Lotu ki he ʻOtua “ʻi he Laumālie”

“Ko hai ʻe lava ke ke fakatatau ki ai ʻa e ʻOtuá? Ko e hā ʻa e ʻīmisi ʻo ia ʻe lava ke ke faʻú?”—AISEA 40:​18, “THE JERUSALEM BIBLE”

MAHALO PĒ ʻokú ke tuipau loto-moʻoni ko hono ngāueʻaki ʻo e ngaahi fakatātā fakalotú ʻoku ala tali ia ʻi he lotu ki he ʻOtuá. Te ke ongoʻi nai ʻoku tohoakiʻi koe ʻe he meʻá ni ke ke ofi ange ai ki he Tokotaha-Fanongo ki he lotú, ʻa ia ʻoku taʻehāmai pea hā ngali taʻefakaetangata mo ʻikai moʻoni nai.

Ka ʻoku tau ʻatā fakaʻaufuli ke fili ʻetau founga pē ʻatautolu fekauʻaki mo e fakaofiofi ki he ʻOtuá? ʻIkai ʻoku totonu ke hoko ʻa e ʻOtuá tonu ko e mafai fakaʻosi ia ki he meʻa ʻoku ala talí mo ia ʻoku ʻikaí? Naʻe fakamatalaʻi ʻe Sīsū ʻa e anga ʻo e vakai ʻa e ʻOtuá ki he meʻá ni ʻi heʻene pehē: “Ko au pē ko e Hala, ko e Moʻoni pea mo e Moʻui. ʻE ʻikai lava ke haʻu ha taha ki he Tamaí tuku kehe ʻi heʻene fou ʻiate aú.” (Sione 14:6) a Ko e ngaahi foʻi lea pē ko ení ʻoku taʻofi ai ʻa hono ngāueʻaki ʻo e ngaahi fakatātā fakalotú pe ko ha ngaahi meʻa toputapu kehe pē.

ʻIo, ʻoku ʻi ai ʻa e faʻahinga lotu pau ʻoku tali ʻe Sihova ko e ʻOtuá. Pea ko e hā ia? ʻI he taimi ʻe taha, naʻe fakamatala ai ʻe Sīsū: “ʻE hoko mai ʻa e houa—ko hono moʻoní, kuo ʻosi ʻi heni ia—ʻa ia ʻe lotu ai ʻa e kau lotu moʻoní ki he Tamaí ʻi he laumālie pea mo e moʻoni: ko e faʻahinga tokotaha lotu ia ʻoku fiemaʻu ʻe he Tamaí. Ko e ʻOtuá ko e laumālie, pea ko e faʻahinga ʻoku lotú kuo pau ke nau lotu ʻi he laumālie mo e moʻoni.”​—Sione 4:​23, 24.

ʻE lava ʻa e ʻOtuá, ʻa ia “ko e laumālie,” ʻo fakafofongaʻiʻaki ha ʻīmisi fakamatelie? ʻIkai. Tatau ai pē pe ko e hā nai hono fakaʻofoʻofa ʻo ha fakatātā fakalotu, ʻe ʻikai ʻaupito lava ke tatau ia mo e kolōlia ʻo e ʻOtuá. Ko ia ai, ko ha ʻīmisi ʻo e ʻOtuá ʻe ʻikai ʻaupito lava ke hoko ia ko ha fakafofonga moʻoni ʻo ia. (Loma 1:​22, 23) ʻE hoko ha tokotaha ʻo ‘lotu ʻi he moʻoní’ kapau ʻokú ne fakaofiofi ki he ʻOtuá ʻo fakafou ʻi ha fakatātā fakalotu ko e ngaohi ʻe he tangatá?

