ʻOku Taki ʻe he Anga-Tonú ʻa e Kau Faitotonú

“KO E tangata kuo fanauʻi ʻe he fefine ʻoku fuonounou ʻene moʻui, pea ʻoku fonu ʻi he mamahi,” ko e lau ia ʻa e Tohitapú. (Siope 14:1) Ko e mamahí mo e faingataʻaʻiá ʻoku hā ngali ko e tuʻunga anga-maheni ia ʻo e moʻui ʻa e tangatá. He ko ē, naʻa mo e moʻui fakaʻahó ʻoku lava ke fonu ia ʻi he loto-moʻua mo e puputuʻu! Ko e hā te ne tataki lavameʻa kitautolu ʻi he ngaahi tuʻunga faingataʻá mo tokoni kia kitautolu ke tauhi maʻu ha tuʻunga māʻoniʻoni ʻi he ʻao ʻo e ʻOtuá?

Fakakaukau ki he faʻifaʻitakiʻanga ʻo ha tangata koloaʻia ko Siope, ʻa ia naʻe nofo ʻi he taʻu nai ʻe 3,500 kuohilí ʻi he feituʻu ʻoku hoko he taimí ni ko ʻAlepeá. Ko ha fakatamaki ē naʻe ʻomi ʻe Sētane ki he tangata manavahē-ʻOtuá ni. Naʻe mole kotoa ʻa ʻene fanga monumanú pea naʻá ne fuesia ʻa e mole ʻi he mate ko ia ʻa ʻene fānau ʻofeiná. Taimi nounou mei ai, naʻe taaʻi ʻe Sētane ʻa Siope ʻaki ʻa e ngaahi hangatāmaki kovi mei hono ʻulú ki he vaʻé. (Siope, vahe 1, 2) Naʻe ʻikai ha ʻilo ʻa Siope ki he ʻuhinga naʻe hoko ai kiate ia ʻa e ngaahi meʻa kovi ko ení. Neongo ia, “naʻe ʻikai to ha meʻa hala mei he ngutu ʻo Siope.” (Siope 2:10) “Teu mate be ka e ikai teu tukuage eku agatonu meiate au,” ko ʻene leá ia. (Siope 27:​5, PM) ʻIo, ko e anga-tonu ʻa Siopé naʻá ne tataki ia ʻi hono ngaahi ʻahiʻahí.

Ko e anga-tonú ʻoku fakamatalaʻi ia ko e totonu pe tuʻunga kakato fakaeʻulungaanga pea kau ki ai mo e hoko ʻo haohaoa mo taʻemele ʻi he ʻafio ʻa e ʻOtuá. Kae kehe, ʻoku ʻikai te ne fakahuʻunga mai ha haohaoa ʻi he lea mo e tōʻonga ʻa e faʻahinga taʻehaohaoa ʻo e tangatá, ʻa ia ʻoku mātuʻaki taʻemalava ke nau aʻusia kakato ʻa e ngaahi tuʻunga ʻa e ʻOtuá. ʻI hono kehé, ko e anga-tonu ʻa e tangatá ʻoku ʻuhinga iá ki he kotoa pe tuʻunga kakato ʻo e līʻoa ʻa e lotó kia Sihova pea ki hono finangaló mo ʻene taumuʻá. Ko e anga-līʻoa fakaʻotua peheé ʻokú ne tataki, pe taki ʻa e kau faitotonú ʻi he malumalu ʻo e ngaahi tuʻunga kotoa pē pea ʻi he taimi kotoa pē. Ko e muʻaki konga ʻo e vahe hono 11 ʻo e tohi faka-Tohitapu ʻa Palovēpí ʻoku fakahā ai ʻa e founga ʻe malava ai ʻe heʻetau anga-tonú ʻo tataki kitautolu ʻi he ngaahi tafaʻaki kehekehe ʻo e moʻuí pea fakapapauʻi mai kia kitautolu ʻa e ngaahi tāpuaki ʻe hoko mai aí. ʻI he holi vēkeveké leva, tau vakai angé ki he meʻa ʻoku hiki aí.

