoutolu ʻe he poʻuli: pea ko ia ʻoku haʻele ʻi he poʻuli ʻoku ʻikai te ne ʻilo pe ko ʻene mole ki fē. ʻI hoʻomou maʻu ʻa e maama, mou tui pikitai ki he maama, koeʻuhi ke mou hoko ko e fanau ʻa e maama.” (Sione 12:​35, 36) Ko e faʻahinga ko ia naʻe hoko ko e fānau ʻo e māmá naʻa nau ako ʻa e “anga ʻo e ngaahi lea moʻui” ʻa e Tohitapú. (2 Timote 1:​13, 14) Naʻa nau ngāueʻaki leva ʻa e ngaahi lea moʻui ko ʻení ki hono tohoaki mai ʻa e faʻahinga tāutaha loto-totonú mei he poʻulí ki he maama ʻa e ʻOtuá.

6. Ko e hā ʻa e moʻoni tefito fekauʻaki mo e māmá mo e fakapoʻulí ʻoku tau maʻu ʻi he 1 Sione 1:5?

⁶ Naʻe tohi ʻe he ʻapositolo ko Sioné: “Ko e ʻOtua ko e maama, pea ʻoku ʻikai ha momoʻi fakapoʻuli ʻi he ʻEne ʻAfio.” (1 Sione 1:5) Fakatokangaʻi ʻa e kehekehe lahi heni ʻi he māmá mo e poʻulí. ʻOku tupu ʻa e maama fakalaumālié ia meia Sihova, pea ko e fakapoʻuli fakalaumālié ʻoku ʻikai malava ke fekauʻaki ia mo ia. Ko hai leva ʻa e matavai ia ʻo e fakapoʻulí?

Fakapoʻuli Fakalaumālié​—Ko e Matavaí

7. Ko hai ʻoku tuʻu mei mui ʻi he fakapoʻuli fakalaumālie ʻo e māmaní, pea ko e hā ʻa e tākiekina ʻokú ne maʻú?

⁷ Naʻe lea ʻa e ʻapositolo ko Paulá ʻo kau ki he “ʻotua ʻo e tuʻu ko eni.” ʻI he kupuʻi lea ko iá, naʻá ne ʻuhinga ai kia Sētane ko e Tēvoló. Naʻá ne toe pehē ko e tokotahá ni ‘kuó ne fakakui ʻa e ʻatamai ʻo e kau taʻetuí, koeʻuhi ke ʻoua naʻa huluʻia ʻe he ulo mei he Kosipeli ʻo e langilangi ʻo Kalaisí, ʻa ia ko e imisi ʻo e ʻOtuá.’ (2 Kolinito 4:4) ʻOku fakahaaʻi ʻe he tokolahi ʻenau tui ki he ʻOtuá; ka, ko ha tokolahi fakautuutu ʻo kinautolu ʻoku ʻikai te nau tui ki ha Tēvolo. Ko e hā hono ʻuhingá? ʻOku ʻikai te nau loto ke tali ʻoku ʻi ai ha mālohi kovi ʻoku mahulu hake ia ʻi he tangatá pea ʻoku malava ke ne tākiekina ʻa e founga ʻo ʻenau fakakaukaú. Ka neongo ia, hangē ko ia ʻoku fakahaaʻi ʻe Paulá, ʻoku ʻi ai ʻa e Tēvolo, pea ʻokú ne tākiekina ʻa e kakaí koeʻuhi ke ʻoua te nau malava ʻo sio ki he maama ʻo e moʻoní. Ko e mālohi ʻo Sētane ke tākiekina ʻa e fakakaukau ʻa e tangatá ʻoku hā ia ʻi he fakamatala fakaekikite ʻo ia ʻi he tuʻunga ko e “tokotaha . . . ʻoku ne kākāʻi ʻa mamani kātoa.” (Fakahā 12:9) ʻI he hoko ko ha nunuʻa ʻo e ngaahi ngāue ʻa Sētané, ko e tuʻunga ko ia naʻe tomuʻa tala ʻe he palōfita ko ʻAiseá ʻoku kaungatonu ia ki he kotoa ʻo e faʻahinga ʻo e tangatá tuku kehe ʻa e faʻahinga ko ia ʻoku nau tauhi kia Sihová: “Vakai ʻoku ʻufiʻufi ʻa mamani ʻe he poʻuli, mo e poʻuli matolu ʻa e ngaahi faʻahinga.”—Aisea 60:2.

