ʻOku Fiemaʻu Ke Tau ʻIlo pe ko Hai ʻa e ʻOtuá

ʻIKAI ʻokú ke fiefia ke sio ki ha langi fetuʻua ʻi ha pō tafitonga? ʻIkai ʻoku fakamānako ʻa e ʻalaha namu kakala ʻo e ngaahi matalaʻiʻakau lanu kehekehé? ʻIkai ʻokú ke fiefia ʻi he fanongo ki he hiva ʻa e manupuná pea mo e ongo ʻo e ngahaha ʻa e lauʻiʻakaú ʻi haʻane kiʻi havilivili? Pea he fakatoʻoaloto ē ko e ngaahi fuʻu tofuaʻa mālohí mo e ngaahi meʻamoʻui kehe ʻoku nofo ʻi tahí! ʻOku ʻi ai leva ʻa e faʻahinga ʻo e tangatá mo honau tufakanga fakakonisēnisí pea mo ha foʻi ʻuto fihi fakaʻulia. ʻOku anga-fēfē hoʻo fakamatalaʻi ʻa e ʻi ai ʻa e ngaahi meʻa fakaofo kotoa ʻokú ne takatakaiʻi kitautolú?

ʻOku tui ʻa e niʻihi ko e kotoa ʻo e meʻá ni ko ha hoko fāinoa mai pē. Ka ʻo kapau ʻoku pehē eni, ko e hā ʻoku tui ʻOtua ai ʻa e faʻahinga ʻo e tangatá? Ko e hā ka fakahoko mai ai ʻe ha fakatahataha fāinoa ʻo e ngaahi kemikale kehekehé ha ngaahi meʻamoʻui fakataha mo ha fiemaʻu fakalaumālie?

“ʻOku faiaka loloto ʻa e lotú ʻi he natula ʻo e tangatá pea ʻoku hoko ia ki he tuʻunga fakaʻekonōmika mo e ʻātakai fakaeako kotoa.” Ko e foʻi fakakaukaú ni ʻokú ne fakanounouʻi ʻa e fakatotolo naʻe fakahā ʻe Palōfesa Alister Hardy ʻi heʻene tohi ko e The Spiritual Nature of Man. Ko ha ngaahi sivi ki muí ni ʻi he ʻutó kuo taki ai ʻa e kau faisaienisi niuloni ʻe niʻihi ke nau pehē ko e faʻahinga ʻo e tangatá naʻe “fakapolokalamaʻi fakakēnisi” nai ia fakataha mo e malava ke lotú. Ko e tohi ʻoku fakakaveinga ko e Is God the Only Reality? ʻoku pehē ai: “Ko e fekumi fakalotu ki ha ʻuhingá . . . ʻa e meʻa ʻoku hokosia anga-maheni ʻi he sivilaise mo e kuonga kotoa talu mei he hā ko ia ʻa e faʻahinga ʻo e tangatá.”

Fakakaukau angé ki he meʻa naʻe fakaʻosiʻaki ʻe ha tangata poto ʻi he taʻu nai ʻe 2,000 kuo maliu atú. Naʻá ne tohi: “ʻIlonga ha ʻapi, kuo pau naʻe langa ʻe ha taha; pea ko ia naʻá ne langa ʻa e meʻa kotoa pe ko e ʻOtua.” (Hepelu 3:4) Ko hono moʻoní, ko e ʻuluaki foʻi veesi pē ʻo e Tohitapú ʻoku pehē ai: “I he kamataʻanga naʻe fakatupu ʻe he ʻOtua ʻa e ngaahi langi mo mamani.”​​—Senesi 1:1.

