Hanganaki ʻĀʻā, Laka Atu Loto-Toʻa!

Fakamatala ki he Ngaahi Fakataha Makehe

KO HAI ʻe lava ke ne fakaʻikaiʻi totonu ʻa ʻetau moʻui ʻi he “ngaahi taimi faingataʻa ke fekuki mo iá”? ʻI he tuʻunga ko e Kau Fakamoʻoni ʻa Sihová, ʻoku ʻikai ke tau hao mei he ngaahi tenge ʻo e moʻui ʻi he “ngaahi ʻaho fakaʻosí.” (2 Timote 3:​1-5, NW) Ka ʻoku tau ʻiloʻi ʻoku fiemaʻu ʻe he kakaí ha tokoni. ʻOku ʻikai mahino kia kinautolu ʻa e ʻuhinga ʻo e ngaahi meʻa ʻoku hoko ʻi he māmaní. ʻOku nau fiemaʻu ʻa e fakafiemālie mo e ʻamanaki. Ko e hā hotau ngafa tefito ʻi hono tokoniʻi ʻa hotau kaungā faʻahinga ʻo e tangatá?

ʻOku tau maʻu ha fekau kuo ʻomai mei he ʻOtuá ke vahevahe atu ʻa e ongoongo lelei ʻo e Puleʻanga ʻo e ʻOtuá kuo fokotuʻú. (Mātiu 24:14) ʻOku fiemaʻu ke ʻiloʻi ʻe he kakaí ko e Puleʻanga fakahēvani ko ení, ko e ʻamanakiʻanga pē ia ʻe taha ki he faʻahinga ʻo e tangatá. Neongo ia, ko ʻetau pōpoakí, ʻoku ʻikai tali lelei maʻu pē ia. Kuo tapui ʻetau ngāué ʻi he ngaahi feituʻu ʻe niʻihi, pea kuo fakatangaʻi ai hotau fanga tokouá. Neongo ia, ʻoku ʻikai te tau foʻi. ʻI he falala kakato kia Sihová, ʻoku tau fakapapauʻi ai ke nofoʻaki ʻāʻā pea ke hanganaki laka loto-toʻa atu ki muʻa ʻi hono talaki ʻa e ongoongo leleí ʻo ʻikai fakavaivai.​​—Ngāue 5:​42.

Ko e fakapapau mālohi ko iá ne hā mahino ia ʻi he ngaahi fakataha makehe naʻe hoko ʻi ʻOkatopa ʻo e 2001. ʻI he Tokonaki, ʻOkatopa 6, ko e fakataha fakataʻu ʻa e Sōsaieti Taua Leʻo Tohitapu mo e Tuleki ʻo Pennsylvania naʻe fai ia ʻi Jersey City, New Jersey, Holo ʻAsemipilī ʻo e Kau Fakamoʻoni ʻa Sihová ʻi he ʻIunaite Seteté. a Ko e ʻaho hoko aí, naʻe fai ai ʻa e ngaahi fakataha fakalahi ʻi he feituʻu ʻe fā, ko e tolu ʻi he ʻIunaite Seteté pea taha ʻi Kānata. b

ʻI heʻene lea kamata ʻi he fakataha fakataʻú, ko e seá, ko Samuel F. Herd, ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻá ne lave ki he Sāme 92:​1, 4 peá ne pehē leva: “ʻOku mau loto ke fakahaaʻi ʻa ʻemau houngaʻiá.” Ko e moʻoni, ko e ngaahi ʻuhinga ki he houngaʻiá naʻe ʻomai ia ʻi he fakamatala ʻe nima mei he māmaní takatakai.

Ngaahi Fakamatala mei he Feituʻu Kotoa Pē

Ko Tokoua Alfred Kwakye naʻá ne fakamatala ki he fakalakalaka ʻa e ngāue fakamalanga ʻi Kaná, ʻa ia naʻe ʻiloa ki muʻa ko e Matāfonua Koulá. Ko ʻetau ngāue ʻi he fonua ko iá naʻe tapui ia ʻi ha ngaahi taʻu lahi. Naʻe ʻeke ʻe he kakaí: “Ko e hā ʻoku  tapui aí? Ko e hā ne mou faí?” Naʻe fakaava ʻe he meʻá ni ʻa e ngaahi faingamālie ke fai ai ha fakamoʻoni, ko e fakamatala ia ʻa Tokoua Kwakye. ʻI he 1991 ʻi hono toʻo ʻa e tapuí, naʻe ʻi ai ʻa e Kau Fakamoʻoni ʻa Sihova ʻe toko 34,421 ʻi Kana. ʻI ʻAokosi 2001, ko e fakakātoá naʻe toko 68,152​—ko ha tupu peseti ʻe 98. ʻOku fai ʻa e ngaahi palani ke langa ai ha Holo ʻAsemipilī sea ʻe 10,000. ʻOku hā mahino, ko hotau fanga tokoua fakalaumālie ʻi Kaná ʻoku nau ngāueleleiʻaki ʻa ʻenau tauʻatāina fakalotú.