8. ʻI he ngaahi founga fē ʻoku fakahāhā ai ʻe he faʻahinga ʻi he fakapoʻuli fakalaumālié ʻoku nau puputuʻú?

⁸ ʻI ha fakapoʻuli matolu ʻoku ʻikai malava ai ke te sio ki ha meʻa. ʻOku faingofua ai ʻete hoko ʻo hē pe puputuʻú. ʻI he tuʻunga meimei tatau, ko e faʻahinga ʻi he fakapoʻuli fakalaumālié ʻoku nau hala ʻi he ʻiló pea ʻoku nau hoko vave ai ʻo puputuʻu ʻi ha ʻuhinga fakalaumālie. ʻE lava ke mole ai meiate kinautolu ʻa e malava ke fakafaikehekeheʻi ʻa e moʻoní mei he loí, ʻa e leleí mei he koví. Naʻe lea ʻa e palōfita ko ʻAiseá ʻo kau ki he faʻahinga ʻi he fakapoʻuli peheé ʻi heʻene tohi: “ʻOiaue ʻa kinautolu ʻoku lau ʻa e kovi ko e lelei, pea ʻoku lau ʻa e lelei ko e kovi; ʻoku nau tuku ʻa e poʻuli ko e maama, mo e maama ko e poʻuli; ʻoku nau tuku ʻa e kona ko e melie, mo e melie ko e kona!” (Aisea 5:20) Ko e faʻahinga ʻoku nau nofo ʻi he fakapoʻuli fakalaumālié ʻoku tākiekina ai kinautolu ʻe he ʻotua ʻo e fakapoʻulí, ko Sētane ko e Tēvoló, pea ʻoku faai atu pē ʻo nau mavahe ai mei he matavai ʻo e māmá mo e moʻuí.—Efeso 4:​17-19.

Mei he Fakapoʻulí ki he Māmá​—Ko e Pole

9. Fakamatalaʻi ʻa e anga ʻo e manako ʻa e kau faihalá ki he fakapoʻulí fakatouʻosi ʻi he fakapoʻuli moʻoní pea ʻi he ʻuhinga fakalaumālié.

⁹ Naʻe fakahaaʻi ʻe he tokotaha faitōnunga ko Siopé ʻa e manako ʻa e kau faihalá ki he fakapoʻuli moʻoní ʻi heʻene pehē: “Oku tatali ae mata oe tonofefine ki he efiafi bouli, o ne behe, E ikai jio ha mata kiate au, bea ne fakabuli hono mata.” (Siope 24:​15, PM) ʻOku toe ʻi he fakapoʻuli fakalaumālié  foki ʻa e kau faihalá, pea ko e fakapoʻuli ko iá ʻoku malava ke pule fakaʻaufuli. Naʻe pehē ʻe he ʻapositolo ko Paulá ko e fehokotaki fakasino taʻetāú, kaihaʻá, mānumanú, konaá, lea koví, mo e faʻao fakamālohí ʻoku hoko lahi ia ʻi he lotolotonga ʻo e faʻahinga ʻoku fihia ʻi he fakapoʻuli ko iá. Ka ko ha taha pē ʻoku haʻu ki he maama ʻo e Folofola ʻa e ʻOtuá ʻe lava ke liliu. Ko e malava ha liliu peheé ʻoku fakamahino ia ʻe Paula ʻi heʻene tohi ki he kau Kolinitoó. Naʻe angaʻaki ʻe he kau Kalisitiane Kolinitō tokolahi hono fai ʻa e ngaahi ngāue ʻo e fakapoʻulí, ka naʻe tala ʻe Paula kiate kinautolu: “Ka kuo fufulu akimoutolu, ka kuo fakatabuʻi akimoutolu, ka kuo fakatonuhia akimoutolu, i he huafa oe Eiki ko Jisu, bea i he Laumalie o ho tau Otua.”—1 Kolinito 6:​9-11, PM.

