Meʻa Naʻe Manatuʻi ʻe Siosiuá

“KO Mosese ko ʻeku sevaniti kuo pekia,” ko e folofola ia ʻa Sihová, “pea ko e ni ke ke tuʻu koe ʻo ʻalu ki he kauvai ʻe taha ʻo Sioatani na, ʻakoe mo e kakai ni katoa, ʻo aʻu ki he fonua ʻa ia ʻoku ou foaki ni kiate kinautolu.” (Siosiua 1:2) Ko ha ngāue faingataʻa moʻoni ia naʻe tuku kia Siosiuá! Naʻá ne hoko ko e tauhi kia Mōsese ʻi he meimei taʻu ʻe 40. Naʻe tala eni ke ne toʻo ʻa e fatongia ʻo hono pulé pea tataki ʻa e fānau toutou ongongataʻa ʻa ʻIsilelí ki he Fonua ʻo e Talaʻofá.

ʻI he fakakaukau ʻa Siosiua ki he meʻa naʻe tuʻu mei muʻá, naʻe felēleaki nai ʻi hono ʻatamaí ʻa e ngaahi ʻahiʻahi naʻá ne ʻosi fetaulaki mo ia peá ne ikuʻí. Ko e ngaahi meʻa ne manatuʻi ʻe Siosiuá naʻe ʻikai ha veiveiua ko ha tokoni taʻehanotatau ia kiate ia ʻi he taimi ko iá, pea ʻe lava ke hoko ia ki he kau Kalisitiane he ʻaho ní.

Mei he Pōpulá ki he Pule

Ko e ngaahi taʻu lōloa ʻo e nofo pōpulá naʻe hoko ko e konga ia ʻo e ngaahi manatu ʻa Siosiuá. (Ekisoto 1:​13, 14; 2:​23) Pe ko e hā ʻa e meʻa tonu naʻe hokosia ʻe Siosiua lolotonga ʻa e vahaʻa taimi ko iá, ʻe lava pē ke tau toki fakaʻuta atu ki ai, koeʻuhi ʻoku ʻikai ke fakaikiiki mai ia ʻe he Tohitapú. Naʻe ako nai ʻa Siosiua ke hoko ko ha tokotaha fokotuʻutuʻu lelei lolotonga ʻene ngāue ʻi ʻIsipité, pea naʻe lava ke ne tokoni ʻi hono fokotuʻutuʻu ʻa e hola ʻa e kau Hepeluú pea mo e “kakai kehe toko lahi” mei he fonua ko iá.—Ekisoto 12:​38, PM.

Naʻe kau ʻa Siosiua ki ha fāmili ʻo e matakali ʻo ʻIfalemí. Ko ʻene kui-tangatá ko ʻElisama ʻa e ʻeiki ʻo e matakalí pea ʻoku ngalingali naʻá ne taki ʻa e kau tangata tau ʻe toko 108,100 ʻi he taha ʻo e ngaahi vāhenga matakali ʻe tolu ʻo ʻIsilelí. (Nomipa 1:​4, 10, 16; 2:​18-​24; 1 Kalonikali 7:​20, 26, 27) Neongo ia, ʻi he taimi naʻe ʻohofi ai ʻe he kau ʻAmalekí ʻa ʻIsileli ʻi he hili pē ʻa e mavahe  ʻa ʻIsileli mei ʻIsipité, naʻe fiemaʻu ai ʻe Mōsese ʻa Siosiua ke ne fokotuʻutuʻu ʻa e maluʻí. (Ekisoto 17:​8, 9a) Hangē ko ení, ko e hā naʻe fiemaʻu ai ʻa Siosiua kae ʻikai ko ʻene kui-tangatá pe ko ʻene tamaí? Ko e fakakaukau eni ʻe taha: “ʻI he tuʻunga ko ha ʻeiki ʻo e matakali mahuʻinga ʻo ʻIfalemí, pea ko e tokotaha ne ʻosi ʻiloʻi lelei ʻi heʻene pōtoʻi ʻi he fai fokotuʻutuʻú, pea ko e taha naʻe falala kakato ki ai ʻa e kakaí, naʻe hanga ʻa Mōsese kia [Siosiua] ko e taki lelei taha ia naʻe feʻungamālie ke ne fili pea fokotuʻutuʻu ʻa e kau sōtiá.”

