Ako Fakafoʻituitui ʻOkú Ne Teuʻi Kitautolu ko e Kau Faiako

“Fakalaulauloto ki he gaahi mea ni; ke ke moua koe ki ai; koeuhi ke ha mai hoo fakaaau ki muʻa i he mea kotoabe. Ke ke vakai kiate koe, bea ki he akonaki.”—1 TIMOTE 4:​15, 16, PM.

1. Ko e hā ʻoku moʻoni fekauʻaki mo e taimí mo e ako fakafoʻituituí?

 “KO E meʻa kotoa ʻoku ai hano taimi,” ko e lau ia ʻa e Tohitapú ʻi he Koheleti 3:1. ʻOku mātuʻaki moʻoni eni fekauʻaki mo e ako fakafoʻituituí. ʻOku ʻilo ʻe he tokolahi ʻoku faingataʻa ke fakalaulauloto ki he ngaahi meʻa fakalaumālié kapau ko e taimi hala ia pe ko e feituʻu hala. Ko e fakatātaá, hili ha ʻaho ngāue lahi mo ha kai efiafi lahi, te ke ongoʻi fie ako, tautefito kapau ʻokú ke taʻutu ʻi ho sea falala ʻokú ke manako aí ʻi muʻa ʻi he TV? Mahalo ʻikai. Ko ia, ko e hā ʻa e fakaleleiʻangá? ʻOku hā mahino, kuo pau ke tau fili ʻa e taimi mo e feituʻu ke ako ai fakataha mo ha vakai atu ke maʻu ʻa e ʻaonga lahi taha mei heʻetau ngaahi feingá.

2. Ko e hā ʻa e taimi ʻoku faʻa lelei taha ki he ako fakafoʻituituí?

² ʻOku ʻilo ʻe he tokolahi ko ʻenau taimi lelei taha ki he akó ko e ʻuluaki meʻa ia ʻi he pongipongí ʻi he taimi ʻoku nau meimei faʻa ʻāʻā lelei taha aí. ʻOku ngāueʻaki ʻe he niʻihi ha mālōlō hoʻatā ki ha kiʻi houa ako nounou. Fakatokangaʻi ʻa e lave ki he taimí fekauʻaki mo e ngaahi ngāue fakalaumālie  mahuʻinga ʻi he ongo faʻifaʻitakiʻanga hoko haké. Naʻe tohi ʻe Tuʻi Tēvita ʻo ʻIsileli ʻo e kuonga muʻá: “Tuku ke fanongo ki hoʻo ʻofa kei pongipongi; he ʻoku tuʻu ʻeku falala kiate koe: tuku ke u ʻilo ʻa e hala te u fou ai; he ko koe kuo u hapai ki ai hoku laumalie.” (Sāme 143:8) Ko e palōfita ko ʻAiseá naʻá ne fakahā ʻa e houngaʻia meimei tatau ʻi heʻene pehē: “Ko Atonai Sihova kuo ne ʻomi kiate au ʻa e ʻelelo ʻo e tama ako, ke u ʻilo ʻa e ngaahi lea ke tokoniʻaki ʻa e ongosia: ʻoku ne fafangu au ʻi he pongipongi kotoa pe, ʻoku ne ueʻi hoku telinga ke fanongo hange ha tama ako.” Ko e poiní ia ʻoku fiemaʻu ke tau ako pea fetuʻutaki mo Sihova, ʻi he taimi ʻoku tau ʻāʻā fakaeʻatamai aí, ko fē pē ha taimi ʻo e ʻahó.​—Aisea 50:​4, 5; Sāme 5:3; 88:13.