10, 11. (a) Naʻe anga-fēfē hono fakahāhā ʻe Sīsū ʻa e fakaʻatuʻí ki ha tangata ʻa ia naʻá ne toe fakafoki ki ai ʻene vakaí? (e) Ko e hā ʻoku ʻikai fili ai ʻe he tokolahi ʻa e māmá?

¹⁰ ʻI he hū mai ʻa ha taha mei ha fakapoʻuli matolú ki he māmá, ngalingali ʻe fiemaʻu ki hono matá ha kiʻi taimi siʻi ke anga ai ki he māmá. ʻI Petesaita, naʻe fakamoʻui ai ʻe Sīsū ha tangata kui ka naʻe fai ia ʻi he anga-ʻofa ʻi ha ngaahi sitepu hokohoko. “Pea ne puke ʻa e nima ʻo e kui, ʻo ne ʻave ia kituʻa kolo; ʻo ne aʻanu ki hono ongo foʻi mata, ʻo ne ʻai hono ongo nima ki he tangata, ʻo ne fehuʻi kiate ia, ʻOku ke ʻilo ha meʻa? Pea hanga hake ia ʻo ne pehē, ʻOku ou sio ki he kakai; he ʻoku hā ha meʻa hange ko ha ngaahi ʻakau, ka ʻoku nau ʻeveʻeva. Pea ne toki ʻai hono nima ki he mata ʻo e tangata ko hono tuʻo ua; pea ne sio tonu, ʻo ne toe moʻui ʻo haohaoa, pea hili ia naʻa ne matuaki ʻilo meʻa mamaʻo.” (Maake 8:​23-25) ʻOku hā mahino, naʻe fakafoki māmālie mai ʻe Sīsū ʻa e vakai ʻa e tangatá koeʻuhi ke malava ʻa e tangatá ʻo fakaangaanga ʻa ia tonu ki he ulo ngingila mai ʻa e laʻaá. ʻOku lava ke tau sioloto atu ki he fiefia ʻa e tangata ko iá ʻi heʻene malava ke sió.

¹¹ Kae kehe, ko e fiefia naʻe ongoʻi ʻe he tangata ko iá ʻoku lakasi ia ʻe he fiefia ʻa e faʻahinga ko ia ʻoku tokoniʻi ke nau ʻasi mai, ʻi he sitepu ki he sitepu, mei he fakapoʻuli fakalaumālié ki he maama ʻo e moʻoní. ʻI heʻetau vakai atu ki heʻenau fiefiá, ʻoku tau fifili nai pe ko e hā ʻoku ʻikai tohoakiʻi mai ai ʻa e tokolahi ange ki he māmá. ʻOku ʻomai ʻe Sīsū ʻa e ʻuhingá: “Ko eni ia ʻa e fakamāu: kuo hoko mai ʻa e māma ki māmani, pea ʻofa ʻa e kakai ki he poʻuli ʻo ʻikai ki he maama; he ko ʻenau ngaahi ngaue naʻe kovi. He ʻilonga ʻa ia ʻoku ngaue kovi ʻoku ne fehiʻa ki he maama, pea ʻoku ʻikai te ne haʻu ki he maama, naʻa ʻilonga ʻene ngaahi ngaue.” (Sione 3:​19, 20) ʻIo, ʻoku ʻofa ʻa e tokolahi ki hono fai ʻo e “ngāue kovi”—hangē ko e ʻulungaanga taʻetāú, fakafeʻātungiá, loí, kākaá, mo e kaihaʻá—pea ko e fakapoʻuli fakalaumālie ʻa Sētané ko ha ʻātakai lelei ʻaupito ia kiate kinautolu ke fai ai ʻa e meʻa ʻoku nau fakaʻamu ki aí.

Ko Hono Fai ʻa e Fakalakalaka ʻi he Māmá

12. ʻI he ngaahi founga fē kuo tau maʻu ai ʻa e ʻaonga ʻi he haʻu ki he māmá?