 Ko ha Akonaki Faka-Tohitapu Mahino

ʻOku tapui ʻi he Lao ʻa e ʻOtuá ʻa hono ngaohi ʻo e ngaahi ʻīmisí ko e ngaahi meʻa ke fai ki ai ʻa e lotú. Ko hono ua ʻo e Fekau ʻe Hongofulú naʻe tuʻutuʻuni ai: “ʻE ʻikai te ke ngaohi maʻau ha ʻīmisi kuo tā tongitongi pe ko ha tatau ʻo ha meʻa pē ʻi hēvani pe ʻi māmani ʻi laló ni pe ʻi he ngaahi vai ʻi lalo ʻi he māmaní; ʻe ʻikai te ke punou ki ai pe tauhi ki ai.” (Ekisoto 20:​4, 5) ʻOku toe fekau mai ʻi he ngaahi Konga Tohitapu fakamānavaʻi faka-Kalisitiané: “Kuo pau ke ke tauhi ke ʻatā mei he tauhi ʻaitolí.”​—1 Kolinito 10:14.

Ko e moʻoni, ʻoku kikihi ʻa e tokolahi ko ʻenau ngāueʻaki ʻo e ngaahi ʻīmisí ʻi he lotú ʻoku ʻikai ko e tauhi ʻaitoli ia. Ko e fakatātaá, ko e kau Kalisitiane ʻOfotokisií ʻoku nau faʻa fakaʻikaiʻi ʻa ʻenau lotu moʻoni ki he ngaahi fakatātā fakalotú ʻa ia ʻoku nau punou, tūʻulutui, mo lotu ʻi honau ʻaó. Naʻe tohi ha pātele ʻOfotokisī: “ʻOku mau fakalāngilangiʻi kinautolu koeʻuhi ko e ngaahi meʻa māʻoniʻoni, pea koeʻuhí ʻoku mau fakalāngilangiʻi ʻa e meʻa ʻoku fakatātaaʻi ʻe he ngaahi Fakatātā Fakalotú.”

Kae kehe, ʻoku kei tuʻu pē ʻa e fehuʻí: ʻOku hōifua ʻa e ʻOtuá ki hono ngāueʻaki ʻo e ngaahi fakatātā fakalotú ki he taumuʻa ʻoku aʻu ʻo taku ko e fakalāngilangi taʻefakahangatonú? ʻOku ʻikai ke fakamafaiʻi ʻi ha feituʻu ʻe he Tohitapú ha tōʻonga pehē. ʻI he taimi naʻe fokotuʻu ai ʻe he kau ʻIsilelí ha ʻīmisi ʻo ha kiʻi pulu, ʻo fakaʻuhinga ko e taumuʻa ki hono fakalāngilangiʻi ʻo Sihová, naʻá ne fakahaaʻi ʻene taʻehōifua mālohi ki ai, ʻi heʻene folofola ʻo pehē kuo nau tafoki mei he moʻoní.​—Ekisoto 32:​4-7.

Ko e Fakatuʻutāmaki Fufū

Ko hono ngāueʻaki ʻo e ngaahi meʻa ʻoku lava ʻo ala ki ai ʻi he lotú ko ha tōʻonga fakatuʻutāmaki ia. ʻE lavangofua ke ne tauheleʻi ʻa e kakaí ke nau lotu ki he meʻa ko iá kae ʻikai ki he ʻOtuá ʻa ia ʻoku pehē  ʻoku fakafofongaʻi ʻe he meʻá. ʻI hano toe fakalea, ʻoku hoko ʻa e fakatātā fakalotú ko ha meʻa tefito ia ki he tauhi ʻaitolí.

Naʻe hoko ia ʻi ha ngaahi meʻa ʻi he ngaahi ʻaho ʻo e kau ʻIsilelí. Ko e fakatātaá, naʻe ngaohi ʻe Mōsese ha ngata palasa lolotonga ʻenau fononga ʻi he toafá. ʻI he kamatá, ko e fokotuʻu ʻo e ngatá ʻi ha ʻakaú naʻe hoko ia ko ha ngaahi founga ʻo e faifakamoʻuí. Ko e faʻahinga naʻe tauteaʻi ʻaki hono uʻu ʻe he ngatá naʻe lava ke nau sio ki he ngata kopá pea nau maʻu ai ʻa e tokoni ʻa e ʻOtuá. Ka ʻi he hili ʻa e nofo ʻa e kakaí ʻi he Fonua ʻo e Talaʻofá, ʻoku hā naʻa nau liliu ʻa e tuʻunga ko ení ki ha ʻaitoli, ʻo hangē ia ko e ngata palasá tonu naʻe ʻi ai hano mālohi ke faifakamoʻui. Naʻa nau tutu ʻinisēnisi ki ai pea fakahingoa ia ko Nehusitani.​—Nomipa 21:​8, 9; 2 Tuʻi 18:4.

