‘Ke ʻAsili Tokanga’

“Ko e meʻa ia ʻoku totonu ke ʻasili ai ʻetau fakatokanga [“tokanga,” NW] ki he ngaahi meʻa kuo ongo mai, naʻa ʻiloange te tau ʻauhia atu ʻo tovale mo ia.”—HEPELU 2:1.

1. Fakatātaaʻi ʻa e founga ʻe malava ai ke taki atu ʻa e fakaleluʻí ki he fakatuʻutāmakí.

 KO E ngaahi fakatamaki ʻi he meʻalelé ʻokú ne toʻo ʻa e moʻui ʻa ha kakai nai ʻe toko 37,000 ʻi he taʻu taki taha ʻi he ʻIunaite Seteté ʻataʻatā pē. ʻOku pehē ʻe he kau mataotaó ko e lahi ʻo e ngaahi mate ko ení naʻe mei lava ke kalofi kapau naʻe ʻāsili tokanga ʻa e kau fakaʻulí ki he halá. Ko e kau fakaʻuli meʻalele ʻe niʻihi ʻoku fakaleluʻi kinautolu ʻe he ngaahi fakaʻilongá mo e ngaahi papa tuʻuakí pe ko hono ngāueʻaki ʻenau telefoni selulaá. ʻOku toe ʻi ai foki mo e faʻahinga ʻoku nau fakatōliʻa kinautolu ʻi he meʻa kuo ui ko e kai-mo-lelé​—ʻa e kai lolotonga ʻoku nau fakaʻulí. ʻI he ngaahi tuʻunga kotoa ko ení, ko e fakaleluʻí ʻe lava ke taki atu ia ki he fakatuʻutāmaki.

2, 3. Ko e hā ʻa e ekinaki naʻe ʻoange ʻe Paula ki he kau Kalisitiane Hepeluú, pea ko e hā naʻe feʻungamālie ai ʻene akonakí?

² ʻI he meimei taʻu ʻe 2,000 ki muʻa ke fuofua faʻu ʻa e meʻalelé, naʻe fakamahino pau ai ʻe he ʻapositolo ko Paulá ha faʻahinga fakaleluʻi naʻe fakamoʻoniʻi ʻene fakatuʻutāmaki ki he kau Kalisitiane Hepelū ʻe niʻihi. Naʻe fakamamafaʻi ʻe Paula ko Sīsū Kalaisi ko ia kuo toetuʻú naʻe foaki ki ai ha tuʻunga naʻe māʻolunga ange ʻi he kau ʻāngeló kotoa, he naʻe nofo ia ʻi he nima toʻomataʻu ʻo e ʻOtuá. Naʻe fakahaaʻi leva ʻe he ʻapositoló: “Ko e meʻa ia ʻoku totonu ke ʻasili ai ʻetau fakatokanga [“tokanga,” NW] ki he ngaahi meʻa kuo ongo mai, naʻa ʻiloange te tau ʻauhia atu ʻo tovale mo ia.”—Hepelu 2:1.

³ Ko e hā naʻe fiemaʻu ai ki he kau Kalisitiane Hepeluú ke ‘ʻasili ʻenau tokanga ki he ngaahi meʻa kuo ongo mai’ fekauʻaki mo Sīsuú? Koeʻuhí ko e meimei taʻu eni ʻe 30 kuo maliu atú talu ʻa e mavahe ʻa Sīsū mei he feituʻu ʻo e māmaní. ʻI he ʻikai ʻi ai honau ʻEikí, naʻe kamata ai ke ʻauhia atu ʻa e niʻihi ʻo e kau Kalisitiane Hepeluú mei he tui moʻoní. Naʻe fakaleluʻi kinautolu ʻe he lotu faka-Siú, ʻa ʻenau founga lotu ki muʻá.