¹² Koeʻuhi kuo tau hoko mai ki ha ʻilo ʻo e māmá, ko e hā ʻa e ngaahi liliu kuo tau mātā ʻiate kitautolú? ʻOku lelei ʻi he taimi ʻe niʻihi ke tau toe sio ki mui ʻo sivisiviʻi ʻa e fakalakalaka fakalaumālie kuo tau faí. Ko e hā ʻa e ngaahi tōʻonga kovi kuo tau liʻaki atú? Ko e hā ʻa e ngaahi palopalema ʻi heʻetau moʻuí kuo tau malava ke fakatonutonú? Kuo anga-fēfē ʻa e liliu ʻo ʻetau ngaahi palani ki he kahaʻú? ʻI he mālohi ʻo Sihová fakataha mo e tokoni ʻa hono laumālie māʻoniʻoní, ʻe lava ke tau hokohoko atu ai ke fai ʻa e ngaahi liliu ʻi hotau angaʻitangatá pea mo e anga ʻo e fakakaukau ʻe fakahaaʻi ai ʻoku tau tali ʻa e māmá. (Efeso 4:​23, 24) ʻOku fakalea peheni ia ʻe Paula: “Ko e koto poʻuli kimoutolu ʻi muʻa, ka ʻi onoponi ko e koto maama kimoutolu ʻi he ʻEiki: mou laka ʻo tāu mo e fanau ʻa maama; (he ko e fua ʻo e maama  ʻoku fou ʻi he lelei kotoa pe mo e totonu mo e moʻoni).” (Efeso 5:​8, 9) ʻI hono fakaʻatā kitautolu tonu ke tataki ʻe he maama ʻa Sihová ʻoku ʻomai ai kiate kitautolu ha ʻamanaki mo ha taumuʻa pea pehē ki hono fakalahi ʻa e fiefia ʻo e moʻui ʻa e faʻahinga takatakai ʻiate kitautolú. Pea ko ha fiefia lahi ē ʻoku ʻoatu ki he loto ʻo Sihová ʻi heʻetau fai ʻa e ngaahi liliu peheé!​—Palovepi 27:11.

13. ʻE lava fēfē ke tau fakahāhā ʻetau houngaʻia ki he maama ʻa Sihová, pea ko e hā ʻoku fiemaʻu ki ha ʻalunga peheé?

¹³ ʻOku tau fakahāhā ʻetau houngaʻia ki he moʻui fiefia ange ʻoku tau maʻú ʻaki hono tapua atu ʻa e maama ʻa Sihová—ʻo vahevahe atu ʻa e meʻa kuo tau ako mei he Tohitapú ki he ngaahi mēmipa ʻo hotau fāmilí, ngaahi kaumeʻá, mo e ngaahi kaungāʻapí. (Mātiu 5:​12-16; 24:14) ʻOku hoko ʻetau malangá fakataha mo ʻetau moʻui alafaʻifaʻitakiʻanga faka-Kalisitiané ko ha valoki ki he faʻahinga ko ia ʻoku nau fakafisi ke fanongó. ʻOku fakamatala ʻa Paula: “Mou sivi ʻo ʻilo, pe ko e ha ʻa e meʻa ʻe hōifua ai ʻa e ʻEiki. Pea ʻoua naʻa mou kau ʻi he ngaahi ngaue taʻefua ʻo e fakapoʻuli; kaekehe, mou valoki ki ai muʻa.” (Efeso 5:​10, 11) Ko hono tokoniʻi ʻa e niʻihi kehé ke nau siʻaki ʻa e fakapoʻulí pea fili ʻa e māmá ʻoku fiemaʻu ki ai ʻa e loto-toʻa ʻi heʻetau tafaʻakí. Ko e meʻa ʻoku toe mahuʻinga angé, ʻoku fiemaʻu ki ai ʻa e manavaʻofa mo e tokanga ki he niʻihi kehé pea mo ha holi fakamātoato ke vahevahe atu ʻa e maama ʻo e moʻoní kia kinautolu ki haʻanau lelei taʻengata.—Mātiu 28:​19, 20.

Tokanga Telia ʻa e Ngaahi Maama Tauhelé!

14. ʻI he fekauʻaki mo e māmá, ko e hā ʻa e fakatokanga ʻoku totonu ke tau tokanga ki aí?