Neongo ʻa e taʻemanonga fakapolitikalé, ko hotau fanga tokoua ʻi ʻAilaní ʻoku nau kau longomoʻui ʻi he ngāue fakafaifekaú, pea ʻoku tokaʻi kinautolu ʻi heʻenau tuʻu-ʻataá. ʻOku maʻu ʻe ʻAilani ha fakatahaʻanga ʻe 115 ʻi he sēketi ʻe 6, ko e lau ia ʻa e kouʻotineita ʻo e Kōmiti Vaʻá ko Peter Andrews. Naʻe fakahā ʻe Tokoua Andrews ha meʻa naʻe hokosia fekauʻaki mo Liam, ko ha tamasiʻi taʻu hongofulu ʻa ia ʻoku taʻemanavahē ʻi he faifakamoʻoni he ʻapiakó. Naʻe tufa ʻe Liam ʻa e tohi Ko ʻEku Tohi ʻo e Ngaahi Talanoa Faka-Tohitapú, ko e pulusi ʻe he Kau Fakamoʻoni ʻa Sihová, ki he toko 25 ʻo hono kaungā kalasí pea pehē foki ki heʻene faiakó. Naʻe loto ʻa Liam ke papitaiso, ka naʻe ʻeke ange ʻe ha taha pe ʻokú ne fuʻu kei siʻi. Naʻe tali ange ʻe Liam: “ʻOku ʻikai ko hoku taʻumotuʻá ka ko ʻeku ʻofa kia Sihová ʻoku totonu ke hoko ko e meʻa fakapapauʻiʻanga tefitó ia. ʻE fakahaaʻi ʻe heʻeku papitaisó ʻa e lahi ʻo ʻeku ʻofa ʻiate iá.” Ko e taumuʻa ʻa Liam ke hoko ko ha misinale.

ʻI he 1968, naʻe toko 5,400 ʻa e kau malanga ʻo e ongoongo leleí ʻi Venisuela. Ka ʻoku laka hake he taimí ni ʻi he toko 88,000, ko e fakamatala ia ʻa Stefan Johansson, ko e kouʻotineita ʻo e Kōmiti Vaʻá. Pea ʻoku ʻi ai ʻa e malava ke hoko ha tupu lahi ange koeʻuhi naʻe laka hake ʻi he toko 296,000 naʻa nau maʻu ʻa e Fakamanatú ʻi he 2001. ʻI Tīsema ʻo e 1999, ko e ngaahi ʻuha tāfeá naʻá ne fakatupunga ʻa e holo mai ʻa e pelepelá ʻo mate ai ha kakai fakafuofua ki he toko 50,000, ʻo kau ai ha Kau Fakamoʻoni tokolahi. Naʻe fonu ha Fale Fakatahaʻanga ʻe taha ʻi he pelepelá ʻo aʻu ki he mita ʻe .5 mei he ʻaofi ʻo e ʻató. ʻI he fokotuʻu ange ʻe ha taha ke liʻaki ʻa e falé, naʻe tali ange ʻe he fanga tokouá: “ʻIkai ʻaupito! Ko homau Fale Fakatahaʻangá eni, pea ʻoku ʻikai te mau loto ke liʻaki ia he taimí ni.” Naʻa nau kamata ngāue leva, ʻo toʻo ʻa e ngaahi toni pelepela, makamaka, mo e ngaahi toetoenga maumau kehé. Naʻe toe ngaahi ʻa e falé, pea ʻoku pehē ʻe he fanga tokouá ʻoku fakaʻofoʻofa ange ia he taimí ni ʻi he ki muʻa ke hoko ʻa e fakatamakí!

ʻOku ʻi ai ʻa e lea ʻe 87 mo e ngaahi lea fakafeituʻu ʻoku leaʻaki ʻi he ʻOtu Motu Filipainí, ko e lau ia ʻa Tokoua Denton Hopkinson, ko e kouʻotineita ʻo e Kōmiti Vaʻá. Lolotonga ʻa e taʻu fakangāue kuohilí, ko e New World Translation of the Holy Scriptures kakató naʻe tukuange mai ia ʻi he lea tefito ʻe tolu ʻa e fonuá​—faka-Sepuanó, faka-ʻIlokó mo e faka-Takalokó. Naʻe lave ʻa Tokoua  Hopkinson ki ha meʻa naʻe hokosia ʻe ha tamasiʻi taʻu hiva ʻa ia naʻá ne lau ʻa e tohi Good News​​—To Make You Happy, ko e pulusi ʻe he Kau Fakamoʻoni ʻa Sihová. Naʻá ne maʻu mo e toe ngaahi tohi kehe mei he vaʻá, ʻa ia naʻá ne toe lau mo ia, ka naʻe fakafepakiʻi ia ʻe hono fāmilí. ʻI ha ngaahi taʻu ki mui ai ʻi heʻene ʻi he akoʻanga fakafaitoʻó, naʻá ne fetuʻutaki ai ki he vaʻá ʻo kole ki ha ako Tohitapu. Naʻá ne papitaiso ʻi he 1996 pea kau leva ki he ngāue fakafaifekau taimi-kakató. ʻOkú ne ngāue he taimí ni mo hono uaifí ʻi he ʻōfisi vaʻá.

‘Ko Pueto Likó ʻoku hū atu ai ki tuʻa ʻa e Kau Fakamoʻoní,’ ko e fakamatala ia ʻa e kouʻotineita ʻo e Kōmiti Vaʻá ko Ronald Parkin. ʻOku toko 25,000 nai ʻa e kau malanga ʻi he motú, pea kuo hanganaki tuʻu tatau pē ai ʻa e tokolahí ʻi he ngaahi taʻu lahi. Ko e hā hono ʻuhingá? Sai, ʻoku fakafuofua ʻoku “tuku atu” ʻe Pueto Liko ʻa e kau malanga nai ʻe toko 1,000 ʻi he taʻu ki he ʻIunaite Seteté, ko e tokolahi ʻo kinautolu ko ʻenau hiki ʻi he ngaahi ʻuhinga fakaʻekonōmika. Naʻe fakahaaʻi ʻe Tokoua Parkin ha tuʻutuʻuni fakaefakamaau mahuʻinga fekauʻaki mo Luis, ko ha Fakamoʻoni taʻu 17 naʻe kanisā toto. Koeʻuhi naʻe fakafisingaʻi ʻe Luis ʻa e totó, naʻe ʻave ai ʻa ʻene keisí ki he fakamāuʻangá. Naʻe fiemaʻu ʻe he fakamāú ke ne talanoa hangatonu mo ia, ko ia naʻá ne ʻaʻahi ai ki ai ʻi he falemahakí. Naʻe ʻeke ange ʻe Luis kiate ia: “Ko e hā te ke fakamāuʻi ai au ko ha tokotaha lahi kapau naʻá ku fai ha hia mafatukituki, ka ʻi heʻeku loto ke talangofua ki he ʻOtuá, ʻokú ke tōʻongafai mai kiate au ko ha tokotaha kei siʻi?” Naʻe tuipau ai ʻa e fakamāú ko ha tokotaha kei siʻi matuʻotuʻa ia pea ʻoku malava ke ne fai ha fili maʻana.

