“Oku ia Jihova ae Fakamoui”

ʻI HE ngaahi taimi ʻo e tauhaʻa fakafonuá mo e taʻemanonga fakavahaʻapuleʻangá, ʻoku hanga ʻa e kakaí ki honau puleʻangá ki ha maluʻi mo ha maluʻanga. Kuo fokotuʻu ʻe he ngaahi puleʻangá ʻi heʻenau tafaʻakí ʻa e ngaahi polokalama kuo faʻufaʻu ke pouaki ʻa e tokoni ki he kakaí. Ko e lahi ange ʻo hono pouaki ʻo e ongoʻi mamahiʻi-fonuá ʻe he ngaahi polokalama peheé, ko e fakalotomāfana mo e hoko ʻo lahi ange ia ʻa e ngaahi ouau ʻo e ngaahi tōʻonga mamahiʻi-fonuá.

ʻI he lolotonga ʻo ha hoko ʻa ha meʻa fakafokifā fakafonua, ʻoku faʻa ʻoange ai ʻe he mamahiʻi-fonua tōtuʻá ha ongoʻi ʻo e fāʻūtaha mo e mālohi ki he kakaí, pea ʻoku pouaki nai ai ha laumālie ʻo e ngāue fakataha mo e fetokoniʻaki ʻi honau lotolotongá. Kae kehe, ko e “mamahiʻi-fonuá ʻoku lava ke fakatuʻutāmaki tatau pē mo ha faʻahinga ongo,” ko e lau ia ʻa ha kupu ʻi he The New York Times Magazine, koeʻuhi “ʻi hono fakaʻatā atu pē iá, ʻoku malava ke fakahāhā ia ʻi he ngaahi founga palakū.” Ko hono ngaahi fakahāhaaʻi iá ʻe hoko nai ai ia ko ha tōʻonga ʻa ia ʻe lava ke hala loto ʻapi ʻi he ngaahi tauʻatāina ʻa e fonuá mo e tauʻatāina fakalotu ʻa e kakai totonu ʻe niʻihi ʻo e fonuá. ʻOku tautefito ki he kau Kalisitiane moʻoní ʻa ʻenau hoko ʻo tofanga ʻi he tenge ke fakangaloku ʻenau ngaahi tuí. ʻOku fēfē ʻenau tōʻongafaí ʻi he taimi ʻoku hanga ai ʻe ha ʻatimosifia pehē ʻo lōmekina ʻa e māmani takatakai ʻiate kinautolú? Ko e hā ʻa e ngaahi tefitoʻi moʻoni Fakatohitapu ʻoku tokoni kiate kinautolu ke nau ngāueʻaki ai ʻa e mahinó pea ke tauhi maʻu ʻa e anga-tonu ki he ʻOtuá?

“Oua Naa Ke Bunou Hifo Koe Kiate Kinautolu”

ʻI he taimi ʻe niʻihi, ʻoku hoko ai ʻa e salute ki ha fuka fakafonuá ko ha fakahāhā manakoa ia ʻo e ngaahi ongoʻi mamahiʻi-fonuá. Ka ʻoku faʻa fakahāhā ʻi he ngaahi fuká ʻa e ngaahi fakatātā ʻo e ngaahi meʻa ʻi he langí, ʻo hangē ko e ngaahi fetuʻú, pea pehē ki he ngaahi meʻa ʻi he māmaní. Naʻe fakahāhaaʻi ʻe he ʻOtuá ʻene vakai ki he punou hifo ki he ngaahi meʻa peheé ʻi heʻene fekau ki hono kakaí: “Oua naa ke gaohi kiate koe ha fakatātā, be ha mea fakatatau e taha i ha mea i he lagi i oluga, be ha mea oku i he fonua i lalo ni, be ki ha mea oku i he vai i he lalo fonua: Oua naa ke bunou hifo koe kiate kinautolu, be tauhi ki ai: he ko au Jihova ko ho Otua koe Otua fuaa [“ʻokú ne kounaʻi ʻa e anga-līʻoa maʻataʻatā,” NW] au.”​—Ekisoto 20:​4, 5, PM.