ʻOku Taki Atu ʻa e Anga-Tonú ki he Faitotonu ʻi he Pisinisí

ʻI hono fakaeʻa ʻa e tefitoʻi moʻoni ʻo e faitotonú, ʻo ngāueʻaki ʻa e ngaahi foʻi lea fakaetaʻanga kae ʻikai ko ha ngaahi kupuʻi lea fakalaó, ʻoku pehē ʻe Tuʻi Solomone ʻo ʻIsileli ʻo e kuonga muʻá: “Ko e meʻafua kākā ʻoku fakaliliʻa ki ai ʻa Sihova: ka ko e meʻa-fakamamafa ʻoku kakato, ko hono mamana ia.” (Palovepi 11:1) Ko e ʻuluaki eni ʻi heʻene hā tuʻo fā ʻi he tohi ʻa Palovēpí ʻa ia ʻoku ngāueʻaki ai ʻa e meʻafuá mo e meʻa-fua-mamafá ke fakahaaʻi ʻoku fiemaʻu ʻe Sihova ʻa ʻene kau lotú ke nau faitotonu ʻi heʻenau ngaahi meʻa fakapisinisí.​​—Palovepi 16:11; 20:​10, 23.

Ko e lakalakaimonū ʻa e faʻahinga ʻoku nau  hanga ki ha meʻafua kākaá​—pe ki he taʻefaitotonú—ʻoku fakatauele nai. Ka te tau loto moʻoni ke liʻaki ʻa e ngaahi tuʻunga ʻa e ʻOtuá ki he leleí mo e koví ʻaki ʻa e kau ʻi ha ngaahi tōʻonga fakapisinisi taʻetotonu? ʻE ʻikai pehē ia kapau ʻoku tataki kitautolu ʻe he anga-tonú. ʻOku tau hola mei he taʻefaitotonú koeʻuhi ko ha maka fakamamafa ʻoku kakato, ko ha meʻa-fua-mamafa totonu ʻo fakahaaʻi ai ʻa e faitotonú, ʻoku fakahōhōʻiaʻi ai ʻa Sihova.

“Ko e Potó ʻOku ʻi he Faʻahinga Anga-Fakanānaá Ia”

ʻOku hoko atu ʻe Tuʻi Solomone: “Kuo haʻu ʻa e ʻafungí? ʻE haʻu leva mo e fakamaá; ka ko e potó ʻoku ʻi he faʻahinga anga-fakanānaá ia.” (Palovepi 11:​2, NW) Ko e ʻafungí​​—pe ʻokú ne fakahaaʻi tonu mai ia ʻi he pōlepole, talangataʻa pe meheka—ʻokú ne ʻomai ai ha fakamāʻanga. ʻI he tafaʻaki ʻe tahá, ko hono fakahaaʻi anga-fakatōkilalo ʻa hotau ngaahi ngataʻangá ko e ʻalunga fakapotopotó ia. He lelei ē ko hono fakatātaaʻi ʻe he ngaahi faʻifaʻitakiʻanga Fakatohitapú ʻa e moʻoni ʻo e palōvēpí ni!

Ko ha tangata Līvai meheka ko Kola, naʻá ne taki ha fuʻu kau angatuʻu ke fakafepaki ki he tuʻunga mafai ʻo e ongo sevāniti fakanofo ʻa Sihova ko Mōsese mo ʻĒloné. Ko e hā ʻa e ikuʻanga ʻo e tōʻonga ʻafungi ko iá? ‘Naʻe fakamanga ʻe he kelekelé hono ngutú, ʻo ne folo fua’ ha niʻihi ʻo e kau angatuʻú, lolotonga ia ko e niʻihi, kau ai ʻa Kola naʻe keina ʻe ha afi. (Nomipa 16:​1-3, 16-35; 26:10; Teutalonome 11:6) He fakamā ē ko ia! Fakakaukau atu foki kia ʻUsa, ʻa ia naʻá ne ala atu ʻi he ʻafungi ʻo puke ʻa e puha ʻo e fuakavá ke taʻofi ia mei haʻane tō. Naʻe taaʻi ia ʻo ne mate ʻi he taimi pē ko iá. (2 Samiuela 6:​3-8) He mātuʻaki mahuʻinga ē ke tau hola mei he ʻafungí!