Naʻe toe feinga ʻa e kau ʻIsilelí ke ngāueʻaki ʻa e ʻaʻake ʻo e kovinānité ko ha meʻa faimana ia ki honau ngaahi filí, ʻo iku ai ki ha ngaahi nunuʻa fakamamahi. (1 Samiuela 4:​3, 4; 5:​11) Pea ʻi he ʻaho ʻo Selemaiá, naʻe tokanga lahi ange ʻa e kau tangataʻifonua ʻo Selusalemá fekauʻaki mo e temipalé ʻi heʻenau tokanga fekauʻaki mo e ʻOtua naʻe fai ki ai ʻa e lotú.​—Selemaia 7:​12-​15.

Ko e hehema ke lotu ki he ngaahi meʻá ʻo fetongi ʻa e ʻOtuá ʻoku kei mafolalahia pē ia. Naʻe pehē ʻe he tokotaha fakatotolo ko Vitalij Ivanovich Petrenko: “Ko e fakatātā fakalotú . . . ʻoku hoko ia ko e meʻa ke fai ki ai ʻa e lotú pea ʻoku ʻi he tuʻunga fakatuʻutāmaki ʻo e tauhi ʻaitolí . . . Kuo pau ke te fakahaaʻi ko ha fakakaukau fakapangani tefito ia naʻe ʻomai ki he lotu ki he fakatātā fakalotú fakafou ʻi he ngaahi tui manakoa.” ʻI he founga meimei tatau, ʻoku pehē ʻe he pātele ʻOfotokisī Kalisi ko Demetrios Constantelos ʻi heʻene tohi ko e Understanding the Greek Orthodox Church: “ʻOku malava ki ha Kalisitiane ke ne ʻai ha fakatātā fakalotu ko ha meʻa ia ke lotu ki ai.”

Ko e taukaveʻi ʻo pehē ko e ngaahi fakatātā fakalotú ko e ngaahi tokoni pē ia ʻoku kaungatonu ki he lotú ʻoku fehuʻia lahi ia. Ko e hā hono ʻuhingá? Sai, ʻikai ʻoku moʻoni ko e ngaahi  fakatātā fakalotu pau ʻo Mele pe ko e “kau sangató” ʻoku vakai nai ʻoku taau ke līʻoa lahi ange ki ai pea ʻoku ʻaonga lahi ange ia ʻi he ngaahi fakatātā fakalotu kehe ʻoku nau fakafofongaʻi ʻa e tokotaha tatau kuo fuoloa ʻa ʻene maté? Ko e fakatātaá, ko ha fakatātā fakalotu pau ʻokú ne fakafofongaʻi ʻa Mele ʻi Tínos, Kalisí, ʻoku ʻi ai hono kau lotu līʻoa ʻOfotokisī ʻoku muimui ki ai, ʻo kehe ia mei he kau līʻoa fakalotu loto-tōnunga tatau ʻo ha fakatātā fakalotu ʻokú ne fakafofongaʻi ʻa Mele ʻi Soumela, ʻi he fakatokelau ʻo Kalisí. ʻOku tui ʻa e ongo kulupú fakatouʻosi ko ʻena fakatātā fakalotú ʻoku māʻolunga ange ia, ʻo fakahoko ʻa e ngaahi mana fakaueʻiloto lahi ange ia ʻi he fakatātā fakalotu ʻe tahá, neongo ia ʻokú na fakatou fakafofongaʻi ʻa e tokotaha tatau pē kuo fuoloa ʻene maté. Ko ia ai, ʻi he tōʻongafaí, ʻoku tuku ai ʻe he kakaí ʻa e ngaahi mālohi moʻoni ki he ngaahi fakatātā fakalotu pau pea lotu ki ai.

