ʻOkú Ke Fatu ʻa e Fakamolé?

NAʻE tuʻuaki ange ʻe Sīsū Kalaisi ki heʻene kau ākongá ʻa e ʻamanaki ʻo e moʻui taʻengatá, ka naʻá ne toe naʻinaʻi kiate kinautolu ke fatu ʻa e fakamole ʻo e hoko ko ha Kalisitiané. Naʻá ne fakatātaaʻi ʻa e poiní ʻaki ʻene ʻeke: “Tau lau ʻoku ai hamou toko taha ʻoku ne loto ke langa ha fuʻu taua, ʻikai te ne nofo muʻa ʻo fatu hono totongi [“fakamolé,” NW], pe ʻoku feʻunga ʻene paʻanga mo hono fai ke osi?” (Luke 14:28) Ko e hā ʻa e fakamole naʻe ʻuhinga ki ai ʻa Sīsuú?

ʻOku fetaulaki ʻa e kau Kalisitiane kotoa pē mo e ngaahi ʻahiʻahi—ko e niʻihi ʻoku mafatukituki. (Sāme 34:19; Mātiu 10:36) Ko ia ai, ʻoku fiemaʻu ke tau mateuteu fakaeʻatamai mo fakalaumālie koeʻuhí ke ʻoua te tau ʻohovale ʻi he taimi ʻe hoko fakahangatonu mai ai kia kitautolu ha fakafepaki pe ha ngaahi palopalema kehe. Kuo tau ʻosi fakafuofuaʻi ha ngaahi pole pehē ʻi he fakamole ki he hoko ko ha ākonga ʻa Kalaisí, ʻo ʻiloʻi ko e palé​—ʻa e fakamoʻui mei he angahalá mo e maté​—ʻoku mahuʻinga mamaʻo ange ia ʻi ha meʻa pē ʻe lava ke tuʻuaki mai kia kitautolu ʻe he fokotuʻutuʻu lolotongá. ʻIo, ʻoku ʻikai ha meʻa ʻe fakangofua ʻe he ʻOtuá​—naʻa mo e maté​—ʻe lava ke ne maumauʻi tuʻuloa kitautolu kapau te tau hokohoko atu ʻetau tauhi kiate iá.​—2 Kolinito 4:​16-18; Filipai 3:8.

ʻE lava fēfē ke hoko ʻo mālohi pehē ʻetau tuí? ʻOku tupu ʻetau tuí ʻo mālohi ange ʻi he taimi taki taha ʻoku tau fai ai ha fili totonu, mo tuʻumaʻu maʻá e ngaahi tefitoʻi moʻoni faka-Kalisitiané, pe fakahoko ha ngāue ʻoku fehoanaki mo e finangalo ʻo e ʻOtuá—tautautefito ʻi he taimi ʻoku fakamālohiʻi ai kitautolu ke fai ha meʻa ʻoku kehe. ʻI he taimi ʻoku tau hokosia fakafoʻituitui ai ʻa e tāpuaki ʻa Sihová ʻa ia ko e tupu mei hotau ʻalunga loto-tōnungá, ʻoku fakaivimālohiʻi mo fakalolotoʻi ai ʻetau tuí. ʻI he founga ko iá, ʻoku tau muimui ai ki he faʻifaʻitakiʻanga ʻa Sīsuú, ko ʻene ʻuluaki kau ākongá, pea mo e kotoa ʻo e kau tangata mo e kau fefine ʻo e tuí ʻi he ngaahi vahaʻa taimi kehekehe ʻo e hisitōliá ʻa ia naʻa nau ‘fatu [totonu] ʻa e fakamole’ ʻo e tauhi ki he ʻOtuá.​—Maake 1:​16-20; Hepelu 11:​4, 7, 17, 24, 25, 32-​38.