Ko ha tokotaha anga-fakatōkilalo mo anga-fakanānā ʻoku ʻikai te ne fuesia ha fakamā naʻa mo e taimi ʻoku lākahala aí. Ko Siope, neongo naʻe alafaʻifaʻitakiʻanga ia ʻi he ngaahi founga lahi, naʻe taʻehaohaoa. Ko hono ngaahi ʻahiʻahí naʻá ne fakahaaʻi ha mele mafatukituki ʻi he niʻihi ʻo ʻene fakakaukaú. ʻI hono taukapoʻi ia ki hono kau tukuakiʻí, naʻe hoko ai ʻa Siope ʻo taʻemafamafatatau ʻi ha tuʻunga. Naʻe aʻu ʻo ne fakahaaʻi ʻoku lahi ange ʻa ʻene māʻoniʻoní ʻi he ʻOtuá. (Siope 35:​2, 3) Naʻe anga-fēfē hono fakatonutonu ʻe Sihova ʻa e fakakaukau ʻa Siopé?

ʻI he tuhu ki he māmaní, ko e tahí, ko e ngaahi langi fetuʻuá, ko e niʻihi ʻo e fanga monumanú pea mo e ngaahi meʻa fakaofo kehe ʻo e fakatupú, naʻe ʻoange ai ʻe Sihova kia Siope ha lēsoni ʻi he tuʻunga valevale ʻa e tangatá ʻi hono fakahoa atu ki he tuʻunga lahi ʻo e ʻOtuá. (Siope, vahe 38-41) ʻOku ʻikai ha konga ʻi heʻene leá naʻe fakahaaʻi ai ʻe Sihova ʻa e ʻuhinga naʻe faingataʻaʻia ai ʻa Siopé. Naʻe ʻikai fiemaʻu ia ke ne fai pehē. Ko Siopé naʻe anga-fakanānā. Naʻá ne fakahaaʻi anga-fakatōkilalo ʻa e faikehekehe lahi ʻi hono vahaʻa mo e ʻOtuá, ʻi he vahaʻa ʻo ʻene taʻehaohaoá mo hono vaivaiʻangá tonu pea mo e māʻoniʻoni mo e mālohi ʻo Sihová. “ʻOku ou fakafoki atu ʻeku leá,” ko ʻene leá ia, “pea ʻoku ou fakatomala ʻi he funga ʻo e efu mo e efuefu.” (Siope 42:​6, NW) Ko e anga-tonu ʻa Siopé naʻe taki ai ia ke ne tali loto-lelei ʻa e valokí. Fēfē kitautolu? ʻI hono taki ʻe he anga-tonú, te tau tali loto-lelei nai ʻa e valokí pe fakatonutonú ʻi hono fiemaʻú?

Ko Mōsese foki naʻe anga-fakanānā mo anga-fakatōkilalo. ʻI heʻene hoko ʻo ongosia ʻi hono tokangaʻi ʻa e ngaahi palopalema ʻa e niʻihi kehé, naʻe fokotuʻu ange ʻe heʻene tamai-ʻi-he-fono ko Seteloó ʻa e fakaleleiʻanga ʻaonga: Vahevahe atu ha ngaahi fatongia ki he kau tangata taau kehé. ʻI hono fakatokangaʻi ʻa hono ngaahi ngataʻangá tonu, naʻe tali fakapotopoto ai ʻe Mōsese ʻa e fokotuʻú. (Ekisoto 18:​17-26; Nomipa 12:3) Ko ha  tangata anga-fakanānā ʻoku ʻikai te ne taʻeloto ke tuku ʻa e mafaí ki he niʻihi kehé, pea ʻoku ʻikai te ne tailiili ki ha mole nai ʻa hono mafaí ʻi hono vahevahe atu ʻa e ngaahi fatongia totonú mo e kau tangata taau kehé. (Nomipa 11:​16, 17, 26-29) ʻI hono kehé, ʻokú ne vēkeveke ke tokoniʻi kinautolu ke nau laka ki muʻa fakalaumālie. (1 Timote 4:15) ʻIkai ʻoku totonu ke tau fai pehē foki?

