ʻOua ʻe Foʻi ʻi he Fakatahataha Fakatahá

“ʻOua naʻa tau foʻi ʻi he fakatahataha fakatahá, ʻo hangē ko ia ʻoku angaʻaki ʻe he niʻihi hono faí,” ko e lau ia ʻa e ngaahi Konga Tohitapú, “ka ke tau fefakalototoʻaʻaki—pea toe ʻāsili angé ko hoʻomou sio ki he fakaofiofi mai ʻa e ʻAhó.” (Hepelu 10:​25, New International Version) ʻOku hā mahino, ʻoku fakafatongiaʻi ʻa e kau lotu moʻoní ke nau fakatahataha ki ha feituʻu faiʻanga lotu ke ‘fefakaʻaiʻaiʻaki ai ʻa kinautolu ki he feʻofaʻaki mo e ngaue lelei.’—Hepelu 10:24.

ʻI HE taimi naʻe tohi ai ʻe he ʻapositolo ko Paulá ʻa e ngaahi lea ko eni naʻe lave ki aí ʻi he ʻuluaki senituli ʻo Hotau Kuongá, naʻe hoko ai ha temipale fakaueʻiloto ʻi Selusalema ko ha feituʻu faiʻanga lotu ki he kau Siú. Naʻe ʻi ai foki mo e ngaahi sinakoke. Ko Sīsū naʻe “[fai]ako . . . ʻi ha falelotu [“sinakoke,” NW], kaeʻumaʻā ʻi he Temipale, ʻa e potu [naʻe] fakataha ki ai ʻa haʻa Siū kotoa.”—Sione 18:20.

Ko e hā ʻa e faʻahinga feituʻu faiʻanga lotu naʻe fakakaukau ki ai ʻa Paulá ʻi heʻene enginaki ki he kau Kalisitiané ke nau fakatahataha ke fefakalototoʻaʻakí? Naʻe ʻi ai ha fokotuʻutuʻu ki muʻa ʻo e ngaahi fuʻu fale molumalu ʻo e Puleʻanga-Haʻa-Kalisitiané ʻi he fokotuʻutuʻu fakaetemipale ʻi Selusalemá? Ko fē ʻa e taimi naʻe ʻuluaki ngāueʻaki ai ʻa e ngaahi fuʻu fale fakalotu kāfakafá ki he faʻahinga naʻe taku ko e kau Kalisitiané?

‘Ko ha Fale ki he Huafa ʻo e ʻOtuá’

Ko e ʻuluaki ngaahi fakahinohino fekauʻaki mo ha feituʻu faiʻanga lotu ki he ʻOtuá ʻoku maʻu ia ʻi he tohi Tohitapu ʻa Ekisotó. Naʻe fakahinohino ʻe Sihova ko e  ʻOtuá ki heʻene kakai filí—ʻa e kau ʻIsilelí—ke langa ʻa e “Tapanekale,” pe ko e “Teniti Feʻiloakiʻanga.” Ko e puha ʻo e fuakavá mo e ngaahi naunau toputapu kehekehé naʻe pau ke tauhi ia ʻi ai. “Naʻe faʻofale ʻa e Sikaina ʻo e ʻEiki ʻi he Tapanekale” ʻi heʻene ʻosí ʻi he 1512 K.M. Ko e tēniti naʻe lava ke hiki holo ko iá naʻe hoko ia ko ha tafaʻaki tefito ʻo e fokotuʻutuʻu ʻa e ʻOtuá ki he fakaofiofi kiate iá ʻo laka hake ʻi he senituli ʻe fā. (Ekisoto, vahe 25-​27; Ekisoto 40:​33-​38) ʻOku toe lave ʻa e Tohitapú ki he tēniti ko ení ko e “Temipale ʻo Sihova” pea mo e “fale ʻo Sihova.”—1 Samiuela 1:​9, 24.