3. Ko e hā ʻa e ngaahi tuʻunga ʻoku fiemaʻu ki he ako ola leleí?

³ Ko e moʻoniʻi meʻa ʻe taha ki he ako ola leleí ʻoku totonu ke ʻoua te tau fili ke taʻutu ʻi he sea pe sofa fakafiemālie tahá. ʻOku ʻikai ko e founga eni ia ke nofo ʻāʻā aí. ʻI he taimi ʻoku tau ako aí, kuo pau ke ueʻi hotau ʻatamaí, pea ko e fuʻu hulu ʻa e fiemālie fakaesinó ʻe hangē te ne fai ʻe ia ʻa e meʻa ʻoku fehangahangaí. ʻOku toe fiemaʻu ki he akó mo e fakalaulaulotó ha kiʻi lōngonoa mo e ʻatā mei he ngaahi fakahohaʻá. Ko e feinga ke ako fakataha mo e letioó, TV, pe ko e feʻauhi ʻa e fānaú ki hoʻo tokangá ʻe ʻikai te ne ʻomi ʻe ia ʻa e ngaahi ola ʻoku lelei tahá. ʻI he taimi naʻe fie fakalaulauloto ai ʻa Sīsuú, naʻá ne ʻalu ki ha feituʻu lōngonoa. Naʻá ne toe lea foki fekauʻaki mo e mahuʻinga ʻo hono kumi ha feituʻu fakaekita ki he lotú.​—Mātiu 6:6; 14:13; Maake 6:​30-32.

Ako Fakafoʻituitui ʻOkú Ne Teuʻi Kitautolu ke Fai ha Tali

4, 5. ʻI he ngaahi founga fē ʻoku hoko ai ʻa e polosiua Fiemaʻu ko ha tokoni ʻaonga?

⁴ Ko e ako fakafoʻituituí ʻoku fakafiemālie ia ʻi he taimi ʻoku tau ngāueʻaki ai ʻa e ngaahi maʻuʻanga tokoni faka-Tohitapu kehekehe koeʻuhí ke tau keli loloto ange ai ki ha kaveinga, tautefito ʻi he taimi ʻoku tau fai pehē ai ke tali ha ngaahi fehuʻi loto-moʻoni ʻa ha taha. (1 Timote 1:4; 2 Timote 2:23) Ke kamataʻaki, ko e faʻahinga foʻou tokolahi ʻoku nau ako ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú?, a ʻa ia ʻoku ala maʻu ia ʻi he taimí ni ʻi he lea ʻe 261. Ko e kiʻi tohi ia ʻoku faingofua kae fakahangatonu ʻa ia ʻoku makatuʻunga fakaʻaufuli ʻi he Tohitapú. ʻOkú ne tokoniʻi ʻa hono kau lautohí ke nau mahinoʻi vave ko e hā ʻa e ngaahi fiemaʻu ʻa e ʻOtuá ki he lotu moʻoní. Kae kehe, ko hono faʻungá ʻoku ʻikai ke ne fakaʻatā ai  ha faingamālie ki ha ako fakaikiiki ʻo e kaveinga taki taha. Kapau ʻoku langaʻi hake ʻe hoʻo ako Tohitapú ha ngaahi fehuʻi fakamātoato fekauʻaki mo ha ngaahi kaveinga pau faka-Tohitapu ʻoku lolotonga fai ha lāulea ki ai, ʻe anga-fēfē haʻo maʻu ha fakamatala Tohitapu lahi ange ʻe tokoniʻi ai ia ke tali ʻa e ngaahi fehuʻi ko iá?

⁵ Ki he faʻahinga ko ia ʻoku nau maʻu ʻa e Watchtower Library ʻi he sītī ʻi heʻenau leá, ʻoku faingofua ke maʻu ha maʻuʻanga fakamatala lahi ʻi ha komipiuta. Kae fēfē ʻa e kakai ko ia ʻoku ʻikai ke nau maʻu ʻa e nāunau ko ení? Tau vakaiʻi angé ʻa e ongo tuʻunga-lea ʻe ua ʻoku lāulea ki ai ʻi he polosiua Fiemaʻu koeʻuhi ke tau sio pe ʻe lava fēfē ke tau fakalahi ʻetau mahinó pea malava ke fai ha tali ʻo toe fakaikiiki ange​—tautefito kapau ʻoku langaʻi hake ʻe ha taha ʻa e ongo fehuʻi hangē ko e, Ko hai ʻa e ʻOtuá, pea ko e tokotaha mātuʻaki fēfē ʻa Sīsū?​—Ekisoto 5:2; Luke 9:​18-20; 1 Pita 3:15.

Ko Hai ʻa e ʻOtuá?

6, 7. (a) Ko e hā ʻa e fehuʻi ʻoku malanga hake fekauʻaki mo e ʻOtuá? (e) Ko e hā ʻa e foʻi toʻo fehālaaki lahi naʻe fai ʻe he faifekau ʻe taha ʻi haʻane lea?

