ʻOku Talitali Lelei ʻe he ʻOtuá ʻa e Puleʻanga Kotoa Pē

ʻI HEʻENE ʻuluaki folau ki Mali, naʻe maongo ai kia John ʻa e anga-talitali kakai māfana naʻe fakahāhaaʻi ʻe Mamadou mo hono fāmilí. ʻI he tangutu ʻa John ʻi he kelekelé ʻo kai fakahelengavale mei he meʻakai fakafonua anga-mahení, naʻá ne fifili ai pe ko e hā ʻa e founga lelei taha ke vahevahe atu ai ki heʻene tokotaha talitalí ha meʻaʻofa mātuʻaki mahuʻinga​—ko e ongoongo lelei ʻo e Puleʻangá mei he Folofola ʻa e ʻOtuá, ko e Tohitapú. Neongo naʻá ne ʻiloʻi ʻa e lea faka-Falaniseé, ko ha lea naʻe leaʻaki ʻi Mali, naʻe fifili ʻa John ki he founga ʻe lava ke ne fetuʻutaki ai mo ha fāmili ʻa ia naʻa nau maʻu ha lotu mo ha founga fakakaukau ʻoku kehe fakaʻaufuli.

ʻOku ʻikai ha ofo, naʻe fakakaukau ʻa John fekauʻaki mo e talanoa faka-Tohitapu ʻo kau ki he kolo ko Pēpelí. Naʻe fakapuputuʻuʻi ai ʻe he ʻOtuá ʻa e lea ʻa e kakai angatuʻú. (Senesi 11:​1-9) Ko hono olá, kuo mapuna hake ai ʻa e ngaahi kakai fakataha mo e ngaahi lea, lotu, pea mo e sīpinga fakakaukau kehe ʻi he ngaahi tapa kehekehe ʻo e māmaní. ʻI he ʻahó ni, ʻi he hoko ko e meʻa anga-maheni ʻa e fefonongaʻakí mo e fehikitakí, ʻoku fehangahangai ai ʻa e tokolahi mo ha palopalema meimei tatau mo ia naʻe fehangahangai mo John, naʻa mo e ʻi honau feituʻu kaungāʻapí tonu: Anga-fēfē ke vahevahe atu ʻenau ʻamanaki makatuʻunga ʻi he Tohitapú ki he kakai ʻo ha ʻātakai kehe?

Ko ha Fakatātā Motuʻa

ʻI he hangē ko e kau palōfita kehe ʻi ʻIsilelí, naʻe malanga tefito pē ʻa Siona ki he kau ʻIsilelí. Naʻá ne kikite ʻi ha taimi naʻe kau fakahāhā ai ʻa e puleʻanga matakali ʻe hongofulu tafoki mei he moʻoní ʻi he ngaahi tōʻonga fakamaaʻi-ʻOtuá. (2 Tuʻi 14:​23-​25) Fakaʻuta atu ki he tali ʻa Sioná ʻi heʻene maʻu ʻa e fekau makehe ke mavahe mei hono fonua tupuʻangá, pea ʻalu ki ʻAsīlia ke malanga ki he kau nofo ʻi Ninivé, ko e kakai ʻo ha lotu pea mo ha sivilaise kehe. Naʻe ʻikai nai ke leaʻaki ʻe Siona ʻa e lea ʻa e kau Ninivé, ʻo ʻikai poto ai ʻi ha tuʻunga. Ko e hā pē ʻa e tuʻungá, ngalingali naʻe ʻiloʻi ʻe Siona naʻe lahi fau ʻa e faingataʻa ʻo e fekaú, pea naʻá ne hola.​—Siona 1:​1-3.