Naʻe Fiemaʻu Ke Nau Tokanga Lahi Ange

4. Ko e hā kuo fakataueleʻi nai ai ʻa e kau Kalisitiane Hepelū ʻe niʻihi ke toe foki ki he lotu faka-Siú?

⁴ Ko e hā naʻe fakataueleʻi nai ai ha Kalisitiane ke toe foki ki he lotu faka-Siú? Sai, ko e fokotuʻutuʻu ʻo e lotú ʻi he malumalu ʻo e Laó naʻe lahi ʻa e ngaahi meʻa naʻe ʻasi mai aí. Naʻe malava ʻa e kakaí ke mamata ki he kau taulaʻeikí mo nāmuʻi ʻa e ngaahi feilaulau tutú. Kae kehe, ʻi he ngaahi tuʻunga ʻe niʻihi, naʻe mātuʻaki kehe ʻa e lotu faka-Kalisitiané ia. Naʻe maʻu ʻe he kau Kalisitiané ha Taulaʻeiki Lahi, ʻa Sīsū Kalaisi, ka kuo teʻeki ke mātā ia ʻi māmani feʻunga mo ha hongofuluʻi taʻu ʻe tolu. (Hepelu 4:14) Naʻe ʻi ai honau temipale, ka ko hono potu toputapú ko hēvani tonu ia. (Hepelu 9:24) ʻI he ʻikai hangē ko e kamu fakaekakano ʻi he malumalu ʻo e Laó, ko e kamu faka-Kalisitiané “oku oe loto ia, i he laumalie.” (Loma 2:​29, PM) Ko ia ai, ki he kau Kalisitiane Hepeluú, ko e lotu faka-Kalisitiané kuo kamata ke hangē nai ia ʻoku kiʻi taʻehāmai hono natulá.

5. Naʻe anga-fēfē hono fakahāhā ʻe Paula ko e fokotuʻutuʻu ʻo e lotu naʻe fokotuʻu ʻe Sīsuú naʻe māʻolunga ange ia ʻi he meʻa ko ia naʻe ʻi he malumalu ʻo e Laó?

 ⁵ Naʻe fiemaʻu ki he kau Kalisitiane Hepeluú ke nau ʻiloʻi ha meʻa mātuʻaki mahuʻinga fekauʻaki mo e fokotuʻutuʻu ʻo e lotu naʻe fokotuʻu ʻe Kalaisí. Naʻe makatuʻunga lahi ange ia ʻi he tuí kae ʻikai ʻi he mamatá, neongo ia naʻe māʻolunga ange ia ʻi he Lao naʻe foaki mai fakafou ʻi he palōfita ko Mōsesé. “Kapauā naʻe lava ʻe he toto ʻo e fanga kosi mo e fanga pulu mo e efuefu ʻo ha pulu fefine, ʻi hono luluku ʻaki ʻa e kakai kuo taʻemaʻa—kapau naʻe lava ʻe ia ke fakamaʻa ʻa e kakano;” ko e tohi ia ʻe Paulá, “huanoa ʻa e taʻataʻa ʻo Kalaisi, ʻa ia naʻa ne ʻoatu ʻe ia ia taʻe hano mele ki he ʻOtua, fai ʻe ha laumalie laui itaniti—huanoa ʻene fakamaʻa ʻe he taʻataʻa ko ia hotau konisenisi mei he ngaahi ngaue mate, ke tau tauhi ʻa e ʻOtua ʻoku Moʻui.” (Hepelu 9:​13, 14) ʻIo, ko e fakamolemole ko ia ʻoku ala malava fakafou he tui ki he feilaulau huhuʻi ʻa Sīsū Kalaisí ʻoku māʻolunga mamaʻo ange ia ʻi he ngaahi founga lahi ʻi he meʻa ko ia naʻe tokonaki ʻe he ngaahi feilaulau naʻe ʻoatu ʻi he malumalu ʻo e Laó.​—Hepelu 7:​26-28.

6, 7. (a) Ko e hā ʻa e tuʻunga naʻá ne ʻai ke fakavavevave ai ki he kau Kalisitiane Hepeluú ‘ke ʻasili ʻenau tokanga ki he ngaahi meʻa kuo ongo maí’? (e) ʻI he taimi naʻe hiki ai ʻe Paula ʻene tohi ki he kau Hepeluú, ko e hā e lahi ʻo e taimi naʻe kei toe ki Selusalemá? (Sio ki he fakamatala ʻi laló.)