‘Ko e Hala ʻo e Haohaoá ʻOku Hangatonu’

ʻI hono ʻiloʻi ko e anga-tonú ʻoku ʻikai te ne maluʻi maʻu pē ʻa e faitotonú mei he fakatuʻutāmakí pe faingataʻá, ʻoku pehē ʻe Solomone: “Ko e anga-tonu ʻa e faitotonú ʻokú ne taki kinautolu, ka ko e mioʻi ʻa e kau fai kākaá te nau ʻauha ai.” (Palovepi 11:​3, NW) Ko e moʻoni, ʻoku taki ʻe he anga-tonú ʻa e faitotonú ke ne fai ʻa e meʻa ʻoku totonu ʻi he vakai ʻa e ʻOtuá, naʻa mo e ʻi he malumalu ʻo e ngaahi tuʻunga faingataʻá, pea ʻomai ai ʻa e ngaahi ʻaonga ʻi he kahaʻú. Naʻe fakafisi ʻa Siope ke siʻaki ʻa ʻene anga-tonú, pea naʻe hanga ʻe Sihova ʻo “fai tapuekina . . . ʻa e taimi ki mui ʻo Siope ʻi he taimi muʻa.” (Siope 42:12) Ko e faʻahinga ʻoku fai kākaá ʻoku nau ongoʻi nai ʻoku nau hoko ʻo lelei ange neongo ʻoku kaunga kovi ia ki he tokotaha kehé pea aʻu nai ʻo hā ngali lakalakaimonū ʻi ha taimi. Ka ʻe iku ʻa ʻenau kākaá tonu ʻo nau ʻauha ai.

“ʻOku ʻikai ʻaonga ʻa e koloa ʻi he ʻaho ʻo e houhau,” ko e lau ia ʻa e tuʻi potó, “ka ko e faitotonu ʻoku ne fakahaofi kita mei he mate.” (Palovepi 11:4) He fakavalevale ē ke pōpula ki he koloa fakamatelié kae liʻaki ʻa e ako fakafoʻituituí, lotú, maʻu fakatahá mo e malaʻe fakafaifekaú​​—ʻa e ngaahi ngāue tofu pē ko ia ʻokú ne fakalolotoʻi ʻetau ʻofa ki he ʻOtuá mo fakaivimālohiʻi ʻetau līʻoa kiate iá! ʻOku ʻikai ha lahi ʻo e koloá ʻe fai fakahaofi ʻi he mamahi lahi ka hoko maí. (Mātiu 24:21) Ko e māʻoniʻoni pē ʻa e faitotonú te ne malavá. (Fakahā 7:​9, 14) Ko ia, ʻoku fakapotopoto ke tau tokanga ki he kōlenga ʻa Sēfanaiá: “I he heeki ke hoko kiate kimoutolu ae aho oe tubutamaki o Jihova. Mou kumi kia Jihova, akimoutolu kotoabe ae agamalu oe fonua, kuo mou fai a ene fakamāu; kumi ki he maonioni, kumi ki he agamalu.” (Sefanaia 2:​2, 3, PM) Lolotonga iá, tau ʻai ko ʻetau taumuʻá ia ke ‘fakaabaaba kia Jihova aki ʻetau koloá.’​​—Palovepi 3:​9, PM.