ʻOku fepaki moʻoni ʻa e salute pe tūʻulutui hifo ʻi he ʻao ʻo ha fuka ʻokú ne fakafofongaʻi ʻa e Puleʻangá pea mo hono ʻoatu ʻa e anga-līʻoa maʻataʻataá kia Sihova ko e ʻOtuá? Naʻe maʻu moʻoni ʻe he kau ʻIsileli ʻo e kuonga muʻá ha ngaahi “fakailoga,” pe ngaahi fakatātā, ʻa ia naʻe fakatahataha takatakai ki ai honau ngaahi vāhenga ʻe tolu fakamatakalí he lolotonga ʻa e ʻi he toafá. (Nomipa 2:​1, 2, PM) ʻI he fakamatala ki he ngaahi foʻi lea faka-Hepelū ʻoku ʻuhinga ki he ngaahi fakatātā peheé, ʻoku pehē ʻe he Cyclopedia ʻa McClintock mo Strong: “Kae kehe, naʻe ʻikai ha taha ʻo kinautolu te ne fakahaaʻi ʻa e foʻi fakakaukau ʻa ia ʻoku hoko ai ʻa e ‘fakatātaá’ ʻo ne fakahoko mai ki heʻetau fakakaukaú, ʻo pehē ko ha fuka.” ʻIkai ngata aí, ko e ngaahi fakatātā ʻa e kau ʻIsilelí naʻe ʻikai vakai ia ki ai ʻoku toputapu, pea naʻe ʻikai ha ngaahi ouau ia ʻe fekauʻaki mo honau ngāueʻakí. Naʻa nau fakahoko pē ʻa e taumuʻa ʻaonga ʻo e ngaahi fakaʻilongá, ko hono fakahaaʻi ki he kakaí ʻa e feituʻu ke fakatahataha ki aí.

Ko e ngaahi fakafofonga ʻo e ngaahi selupimi ʻi he tāpanekalé pea ʻi he temipale ʻo Solomoné naʻe hoko tefito ia ko hano fakamatalaʻi ʻo e ngaahi selupimi fakahēvaní. (Ekisoto 25:18; 26:​1, 31, 33; 1 Tuʻi 6:​23, 28, 29; Hepelu 9:​23, 24) ʻOku hā mahino naʻe ʻikai fiemaʻu ke fai ha lotu ki he ngaahi fakafofonga ko ʻení mei he moʻoniʻi meʻa ko ia ko e  kakaí fakalūkufua naʻe ʻikai ʻaupito te nau sio kiate kinautolu pea ko e kau ʻāngeló tonu ʻoku ʻikai fiemaʻu ke fai ha lotu ki ai.—Kolose 2:18; Fakahā 19:10; 22:​8, 9.

Toe fakakaukau atu ki he fakatātā ʻo ha ngata palasa ʻa ia naʻe ngaohi ʻe he palōfita ko Mōsesé he lolotonga ʻa e ʻāunofo ʻa e kau ʻIsilelí ʻi he toafá. Ko e fakatātā, pe ʻīmisi ko iá, naʻe hoko ko ha fakaʻilonga pea naʻe ʻi ai hono ʻuhinga fakaekikite. (Nomipa 21:​4-9; Sione 3:​14, 15) Naʻe ʻikai ke ʻotuaʻaki pe ngāueʻaki ia ki he lotú. Kae kehe, ʻi he laui senituli hili ʻa e ʻaho ʻo Mōsesé, naʻe kamata taʻetotonu ai ʻa e kau ʻIsilelí ke lotu ki he ʻīmisi tofu pē ko iá, naʻa mo e tutu ʻinisēnisi ki aí. Ko ia, naʻe hanga ʻe he tuʻi Siuta ko Hesekaiá ʻo laiki momomomo iiki ia.—2 Tuʻi 18:​1-4.

