“Haʻu Kiate Au, . . . pea Te U Fakaivifoʻou Kimoutolu”

Ngaahi Fakataha ʻOku Fakaʻaiʻai Ai ʻa e ʻOfá mo e Ngaahi Ngāue Leleí

MEI Toronto ki Tōkiō, mei Mosikou ki Montevideo​—ʻi ha ngaahi taimi kehekehe ʻi he uike taki taha, ʻoku ʻaukolo ai ʻa e laui miliona ʻo e Kau Fakamoʻoni ʻa Sihová mo honau ngaahi kaungāmeʻá ki honau ngaahi feituʻu faiʻanga lotú. Ko e faʻahinga tāutahá ni ʻoku kau ai ʻa e kau tangata maʻu fāmili ngāue mālohi, ʻa ia ʻoku nau ongosia hili ia ha ʻaho femoʻuekina ʻi he ngāué; ngaahi uaifi mo e ngaahi faʻē ngāue tōtōivi fakataha mo e fānau īkí; kau talavou longomoʻui ʻa ia naʻa nau fakamoleki ha ʻaho ʻi he akoʻangá; faʻahinga kauvaivai taʻumotuʻa ange ʻa ia ʻoku māmālie ʻenau laká koeʻuhi ko e langá mo e mamahí; kau uitou mo e kau paea loto-toʻa; pea mo e ngaahi soulu loto-mafasia ʻoku nau fiemaʻu fakafiemālié.

Ko e Kau Fakamoʻoni ko eni ʻa Sihová ʻoku nau ngāueʻaki ha ngaahi tuʻunga lahi ʻo e fefonongaʻakí​—mei he ngaahi fuʻu lēlue uta pāsese omá ki he ʻasí, mei he kā feʻefiʻefihi ʻi lolofonuá ki he lolí. Kuo pau ki he niʻihi ke nau kolosi ʻi ha ngaahi vaitafe kalokataileʻia, lolotonga ia kuo pau ke kātekina ʻe he niʻihi ʻa e fefonongaʻaki fakahohaʻa ʻo e ngaahi kolo lalahí. Ko e hā ʻoku fai ai ʻe he fuʻu kakaí ni kotoa ha feinga mātuʻaki lahí?

Ko hono tefitó, koeʻuhi ko e maʻu mo e kau ʻi he ngaahi fakataha faka-Kalisitiané ko ha founga mahuʻinga ia ke fai ai ʻa e lotu kia Sihova ko e ʻOtuá. (Hepelu 13:15) Naʻe lave ʻa e ʻapositolo ko Paulá ki ha ʻuhinga ʻe taha ʻi heʻene tohi: “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, . . . ka mou feenginakiʻaki, pea ʻasili he ʻoku mou sio ki he fakaofiofi mai ʻa e ʻaho.” (Hepelu 10:​24, 25, fakaʻītali ʻamautolu.) Naʻe fakaongo atu heni ʻe Paula ʻa e ongoʻi ʻa e tangata-tohi-saame ko Tēvitá, ʻa ia naʻá ne hiva: “Naaku fiefia i he e nau behe mai kiate au, Ke tau o ki he fale o Jihova.”​—Sāme 122:​1, PM.

Ko e hā ʻoku fiefia ai ʻa e kau Kalisitiané ʻi he ʻi ai ʻi heʻenau ngaahi fakatahá? Koeʻuhí ko e faʻahinga ʻoku kau ki aí ʻoku ʻikai ko ha kau mamata pē. ʻI hono kehé, ʻoku ʻoange ʻe he ngaahi fakatahá kia kinautolu ʻa e ngaahi faingamālie ke nau hoko ai ʻo feʻilongaki. ʻOku tautefito ʻa e tokonaki mai ʻe he ngaahi fakatahataha pehení ʻa e ngaahi faingamālie ke fai ai ha foaki, ʻo ʻikai ko e maʻu pē, pea ke tauʻaki fefakaʻaiʻaiʻaki ke fakahāhā ʻa e ʻofa mo e fai ʻa e ngaahi ngāue lelei. ʻOku tokoni eni ke ʻai ʻa e ngaahi fakatahá ko e ngaahi taimi langa hake. ʻIkai ko ia pē, ko e ngaahi fakataha faka-Kalisitiané ko e taha ia ʻo e ngaahi founga ʻoku fakahoko ai ʻe Sīsū ʻa ʻene  talaʻofa: “Haʻu kiate au, . . . pea te u fakaivifoʻou kimoutolu.”​—Mātiu 11:​28, NW.