⁶ Ko e lēsoni 2 ʻi he polosiua Fiemaʻu ʻokú ne tali ʻa e fehuʻi mātuʻaki mahuʻinga, Ko Hai ʻa e ʻOtuá? Ko e poini tefito eni koeʻuhí heʻikai lava ke lotu ha taha ki he ʻOtua moʻoní kapau ʻoku ʻikai ke ne ʻiloʻi Ia pe veiveiua nai fekauʻaki mo ʻEne ʻi aí. (Loma 1:​19, 20; Hepelu 11:6) Neongo ia, ko e kakai ʻi he māmaní ʻoku nau piki ki he ngaahi foʻi fakakaukau ʻe laui teau pe ko hai ʻa e ʻOtuá. (1 Kolinito 8:​4-6) Ko e filōsofia fakalotu kotoa pē ʻokú ne maʻu ha tali ʻoku kehe ki he fehuʻi fekauʻaki mo e ʻiloʻiʻanga ʻo e ʻOtuá. ʻI he Puleʻanga-Haʻa-Kalisitiané ko e tokolahi taha ʻo e ngaahi lotú ʻoku nau vakai ki he ʻOtuá ko ha Tolu-Tahaʻi-ʻOtua. Naʻe fai ʻe ha faifekau U.S. tuʻu-ki-muʻa ʻe taha ha lea naʻe fakakaveinga “ʻOkú Ke ʻIloʻi ʻa e ʻOtuá?” ka naʻe halaʻatā haʻane lave tuʻo taha ʻi heʻene leá ki he huafa fakaʻotuá, neongo naʻá ne toʻo fakamatala tuʻo lahi mei he Ngaahi Konga Tohitapu Faka-Hepeluú. Ko e moʻoni, naʻá ne lau mei he liliu Tohitapu naʻe ngāueʻaki ai ʻa e “ʻEikí” ʻa ia ʻoku fakaʻaloʻalongaua mo taʻehingoa kae tuku ʻa e Sihová pe Iaueé.

⁷ He poini mātuʻaki mahuʻinga ia naʻe ʻikai ke ʻohake ʻe he faifekau ko iá ʻi he taimi naʻá ne lave ai ki he Selemaia 31:​33, 34: “‘ʻE ʻikai akoʻi ʻe he tangata kotoa pē ki hono kaungāʻapi, pea ki he tangata kotoa pē ki hono tokoua, ʻo pehē, “ʻIlo ʻa e ʻEikí” [faka-Hepelū “ʻIlo ʻa Sihova”], he te nau ʻilo kotoa pē Au, mei he siʻi taha ʻo kinautolu ki he lahi taha ʻo kinautolu,’ ko e lea ia ʻa e ʻEikí [faka-Hepelū, Sihova].” Ko e liliu naʻá ne ngāueʻakí naʻe toʻo ai ʻa e huafa laulōtaha fakaʻotuá ia, ʻa e Sihová.​—Sāme 103:​1, 2.

8. Ko e hā ʻokú ne fakatātaaʻi ʻa e mahuʻinga ʻo hono ngāueʻaki ʻa e huafa ʻo e ʻOtuá?

⁸ ʻOku fakatātaaʻi ʻe he Sāme 8:9 ʻa e ʻuhinga ʻoku mātuʻaki mahuʻinga ai hono ngāueʻaki ʻa e huafa Sihová: “ʻE Sihova, ko homau ʻEiki, hono ʻikai fungani ho huafa ʻi mamani!” Fakahoa ia mo e: “ʻE ʻEIKI, ko homau ʻEiki, he lelei lahi moʻoni ko ho huafá ʻi he māmaní kotoa!” (King James Version; toe sio ki he The New American Bible, The Holy Bible​—New International Version, Tanakh​—The Holy Scriptures) Kae kehe, hangē ko ia naʻe lave ki ai ʻi he kupu ki muʻá, ʻe lava ke tau maʻu ʻa e “ʻiloʻi ʻo e ʻOtua” kapau te tau fakaʻatā ʻene Folofolá ke ne fakamaama kitautolu. Ka ko fē ʻa e maʻuʻanga tokoni ako Tohitapu te ne mateuteu ke tali ʻetau ngaahi fehuʻi fekauʻaki mo e mahuʻinga ʻo e huafa fakaʻotuá?​—Palovepi 2:​1-6.