ʻI hono toe fakamamafaʻi ʻa e mahuʻinga ʻo e tuli ki he māʻoniʻoní, naʻe fakafaikehekeheʻi ai ʻe Solomone ʻa e ikuʻanga ʻo e haohaoá mo ia ʻo e fulikivanú, ʻi heʻene pehē: “Ko e māʻoniʻoni ʻa e haohaoá ʻa e meʻa te ne ʻai ke hangatonu ʻa hono halá, ka ʻe humu ʻa e fulikivanú ʻi heʻene anga-fulikivanu ʻaʻaná. Ko e māʻoniʻoni ʻa e kau faitotonú ʻa e meʻa te ne fakahaofi kinautolú, ka ko e havala ʻa e faʻahinga ʻoku fai kākaá ʻe maʻu ai kinautolu. ʻI he pekia ʻa e tangata fulikivanú, ʻoku ʻauha ai ʻene ʻamanakí; pea naʻa mo e ʻamanaki ʻoku makatuʻunga ʻi he lahi ʻo e mālohí kuo ʻauha ia. Ko e māʻoniʻoní ko ia ia ʻoku fakahaofi mei he mamahí, pea ʻoku haʻu ʻa e fulikivanú ʻo fetongi ia.” (Palovepi 11:​5-8, NW) ʻOku ʻikai humu ʻa e haohaoá ʻi hono hala ʻoʻoná pe hoko ʻo fihia ʻi heʻene ngaahi tōʻongá tonu. Ko hono halá ʻoku hangatonu. ʻI hono ikuʻangá, ʻoku fakahaofi ai ʻa e faitotonú mei he mamahí. ʻE hā ngali ivimālohi ʻa e fulikivanú, ka ʻoku ʻikai ha fakahaofi ʻe fakatatali mai kia kinautolu.

“ʻOku Hakailangitau ha Kolo”

Ko e anga-tonu ʻa e faitotonú pea mo e fulikivanu ʻa e kau faikoví ʻoku toe ʻi ai ʻa ʻene tākiekina ʻi he kakai kehé. “Ko e momoleʻolunga ʻokú ne teu ʻaki hono ngutu ha luo ki hono kaungaʻapi,” ko e lau ia ʻa e tuʻi ʻo ʻIsilelí, “ka ko e ʻiloʻilo ʻa e faitotonu [“māʻoniʻoní,” NW] ʻokú ne hao ai.” (Palovepi 11:9) Ko hai ia te ne fakaʻikaiʻi ʻa e fakatupu maumau ʻa e lauʻikovi loí, lau fakatupu maumaú, talanoa fakalieliá mo e talanoa launoa ki he niʻihi kehé? ʻI he tafaʻaki ʻe tahá, ko e talanoa ʻa e māʻoniʻoní ʻoku maʻa, fakakaukauʻi lelei mo fakaʻatuʻi. ʻI he ʻiló, ʻoku fakahaofi ai ia koeʻuhi ʻoku teuʻi ia ʻe heʻene anga-tonú ʻaki ʻa e fakamoʻoni ʻoku fiemaʻu ke fakahā ai ʻoku loi ʻa hono kau tukuakiʻí.

“Koeʻuhi ko e anga-lelei ʻa e māʻoniʻoní ʻoku hakailangitau ai ha kolo,” ko e hoko atu ia ʻa e tuʻí, “ka ʻi he ʻauha ʻa e kau fulikivanú ʻoku ʻi ai ha kalanga fiefia.” (Palovepi 11:​10, NW) ʻI hono fakalūkufuá, ko e māʻoniʻoní ʻoku ʻofaʻi ʻe he niʻihi kehé, pea ʻoku nau ʻai ʻa honau ngaahi kaungāʻapí  ke nau hakailangitau​​—nēkeneka mo fiefia. ʻOku ʻikai moʻoni saiʻia ha taha ʻi he “kau fulikivanú.” ʻI he mate ʻa e fulikivanú, ʻoku ʻikai faʻa tengihia kinautolu ʻe he kakaí fakalūkufua. ʻE ʻikai moʻoni ke toe ʻi ai ha mamahi ʻi hono ‘tuʻusi [ʻe Sihova] ʻa e kakai koví mei he fonuá pea taʻaki ʻa e fai kākaá mei ai.’ (Palovepi 2:​21, 22) ʻI hono kehé, ʻe ʻi ai ʻa e mavava koeʻuhí kuo toʻo atu kinautolu. Kae fēfē kitautolu? ʻOku taau ke tau vakaiʻi pe ko e founga ʻoku tau tataki ʻaki kitautolú ʻokú ne ʻomai ha fiefia ki he niʻihi kehé.

