“ʻOku Mou ʻIlo ʻa e ʻUhinga ʻOku Ou Fakafoki Mai Ai Hoʻomou Paʻangá?”

‘ʻOI, HE fiemaʻu moʻoni ʻe au ha paʻangá!’ ko e fakakaukau ia ʻa Nana, ko ha faʻē taʻehoa ʻa ha fānau tangata ʻe toko tolu ʻoku nau nofo ʻi Kaspi ʻi he Lepupilika ʻo Siōsiá. ʻI he pongipongi ʻe taha ko ʻene fakaʻānaua ke maʻu ha paʻangá naʻe hoko ia ʻo moʻoni. Naʻá ne maʻu ʻa e lari ʻe 300 ʻo hoko atu pē ki he ʻapi polisí. Naʻe ʻikai ha taha ʻe ʻasiʻasi holo. Ko ha paʻanga ia naʻe lahilahi ʻa hono mahuʻingá. Ko hono moʻoní, kuo teʻeki ke sio ʻa Nana ia ʻi ha laʻi paʻanga lari ʻe 100 ʻi he taʻu ʻe nima ko ia talu mei he hoko ʻa e lari ko e paʻanga fakafonuá. Ko e kau pisinisi koloa fakalotofonuá ʻe ʻikai te nau maʻu ʻa e lahi ko iá ʻi he hili ia ha ngāue ʻi ha ngaahi taʻu.

‘Ko e hā te u fiemaʻu ki ai ʻa e paʻanga ko ení kapau ʻe mole meiate au ʻa ʻeku tuí, manavahē-ʻOtuá mo hoku tuʻunga fakalaumālié?’ Ko e fakakaukau ia ʻa Nana. Kuó ne fakatupulekina ʻa e ngaahi ʻulungaanga faka-Kalisitiane ko iá, ʻo aʻu ki hono kātakiʻi ʻa e fakatanga fefeká mo e taá koeʻuhi ko ʻene tuí.

ʻI heʻene lue atu ki he ʻapi polisí, naʻe sio atu ai ʻa Nana ki ha kau ʻōfisa ʻe toko nima ʻoku nau kumi vavale holo ha meʻa. Naʻá ne ʻilo ʻoku nau fakasio ʻa e paʻangá, ko ia naʻá ne fakaofiofi atu peá ne pehē ange: “Naʻe ʻi ai haʻamou meʻa ne mole?”

“Ko e paʻanga,” ko ʻenau talí ia.

“Ko e fiha?”

“Ko e lari ʻe 300!”

“Naʻá ku maʻu hoʻomou paʻangá,” ko e lea atu ia ʻa Nana. Naʻá ne ʻeke ange leva: “ʻOku mou ʻilo ʻa e ʻuhinga ʻoku ou fakafoki mai ai hoʻomou paʻangá?” Naʻe ʻikai te nau ʻilo.

“Koeʻuhi ko e taha au ʻo e Kau Fakamoʻoni ʻa Sihová,” ko ʻene hokó atu ia. “Kapau naʻe ʻikai, ʻe ʻikai te u fakafoki mai hoʻomou paʻangá.”

Ko e pule polisi ko ia ne mole ʻene paʻangá naʻá ne ʻoange kia Nana ʻa e lari ʻe 20 ʻi he fakamālō ki heʻene tōʻonga faitotonú.

Naʻe mafola vave ʻa e talanoá ʻi he vahe Kaspi kātoa. ʻI he ʻaho hono hokó, ko ha fefine ngāue naʻe hū mai mei he ʻapi polisí naʻá ne pehē ange kia Nana: “ʻOku tauhi maʻu pē [ʻe he pulé] ʻa hoʻomou ʻū tohí ʻi hono ʻōfisí. Ngalingali te ne toe fakamahuʻingaʻi lahi ange ia he taimí ni.” Naʻe aʻu ʻo pehē ʻe ha ʻōfisa polisi ʻe taha: “Kapau naʻa ko e kakai kotoa pē ko e Kau Fakamoʻoni ʻa Sihova, ko hai ia ʻe toe faihia?”