9. (a) Ko fē ʻa e tohi ʻe lava ke ne tokoniʻi kitautolu ke fakamatalaʻi ʻa e mahuʻinga ʻo hono ngāueʻaki ʻa e huafa fakaʻotuá? (e) Kuo anga-fēfē ʻa e taʻemalava ʻa e kau liliu-lea tokolahi ke fakahā ʻa e ʻapasia ki he huafa ʻo e ʻOtuá?

⁹ ʻE lava ke tau hanga ki he polosiua The Divine Name That Will Endure Forever, ʻa ia kuo ʻosi liliu ia ki he lea ʻe 69. b Ko e konga ʻoku fakakaveinga ko e “God’s Name—Its Meaning and Pronunciation” (peesi 6-11) ʻoku fakahā māʻalaʻala ai ko e Tetakalamatoni Hepeluú (mei he faka-Kalisí, ʻoku ʻuhingá ko e “mataʻitohi ʻe fā”) ʻoku hā meimei tuʻo 7,000 ʻi he ngaahi konga tohi Hepelū motuʻá. Neongo ia, ko e haʻa faifekaú mo e kau liliu-lea ʻo e lotu faka-Siú mo e Puleʻanga-Haʻa-Kalisitiané kuo nau toʻo fakakaukauʻi pē ia mei he lahi taha ʻo ʻenau ngaahi liliu Tohitapú. c ʻE lava fēfē ke nau taku ʻoku nau ʻiloʻi ʻa e ʻOtuá pea maʻu ha vahaʻangatae fakahōifua mo ia kapau ʻoku nau fakafisi ke ʻiloʻi ia ʻaki hono huafá? Ko hono huafa moʻoní  ʻokú ne fakaava ʻa e hala ki he mahinoʻi ko e hā ʻene ngaahi taumuʻá pea ko hai ia. ʻIkai ko ia pē, ko e hā hono ʻaonga ʻo e konga ʻo e sīpinga lotu ʻa Sīsuú “ko ʻemau Tamai ʻoku ʻi Hevani, ke tapuhā ho Huafa” kapau ʻoku ʻikai pē ke ngāueʻaki ʻa e huafa ia ʻo e ʻOtuá?​—Mātiu 6:9; Sione 5:​43; 17:6.

Ko Hai ʻa Sīsū Kalaisi?

10. ʻI he ngaahi founga fē ʻe lava ke tau maʻu ai ha ʻata kakato ʻo e moʻui mo e ngāue fakafaifekau ʻa Sīsuú?

¹⁰ Ko e lēsoni 3 ʻo e polosiua Fiemaʻu ʻoku fakakaveinga ia “Ko Hai ʻa Sīsū Kalaisi?” ʻI he palakalafi pē ʻe ono, ʻokú ne ʻomai ai ha fakamatala nounou ʻaupito ʻo Sīsū, ko hono tupuʻangá, pea mo ʻene taumuʻa ki heʻene haʻu ki māmaní. Kae kehe, kapau ʻokú ke fiemaʻu ha fakamatala kakato ʻo ʻene moʻuí, ʻoku ʻikai toe laka ha fakamatala​—tuku kehe ʻa e ngaahi fakamatala tonu ʻa e Kōsipelí​—ʻi he Ko e Moʻungaʻi Tangata Lahi Taha Kuo Moʻui Maí, ʻa ia ʻoku ala maʻu ia ʻi he lea ʻe 111.* Ko e tohi ko ení ʻokú ne ʻomai ha fakamatala hokohoko totonu ʻo e taimi mo e moʻui ʻa Kalaisí mo ʻene ngaahi akonakí, ʻo makatuʻunga ʻi he faaʻi Kōsipelí. Ko hono ngaahi vahe ʻe 133 ʻokú ne kāpui ʻa e ngaahi meʻa naʻe hoko ʻi he moʻui mo e ngāue fakafaifekau ʻa Sīsuú. Ki ha vakai mei ha tafaʻaki kehe mo fakakongokonga, ʻe lava ke ke sio ki he Insight, Voliume 2, ʻi lalo ʻi he kaveinga “Jesus Christ.”