⁶ Naʻe toe ʻi ai ʻa e ʻuhinga ʻe taha naʻe fiemaʻu ai ki he kau Kalisitiane Hepeluú ke nau tokanga lahi ki he ngaahi meʻa naʻe ongo mai fekauʻaki mo Sīsuú. Naʻá ne tomuʻa tala ʻe fakaʻauha ʻa Selusalema. Naʻe pehē ʻe Sīsū: “Tokaange hao taimi ʻe ʻākoloʻi koe ʻe ho ngaahi fili, pea te nau kapuʻi koe, mo punipuni mei he potu kotoa pe, pea te nau laiki koe mo hoʻo fanau foki; pea ʻe ʻikai te nau fakatoe hao maka ʻo taʻe holoki: koeʻuhiā naʻe ʻikai te ke lavea ʻa e kuonga ʻo ho aʻahi.”—Luke 19:​43, 44.

⁷ ʻE hoko eni ʻafē? Naʻe ʻikai ke fakahā ʻe Sīsū ia ʻa e ʻahó mo hono houá. Ka, naʻá ne ʻoange ʻa e fakahinohino ko ení: “Ka mou ka vakai ki he kapui ʻo Selusalema ʻe he ngaahi matatau, te mou toki ʻilo kuo ofi hono fakaʻauha. Pea ke toki hola ki he moʻunga ʻa kinautolu ʻoku ʻi Siutea; pea ko kinautolu ʻoku ʻi loto kolo ke hiki mei ai; pea ko kinautolu ʻoku ʻi ʻuta ke ʻoua te nau hu ki he kolo.” (Luke 21:​20, 21) Lolotonga ʻa e taʻu ʻe 30 hili hono leaʻaki ʻe Sīsū ʻa e ngaahi lea ko iá, naʻe mole mei he niʻihi ʻo e kau Kalisitiane ʻi Selusalemá ʻenau ongoʻi fakavavevavé pea nau hoko ʻo fakaleluʻi. Naʻe toʻo honau matá mei he halá, ʻo hangē ko e laú. Kapau naʻe ʻikai fakatonutonu ʻenau fakakaukaú, ko e fakatuʻutāmaki kuo pau. Pe naʻa nau fakakaukau pehē pe ʻikai, ko e fakaʻauha ʻo Selusalemá naʻe tuʻunuku mai! a Fakatauange pē, ko e ekinaki ʻa Paulá naʻá ne tokonaki ha fafangu fakatokanga ki he kau Kalisitiane mohe fakalaumālie ʻi Selusalemá.

 Ko e ‘ʻAsili Tokanga’ ʻi he ʻAho Ní

8. Ko e hā ʻoku fiemaʻu ai ke tau ‘ʻasili tokanga’ ki he ngaahi moʻoni ʻo e Folofola ʻa e ʻOtuá?

⁸ Hangē ko e kau Kalisitiane he ʻuluaki senitulí, ʻoku fiemaʻu kia kitautolu ke ‘ʻasili tokanga’ ki he ngaahi moʻoni ʻo e Folofola ʻa e ʻOtuá. Ko e hā hono ʻuhingá? Koeʻuhi ʻoku tau toe fehangahangai mo kitautolu mo e fakaʻauha ʻoku tuʻunuku mai, ʻo ʻikai ʻo ha puleʻanga pē taha, ka ko ha fokotuʻutuʻu kotoa ʻo e ngaahi meʻá. (Fakahā 11:18; 16:​14, 16) Ko e moʻoni, ʻoku ʻikai te tau ʻilo ʻa e ʻaho mo e houa tofu pē ko ia ʻe hanga ai ʻe Sihova ʻo fai ʻa e meʻá ni. (Mātiu 24:36) Neongo ia, ko e kau sio tonu kitautolu ʻi hono fakahoko ʻo e ngaahi kikite faka-Tohitapu ʻokú ne fakahaaʻi mahino ʻoku tau lolotonga moʻui ʻi he “kuonga fakamui.” (2 Timote 3:​1-5) Ko ia ai, ʻoku totonu ke tau tokanga fekauʻaki mo ha faʻahinga meʻa pē ʻe malava ke ne fakaleluʻi kitautolu. ʻOku fiemaʻu ke tau tokanga ki he Folofola ʻa e ʻOtuá pea tauhi maʻu ha ongoʻi mālohi ʻo e fakavavevave. Ko e toki fai peheé pē te tau “lava [ai] ke hao mei he ngāhi meʻa ko ia fulipe ʻoku ene ke hoko.”​—Luke 21:36.