ʻOku hā mahino, naʻe fiemaʻu ke ʻiloʻi ʻe Siona ʻoku ʻafio mai ʻa Sihova ko e ʻOtuá ʻo fakalaka ia ʻi he ngaahi meʻa ʻoku hā ki tuʻá, pea ʻokú ne sivi ʻa e lotó. (1 Samiuela 16:7) Hili hono fakahaofi fakaemana ʻa Siona mei he melemó, naʻe fekauʻi ia ʻe Sihova ʻi hono tuʻo uá ke ne malanga ki he kau nofo ʻi Ninivé. Naʻe talangofua ʻa Siona, pea ko hono olá, naʻe fakatomala fakalūkufua ai ʻa e kau Ninivé. Neongo ia, naʻe ʻikai ke maʻu ʻe Siona ʻa e fakakaukau totonú. Fakafou ʻi ha fakatātā mālohi, naʻe akoʻi kiate ia ʻe Sihova ʻoku fiemaʻu ke liliu ʻa ʻene fakakaukaú. Naʻe ʻeke ange ʻe Sihova kia Siona: “ʻIkaiā te u mamae koā ʻe au ki Ninive, ʻa e fuʻu kolo ni; ʻa ia ʻoku ʻi ai ha kakai ʻe taha kilu ma ua mano tupu, ʻa e faʻahinga ʻoku ʻikai te nau ʻilo honau nima toʻomataʻu mo e toʻohema?” (Siona 4:​ 5-11) Fēfē kitautolu ʻi he ʻaho ní? ʻE lava fēfē ke tau tokoniʻi ʻa e kakai mei ha ʻātakai kehe?

Talitali Lelei ʻa e Kau Samēliá mo e Faʻahinga ʻIkai ko e Siú

ʻI he ʻuluaki senitulí, naʻe tuʻutuʻuni ai ʻe Sīsū ki hono kau muimuí ke nau ngaohi ʻa e kakai ʻo e ngaahi puleʻanga kotoa pē ke nau hoko ko e kau ākonga. (Mātiu 28:19) Naʻe ʻikai faingofua eni kia kinautolu. Ko e kau ākonga ʻa Sīsuú ko e kau Siu, pea ʻi he hangē ko Sioná, naʻa nau angaʻaki ke talanoa mo e kakai pē mei he ʻātakai mo e sivilaise tatau. ʻI he fakanatulá, ne nau toe ongoʻi ʻa e tenge kinautolu ʻe he lahi ʻa e tomuʻa fehiʻa ʻi he taimi ko iá. Kae kehe, naʻe tataki ʻe Sihova ʻa e ngaahi meʻá, koeʻuhi ke fakalakalaka ai ʻa e ʻilo ʻa ʻene kau sevānití ki hono finangalo kia kinautolú.

Ko e ʻuluaki sitepú ke ikuʻi ʻa e tomuʻa fehiʻa ʻi he vahaʻa ʻo e kau Siú mo e kau Samēliá. Naʻe ʻikai ha fetuʻutaki ʻa e kau Siú mo e kau Samēliá. Neongo ia, naʻe laka hake he tuʻo tahá ʻa hono teuteu ʻe Sīsū ʻa e hala ki hono tali ʻe he kau Samēliá ʻa e ongoongo leleí ʻi he kahaʻú. Naʻá ne fakahaaʻi ʻa ʻene taʻefilifilimānakó ʻaki ʻene lea ki ha fefine Samēlia. (Sione 4:​7-​26) ʻI he taimi ʻe taha, fakafou ʻi he talanoa fakatātā fekauʻaki mo e Samēlia anga-fakakaungāʻapí, naʻá ne fakahaaʻi ai ki ha Siu anga-fakalotu ko e kakai ʻikai ko ha Siú naʻe malava ke nau fakahaaʻi ʻa e ʻofa ki he kaungāʻapí. (Luke 10:​25-​37) ʻI he hoko ki he taimi ke ʻomai ai ʻe Sihova ʻa e kau Samēliá ki he fakatahaʻanga Kalisitiané, ko Filipe, Pita, mo Sione​​—ko e kau tupuʻi Siu kotoa​—naʻa nau malanga ki he kau nofo ʻi Samēliá. Naʻe fakatupu ʻe heʻenau pōpoakí ha fiefia lahi ʻi he kolo ko iá.​—Ngāue 8:​4-8, 14-17.