Hoko atu ʻi he līpooti mei he ngaahi fonua mamaʻó, ko Harold Corkern, ʻo e Kōmiti Vaʻa U.S., naʻá ne fai ha fakaʻekeʻeke ʻo ha kau sevāniti taimi fuoloa ʻa Sihova ʻe toko fā. Ko Arthur Bonno kuó ne fakamoleki ha taʻu ʻe 51 ʻi he ngāue taimi-kakató pea ʻoku ngāue he taimí ni ʻi he Kōmiti Vaʻa ʻi ʻEkuatoá. Ko Angelo Catanzaro kuó ne fakamoleki ʻa e taʻu ʻe 59 ʻi he ngāue taimi-kakató, ko e lahi taha aí ʻi he tuʻunga ko ha ʻovasia fefonongaʻaki. Ko Richard Abrahamson naʻá ne maʻu tohi fakamoʻoni ako mei he Akoʻanga ko Kiliatí ʻi he 1953, pea naʻe fakamonūʻaki ia ke ne tokangaʻi ʻa e ngāue ʻi Tenimaʻaké feʻunga mo e taʻu ʻe 26 ki muʻa ke ne toe foki ki he Pēteli ʻi Brooklyn. Fakaʻosí, naʻe fiefia ʻa e tokotaha kotoa ke fanongo ki he taʻu 96 ko Carey W. Barber. ʻI heʻene papitaiso ʻi he 1921, kuo fakamoleki ai ʻe Tokoua Barber ʻa e taʻu ʻe 78 ʻi he ngāue fakafaifekau taimi-kakató pea kuó ne hoko ko ha mēmipa ʻo e Kulupu Pulé talu mei he 1978.

Ngaahi Malanga Fakaueʻiloto

Naʻe kau ʻi he fakataha fakataʻú ha ngaahi malanga fakatupu fakakaukau hokohoko. Ko Tokoua Robert W. Wallen naʻá ne malanga ʻi he kaveinga “Ko ha Kakai Maʻa Hono Huafá.” Ko e kakai kitautolu maʻá e huafa ʻo e ʻOtuá, pea ʻoku lava ke ʻiloʻi kitautolu ʻi he ngaahi fonua laka hake he 230. Kuo ʻomai ʻe Sihova kia kitautolu “ha ʻamui mo ha ʻamanaki.” (Selemaia 29:11) Kuo pau ke tau hokohoko atu ʻi hono ʻai ke ʻiloa ʻa e Puleʻanga ʻo e ʻOtuá, ʻo vahevahe atu ʻa e pōpoaki fakaofo ʻo e fakafiemālie mo e fakanonga. (Aisea 61:1) “ʻOfa ke tau hokohoko atu,” ko e fakaʻosiʻaki ia ʻe Tokoua Wallen, “ʻi he ʻaho ki he ʻaho ʻa e moʻui maʻá e huafa ʻoku uiʻaki kitautolú, ko e Kau Fakamoʻoni ʻa Sihová.”​—Aisea 43:10.

Ko e konga fakaʻosi ʻo e polokalamá ko ha malanga fakakongokonga ia ʻa e kau mēmipa ʻe toko tolu ʻo e Kulupu Pulé. Naʻe fakakaveinga ia “Ko e Taimi Eni ke Hanganaki ʻĀʻā, Tuʻu Maʻu, pea Tupu ʻo Mālohi.”​—1 Kolinito 16:13.

ʻUluakí, naʻe malanga ʻa Tokoua Stephen Lett ʻi he kaveinga “Hanganaki ʻĀʻā ʻi he Houa Fakaʻosi ko Ení.” Ko e mohe ʻa e sinó ko ha meʻaʻofa ia, ko e fakamatala ia ʻa Tokoua Lett. ʻOkú ne fakaivimālohiʻi kitautolu. Kae kehe, ko e mohe fakalaumālié, ʻoku ʻikai ʻaupito ke ʻaonga ia. (1 Tesalonaika 5:6) ʻE lava fēfē leva ke tau hanganaki ʻāʻā fakalaumālie? Naʻe fakahaaʻi ʻe Tokoua Lett ʻa e “ngaahi foʻiʻakau” fakalaumālie ʻe tolu: (1) Femoʻuekina ʻi he ngāue ʻa e ʻEikí. (1 Kolinito 15:58) (2) Lāuʻilo ki hoʻo fiemaʻu fakalaumālié. (Mātiu 5:3) (3) Tali ʻa e akonaki makatuʻunga ʻi he Tohitapú koeʻuhi ke ngāue fakapotopoto ai.​—Palovepi 13:20.