¹⁴ Ki he faʻahinga ʻoku nau ʻi tahi he lolotonga ʻo e ngaahi houa ʻo e fakapoʻulí, ko ha meʻa fakafiefia ʻa e sio atu ki ha maama. ʻI he ngaahi taimi ʻi he kuohilí, naʻe tutu ai ʻa e ngaahi afi ʻi he ngaahi lilifa makaʻia ʻo ʻIngilaní ke fakahā ʻa e feituʻu ʻe lava ke maʻu ai ʻa e ungaʻanga mei he ngaahi matangí. Naʻe houngaʻia lahi ʻa e kau kauvaka ʻo e ngaahi vaká ʻi he tataki kinautolu ʻe he ngaahi maama ko ʻení ki he ngaahi taulanga malú. Kae kehe, ko e ngaahi afi ʻe niʻihi, ko e ngaahi tauhele. ʻI he ʻikai maʻu ai ha taulangá, naʻe takihalaʻi ai ʻa e ngaahi vaka lahi ʻo nau tūkia ʻi he ʻuluʻulú, ʻa ia naʻe kaihaʻasi ai ʻenau ngaahi utá. ʻI he māmani kākā ko ʻení, kuo pau ke tau tokanga ke ʻoua naʻa tohoaki kitautolu ki he ngaahi maama tauhele ʻa ia ʻe lava ke nau tauheleʻi kitautolu ki he tūkia fakalaumālié. “Naa mo Setan[e] oku fakakehe foki ia koe agelo oe māma,” ko e meʻa ia ʻoku tala mai kiate kitautolú. Pehē foki, ko ʻene kau sevānití, ʻo kau ai ʻa e kau tafoki mei he moʻoní, ko e “kau gaue fakakākā” ʻa ia ʻoku nau “fakakehe foki ke hage koe kau faifekau oe maonioni.” Kapau te tau tali ʻa e ngaahi fakaʻuhinga loi ʻa e faʻahinga peheé, ko ʻetau falala ki he Folofola ʻa Sihova ʻo e moʻoní, ʻa e Tohitapú, ʻe lava ke vaivai pea ʻe lava ke mate ai ʻetau tuí.—2 Kolinito 11:​13-15, PM; 1 Timote 1:19.

15. Ko e hā te ne tokoniʻi kitautolu ke tau nofo maʻu ʻi he hala ʻoku taki atu ki he moʻuí?

 ¹⁵ Naʻe tohi ʻe he tokotaha-tohi-sāmé: “Ko hoʻo folofola ko e tuhulu ki heʻeku laka, mo e maama ki hoku hala.” (Sāme 119:105) ʻIo, ko e ‘hala ʻefiʻefi ʻoku fakatau ki he moʻuí’ ʻoku fakamaama mahino mai ia ʻe hotau ʻOtua ʻofá, ʻe Sihova, ʻa ia “ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (Mātiu 7:14; 1 Timote 2:4) Ko hono ngāueʻaki ʻo e ngaahi tefitoʻi moʻoni ʻi he Tohitapú ʻe maluʻi ai kitautolu mei he hē mamaʻo mei he hala ʻefiʻefi ko iá ki he ngaahi hala ʻo e fakapoʻulí. Naʻe tohi ʻe Paula: “Oku foaki mai ae Tohitabu kotoabe i he fakamanava ae Otua, bea oku aoga ia ki he akonaki, moe valoki, moe fakatonutonu, moe fakaboto ki he maonioni.” (2 Timote 3:​16, PM) ʻI heʻetau tupu fakalaumālié, ʻoku akoʻi kitautolu ʻe he Folofola ʻa e ʻOtuá. Te tau lava, ʻi he maama ʻo e Folofola ʻa e ʻOtuá, ʻo valokiʻi kitautolu, pe hoko ʻo valokiʻi, kapau ʻe fiemaʻu ʻe he kau tauhi-sipi ʻofa ʻi he fakatahaʻangá. Pehē foki, ʻe lava ke tau fakatonutonu ʻa e ngaahi meʻá pea tali anga-fakatōkilalo ʻa e fakapoto ki he māʻoniʻoní ke tau hanganaki ʻaʻeva ʻi he hala ki he moʻuí.