Ko e ngaahi fuka fakafonuá ko ha ngaahi fakaʻilonga pē ʻoku nau fakahoko ha ngāue ʻaonga? Ko e hā ʻoku nau fakatātāʻí? “Ko e fakaʻilonga tefito ʻo e tui mo e meʻa tefito ʻoku fai ki ai ʻa e lotu ʻa e mateakiʻi-fonuá ko e fuká,” ko e lau ia ʻa e faʻu-tohi ko J. Paul Williams. ʻOku pehē ʻe he The Encyclopedia Americana: “Ko e fuká, hangē ko e kolosí, ʻoku toputapu.” Ko e fuká ko e fakaʻilonga ia ʻo e Puleʻangá. Ko ia ai, ko e punou hifo ki aí pe salute ki aí ko ha ouau fakalotu ia ʻokú ne ʻave ʻa e fakalāngilangí ki he Puleʻangá. Ko ha tōʻonga pehē ʻoku taku ai ʻa e fakamoʻuí ia ki he Puleʻangá pea ʻoku ʻikai fehoanaki ia mo e meʻa ʻoku leaʻaki ʻe he Tohitapú ʻo fekauʻaki mo e tauhi ʻaitolí.

ʻOku fakahā mahino ʻe he ngaahi Konga Tohitapú: “Oku ia Jihova ae fakamoui.” (Sāme 3:​8, PM) Ko e fakamoʻuí heʻikai ke taku ia ki he ngaahi kautaha fakaetangatá pe ki heʻenau ngaahi fakaʻilongá. Naʻe enginaki ʻa e ʻapositolo ko Paulá ki he kaungā Kalisitiané: “Siʻoku ʻofaʻanga, mou hola mei he tauhi-aitoli.” (1 Kolinito 10:14) Naʻe ʻikai ke kau ʻa e muʻaki kau Kalisitiané ia ʻi he ngaahi tōʻonga ʻo e lotu ʻa e Puleʻangá. ʻI he tohi ko e Those About to Die, ʻoku pehē ai ʻe Daniel P. Mannix: “Naʻe fakafisi ʻa e kau Kalisitiané ke . . . feilaulau ki he tuʻunga poto ʻo e ʻemipola [Lomá]​—ʻoku meimei tatau ia mo e fakafisi he ʻahó ni ke salute ki he fuká.” ʻOku pehē pē mo e kau Kalisitiane moʻoni ʻi he ʻaho ní. Ke ʻoatu kia Sihova ʻa e anga-līʻoa maʻataʻataá, ʻoku nau fakaʻehiʻehi mei he salute ki he fuka ʻa ha faʻahinga puleʻanga pē. ʻI he fai peheé, ʻoku nau fakamuʻomuʻa ai ʻa e ʻOtuá lolotonga hono tauhi maʻu ʻa e fakaʻapaʻapa ki he ngaahi puleʻangá mo ʻenau kau pulé. Ko e moʻoni, ʻoku nau lāuʻilo ki honau fatongia ke hoko ʻo moʻulaloa ki he “ngaahi mafai māʻolunga ange” fakapuleʻangá. (Loma 13:​1-7, NW) Neongo ia, ko e hā ʻa e vakai Fakatohitapu ki he hiva ʻi he ngaahi hiva mamahiʻi-fonuá, hangē ko e ngaahi fasi fakafonuá?

Ko e Hā ʻa e Ngaahi Fasi Fakafonuá?

“Ko e ngaahi fasi fakafonuá ko e ngaahi fakahāhaaʻi ia ʻo e ongoʻi mamahiʻi-fonuá pea ʻoku faʻa fakakau ai ha kole ki ha tataki mo ha maluʻi fakaʻotua ʻo e kakaí pe ko honau kau pulé,” ko e lau ia ʻa e The Encyclopedia Americana. Ko hono moʻoní, ko e fasi fakafonuá, ko ha himi pe ko ha foʻi lotu ia maʻa ha fonua. ʻOku kole maʻu pē ai ke maʻu ʻe he puleʻangá ha lakalakaimonū fakamatelie pea mo tolonga ʻo tuʻuloa. ʻOku totonu ki he kau Kalisitiane moʻoní ke nau kau ʻi ha ngaahi lea fakaelotu pehē?