Lotu ki he “Kau Sangató” pe ko Mele?

Ko ia ai, fēfē ʻa e fakalāngilangiʻi ʻo e faʻahinga tāutaha, hangē ko Mele pe ko e “kau sangató”? Ko Sīsū ʻi heʻene tali ki ha ʻahiʻahi meia Sētane, naʻá ne lave ai ki he Teutalonome 6:​13 ʻo ne pehē: “Kuo pau ke ke lotu ki he ʻEiki ko ho ʻOtuá, pea tauhi kiate ia pē tokotaha.” (Mātiu 4:​10) Naʻá ne pehē ki mui ko e kau lotu moʻoní te nau lotu ki he “Tamaí,” ʻo ʻikai ki ha toe taha kehe. (Sione 4:​23) ʻI he ʻiloʻi ení, naʻe valokiʻi ai ʻe ha ʻāngelo ʻa e ʻapositolo ko Sioné ʻi heʻene feinga ke lotu ange kiate iá, ʻi heʻene pehē: “ʻOua ʻe fai ia . . . Ko e ʻOtuá kuo pau ke ke lotu ki aí.”​—Fakahā 22:9.

ʻOku totonu ke lotu ki he faʻē fakaemāmani ʻa Sīsuú, ʻa Mele, pe ki ha “kau sangato” pau, ʻo kole kia kinautolu ke fakalaloa ki he ʻOtuá maʻata? Ko e tali hangatonu eni ʻa e Tohitapú: “ʻOku taha pē ʻa e fakalaloa ʻi he vahaʻa ʻo e ʻOtuá mo e faʻahinga ʻo e tangatá, ko ia tonu ko ha tangata, ko Kalaisi Sīsū.”​—1 Timote 2:5.

Maluʻi Ho Vahaʻangatae mo e ʻOtuá

Ko e ngāueʻaki ʻo e ngaahi fakatātā fakalotú ʻi he lotú, ʻo fepaki mo e akonaki mahino ʻa e Tohitapú, ʻoku ʻikai lava ke ne tokoniʻi ʻa e kakaí ke nau maʻu ai ʻa e hōifua ʻa e ʻOtuá pea maʻu ʻa e fakamoʻuí. ʻI hono kehé, naʻe pehē ʻe Sīsū ko e moʻui taʻengatá ʻoku fakatuʻunga ia ʻi heʻetau maʻu ʻa e ʻilo ki he ʻOtua moʻoni pē tahá, hoko ʻo maheni mo hono ʻulungaanga taʻefakatatauá pea pehē ki heʻene ngaahi taumuʻa mo e ngaahi feangainga mo e faʻahinga ʻo e tangatá. (Sione 17:3) Ko e ngaahi fakatātā fakalotú ʻa ia ʻoku ʻikai te nau sio, ongoʻi, pe leá ʻoku ʻikai te nau tokoniʻi ha taha ke ne ʻiloʻi ʻa e ʻOtuá pea ke lotu ʻi ha tuʻunga fakahōifua kiate ia. (Sāme 115:​4-8) Ko e ako mahuʻinga taha ko iá ʻoku ala maʻu ia fakafou pē ʻi hano ako ʻo e Folofola ʻa e ʻOtuá, ko e Tohitapú.

Tuku kehe ʻa e ʻikai ʻomai ai ha ʻaongá, ko e lotu ki he fakatātā fakalotú ʻoku fakatuʻutāmaki fakalaumālie nai. Anga-fēfē? ʻUluakí mo e muʻomuʻa tahá, ʻe lava ke ne fakatupunga ha maumau ʻi hoto vahaʻangatae mo Sihová. ʻI he fekauʻaki mo ʻIsileli, ʻa ia naʻá ne “fakaʻitaʻi ia ʻaki ʻa e ngaahi ʻaitoli fakalieliá,” naʻe tomuʻa tala ʻe he ʻOtuá: “Te u fufū hoku fofongá meiate kinautolu.” (Teutalonome 32:​16, 20, The New American Bible) Ko hono toe fokotuʻu honau vahaʻangatae mo e ʻOtuá naʻe ʻuhinga iá ke nau ‘talitekeʻi ʻa e ngaahi ʻaitoli angahalaʻiá.’​—Aisea 31:​6, 7, NAB.

