Tuʻunga-Taki Leleí—ʻE Lava Ke Tau Maʻu Ia mei Fē?

“ʻILONGA ha ʻapi, kuo pau naʻe langa ʻe ha taha,” ko e lau ia ʻa e Tohitapú, “pea ko ia naʻa ne langa ʻa e meʻa kotoa pe ko e ʻOtua.” (Hepelu 3:4; Fakahā 4:11) Koeʻuhi ko e ʻOtua moʻoni ko Sihová, ʻa hotau Tokotaha-Fakatupú, ʻokú ne “ʻilo ʻe ia hota anga.” (Sāme 103:14) ʻOkú ne ʻafioʻi kakato ʻa hotau ngaahi ngataʻangá mo ʻetau ngaahi fiemaʻú. Pea koeʻuhi ko e ʻOtua ʻofa ia, ʻokú ne loto ai ke fakatōliʻa ʻa e ngaahi fiemaʻu ko iá. (Sāme 145:16; 1 Sione 4:8) Ko ʻetau fiemaʻu ʻa e tuʻunga-taki leleí ʻoku ʻikai toe kaunga kehe ia.

Fakafou ʻi he palōfita ko ʻAiseá, naʻe fanongonongo ʻe Sihova: “Vakai, kuou foaki ia koe fakamooni ki he kakai, koe takimua moe bule ki he kakai.” (Aisea 55:​4, PM) Ko e fakaleleiʻanga ki he faingataʻa lahi fakaetataki ʻi he ʻaho ní ʻoku kau ai ʻa hono ʻiloʻi fakapapau ʻa e Taki ko ení​—ʻa ia naʻe fakanofo tonu ʻe he Māfimafi-Aoniú​—pea mo hono tali ʻa hono tuʻunga-takí. Ko hai leva ʻa e Taki mo e Pule ko eni ne tomuʻa talá? Ko e hā ʻa hono ngaahi fakaongoongolelei ʻi he tuʻunga ko ha takí? Ko fē te ne tataki kitautolu ki aí? Ko e hā kuo pau ke tau fai ke maʻu ai ʻa e ʻaonga mei hono tuʻunga-takí?

Hoko Mai ʻa e Taki Naʻe Talaʻofaʻakí

ʻI he taʻu nai ʻe 2,500 kuo maliu atú, naʻe hā ai ʻa e ʻāngelo ko Kepalelí ki he palōfita ko Tanielá ʻo fakahā kiate ia: “Ke ke ʻilo . . . pea  ke mahino kiate koe; mei he ʻalu atu ʻa e fekau ke fokotuʻu foʻou mo langa ʻa Selusalema, ʻo aʻu kia Misaia ko e ʻEiki [“Takí,” NW], ko e uike ʻe fitu mo e uike ʻe onongofulu ma ua: ʻe toe fokotuʻu mo langa ʻa malaʻe mo e ʻa, pea ʻi he ngaahi taimi ʻefihia foki.”​—Taniela 9:25.

ʻOku hā mahino, naʻe fakahā ʻe he ʻāngeló kia Taniela ʻa e taimi pau ʻo e hoko mai ʻa e Taki kuo fili ʻe Sihová. ʻE hā ʻa e ‘Misaia ko e Takí’ ʻi he ngata ʻa e uike ʻe 69, pe taʻu ʻe 483, ʻo lau mei he 455 K.M., ʻa e taimi naʻe ʻalu atu ai ʻa e fekau ke toe langa ʻa Selusalemá. a (Nehemaia 2:​1-8) Ko e hā naʻe hoko ʻi he ngataʻanga ʻo e vahaʻa taimi ko iá? ʻOku fakamatala ʻa e tohi Kōsipeli ko Luké: “I hono hogofulu ma nima oe taʻu oe bule a Taibiliusi Sisa, koe eiki bule a Bonito Bailato i Jutea, bea tuʻi ai a Helota i Kaleli, [29 T.S.], . . . nae hoko ae folofola ae Otua kia Jone koe foha o Sakalia i he toafa. Bea haʻu ia ki he botu fonua kotoabe o ofi ki Joatani, o ne malaga aki ae babitaiso oe fakatomala ki he fakamolemole oe agahala.” ʻI he taimi ko iá, ‘nae lolotonga amanaki ae kakaí’ ki he Mīsaia ko e Takimuʻá. (Luke 3:​1-3, 15, PM) Neongo naʻe haʻu ha fuʻu kakai kia Sione, naʻe ʻikai ko ia ʻa e Taki ko iá.