“ʻOku Hakeakiʻi ha Kolo”

ʻI hono fakafaikehekeheʻi lahi ange ʻa e tākiekina ʻa e faitotonú pea mo e fulikivanú ʻi ha kolo, ʻoku pehē ʻe Solomone: “ʻOku hakeakiʻi ha kolo ʻi he tapuaki ʻa e faitotonu: ka ʻoku maumau ʻi he meʻa ʻoku puʻaki ʻe he angahala.”​​—Palovepi 11:11.

Ko e kakai ʻo ha kolo ʻa ia ʻoku nau muimui ʻi ha ʻalunga faitotonu ʻokú ne pouaki ʻa e melinó mo e leleí pea langa hake ʻa e niʻihi kehe ʻi he koló. Ko ia ai, ʻoku hakeakiʻi ai ha kolo​​—ʻoku lakalakaimonū. Ko e faʻahinga ʻoku nau leaʻaki ʻa e ngaahi meʻa ko e lauʻikovi loí, fakalotomamahi, mo halá ʻokú ne fakatupunga ʻa e moveuveu, loto-mamahi, māvahevahe mo e faingataʻa. ʻOku tautefito ʻa e moʻoni ʻo e meʻá ni kapau ko e faʻahinga tāutahá ni ʻoku nau ʻi ha tuʻunga tuʻu-ki-muʻa. Ko ha kolo pehē ʻoku tofanga ia ʻi he moveuveu, fakameleʻi pea mo e hōloa fakaeʻulungaanga mo fakaʻekonōmika nai.

Ko e tefitoʻi moʻoni ʻoku fakahā ʻi he Palovepi 11:11 ʻoku ngāueʻaki tatau pē ia ki he kakai ʻa Sihová ʻi heʻenau feohi fakaekinautolu ʻi heʻenau ngaahi fakatahaʻanga hangē ha koló. Ko ha fakatahaʻanga ʻoku tākiekina ʻe he kakai fakalaumālié​​—kau faitotonu ʻoku taki ʻe heʻenau anga-tonú—ko ha fakatahaʻanga ia ʻo e kakai fiefia, longomoʻui mo tokoni, ʻokú ne ʻomai ʻa e lāngilangi ki he ʻOtuá. ʻOku tāpuakiʻi ʻe Sihova ʻa e fakatahaʻangá, pea ʻoku lakalakaimonū fakalaumālie. ʻI he taimi ki he taimi, ko e kiʻi tokosiʻi ko ia ʻoku nau loto-ʻingoʻingo nai mo taʻefiemālié, ʻa ia ʻoku nau fakaanga mo lea tamaki ki he founga ʻoku fakahoko ai ʻa e ngaahi meʻá, ʻoku nau hangē ha “aka kona” ʻa ia ʻe lava ke mafola ʻo ne fakakonahi ʻa e niʻihi kehe naʻe ʻikai ke uesia ki muʻá. (Hepelu 12:15) Ko e faʻahinga peheé ʻoku nau faʻa fiemaʻu ha mafai mo ha tuʻunga tuʻu-ki-muʻa lahi ange. ʻOku nau langaʻi ʻa e ngaahi muhu ʻoku ʻi ai ʻa e fakamaau taʻetotonu, tomuʻa tāufehiʻa fakaefaʻahinga pe alā meʻa pehē ʻi he fakatahaʻangá pe ʻi he tafaʻaki ʻa e kau mātuʻá. Ko e moʻoni, ko honau ngutú ʻe lava ke ne fakatupunga ha māvahevahe ʻi he fakatahaʻangá. ʻIkai ʻoku totonu ke tau fakaongo tuli ki heʻenau talanoá pea feinga ke hoko ko e kakai fakalaumālie ʻoku tokoni ki he melino mo e fāʻūtaha ʻi he fakatahaʻangá?