Ko ia ai, he feʻungamālie moʻoni ko e akonaki Fakatohitapu: “ʻA ʻeku fanga kiʻi fānau, mou leʻohi kimoutolu mei he ngaahi ʻaitolí”!​—1 Sione 5:​21, NAB.

[Fakamatala ʻi lalo]

[Puha ʻi he peesi 6]

Tokoniʻi ke Lotu “ʻi he Laumālie”

Ko Olivera ko ha mēmipa līʻoa ia ʻo e Siasi ʻOfotokisī ʻi ʻAlipēniá. ʻI he taimi naʻe ʻai ai ʻe he fonuá ko ha maumau-lao ʻa e lotú ʻi he 1967, naʻe hokohoko fakapulipuli atu pē ʻe Olivera ʻa ʻene ngaahi tōʻongafai fakalotú. Naʻá ne ngāueʻaki ʻa e lahi taha ʻo ʻene kiʻi vāhenga-mālōloó ke fakatau mai ʻaki ʻa e ngaahi fakatātā fakalotu koula mo e siliva, ʻinisēnisi mo e ngaahi teʻelango. Naʻá ne tauhi fakafufū eni ʻi hono mohengá peá ne faʻa mohe ʻi ha sea ofi ki ai ʻi he manavahē naʻa ʻiloʻi ia pe kaihaʻasi. ʻI he ʻaʻahi ki ai ʻa e Kau Fakamoʻoni ʻa Sihová ʻi he konga ki muʻa ʻo e 1990 tupú, naʻe ʻiloʻi ai ʻe Olivera ʻa e maongo ʻa e moʻoni faka-Tohitapú ʻi heʻenau pōpoakí. Naʻá ne ʻiloʻi ai ʻa e meʻa ʻoku leaʻaki ʻe he Tohitapú fekauʻaki mo e lotu moʻoní ʻoku fai “ʻi he laumālie,” pea naʻá ne ako ai ki he anga ʻo e ongoʻi ʻa e ʻOtuá fekauʻaki mo hono ngāueʻaki ʻa e ngaahi fakatātā fakalotú. (Sione 4:​24, The Jerusalem Bible) Ko e tokotaha Fakamoʻoni naʻe ako Tohitapu mo iá naʻá ne fakatokangaʻi naʻe siʻisiʻi ange ʻa e ngaahi fakatātā fakalotu ʻi hono ʻapí ʻi he taimi taki taha naʻá ne ʻaʻahi ai ki he ʻapi ʻo Olivera. Faifai atu pē, naʻe ʻikai ke toe ʻi ai. Hili ʻene papitaisó, naʻe pehē ʻe Olivera: “ʻI he ʻahó ni, ʻi he ʻikai ko e ngaahi fakatātā fakalotu taʻeʻaongá, ʻoku ou maʻu ʻa e laumālie māʻoniʻoni ʻo Sihová. ʻOku ou fakamālō lahi ʻi he lava ke u maʻu ʻa hono laumālié ʻo ʻikai ʻi hono ngāueʻaki ʻa e ngaahi fakatātā fakalotú.”