9, 10. (a) ʻE lava fēfē ke tau fakahāhā kitautolu ʻoku tau tokanga ki he ngaahi meʻa fakalaumālié? (e) ʻOku anga-fēfē ʻa e hangē ʻa e Folofola ʻa e ʻOtuá ko ha ‘tuhulu ki heʻetau laká’ mo ha ‘maama ki hotau halá’?

⁹ ʻI he ngaahi taimi mahuʻinga ko ení, ʻe malava fēfē ke tau fakahāhā ʻoku tau ‘ʻasili tokanga’ ki he ngaahi meʻa fakalaumālié? Ko e taha e foungá ko e hoko ʻo maʻu tuʻumaʻu ʻetau ngaahi fakatahá, ngaahi ʻasemipilií, mo e ngaahi fakataha-lahi faka-Kalisitiané. ʻOku totonu ke tau toe hoko ko e kau ako faivelenga ʻo e Tohitapú koeʻuhi ke tau lava ʻo ʻunu ofi ai ki hono Tokotaha-Faʻú, ʻa Sihova. (Semisi 4:8) Kapau te tau maʻu ʻa e ʻilo ʻo Sihová fakafou ʻi heʻetau ako fakafoʻituituí mo e maʻu fakatahá, te tau hangē ai ko e tokotaha-tohi-saame ko ia naʻá ne pehē ki he ʻOtuá: “Ko hoʻo folofola ko e tuhulu ki heʻeku laka, mo e maama ki hoku hala.”​—Sāme 119:105.

¹⁰ ʻOku ngāue ʻa e Tohitapú ko ha ‘maama ki hotau halá’ ʻi he taimi ʻokú ne tala mai ai kia kitautolu ʻa e ngaahi taumuʻa ʻa e ʻOtuá ki he kahaʻú. Ko ha toe ‘tuhulu ia ki heʻetau laká.’ ʻI hono toe fakalea ʻe tahá, ʻe lava ke ne tokoniʻi kitautolu ʻi heʻetau laka hono hokó ʻi he taimi ʻoku tau fehangahangai ai mo e ngaahi palopalema fakamamahi ʻo e moʻuí. Ko e meʻa ia ʻoku mātuʻaki mahuʻinga ai ke tau ‘ʻasili tokanga’ ʻi he taimi ʻoku tau fakatahataha ai ke fakahinohinoʻi fakataha mo hotau kaungātuí mo e taimi ʻoku tau lau fakafoʻituitui ai ʻa e Folofola ʻa e ʻOtuá. Ko e fakamatala ʻoku tau maʻú te ne tokoniʻi kitautolu ke tau fai ha ngaahi fili fakapotopoto mo ʻaonga ʻa ia ʻoku fakahōifua kia Sihova mo ʻai hono lotó ke fiefia. (Palovepi 27:11; Aisea 48:17) ʻE lava fēfē ke tau fakalahi ʻa e lahi ʻo ʻetau tokangá ʻi he ngaahi fakatahá pea mo e lolotonga ʻo e ngaahi houa ako fakafoʻituituí koeʻuhi ke tau maʻu ai ʻa e ʻaonga lahi taha mei he ngaahi tokonaki fakalaumālie ʻa e ʻOtuá?

Fakalakalaka ʻa ʻEtau Tokanga ʻi he Ngaahi Fakatahá

11. Ko e hā ko ha pole ai ʻi he taimi ʻe niʻihi ʻa e tokanga ʻi he ngaahi fakataha faka-Kalisitiané?

¹¹ ʻI he taimi ʻe niʻihi, ko e tokanga ʻi he ngaahi fakataha faka-Kalisitiané ko ha pole ia. Ko e ʻatamaí ʻe lavangofua ke fakaleluʻi, mahalo ʻe ha tangi ʻa ha kiʻi valevale pe ko ha tokotaha tōmui ʻoku fakasio hano nofoʻanga. Hili ha ʻaho ngāue lahi, te tau mātuʻaki helaʻia nai. Ko e tokotaha ʻoku malanga mei he peletifōmú ʻe ʻikai nai ko e tokotaha malanga mālie tahá ia, pea ki muʻa ke tau fakatokangaʻí, kuo tau misi ʻāʻā kitautolu​—pea aʻu pē nai ʻo tau kiʻi mohe! ʻI he vakai ki he fakamatala mātuʻaki mahuʻinga ʻoku fakahoko maí, ʻoku totonu ke tau feinga ke fakalakalaka ʻetau ngaahi mafaí ʻi he tokanga ki he ngaahi fakataha ʻa e fakatahaʻangá. Ka ʻe malava fēfē ke tau fai eni?