Ko hai leva ʻa e ʻOtuá? ʻOku fekehekeheʻaki ʻa e faʻahinga ʻo e tangatá ʻi he foʻi fehuʻi ko ení. ʻI hono ʻeke pe ko hai ʻa e ʻOtuá, naʻe tali ʻe ha Siapani taʻu hongofulu tupu ko Yoshi: “ʻOku ʻikai te u fakapapauʻi. Ko ha tokotaha lotu Puta au, pea kuo ʻikai ke mahuʻinga kia au ke ʻiloʻi pe ko hai ʻa e ʻOtuá.” Neongo ia, ʻoku fakahaaʻi ʻe Yoshi ʻoku ʻotuaʻaki ʻe he tokolahi ʻa Puta tonu. Ko Nick, ko ha tangata pisinisi ʻi hono taʻu 60 tupú, ʻokú ne tui ki he ʻOtuá pea fakakaukau kiate ia ko e ivi mālohi tahá ia. ʻI he kole ke ne fakamatala ki he meʻa ʻokú ne ʻilo fekauʻaki mo e ʻOtuá, naʻe tali ʻe Nick ʻi he hili ia haʻane longo fuoloa: “Ko ha fehuʻi mātuʻaki faingataʻa ia, ʻe hoku kaumeʻa. Ko e meʻa pē ʻoku lava ke u leaʻakí ʻoku ʻi ai ʻa e ʻOtua.”

 Ko e kakai ʻe niʻihi ʻoku nau “lotu mo tauhi ʻa e meʻa naʻe fakatupu ʻe he ʻOtuá kae ʻikai ko e Tokotaha-Fakatupú tonu.” (Loma 1:​25, Today‘s English Version) ʻOku lotu ʻa e laui miliona ki he fanga kui kuo maté, ʻi he tui ʻoku fuʻu mamaʻo ʻa e ʻOtuá ke aʻu ki ai. ʻI he lotu Hinituú, ʻoku ʻi ai ʻa e ngaahi ʻotua mo e ngaahi ʻotua fefine tokolahi. Ko e ngaahi ʻotua kehe, hangē ko Siusi mo Hēmesí, naʻe fai ʻa e lotu ki ai ʻi he ngaahi ʻaho ʻo e kau ʻapositolo ʻa Sīsū Kalaisí. (Ngāue 14:​11, 12, NW) Ko e ngaahi siasi lahi ʻo e Puleʻanga-Haʻa-Kalisitiané ʻoku nau akoʻi ko e ʻOtuá ko ha Tolu-Tahaʻi-ʻOtua, ʻo ʻi ai ʻa e ʻOtua ko e Tamai, ʻOtua ko e ʻAlo mo e ʻOtua ko e Laumālie Māʻoniʻoni.

Ko e moʻoni, “ʻoku ʻi ai ha ngaahi ʻotua tokolahi, mo ha ngaahi ʻeiki tokolahi,” ko e lau ia ʻa e Tohitapú. Kae kehe, ʻokú ne tānaki mai: “Kiate kitautolu ʻoku taha pe ʻa e ʻOtua, ko e Tamai, ʻa ia ʻoku mei ai ʻa e meʻa kotoa pe.” (1 Kolinito 8:​5, 6) ʻIo, ʻoku taha pē ʻa e ʻOtua moʻoní. Ka ko hai ia? Ko e tokotaha fēfē ia? ʻOku mahuʻinga kia kitautolu ke ʻilo ʻa e tali ki he ongo fehuʻí ni? Ko Sīsū tonu naʻá ne lea ʻi he lotu ki he Tokotahá ni: “Ko eni ae moui taegata, koʻe nau ilo koe koe Otua mooni be taha, mo Jisu Kalaisi, aia naa ke fekau.” (Sione 17:​3, PM) ʻOku ʻi ai ʻa e ʻuhinga ke tui ko ʻetau lelei taʻengatá ʻoku fakatuʻunga ia ʻi hono ʻiloʻi ʻa e moʻoni fekauʻaki mo e ʻOtuá.

[Fakatātā ʻi he peesi 3]

Ko e hā ʻokú ne fakamatalaʻi ʻa ʻenau ʻi aí?

[Maʻuʻanga]

Tofuaʻa: Courtesy of Tourism Queensland

[Maʻuʻanga ʻo e Tā ʻi he peesi 2]

TAKAFI: Index Stock Photography © 2002