Ki mui ai, ʻi he taimi naʻe tuʻi ai ʻa Tēvita ʻi Selusalemá, naʻá ne fakahaaʻi ha holi mālohi ke langa ha fale tuʻumaʻu ki he lāngilangi ʻo Sihová. Kae kehe, koeʻuhi ko Tēvitá ko ha tangata tau ia, naʻe tala ange ʻe Sihova kiate ia: “ʻE ʻikai te ke langa ʻe koe ha fale ki hoku hingoa.” ʻI hono kehé, naʻá Ne fili ʻa e foha ʻo Tēvita ko Solomoné ke ne langa ʻa e temipalé. (1 Kalonikali 22:​6-10) Naʻe fokotuʻu ʻe Solomone ʻa e temipalé ʻi he 1026 K.M., hili ha vahaʻa taimi langa naʻe ʻosi ʻi he taʻu ʻe fitu mo e konga. Naʻe hōifua ʻa Sihova ki he langa ko ení, ʻi heʻene pehē: “Kuo u tapui ʻa e fale na kuo ke langa, ke ʻai ki ai hoku hingoa ʻo taʻengata: pea ʻe ʻi ai hoku mata mo hoku loto maʻu ai pe.” (1 Tuʻi 9:3) ʻI he faitōnunga ai pē ʻa e kau ʻIsilelí, ʻe fakahanga ʻe Sihova ʻa ʻene hōifuá ki he fale ko iá. Kae kehe, ʻo kapau te nau afe mei he meʻa naʻe tonú, ʻe toʻo ʻe Sihova ʻa ʻene hōifuá mei he feituʻu ko iá, pea ‘ko e falé tonu ʻe hoko ko e fokotuʻunga maumau.’​—1 Tuʻi 9:​4-9, NW; 2 Kalonikali 7:​16, 19, 20.

Naʻe afe moʻoni ʻi ha taimi ʻa e kau ʻIsilelí mei he lotu moʻoní. (2 Tuʻi 21:​1-5) “Ko ia [ko Sihova] naʻa ne ʻomi kiate kinautolu ʻa e tuʻi ʻo e Kau Kalitia, ʻa ia naʻa ne . . . tutu ʻa e fale ʻo Elohimi, pea nau laiki ʻa e ʻa ʻo Selusalema, ʻo nau fakamomofi hono ngaahi palasi, ʻo maumau hono ngaahi naunau mahuʻinga. Pea ko kinautolu kuo hao mei he heleta naʻa ne taki popula ki Papilone, pea nau nofo hopoate kiate ia mo ʻene fanau.” Fakatatau ki he Tohitapú, naʻe hoko eni ʻi he 607 K.M.—2 Kalonikali 36:​15-21; Selemaia 52:​12-14.

Hangē ko ia ne tomuʻa tala ʻe he palōfita ko ʻAiseá, naʻe hiki hake ʻe he ʻOtuá ʻa Tuʻi Kōlesi ʻo Pēsiá ke ne fakatauʻatāinaʻi ʻa e kau Siú mei he mālohi ʻo Pāpiloné. (Aisea 45:1) Hili ha fakaheeʻi taʻu ʻe 70, naʻa nau toe foki ki Selusalema ʻi he 537 K.M. ki he taumuʻa ko hono toe langa ʻa e temipalé. (Esela 1:​1-6; 2:​1, 2; Selemaia 29:10) Hili ʻa e ngaahi toloi ʻi hono langá, naʻe iku ai ʻo ʻosi ʻa e temipalé ʻi he 515 K.M., pea naʻe toe fakafoki mai ai ʻa e lotu maʻa ki he ʻOtuá. Neongo naʻe ʻikai ke lāngilangiʻia ia ʻo hangē ko ia ʻi he temipale ʻo Solomoné, naʻe tuʻu ʻa e falé ʻi he meimei taʻu ʻe 600. Kae kehe, ko e temipalé ni naʻe toe hoko ia ʻo ʻikai monomono koeʻuhi ko e liʻaki ʻe he kau ʻIsilelí ʻa e lotu kia Sihová. ʻI he hā ʻa Sīsū Kalaisi ʻi he feituʻu fakaemāmaní, naʻe hoko ai ʻa e temipalé ʻo toe langa fakaleleiʻi ʻe Tuʻi Hēlota. Ko e hā naʻe pau ke hoko ki he temipale ko ení?