Ko Tokoua Theodore Jaracz naʻá ne fakahoko ha malanga fakaueʻiloto naʻe fakakaveinga ko e “Tuʻu Maʻu ʻi he Malumalu ʻo e ʻAhiʻahí.” ʻI he lave ki he Fakahā 3:​10, naʻe ʻeke ai ʻe Tokoua Jaracz: “Ko e hā ʻa e ‘taimi ʻahiʻahí’?” Ko e ʻahiʻahi ko iá ʻoku hoko mai ia “ʻi he ʻaho ʻo e ʻEiki,” ʻa ia ʻoku tau lolotonga ʻi aí. (Fakahā 1:10) Ko e ʻahiʻahí ʻoku hoko takatakai ia ʻi he ʻīsiu tefitó​—ʻoku tau kau ki he Puleʻanga kuo fokotuʻu ʻo e ʻOtuá pe ki he fokotuʻutuʻu ʻo e ngaahi meʻa fulikivanu ʻa Sētané? Kae ʻoua ke ngata ʻa e taimi ʻahiʻahi ko iá, kuo pau ke tau fehangahangai mo e ngaahi ʻahiʻahi pe ngaahi  faingataʻa. Te tau hanganaki mateaki kia Sihova mo ʻene kautahá? ‘Kuo pau ke tau fakahāhā ʻa e mateaki ko iá ʻi he tuʻunga ko e faʻahinga tāutaha,’ ko e fakamatala ia ʻa Tokoua Jaracz.

Fakaʻosí, naʻe malanga ʻa Tokoua John E. Barr ʻi he kaveinga ko e “Tupu ʻo Mālohi ʻi he Tuʻunga ko ha Tokotaha Fakalaumālie.” ʻI he lave ki he Luke 13:​23-​25, naʻá ne fakamatala ai kuo pau ke tau fakafitefitaʻa “ke hū ʻi he matapa fāsiʻi.” ʻOku ʻikai lava ʻa e tokolahi koeʻuhi ko e ʻikai te nau ngāue tōtōivi feʻunga ke tupu ʻo mālohí. Ke hoko ko e kau Kalisitiane lalahí, kuo pau ke tau ako ke ngāueʻaki ʻa e ngaahi tefitoʻi moʻoni faka-Tohitapú ʻi he tafaʻaki kotoa ʻo e moʻuí. Naʻe enginaki ʻa Tokoua Barr: “ʻOku ou fakapapauʻi te mou loto-tatau ko e taimi eni ke (1) tauhi ʻa Sihova ke ʻuluaki mo muʻomuʻa taha; (2) tupu ʻo mālohi; pea (3) fakafitefitaʻa ʻi hono fai ʻa e finangalo ʻo Sihová. ʻI he foungá ni te tau malava ai ke hū ʻi he matapā fāsiʻi ʻa ia ʻoku taki atu ki he moʻui fakaofo taʻehanongataʻangá.”

ʻI he fakaofiofi ke ʻosi ʻa e fakataha fakataʻú, naʻe ʻi ai ʻa e foʻi fehuʻi ʻe taha naʻe teʻeki ai ke tali: Ko e hā ʻa e konga tohi fakataʻu ki he taʻu fakangāue 2002? Ko e foʻi fehuʻi ko iá ne tali ia ʻi he ʻaho hono hokó.

Fakataha Fakalahi

Ne lahi ʻa e ngaahi meʻa naʻe fakatuʻotuʻa ki ai ʻi he pongipongi Sāpaté ʻi he kamata ʻa e polokalama ʻo e fakataha fakalahí. Naʻe kamata ia ʻaki ha fakamatala fakanounou ʻo e lēsoni Taua Leʻo ki he uiké, ʻo hoko atu ai ha fakahoko nounou ʻo e niʻihi ʻo e ngaahi meʻa mahuʻinga ʻo e fakataha fakataʻú. Hokó, naʻe fiefia ʻa e tokotaha kotoa ke fanongo ki ha malanga ʻi he konga tohi fakataʻu ki he 2002: “Haʻu kiate au, . . . pea te u fakaivifoʻou kimoutolu.” (Mātiu 11:​28, NW) Naʻe makatuʻunga ʻa e malangá ʻi he ngaahi kupu ako naʻe toki pulusi ki mui ʻi he ʻīsiu ʻo e Taua Leʻo ʻo Tīsema 15, 2001.

Hoko atu aí, ko e niʻihi ʻa ia naʻa nau hoko ko e kau fakafofonga ki he ngaahi Fakataha-Lahi makehe “Kau Faiako ʻo e Folofola ʻa e ʻOtuá” ʻi Falanisē mo ʻĪtali ʻi ʻAokosi 2001, naʻa nau vahevahe mai ai ʻa e ngaahi meʻa naʻe maongo kia kinautolú. c Fakaʻosí, ʻi he hoko ko e meʻa mahuʻinga ʻo e polokalama ʻo e ʻahó, naʻe fakahoko ai ʻa e ongo malanga fakaʻosí ʻe ha ongo malanga ʻaʻahi mei he Pēteli Brooklyn.