Pea ʻi ʻOkatopa nai ʻo e 29 T.S., naʻe haʻu ai ʻa Sīsū ʻo Nasaletí kia Sione ke papitaiso. Pea naʻe fakamoʻoni ʻa Sione, ʻo pehē: “Naaku mamata ki he Laumalie oku alu hifo mei he lagi o hage koe lube, o nofo kiate ia. Bea nae ikai teu ilo ia: ka ko ia naa ne fekau au ke babitaiso aki ae vai, nae behe eia kiate au, Ko ia te ke mamata e alu hifo ki ai ae Laumalie, o nofo ki ai, ko ia ia oku ne babitaiso aki ae Laumalie Maonioni. Bea naaku mamata, bea fakamooni koe Alo eni oe Otua.” (Sione 1:​32-34, PM) ʻI hono papitaisó, naʻe hoko ai ʻa Sīsū ko e Taki kuo pani​—ko e Mīsaia, pe Kalaisí.

ʻIo, ko e “takimua moe bule ki he kakai” naʻe talaʻofaʻakí naʻe fakamoʻoniʻi ko Sīsū Kalaisi ia. Pea ʻi heʻetau sivisiviʻi ʻa hono ngaahi ʻulungāngá ʻi he tuʻunga ko ha takí, ʻoku tau ʻilo taʻetoeveiveiua ai ko hono tuʻunga-takí ʻokú ne lakasi mamaʻo ʻa e ngaahi meʻa ʻoku fiemaʻu ʻi onopooni ki ha taki haohaoá.

Ko e Mīsaiá​—Ko ha Taki Haohaoa

Ko ha taki lelei ʻokú ne ʻomai ha tataki mahino mo tokoniʻi ʻa e kakai ʻi hono malumalú ke nau maʻu ha mālohi mo ha ngaahi malava fakafoʻituitui koeʻuhi ke nau lava ke solova lavameʻa ʻa e ngaahi palopalemá. ‘Ko ha fiemaʻu pau eni ki he taki lavameʻa ʻo e senituli hono 21,’ ko e lau ia ʻa e tohi ko e 21st Century Leadership: Dialogues With 100 Top Leaders. He ola lelei ē ko hono teuʻi ʻe Sīsū ʻa ʻene kau fanongó ke nau lavaʻi ʻa e ngaahi tuʻunga fakaʻahó! Fakakaukau angé ki heʻene malanga ʻiloa lahi tahá​—ʻa e Malanga ʻi he Moʻungá. ʻOku hulu ʻi he faleʻi ʻaongá ʻa e ngaahi lea ʻoku hiki ʻi he Mātiu vahe 5 ki he 7.

Ko e fakatātaá, fakakaukau atu ki he faleʻi ʻa Sīsū ki hono fakaleleiʻi ʻa e ngaahi felotokehekeheʻaki fakafoʻituituí. Naʻá ne pehē: “Ko ia, ka kuo ke haʻu mo koe ha feilaulau ki he ʻolita, ʻo ke toki manatuʻi ai ʻoku ai ha meʻa ʻoku koviʻia ai ho kainga kiate koe: tuku pe hena hoʻo feilaulau ʻi he veʻe olita, pea ke mole atu muʻa ʻo fakalelei ho kainga, pea ke toki haʻu ʻo ʻatu hoʻo feilaulau.” (Mātiu 5:​23, 24) Ko e tomuʻa fakamelino mo e niʻihi kehé ʻa e ʻuluaki meʻa muʻomuʻá​—ʻo aʻu ʻo mahuʻinga ange ia ʻi hono fakahoko ha ngafa fakalotu, ʻo hangē ko hono ʻoatu ʻo e ngaahi meʻaʻofa ʻi he ʻōlita ʻo e temipale ʻi Selusalemá hangē ko ia naʻe fiemaʻu ʻe he Lao ʻa Mōsesé. Ka ʻikai, ʻoku taʻefakahōifua ʻa e ngaahi tōʻonga lotú ki he ʻOtuá. Ko e faleʻi ʻa Sīsuú ʻoku ʻaonga tatau pē ʻi he ʻahó ni ʻo hangē ko ʻene pehē ʻi he ngaahi senituli kuo maliu atú.

Naʻe toe tokoniʻi ʻe Sīsū ʻa ʻene kau fanongó ke nau fakaʻehiʻehi mei he tauhele ʻo e ʻulungaanga taʻetāú. Naʻá ne akonekina kinautolu: “Kuo mou fanongo naʻe folofolaʻaki, ʻOua naʻa ke tono fefine: ka ʻoku ou tala kiate kimoutolu ʻe au, ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.” (Mātiu 5:​27, 28) Ko ha fakatokanga feʻungamālie ē! Ko e hā ke tau tofa ai ʻa e hala ki he tonó ʻaki ʻa e tali ʻo e ngaahi fakakaukau fekauʻaki mo iá? Naʻe pehē ʻe Sīsū, ʻoku mei he lotó ʻa e feʻauakí mo e tonó. (Mātiu 15:​18, 19) ʻOku fakapotopoto ke tau maluʻi hotau lotó.​—Palovepi 4:23.