‘Ikai ha Maka Kuo Fokotuu ki ha Maka’

ʻI he lave ki he temipale ʻi Selusalemá, naʻe tala ʻe Sīsū ki heʻene kau ākongá: “E ikai i heni ha maka kuo fokotuu ki ha maka, e tae laku ki lalo.” (Mātiu 24:​1, 2, PM) ʻI he hoko ʻa e ngaahi lea ko iá, ko e feituʻu naʻe ʻiloa ʻi he laui senituli ko e senitā ʻo e lotu ki he ʻOtuá naʻe fakaʻauha ia ʻi he 70 T.S. ʻe he kau tau Loma naʻa nau haʻu ke lōmia ʻa e angatuʻu ʻa e kau Siú. a Ko e temipale ko iá naʻe ʻikai ʻaupito ke toe langa. ʻI he senituli hono fitú, naʻe langa ai ʻa e feituʻu toputapu Mosilemi ʻoku ʻiloa ko e Fale ʻo e Maká, pea ʻoku tuʻu ia ʻo aʻu mai ki he ʻahó ni ʻi he tuʻuʻanga ʻo e feituʻu faiʻanga lotu faka-Siu ki muʻá.

Ko e hā naʻe pau ke hoko ko e fokotuʻutuʻu ia  ʻo e lotú ki he kau muimui ʻo Sīsuú? ʻE hokohoko atu ʻa e muʻaki kau Kalisitiane naʻa nau haʻu mei ha ʻātakai faka-Siú ke lotu ki he ʻOtuá ʻi he temipale naʻe vave ke fakaʻauhá? Ko fē ʻe lotu ai ʻa e kau Kalisitiane ʻikai ko e Siú ki he ʻOtuá? Ko e ngaahi fuʻu fale fakalotu ʻo e Puleʻanga-Haʻa-Kalisitiané naʻe pau ke hoko ko ha fetongi ʻo e temipalé? Ko e fetalanoaʻaki ʻa Sīsū mo ha fefine Samēliá ʻoku ʻomai ai kia kitautolu ʻa e fakamaama ki he meʻá ni.

ʻI he laui senituli, naʻe lotu ai ʻa e kau Samēliá ki he ʻOtuá ʻi ha fuʻu temipale lahi ʻi Moʻunga Kelisimi ʻi Samēlia. “Ko ʻemau ngaahi kui naʻa nau fai ʻenau lotu ʻi he moʻunga ni,” ko e lea ia ʻa e fefine Samēliá kia Sīsuú, “ka ko kimoutolu ʻoku mou pehē, ko Selusalema pe ʻa e potu ʻoku totonu ke fai ai ʻa e lotu.” ʻI he tali ki aí naʻe pehē ʻe Sīsū: “ʻE fefine, tui mai kiate au, ʻoku ʻunu mai ha taimi, ʻa ia ʻe ʻikai te mou fai ʻi he moʻunga ni, pe ʻi Selusalema, hoʻomou lotu ki he Tamai.” ʻE ʻikai kei fiemaʻu ha temipale fakamatelie ʻi he lotu kia Sihová, he naʻe fakamatalaʻi ʻe Sīsū: “Ko e ʻOtua ko e laumālie: pea ko kinautolu ʻe hū kiate ia, kuo pau ke nau fai ʻi laumālie pea fai ʻi moʻoni ʻenau hu.” (Sione 4:​20, 21, 24) Naʻe tala ki mui ʻe he ʻapositolo ko Paulá ki he kau ʻAtenisí: “Ko e ʻOtua naʻa ne ngaohi ʻa e univēsi, mo e meʻa kehekehe ʻoku ʻi ai, ko e toko taha ia ko e ʻEiki ʻo e langi mo māmani; ko ia ʻoku ʻikai te ne ʻafio ʻi ha ngaahi temipale kuo ngaohi ʻe he nima.”—Ngāue 17:24.

ʻOku hā mahino, ko e ngaahi fuʻu fale fakalotu ʻo e Puleʻanga-Haʻa-Kalisitiané ʻoku ʻikai ke nau fekauʻaki mo e fokotuʻutuʻu fakaetemipale ʻo e Kuonga ki muʻa ʻi he Kalisitiané. Pea ko e kau Kalisitiane ʻi he ʻuluaki senitulí naʻe ʻikai ha ʻuhinga ke nau langa ai ha ngaahi feituʻu pehē. Kae kehe, hili e mate ʻa e kau ʻapositoló, ko e afe naʻe tomuʻa tala mei he ngaahi akonaki moʻoní—ʻa e tafoki mei he moʻoní—naʻe hoko ia. (Ngāue 20:​29, 30) ʻI ha ngaahi taʻu ki muʻa ʻi he taku naʻe tafoki ʻa ʻEmipola Konisitanitaine ʻo Lomá ki he lotu faka-Kalisitiané ʻi he 313 T.S., naʻe kamata ke afe ai ʻa e faʻahinga naʻe taku ko e kau Kalisitiané mei he meʻa naʻe akoʻi ʻe Sīsuú.

