Ngaahi Fehuʻi mei he Kau Lautohí

• Ko e Lusefaá ko ha hingoa ia ʻoku ngāueʻaki ʻe he Tohitapú kia Sētane?

Ko e hingoa Lusefaá ʻoku hā tuʻo taha pē ia ʻi he ngaahi Konga Tohitapú pea ʻi he ngaahi liliu pē ʻe niʻihi ʻo e Tohitapú. Ko e fakatātaá, ʻoku pehē ʻi he Aisea 14:12: “Uoke! hoʻo to hifo mei langi, ʻe Lusefa tama ʻa Hengihengi!”

Ko e foʻi lea faka-Hepelū naʻe liliu ko e “Lusefa” ʻoku ʻuhingá ko e “tokotaha ʻoku ulo.” ʻOku ngāueʻaki ʻe he Septuagint ʻa e foʻi lea faka-Kalisi ʻoku ʻuhinga ko e “tokotaha ʻomai ʻo e atá.” Ko ia ai, ʻoku fakalea ʻe he ngaahi liliu ʻe niʻihi ʻa e muʻaki foʻi lea faka-Hepeluú ko e “fetuʻu pongipongi” pe “Fetuʻu ʻaho.” Ka ʻoku ngāueʻaki ʻe he Vulgate faka-Latina ia ʻa Selomé ʻa e “Lusefā” (tokotaha toʻo maama), pea ʻoku fakamatalaʻi ʻe he meʻá ni ʻa e hā ʻa e foʻi lea ko iá ʻi he ngaahi liliu kehekehe ʻo e Tohitapú.

Ko hai ʻa e Lusefā ko ʻení? Ko e kupuʻi lea “tokotaha ʻoku uló,” pe “Lusefa,” ʻoku maʻu ia ʻi he meʻa naʻe tuʻutuʻuni fakaekikite ʻe ʻAisea ki he kau ʻIsilelí ke nau leaʻaki ko ha “lea fakaefakatātā fakafepaki ki he tuʻi ʻo Pāpiloné.” Ko ia, ko ha konga ia ʻo ha lea naʻe fakahanga tefito ki he haʻa tuʻi Pāpiloné. Ko e fakamatala ko ia “tokotaha ʻoku uló” ʻoku fai ia ki ha tangata kae ʻikai ki ha meʻamoʻui laumālié ʻoku toe hā ia ʻi he fakamatala: “ʻE ʻohifo koe ki Hetesi [“Seoli,” NW].” Ko Seolí ko e faʻitoka anga-maheni ʻo e faʻahinga ʻo e tangatá​—ʻikai ko ha feituʻu ʻoku nofo ai ʻa Sētane ko e Tēvoló. ʻIkai ngata aí, ko e faʻahinga naʻa nau sio ki hono ʻohifo ʻo Lusefā ki he tuʻunga ko ʻení ne nau ʻeke: “Ko eni koā ʻa e tangata naʻe ngaohi ʻa mamani ke tete.” ʻOku hā mahino, ko e “Lusefa” ʻoku ʻuhinga ia ki ha tangata, ʻikai ki ha meʻamoʻui laumālie.​—Aisea 14:​4, 15, 16, fakaʻītali ʻamautolu.

Ko e hā kuo fai ai ha fakamatala tuʻu-ki-muʻa pehē ki he haʻa tuʻi Pāpiloné? Kuo pau ke tau fakatokangaʻi naʻe pau ke ui ʻa e tuʻi ʻo Pāpiloné ko e tokotaha ʻoku uló ʻi he toki hili pē ʻene toó, pea ʻi ha founga fakaʻaluma. (Aisea 14:​3, 4) Naʻe hanga ʻe he loto-pōlepole siokitá ʻo ueʻi ʻa e ngaahi tuʻi Pāpiloné ke nau hiki hake kinautolu ʻo māʻolunga ʻi he faʻahinga takatakai ʻiate kinautolú. ʻI he lahi fau ʻa e loto-fieʻeiki ʻa e haʻa tuʻí ʻoku fakamatalaʻi ai ia ʻoku fakamafutofuta: “Teu alu hake ki he lagi, teu fokotuu ke maoluga hake a hoku nofoaga i he gaahi fetuu oe Otua: bea teu nofo i he mouga oe fakatahaaga, i he gaahi botu tokelau: . . . teu tatau mo ia oku maoluga taha be.”​—Aisea 14:​13, 14, PM.

Ko e “gaahi fetuu oe Otua” ʻa e ngaahi tuʻi ʻo e laine fakatuʻi ʻo Tēvitá. (Nomipa 24:17) Meia Tēvita ʻo faai mai, ko e “gaahi fetuu” ko ʻení naʻe pule mei he Moʻunga Saioné. ʻI he hili hono langa ʻe Solomone ʻa e temipale ʻi Selusalemá, naʻe hoko ʻa e hingoa Saioné ʻo ngāueʻaki ki he fuʻu koló fakakātoa. ʻI he malumalu ʻo e fuakava Laó, naʻe pau ki he kakai tangata ʻIsilelí kotoa ke nau fononga ki Saione ʻo tuʻo tolu ʻi he taʻu. Ko ia, naʻe hoko ai ia ko e “mouga oe fakatahaaga.” ʻI hono fakapapauʻi ke fakamoʻulaloaʻi ʻa e ngaahi tuʻi Siutá pea fakamavaheʻi leva mei he moʻunga ko iá, ʻoku talaki ai ʻe Nepukanesa ʻene taumuʻa ke ʻai ia ke ne māʻolunga ʻi he “gaahi fetuu” ko iá. ʻI he ʻikai ke ʻoange kia Sihova ʻa e lāngilangi koeʻuhi ko hono ikunaʻi ʻa e ngaahi tuʻi Siutá, ʻokú ne loto-fieʻeiki ʻo ʻai ʻa ia tonu ʻi he tuʻunga ʻo Sihová. Ko ia ko e hili ko ia hono tulaki hifo ki he kelekelé ʻoku toki lave fakaʻaluma ai ki he haʻa tuʻi Pāpiloné ko e “tokotaha ʻoku uló.”

