Taimi ʻOku Fakapotopoto Ai Ke Holá

ʻOKU faʻa fakaʻilongaʻi ʻa e māmani he ʻaho ní ʻaki ha laumālie ʻo e fakangalingali toʻa mo e fakafili pe ʻaki ʻa e fakatauelé. Ko ha tokotaha ʻoku hola mei ha tuʻunga ʻoku fai ʻa e vakai lahi ki ai ko ha tokotaha vaivai pe foʻi. ʻOkú ne hoko nai ko ha manukiaʻanga.

Kae kehe, ʻoku fakamahino mai ʻe he Tohitapú ʻoku ʻi ai ʻa e taimi ʻoku fakatou fakapotopoto mo fakalototoʻa ai ʻa e holá. ʻI hono fakapapauʻi ʻa e moʻoni ko ʻení, ki muʻa ke fekau atu ʻa ʻene kau ākongá ʻi he ngāue fakafaifekaú, naʻe tala ʻe Sīsū kiate kinautolu: “Ka nau ka fakatangaʻi kimoutolu ʻi he kolo ko é, mou hola ki he kolo kó é.” (Mātiu 10:23) ʻIo, naʻe feinga ʻa e kau ākonga ʻa Sīsuú ke hola mei honau kau fakatangá. Naʻe ʻikai fiemaʻu ke nau fakahoko ha meʻa ʻo hangē ha tau kalusetí, ʻi he feinga ke liliuʻi fakamālohi ʻa e niʻihi kehé. Naʻa nau maʻu ha pōpoaki ʻo e melino. (Mātiu 10:​11-​14; Ngāue 10:​34-​37) Ko ia ai, ʻi he ʻikai ke fakaʻatā ke hoko ha ʻitá, naʻe pau ke hola ʻa e kau Kalisitiané, ke mavahe mei he meʻa ʻoku fakatupu ʻitá. ʻI he founga ko ʻení, naʻa nau tauhi maʻu ai ha konisēnisi lelei pea pehē foki ki honau vahaʻangatae mahuʻinga mo Sihová.—2 Kolinito 4​:​1, 2.

Ko ha fakatātā kehe ʻaupito ʻoku maʻu ia ʻi he tohi Tohitapu ʻa Palovēpí. ʻOku fakamatala ai fekauʻaki mo ha talavou, ʻa ia ʻi he ʻikai hola ʻi he fehangahangai mo e fakatauelé, naʻá ne muimui ai ʻi ha paʻumutu “hange ko e ʻalu ʻa ha pulu ki he fale tamate manu.” Ko e olá? Ko ha mamahi, koeʻuhi ko e tō ki he fakatauele ʻa ia naʻe kaunga ki heʻene moʻuí tonu.​—Palovepi 7:​5-8, 21-​23.

Fēfē kapau te ke fehangahangai mo ha ʻahiʻahi ke fai ha ʻulungaanga fakaefehokotaki fakasino taʻetaau pe fetaulaki mo ha fakatuʻutāmaki kehe pē ʻe lava ke hoko? Fakatatau ki he Folofola ʻa e ʻOtuá, ko e ngāue feʻungamālié pē nai ke hola, ke fakamavaheʻi ʻa koe tonu mei he tuʻunga ko iá ʻi he vave tahá.—Palovepi 4:​14, 15; 1 Kolinito 6:18; 2 Timote 2:​22.