11. (a) Ko e hā ʻokú ne ʻai ʻa e Kau Fakamoʻoni ʻa Sihová ke kehe ʻi heʻenau tui fekauʻaki mo Sīsuú? (e) Ko e hā ʻa e ongo konga Tohitapu ʻokú ne fakahalaʻi mahino ʻa e tokāteline Tolu-Tahaʻi-ʻOtuá, pea ko e hā ʻa e tohi ʻoku tokoni fekauʻaki mo e meʻá ni?

¹¹ ʻI he Puleʻanga-Haʻa-Kalisitiané ko e fekīhiaki fekauʻaki mo Sīsuú ʻoku fakatefito ia pe ko e “ʻAlo ʻo e ʻOtuá” ia pea pehē ki he “ʻOtua ko e ʻAló”​—ʻi hono fakalea ʻe tahá, ko e fakakikihi ʻi he meʻa ʻoku ui ʻe he Catechism of the Catholic Church ko e “tefitoʻi misiteli ʻo e tui faka-Kalisitiané,” ʻa e Tolu-Tahaʻi-ʻOtuá. ʻI he tuʻu mavahe mei he ngaahi lotu ʻo e Puleʻanga-Haʻa-Kalisitiané, ʻoku tui ʻa e Kau Fakamoʻoni ʻa Sihová ko Sīsuú ko e tupu fakaʻotua ka ʻoku ʻikai ko e ʻOtuá ia. Ko ha lāulea mahino ʻi he kaveinga ko ení ʻoku maʻu ia ʻi he polosiua ʻOku Totonu Ke Ke Tui ki he Tolu-Tahaʻi-ʻOtuá?, ʻa ia ʻoku liliu ki he lea ʻe 95. d ʻOku kau ʻi he ngaahi konga Tohitapu lahi ko ia ʻoku ngāueʻaki ke fakahalaʻi ʻa e tokāteline Tolu-Tahaʻi-ʻOtuá ʻa e Maake 13:32 mo e 1 Kolinito 15:​24, 28.

12. Ko e hā ha toe fehuʻi ʻoku tuha mo ʻetau tokangá?

¹² Ko e lāulea ʻi ʻolunga fekauʻaki mo e ʻOtuá mo Sīsū Kalaisí ʻoku hoko ia ʻo ne fakatātaaʻi ʻa e ngaahi founga ʻe lava ke tau fai ai ʻa e ako fakafoʻituituí mo ha vakai atu ke tokoniʻi ʻa e faʻahinga ko ia ʻoku ʻikai taukei mo e moʻoni ʻo e Tohitapú ke nau maʻu ʻa e ʻilo totonú. (Sione 17:3) Fēfē leva, ʻa e faʻahinga kuo nau feohi mo e fakatahaʻanga Kalisitiané ʻi he ngaahi taʻu lahi? ʻI honau puipuituʻa ʻo e ʻilo faka-Tohitapu kuo nau tātānakí, ʻoku kei fiemaʻu ke nau tokanga ki heʻenau ako fakafoʻituitui ʻo e Folofola ʻa Sihová?

Ko e Hā ke “Tokanga” Aí?

13. Ko e hā ʻa e vakai hala ʻe maʻu nai ʻe he faʻahinga ʻe niʻihi fekauʻaki mo e ako fakafoʻituituí?

¹³ Ko e niʻihi kuo nau hoko ko e kau mēmipa ʻo e fakatahaʻangá ʻi he ngaahi taʻu lahi te nau tō nai ki he tōʻonga ʻo e falala pē ki he ʻilo faka-Tohitapu naʻa nau maʻu ʻi honau ʻuluaki ngaahi taʻu ko e Kau Fakamoʻoni ʻa Sihová. ʻOku faingofua ke fakaʻuhinga: “ʻOku ʻikai fiemaʻu ia ke u ako lahi ʻo hangē ko e faʻahinga foʻou angé. He ko ē, vakai ki he ngaahi taimi kuó u toutou lau ai ʻa e Tohitapú mo e ngaahi tohi faka-Tohitapú ʻi he faai mai ʻa e ngaahi taʻú.” ʻOku meimei tatau eni mo e pehē: “ʻOku ʻikai fiemaʻu moʻoni ia kia au ke u tokanga lahi ki heʻeku kaí he taimí ni, he vakai atu ki he ngaahi meʻakai kuó u kai ʻi he kuohilí.” ʻOku tau ʻilo ʻoku fiemaʻu ʻe he sinó ha fafanga tuʻumaʻu mei he meʻakai lelei, kuo teuteu fakalelei, koeʻuhi ke tauhi ia ke moʻui lelei mo longomoʻui. Huanoa ange ʻene moʻoni eni fekauʻaki mo hono tauhi maʻu ʻo ʻetau moʻui lelei mo e mālohi fakalaumālié!​—Hepelu 5:​12-14.