Ko e ʻuluakí naʻe fakakaveinga ia ko e “Falala Loto-Toʻa kia Sihova Lolotonga ʻa e Ngaahi Taimi Faingataʻa ko Ení.” Naʻe fakahoko mai ai ʻe he tokotaha malangá ʻa e ngaahi poini tefito ko ení: (1) Ko e falala loto-toʻa kia Sihová kuo mātuʻaki mahuʻinga maʻu pē ia ki he kakai ʻa e ʻOtuá. ʻOku ʻi he Tohitapú ʻa e ngaahi faʻifaʻitakiʻanga lahi ʻo e faʻahinga naʻa nau fakahāhā ʻa e loto-toʻa mo e tui ʻi he fehangahangai mo e fakatangá. (Hepelu 11:1–​12:3) (2) ʻOku tokonaki mai ʻe Sihova ha makatuʻunga lelei kia kitautolu ke falala taʻetoeveiveiua ai kiate ia. Ko ʻene ngaahi ngāué mo ʻene Folofolá ʻoku fakapapauʻi ai ʻokú ne tokanga ki heʻene kau sevānití pea ʻe ʻikai ʻaupito te ne fakangaloʻi kinautolu. (Hepelu 6:​10) (3) Ko e loto-toʻá mo e falalá ʻoku fiemaʻu ia tautefito ʻi he ʻahó ni. ʻOku “fehiʻanekina” kitautolu, hangē ko ia ne tomuʻa tala ʻe Sīsuú. (Mātiu 24:9) Koeʻuhi ke kātaki, ʻoku fiemaʻu ke tau falala ki he Folofola ʻa e ʻOtuá, ʻo tuipau ʻoku ʻia kitautolu hono laumālié, pea loto-toʻa ke hanganaki talaki ʻa e ongoongo leleí. (4) ʻOku fakahaaʻi ʻe he ngaahi faʻifaʻitakiʻangá ʻoku tau fehangahangai mo e fakafepakí he taimí ni. Naʻe maongo loloto ki he tokotaha kotoa ʻa e lave ʻa e tokotaha malangá ki he meʻa ne kātekina ʻe hotau fanga tokouá ʻi Falanisē, Kāsakisitani, Lūsia, Siōsia, Tekimēnisitani mo ʻAimīnia. Ko e moʻoni, ko e taimi eni ke fakahāhā ai ʻa e loto-toʻa mo e falala kia Sihová!

Ko e tokotaha malanga fakamuimuí naʻá ne fakahoko ʻa e kaveinga ko e “Laka Fāʻūtaha ki Muʻa mo e Kautaha ʻa Sihová.” Naʻe kāpui ʻi he malangá ha ngaahi poini taimi totonu. (1) Ko e laka ki muʻa ʻa e kakai ʻa Sihová ʻoku ʻilolahia ia. Ko ʻetau ngāue fakamalangá mo ʻetau ngaahi fakataha-lahí ʻoku tohoakiʻi ai kitautolu ki he vakai ʻa e kakaí. (2) Kuo fokotuʻu ʻe Sihova ha kautaha ʻa ia ʻoku fāʻūtaha.  ʻI he 29 T.S., naʻe pani ai ʻa Sīsū ʻe he laumālie māʻoniʻoní fakataha mo ha taumuʻa ke ne ʻomai ʻa e “meʻa kotoa pe”​—ʻa e faʻahinga ʻoku ʻamanaki fakahēvaní pea pehē ki he faʻahinga ʻoku ʻamanaki fakaemāmaní​—ki he fāmili fāʻūtaha ʻo e ʻOtuá. (Efeso 1:​8-10) (3) Ko e ngaahi fakataha-lahí ko ha fakahāhā tuʻu-ki-muʻa ia ʻo e fāʻūtaha fakavahaʻapuleʻangá. Naʻe hā mahino māʻalaʻala eni ʻi he ngaahi fakataha-lahi makehe naʻe fai ʻi Falanisē mo ʻĪtali ʻi ʻAokosi ʻo e taʻu kuo ʻosí. (4) Naʻe fai ha fakapapau fakaueʻiloto ʻi Falanisē mo ʻĪtali. Naʻe vahevahe mai ʻe he tokotaha malangá ha kiʻi konga siʻi mei he fakapapau fakaueʻilotó. Ko e konga kakato ʻo e fakapapaú ʻoku hā ia ʻi lalo.

ʻI he fakaʻosi ʻo e malanga fakamuimuí, naʻe lau ai ʻe he tokotaha malanga ʻaʻahí ha fanongonongo fakaueʻiloto naʻe teuteuʻi ʻe he Kulupu Pulé. Naʻe pehē ai, ʻi hano konga: “Ko e taimi eni ke hanganaki ʻāʻā ai pea hanganaki leʻo, ʻo ʻiloʻi ʻa e anga ʻo e hoko ʻa e ngaahi meʻa ʻi he māmaní. . . . ʻOku mau loto ke fakahoko atu ʻa e tokanga ʻofa ʻa e Kulupu Pulé kia kimoutolú pea ki he toenga kotoa ʻo e kakai ʻa e ʻOtuá. ʻOfa ke ne faitāpuekina lahi kimoutolu ʻi hoʻomou fai ʻaufuatō ʻa hono finangaló.” Ko e kakai ʻa Sihová ʻi he feituʻu kotoa pē ʻoku nau fakapapauʻi ke hanganaki ʻāʻā ʻi he ngaahi taimi faingataʻa ko ení pea ke hanganaki laka ki muʻa loto-toʻa fakataha mo e kautaha fāʻūtaha ʻa Sihová.

[Fakamatala ʻi lalo]

[Puha/Fakatātā ʻi he peesi 29-31]

Fakapapau

ʻI ʻAokosi 2001, naʻe fai ai ʻa e ngaahi Fakataha-Lahi makehe “Kau Faiako ʻo e Folofola ʻa e ʻOtuá” ʻi Falanisē mo ʻĪtali. ʻI he ngaahi fakataha-lahi ko iá, naʻe fakahoko ai ha fakapapau fakaueʻiloto. Ko e konga tohi eni ʻo e fakapapau ko iá.