 ʻOku toe kau ʻi he Malanga ʻi he Moʻungá ʻa e faleʻi lelei ʻaupito fekauʻaki mo e ʻofa ki hoto ngaahi filí, ko hono fakahāhā ʻa e nima-homó, ko hono maʻu ʻa e vakai totonu ki he ngaahi meʻa fakamatelié mo fakalaumālié pea mo e ngaahi alā meʻa peheé. (Mātiu 5:​43-47; 6:​1-4, 19-21, 24-34) Naʻe aʻu ʻo fakahaaʻi ʻe Sīsū ki heʻene kau fanongó ʻa e founga ke kumi ai ʻa e tokoni ʻa e ʻOtuá ʻaki hono akoʻi kinautolu ki he founga ke fai ai ʻa e lotú. (Mātiu 6:​9-13) ʻOku fakaivimālohiʻi mo teuʻi ʻe he Mīsaia ko e Takí ʻa ʻene kau muimuí ke fekuki mo e ngaahi palopalema anga-maheni ʻo e faʻahinga ʻo e tangatá.

Tuʻo ono ʻi he Malanga ʻi he Moʻungá, naʻe kamataʻaki ai ʻe Sīsū ʻa ʻene ngaahi fakamatalá ʻa e kupuʻi lea “kuo mou fanongo ne folofolaʻaki” pe “ka naʻe folofolaʻaki,” ka naʻá ne toe fakahaaʻi ha foʻi fakakaukau kehe mei ai, ʻo ne pehē “ka ʻoku ou tala kiate kimoutolu ʻe au.” (Mātiu 5:​21, 22, 27, 28, 31-​34, 38, 39, 43, 44) ʻOku hā mei he meʻa ko iá naʻe ʻosi anga ʻa ʻene kau fanongó ke ngāue ʻi ha faʻahinga tōʻonga pau, ʻo fakatatau ki he ngaahi talatukufakaholo tala ngutu faka-Fālesí. Ka naʻe fakahaaʻi ange ʻe Sīsū ʻi he taimi ko ení kia kinautolu ha founga kehe​—ʻa e taha ko ia ʻokú ne tapua atu ʻa e laumālie totonu ʻo e Lao ʻa Mōsesé. Ko ia naʻe fakalika mai ai ʻe Sīsū ha liliu, pea naʻá ne fai eni ʻi ha founga naʻá ne ʻai ai ke faingofua ki hono kau muimuí ke nau tali. ʻIo, naʻe ueʻi ʻe Sīsū ʻa e kakaí ke nau fai ʻa e ngaahi liliu fakaofo lahi ʻi heʻenau moʻuí, ʻi he fakalaumālie mo e fakaʻulungaanga. Ko e fakaʻilonga eni ʻo ha taki moʻoni.

ʻOku fakahā ʻe ha tohi fekauʻaki mo e anga ʻo e founga puleʻí ʻa e fuʻu mātuʻaki faingataʻa ke fakahoko ha liliu peheé. ʻOku pehē ai: “ʻOku fiemaʻu ki he fakafofonga ʻokú ne fakahoko ʻa e liliú [takí] ke ne maʻu ʻa e tokanga ʻa ha tokotaha ngāue tokoni maʻá e sōsaietí, ko e fakafuofua ʻa ha toketā fakaʻatamai, ko e ivi kātaki fuoloa ʻa ha tokotaha lele malafoni, ko e kīvoi ʻa ha kulī-pulu, ko e falala-fakaekita pē ʻa ha tokotaha nofo tokotaha pea mo e kātaki ʻa ha sangato. Pea naʻa mo hono maʻu kotoa ʻa e ngaahi tuʻunga ko iá, ʻoku ʻikai ke fakapapauʻi ai ha lavameʻa.”

“Ko e kau takí kuo pau ke nau fou ʻi he tōʻonga ʻoku nau loto ke tōʻongaʻaki ʻe honau kau muimuí,” ko e lau ia ʻa ha kupu naʻe fakakaveinga, “Tuʻunga-Takí: ʻOku Mahuʻinga ʻa e Ngaahi Tōʻonga Anga-Kehé?” Ko e moʻoni, ko ha taki lelei ʻokú ne fai ʻa e meʻa ʻokú ne malangaʻakí. He hoko moʻoni ē ko e meʻá ni ʻia Sīsū Kalaisi! ʻIo, naʻá ne akoʻi ʻa e faʻahinga naʻe ʻiate iá ke nau anga-fakatōkilalo, ka naʻá ne toe tokonaki ha lēsoni lelei maʻa kinautolu ʻaki hono fufulu honau vaʻé. (Sione 13:​5-15) Naʻe ʻikai te ne fekau atu pē ʻa ʻene kau ākongá ke malangaʻi ʻa e ongoongo lelei ʻo e Puleʻanga ʻo e ʻOtuá, ka naʻá ne ngāue mālohi ʻi he ngāue ko iá. (Mātiu 4:​18-​25; Luke 8:​1-3; 9:​1-6; 10:​1-​24; Sione 10:​40-​42) Pea ʻi he fekauʻaki mo e fakafeangai ki he tuʻunga-takí, naʻe fokotuʻu ʻe Sīsū ha faʻifaʻitakiʻanga. “ʻOku ʻikai lava ʻe he ʻAlo ke fai ʻiate ia ha momoʻi meʻa,” ko ʻene lau ia fekauʻaki mo iá tonu, “ngata pe ʻi he meʻa ʻoku ne vakai ʻoku fai ʻe he Tamai.”​—Sione 5:19.