Tatau ai pē pe ko e hā ʻa e ʻuhingá, ʻi hono filí, naʻe fai ʻe Siosiua ʻa e meʻa tofu pē ko ia naʻe tuʻutuʻuni ʻe Mōsesé. Neongo naʻe taʻetaukei fakaʻaufuli ʻa ʻIsileli ʻi he taú, naʻe tuipau ʻa Siosiua ki he tokoni fakaʻotuá. Ko ia, ʻi hono tala ange ʻe Mōsese kiate ia, “pongipongi hake te u tuʻu au ʻi he tumutumu ʻo e moʻunga mo e tokotoko ʻo Elohimi ʻi hoku nima,” naʻe ʻosi feʻungaʻānoa pē ia. Kuo pau pē naʻe manatuʻi ʻe Siosiua ko e toki ʻosi pē ia hono fakaʻauhamālie ʻe Sihova ʻa e mālohi fakakautau lahi taha ʻo e ʻaho ko iá. ʻI he ʻaho hoko maí, ʻi hono hiki hake ʻe Mōsese hono nimá ʻo pukepuke ʻi ʻolunga kae ʻoua kuo tō ʻa e laʻaá, naʻe ʻikai ha fili ʻe lava ke tuʻu ki ʻIsileli, pea naʻe ikunaʻi ʻa e kau ʻAmalekí. Naʻe fekau leva ʻe Sihova kia Mōsese ke ne hiki ʻi ha tohi pea ‘lau ʻi he ongo telinga ʻo Siōsiuá’ ʻa e tuʻutuʻuni fakaʻotua: “Te u matuʻaki tamateʻi ʻa e manatu kia Amaleki mei he lalo langi.” (Ekisoto 17:9e-14) ʻIo, ʻe fakahoko taʻealatuku ʻe Sihova ʻa e tautea ko iá.

Tuʻunga ko e Tauhi ʻo Mōsesé

Ko e meʻa naʻe hoko ki ʻAmalekí kuo pau pē naʻá ne fokotuʻu ha vahaʻangatae toe ofi ange ʻi he vahaʻa ʻo Siosiua mo Mōsesé. Naʻe maʻu ʻe Siosiua ʻa e lāngilangi ʻo e hoko ko e tauhi fakafoʻituitui ʻo Mōsese, pe “tamaioeiki,” ‘i he ene talavoú’ ʻo aʻu ki he mate ʻa Mōsesé, ko ha vahaʻa taimi ʻo e taʻu nai ʻe 40.—Nomipa 11:​28, PM.

Ko e tuʻunga ko iá naʻe ʻuhingá ko e ngaahi monū mo e ngaahi fatongia. Ko e fakatātaá, ʻi he taimi naʻe ʻalu hake ai ʻa Mōsese, ʻĒlone, ngaahi foha ʻo ʻĒloné, mo e kau tangata taʻumotuʻa ʻe toko 70 ʻo ʻIsilelí ki he Moʻunga Sainaí pea sio ai ki ha vīsone ʻo e lāngilangi ʻo Sihová, hangehangē naʻe ʻi ai ʻa Siosiua ʻi honau haʻohaʻongá. ʻI hono ngafa ko e tokotaha tauhí, naʻá ne fakafeʻao ʻa Mōsese ʻo māʻolunga hake ʻi he moʻungá pea ngalingali naʻá ne nofo ai ʻi ha tuʻunga mamaʻo lolotonga ʻa e hū ʻa Mōsese ki he konga ʻao naʻá ne fakatātaaʻi ʻa e ʻi ai ʻa Sihová. ʻOku taau ke fakatokangaʻi, ʻoku hā ngali naʻe nofo ʻa Siosiua ʻi he moʻungá ʻo feʻunga mo e ʻaho ʻe 40 mo e pō ʻe 40. Naʻá ne tatali loto-tōnunga ki he foki mai ʻa hono pulé, he ʻi he kamata ke hifo ʻa Mōsese mo e ongo maka ʻo e Fakamoʻoní, naʻe ʻi ai ʻa Siosiua ke fakafetaulaki kiate ia.​—Ekisoto 24:​1, 2, 9-​18; 32:​15-​17.