Ko ha Taulangaū ʻo e Fiemālie mo e Tokanga

ʻOku maʻu ʻe he Kau Fakamoʻoni ʻa Sihová ʻa e ngaahi ʻuhinga lelei ke vakai ai ki heʻenau ngaahi fakatahá ʻoku fakaivifoʻou. Ko e ʻuhinga ʻe tahá, ʻi he ngaahi fakatahá ʻoku ʻomai ai ʻa e meʻakai fakalaumālié ʻi he taimi totonu ʻe he “tamaioeiki agatonu mo boto.” (Mātiu 24:​45, PM) ʻOku toe fakahoko ʻe he ngaahi fakatahá ha ngafa mahuʻinga ʻi hono ngaohi ʻa e kau sevāniti ʻa Sihová ko e kau faiako pōtoʻi mo faivelenga ʻo e Folofola ʻa e ʻOtuá. Tānaki atu ki ai, ʻi he Fale Fakatahaʻangá, ʻoku lava ke maʻu ai ʻe ha taha ha kulupu ʻo e ngaahi kaumeʻa anga-ʻofa, mahuʻingaʻia mo tokanga ʻa ia ʻoku nau mateuteu mo loto-lelei ke tokoniʻi mo fakafiemālieʻi ʻa e niʻihi kehé ʻi he ngaahi taimi faingataʻá.​—2 Kolinito 7:​5-7.

Ko e meʻa eni naʻe hokosia ʻe Phillis, ko ha uitou ʻa ia naʻe mole hono husepānití ʻi he taimi naʻe taʻu nima mo valu ai ʻa ʻene ongo tamaikí. ʻI hono fakamatalaʻi ʻa e tākiekina fakaivifoʻou naʻe fai ʻe he ngaahi fakataha faka-Kalisitiané kiate ia mo ʻene ongo tamaikí, naʻá ne pehē: “Ko ha fakafiemālie ia ke ʻalu ki he Fale Fakatahaʻangá koeʻuhi ʻoku fakahaaʻi maʻu pē ai ʻe he kaungātuí ʻenau ʻofá mo e tokangá ʻaki ha fāʻofua, ko ha fakakaukau Fakatohitapu, pe ko ha lulululu anga-ʻofa. Ko ha feituʻu ia naʻá ku loto maʻu pē ke ʻi ai.”​—1 Tesalonaika 5:14.

ʻI he hili hano fai ha tafa lahi ʻo Marie, naʻe pehē ʻe heʻene toketaá ʻe feʻunga mo e uike ʻe ono ʻo ʻikai toe siʻi hifo ai peá ne toki sai. Lolotonga ʻa e muʻaki ngaahi uike ʻo ʻene fakaakeaké, naʻe ʻikai lava ʻe Marie ke maʻu ʻa e ngaahi fakatahá. Naʻe fakatokangaʻi ʻe heʻene toketaá naʻe ʻikai te ne fuʻu fiefia ʻo hangē ko ia ki muʻá. ʻI heʻene ʻiloʻi naʻe ʻikai te ne maʻu ʻa e ngaahi fakatahá, naʻá ne fakalototoʻaʻi ia ke ne fai pehē. Naʻe tali ʻe Marie ʻe ʻikai ke loto ʻa hono husepānití, ʻa ia naʻe ʻikai te na maʻu ha tui tataú, ke tuku ia ke ne ʻalu ki he ngaahi fakatahá ko ʻene maemaeekina ki heʻene moʻuileleí. Naʻe tohi ai ʻe he toketaá ha tuʻutuʻuni fakaʻofisiale ʻo “fekauʻi” ai ʻa Marie ke ʻalu ki he Fale Fakatahaʻangá ki ha fakalototoʻa mo ha feohi fakatupu langa hake. ʻOku fakaʻosiʻaki ʻe Marie: “ʻI he hili ʻa e maʻu ha fakataha ʻe taha, naʻá ku ongoʻi mātuʻaki sai lahi ange. Naʻe kamata ke u kai, naʻá ku mohe ʻi he poó kotoa, naʻe ʻikai toe fiemaʻu ke u toutou ngāueʻaki ʻa e faitoʻo langá pea naʻá ku toe mata malimali!”​—Palovepi 16:24.