12. Ko e hā ʻe lava ke ne ʻai ke faingofua ange ʻetau tokanga ʻi he ngaahi fakatahá?

¹² ʻOku faʻa faingofua ange ke tokanga ʻi he ngaahi fakatahá kapau ʻoku tau teuteu lelei. Ko ia ai, ko e hā ʻoku ʻikai ke tuku mavahe ai ha taimi ke fai ha fakakaukau tōmuʻa ki he fakamatala ʻe fai ki ai ʻa e lāuleá? ʻOku fiemaʻu ʻa e ngaahi miniti siʻi pē ʻi he ʻaho taki taha ke lau mo fakalaulauloto ai ki ha konga ʻo e ngaahi vahe kuo vaheʻi ki he lau Tohitapu ʻi he uiké. ʻI hono fai ha palani, ʻe lava ke tau toe maʻu ai mo e taimi ke teuteu ai ki he Ako Tohi ʻa e Fakatahaʻangá mo e Ako Taua Leʻo. Ko e hā pē ha taimi-tēpile ʻoku tau fili, ko e meʻa ʻe taha ʻoku paú: Ko e teuteú te ne tokoniʻi ai kitautolu ke tau tokanga ki he fakamatala ʻoku fai ki ai ʻa e lāulea ʻi he ngaahi fakatahá.

13. Ko e hā te ne tokoniʻi nai kitautolu ke tauhi maʻu ʻa e tokangá ʻi he fakamatala ʻoku fai ʻa e lāulea ki ai ʻi he ngaahi fakatahá?

¹³ Tānaki atu ki he hoko ʻo teuteu leleí, ʻoku ʻilo  ʻe he niʻihi ʻoku nau tokanga lelei ange ʻi he ngaahi fakatahá kapau te nau nofo ʻo ofi ki muʻa ʻi he Fale Fakatahaʻangá. Ko e tauhi maʻu ha fetuʻutaki mata mo e tokotaha malangá, ʻo muimui ʻi he Tohitapú ʻi he taimi ʻoku lau ai ha konga Tohitapú, mo e hiki noutí ʻa e ngaahi founga kehe ke tauhi ai hotau ʻatamaí mei heʻene heva noa holó. Kae kehe, ko hono maʻu ko ia ha loto kuo mateuteú ʻoku mahuʻinga mamaʻo ange ia ʻi ha faʻahinga founga tokanga pau pē. ʻOku fiemaʻu ke tau mahinoʻi ʻa e taumuʻa ʻo ʻetau fakatahataha fakatahá. ʻOku tau fakataha tefito mo hotau kaungātuí ke lotu kia Sihova. (Sāme 26:12; Luke 2:​36, 37) Ko e ngaahi fakatahá ko ha founga mahuʻinga ia ʻoku fafangaʻi fakalaumālie ai kitautolu. (Mātiu 24:​45-47) ʻIkai ko ia pē, ʻoku nau tokonaki mai kia kitautolu mo ha ngaahi faingamālie “ke fefakaʻaiʻaiʻaki ʻa kitautolu ki he feʻofaʻaki mo e ngaue lelei.”​—Hepelu 10:​24, 25.