Naʻe tokoni ʻa Konisitanitaine ki hono fio ʻa e “lotu faka-Kalisitiané” mo e lotu pangani faka-Lomá. ʻOku pehē ʻe he Encyclopædia Britannica: “Naʻe fekauʻi ʻe Konisitanitaine tonu ʻa hono langa ʻo e ngaahi fuʻu pasilika Kalisitiane kāfakafa ʻe tolu ʻi Loma: Ko e Sā. Pita, S. Paolo Fuori le Mura, mo e S. Giovanni ʻi Laterano. Naʻá ne . . .  faʻu ʻa e palani fuo kolosi naʻe hoko ko e tuʻunga ia ki he ngaahi fale lotu ʻi ʻIulope hihifo ʻi he kotoa ʻo e Kuonga Lotolotó.” Ko e Pasilika ʻo Sā. Pita naʻe toe langa ʻi Lomá ʻoku kei vakai ki ai ko e senitā ia ʻo e Siasi Katolika Lomá.

“Naʻe ohi ʻe he Siasí ʻa e ngaahi tōʻonga fakalotu ʻe niʻihi mo e ngaahi founga lotu naʻe ʻiloa ʻi he ki muʻa ʻi he Kalisitiane [pangani] Lomá,” ko e lau ia ʻa e faihisitōlia ko Will Durant. Naʻe kau ki heni ʻa e “palani ʻo e pasiliká.” Mei he senituli hono 10 ki he 15, naʻe ʻi ai ha tupulaki ʻi hono langa ʻa e ngaahi fale lotú mo e ngaahi fale lotu lalahí, fakataha mo e fakamamafa lahi ki hono palaní. Ko e taimi ia naʻe hoko mai ai ʻa e ngaahi fuʻu fale molumalu ʻo e Puleʻanga-Haʻa-Kalisitiané ʻa ia ʻoku vakai ki ai he taimí ni ko e ngaahi fuʻu fale fakaeʻaati fakamanatú.

ʻOku maʻu maʻu pē ʻe he kakaí ʻa e fakaivifoʻou fakalaumālie mo e fakalototoʻa mei he lotu ʻi ha fale lotú? “Kiate au, naʻe hoko ʻa e fale lotú ʻo fakafofongaʻi ʻa e meʻa kotoa ʻoku fakapipiko mo fakahela ʻi he lotú,” ko e lau ia ʻa Francisco mei Pelēsila. “Ko e Misá ko ha ouau taʻeʻuhinga mo toutou fai ia naʻe ʻikai te ne fai ha meʻa ke fakatōliʻa ʻa ʻeku ngaahi fiemaʻu moʻoní. Ko ha meʻa fakafiefia ʻa e taimi naʻe ʻosi aí.” Neongo ia, ko e kau tui moʻoní ʻoku fekauʻi ke nau fakatahataha fakataha. Ko e hā ʻa e fokotuʻutuʻu ki he ngaahi fakatahá ʻoku totonu ke nau muimui ki aí?

 “Jiasi Oku i Ho Na Fale”

Ko e Sīpinga ki he founga faka-Kalisitiane ʻo e fakatahataha fakatahá ko e tupu ia mei hano sivisiviʻi ʻa e founga ʻo e fakataha ʻa e kau tui ʻi he ʻuluaki senitulí. ʻOku fakahaaʻi ʻe he ngaahi Konga Tohitapú naʻa nau faʻa fakatahataha fakataha ʻi he ngaahi ʻapi tāutaha. Ko e fakatātaá, naʻe tohi ʻa e ʻapositolo ko Paulá: “Tala eku ofa kia Bisila mo Akuila, ko eku kauga gaue ia Kalaisi Jisu:  . . . tala atu eku ofa ki he jiasi [“fakatahaʻanga,” NW] oku i ho na fale.” (Loma 16:​3, 5, PM; Kolose 4:15; Filimone 2) Ko e foʻi lea faka-Kalisi ki he “fakatahaʻangá” (ek·kle·siʹa) ʻoku fakalea ia ko e “siasi” ʻi he ongo liliu faka-Tongá. Ka ko e foʻi leá ʻoku ʻuhinga ia ki ha kulupu ʻo e kakai ʻoku nau fakatahataha fakataha ki ha taumuʻa maheni, ʻo ʻikai ki ha fale. (Ngāue 8:1; 13:1) Ko e lotu ʻoku fai ʻe he kau Kalisitiane moʻoní ʻoku ʻikai fiemaʻu ai ha ngaahi fale fakalotu teuteuʻi tōtuʻa.