Hili ʻa e meʻa naʻe hoko ʻi he lotu ʻaitoli ʻa ʻIsileli ʻaki ʻa e kiʻi pulu koulá, naʻe hoko atu ʻa Siosiua ʻi hono tauhi ʻa Mōsesé ʻi he tēniti feʻiloakiʻangá ʻi he tuʻa ʻapitangá. Naʻe folofola mata-ki-he-mata ai  ʻa Sihova kia Mōsese. Ka ʻi he foki ʻa Mōsese ki he ʻapitangá, ko Siosiua “naʻe ʻikai mahuʻi ia mei he Teniti.” Mahalo pē ko ʻene ʻi aí naʻe fiemaʻu ai ke taʻofi ʻa e kau ʻIsilelí mei he hū ki he tēnití ʻi honau tuʻunga taʻemaʻá. He fakamātoato moʻoni ē ko hono fua ʻe Siosiua ʻa e fatongia ko iá!—Ekisoto 33:​7, 11.

Ko e feohi mo Mōsesé, ʻa ia, ʻi he fakatatau ki he faihisitōlia ko Siosifasí, naʻá ne motuʻa ange ʻaki ʻa e taʻu ʻe 35 ʻia Siosiuá, kuo pau pē naʻá ne ʻai ke mālohi lahi fau ʻa e tui ʻa Siosiuá. Ko hona vahaʻangataé naʻe ui ia “ko e fetuʻutaki ʻa e matuʻotuʻá mo e talavoú, ʻa e pulé mo e tokotaha akó,” ʻo iku ai ki he hoko ʻa Siosiua “ko ha tangata loto-maʻu, mo falalaʻanga.” ʻOku ʻikai te tau maʻu ha kau palōfita hangē ko Mōsesé he ʻahó ni ʻi hotau lotolotongá, ka ko e ngaahi fakatahaʻanga ʻo e kakai ʻa Sihová ʻoku kau ai ʻa e faʻahinga taʻumotuʻa ʻa ia koeʻuhi ko ʻenau taukeí mo e tuʻunga fakalaumālié, ʻoku nau ʻomai ai ha matavai moʻoni ʻo e mālohi mo e fakalototoʻa. ʻOkú ke fakahoungaʻi kinautolu? Pea ʻokú ke maʻu ʻaonga ʻi he feohi mo kinautolú?

Ko ha Asiasi ki Kēnani

Ko ha taimi faingataʻa ʻi he moʻui ʻa Siosiuá naʻe hoko ia ʻi he taimi nounou hili hono maʻu ʻe ʻIsileli ʻa e Laó. Naʻe fili ia ke ne fakafofongaʻi ʻa hono matakalí ʻi he asiasi ki he Fonua ʻo e Talaʻofá. ʻOku ʻiloa ʻa e talanoá ni. Naʻe loto-tatau ʻa e kau asiasi kotoa ʻe toko 12 ko e moʻoni ko e fonuá naʻe “mahutafea ʻi he huʻakau mo e honi,” ʻo hangē tofu pē ko ia ne talaʻofa ʻe Sihová. Kae kehe, naʻe ilifia ʻi he taʻetui ʻa e toko hongofulu ʻo pehē ʻe ʻikai lava ke kapusi ʻe ʻIsileli ʻa e kau nofo ʻi he fonuá. Ko Siosiua pē mo Kēlepi naʻá na fakaʻaiʻai ʻa e kakaí ke ʻoua ʻe angatuʻu ʻi he manavaheé, he ʻe kau moʻoni ʻa Sihova mo kinautolu. ʻI he meʻa ko iá, naʻe fakafepaki kotoa ʻa e fakatahá ʻo lau fekauʻaki mo hano tolomakaʻi ʻa e toko uá ni. Mahalo pē ne nau mei fai ia kapau naʻe ʻikai ke kau mai ʻa Sihova fakataha mo hano fakahāhā ʻa hono lāngilangí. Koeʻuhi ko ʻenau taʻetuí, naʻe tuʻutuʻuni ai ʻa e ʻOtuá ʻo pehē ʻe ʻikai ha taha ʻi he faʻahinga naʻe lēsisita ʻi ʻIsileli mei he taʻu 20 ʻo fai ki ʻolunga, ʻe moʻui ke hū ki Kēnani. ʻI he faʻahingá ni, ko Siosiua pē mo Kēlepi, pea mo e kau Līvaí naʻe hao moʻuí.—Nomipa 13:​1-​16, 25-​29; 14:​6-​10, 26-​30.