ʻAʻeva Loto-Houngaʻia ʻi he Māmá

16. ʻE lava fēfē ke tau fakahāhā ʻa e houngaʻia ki he tokonaki fakaofo ʻa Sihova ko e māmá?

¹⁶ ʻE lava fēfē ke tau fakahāhā ʻa e loto-houngaʻia ki he tokonaki fakaofo ʻa Sihova ko e māmá? ʻOku tala mai ʻe he Sione vahe 9 kiate kitautolu ʻi hono fakamoʻui ko ia ʻe Sīsū ha tangata naʻe fanauʻi kui maí, naʻe ueʻi ai ʻa e tangatá ke ne fakahā ʻene houngaʻiá. Anga-fēfē? Naʻá ne tui kia Sīsū ko e ʻAlo ʻo e ʻOtuá pea fakahaaʻi fakahāhā ia “ko e palōfita.” ʻIkai ngata aí, naʻá ne lea loto-toʻa ʻo fakafepakiʻi ʻa e faʻahinga ko ia naʻa nau feinga ke fakasiʻisiʻiʻi ʻa e mana ʻa Sīsuú. (Sione 9:​17, 30-34) ʻOku ui ʻe he ʻapositolo ko Pitá ʻa e kau mēmipa pani ʻo e fakatahaʻanga Kalisitiané “ko e faʻahinga ʻoku maʻane meʻa tonu.” Ko e hā hono ʻuhingá? Koeʻuhí ʻoku nau maʻu ʻa e fakakaukau houngaʻia tatau mo e tangata ko ia naʻe fanauʻi kui maí pea naʻe fakamoʻuí. ʻOku nau fakahāhā ʻa e houngaʻia kia Sihova, ko honau Tokotaha-Foakí, ʻaki hono ‘ongoongoa atu ʻa e ngaahi lelei ʻo ʻEne ʻAfió, ʻa ia naʻá ne ui mai kinautolu mei he poʻulí ki he maama fakaofo ʻaʻaná.’ (1 Pita 2:9; Kolose 1:13) ʻOku maʻu ʻe he faʻahinga ʻoku nau maʻu ha ʻamanaki fakaemāmaní ʻa e laumālie houngaʻia tatau, pea ʻoku nau poupou ki honau fanga tokoua paní ʻi hono talaki fakahāhā atu ʻa e “ngaahi lelei” ʻa Sihová. Ko ha monū taʻealafakatataua ē ʻoku foaki ʻe he ʻOtuá ki he faʻahinga taʻehaohaoa ʻo e tangatá!

17, 18. (a) Ko e hā ʻa e fatongia ʻo e tokotaha taki taha? (e) ʻI he faʻifaʻitaki kia Tīmoté, ko e hā ʻoku fakalototoʻaʻi ki he Kalisitiane taki taha ke fakaʻehiʻehi mei aí?

¹⁷ ʻOku mātuʻaki mahuʻinga ʻa hono maʻu ha houngaʻia loto-moʻoni ki he maama ʻo e moʻoní. Manatuʻi, ʻoku ʻikai ha taha ia ʻo kitautolu ʻoku fanauʻi mai pē kuó ne ʻiloʻi ʻa e moʻoní. ʻOku ako ki ai ʻa e niʻihi ʻi heʻenau hoko ko e kakai lalahí, pea ʻoku nau ʻilo vave ki he lelei ange ʻa e māmá ʻi he fakapoʻulí. ʻOku maʻu ʻe he niʻihi kehe ʻa e monū lahi ʻo hono tauhi hake ʻe ha ngaahi mātuʻa manavahē-ʻOtua. ʻI he tuʻunga ko iá, ʻe faingofua nai ai ke fakamaʻamaʻaʻi ʻa e māmá. Ko ha Fakamoʻoni ʻe taha ʻa ia ko ʻene ongo mātuʻá naʻá na tauhi kia Sihova ki muʻa ʻi hono fanauʻi mai iá ʻokú ne tala moʻoni mai naʻe fiemaʻu kiate ia ʻa e taimi lahi mo e feinga lahi ke mahino ʻa e ʻuhinga mo e mahuʻinga kakato ʻo e ngaahi moʻoni naʻe akoʻi kiate ia mei he kei valevalé. (2 Timote 3:15) Kei siʻi pe taʻumotuʻa, ko kitautolu taki taha ʻoku fiemaʻu ke tau fakatupu ha houngaʻia loloto ki he moʻoni kuo fakahaaʻi mai ʻe Sihová.