14. Ko e hā te ne ʻai moʻoni ha fakataha ke lavameʻá?

¹⁴ ʻE hehema nai ʻa e niʻihi ke fakamāuʻi ʻa e tuʻunga ʻo ha fakataha ʻaki ʻa e ngaahi malava fakaefaiako ʻa kinautolu ʻoku kau ki aí. Kapau ʻoku mātuʻaki lavameʻa ʻa kinautolu ʻoku malangá, ʻe lau nai ia ko e fakataha lelei. Ka ʻo kapau ʻoku hā ʻoku ʻikai ola lelei ʻa e faiakó, ʻe kehe nai ʻetau laú ʻatautolu. Ko e moʻoni ko e faʻahinga ko ia ʻi he polokalamá ʻoku totonu ke nau fai ʻenau lelei tahá ke ngāueʻaki ʻa e pōtoʻi fakafaiakó pea tautautefito ke aʻu ki he lotó. (1 Timote 4:16) Neongo ia, ko kitautolu ʻoku fanongó ʻoku totonu ke ʻoua te tau fuʻu fakaanga. Neongo ʻoku mahuʻinga ʻa e malava fakaefaiako ʻa kinautolu ʻoku kaú, ʻoku ʻikai ko e moʻoniʻi meʻa tefito ia ʻoku tokoni ki he lavameʻa ʻo ha fakataha. ʻIkai ʻokú ke loto-tatau ko ʻetau tokanga tefitó ʻoku totonu ke hoko ia, ʻo ʻikai ki he anga ʻo e lelei hono fakahoko ʻe he tokotaha malangá ʻene malangá, ka ko e anga ʻo e lelei ʻo ʻetau fokotuʻu telinga ki aí? ʻI he taimi ʻoku tau maʻu ai ʻa e ngaahi fakatahá pea tokanga ki he meʻa ʻoku fakahoko maí, ʻoku tau lotu ai ki he ʻOtuá ʻo fehoanaki mo hono finangaló. Ko e meʻa ia ʻokú ne ʻai ʻa e fakatahá ke lavameʻá. Kapau ʻoku tau vēkeveke ke maʻu ʻa e ʻiloʻi ʻo e ʻOtuá, te tau maʻu ʻaonga mei he ngaahi fakatahá, neongo pe ko e hā ʻa e  ngaahi malava ʻa e tokotaha malangá. (Palovepi 2:​1-5) Ko hono moʻoní leva, tau fakapapauʻi ke ‘ʻasili tokanga’ ʻi heʻetau ngaahi fakatahá.

Maʻu ʻAonga Kakato mei he Ako Fakafoʻituituí

15. ʻE lava fēfē ke ʻaonga ʻa e akó mo e fakalaulaulotó kia kitautolu?

¹⁵ ʻOku tau maʻu ʻaonga lahi mei he ʻasili tokanga’ lolotonga ʻa e ngaahi houa ako fakafoʻituituí mo e fakalaulaulotó. Ko e lautohi mo e fakakaukau ki he Tohitapú mo e ngaahi tohi faka-Kalisitiané te ne ʻomi ai kia kitautolu ha ngaahi faingamālie mahuʻinga ke fakamaʻu ai ʻa e ngaahi moʻoni ʻo e Folofola ʻa e ʻOtuá ʻi hotau lotó. Ko e meʻá ni leva, ʻe maongo loloto ia ʻi he anga ʻo ʻetau fakakaukaú mo ʻetau ngāué. Ko e moʻoni, ʻe tokoni ia kia kitautolu ke tau maʻu ʻa e fiefia ʻi hono fai ʻa e finangalo ʻo e ʻOtuá. (Sāme 1:2; 40:8) Ko ia ai, ʻoku fiemaʻu ke fakatupulekina ʻetau ngaahi mafai ʻi he tokangá koeʻuhi ʻe ʻaonga ia kia kitautolu ʻi he taimi ʻoku tau ako aí. ʻOku mātuʻaki faingofua ke fakaleluʻi! Ko e ngaahi fakahohaʻa īkí​—ha tā telefoni pe ko ha lea ha meʻa te ne fakatupunga nai kitautolu ke mole ʻetau tokangá. Pe ʻoku kamata pē nai ia ʻia kitautolu ko e nounou hotau taimi tokangá. Te tau taʻutu hifo nai mo ha taumuʻa lelei ko hono fafangaʻi fakalaumālie, kae ʻikai loko fuoloa ko e ʻatamaí, ko e moʻoni, ʻe heva atu nai ia ki he ngaahi feituʻu kehe. ʻE malava fēfē ke tau ‘ʻasili tokanga’ lolotonga hono ako fakafoʻituitui ʻa e Folofola ʻa e ʻOtuá?

16. (a) Ko e hā ʻoku mahuʻinga ai kia kitautolu ke fakataimitēpileʻi ha taimi ki he ako fakafoʻituituí? (e) Kuo anga-fēfē hoʻo ʻai ha taimi ki hono ako ʻo e Folofola ʻa e ʻOtuá?

