Ko ha Māmani Fakataha mo e Ngaahi Fakakaukau Mioʻi ki he Mateakí

ʻI HA efiafi Falaite māfana ʻe taha ʻi Tel Aviv, ʻIsileli, naʻe kau atu ai ha talavou ki ha kulupu ʻo e toʻutupu naʻa nau tatali ʻi tuʻa ʻi ha naitikalapu. ʻI ha ngaahi mōmeniti ki mui ai naʻe fakaʻauha ʻe ha pahū ʻa e fuʻu kakaí.

Ko e tokotaha fakapā pomu taonakita ʻe taha naʻá ne foaki ʻa ʻene moʻuí ʻo toʻo fakamālohi ai ʻa e moʻui ʻa e toʻutupu ʻe toko 19 kehe. “Naʻe kongokongaʻi sino ʻatā ʻa e feituʻú kotoa, ko e sino kotoa ʻo e toʻutupu, mātuʻaki kei siʻi​—ko e meʻa fakalilifu taha ia kuo faifai ange peá u mātaá,” ko e fakahā ia ki mui ʻe ha tangata fakafaitoʻo ki he kau faiongoongó.

“Ko e ngaahi ʻulungaanga ʻa ia ʻoku hohoi ki ai ʻa e tokotaha kotoa, hangē ko e mateakí . . . , ʻe lava ke ne ʻai ʻa e ngaahi taú ke fakatou ngali lahi ange ke kamata pea toe faingataʻa ange ke ngata,” ko e tohi ia ʻa Thurstan Brewin ʻi he The Lancet. ʻIo, mei he ngaahi Kaluseti ʻa e Puleʻanga-Haʻa-Kalisitiané ki he ngaahi tāmate tavale ʻosi fokotuʻutuʻu ʻa e kau Nasi Siamané, kuo totoʻia ʻa e hisitōlia ʻo e tangatá ʻi he tāmate fakatokolahi kuo fai ʻi he hingoa ʻo e mateakí.

Fakautuutu ʻa e Faʻahinga Maʻukovia ʻo e Taʻemateakí

ʻI he ʻikai ala fakaʻikaiʻí, ko e mateaki tōtuʻá ʻe lava ke hoko ia ʻo fakatupu ʻauha, ka ko e ʻikai ha mateakí ʻe toe lava ke ne maumauʻi ʻa e sōsaietí. Ke hoko ʻo mateakí, ko e lau ia ʻa e Webster’s New Encyclopedic Dictionary, ʻoku ʻuhinga iá ke ‘faitōnunga ki ha tokotaha pe taumuʻa’ pea “fakahuʻunga ai ʻa e pipiki maʻu fakafoʻituitui ʻi he fehangahangai mo ha fakatauele pē ke liʻaki pe lavakiʻi.” Lolotonga ʻoku pehē ʻe he tokolahi taha ʻo e kakaí ʻoku nau hohoi ki he faʻahinga mateaki ko ení, ʻoku faingataʻaʻia ʻa e sōsaietí mei ha taʻemateaki lahi fau ʻi he lēvolo tefito tahá​—ko e lotoʻi siakale fakafāmilí. Ko e tuʻunga ʻo e vete malí kuo mahiki vave, ʻo tafunaki ia ʻe he fakamamafa ki he fiemālie fakafoʻituituí, ko e ngaahi mafasiaʻanga mo e kulukiaʻanga ʻo e moʻui fakaʻahó, pea mo e ngaahi nunuʻa ʻo e taʻemateaki fakaefehokotaki fakasino ʻoku mafola noaʻiá. Pea hangē ko e faʻahinga maʻukovia ʻo e fakapā pomu ʻi Tel Aviv, ʻoku faʻa hoko ko e faʻahinga maʻukovia taʻehalaiá ʻa e toʻutupú.

“ʻOku faʻa uesia kovi ʻa e ako ʻa ha kiʻi tama ʻi he ʻikai tuʻumaʻu ʻa e fāmilí tupu mei he vete malí, māvaé, mo e tauhi fānau tokotahá,” ko e lau ia ʻa e līpooti ʻe taha. Ko e tamaiki tangata ʻi he ngaahi fāmili ʻa ia ko e faʻeé pē ʻa e tauhí ʻoku hā ʻoku tautefito ʻa ʻenau ʻi he tuʻunga fakatuʻutāmaki ʻo e faingatāmaki fakaeakó, taonakitá mo e faihia kei siʻí. ʻI he taʻu taki taha, ko e fānau ʻe toko taha miliona ʻi he ʻIunaite Seteté ʻoku nau hokosia ai ʻa e vete ʻa ʻenau ngaahi mātuʻá, pea ʻi ha taʻu pē ʻe taha, ko e vaeua ʻo e fānau kotoa ʻoku fanauʻi ki he ngaahi mātuʻa malí ʻi he fonua ko iá ngalingali te nau hoko ko e faʻahinga maʻukovia ʻe he vete malí ʻi he taimi ʻe aʻu ai ʻa e fānau ko iá ki he taʻu 18. ʻOku hā mei he ngaahi fiká ʻoku fakamamahi ʻi he tuʻunga meimei tatau ʻa e meʻa ʻoku fakatuʻotuʻa atu ki ai ʻa e toʻutupu tokolahi ʻi he ngaahi tapa kehe ʻo e māmaní.

 Mateakí​—Ko ha Tuʻunga ʻOku Fuʻu Māʻolunga?

Ko e tōlalo lolotonga ʻi he ngaahi tuʻunga mateaki tukufakaholó ʻokú ne ʻai ai ʻa e ngaahi lea ʻa Tuʻi Tēvitá ke hā ngali feʻungamālie ange ʻi ha toe taimi: “Ke ke fakamoʻui au, ʻE Sihova, he kuo ngata ʻa e tangata mateakí; he ko e kakai faitōnungá kuo mole mei he ngaahi foha ʻo e tangatá.” (Sāme 12:​1, NW) Ko e hā e ʻuhinga ʻo e mafolalahia ko eni ʻa e taʻemateakí? Ko Roger Rosenblatt, ʻi heʻene tohi ʻi he makasini Time, ʻokú ne pehē: “Neongo ʻa e tuʻunga māʻolunga ʻoku ʻi ai ʻa e mateakí, ʻoku kei fuʻu lahi pē ʻa e manavahē, taʻefalala fakaekita, kumi faingamālie siokita mo e taumuʻa māʻolunga ʻi hotau anga fakaetangatá ke ʻamanekina ai ʻa hotau faʻahinga fakaetangata vaivaí ke tauhi maʻu ki ai.” ʻI hono fakamatalaʻi ʻa e taimi ʻa ia ʻoku tau moʻui aí, ʻoku fakamatalaʻi totonu ʻe he Tohitapú: “Ko hono kakai te nau ʻofa kiate kinautolu pe, . . . ko e kau angataʻemolumalu [“taʻemateaki,” NW], ko e kau taeʻofa-ki-hoʻota.”—2 Timote 3:​1-5.

ʻI he fakakaukau ki he tākiekina mālohi ʻoku fai ʻe he mateakí​—pe ko e ʻikai ha mateaki​—ki he fakakaukau mo e ngaahi tōʻonga ʻa ha taha, te tau ʻeke nai, ‘Ko hai ʻoku tuha totonu mo ʻetau mateakí?’ Fakatokangaʻi ʻa e meʻa ʻe leaʻaki ʻe he kupu hono hokó fekauʻaki mo e fehuʻi ko ení.

[Maʻuʻanga ʻo e Tā ʻi he peesi 3]

Tā ʻi ʻolunga: © AFP/CORBIS