Kapau naʻe faingataʻa ki he kau Kalisitiane Siú ke ʻofa ki he kau Samēliá, ʻa ia ko hono moʻoní ko e ngaahi kāinga mamaʻo ʻo e kau Siú, kuo pau pē ne toe faingataʻa ange kia kinautolu ke fakahaaʻi ʻa e ʻofa fakakaungāʻapí ki he faʻahinga ʻikai ko e Siú, pe Senitailé, ʻa ia naʻe manukiʻi mo fehiʻanekinaʻi ʻe he kau Siú. Ka neongo ia, hili e pekia ʻa Sīsuú, ko e ʻā vahevahe ʻi he vahaʻa ʻo e kau Kalisitiane Siú mo e kau Senitailé ne lava ke toʻo ia. (Efeso 2:​13, 14) Ke tokoniʻi ʻa Pita ke ne tali ʻa e fokotuʻutuʻu foʻou ko ení, naʻe fakahaaʻi ʻe Sihova kiate ia ha vīsone, ʻa ia naʻá Ne tala ange ai kiate ia “ko e ngaahi meʻa kuo fakamaʻa ʻe he ʻOtua, ʻoua te ke pehē ʻe koe ʻoku taʻetāu.” Naʻe taki leva ia ʻe he laumālie ʻo Sihová ki ha Senitaile ko hono hingoá ko Koliniusi. ʻI he mahino kia Pita ʻa e vakai ʻa e ʻOtuá​—ke ʻoua te ne lau ʻoku taʻetaau ʻa e tangata ko eni ʻo e ngaahi puleʻangá koeʻuhi kuo fakamaʻa ia ʻe he ʻOtuá​—naʻá ne lea ai ʻi he malumalu ʻo e fakamānavaʻi: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ngāue 10:​9-35) He ofo ē ka ko Pita ʻi hono fakahaaʻi ʻe he ʻOtuá naʻá ne tali ʻa Koliniusi mo hono fāmilí ʻaki hono lilingi hifo kia kinautolu ʻa e laumālie māʻoniʻoní!

Paula​—Ko ha Ipu Mātuʻaki Fili ki he Ngaahi Puleʻangá

Ko e ngāue fakafaifekau ʻa Paulá ko ha fakatātā tuʻu-ki-muʻa ia ʻo e anga hono teuteuʻi ʻi ha tuʻunga fakalakalaka ʻe Sihova ʻa ʻene kau sevānití ke nau ʻofa mo tokoniʻi ʻa e faʻahinga kakai kotoa pē. ʻI he taimi ʻo e liliu ʻa Paulá, naʻe pehē ai ʻe Sīsū ʻe hoko ʻa Paula ko ha ipu mātuʻaki fili ke hapai Hono huafá ki he ngaahi puleʻangá. (Ngāue 9:​15) Naʻe ʻalu leva ai ʻa Paula ki ʻAlepea, mahalo pē ke fakalaulauloto ki he taumuʻa ʻa e ʻOtuá ke ngāueʻaki ia  ʻi hono talaki ʻa e ongoongo leleí ki he ngaahi puleʻangá.​—Kaletia 1:​15-​17.

Lolotonga ʻa ʻene ʻuluaki fononga fakamisinalé, naʻe fakahaaʻi ʻe Paula ʻa e faivelenga ʻi he malanga ki he faʻahinga ʻikai ko e Siú. (Ngāue 13:​46-​48) Naʻe tāpuakiʻi ʻe Sihova ʻa e ngāue ʻa Paulá, pea ko e fakamoʻoni ia naʻe fai ʻe he ʻapositoló ʻa e ngaahi meʻá ʻo fakatatau ki he fokotuʻutuʻu ʻa Sihová. Naʻe fakahaaʻi ʻe Paula naʻe mahino kakato kiate ia ʻa e vakai ʻa Sihová ʻi heʻene fakatonutonu loto-toʻa ʻa Pitá, ʻa ia naʻá ne fakahaaʻi ʻa e filifilimānako ʻi he fakaʻehiʻehi mei he feohi mo hono fanga tokoua ʻikai ko e Siú.​—Kaletia 2:​11-​14.