ʻIkai ne mamata kotoa ʻa e kakaí ki he ngaahi ngāue māfimafi ʻa Sihova ʻi ʻIsipité? Ko e hā leva naʻá ne ʻai ke malava ʻa Siosiua ʻo tui ki he tokoni ʻa e ʻOtuá lolotonga ia naʻe veiveiua ʻa e tokolahi tahá? Kuo pau pē naʻe manatuʻi lelei ʻe Siosiua ʻa e meʻa kotoa ne talaʻofaʻaki mo fai ʻe Sihová, pea naʻá ne fakalaulauloto fekauʻaki mo ia. ʻI he ngaahi taʻu ki muí naʻe lava ai ke ne pehē ‘kuo ʻikai to kelekele ha momoʻi meʻa ʻe taha ʻi he ngaahi lelei fuape naʻe talaʻofa ʻe Sihova ki he kau ʻIsilelí; kuo hoko kotoa pe.’ (Siosiua 23:14) Ko ia naʻe maʻu ʻe Siosiua ʻa e tui ko e ngaahi talaʻofa fua pē naʻe fai ʻe Sihova fekauʻaki mo e kahaʻú ʻe toe fakahoko moʻoni mo ia. (Hepelu 11:6) ʻOku totonu ke ueʻi ʻe he meʻá ni ha tokotaha ke ne ʻeke: ‘Fēfē au? Kuo hoko ʻa e feinga kuó u līʻoa ki hono ako mo fakalaulauloto ki he ngaahi talaʻofa ʻa Sihová ʻo fakatuipauʻi kiate au ʻa ʻenau alafalalaʻangá? ʻOku ou tui ʻe lava ke maluʻi au ʻe he ʻOtuá fakataha mo ʻene kakaí lolotonga ʻa e mamahi lahi ka hoko maí?’

Naʻe ʻikai ngata pē ʻi hono ngāueʻi ʻe Siosiua ʻa e tuí ka naʻá ne toe fakahāhā ʻa e loto-toʻa ke fai ʻa e meʻa ʻoku totonú. Ko ia pē mo Kēlepi naʻá na tuʻú, pea ko e kotoa ʻo e fakatahá naʻa nau lau fekauʻaki mo hano tolomakaʻi kinaua. Naʻá ke mei ongoʻi fēfē? Tailiili? Naʻe ʻikai pehē ʻa Siosiua. Ko ia mo Kēlepí naʻá na leaʻaki mālohi ʻa e meʻa naʻá na tui ki aí. Ko e mateaki kia Sihová ʻe fiemaʻu nai ai ke tau fai ʻa e meʻa tatau ʻi ha taimi.

Ko e talanoa ki he kau asiasí ʻoku toe fakahaaʻi mai ai kia kitautolu naʻe liliu ʻa e hingoa ʻo Siosiuá. Ki hono muʻaki hingoá, ko e Hōsea, ko hono ʻuhingá ko e “Fakamoʻui,” naʻe tānaki atu ki ai ʻe Mōsese ʻa e silapa naʻe fakahaaʻi ai ʻa e huafa fakaʻotuá ʻo ui ia ko Sihōsiua, pe Siosiua—ko “Sihova ʻa e Fakamoʻuí.” ʻOku fakalea ʻe he Septuagint hono hingoá ko “Sīsū.” (Nomipa 13:​8, 16) ʻI he moʻoni ʻa e hingoa lahi ko iá, naʻe talaki loto-toʻa ʻe Siosiua ko Sihova ʻa e fakamoʻuí. Ko e liliu ʻo e hingoa ʻo Siosiuá naʻe ʻikai lava ke fai noaʻia ia. Naʻe tapua mei ai ʻa e fakamāʻolungaʻi ʻe Mōsese ʻa e anga ʻo Siosiuá pea mo ʻene fehoanaki mo e ngafa monūʻia ʻe fakahoko ʻe Siosiua ʻi hono tataki atu ha toʻutangata foʻou ki he Fonua ʻo e Talaʻofá.

ʻI he mate ʻenau ngaahi tamaí, naʻe fononga holo ʻa e kau ʻIsilelí ʻi he toafá ʻi he taʻu fakaongosia ʻe 40. ʻOku ʻikai te tau ʻiloʻi ha meʻa fekauʻaki mo Siosiua lolotonga ʻa e vahaʻa taimi ko iá. Kae kehe, kuo pau pē naʻe akoʻi ai kiate ia ʻa e meʻa lahi. Ngalingali naʻá ne sio tonu ai ʻi he fakamaau ʻa e  ʻOtuá ki he kau angatuʻu ko Kola, Tētani, mo ʻApilamí pea ki honau kau muimuí mo e faʻahinga naʻa nau kau ʻi he lotu ololalo kia Pēali-Pēolí. ʻOku ʻikai ha veiveiua naʻe ʻiloʻi ʻe Siosiua fakataha mo e loto-mamahi lahi koeʻuhi ko e ʻikai lava ke fakamāʻoniʻoniʻi ʻe Mōsese ʻa Sihova, ʻi he fekauʻaki mo e vai ʻo Mēlipá, ko Mōsese ʻe taʻofi mo ia foki mei he fonua ʻo e talaʻofá.​—Nomipa 16:​1-​50; 20:​9-​13; 25:​1-9.