Naʻe moʻui ʻa e palōfita ko Selemaiá he lotolotonga ʻo e kakai naʻa nau taukaveʻi ʻoku nau tauhi ʻa e ʻOtuá. Kae kehe, naʻe tuʻutuʻuni ʻe Sihova kiate ia: “Oua naa ke lotua ae kakai ni, bea oua naa o hake ha tagi, be hufia akinautolu, bea oua naa fai ha kole kiate au; koeuhi e ikai teu ogoʻi koe.” (Selemaia 7:​16, PM; Selemaia 11:14; 14:11) Ko e hā naʻe fai ai ʻa e tuʻutuʻuni ko ʻení kia Selemaiá? Koeʻuhi naʻe fonu honau sōsaietí ʻi he kaihaʻá, fakapoó, ko e tonó, fuakava loí, mo e tauhi ʻaitolí.​—Selemaia 7:9.

Naʻe fokotuʻu ʻe Sīsū Kalaisi ha sīpinga ʻi heʻene pehē: “Oku ikai teu lotua a mamani, ka ko kinautolu kuo ke foaki kiate au.” (Sione 17:​9, PM) ʻOku pehē ʻe he ngaahi Konga Tohitapú ko “hono kotoa ʻo mamani ʻoku ʻi he nima ʻo e Fili” pea “ʻoku fakaʻaʻau ke mole.” (1 Sione 2:17; 5:19) ʻE lava fēfē leva ki he kau Kalisitiane moʻoní ke nau lotu tōnunga ke lakalakaimonū mo tuʻuloa ha fokotuʻutuʻu pehē?

Ko e moʻoni, ʻoku ʻikai kau ʻi he ngaahi fasi fakafonua kotoa pē ha ngaahi kole ki he ʻOtuá. “ʻOku kehekehe ʻa e ngaahi lea ʻo e ngaahi fasi fakafonuá,” ko e lau ia ʻa e Encyclopædia Britannica, “mei he ngaahi lotu maʻá e tuʻí ki he ngaahi lave ki he ngaahi faitau fakafonua mahuʻinga pe ngaahi angatuʻu . . . ki he ngaahi fakahaaʻi ʻo e ongoʻi mamahiʻi-fonua.” Ka ʻe lava ʻa e faʻahinga ko ia ʻoku nau feinga ke fakahōifuaʻi ʻa e ʻOtuá ke nau fiefia moʻoni ʻi he ngaahi tau mo e ngaahi angatuʻu ʻa ha puleʻanga? ʻI he fekauʻaki mo e kau lotu moʻoní, naʻe tomuʻa tala ʻe ʻAisea: “Te nau tuki huo ʻaki  ʻenau ngaahi heleta, mo e ngaahi hele ʻauhani ʻaki honau ngaahi tao.” (Aisea 2:4) “Neongo ʻoku mau fou ʻi he kakano,” ko e tohi ia ʻa e ʻapositolo ko Paulá, “talaʻehai ʻoku fakaekakano ʻemau fai tau. He ko e mahafu ʻo e tau ʻoku mau fai ʻoku ʻikai ko e koto kakano.”​—2 Kolinito 10:​3, 4.

Ko e ngaahi fasi fakafonuá ʻoku faʻa fakahaaʻi ai ʻa e ngaahi ongoʻi ʻo e loto-mahikihiki pe māʻolunga ange fakafonua. ʻOku ʻikai ha makatuʻunga Fakatohitapu ʻo e anga ʻo e vakai ko ʻení. ʻI heʻene lea ʻi he ʻAleopeikó, naʻe pehē ʻe he ʻapositolo ko Paulá: “Nae gaohi [ʻe Sihova ko e ʻOtuá] i he toto be taha ae gaahi kakai kotoabe ke nofo i he fuga o mamani kotoabe.” (Ngāue 17:​26, PM) “ʻOku ʻikai filifilimanako ʻa e ʻOtua,” ko e lea ia ʻa e ʻapositolo ko Pitá, “ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.”​—Ngāue 10:​34, 35.

