“Sai, ʻe Mamahi Nai Eni”

KUÓ KE fanongo ʻi ha taimi ki he ngaahi lea ko iá? Mahalo pē naʻe leaʻaki ia ʻe ha toketā pe ko ha neesi ki muʻa ke fakahoko ha faitoʻo naʻe fiemaʻu ke fai.

Ngalingali naʻe ʻikai te ke fakafisi ke tali ʻa e faitoʻó koeʻuhi pē ke kalofi ʻa e mamahi ne tomuʻa fakakaukau atu ki aí. ʻI hono kehé, naʻá ke kātakiʻi ʻa e mamahí koeʻuhi ke utu ha ngaahi ʻaonga fakatupu moʻuilelei ʻi he kahaʻú. ʻI he ngaahi tuʻunga lahi, ko e tali pe talitekeʻi ʻo e faitoʻo taʻefakafiemālié ʻe lava ke hoko ia ko ha meʻa fekauʻaki mo e mate pe ko e moʻui.

Neongo ʻe ʻikai nai te tau fiemaʻu maʻu pē ʻa e tokanga ʻa ha toketā fakafaitoʻo, ko kitautolu hono kotoa ʻi he tuʻunga ko e faʻahinga taʻehaohaoa ʻo e tangatá ʻoku tau fiemaʻu ʻa e akonaki, pe fakatonutonu, naʻa mo ia ʻi he taimi ʻe niʻihi, ʻe fakatupu mamahi nai. (Selemaia 10:23) ʻI hono fakamamafaʻi ʻa e fiemaʻu ko ení ʻi he tafaʻaki ʻa e fānaú, ʻoku pehē ʻe he Tohitapú: “ʻOku tavani ʻa e vale ʻi he loto ʻo ha tamasiʻi: ko e ʻakau ako [“akonakí,” NW] te ne vaea ke mavahe.”​—Palovepi 22:15.

Ko e ʻakaú, ʻi he fakatātā ko ení, ko ha fakaʻilonga ia ʻo e mafai fakaemātuʻá. Ko e moʻoni, ko e fānau tokosiʻi pē ʻoku nau saiʻia he akonakí. Kapau ʻoku kau ki ai ha tautea ʻi ha faʻahinga founga, te nau fehiʻa nai ai. Kae kehe, ko e ngaahi mātuʻa poto mo anga-ʻofá ʻoku nau sio fakalaka atu ʻi he ngaahi ongoʻi mamahi ʻa e kiʻi tamá ki he lelei ʻe hoko ʻamuí. Ko e ngaahi mātuʻa Kalisitiané ʻoku nau ʻiloʻi ko e Folofola ʻa e ʻOtuá ʻoku moʻoni ia ʻi heʻene pehē: “Ka fai ha kinisi [“akonaki,” NW], talaʻehai ʻoku tau ongoʻi leva ko e meʻa fakafiefia ia, kaekehe, ko e meʻa fakamamahi: ka ʻe faifai pea tupu ai kiate kinautolu kuo ʻosi ʻa ako ai, ha fua ʻoku hoa mo e melino, ko e koto maʻoniʻoni.”​—Hepelu 12:11; Palovepi 13:24.

Ko e moʻoni, ʻoku ʻikai ko e fānaú pē ʻoku fiemaʻu ki ai ʻa e akonakí. ʻOku fiemaʻu mo ia foki ki he kakai lalahí. ʻOku lau ʻa e Tohitapú ki he kakai lalahí ʻi heʻene pehē: “Pukenima ʻa e akonaki; ʻoua ʻe tukuange: tauhi ke maʻu; he ko hoʻo moʻui ia.” (Palovepi 4:​13) ʻIo, ko e faʻahinga potó—kei siʻi mo e taʻumotuʻa—te nau koloaʻaki ʻa e akonaki makatuʻunga ʻi he Folofola ʻa e ʻOtuá, ko e Tohitapú, koeʻuhi ko hono fai iá, ʻe iku ai ʻo tolonga ʻenau moʻuí.