Ko e Manakoa ʻi Onopooni ʻo e “Kau Sangató”

“Manatuʻi ʻa e taimi naʻa tau hā ngali fakapikoʻia ai ʻi ha lave pē ki he kau heló? Naʻe ʻikai hā ngali uesia ʻe he meʻa ko iá ʻa e kau ʻAmelika ʻe toko 4.2 miliona naʻa nau mamata ʻi he putu ʻo Faʻē Telesá ʻi Sep. 13. Talu ʻene mate ʻi Sep. 5, mo hono nafui ʻaki ʻe he kakaí ʻa e Vatikanó ʻa e ngaahi kole ke talaki fakaeouau ia ko ha sangata. ʻOku tokosiʻi ʻa e kakai ʻoku nau veiveiua ʻe hoko ʻa e meʻa ko iá.”—Sun-sentinel, ʻIunaite Setete, ʻOkatopa 3, 1997.

KO E ngāue ʻofa mo e tokoni ʻa e misinale Katolika ko Faʻē Telesá ʻoku vakai ki ai ʻa e tokolahi ko e uho ia ʻo e tuʻunga sangata moʻoní. ʻOku ʻi he lotolotonga ʻo e ngaahi lotu kehé ʻa e faʻahinga helo. Kae kehe, mahalo pē ʻoku ʻikai ha taha ʻe fakahaaʻi fakaʻofisiale ʻo hangē ko e faʻahinga ko ia ʻoku fakanofo sangato ʻe he Siasi Katolika Lomá.

Ko Tuʻitapu Sōane Paulo II kuó ne fakanofo sangato ʻa e faʻahinga laka hake ʻi he toko 450 lolotonga ʻa ʻene pule fakatuʻitapú, ʻo lahi ange ia ʻi he tokolahi kuo fakanofo sangato ʻe he kotoa ʻo e kau tuʻitapu kehe ʻo e senituli hono 20 ʻi hono fakatahaʻí. a Ko e hā ʻoku ʻi ai ai ʻa e līʻoa tuʻuloa pehē ki he “kau sangató,” ʻa ia ko e tokolahi ai ʻoku siʻi hono ʻiloa ʻi he lotolotonga ʻo e kau Katoliká fakalūkufua?

Ko e teolosia ʻi he ʻUnivēsiti Notre Dame ko Lawrence Cunningham ʻokú ne fakamatala: “ʻOku mahuʻingaʻia ʻa e kakaí ʻi he fakakaukau ʻoku ʻi ai ha tuʻunga fakaʻotua ʻi he māmaní. Ko e kau sangató ʻoku fakahaaʻi ai ʻa e malava ke ʻi ai ha moʻui fakaehelo, naʻa mo e ʻi he ʻahó ni.” Tānaki atu ki ai, ʻoku taukaveʻi ʻoku maʻu ʻe he “kau sangató” ʻa e malava ke hū makehe ki he ʻOtuá, ʻo ʻai ai kinautolu ko e kau fakalaloa ola lelei ki he faʻahinga moʻuí. ʻI hono maʻu ha ngaahi fakatātā fakalotu pe toetoenga fakaesino ʻo ha “sangato,” ʻoku fakalāngilangiʻi ia ʻi he tui ʻoku tupu mei ai ʻa e mālohi.

Ko e pepa fehuʻi ʻo e Kosilio ʻo Trent, naʻe pulusi ʻi he senituli hono 16 ke toe fakapapauʻi ai ʻa e tokāteline Katoliká, naʻe tuʻutuʻuni ai: “ʻOku tau tonuhia ʻi he fakaʻosiʻaki, ko hono fakalāngilangiʻi ʻa e kau sangato ‘ʻoku nau mohe ʻi he ʻEikí,’ ke kole ki heʻenau fakalaloá, pea ke fakalāngilangiʻi honau ngaahi fakatātā fakalotu toputapú mo e efuefú, ʻi he ʻikai ʻaupito hōloá, ʻoku hehema ia ʻi he tuʻunga lahi ke fakalahi ai ʻa e lāngilangi ʻo e ʻOtuá, ʻi he fakatatau ki he ʻamanaki ʻa e Kalisitiané ʻoku longomoʻui ai mo mālohi, pea ʻoku fakaʻaiʻai ai ʻa ia tonu ke faʻifaʻitaki ki honau ngaahi ʻulungaanga leleí.” (The Catechism of the Council of Trent, 1905) ʻOku fiemaʻu moʻoni ʻe he kau Kalisitiane moʻoní ke nau moʻui ʻi ha ngaahi moʻui ʻulungaanga lelei, ke fakaofiofi totonu ai ki he ʻOtuá, pea ke maʻu ai ʻa e tokoni fakaʻotuá. (Semisi 4:​7, 8) Ko ia ai, fakatatau ki he Folofola ʻa e ʻOtuá, ko hai ʻoku taau ʻi he tuʻunga ko e kau sangato moʻoní? Pea ko e hā ʻa e ngafa ʻoku nau fakahokó?

[Fakamatala ʻi lalo]