Ko e ʻātakai anga-ʻofa ʻo e ngaahi fakataha faka-Kalisitiané ʻoku ʻikai ke taʻefakatokangaʻi ia ʻe he kakai mei tuʻá. Naʻe fili ʻe ha tokotaha ako ʻe taha ke siofi ʻa e Kau Fakamoʻoni ʻa Sihová koeʻuhi ke hiki ai ha fakamatala ki heʻene kalasi ʻefinolosiá. Fekauʻaki mo e ʻatimosifia ʻi he ngaahi fakatahá, naʻá ne tohi ʻi heʻene pepá: “Ko e talitali māfana naʻá ku maʻú . . . [naʻe] fakaueʻiloto ʻaupito. . . . Ko e anga-fakakaumeʻa ʻa e Kau Fakamoʻoni ʻa Sihová ko ha ʻulungaanga naʻe mātuʻaki eʻa ʻaupito pea ʻoku ou ongoʻi ko e konga mahuʻinga taha ia ʻo e ʻātakaí.”​—1 Kolinito 14:25.

ʻI he māmani faingataʻá ni, ko e fakatahaʻanga Kalisitiané ko ha taulangaū fakalaumālie. Ko ha feituʻu ʻo e melino mo e ʻofa. ʻI he ʻi ai ʻi he ngaahi fakatahá, ʻe lava ke ke hokosia tonu ai ʻa e moʻoni ʻo e lea ʻa e tokotaha-tohi-sāmé: “Vakai! Hono ʻikai lelei pea hono ʻikai sai ki he fanga tokouá ke nofo fakataha ʻi he fāʻūtaha!”​—Sāme 133:​1, NW.

[Puha/Fakatātā ʻi he peesi 25]

FAKATŌLIʻA HA FIEMAʻU MAKEHE

ʻE malava fēfē ke maʻu ʻe he faʻahinga ʻoku taʻemalava ke fanongó ha ʻaonga mei he ngaahi fakataha faka-Kalisitiané? Takatakai ʻi he māmaní, ʻoku fokotuʻu ai ʻe he Kau Fakamoʻoni ʻa Sihová ha ngaahi fakatahaʻanga lea-fakaʻilonga. Lolotonga ʻa e taʻu ʻe 13 kuo maliu atú, kuo fokotuʻu ai ʻi he ʻIunaite Seteté ʻa e ngaahi fakatahaʻanga lea-fakaʻilonga ʻe 27 mo e ngaahi kulupu lea-fakaʻilonga ʻe 43. ʻI he ngaahi fonua kehe ʻo ʻikai toe siʻi hifo ʻi he 40, ʻoku ʻi ai he taimí ni ʻa e ngaahi fakatahaʻanga lea-fakaʻilonga ʻe 140 nai. Kuo teuteuʻi ʻa e ngaahi tohi faka-Kalisitiané ʻi ha ngaahi foʻi vitiō ʻi he ngaahi lea-fakaʻilonga ʻe 13.

ʻOku ʻoatu ʻe he fakatahaʻanga Kalisitiané ki he kau tulí ʻa e faingamālie ke fakahīkihikiʻi ai ʻa Sihova. Ko Odile, ko ha tokotaha Katolika ki muʻa ʻi Falanisē ʻa ia naʻe puke ʻi he lolo mai ʻa e fuʻu loto-mafasia lahí pea maʻu mo e ngaahi fakakaukau taonakita, ʻokú ne houngaʻia loloto ʻi he ako faka-Tohitapu naʻá ne maʻu ʻi he ngaahi fakataha faka-Kalisitiané. “Naʻe toe foki mai ʻa hoku tuʻunga moʻuileleí mo e fiefia ʻi he moʻuí,” ko ʻene laú ia. “Kae hiliō ʻi he meʻa kotoa, kuó u maʻu ʻa e moʻoní. ʻOku ʻi ai he taimí ni ha taumuʻa ʻo e moʻuí kiate au.”