ʻI heʻene hoko atú, ʻoku pehē ʻe Solomone: “Ko ia ʻoku manukiʻi hono kaungaʻapi ko e taha masiva ʻatamai ia: ka ko e tangata poto te ne fakalongope. Ko ia ʻoku ʻalu fano mo e lau, ʻokú ne tatala ai pe ʻena alea fufū: ka ko e laumalie tonunga ʻoku ne fufu ai pe ʻa e meʻa.”​​—Palovepi 11:​12, 13.

He maumau lahi ē ʻoku fakatupunga ʻe he tokotaha ʻoku siʻi ʻa ʻene fakafuofua leleí, pe ʻoku “masiva ʻatamai”! ʻOku hoko atu ʻa ʻene talanoa taʻemapuleʻí ʻo aʻu ki he tuʻunga ko e lauʻikovi loi pe leakovi. Ko e kau mātuʻa kuo fakanofó kuo pau ke nau fai vave ke fakangata ha tākiekina kovi pehē. ʻI he ʻikai hangē ko e “taha masiva ʻatamai,” ko ha tangata poto ʻokú ne ʻilo ʻa e taimi ke hanganaki fakalongo aí. ʻI he ʻikai te ne lavakiʻi ha falalá, ʻokú ne ʻufiʻufi ʻa e meʻá. ʻI hono ʻiloʻi ko ha ʻelelo taʻemapuleʻi ʻoku malava ke ne fakatupunga ha maumau lahi, ko e tokotaha potó ʻokú ne maʻu ʻa e “laumalie tonunga.” ʻOkú ne mateaki ki he kaungātuí pea ʻoku ʻikai te ne ʻaʻau ʻa e ngaahi meʻa fakapulipuli ʻe fakatuʻutāmaki nai kia kinautolú. Ko ha tāpuaki ē ko e kau tauhi anga-tonu peheé ki he fakatahaʻangá!

Ke tokoniʻi kitautolu ke ʻaʻeva ʻi he hala ʻo e haohaoá, ʻoku ʻomai ai ʻe Sihova ha fuʻu tokonaki lahi ʻo e meʻakai fakalaumālie kuo teuteu ʻi he malumalu ʻo e tataki ʻa e “tamaioeiki agatonu mo boto.”  (Mātiu 24:​45, PM) ʻOku tau toe maʻu mo e tokoni lahi fakafoʻituitui fakafou ʻi he kau mātuʻa Kalisitiane ʻi heʻetau ngaahi fakatahaʻanga ʻoku hangē ha koló. (Efeso 4:​11-13) ʻOku tau fakamālō moʻoni ki he ngaahi meʻá ni, he “ʻi he taimi ʻoku ʻikai ʻi ai ai ha tataki pōtoʻí, ʻoku humu ʻa e kakaí; ka ʻoku ʻi ai ha fakamoʻui ʻi he tokolahi ʻa e kau faleʻí.” (Palovepi 11:​14, NW) Neongo pe ko e hā nai ʻe hokó, tau fakapapauʻi mālohi ke ‘ʻaʻeva ʻi heʻetau anga-tonú.’​​—Sāme 26:​1, NW.

[Fakamatala ʻi he peesi 26]

He fakavalevale ē ke pōpula ki he koloa fakamatelié kae liʻaki ʻa e ngaahi ngāue fakateokalatí!

[Fakatātā ʻi he peesi 24]

Naʻe tataki ʻa Siope ʻe heʻene anga-tonú, pea naʻe tāpuakiʻi ia ʻe Sihova

[Fakatātā ʻi he peesi 25]

Naʻe mate ʻa ʻUsa ʻi heʻene ʻafungí