Ko Athena, mei he motu ko Lesbos ʻi Kalisí, ko ha mēmipa longomoʻui ʻaupito ia ʻo e Siasi ʻOfotokisií. Ko ha mēmipa ia ʻo ha kau hiva pea naʻá ne muimui fakamākukanga ki he talatukufakaholo fakalotú, ʻo kau ai ʻa hono ngāueʻaki ʻo e ngaahi fakatātā fakalotú. Naʻe tokoniʻi ʻe he Kau Fakamoʻoni ʻa Sihová ʻa Athena ke ne ʻiloʻi ʻoku ʻikai ko e meʻa kotoa pē ne akoʻi kiate iá naʻe tatau mo e lau ʻa e Tohitapú. Naʻe kau ʻi he meʻá ni ʻa e ngāueʻaki ʻo e ngaahi fakatātā fakalotú mo e ngaahi kolosí ʻi he lotú. Naʻe kīvoi ʻa Athena ʻi he fai ʻa ʻene fekumi pē ʻaʻana ʻo fekauʻaki mo e tupuʻanga ʻo e ngaahi meʻa fakalotu ko ení. Hili ʻene fekumi fakaʻāuliliki ki he ngaahi maʻuʻanga fakamatala kehekehe, naʻá ne tuipau ai ko e ngaahi tupuʻanga ʻo e ngaahi meʻa ko ení naʻe ʻikai faka-Kalisitiane. Ko ʻene holi ke lotu ki he ʻOtuá “ʻi he laumālie” naʻe tataki ai ia ke ne liʻaki ʻa ʻene ngaahi fakatātā fakalotú, neongo ʻa honau mahuʻinga fakaepaʻangá. Kae kehe, naʻe fiefia ʻa Athena ke tali ha mole pē koeʻuhi ke lotu ai ki he ʻOtuá ʻi ha founga maʻa mo fakahōifua fakalaumālie.​—Ngāue 19:19.

[Puha/Fakatātā ʻi he peesi 7]

Fakatātā Fakalotú ko ha Ngāue Fakaeʻaati Pē?

ʻI he ngaahi taʻu ki mui ní, kuo tānaki takatakai ai ʻi he māmaní ʻa e ngaahi fakatātā fakalotu ʻOfotokisií. ʻOku faʻa vakai ʻa e kau tānakí ki he fakatātā fakalotú, ʻoku ʻikai ko ha meʻa fakalotu toputapu, ka ko ha ngāue fakaeʻaati ʻoku tapua mai ai ʻa e sivilaise Paisenitainé. ʻOku ʻikai ngalikehe ʻa hono maʻu ʻa e ngaahi fakatātā fakalotu pehē ʻoku teuteuʻiʻaki ʻa e ʻapi pe ko e ʻōfisi ʻo ha taha ʻokú ne taukaveʻi ko ha tokotaha fakaʻikaiʻi-ʻOtua ia.

Kae kehe, ko e kau Kalisitiane loto-moʻoní ʻoku ʻikai ngalo ʻia kinautolu ʻa e taumuʻa tefito ʻo e fakatātā fakalotú. Ko ha meʻa ia ʻoku fai ki ai ʻa e lotu. Lolotonga ʻoku ʻikai ke poleʻi ʻe he kau Kalisitiané ʻa e totonu ʻa e niʻihi kehé ke maʻu ʻa e ngaahi fakatātā fakalotú, ʻi he tuʻunga fakafoʻituituí ʻoku ʻikai haʻanau ngaahi fakatātā fakalotu ʻi heʻenau koloá, naʻa mo ʻene ʻi he tuʻunga ko ha meʻa ʻa e tokotaha tānakí. ʻOku fehoanaki eni mo e tefitoʻi moʻoni ʻoku maʻu ʻi he Teutalonome 7:​26, The Jerusalem Bible: “Kuo pau ke ʻoua te ke ʻomai ha meʻa fakalielia [ngaahi ʻīmisi ʻoku ngāueʻaki ʻi he lotú] ki ho falé pe ko koe, ʻi he hangē ko iá, te ke hoko ʻo ʻi he malumalu foki ʻo e tapuí. Kuo pau ke ke vakai ki ai ʻoku taʻemaʻa mo palakū.”

[Fakatātā ʻi he peesi 7]

Naʻe ʻikai kātakiʻi ʻe he ʻOtuá ʻa hono ngāueʻaki ʻo e ngaahi ʻīmisí ʻi he lotú

[Fakatātā ʻi he peesi 8]

Ko e ʻilo mei he Tohitapú ʻoku tokoniʻi ai kitautolu ke lotu ki he ʻOtuá ʻi he laumālie