Naʻe anga-fēfē hono fai ʻa e ngaahi fakatahá ʻi he muʻaki ngaahi fakatahaʻanga Kalisitiané? ʻOku ngāueʻaki ʻe he ākonga ko Sēmisí ha faʻunga ʻo e foʻi lea faka-Kalisi ko e sy·na·go·geʹ ko e ʻuhingá ki ha fakataha faka-Kalisitiane. (Semisi 2:​2, NW, fakamatala ʻi laló) Ko e foʻi lea faka-Kalisi ko ení ʻoku ʻuhingá “ko hano fakatahatahaʻi” pea ʻoku ngāueʻaki ia ʻo lava ke fefetongiʻaki mo e ek·kle·siʹa. Neongo ia, ʻi he faai mai ʻa e taimí, ko e foʻi lea “sinakoké” naʻe ʻuhinga ia ko e feituʻu pe fale naʻe fai ai ha fakatahataha. Ko e ʻuluaki kau Kalisitiane Siú naʻa nau alāanga mo e meʻa naʻe fai ʻi ha sinakoké. b

Lolotonga naʻe fakataha ʻa e kau Siú ʻi he temipale ʻi Selusalemá ki heʻenau ngaahi kātoanga fakataʻú, naʻe hoko ai ʻa e ngaahi sinakoké ko e ngaahi feituʻu fakalotofonua ki he ako fekauʻaki mo Sihová mo hono maʻu ha ako ki he Laó. Ko e ngaahi meʻa naʻe fai ʻi he ngaahi sinakoké ʻoku hā naʻe kau ki ai ʻa e lotu mo hono lau ʻa e ngaahi Konga Tohitapú, pea pehē ki he lāulea ʻi he ngaahi Konga Tohitapú, pea mo e enginaki. ʻI he taimi naʻe ʻalu ai ʻa Paula mo e niʻihi kehe naʻe ʻiate iá ki ha sinakoke ʻi ʻAniteoké, “naʻe fekau mai ʻa e kau pule ʻo e [sinakoké] ke fakaha kiate kinaua, Siʻi ongo matapule, kapau ʻoku ai haʻamo tokoni ke fai ki he kakai, pea mo lea mai.” (Ngāue 13:15) ʻI he taimi naʻe fakatahataha fakataha ai ʻa e ʻuluaki kau Kalisitiane Siú ʻi he ngaahi ʻapi tāutahá, ʻoku ʻikai ha veiveiua naʻa nau muimui ʻi ha sīpinga tatau, ʻi hono ʻai ʻenau ngaahi fakatahá ke fakamaama Fakatohitapu mo fakatupu langa hake fakalaumālie.

 Ngaahi Fakatahaʻanga ki he Langa Hake

ʻI he hangē ko e muʻaki kau Kalisitiané, ʻoku fakatahataha mai ʻa e Kau Fakamoʻoni ʻa Sihova ʻi he ʻaho ní ki ha ngaahi feituʻu faiʻanga lotu feʻunga ke maʻu ai ʻa e fakahinohino ʻi he Tohitapú pea ke maʻu ai ha feohi lelei. ʻI ha ngaahi taʻu lahi naʻa nau fakataha ai ʻi he ngaahi ʻapi tāutaha pē pea ʻoku nau kei fai ia ʻi he ngaahi feituʻu ʻe niʻihi. Ka ʻi he taimi ní ko e lahi ʻo e ngaahi fakatahaʻangá kuo tupulaki ia ʻo laka hake ʻi he 90,000, pea ko honau ngaahi faiʻanga fakataha tefitó ʻoku ui ia ko e ngaahi Fale Fakatahaʻanga. Ko e ngaahi falé ni ʻoku ʻikai ke fakahāhā pe hangē ha fale lotú honau fōtungá. Ko e ngaahi fale ʻikai fakahāhā mo feʻunga ia ʻoku malava ai ʻa e ngaahi fakatahaʻanga ʻo e kakai ʻe toko 100 ki he 200 ke fakatahataha ki he ngaahi fakataha fakauiké koeʻuhi ke fanongo ai pea ke ako mei he Folofola ʻa e ʻOtuá.