“ʻI HE TUʻUNGA ko e Kau Fakamoʻoni ʻa Sihová, ko kitautolu kotoa ʻoku fakatahataha ʻi he Fakataha-Lahi ko eni ‘Kau Faiako ʻo e Folofola ʻa e ʻOtuá,’ kuo fakahinohinoʻi kitautolu ʻe ha akonaki ʻa ia ʻoku ʻaonga lahi. Ko e matavai ʻo e akonaki ko ení kuo fakahaaʻi māʻalaʻala. Ko e akonakí ʻoku ʻikai hano tupuʻanga fakaetangata. ʻOku haʻu ia mei he Tokotaha ʻoku fakamatalaʻi ʻe he palōfita ko ʻAisea ʻi he kuonga muʻá ko hotau ‘Faiako Maʻongoʻongá.’ (Aisea 30:​20, NW) Fakatokangaʻi ʻa e fakamanatu ʻa Sihova hangē ko ia ʻoku fakamatalaʻi ʻi he Aisea 48:17: ‘Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.’ ʻOku anga-fēfē ʻene fakahoko ení? Ko e founga tefitó ʻoku fakafou ia ʻi he tohi kuo liliu mo tufaki lahi taha ʻi he māmaní, ko e Tohitapú, ʻa ia ʻoku tala mai ai kia kitautolu ʻi he kupuʻi lea mahino: ‘Ko e potu Folofola kotoa pe ne fakamanava mei he ʻOtuá, ʻoku ʻaonga.’​—2 Timote 3:16.

“ʻI he ʻahó ni, ʻoku fiemaʻu vavale ʻe he faʻahinga ʻo e tangatá ʻa e akonaki ʻaonga peheé. Ko e hā ʻoku lava ke leaʻaki ai ení? ʻI he fakakaukau atu ki he tuʻunga feliliuaki, fakatupu puputuʻu ʻo e māmani ko ení, ko e hā ʻoku ʻiloʻi ʻe he kakai ʻiloʻiló? Ko e meʻa tofu pē ko ení: Neongo kuo akoʻi ʻa e laui miliona ʻe he ngaahi founga fakaeako ʻa e māmaní, ʻoku fakamamahi ʻa e ʻikai ʻi ai ha ngaahi meʻa mahuʻinga moʻoní pea mo e taʻemalava ke fakafaikehekeheʻi ʻa e tonú mei he halá. (Aisea 5:​20, 21) ʻOku hulu fau ʻa e taʻeʻilo ki he Tohitapú. Lolotonga ʻoku ʻai ʻe he tekinolosiá ke malava ʻo maʻu ha fakahinohino lahi fakafou ʻi hono ngāueʻaki ʻa e komipiutá, ko fē ʻa e tali ki he ngaahi fehuʻi mātuʻaki mahuʻinga hangē ko ení, Ko e hā ʻa e taumuʻa ʻo e moʻuí? ʻE anga-fēfē ke tau mahinoʻi ʻa e ngaahi meʻa ʻoku hoko ʻi hotau taimí? ʻOku ʻi ai ha ʻamanaki papau ki he kahaʻú? ʻE faifai pea hoko ʻa e melinó mo e maluʻangá ko ha meʻa moʻoni? ʻIkai ko ia pē, ʻoku maʻu ʻi he ngaahi laupapa ʻo e laipelí ʻa e ngaahi voliume lahi ʻo e ngaahi tohi maʻuʻanga fakamatala kuo meimei kāpui ai ʻa e tafaʻaki kotoa ʻo e feinga ʻa e tangatá. Neongo ia, ʻoku kei fai pē ʻe he faʻahinga ʻo e tangatá ʻa e ngaahi fehālaaki ki muʻá. ʻOku ʻalu he ʻataá ʻa e faihiá. Ko e ngaahi mahaki naʻe pehē ʻi ha taimi kuo fakangatá ʻoku toe foki mai ia, lolotonga ia ko e ngaahi mahaki kehe, hangē ko e ʻeitisí,  ʻoku mafola fakamanavahē ia. ʻOku movetevete ʻa e moʻui fakafāmilí ʻi ha tuʻunga fakatupu puputuʻu. ʻOku maumauʻi ʻe he ʻuliʻi ʻo e ʻeá ʻa e ʻātakaí. Ko e tautoitoí mo e ngaahi meʻatau ʻo e fakaʻauhamālie fakatokolahí ʻokú ne fakamanamanaʻi ʻa e melinó mo e maluʻangá. Ko e ngaahi palopalema ʻoku ʻikai hano fakaleleiʻangá ʻoku hokohoko atu ʻa ʻene fakautuutú. Ko e hā hotau ngafa totonu ʻi hono tokoniʻi hotau kaungā faʻahinga ʻo e tangatá ʻi he ngaahi taimi faingataʻa ko ení? ʻOku ʻi ai ha akonaki ʻoku fakamatalaʻi ai ʻa e tupuʻanga ʻo e faingataʻaʻia ʻa e faʻahinga ʻo e tangatá pea ʻikai ngata pē ʻi heʻene fakahaaʻi ʻa e hala ki he moʻui ʻoku lelei angé he taimí ni, ka ʻokú ne toe ʻomai ha ʻamanaki lelei papau ki he kahaʻú?

“Ko ʻetau ngāue Fakatohitapú ke ‘ō, ʻo ngaohi ʻa e ngāhi kakai kotoa pe ko e kau ako, ʻi he akoʻi kinautolu ke tauhi ʻa e ngāhi meʻa kotoa pe kuo tuʻutuʻuni ʻe Kalaisí.’ (Mātiu 28:​19, 20) Ko e ngāue ko ení naʻe tuku mai ia ʻe Sīsū Kalaisi ʻi he hili ʻa ʻene pekiá mo e toetuʻú, ʻi heʻene maʻu ʻa e mafai kotoa pē ʻi hēvani pea ʻi he māmaní. ʻOku māʻolunga ia ʻi he ngāue kotoa kuo pouaki ʻe he tangatá. Mei he vakai ʻa e ʻOtuá, ko ʻetau ngāué, ʻa ia ʻoku fakahangataha ki he ngaahi fiemaʻu fakalaumālie ʻa e faʻahinga ʻoku fiekaia ki he māʻoniʻoní, ʻoku muʻomuʻa tahá. ʻOku tau maʻu ʻa e ngaahi ʻuhinga lelei Fakatohitapu ki hono fai fakamātoato ʻa e ngāue ko iá.