14. Ko e hā ʻoku fiemaʻu ai ke tau tokanga kia kitautolú?

¹⁴ Ko ia ai, ko e kotoa ʻo kitautolú, tatau ai pē pe ko e kau ako Tohitapu fuoloa pe ʻikai, ʻoku fiemaʻu ke tau muimui ki he akonaki ʻa Paula kia Tīmoté, ʻa ia naʻá ne hoko ʻi he taimi ko ení ko ha ʻovasia matuʻotuʻa mo fua fatongia: “Lamalama kiate koe mo e meʻa ʻoku ke akoʻaki: ke ke nofoʻaki fai ʻa e ongo meʻa ko ia; he ʻi hoʻo fai pehe, te ke fakamoʻui koe mo kinautolu foki ʻoku fanongo kiate koe.” (1 Timote 4:​15, 16) Ko e hā ʻoku totonu ai ke tau tokanga ki he faleʻi ʻa Paulá? Manatuʻi, naʻe toe fakamahino mai ʻe Paula ʻoku ʻi ai ʻetau faitau mo e “ngaahi tuʻutuʻuni kākā ʻa e Tevolo” pea mo e “ngaahi kongakau laumalie ʻa e kovi ʻi he ngaahi  feituʻu ʻo langi.” Pea ʻoku fakatokanga mai ʻa e ʻapositolo ko Pitá ko e Tēvoló ʻokú ne “kumi ha taha ke ne matuʻaki folo,” pea ko e “taha” ko iá ʻe lava ke hoko ko ha taha pē ʻo kitautolu. Ko ʻetau fakataʻetaʻehohaʻá ʻe lava ke hoko ko e faʻahinga ava tofu pē ia ʻokú ne kumi ki aí.​—Efeso 6:​11, 12; 1 Pita 5:8.

15. Ko e hā ʻa e maluʻi fakalaumālie ʻoku tau maʻú, pea ʻoku lava fēfē ke tau tokangaʻi ia?

¹⁵ Ko ia, ko e hā ʻa e maluʻi ʻoku tau maʻú? ʻOku fakamanatu mai ʻe he ʻapositolo ko Paulá kia kitautolu: “Toʻo ʻa e mahafukotoa [“teunga tau kakato,” NW] ʻa e ʻOtua, koeʻuhi ke mou lava ke talituʻu ʻi he ʻaho ʻo e fai mai ʻa e kovi; pea kuo lava kotoa pe kae tuʻu pe.” (Efeso 6:13) Ko e ola lelei ʻo e teunga tau fakalaumālie ko iá ʻoku fakatuʻunga ia ʻo ʻikai ngata pē ʻi hono tuʻunga tefitó tonu kae pehē foki ki hono tokangaʻi maʻu pē. Ko e teunga kakato ko ia mei he ʻOtuá, kuo pau leva ke kau ki ai ʻa e ʻilo fakamuimui taha ʻo e Folofola ʻa e ʻOtuá. ʻOku tuhu eni ki he mahuʻinga ʻo e tulituli ke ʻalu tatau maʻu pē ʻetau mahinoʻi ʻa e moʻoní mo ia kuo fakaeʻa ʻe Sihova fakafou ʻi heʻene Folofolá pea fakafou ʻi he kalasi tamaioʻeiki anga-tonu mo potó. Ko e ako tuʻumaʻu ʻo e Tohitapú mo e ngaahi tohi faka-Tohitapú ʻoku mātuʻaki mahuʻinga ia ki hono tokangaʻi hotau teunga tau fakalaumālié.​—Mātiu 24:​45-47; Efeso 6:​14, 15.