¹⁶ ʻOku ʻaonga ke ʻai ha taimi-tēpile pea fili ha fokotuʻutuʻu ʻoku tokoni lahi taha ki he akó. Ki he tokolahi taha ʻo kitautolú, ʻoku tātātaha ke tau maʻu ha taimi fakaekita. Te tau ongoʻi nai ʻoku hanga ʻe he fakavavevave ʻo e ngaahi meʻa fakaʻahó ʻo tafiʻi atu kitautolu hangē ha vaʻakau ʻi ha vaitafe tafe omá. Ko e moʻoni, ʻoku fiemaʻu ke tau tauʻi ʻa e ʻaú, hangē ko e laú, pea kumi ki ha kiʻi motu ʻoku nongá. ʻE ʻikai te tau tatali pē ke hokonoa mai ha faingamālie ke ako. Ka, ʻoku fiemaʻu ke tau mapuleʻi ʻa e tuʻunga ʻoku hokó ʻaki hono ʻai ha taimi ki he akó. (Efeso 5:​15, 16) ʻOku tuku mavahe ʻe he niʻihi ha kiʻi taimi nounou ʻi he pongipongí ʻi heʻene ngali siʻi ange ai ʻa e fakalelú. ʻOku ʻilo ʻe he niʻihi ia ko e efiafí ʻokú ne ʻomi ʻe ia ha faingamālie lelei ange. Ko e poiní ia kuo pau ke ʻoua te tau tukunoaʻi ʻa e fiemaʻu mātuʻaki mahuʻinga ko ia ke maʻu ʻa e ʻilo totonu ki he ʻOtuá mo hono ʻAló. (Sione 17:3) Ko ia ai, tau fakataimitēpileʻi ha taimi ki he ako fakafoʻituituí pea tauhi maʻu leva ki he taimi-tēpile ko iá.

17. Ko e hā ʻa e fakalaulauloto, pea ʻe lava fēfē ke ʻaonga kia kitautolu?

¹⁷ Ko e fakalaulaulotó​—ʻa e founga ʻo e fakakaukau atu ki he meʻa kuo tau ʻilo fakafou he akó​—ʻoku mahuʻinga taʻehanotatau. ʻOkú ne tokoniʻi kitautolu ke toʻo ʻa e ngaahi fakakaukau ʻa e ʻOtuá mei he ngaahi peesi kuo pulusí pea ʻai ia ki hotau lotó. Ko e fakalaulaulotó ʻokú ne tokoniʻi kitautolu ke sio ki he anga hono ngāueʻaki ʻa e akonaki ʻo e Tohitapú koeʻuhi ke tau hoko ai ko e “kau fai ki he folofola, ʻo ʻikai ko e kau fanongo pe.” (Semisi 1:​22-25) ʻIkai ko ia pē, ko e fakalaulaulotó ʻokú ne tokoniʻi kitautolu ke tau ʻunu ofi ange ai pē kia Sihova, he ʻoku hanga ʻe he fakalaulaulotó ʻo fakamafeia kitautolu ke tau fakakaukau ai ki hono ngaahi ʻulungāngá pea mo e anga honau fakamahinoʻi ʻi he fakamatala ko ia ʻoku fai ʻa e lāulea ki ai lolotonga ʻa e ngaahi taimi akó.

18. Ko e hā ʻa e ngaahi tuʻunga ʻoku fiemaʻu ki ha fakalaulauloto ola lelei?

¹⁸ Ke maʻu ʻaonga kakato mei he akó mo e fakalaulaulotó, kuo pau ke tauhi ke ʻatā ʻa e ʻatamaí mei he ngaahi fakalelú. Koeʻuhi ke fakaʻatā ha potu ki he fakamatala foʻoú ʻi he taimi ʻoku tau fakalaulauloto aí, ʻoku fiemaʻu ke tāpuniʻi atu ʻa e ngaahi fakalelu ʻo e moʻui ʻo e ʻaho ní. Ko hono fai ení ʻoku fiemaʻu ki ai ha taimi mo ha nofo tokotaha, neongo ia, he meʻa fakaivifoʻou moʻoni ke ʻinasi mei he meʻakai fakalaumālie mo e ngaahi vai ʻo e moʻoní ʻoku ʻi he Folofola ʻa e ʻOtuá!

19. (a) ʻI he fekauʻaki mo e ako fakafoʻituituí, ko e hā kuó ne tokoniʻi ʻa e niʻihi ke fakalahi ʻa e lahi ʻo ʻenau tokangá? (e) ʻOku totonu ke fēfē ʻetau fakakaukau fekauʻaki mo e akó, pea ko e hā ʻa e ngaahi ʻaonga ʻe lava ke tau maʻu mei he ngāue mahuʻinga ko ení?