Fakanofo ko e Fetongi ʻo Mōsese

ʻI he ofi ke mate ʻa Mōsesé, naʻá ne kole ai ki he ʻOtuá ke fakanofo hano fetongi koeʻuhí ke ʻoua ʻe hoko ai ʻa ʻIsileli “ʻo hange ha fanga sipi ʻoku ʻikai hanau tauhi.” Ko e hā ʻa e tali ʻa Sihová? Ko Siosiua, “ko e tangata ʻoku Laumalieʻia,” ke fakanofo ia ʻi he ʻao ʻo e fakatahá kotoa. Naʻe pau ke nau fanongo kiate ia. Ko ha fakaongoongolelei moʻoni ē! Naʻe ʻafioʻi ʻe Sihova ʻa e tui mo e malava ʻa Siosiuá. Ko e taki ʻo ʻIsilelí naʻe ʻikai lava ke tuku ia ki ha tokotaha ʻe toe taau ange. (Nomipa 27:​15-20) Neongo ia, naʻe ʻiloʻi ʻe Mōsese naʻe fehangahangai ʻa Siosiua mo e ngaahi pole lahi fakaʻulia. Ko ia naʻe fakaʻaiʻai ai ʻe Mōsese ʻa hono fetongí ke hoko ʻo “loto toʻa, mo tuʻu kalikali,” he ʻe hokohoko atu ʻa e kau mo ia ʻa Sihová.—Teutalonome 31:​7, 8.

Ko e ʻOtuá tonu naʻá ne toe fai ʻa e fakalototoʻa tatau kia Siosiua ʻo ne tānaki atu: “Tokanga ke fai ki hono kotoa ʻo e lao, ʻa ia naʻe tuʻutuʻuni atu ʻe Mosese ko ʻeku sevaniti: ʻoua te ke afe mei ai ki he toʻomataʻu pe ki he toʻohema, koeʻuhi ke ke fai fakapotopoto ʻi he meʻa kotoa pe te ke ʻalu ki ai. ʻE ʻikai mahuʻi mei ho ngutu ʻa e tohi lao ko ia, ka te ke fakalaulauloto ki ai ʻi he ʻaho mo e po, koeʻuhi ke ke tokanga ke fai ʻo hange ko e meʻa kotoa kuo tohi ai; he te ke toki monuʻia ʻi he meʻa ʻoku ke fou ai, pea te ke fai fakapotopoto ai. ʻIkai kuo u kouna koe? Ke ke lototoʻa, mo tuʻu kalikali; ʻoua te ke manavahe, pea ʻoua te ke tailiili; he ko Sihova ko ho ʻOtua te ne ʻiate koe ʻi he meʻa kotoa ʻoku ke ʻalu ki ai.”—Siosiua 1:​7-9.

ʻI he nofo ʻi hono telingá ʻa e ngaahi folofola ʻa Sihová fakataha mo e taukei naʻá ne ʻosi tātānakí, ʻe lava fēfē ke toe veiveiua ʻa Siosiua? Naʻe fakapapauʻi ai ʻa hono ikunaʻi ʻa e fonuá. Ko e moʻoni, ʻe malanga hake ha ngaahi faingataʻa, ʻo ʻikai siʻi hifo ia ʻi he ʻuluaki polé tonu, ko e kolosi ʻi he Vaitafe Sioataní ʻi ha tuʻunga tāfea. Neongo ia, naʻe fekau ʻe Sihova tonu: “Tuʻu koe ʻo ʻalu ki he kauvai ʻe taha ʻo Sioatani.” Ko ia ai, ko e hā ha palopalema ʻe toe lava ke hoko?—Siosiua 1:2.