16. Ko e hā ʻoku malava ke tau fai ke fakapapauʻi ai ko hotau “pā ko e tui” ʻoku ngāue lelei?

¹⁶ Naʻe fakamamafaʻi ʻe Paula ha konga mahuʻinga ʻo hotau teunga tau maluʻí “ʻa e pā ko e tui,” ʻa ia te tau lava ai ke paleʻi mo tāmateʻi ʻa e ngaahi ngahau vela ʻa Sētane ʻa ia ko e ngaahi tukuakiʻi loi mo e ngaahi akonaki hē mei he moʻoní. (Efeso 6:16) Ko ia ʻoku mahuʻinga ke tau vakaiʻi pe ʻoku mālohi fēfē hotau pā ko e tuí pea ko e hā ʻa e ngaahi sitepu te tau fai ke tokangaʻi mo fakamālohiʻi ai iá. Ko e fakatātaá, te ke ʻeke nai: ‘ʻOku fēfē ʻeku teuteu ki he ako Tohitapu fakauiké fakataha mo hono ngāueʻaki ʻo e Taua Leʻo? Kuó u ako feʻunga ke malava ai ke “fefakaʻaiʻaiʻaki ʻa kitautolu ki he feʻofaʻaki mo e ngaue lelei” ʻaki hono ʻoatu ha ngaahi tali kuo ʻosi fakakaukauʻi lelei lolotonga ʻa e fakatahá? ʻOku tau fakaava ʻa e Tohitapú ʻo lau ʻa e ngaahi konga Tohitapu ʻoku fakahā ka ʻoku ʻikai fakaleá? ʻOku ou fakalototoʻaʻi ʻa e niʻihi kehé ʻaki ʻa ʻeku kau faivelenga ʻi he ngaahi fakatahá?’ Ko ʻetau meʻakai fakalaumālié ʻoku fefeka, pea ko hono fakamolū fakaʻāulilikí ʻoku fiemaʻu ia kia kitautolu ke tau maʻu ʻaonga kakato ai.​—Hepelu 5:14; 10:24.

17. (a) Ko e hā ʻa e huhu kona ʻoku ngāueʻaki ʻe Sētane ke feingaʻi ke fakavaivaiʻi hotau tuʻunga fakalaumālié? (e) Ko e hā ʻa e faitoʻo ki he huhu kona ʻa Sētané?

¹⁷ ʻOku ʻilo ʻe Sētane ʻa e ngaahi vaivaiʻanga ʻo e kakano kuo hingá, pea ko ʻene fāliungá ʻoku olopoto. Ko e taha ʻo e ngaahi founga ʻokú ne fakamafola ai ʻene tākiekina koví ko hono ʻai ke faingofua ange ʻa hono ala maʻu ʻo e ngaahi meʻa fakalieliá ʻi he TV, ʻinitanetí, vitioó, pea ʻi he ngaahi tohi ʻoku pulusí. Kuo fakaʻatā ʻe he kau Kalisitiane ʻe niʻihi ʻa e kona ko ení ke hūhū atu ʻi heʻenau ngaahi meʻa maluʻi kuo ngāvaivaí, pea kuo taki atu ia ki he mole ʻo e ngaahi monū ʻi he fakatahaʻangá pe naʻa mo e ngaahi nunuʻa kovi ange. (Efeso 4:​17-19) Ko e hā ʻa e faitoʻo ki he huhu kona fakalaumālie ʻa Sētané? Kuo pau ke ʻoua naʻa fakaliʻeliʻaki ʻetau ako Tohitapu tuʻumaʻu fakafoʻituituí, ko ʻetau ngaahi fakataha faka-Kalisitiané, pea mo e teunga tau kakato mei he ʻOtuá. ʻI hono fakatahaʻí, ʻoku ʻomi ʻe he ngaahi meʻá ni kia kitautolu ʻa e malava ke fakafaikehekeheʻi ʻa e tonú mei he halá pea ke fehiʻa ki he meʻa ʻoku fehiʻa ki ai ʻa e ʻOtuá.​—Sāme 97:10; Loma 12:9.

18. ʻE lava fēfē ʻe he “heletā ʻa e Laumalie” ke ne tokoniʻi kitautolu ʻi heʻetau faitau fakalaumālié?