Ko e fakamoʻoni lahi ange naʻe tataki ʻe he ʻOtuá ʻa e ngaahi feinga ʻa Paulá, ʻoku hā ia ʻi heʻene fononga fakamisinale hono uá ʻi hono taʻofi ʻe he laumālie māʻoniʻoní ʻa Paula, mei he malanga ʻi he vahefonua Loma ʻo Pitiniá. (Ngāue 16:7) ʻOku hā ngalingali naʻe ʻikai feʻunga ia mo e taimi ko ení. Neongo ia, ki mui ai, naʻe hoko ai ʻa e kau Pitinia ʻe niʻihi ko e kau Kalisitiane. (1 Pita 1:1) ʻI ha vīsone, naʻe kōlenga ai ha Masitōnia kia Paula, ʻo pehē: “Laka mai ki Masitonia, ʻo tokoniʻi kimautolu.” Naʻe maʻu ai ʻe Paula ʻa e fakamulituku ʻoku totonu ke liliu hono halá koeʻuhi ke talaki ʻa e ongoongo leleí ʻi he vahefonua Loma ko iá.​—Ngāue 16:​9, 10.

Ko e malava ʻa Paula ke feʻunuʻaki ki aí naʻe ʻahiʻahiʻi mālohi ia ʻi heʻene malanga ki he kau ʻAtenisí. Naʻe tapui ʻe he lao faka-Kalisí mo e faka-Lomá ʻa hono fakahake ange ʻo e ngaahi ʻotua mulí pea mo e ngaahi tōʻonga fakalotu foʻoú. Ko e ʻofa ʻa Paula ki he kakaí naʻá ne ueʻi ia ke vakai fakamātoato ki heʻenau ngaahi tōʻongafai fakalotú. Naʻá ne fakatokangaʻi ha ʻōlita ʻi ʻAtenisi naʻe tohi ai ʻo pehē “moʻo ha ʻOtua Teʻeki ʻIloa.” Naʻá ne lave ki he fakamatala ko ení ʻi heʻene ngāue fakaefakamoʻoní. (Ngāue 17:​22, 23) Ko ha founga lelei ē ke kamata ʻaki ʻa ʻene pōpoakí, ʻi ha founga anga-ʻofa mo tokaʻi!

He fiefia ē kuo pau naʻe hoko kia Paulá ʻi heʻene fakakaukau atu ki he ngaahi ola ʻo ʻene ngāue ʻi he tuʻunga ko ha ʻapositolo ki he ngaahi puleʻangá! Naʻá ne tokoni ke fokotuʻu ʻa e ngaahi fakatahaʻanga naʻe faʻuʻaki ʻa e kau Kalisitiane tokolahi naʻe ʻikai ko e tupuʻi Siu ʻi Kolinitō, Filipai, Tesalonaika mo e ngaahi kolo ʻi Kalētiá. Naʻá ne tokoniʻi ʻa e kau tangata mo e kau fefine ʻo e tuí, hangē ko Temalisi, Taionisio, Sēsio Paulo mo Taitusí. Ko ha monū ē ke sio ki he kakai naʻe ʻikai te nau ʻilo ʻa Sihova pe ko e Tohitapú ʻoku nau tali ʻa e moʻoni ʻo e lotu faka-Kalisitiané! ʻI he  fekauʻaki mo hono ngafa ʻi hono tokoniʻi ʻa e faʻahinga ʻikai ko e Siú ke nau hoko ʻo ʻiloʻi ʻa e moʻoní, naʻe pehē ʻe Paula: “Ka naʻe pehe ʻeku fai: naʻa ku tokanga ke ʻoua naʻa ku malangaʻaki ʻa e Kosipeli ʻi he ngaahi potu kuo hueʻekina ai ʻa e huafa ʻo Kalaisi, . . . hange ko e meʻa ʻi he folofola, Ko kinautolu naʻe ʻikai te nau maʻu ha ongoongo kiate ia te nau sio; ko kinautolu kuo teʻeki ke nau fanongo kiate ia te nau ʻilo.” (Loma 15:​20, 21) ʻE lava ke tau kau ʻi hono talaki ʻa e ongoongo leleí ki he kakai ʻoku ʻikai ko ʻenau haʻu mei heʻetau sivilaisé?