Koeʻuhi ko ʻenau mahinoʻi ʻa e Tohitapú, ʻoku fai ai ʻe he tokolahi ha fili fakafoʻituitui ke fakaʻehiʻehi mei he kau ʻi he salute ki he fuká pea ʻi he hiva ʻi he ngaahi hiva mamahiʻi-fonuá. Ka ko e hā ʻoku nau faí ʻi heʻenau fetaulaki mo e ngaahi tuʻunga ʻoku hoko ʻo nau fehangahangai ai mo e ongo ʻīsiu ko ʻení?

Fakaʻehiʻehi Anga-Fakaʻapaʻapa

ʻI ha feinga ke fakafefekaʻi ʻa e fāʻūtaha ʻo hono ʻemipaeá, naʻe fokotuʻu ai ʻe Tuʻi Nepukanesa ʻo Pāpilone motuʻá ha fuʻu ʻīmisi koula lahi fakaʻulia ʻi he tokalelei ʻo Tulá. Naʻá ne fokotuʻutuʻu leva ha kātoanga fakanofo ʻa ia naʻá ne fakaafeʻi ki ai ʻene kau pule fakavahefonuá, kau matāpulé, kau kōvaná, kau faleʻí, mo e kau ʻōfisa māʻolunga kehe. ʻI he ongo mai ʻa e fasí, naʻe pau leva ke punou ʻa e faʻahinga kotoa naʻe fakatahatahá ʻo lotu ki he ʻīmisí. Naʻe ʻi he lotolotonga ʻo e faʻahinga ko ia naʻe pau ke ʻi aí ʻa e kau talavou Hepelū ʻe toko tolu​—ko Setaleki, Mēsake, mo ʻApitenikō. Naʻe anga-fēfē ʻenau fakahaaʻi heʻikai te nau kau ʻi he ouau fakalotu ko ʻení? ʻI he kamata ʻa e fasí pea fakatōmapeʻe atu ki he ʻao ʻo e ʻīmisí ʻa e faʻahinga naʻe fakatahataha ki aí, naʻe tuʻu pē ʻa e kau Hepelū ia ʻe toko tolú.​—Taniela 3:​1-12.

ʻI he ʻahó ni, ʻoku faʻa fai ʻa e salute ki he ngaahi fuká ʻaki hono hiki ʻo mafao hangatonu ʻa e nimá ki muʻa pe ʻaki hono tuku ʻa e nimá ki he foʻi laʻé pe māʻolunga hake ʻi he mafú. ʻI he taimi ʻe niʻihi, ʻoku ʻai nai ha faʻahinga tuʻu fakaesino makehe. ʻI he ngaahi fonua ʻe niʻihi, ko e fānau ʻi he ʻapiakó ʻoku ʻamanekina te nau tūʻulutui ʻo ʻuma ki he fuká. ʻI he tuʻu fakalongolongo pē lolotonga ia ʻoku  salute ʻa e niʻihi kehé ia ki he fuká, ʻoku ʻai ai ʻe he kau Kalisitiane moʻoní ke hā mahino ko e kau mamata anga-fakaʻapaʻapa pē kinautolu.