¹⁸ Kapau te tau tauhi maʻu ʻetau tōʻonga ako Tohitapu tuʻumaʻú, ʻe ʻikai ngata pē ʻi heʻetau maʻu ʻa e maluʻi mālohi ʻoku tokonaki mai ʻe heʻetau ʻiloʻi totonu ʻa e Folofola ʻa e ʻOtuá kae pehē foki ki he faitau ola lelei ʻaki ʻa e “heletā ʻa e Laumalie,  ʻa ia ko e Folofola ʻa e ʻOtua.” Ko e folofola ʻa e ʻOtuá ʻoku “masila ange ʻi he heleta fakatoumata fuape; ʻo ne ʻasi atu ʻo māioioʻi ʻa e loto mo e laumalie, ʻio, hono ngaahi hokonga mo e uho; pea ʻoku ne vavangaʻi ʻa e ngaahi holi mo e fakakaukau ʻo e loto.” (Efeso 6:17; Hepelu 4:12) Kapau te tau hoko ʻo pōtoʻi ʻi hono ngāueʻaki ʻa e “heleta” ko iá, ko e taimi leva te tau fehangahangai ai mo e ngaahi ʻahiʻahí, ʻe lava ke tau ʻiloʻi lelei ʻa e meʻa ʻoku hā ngali ʻikai fakatuʻutāmaki, pe naʻa mo ʻene fakamānakó, pea fakaeʻa ia ko ha tauhele fakatupu mate ʻa e tokotaha koví. Ko ʻetau feleoko ko ia ʻo e ʻiloʻi mo e mahinoʻi ʻo e Tohitapú ʻe tokoni ia kia kitautolu ke talitekeʻi ʻa e meʻa ʻoku koví pea fai ʻa e meʻa ʻoku leleí. Ko ia ʻoku fiemaʻu ke tau ʻeke hifo kia kitautolu kotoa: ‘ʻOku māsila ʻeku heletaá, pe ʻoku peku? ʻOku ou fiu fakamanamanatu ʻa e ngaahi konga Tohitapu ʻoku lava ke ne fakaivimālohiʻi ʻa e faitaú?’ Tau tauhi maʻu ʻetau ngaahi tōʻonga lelei ko ia ʻo e ako Tohitapu fakafoʻituituí pea talitekeʻi ai ʻa e Tēvoló.​—Efeso 4:​22-24.

19. Ko e hā ʻa e ngaahi ʻaonga ʻe lava ke ʻatautolu kapau te tau faivelenga ʻi he ako fakafoʻituituí?

¹⁹ Naʻe tohi ʻe Paula: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.” Kapau te tau tokanga lahi ki heʻene ngaahi lea ʻa Paula kia Tīmoté, ʻe lava ke tau fakaivimālohiʻi ai hotau tuʻunga fakalaumālié pea ʻe lava ke tau ʻai ai ʻetau ngāue fakafaifekaú ke toe ola lelei ange. Ko e kau mātuʻa mo e kau sevāniti fakafaifekau ʻoku fakalaumālié ʻe lava ke nau hoko ko ha ʻaonga lahi ange ki he fakatahaʻangá, pea ʻe lava ke tau mālohi tuʻumaʻu kotoa ai ʻi he tuí.​—2 Timote 3:​16, 17; Mātiu 7:​24-27.

[Fakamatala ʻi lalo]

ʻOkú Ke Manatuʻi?

• Ko e hā ʻa e ngaahi tuʻunga ʻoku tokoni ki he ako fakafoʻituitui ola leleí?

• Ko e hā ʻa e fehālaaki ʻoku fai ʻe he ngaahi liliu Tohitapu lahi fekauʻaki mo e huafa ʻo e ʻOtuá?

• Ko e hā ʻa e ngaahi konga Tohitapu te ke fakahalaʻiʻaki ʻa e akonaki ʻo e Tolu-Tahaʻi-ʻOtuá?

• Ko e hā kuo pau ke tau fai ke maluʻi kitautolu mei he ngaahi fāliunga ʻa Sētané, neongo kapau kuo tau hoko ko e kau Kalisitiane moʻoni ʻi ha ngaahi taʻu lahi?

[Fehuʻi ki he Ako]

[Fakatātā ʻi he peesi 19]

Ki ha ako fakafoʻituitui ola lelei, ʻoku fiemaʻu kiate koe ʻa e feituʻu totonu pea siʻi ʻa e fakahohaʻá

[Fakatātā ʻi he peesi 23]

ʻOku māsila pe ʻoku peku hoʻo “heletā”?