 ¹⁹ Fēfē kapau ko e lahi ʻo ʻetau tokangá ʻoku nounou pea ʻoku kamata ke heva mamaʻo ia hili pē ha taimi nounou ʻo e akó? Kuo ʻilo ʻe he niʻihi ʻoku malava ke nau fakalahi ʻa e mafai ʻo ʻenau tokangá lolotonga ʻa e akó ʻaki hono kamataʻaki ha ngaahi houa ako nounou ange pea hikihiki hake ai pē ʻa hono lōloá. Ko ʻetau koló ia ke nōfoʻi ʻi he akó kae ʻikai ko e fakavave pē ke ʻosi. ʻOku fiemaʻu ke tau fakatupulekina ha mahuʻingaʻia vēkeveke ʻi he kaveinga ʻoku fai ʻa e lāulea ki aí. Pea ʻoku lava ke fai ha fekumi lahi ange ʻo ngāueʻaki ʻa e fakamatala lahi fau kuo tokonaki mai ʻe he kalasi tamaioʻeiki anga-tonu mo potó. ʻOku mahuʻinga lahi ʻa e fakasio atu ki he ‘ngaahi meʻa loloto ʻo e ʻOtuá.’ (1 Kolinito 2:10) Ko e fai peheé ʻokú ne fakamafeia ai kitautolu ke laka ki muʻa ʻetau ʻilo ki he ʻOtuá pea fakatupulekina ai ʻetau mafai fakaefakakaukaú. (Hepelu 5:14) Kapau ko e kau ako fakamākukanga kitautolu ʻo e Folofola ʻa e ʻOtuá, te tau toe hoko ai ʻo “mafai ke akoʻaki ki ha kakai kehe foki.”​—2 Timote 2:2.

20. ʻE lava fēfē ke tau fakatupulekina mo tauhi maʻu ha vahaʻangatae fekoekoeʻi mo Sihova ko e ʻOtuá?

²⁰ Ko hono maʻu ʻa e ngaahi fakataha faka-Kalisitiané mo e kau ʻi he ako fakafoʻituituí te ne tokoniʻi lahi kitautolu ke fakatupulekina mo tauhi maʻu ha vahaʻangatae fekoekoeʻi mo Sihova. ʻOku hā mahino, ko e tuʻunga eni naʻe hoko ki he tokotaha-tohi-saame ko ia naʻá ne pehē ki he ʻOtuá: “ʻOi ʻeku ʻofa ki hoʻo lao na! ʻOku ou fakalaulauloto ki ai he ʻaho kotoa.” (Sāme 119:97) Pea ko ia ai, tau maʻu maʻu pē ʻa e ngaahi fakatahá, ngaahi ʻasemipilií, pea mo e ngaahi fakataha-lahí. Pea ʻofa ke tau fakatau mai ha taimi ki he ako ʻo e Tohitapú mo e fakalaulaulotó. ʻE fakapaleʻi lahi kitautolu ʻi heʻetau ‘ʻasili tokanga’ ki he Folofola ʻa e ʻOtuá.

[Fakamatala ʻi lalo]

ʻOkú Ke Manatuʻi?

• Ko e hā naʻe ʻauhia mamaʻo ai ʻa e kau Kalisitiane Hepelū ʻe niʻihi mei he tuí?

• ʻE lava fēfē ke tau tokanga maʻu pē ʻi he ngaahi fakataha faka-Kalisitiané?

• Ko e hā te ne tokoniʻi kitautolu ke maʻu ʻaonga mei he ako Tohitapu fakafoʻituituí mo e fakalaulaulotó?

[Fehuʻi ki he Ako]

[Fakatātā ʻi he peesi 11]

Naʻe fiemaʻu ki he kau Kalisitiane Hepeluú ke nau tokanga ki he fakaʻauha ʻoku tuʻunuku mai ʻo Selusalemá

[Fakatātā ʻi he peesi 13]

ʻE lava ke tokoniʻi ʻe he ngaahi mātuʻá ʻenau fānaú ke nau maʻu ʻaonga mei he ngaahi fakataha faka-Kalisitiané