¹⁸ Naʻe akoʻi ki he kiʻi talavou ko Tīmoté ʻa e “ngaahi tohi māʻoniʻoní” mei heʻene kei valevalé, ka naʻá ne toki maʻu pē ʻa e matuʻotuʻa ʻi he tuʻunga ko ha Kalisitiané ʻi heʻene fakafitefitaʻa tonu ʻi heʻene ngāue fakafaifekaú. (2 Timote 3:​15, NW) Naʻá ne taau leva ai ke tokoni ki he ʻapositolo ko Paulá, ʻa ia naʻe enginaki kiate ia: “Fai hoʻo lelei tahá ke ʻai koe ke ke fakahōifua ki he ʻOtuá, ko ha tangata ngāue ʻoku ʻikai ha meʻa ke mā ai, ʻi hono  tofa totonu ʻa e folofola ʻo e moʻoní.” ʻOfa ke tau hoko kotoa ʻo hangē ko Tīmoté, ʻo fakaʻehiʻehi mei hano fai ha meʻa te ne ʻai nai kitautolu ke tau mā ai—pe ʻai ai ʻa Sihova ke ne mā ʻiate kitautolu!—2 Timote 2:​15, NW.

19. (a) ʻI he hangē ko Tēvitá, ʻoku maʻu ʻe kitautolu kotoa ʻa e ʻuhinga ke tau leaʻaki ʻa e hā? (e) Ko e hā ʻe lāulea ki ai ʻi he kupu hoko maí?

¹⁹ ʻOku tau maʻu ʻa e ʻuhinga kotoa ke tau fakahīkihikiʻi ʻa Sihova, ʻa ia naʻá ne foaki mai kiate kitautolu ʻa e maama ʻo ʻene moʻoní. ʻI he hangē ko Tuʻi Tēvitá, ʻoku tau pehē: “Ko hoku mama akoe, E Jihova: bea e fakamama e Jihova a eku fakabouli.” (2 Samiuela 22:​29, PM) Neongo ia, ʻoua te tau fakatoʻotoʻa ke hoko ʻo fakataʻetaʻehohaʻa, he ʻe malava ʻe he meʻa ko iá ʻo taki kitautolu ke tau toe foki ki he fakapoʻulí ʻa ē kuo fakahaofi kitautolu mei aí. Ko ia ai, ko e kupu hoko maí te ne tokoniʻi kitautolu ke tau fakamahuʻingaʻi ʻa e mahuʻinga ʻoku tau ʻai ki he moʻoni fakaʻotuá ʻi heʻetau moʻuí.

Ko e Hā Kuó Ke Akó?

• ʻOku anga-fēfē hono tokonaki mai ʻe Sihova ʻa e fakamaama fakalaumālié?

• Ko e hā ʻa e pole ʻoku ʻomai ʻe he fakapoʻuli fakalaumālie ʻoku takatakai ʻiate kitautolú?

• Ko e hā ʻa e ngaahi fakatuʻutāmaki kuo pau ke tau fakaʻehiʻehi mei aí?

• ʻE lava fēfē ke tau fakahāhaaʻi ʻetau loto-houngaʻia ki he maama ʻo e moʻoní?

[Fehuʻi ki he Ako]

[Fakatātā ʻi he peesi 8]

Ko Sihova ʻa e matavai ʻo e maama fakamatelié mo e fakalaumālié

[Fakatātā ʻi he peesi 10]

Hangē pē ko hono fakamoʻui māmālie ʻe Sīsū ha tangata kuí, ʻoku pehē pē ʻene tokoniʻi kitautolu ke tau malanga hake mei he fakapoʻuli fakalaumālié

[Fakatātā ʻi he peesi 11]

Ko e hoko ʻo takihalaʻi ʻe he ngaahi maama loi ʻa Sētané ʻe iku atu ai ki he tūkia fakalaumālie