Ko e ngaahi meʻa hokohoko ʻi he moʻui ʻa Siosiuá—ko e ikunaʻi ʻo Sielikoó, ko e ikunaʻi hokohoko ʻo honau ngaahi filí, pea mo hono vahevahe ʻo e fonuá—ʻoku fakahaaʻi ai naʻe ʻikai ʻaupito ngalo ʻiate ia ʻa e ngaahi talaʻofa ʻa e ʻOtuá. ʻI he ofi ki he ngataʻanga ʻo hono ngaahi ʻahó, ʻi hono ʻoange ʻe Sihova ki ʻIsileli ʻa e mālōlō mei honau ngaahi filí, naʻe fakatahatahaʻi ai ʻe Siosiua ʻa e kakaí ke fakamanatu ʻa e ngaahi feangainga ʻa e ʻOtuá mo kinautolú pea fakaʻaiʻai kinautolu ke nau tauhi ʻaufuatō kiate Ia. Ko hono olá, naʻe fakafoʻou fakamātoato ai ʻe ʻIsileli ʻa ʻene fuakava mo Sihová, pea ʻoku ʻikai ha veiveiua ʻi hono fakaʻaiʻai ʻe he faʻifaʻitakiʻanga ʻa honau takí, “naʻe tauhi kia Sihova ʻa Isileli, lolotonga ʻa e moʻui ʻa Siosiua.”—Siosiua 24:​16, 31.

ʻOku tokonaki mai ʻe Siosiua ha faʻifaʻitakiʻanga lelei ʻaupito kia kitautolu. Ko e kau Kalisitiane he ʻaho ní ʻoku nau fehangahangai mo e ngaahi ʻahiʻahi lahi ʻo e tuí. Ko e fekuki lavameʻa mo iá ʻoku mātuʻaki mahuʻinga ia ki hono tauhi maʻu ʻa e hōifua ʻa Sihová pea ʻi he fakaʻosí ki hono maʻu ʻa ʻene ngaahi talaʻofá. Ko e lavameʻa ʻa Siosiuá naʻe fakatuʻunga ia ʻi heʻene tui mālohí. Ko e moʻoni, kuo teʻeki ai te tau sio ʻi he ngaahi ngāue māfimafi ʻa e ʻOtuá ʻo hangē ko Siosiuá, ka ʻo kapau ʻe ʻi ai ha taha ʻe veiveiua, ko e tohi Tohitapu ʻoku ʻi ai ʻa e hingoa Siosiuá ʻoku tokonaki mai ai ʻa e fakamoʻoni sio tonu ki he tuʻunga falalaʻanga ʻo e folofola ʻa Sihová. Ko kitautolu, hangē ko Siosiuá, ʻoku fakapapauʻi mai ki ai ʻa e poto mo e lavameʻa kapau te tau lau fakaʻaho ʻa e Folofola ʻa e ʻOtuá pea tokanga ke ngāueʻaki ia.

ʻOkú ke mamahi he taimi ʻe niʻihi he ʻulungaanga ʻo e kaungā Kalisitiané? Fakakaukau atu ki he kātaki ʻa Siosiua lolotonga ʻa e taʻu ʻe 40 naʻe fakafatongiaʻi ai ia, ʻo ʻikai tupu ʻi haʻane fehālaaki, ke ʻalu fano holo he toafá fakataha mo e ngaahi takanga taʻetuí. ʻOkú ke ʻiloʻi ʻoku faingataʻa ke taukapoʻi ʻa e meʻa ʻokú ke tui ki aí? Manatuʻi ʻa e meʻa naʻe fai ʻe Siosiua mo Kēlepí. ʻI heʻena tuí mo e talangofuá, naʻá na maʻu ai ha pale fisifisimuʻa. ʻIo, naʻe maʻu moʻoni ʻe Siosiua ʻa e tui ʻe fakahoko ʻe Sihova ʻa e kotoa ʻo ʻene ngaahi talaʻofá. ʻOfa ke hoko kia kitautolu ʻa e meʻa tatau.​—Siosiua 23:14.

[Fakatātā ʻi he peesi 10]

Ko Siosiua mo Kēlepí naʻá na tuipau ki he mālohi ʻo Sihová

[Fakatātā ʻi he peesi 10]

Ko e feohi mo Mōsesé naʻá ne ʻai ke mālohi ʻa e tui ʻa Siosiuá

[Fakatātā ʻi he peesi 10]

Ko e tuʻunga taki ʻa Siosiuá naʻá ne fakaʻaiʻai ʻa e kakaí ke nau pipiki kia Sihova