Fēfē kapau ʻoku fai ʻa e ouau ia ki he fuká ʻi ha faʻahinga founga ko ʻete tuʻu pē ki ʻolungá ʻoku fakamoʻoniʻi ai ʻete kau ki aí? Ko e fakatātaá, tau pehē ko e tokotaha ako ʻe taha ʻi ha ʻapiako ʻoku fili ke ne fakafofongaʻi ʻa e ʻapiakó fakakātoa pea ʻokú ne salute ki he fuká ʻi tuʻa ʻi ha tuʻunga fuka lolotonga iá ʻoku ʻamanekina ʻa e fānau ako kehé ke nau tuʻu hake ʻo tuʻu maʻu ʻi loto ʻi he loki akó. Ko e foʻi tuʻu hake ʻi he taimi ko ʻení ʻoku fakahaaʻi ai ʻa e loto-tatau mo e ngāue ʻa e tokotaha ako ko ia ʻi tuʻá ʻi hono tuʻunga ko ha fakafofonga fakafoʻituitui ʻi he salute ki he fuká. Ko e tuʻu haké ʻiate ia pē te ne fakahaaʻi ʻa e kau ʻi he ouaú. Kapau ko e meʻá ia, ko e faʻahinga ko ia ʻoku nau loto ke hoko ko e kau mamata anga-fakaʻapaʻapa peé te nau tangutu fakalongolongo pē. Fēfē kapau kuo ʻosi tuʻu pē ʻa e kalasí ia ʻi he kamata ʻa ha ouau pehē? ʻI he tuʻunga ko ʻení, ʻe ʻikai ke hā ia ʻokú te kau ki ai kapau te tau kei tuʻu ai pē.

Pehē pē ʻoku ʻikai tala mai ia kiate kita ke te salute ki he fuká ka ke toʻo pē ia, ʻi ha fakatē pe ʻi ha loki ako pe ko ha feituʻu kehe, koeʻuhi ke lava ʻo salute ki ai ʻa e niʻihi kehé. ʻI he ʻikai ke ‘hola mei he tauhi ʻaitolí,’ hangē ko ia ʻoku tuʻutuʻuni mai ʻi he ngaahi Konga Tohitapú, ʻe ʻuhinga moʻoni ʻeni ia ʻokú te ʻi he uhouhonga tonu ʻo e ouaú. ʻOku tatau pē ʻeni ia mo e laka ʻi he ngaahi fakatē mamahiʻi-fonuá. Koeʻuhi ko hono fai ʻení ʻe ʻuhinga ia ko hono poupouʻi ʻa e meʻa ʻoku fakalāngilangiʻi ʻe he fakateé, ʻoku fakafisi fakakonisēnisi mei ai ʻa e kau Kalisitiane moʻoní.

ʻI he taimi ʻoku fai ai ʻa e ngaahi fasi fakafonuá, ʻoku faʻa hoko ko e meʻa pē ʻoku fiemaʻu ke fai ʻe he tokotahá ke fakahāhā ʻokú ne kau ki he ngaahi lea ʻo e hivá ko e tuʻu ki ʻolunga. ʻI he ngaahi tuʻunga peheé, ʻe tangutu pē ʻa e kau Kalisitiané ia. Kae kehe, kapau ne nau ʻosi tuʻu pē kinautolu ʻi hono fai mai ʻa e fasi fakafonuá, ʻoku ʻikai fiemaʻu ia ke nau toe fai ʻa e foʻi ngāue makehe ko e tangutu hifo ki lalo. ʻOku ʻikai hangē ia ai ne nau fili makehe ke tuʻu ki ʻolunga koeʻuhi ko e fasi fakafonuá. ʻI he tafaʻaki ʻe tahá, kapau ʻoku ʻi ai ha foʻi kulupu ʻoku ʻamanekina te nau tuʻu hake ʻo hiva, ko e tuʻu hake pē ʻi he anga-fakaʻapaʻapá kae ʻikai ke hivá ʻe ʻikai ʻuhinga ia ʻokú te kau ʻi he ngaahi lea ʻo e hivá.

 “Maʻu ha Konisēnisi Lelei”

ʻI he hili hono fakamatalaʻi ʻa e ʻikai ha ʻaonga ʻo e ngaahi meʻa faʻu ʻe he tangatá ʻo fakalāngilangiʻí, naʻe pehē ʻe he tokotaha-tohi-sāmé: “ʻOku tatau mo ia ʻakinautolu naʻe fai honau ngaohi; ʻa ia fua pe ʻoku falala ki ai.” (Sāme 115:​4-8) Ko ia, ʻoku hā mahino, ko ha ngāue pē ʻoku fekauʻaki fakahangatonu mo hono faʻu ha ngaahi meʻa ke lotu ki ai, ʻo kau ai ʻa e ngaahi fuka fakafonuá, ʻe ʻikai ala tali ia ki he kau lotu ʻa Sihová. (1 Sione 5:21) ʻOku toe malanga hake nai ʻa e ngaahi tuʻunga fakaengāue kehe ʻi he taimi ʻoku fakahāhā anga-fakaʻapaʻapa ai ʻe he kau Kalisitiané ʻoku ʻikai te nau lotu ki he fuká pe ko e meʻa ʻokú ne fakafofongaʻí ka kia Sihova pē.

