Ko ha Lēsoni mei he Sitoaké

“NAʻA mo e sitoaki ʻi he atā ʻoku ne ʻilo ki hono taimi totonu; . . . ka ko hoku kakai ʻoku ʻikai te nau ʻilo ʻa e fai fakamāu ʻa Sihova.” (Selemaia 8:7) ʻI he ngaahi lea ko iá, naʻe fakaongo atu ai ʻe he palōfita ko Selemaiá ʻa e fakamaau ʻa Sihova ki he kakai tafoki mei he moʻoní ʻo Siutá, ʻa ia naʻa nau liʻaki ʻa Sihova ko honau ʻOtuá ʻo nau tafoki ʻo lotu ki he ngaahi ʻotua mulí. (Selemaia 7:​18, 31) Ko e hā naʻe fili ai ʻe Selemaia ʻa e sitoaké ko ha faʻifaʻitakiʻanga ʻaonga ia ki he kau Siu taʻeangatonú?

Ki he kau ʻIsilelí, ko e sitoaké, pea tautefito ki he sitoake hinehiná, ko ha meʻa anga-maheni ia naʻe mātā ʻi heʻene hiki holo he ngaahi fonua ʻi he Tohitapú. Ko e hingoa faka-Hepelū ki he manupuna lalahi veʻe lōloa aʻa ʻi he vai ko ení, ʻoku ʻi he tuʻunga ki he fefiné ʻo ha foʻi lea ʻa ia ʻoku ʻuhingá ko e “tokotaha mateaki; ko e taha ʻoku ʻaloʻofa.” ʻOku feʻungamālie eni, he ʻi he ʻikai tatau mo e lahi taha ʻo e fanga manupuna kehé, ko e fanga sitoake hinehina tangatá mo e fefiné ʻoku nau nofo tauhoa maʻu pē ʻi he kotoa ʻo ʻenau moʻuí. Hili e nofo ʻi he ngaahi māhina momokó ʻi he ngaahi feituʻu māfana angé, ko e tokolahi taha ʻo e fanga sitoaké ʻoku nau faʻa foki ʻi he taʻu ki he taʻu, ki he pununga tatau pē naʻa nau ngāueʻaki ki muʻá.

Ko e tōʻonga poto fakanatula ʻo e sitoaké ʻoku fakatātaaʻi ai ʻa e anga ʻo e mateakí ʻi he ngaahi founga makehe ʻe niʻihi. Ko e fanga manupuna tangatá mo e fefiné fakatouʻosi ʻoku nau kaungā kau ʻi hono tataʻo ʻa e ngaahi foʻi fuá mo hono fafanga ʻa e fāngangá. Ko e tohi Our Magnificent Wildlife ʻoku fakamatala ai: “ʻI he tuʻunga ko e ongo mātuʻá, ʻoku feangatonuʻaki ʻa e ongo sitoaké ʻi he tuʻunga taha kehe atu. Ko ha foʻi sitoake tangata ʻi Siamane naʻe puna ia ki ha ngaahi uaea ʻuhila pea mate ai he ʻuhilá. Naʻe hokohoko atu ʻa hono hoá ʻi hono tataʻo tokotaha ʻa e ngaahi foʻi fuá ʻo feʻunga mo e ʻaho ʻe tolu, lolotonga ia naʻá ne mavahe tuʻo taha pē mei he punungá ʻi ha kiʻi taimi nounou ke kumi meʻakai. . . . ʻI he tuʻunga ʻe taha, ʻi hono fanaʻi ʻo e sitoake fefiné, naʻe tauhi hake ai ʻe he tamaí ʻa e fāngangá.”

Ko e moʻoni, ʻi hono fakahaaʻi fakanatula ʻa e anga-tonu ki hono hoa ʻi he kotoa ʻo e moʻuí mo hono tokangaʻi fakaalaala ʻa hono fāngangá, ʻoku fakahoko ai ʻe he sitoaké ʻa e ʻuhinga ʻo hono hingoá​—ko e “tokotaha mateaki.” Ko ia ai, ʻoku ngāue lelei ʻa e fanga sitoaké ko ha faʻifaʻitakiʻanga mālohi ki he kau ʻIsileli taʻeangatonu mo talangataʻá.

Ki he kakai tokolahi ʻi he ʻahó ni, ko e mateakí mo e anga-tonú ko e ongo fakakaukau motuʻa ia​—ʻoku lelei ʻaupito ka ʻoku ʻikai ke ʻaonga. Ko e tupu fakautuutu ʻo e vete malí, māvaé, kākā ʻi he paʻangá, mo e ngaahi founga kehe ʻo e kākaá ʻoku fakahāhā ai ko e mateakí ʻoku ʻikai kei fakamahuʻingaʻi. ʻI hono kehé, ʻoku fokotuʻu ʻe he Tohitapú ʻa e mahuʻinga lahi ki he mateaki ʻa ia ʻoku ueʻi ʻe he ʻofá mo e anga-leleí. ʻOkú ne fakaʻaiʻai ʻa e kau Kalisitiané ke nau “kofuʻaki ʻa e tangata foʻou, ʻa ia naʻe ngaohi ke hoko ki he ʻOtua ʻi he angatonu mo e maʻoniʻoni ʻa Moʻoni [“mateaki,” NW].” (Efeso 4:24) ʻIo, ko e tangata foʻoú ʻokú ne tokoniʻi kitautolu ke tau mateaki, ka ʻe toe lava ke tau ako ha lēsoni fekauʻaki mo e mateakí mei he sitoaké.