Ko e tomuʻa vakai ko eni ki he meʻa naʻe leaʻaki mo fai ʻe Sīsuú ʻoku fakahaaʻi mahino ai ko ia ʻa e Taki haohaoá. Ko hono moʻoní, ʻokú ne lakasi ʻa e ngaahi tuʻunga kotoa pē ʻa e tangatá ki he tuʻunga-taki leleí. ʻOku haohaoa ʻa Sīsū. ʻI hono maʻu ʻa e moʻui taʻefaʻamate ʻi he hili ʻa ʻene pekia pea toetuʻú, ʻokú ne moʻui ʻo taʻengata. (1 Pita 3:​18; Fakahā 1:​13-​18) Ko hai ha taki fakaetangata ʻe lava ke ne fakatataua ʻa e ngaahi tuʻunga taau ko ení?

Ko e Hā Kuo Pau Ke Tau Faí?

ʻI he tuʻunga ko e Tuʻi ʻoku pule ʻo e Puleʻanga ʻo e ʻOtuá, ʻe lilingi hifo ʻe he ‘Misaia ko e Takí’ ʻa e ngaahi tāpuaki ki he faʻahinga talangofua ʻo e tangatá. ʻI he fekauʻaki mo e meʻá ni ʻoku talaʻofaʻaki ʻe he ngaahi Konga Tohitapú: “ʻE fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.” (Aisea 11:9) “ʻE maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.” (Sāme 37:11) “Te nau nofo taki taha ʻi hono lolo vaine, pea ʻi hono lolo fiki; ʻo ʻikai mafakahohaʻa kinautolu ʻe ha taha.” (Maika 4:4) “ʻE nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:​3, 4.

 ʻOku hokosia ʻe he māmaní ʻi he ʻahó ni ha faingataʻa lahi fakaetataki. Neongo ia, ʻoku taki ʻe Sīsū Kalaisi ʻa e faʻahinga anga-maluú ki ha māmani foʻou melino, ʻa ia ʻe fāʻūtaha ai ʻa e faʻahinga talangofua ʻo e tangatá ʻi he lotu kia Sihova ko e ʻOtuá pea te nau tutui atu ki he haohaoá. He mātuʻaki mahuʻinga ē ke tau vaheʻi ha taimi ke fakatupu ai ha ʻilo ki he ʻOtua moʻoní mo ʻene Taki kuo fakanofó pea ngāue ʻo fakatatau mo e ʻilo ko iá!​—Sione 17:3.

Ko e taha ʻi he ngaahi fakahāhā lelei taha ʻo e fakavīkiviki ʻe malava ke tau ʻoatu ki ha taha ko e faʻifaʻitaki kiate ia. ʻIkai ʻoku totonu leva ke tau feinga ke faʻifaʻitaki ki he Taki lahi taha ʻi he hisitōlia ʻo e tangatá​—ʻa Sīsū Kalaisi? ʻE malava fēfē ke tau fai pehē? Ko e hā ʻa e tākiekina ʻe fai ʻi he tali ʻa hono tuʻunga-takí ʻi heʻetau moʻuí? Ko e ngaahi fehuʻí ni mo e ngaahi fehuʻi kehe ʻe fakamatalaʻi ia ʻi he ongo kupu hoko maí.

[Fakamatala ʻi lalo]

[Fakatātā ʻi he peesi 4]

Naʻe tomuʻa tala ʻe Taniela ʻa e hoko mai ʻa e Taki kuo fili ʻa e ʻOtuá

[Fakatātā ʻi he peesi 7]

Ko e ngaahi akonaki ʻa Sīsuú naʻá ne teuʻi ʻa e kakaí ke fekuki mo e ngaahi palopalema ʻo e moʻuí

[Fakatātā ʻi he peesi 7]

ʻE tataki ʻe Sīsū ʻa e faʻahinga talangofua ʻo e tangatá ki ha māmani foʻou melino