Ko e fakatātaá, ʻe kole nai ha pule ngāue ki ha tokotaha ngāue ke ne fusi pe tuku hifo ha fuka ʻoku fakaʻaliʻali ʻi ha langa. Pe ʻe fai ia ʻe ha taha pe ʻikai ʻoku fakatuʻunga ia ʻi heʻene vakai fakafoʻituitui ki he ngaahi tuʻungá. Kapau ko hono fusi pe tuku hifo ʻo e fuká ko ha konga ʻo ha ouau makehe, ʻo tuʻu maʻu ki ai ʻa e kakaí pe salute ki he fuká, ʻoku iku leva ʻa hono fakahoko ia ʻo e foʻi ngāué ni ʻo kau ai ʻi he ouaú.

ʻI he tafaʻaki ʻe tahá, kapau ʻoku ʻikai kaunga ʻa hono fusi pe tuku hifo ia ʻo e fuká ki ha ouau, ʻoku ʻikai leva ha toe meʻa ʻe ʻuhinga ki ai ʻa e ongo foʻi ngāué ni ka ko hono fakahoko pē ʻa e ngaahi fatongia hangē ko hono teuteu ʻa e langá ki hono ngāueʻakí, fakaava mo hono lokaʻi ʻo e ʻū matapaá, pea mo hono fakaava mo tāpuni ʻa e ngaahi matapā-sioʻatá. ʻI he ngaahi tuʻunga peheé, ʻoku hoko ai ʻa e fuká ia ko ha fakaʻilonga pē ia ʻo e Puleʻangá, pea ko hono fusi pe tuku hifo iá ʻi he lotolotonga ʻo e ngaahi ngafa tuʻumaʻu kehé ko ha fili fakafoʻituitui ia ʻo makatuʻunga ʻi he angi ʻa hoto konisēnisi kuo akoʻi ʻe he Tohitapú. (Kaletia 6:5) ʻOku ueʻi nai ʻe ha konisēnisi ʻo ha taha ʻa ia tonu ke ne kole ki hono pulé ke ʻai ha tokotaha ngāue kehe ke ne fusi mo tuku hifo ʻa e fuká. ʻE ongoʻi nai ʻe ha Kalisitiane ia ʻe taha ʻe fakaʻatā ia ʻe hono konisēnisí ke ne ngāue ki he fuká ʻi he ʻikai kau ai ha ouaú. Ko e hā pē ʻa e filí, ʻoku totonu ki he kau lotu moʻoní ke nau “maʻu ha konisēnisi lelei” ʻi he ʻao ʻo e ʻOtuá.​—1 Pita 3:​16, NW.

ʻOku ʻikai ha fakafepaki Fakatohitapu ia ki ha ngāue pe hoko ʻo ʻi ha ngaahi langa fakapuleʻanga, hangē ko e ngaahi ʻōfisi fakavahefonuá mo e ngaahi akoʻanga, ʻa ia ʻoku fakaʻaliʻali ai ʻa e fuká. ʻOku toe hā nai ʻa e fuká ʻi he ngaahi sitapá, ngaahi peleti-fika meʻalelé, pe ngaahi meʻa kehe ʻoku faʻu ʻe he puleʻangá. Ko hono ngāueʻaki ʻa e ngaahi meʻa peheé ʻoku ʻikai hoko ia ʻo kau ai ʻa e faʻahinga tāutahá ʻi he ngaahi tōʻonga fakalotú. Ko e meʻa ʻoku mahuʻinga hení, ʻoku ʻikai ko e ʻi ai ʻa e fuká pe ko ha tatau ʻo iá, ka ko e anga ʻo e tōʻongafai ki ai ʻa ha taha.