Ko e lahi taha ʻo e ngaahi fakatahaʻanga ʻa e Kau Fakamoʻoni ʻa Sihová ʻoku nau fakataha tuʻo tolu he uike. Ko e fakataha ʻe taha ko ha malanga ia maʻá e kakaí ʻi ha kaveinga mahuʻinga lolotonga. ʻOku hoko atu ai ha ako makatuʻunga ʻi ha kaveinga pe kikite faka-Tohitapu, ʻo ngāueʻaki ʻa e makasini Taua Leʻo ko ha maʻuʻanga fakamatala tefito. Ko e fakataha ʻe taha ko ha ako ia ʻoku faʻufaʻu ke tokonaki mai ai ʻa e akoʻi ki hono fakahoko ʻa e pōpoaki faka-Tohitapú. ʻOku hoko atu ai ha fakataha ʻoku līʻoa tautefito ki hono fai ha ngaahi fokotuʻu ʻaonga ki he ngāue fakafaifekau faka-Kalisitiané. Tuʻo taha he uike, ʻoku toe fakatahataha ai ʻa e Kau Fakamoʻoní ki ha ako Tohitapu ʻi he ngaahi kulupu iiki ʻi he ngaahi ʻapi tāutaha. Ko e ngaahi fakatahá ni kotoa ʻoku ʻatā ia ki he kakaí. ʻOku ʻikai ʻaupito ke fai ai ha tānaki paʻanga.

Ko Francisco, naʻe lave ki ai ki muʻá, naʻá ne ʻiloʻi ʻoku ʻaonga lahi ʻa e ngaahi fakataha ʻi he Fale Fakatahaʻangá. ʻOkú ne pehē: “Ko e ʻuluaki feituʻu faiʻanga fakataha naʻá ku ʻaʻahi ki aí ko ha fale fakafiemālie ia ʻi ha feituʻu loto kolo, pea naʻá ku mavahe mei he holó mo ha fakaueʻiloto lelei. Ko e faʻahinga naʻa nau maʻu iá naʻa nau anga-fakakaumeʻa, pea naʻe lava ke u ongoʻi ʻa e ʻofa ʻi honau lotolotongá. Naʻá ku vēkeveke ke toe foki ki ai. Ko hono moʻoní, kuo ʻikai te u liʻaki ha fakataha talu mei ai. Ko e ngaahi fakataha faka-Kalisitiane ko ení ʻoku longomoʻui, pea ʻoku nau fakatōliʻa ʻeku fiemaʻu fakalaumālié. Naʻa mo e taimi ʻoku ou ongoʻi loto-siʻi ai ʻi ha ʻuhingá, ʻoku ou ʻalu ki he Fale Fakatahaʻangá, ʻi he tuipau te u foki ki ʻapi kuó u loto-toʻa.”

Ko e ako faka-Tohitapú, feohi fakatupu langa haké, mo e faingamālie ke fakahīkihikiʻi ʻa e ʻOtuá ʻoku toe tatali mai ia kiate koe ʻi he ngaahi fakataha faka-Kalisitiane ʻa e Kau Fakamoʻoni ʻa Sihová. ʻOku mau fakaafeʻi loto-māfana atu koe ke ke haʻu ki he Fale Fakatahaʻanga ofi taha ki ho ʻapí. Te ke fiefia ʻi hoʻo fai iá.

[Fakamatala ʻi lalo]

[Fakatātā ʻi he peesi 4, 5]

Ko e tāpanekalé pea ki mui ai ko e ngaahi temipale naʻe hoko ko e ngaahi senitā lelei ʻo e lotu ʻa Sihová

[Fakatātā ʻi he peesi 6]

Pasilika ʻo Sā. Pitá ʻi Loma

[Fakatātā ʻi he peesi 7]

Ko e muʻaki kau Kalisitiané naʻa nau fakatahataha fakataha ʻi he ngaahi ʻapi tāutaha

[Fakatātā ʻi he peesi 8, 9]

ʻOku fai ʻe he Kau Fakamoʻoni ʻa Sihová ʻa e ngaahi fakataha faka-Kalisitiané ʻi he ngaahi ʻapi tāutaha pea ʻi he ngaahi Fale Fakatahaʻanga