Tokoniʻi ʻa e Kakai Kotoa ʻo e Māmaní

Naʻe lotu ʻa Solomone kia Sihova fekauʻaki mo e faʻahinga ʻikai ko e ʻIsileli ʻa ia te nau haʻu ke lotu ʻi he temipale ʻi Selusalemá. Naʻá ne kole: “Ke ke fanogo ekoe i he lagi ko ho afioaga, bea ke fai o fakatatau moe mea kotoabe oku kole ai e he muli kiate koe: koeuhi ke ilo e he kakai kotoabe o mamani ki ho huafa.” (1 Tuʻi 8:​41-43, PM, fakaʻītali ʻamautolu.) Ko e laui afe ʻo e kau fanongonongo ʻo e Puleʻangá ʻi he ngaahi fonua lahi ʻi he ʻahó ni, ʻoku nau fakahāhaaʻi ʻa e ongoʻi ko iá. ʻOku nau fetaulaki mo e kakai hangē ko e kau Ninivé ʻa ia ʻi he tuʻunga fakalaumālié ‘ʻoku ʻikai te nau ʻilo honau nima toʻomataʻú mo e toʻohemá.’ Pea ko e kau malanga ʻo e Puleʻangá ʻoku nau vēkeveke ke kau ʻi hono fakahoko ʻa e ngaahi kikite ʻo fekauʻaki mo hono fakatahatahaʻi mai ʻa e kau lotu moʻoní, mei he ngaahi puleʻanga kehekehe lahi.​—Aisea 2:​2, 3; Maika 4:​1-3.

Hangē pē ko e tali ʻe he kakai mei he Puleʻanga-Haʻa-Kalisitiané ʻa e pōpoaki faka-Tohitapu ʻo e ʻamanakí, ʻoku fai pehē mo e kakai ʻo e ngaahi ʻātakai fakalotu kehé. ʻOku totonu ke fēfē hono uesia fakafoʻituitui koe ʻe he meʻá ni? Sivisiviʻi faitotonu koe. Kapau ʻokú ke ongoʻi ʻoku faiaka loloto ʻa e tomuʻa fehiʻá ʻia koe, fakangata ia ʻaki ʻa e ʻofá. a ʻOua ʻe talitekeʻi ʻa e kakai ʻa ia ʻoku loto-lelei ʻa e ʻOtuá ke talí.​—Sione 3:​16.

Fai haʻo fekumi ki muʻa ke ke talanoa ki he kakai mei ha ʻātakai ʻe taha. ʻAi ke maheni mo ʻenau ngaahi tuí, ko ʻenau ngaahi hohaʻá, mo ʻenau founga fakakaukaú; pea kumi leva ki ha meʻa ʻoku fai ai ʻa e felotoí. Fakahāhā ʻa e anga-lelei mo e manavaʻofa ki he niʻihi kehé. Fakaʻehiʻehi mei he fakakikihí, hoko ʻo ngaofengofua mo fakatupu langa hake. (Luke 9:​52-​56) ʻI hono fai iá, te ke fakahōifuaʻi ai ʻa Sihova, ʻa ia “ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”​—1 Timote 2:4.

He fiefia ē ko kitautolu ke maʻu ʻi heʻetau ngaahi fakatahaʻangá ʻa e kakai mei ha ʻātakai kehekehe lahi! (Aisea 56:​6, 7) He fakalotomāfana ē ko ia ke fanongo he ʻahó ni ʻo ʻikai ki he ngaahi hingoa pē hangē ko e Mele, Sione, Sitīveni, mo e Tomu kae toe pehē foki ki he ngaahi hingoa hangē ko e Mamadou, Jegan, Reza mo e Chan! Ko e moʻoni, “ko ha matapā lahi ʻoku taki atu ki he ngāué kuo fakaava mai ia” kia kitautolu. (1 Kolinito 16:​9, NW) ʻOfa ke tau ngāueʻaongaʻaki ʻa e ngaahi faingamālie ʻoku hanga mai kia kitautolú ke fakalahi atu ai ʻa e fakaafe ʻoku fai ʻe he ʻOtua taʻefilifilimānako ko Sihová, ke talitali lelei ai ʻa e kakai ʻo e ngaahi puleʻanga kotoa pē!

[Fakamatala ʻi lalo]

[Fakatātā ʻi he peesi 23]

Naʻe vahevahe atu ʻe Paula ʻa e ongoongo leleí ki he kakai ʻi he feituʻu kotoa pē ʻaki ʻa e lava ke feʻunuʻakí

. . . ʻi ʻAtenisi

. . . ʻi Filipai

. . . ʻi he lolotonga ʻa e fefonongaʻakí