ʻOku faʻa fakaʻaliʻali ʻa e ngaahi fuka ʻi he ngaahi matapā-sioʻatá, ngaahi matapaá, ngaahi kaá, ngaahi tesí, pe ngaahi meʻa kehe. ʻOku lava foki ke fakatau mai ʻa e vala ʻoku hā ai ha fakatātā ʻo ha fuka. ʻI he ngaahi fonua ʻe niʻihi, ʻoku taʻefakalao ke tui ʻa e ngaahi meʻa peheé. Neongo kapau ko hono tui iá ʻe ʻikai maumauʻi ai ʻa e laó, ko e hā te ne fakahaaʻi fekauʻaki mo ha tuʻunga ʻo ha tokotaha ʻi he fekauʻaki mo e māmaní? ʻI he fekauʻaki mo hono kau muimuí, naʻe pehē ʻe Sīsū Kalaisi: “ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:16) ʻOua naʻa tukunoaʻi ʻa e ola ʻo ha tōʻonga pehē ki he kaungātuí. ʻE lava ke lavea ai ʻa e konisēnisi ʻo ha niʻihi? ʻE vaivai nai ai ʻenau fakapapau ke tuʻu maʻu ʻi he tuí? Naʻe akonaki ʻa Paula ki he kau Kalisitiané: “Ke mou lava ai ʻo fakapapauʻi ʻa e ngaahi meʻa mahuʻinga angé, koeʻuhi ke mou hoko nai ʻo taʻemele pea ʻikai fakatūkiaʻi ʻa e niʻihi kehé.”​—Filipai 1:​10, NW.

“Anga-Fakaalaala ki he Faʻahinga Kotoa”

ʻI he faai hifo ʻa e ngaahi tuʻunga ʻo e māmaní ʻi he “ngaahi taimi faingataʻa” ko ʻení, ʻoku hangē ʻoku tupulaki ʻa e ngaahi ongoʻi mamahiʻi-fonuá. (2 Timote 3:1) ʻOfa ke ʻoua ʻaupito naʻa ngalo ʻi he faʻahinga ko ia ʻoku nau ʻofa ʻi he ʻOtuá ko e fakamoʻuí ʻoku ʻia Sihova pē taha. ʻOku taau mo ia ʻa e anga-līʻoa maʻataʻataá. ʻI hono tala ange ke nau fai ʻa e meʻa naʻe ʻikai ke fehoanaki mo e finangalo ʻo Sihová, naʻe tali ʻe he kau ʻapositolo ʻa Sīsuú: “ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Ngāue 5:29.

“Ko ha tamaioʻeiki ʻa e ʻEikí ʻoku ʻikai fiemaʻu ke ne fuhu,” ko e tohi ia ʻa e ʻapositolo ko Paulá, “ka ʻoku fiemaʻu ke ne anga-fakaalaala ki he faʻahinga kotoa.” (2 Timote 2:​24, NW) Ko ia ai, ʻoku feinga ʻa e kau Kalisitiané ke hoko ʻo fakamelino, anga-fakaʻapaʻapa, pea anga-fakaalaala ʻi heʻenau falala ki honau konisēnisi kuo akoʻi ʻe he Tohitapú ʻi hono fai ha ngaahi fili fakafoʻituitui fekauʻaki mo e salute ki he fuká pea mo e hiva ʻi ha fasi fakafonuá.

[Fakatātā ʻi he peesi 23]

ʻI he tuʻumaʻu kae anga-fakaʻapaʻapá, naʻe fili ai ʻa e kau Hepelū ʻe toko tolú ke fakahōifuaʻi ʻa e ʻOtuá

[Fakatātā ʻi he peesi 24]

ʻOku totonu ke fēfē ʻa e tōʻongafai ʻa ha Kalisitiane ʻi he lolotonga ʻo ha ouau mamahiʻi-fonua?