“ʻOku fiemaʻu ki he meʻá ni ʻa hono tauhi ʻa e ngāue ko iá ke muʻomuʻa taha ʻi heʻetau moʻuí. ʻI he tāpuaki mo e tokoni ʻa e ʻOtuá, ʻe fakahoko ai ʻa e ngāué, neongo ʻa e ngaahi tākiekina fakahohaʻa lahi, ngaahi fakafaingataʻaʻiaʻanga, mo e ngaahi fakafepaki mei he ngaahi ʻelemēniti fakalotu mo fakapolitikale, kuo faʻufaʻu ke ne taʻofi ʻa e laka ki muʻa ʻa e polokalama ako fakaemāmani lahi ko ení. ʻOku tau falala mo maʻu ʻa e tui ʻe hokohoko atu ʻa e lakalakaimonū ʻa e ngāué ni pea aʻu ki hono fakahoko kakato maʻongoʻongá. Ko e hā ʻoku lava ai ke tau mātuʻaki fakapapauʻí? Koeʻuhi ko e ʻEiki ko Sīsū Kalaisí kuó ne talaʻofa mai te ne ʻia kitautolu ʻi heʻetau ngāue fakafaifekau kuo foaki mai ʻe he ʻOtuá ʻo aʻu ki he fakaʻosiʻosi ʻo e ngaahi meʻa ʻoku tuʻu ní.

“ʻOku ofi ʻa e ngataʻangá ki he faʻahinga faingataʻaʻia ʻo e tangatá. Ko ʻetau ngāue lolotongá kuo pau ke fakahoko ia ki muʻa ke hoko mai ʻa e ngataʻanga fakaʻosí. Ko ia ai, ko kitautolu, ʻi he tuʻunga ko e Kau Fakamoʻoni ʻa Sihová, ʻoku tau fakapapau ʻo pehē:

“ʻUluakí: ʻI he tuʻunga ko e kau faifekau fakatapuí, ʻoku tau fakapapauʻi ke hanganaki fakamuʻomuʻa ʻa e ngaahi meʻa ʻo e Puleʻangá ʻi heʻetau moʻuí pea hokohoko atu ʻa e tupu fakalaumālié. Ke lavaʻi iá, ko ʻetau lotú ʻoku fāitaha ia mo e ngaahi lea ʻo e Sāme 143:10: ‘Ako au ke u fai ho finangaló; he ko hoku ʻOtuá ʻa hoʻo ʻAfió.’ ʻOku fiemaʻu ki he meʻá ni ʻa e hoko ko e kau ako tōtōivi, ʻi he feinga ke lau fakaʻaho ʻa e Tohitapú mo kau ʻi he ako mo e fekumi fakafoʻituituí. Ke ʻai ke hā ʻetau laka ki muʻá ki he faʻahinga kotoa, te tau fai ʻa e feinga totonu kotoa pē ke teuteu pea maʻu ʻaonga kakato mei he ako fakateokalati ʻoku tokonaki mai ʻi he ngaahi fakataha ʻa e fakatahaʻangá, ʻi he ngaahi ʻasemipilī ʻi he sēketí, pea ʻi he ngaahi fakataha-lahi fakavahé, fakafonuá mo e fakavahaʻapuleʻangá.​—1 Timote 4:​15; Hepelu 10:​23-​25.

“Uá: Koeʻuhi ke hoko ʻo akoʻi ʻe he ʻOtuá, te tau kai ʻataʻatā pē ʻi heʻene tēpilé pea tokanga lelei ki he fakatokanga ʻa e Tohitapú fekauʻaki mo e ngaahi akonaki kākā ʻa e kau tēmenioó. (1 Kolinito 10:21; 1 Timote 4:1) Te tau tokanga makehe ke fakaʻehiʻehi mei he ngaahi ʻelemēniti fakatupu maumaú, ʻo kau ai ʻa e ngaahi loi fakalotú, ngaahi fakaʻuhinga launoa, ngaahi tōʻonga anga-kehe fakaefehokotaki fakasino fakamā, ko e hulu fau ʻo e fakatātā fakalieliá, fakafiefia ololaló, mo e meʻa kotoa pē ʻoku ʻikai ‘fakatatau ki he akonaki leleí.’ (Loma 1:​26, 27; 1 Kolinito 3:​20; 1 Timote 6:​3, NW; 2 Timote 1:​13) ʻI he tokanga ki he ‘ngaahi meʻaʻofa ʻi he kau tangatá,’ ʻa ia ʻoku nau taau ke akoʻi ʻa e meʻa ʻoku leleí, te tau tokaʻi moʻoni ʻenau ngaahi feingá pea ngāue fāitaha ʻaufuatō mo kinautolu ʻi hono pouaki ʻa e ngaahi ʻulungaanga maʻa mo māʻoniʻoní pea mo e ngaahi tuʻunga fakalaumālie ʻo e Folofola ʻa e ʻOtuá.​—Efeso 4:​7, 8, 11, 12; 1 Tesalonaika 5:​12, 13; Taitusi 1:9.

“Tolú: ʻI he tuʻunga ko e ngaahi mātuʻa Kalisitiané, ko ʻetau feinga fakamātoató ke fakahinohinoʻi ʻetau fānaú ʻo ʻikai ʻi he leá pē kae pehē foki ʻi he faʻifaʻitakiʻangá. Ko ʻetau tokanga tefitó ke tokoniʻi kinautolu mei heʻenau kei valevalé ke ‘ilo ae gaahi tohi maonioní, koeʻuhi ke hoko ai o fakaboto ki he fakamouí.’ (2 Timote 3:​15, PM) Te tau tauhi maʻu ʻi he fakakaukaú ko ʻetau ʻohake kinautolu ʻi he akonaki mo e fakatonutonu fakaʻatamai ʻa Sihová ʻe ʻoange ai kia kinautolu ʻa e faingamālie lelei taha ke  hokosia ai ʻa e talaʻofa fakaʻotua ʻa ia ‘ʻe hoko ʻo lelei kia kinautolú pea nau maʻu ai ha taimi fuoloa ʻi he māmaní.’​—Efeso 6:​1-4, NW.