Ko e loto-pōlepole ʻa e kau pule Pāpiloné naʻe hā moʻoni mei ai ʻa e fakakaukau ʻa e “ʻotua ʻo e tuʻu ko eni”​—ko Sētane ko e Tēvoló. (2 Kolinito 4:4) ʻOkú ne holi vale foki mo ia ki ha mafai pea fakaʻamu ke ʻai ia ke ne māʻolunga ʻia Sihova ko e ʻOtuá. Ka ko e Lusefaá ʻoku ʻikai ko ha hingoa ia ʻoku ʻoange Fakatohitapu kia Sētane.

 • Ko e hā ʻoku lave ai ʻa e 1 Kalonikali 2:​13-15 kia Tēvita ko e foha hono fitu ʻo Sese, lolotonga iá ʻoku fakahaaʻi ʻe he 1 Samiuela 16:​10, 11 ia ko ia naʻe fika valú?

ʻI he hili ʻa e tafoki ʻa Tuʻi Saula ʻo ʻIsileli ʻo e kuonga muʻá mei he lotu moʻoní, naʻe fekau ʻe Sihova ʻa e palōfita ko Sāmiuelá ke ne pani ʻa e taha ʻo e ngaahi foha ʻo Sesé ko e tuʻi. Ko e lēkooti fakamānavaʻi ʻo e meʻa fakahisitōlia ko ʻení, naʻe tohi ʻe Sāmiuela tonu ʻi he senituli hono 11 K.M., ʻo hā ai ʻa Tēvita ko e foha fika valu ʻo Sese. (1 Samiuela 16:​10-13) Kae kehe, ko e fakamatala naʻe hiki ʻe ʻĒsela ko e taulaʻeikí ʻi he taʻu nai ʻe 600 ki mui mai ai ʻoku pehē: “Pea tupu ʻia Sese ʻa Eliapi; ko hono ʻuluaki ia, mo Apinatabe ko hono ua, mo Sima ko hono tolu; ko Nataniela ko hono fa, ko Latai hono nima; ko Osemi hono ono, ko Tevita ko hono toko fitu.” (1 Kalonikali 2:​13-15) Ko e hā naʻe hoko ki he taha ʻo e fanga tokoua ʻo Tēvitá, pea ko e hā ʻoku liʻaki ai ʻe ʻĒsela hono hingoá?

ʻOku fakahaaʻi ʻe he ngaahi Konga Tohitapú ko Sesé “naʻe toko valu ʻene fanau tangata.” (1 Samiuela 17:12) Ko e taha ʻo hono ngaahi fohá ʻoku ngalingali naʻe ʻikai te ne moʻui fuoloa feʻunga ke mali mo maʻu fānau. ʻI he ʻikai hano hakó, ʻe ʻikai ai ke ne maʻu ha tofiʻa fakaematakali pea ʻe ʻikai ke kau ʻi he ngaahi lēkooti tohi hohoko ʻo e laine ʻo Sesé.

Tau fakakaukau ange he taimí ni ki he ʻaho ʻo ʻĒselá. Fakakaukau atu ki he tuʻunga naʻá ne faʻu ai ʻa e ongo tohi Kalonikalí. Naʻe ngata ʻa e fakaheeʻi ʻi Pāpiloné ʻi he taʻu ʻe 77 nai ki muʻa ia, pea naʻe toe nofoʻi ʻe he kau Siú honau fonuá. Naʻe fakamafaiʻi ʻe he tuʻi ʻo Pēsiá ʻa ʻĒsela ke ne fakanofo ha kau fakamaau mo ha kau faiako ʻo e Lao ʻa e ʻOtuá pea ke teuteuʻi ʻa e fale ʻo Sihová. Naʻe ʻi ai ha fiemaʻu ki ha ngaahi lisi tohi hohoko totonu ke fakapapauʻi ʻa e ngaahi tofiʻa fakamatakalí pea ke fakapapauʻi ko e kakai fakamafaiʻi pē ʻe ngāue ʻi he tuʻunga taulaʻeikí. Ko ia naʻe teuteu ʻe ʻĒsela ha fakamatala kakato ʻo e hisitōlia ʻo e puleʻangá, ʻo kau ai ha lēkooti tonu mo falalaʻanga ʻo e laine ʻo Siuta mo Tēvitá. Ko e hingoa ʻo e foha ʻo Sese naʻe mate taʻefanaú ʻe ʻikai kau ia ai. Ko ia ai, naʻe liʻaki ʻe ʻĒsela ia hono hingoá.