Tuʻunga-Taki Leleí—Ko e Pole Fakaemāmani Lahi

Ko e tangatá ko ha tokotaha faʻu-tohi mo faʻu-maau. Ko hono lotó naʻe fonu ʻi he ʻamanaki lelei ki he kahaʻú. ʻI he taʻu nai ʻe 90 kuo maliu atú, naʻá ne sioloto atu ai ki ha feituʻu “ʻa ia ʻoku ʻikai manavahē tuʻu ai ʻa e ʻatamaí pea lelei mo e vakai ki he moʻuí; ʻa e feituʻu ʻoku maʻu taʻetotongi ai ʻa e ʻiló; mo ia kuo teʻeki ke mapaki kongokonga ai ʻa e māmaní koeʻuhi ko e ngaahi ʻā fakangatangata fakafonuá; ʻa e feituʻu ʻoku haʻu ai ʻa e leá mei he loloto ʻo e moʻoní; [pea] mo ia ʻi he feinga taʻehelá ʻoku mafao atu ai honau nimá ki he tuʻunga haohaoá.”

NAʻE fakamatalaʻi leva ʻe he tokotaha faʻu-tohí ni ʻa e ʻamanaki ʻe ʻi ai ha ʻaho ko hono fonuá pea pehē ki he toenga ʻo māmaní te nau ʻā hake ki ha feituʻu pehē. Kapau naʻe moʻui ʻa e tokotaha faʻu maau maʻu pale Nobel ko ení ʻi he ʻahó ni, ko ʻene loto-mamahi lahi moʻoni. Neongo ʻa e kotoa ʻo hono ngaahi fakalakalaká mo hono ngaahi lavameʻá, ʻoku fakakongokonga lahi ange ʻa e māmaní ia ʻi ha toe taimi. Pea ko e vakai fakalūkufua ki he kahaʻu ʻo e tangatá ʻoku kei tuʻu fakapōpōʻuli pē.

ʻI hono ʻeke pe ko e hā ʻoku mapuna fakafokifā hake ai ʻa e fakamālohí ʻi he vahaʻa ʻo e ngaahi faʻahi pau ʻi hono fonuá, naʻe lave ha tokotaha faama ki he meʻa ʻokú ne pehē ko e taha ʻo e ʻuhingá. “ʻOku hokó koeʻuhi ko e kovi ʻa e kau takí,” ko ʻene laú ia. ʻI heʻene tohi ko e Humanity​​—A Moral History of the Twentieth Century, ʻoku fakahaaʻi ai ʻe he faihisitōlia ko Jonathan Glover ha fakakaukau meimei tatau, ʻo pehē: “Ko e fakaʻauha fakafaʻahingá [ʻi he fonua tatau] naʻe ʻikai ko ha mapuna ākenoa hake pē ʻo e tāufehiʻa fakamatakalí, naʻe palani ia ʻe he kakai ʻoku nau fiemaʻu ke kei tauhi maʻu ʻa e mafaí.”

 ʻI he mapuna hake ha tau ʻi he vahaʻa ʻo ha ongo lepupilika ʻi he ʻIukosilāvia ki muʻá ʻi he konga ki muʻa ʻo e 1990 tupú, naʻe tohi ʻe ha fainusipepa: “Naʻa mau nofo fiefia fakataha ʻi he laui taʻu lahi pea ko eni kuo hoko mai ki he fefakapōngaki ʻo e fanga kiʻi valevalé. Ko e hā ʻoku hoko kia kimautolú?”

ʻI he laui afeʻi kilomita mei ʻIulope ʻoku aʻu ai ki he fonua ko ʻInitiá, ko e feituʻu ia ne fāʻeleʻi ai ʻa e tokotaha faʻu-maau naʻe lave ki ai ʻi he kamatá. ʻI ha lea naʻe fakakaveinga, “ʻE Lava ke Kei Moʻui ʻa ʻInitia ʻi he Tuʻunga ko ha Fonua Pē ʻe Taha?,” naʻe pehē ai ʻe he faʻu-tohi ko Pranay Gupte: ‘Ko e peseti ʻe 70 nai ʻo e fuʻu kakai tokolahi ʻo ʻInitiá ʻoku ʻi lalo honau taʻumotuʻá ʻi he 30, neongo ia ʻoku ʻikai ke ʻi ai ha kau taki ke nau tā ha sīpinga alafaʻifaʻitakiʻanga moʻo kinautolu.’

ʻI he ngaahi fonua pau, kuo pau ai ki he kau takí ke fakafisi mei honau lakangá koeʻuhi ko e ngaahi tukuakiʻi ki he fakameleʻí. ʻI he ngaahi ʻuhinga kehekehe leva, ʻoku hokosia tonu ai ʻe he māmaní ha faingataʻa lahi fakaetataki. ʻOku fakamoʻoni ʻa e tuʻunga ʻo e ngaahi meʻá ki he moʻoni ʻo e lea ʻa e palōfita ʻe taha ʻa ia naʻe moʻui ʻi he taʻu ʻe 2,600 nai kuo maliu atú. Naʻá ne pehē: “ʻOku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.”​—Selemaia 10:23.

ʻOku ʻi ai ha haoʻanga mei he tuʻunga fakamamahi lolotonga ʻo e māmaní? Ko hai ʻe lava ke ne tataki ʻa e faʻahinga ʻo e tangatá ki ha māmani ʻa ia ko e sōsaieti fakaetangatá ʻoku ʻikai ke vahevaheʻi ʻe he fekeʻikeʻí pe mafasia ʻi he manavahē tuʻú, ʻa e feituʻu ʻoku maʻu taʻetotongi mo hulu ai ʻa e ʻilo moʻoní pea mo ē ʻoku ngaʻunu atu ai ʻa e faʻahinga ʻo e tangatá ki he haohaoá?

[Maʻuʻanga ʻo e Tā ʻi he peesi 3]

Fatmir Boshnjaku