“Faá: ʻI he taimi ʻo e fehangahangai mo e ngaahi loto-moʻuá pe palopalema mamafá, te tau tomuʻa ‘fakaha ki he ʻOtuá ʻa ʻetau ngaahi kolé,’ ʻi he fakapapauʻi ko e ‘nonga ʻa e ʻOtuá, ʻa ia ʻoku mamaʻo ʻi he tatae ʻa e ʻatamai fakaetangata kotoa pe’ te ne maluʻi kitautolu. (Filipai 4:​6, 7) ʻI he hoko ʻo ʻi he malumalu ʻo e ʻioke ʻa Kalaisí, te tau maʻu ai ʻa e fakaivifoʻou. ʻI hono ʻiloʻi ʻoku tokanga mai ʻa e ʻOtuá kia kitautolú, ʻe ʻikai te tau toumoua ai ke lī ʻetau ngaahi loto-moʻuá kiate ia.​—Mātiu 11:​28-​30; 1 Pita 5:​6, 7.

“Nimá: ʻI he fakahāhā ʻetau houngaʻia kia Sihova ʻi he monū ʻo e hoko ko e kau faiako ʻo ʻene Folofolá, te tau fakafoʻou ai ʻetau feinga ke ‘vahevahe totonu atu ʻa e mooni ʻo ʻene folofolá’ pea ‘fai ke kakato ʻetau gaue fakafaifekaú.’ (2 Timote 2:​15, PM; 2 Timote 4:​5, PM) Koeʻuhi ʻoku tau mātuʻaki ʻiloʻi ʻa e meʻa ʻoku kau ki aí, ko ʻetau holi fakamātoató ia ke kumi ʻa e faʻahinga tāú pea ʻai ke tupu ʻa e tenga kuo tūtūʻí. ʻIkai ko ia pē, te tau fakaleleiʻi ʻetau founga faiakó ʻaki hono fai ola lelei ha ngaahi ako Tohitapu lahi ange ʻi ʻapi. ʻE ʻomai ʻe he meʻá ni kitautolu ke fehoanaki lahi ange ai mo e finangalo ʻo e ʻOtuá ke ‘maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoní.’​—1 Timote 2:​3, 4. 

“Onó: ʻI he kotoa ʻo e senituli kuo maliu atú pea ki he senituli ko ení, kuo aʻusia ai ʻe he Kau Fakamoʻoni ʻa Sihová ʻi he ngaahi fonua lahi ʻa e ngaahi founga fakafepaki mo e fakatanga kehekehe. Ka kuo fakamoʻoniʻi ʻe Sihova ʻa ʻene kau mo kitautolú. (Loma 8:​31) Ko ʻene Folofola ʻoku ʻikai lava ke loí ʻoku fakapapauʻi mai ai kia kitautolu ‘ʻoku ʻikai ha meʻatau ʻe faʻu kia kitautolu’ ke taʻofi, fakamāmālieʻi, pe tuku ʻetau malangaʻi ʻo e Puleʻangá mo e ngāue fakafaiakó ʻe lavameʻa. (Aisea 54:​17, NW) Tatau ai pē ʻi he taimi faingamālié pe ʻi he faingataʻá, ʻe ʻikai lava ke tuku ʻetau leaʻaki ʻa e moʻoní. Ko ʻetau fakapapaú ke fakahoko fakavavevave ʻetau ngāue fakamalangá mo e fakafaiakó. (2 Timote 4:​1, 2) Ko ʻetau taumuʻá ke vahevahe atu ʻi he kakato taha ʻe ala lavá ʻa e ongoongo lelei ʻo e Puleʻanga ʻo e ʻOtuá ki he kakai ʻo e puleʻanga kotoa pē. Ko ia ai, te nau hokohoko atu ke maʻu ʻa e faingamālie ke ako ai fekauʻaki mo e tokonaki ki hono maʻu ʻa e moʻui taʻengatá ʻi ha māmani foʻou māʻoniʻoni. ʻI he tuʻunga ko e fuʻu kau faiako fāʻūtaha tokolahi ʻo e Folofola ʻa e ʻOtuá, ko ʻetau fakapapaú ia ke hanganaki muimui ʻi he faʻifaʻitakiʻanga ʻa e Faiako Lahí, ʻa Sīsū Kalaisi, pea tapua atu ʻa hono ngaahi ʻulungaanga fakaʻotuá. Te tau fai ʻa e meʻá ni kotoa ke fakalāngilangiʻi mo fakahīkihikiʻi ai ʻa ʻetau Faiako Maʻongoʻonga mo e Tokotaha Foaki-Moʻui ko Sihova ko e ʻOtuá.

“Ko e kau maʻu fakataha kotoa ʻi he fakataha-lahi ko ení ʻa ia ʻoku mou loto-lelei ki hono fai ʻo e fakapapau ko ení, kātaki ʻo lea ʻIO!”

ʻI hono fokotuʻu atu ʻa e fehuʻi fakaʻosi ʻo e fakapapaú ki he toko 160,000 naʻe fakatahataha ʻi he fakataha-lahi ʻaho tolu ʻi Falaniseé pea mo e toko 289,000 ʻi he ngaahi feituʻu ʻe hiva ʻi ʻĪtalí, naʻe kalangaʻaki ha fuʻu “ʻIo” leʻo-lahi ʻi he ngaahi lea lahi naʻe fakafofongaʻi ʻe he kau fakafofongá.